ଭୁବନେଶ୍ୱର: ଶୁକ୍ରବାର ବସିବ ବର୍ଷର ଶେଷ ରାଜ୍ୟ କ୍ୟାବିନେଟ୍ ବୈଠକ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଭର୍ଚୁଆଲ ମୋଡ଼ରେ ବସିବ କ୍ୟାବିନେଟ ବୈଠକ । ସୂଚନା ମୁତାବକ ଅପରାହ୍ନ 12ଟା 30ରେ କ୍ୟାବିନେଟ୍ ବୈଠକ ଅନୁଷ୍ଠିତ କରାଯିବ । ଉଚ୍ଚ ଶିକ୍ଷା, ସ୍କୁଲ ଓ ଗଣଶିକ୍ଷା, ସ୍ବାସ୍ଥ୍ୟ, ପଞ୍ଚୟତିରାଜ ଓ ନଗରଉନ୍ନୟନ ଭଳି ବିଭାଗର ଏଜେଣ୍ଡାକୁ ମିଳିବ ମଞ୍ଜୁରୀ ।
ସେହିପରି ଅନୁଦାନପ୍ରାପ୍ତ ସ୍କୁଲ ଓ କଲେଜର କର୍ମଚାରୀଙ୍କୁ ସପ୍ତମ ବେତନ କମିଶନ ଦରମା ମିଳିବା ନେଇ କ୍ୟାବିନେଟର ମୋହର ମାରିବା ସମ୍ଭାବନା ରହିଛି । କିଛି ସର୍ଭିସ କ୍ୟାଡର ପୁନର୍ଗଠନକୁ ବୈଠକରେ ମଞ୍ଜୁରୀ ମିଳିବାର ମଧ୍ୟ ସମ୍ଭାବନା ରହିଛି ।
ଭୁବନେଶ୍ୱର: ୧୯୯୭ ବ୍ୟାଚ୍ର ୪ଜଣ ଆପିଏସ ଅଫିସରଙ୍କ ପଦନ୍ନୋତି ଦେଲେ ରାଜ୍ୟ ସରକାର । ଡିଏସ କୁଟ୍ଟେ, ଦିପ୍ତେଶ ପଟ୍ଟନାୟକ, ଅସିତ ପାଣିଗ୍ରାହୀ, ରେଖା ଲୋହାନୀଙ୍କୁ ଏଡିଜି ପାହ୍ୟାକୁ ପଦନ୍ନୋତି ମିଳିଛି । ଡିଏସ କୁଟ୍ଟେ ବର୍ତ୍ତମାନ ମୁଖ୍ୟମନ୍ତ୍ରୀଙ୍କ ସ୍ୱତନ୍ତ୍ର ସଚିବ ଭାବେ ଦାୟିତ୍ୱ ତୁଲାଉଛନ୍ତି । ପଦୋନ୍ନତି ପରେ ବି ସେ ସିଏମଓରେ କାର୍ଯ୍ୟ କରିବେ ।
ସେପଟେ ଦୀପ୍ତେଶ ପଟ୍ଟନାୟକ ଜେଲ ବିଭାଗର ଆଇଜି ଅଛନ୍ତି । ଏଥିସହ OSRTCର ସିଏମଡି ଦାୟିତ୍ୱ ମଧ୍ୟ ତୁଲାଉଛନ୍ତି । ଅସୀତ ପାଣିଗ୍ରାହୀ ଭିଜିଲାନ୍ସ ଆଇଜି ଅଛନ୍ତି । ଭୁବନେଶ୍ୱର-କଟକ ପୋଲିସରେ ଅତିରିକ୍ତ ପୋଲିସ କମିଶନର ଅଛନ୍ତି ରେଖା ଲୋହାନି । ଏହି ବରିଷ୍ଠ ଅଧିକାରୀ ମାନେ ପଦନ୍ନୋତି ପରେ ବି ପୂର୍ବଭଳି ନିଜ ପଦରେ ରହି କାର୍ଯ୍ୟ କରିବେ ।
ଝାରସୁଗୁଡ଼ା: ପଶ୍ଚିମ ଓଡ଼ିଶାର ଆକାଶରୁ ଅପସରି ଗଲେ କିଶୋର ମହାନ୍ତି । ଓଡ଼ିଶା ରାଜନୀତିର ପ୍ରବୀଣ ରାଜନେତା ବ୍ରଜରାଜନଗର ବିଧାୟକ କିଶୋର ମହାନ୍ତିଙ୍କ ପରଲୋକ । ଶାସକ ଦଳ ଠାରୁ ବିରୋଧି କିଶୋରଙ୍କ ଦେହାନ୍ତରେ ଶୋକ ପ୍ରକାଶ କରିଛନ୍ତି ସଭିଏଁ । ରାଜ୍ୟସରକାରଙ୍କ ନିର୍ଦ୍ଦେଶ କ୍ରମେ ଗାର୍ଡ ଅଫ ଅନର ଦିଆଯିବ । ସେପଟେ କିଶୋର ମହାନ୍ତିଙ୍କୁ ଗାର୍ଡ ଅଫ ଅନର ଦିଆଯିବା ନେଇ ସୂଚନା ଦେଇଛନ୍ତି ଜିଲ୍ଲା ପ୍ରଶାସନ ।
ଆସନ୍ତାକାଲି କିଶୋରଙ୍କ ପାର୍ଥିବ ଶରୀରକୁ ପରିବାର ଓ ସାଧାରଣ ଲୋକ ଶେଷ ଦର୍ଶନ କରିପାରିବେ । କୋଭିଡ କଟକଣା ଭିତରେ ଜାରି ରହିବ ସାଧାରଣ ଦର୍ଶନ ପ୍ରକ୍ରିୟା । ଏପରି ସ୍ଥିତିରେ ଶୋଭାଯାତ୍ରା ହେବନାହିଁ , ବ୍ରଜରାଜନଗରକୁ କେବଳ ଦର୍ଶନ ପାଇ ନିଆଯିବ, ସେହିପରି ଝାରସୁଗୁଡ଼ାରେ ଦିବଙ୍ଗତ ବିଧାୟକଙ୍କ ଶେଷକୃତ୍ୟ ସମ୍ପନ୍ନ ହେବା ନେଇ ସୂଚନା ପ୍ରଦାନ କରିଛନ୍ତି ।
ନନ୍ଦିଘୋଷ ବ୍ୟୁରୋ: ୨୦୨୧ ସୋସିଆଲ ମିଡିଆ ଓ ଟେକ୍ନୋଲୋଜି କ୍ଷେତ୍ରରେ ଏକ ଘଟଣା ବହୁଳ ବର୍ଷ ଥିଲା । ଫେସବୁକଠାରୁ ଆରମ୍ଭ କରି ଟ୍ୱିଟର ପର୍ଯ୍ୟନ୍ତ ସବୁଠାରେ ଦେଖିବାକୁ ମିଳିଥିଲା କିଛି ନା କିଛି ପରିବର୍ତ୍ତନ । ଏପରି ପରିବର୍ତ୍ତନକୁ ନେଇ ସବୁଠାରୁ ଅଧିକ ଚର୍ଚ୍ଚାରେ ଥିଲା ଫେସବୁକ୍ । ୧୭ ବର୍ଷର ବିଜୟ ଯାତ୍ରା ପରେ ନାମ ପରିବର୍ତ୍ତନ କରିଥିଲା ଏହି ବହୁଳ ବ୍ୟବହୃତ ସୋସିଆଲ ମିଡ଼ିଆ ଫେସବୁକ । ଆସିଥିଲା ନୂଆ ନାଁ ‘ମେଟା’।
ସୋସିଆଲ ମିଡିଆ ପ୍ଲାଟଫର୍ମର ବାଦଶାହା ‘ଫେସବୁକ’ । ବିଶ୍ୱରେ ସର୍ବାଧିକ ଲୋକପ୍ରିୟ ସାମାଜିକ ଗଣମାଧ୍ୟମ କମ୍ପାନୀ ମଧ୍ୟରେ ଅନ୍ୟତମ ଫେସବୁକ । ବିଶ୍ୱରେ ମୋଟ ୨.୮୯ ବିଲିୟନ ୟୁଜର୍ସ ଫେସବୁକ ବ୍ୟବହାର କରୁଛନ୍ତି । କେବଳ ଭାରତରେ ଫେସବୁକ ବ୍ୟବହାରକାରୀଙ୍କ ସଂଖ୍ୟା ୪୧ କୋଟି । ୪ ଜାନୁଆରୀ ୨୦୦୪ରେ ମାର୍କ ଜୁକରବର୍ଗଙ୍କ ଦ୍ୱାରା ପ୍ରତିଷ୍ଠା ହୋଇଥିବା ଏହି କମ୍ପାନୀ ଏବେ ବିଶ୍ୱରେ ପ୍ରମୁଖ ସାମାଜିକ ଗଣମାଧ୍ୟମ ହୋଇପାରିଛି । ଏହି ୧୭ ବର୍ଷ ଅପ୍ରତିଦ୍ୱନ୍ଦ୍ୱୀ ଭାବେ ରାଜୁତି କରିବା ପରେ ୨୦୨୧ରେ ନାଁ ବଦଳାଇଛି କମ୍ପାନୀ । ସୋସିଆଲ ମିଡିଆ ପ୍ଲାଟଫର୍ମ ଫେସବୁକ ଏବେ ’ମେଟା’ ନାଁରେ ଲୋକଙ୍କ ପାଖରେ ପହଞ୍ଚିଛି । ଫେସବୁକ ମୂଳ କମ୍ପାନୀର ନାଁ ପରିବର୍ତ୍ତନ ନେଇ ଘୋଷଣା କରିଥିଲେ ଫେସବୁକ କମ୍ପାନୀର ସିଇଓ ମାର୍କ ଜୁକରବର୍ଗ । ମୂଳ କମ୍ପାନୀର ନାଁ ବଦଳୁଥିଲେ ମଧ୍ୟ ଏକକ ବ୍ରାଣ୍ଡ ଫେସବୁକ୍, ଇନଷ୍ଟାଗ୍ରାମ୍, ହ୍ୱାଟସଆପର ନାଁ ଅପରିବର୍ତ୍ତିତ ରହିବ ।
’ମେଟା’ ନାଁର ଉଦ୍ଦେଶ୍ୟ କ’ଣ?
ଫେସବୁକ ନାଁ ପରିବର୍ତ୍ତନ ପୂର୍ବରୁ ବିଗତ କିଛିଦିନ ଧରି ଫେସବୁକ ନୂଆ ନାଁ ସହ ରିବ୍ରାଣ୍ଡ୍ କରିବ ବୋଲି ରିପୋର୍ଟ ଆସୁଥିଲା । ଏହି ସୋସିଆଲ ମିଡିଆ ପ୍ଲାଟଫର୍ମ ମେଟାଭର୍ସ କରିବା ପାଇଁ ଫୋକସ କରୁଥିଲା । ଯାହା ମୂଳତଃ ଏକ ଅନଲାଇନ ଦୁନିଆ, ଯେଉଁଥିରେ ୟୁଜର ଭର୍ଚ୍ୟୁଆଲ ପରିବେଶରେ ଭିନ୍ନ ଭିନ୍ନ ଟୁଲ୍ସର ବ୍ୟବହାର କରିପାରିବେ ।
ମାର୍କ ଜୁକରବର୍ଗ ଘୋଷଣା କରି କହିଥିଲେ କମ୍ପାନୀ କେବଳ ଏକ ସୋସିଆଲ ମିଡିଆ କମ୍ପାନୀରୁ ଆଗକୁ ବଢି ମେଟାଭର୍ସ କମ୍ପାନୀ ହେବ । ଏହା ଆମ୍ବାଇଟେଡ୍ ଇଣ୍ଟରନେଟ୍ ଉପରେ କାମ କରିବ । ଯେଉଁଥିରେ ଭର୍ଚ୍ୟୁଆଲ ଦୁନିଆରେ ପରସ୍ପର ସହ ଅଧିକ ଭଲ ଭାବେ ଯୋଡି ହୋଇପାରିବେ । ସାରା ବିଶ୍ୱର ଲୋକଙ୍କୁ ଡିଜିଟାଲ କ୍ଷେତ୍ରରେ ଏକତ୍ର କରିବା ପାଇଁ ପ୍ରୟାସ କରିବାକୁ ଏଭଳି କରାଯାଇଥିବା ଜୁକରବର୍ଗ କହିଥିଲେ । ପୁଣି ଥରେ ଏହାର ରି-ବ୍ୟାଣ୍ଡିଂ ସହ ବହୁ ସମୟରେ ଆସୁଥିବା କପି ରାଇଟ୍ ସମସ୍ୟାକୁ ଏଡ଼ାଇବାକୁ ଏପରି କରାଯାଇଥିବା ଜଣାପଡ଼ିଥିଲା ।
କମ୍ପାନୀର ପୂର୍ବତନ ସିଭିକ୍ ଇଣ୍ଟିଗ୍ରିଟି ଚିଫ୍ ସମୀଥ ଚକ୍ରବର୍ତ୍ତୀ କମ୍ପାନୀର ନୂଆ ନାଁ ’ମେଟା’ ରଖିବା ପାଇଁ ପ୍ରସ୍ତାବ ଦେଇଥିଲେ । ଏହା ପୂର୍ବରୁ ୨୦୦୪ରେ ଯେତେବେଳେ ଫେସବୁକ ପ୍ରତିଷ୍ଠା ହୋଇଥିଲା ଏହାର ନାଁ ‘ଦି ଫେସବୁକ’ ରହିଥିଲା । କିନ୍ତୁ ୨୦୦୫ ମସିହାରେ ଏହାର ନାମ ପରିବର୍ତ୍ତନ କରି କେବଳ ଫେସବୁକ ରଖାଯାଇଥିଲା ।
ଫେସବୁକ୍ ପ୍ଲାଟଫର୍ମକୁ କେତେକ ନ୍ୟସ୍ତସ୍ୱାର୍ଥ୍ୟ ବ୍ୟକ୍ତି ମନ୍ଦ ଉଦ୍ଦେଶ୍ୟରେ ଲଗାଇବା, ଫେକ୍ ନ୍ୟୁଜ୍ ପ୍ରସାରଣ ହେବା ସହ ବିଭିନ୍ନ ରାଷ୍ଟ୍ରର ରାଜନେତାମାନଙ୍କ ସମାଲୋଚନା ପରେ ଫେସବୁକ୍ ଏହି ନିଷ୍ପତ୍ତି ନେଇଥିଲା । ଆଗାମୀ ୫ ବର୍ଷରେ ଫେସବୁକ ଏକ ‘ମେଟାଭର୍ସ କମ୍ପାନୀ ହେବାକୁ ଯାଉଥିବା ଜୁକରବର୍ଗ କହିଥିଲେ। ମେଟାଭର୍ସ ଯୋଜନାର ଏକ ଅଂଶ ଭାବେ ସେ କମ୍ପାନୀର ରିବ୍ରାଣ୍ଡିଂ କରି ଏପରି ନାଁ ରଖିଥିବା କହିଥିଲେ ସିଇଓ ମାର୍କ ଜୁକରବର୍ଗ ।
ଭୁବନେଶ୍ୱର: ନୂଆବର୍ଷରେ ଫେରିଲା କରୋନା କଟକଣା । ଜାନୁଆରୀ ୧ ତାରିଖରୁ ଫେବ୍ରୀଆରୀ ୧ ତାରିଖ ପର୍ଯ୍ୟନ୍ତ ଜାରି ରହିବ କୋଭଡ଼ ନିର୍ଦ୍ଦେଶାବଳୀ ଅନୁପାଳନ । ରାଜ୍ୟ ସରକାରଙ୍କ ପକ୍ଷରୁ ପ୍ରକାଶ ପାଇଥିବା କୋଭିଡ ଗାଇଡଲାଇନ ଅନୁଯାୟୀ, ରାତି ୧୦ଟାରୁ ଭୋର ୫ଟା ଯାଏ ସହରାଞ୍ଚଳରେ ନାଇଟ୍ କର୍ଫ୍ୟୁ ଜାରି ରହିବ । ଭୋର ୫ଟାରରୁ ରାତି ୧୦ ଯାଏ ଦୋକାନ ବଜାର ଖୋଲା ରହିବ । ସମସ୍ତ ସାମାଜିକ ଓ ଧାର୍ମିକ ସମ୍ମିଳନୀ ଉପରେ ରୋକ୍ । ସେହିପରି୧୦୦ ଲୋକଙ୍କ ମଧ୍ୟରେ ରାଜନୈତିକ କାର୍ଯ୍ୟକ୍ରମ ସୀମିତ ରହିବ ।
ସେହିପରି ପ୍ରଦର୍ଶନୀ ଓ ବାଣିଜ୍ୟ ମେଳା, ପାର୍କ, ନେଚରକ୍ଲବ, ବେଳାଭୂମି ଓ ପର୍ଯ୍ୟଟନସ୍ଥଳୀରେ ଭୋଜିଭାତ ଆଦି ନିଷେଧ ରହିବ । କେବଳ ସରକାରୀ ଅନୁମୋଦିତ କାର୍ଯ୍ୟକ୍ରମକୁ ଅନୁମତି ମିଳିଛି । ହୋଟେଲ ଓ ଅନ୍ୟ ପ୍ରତିଷ୍ଠାନରେ ସାଂସ୍କୃତିକ କାର୍ଯ୍ୟକ୍ରମ ମନା ରହିଛି । ଶିକ୍ଷା ଅନୁଷ୍ଠାନ ଓ ଅନ୍ୟ ପ୍ରତିଷ୍ଠାନର ବାର୍ଷିକତ୍ସୋବ ମନା, ୫୦ ପ୍ରତିଶତ ଦର୍ଶକରେ ଚାଲିପାରିବ ଅଡିଟୋରିୟମ ଓ ସମ୍ମିଳନୀ କକ୍ଷ । ୫୦ ପ୍ରତିଶତ ଦର୍ଶକରେ ଚାଲିପାରିବ ସିନେମା ହଲ୍ । ସ୍ଥାନୀୟ ପ୍ରଶାସନର ନିର୍ଦ୍ଦେଶରେ ଚାଲିପାରିବ ଖୋଲା ମଞ୍ଚ ଓ ଯାତ୍ରା । ସେପଟେ ୨୫୦ ଲୋକଙ୍କୁ ନେଇ ହୋଇପାରିବ ବିବାହ, ବ୍ରତଘର ଓ ଦଶାହ କାର୍ଯ୍ୟ ହେବା ନେଇ ନିର୍ଦ୍ଦେଶ ନାମାରେ ଉଲ୍ଲେଖ ରହିଛି ।
ଦୁବାଇ: ଅଣ୍ଡର-୧୯ ଏସିଆ କପ୍ ଫାଇନାଲରେ ଟିମ୍ ଇଣ୍ଡିଆ । ସେମିଫାଇନାଲରେ ବାଂଲାଦେଶକୁ ପରାସ୍ତ କରି ଫାଇନାଲରେ ନିଜ ସ୍ଥାନ ପକ୍କା କରିଛି ଭାରତ । ସେମିଫାଇନାଲରେ ଭାରତ ବାଂଲାଦେଶକୁ ୧୦୩ରେ ପରାସ୍ତ କରିଛି । ତେବେ ଡିସେମ୍ବର ୩୧ରେ ଅଣ୍ଡର-୧୯ ଏସିଆ କପ୍ ଫାଇନାଲରେ ଭାରତ-ଶ୍ରୀଲଙ୍କା ମୁହାଁମୁହିଁ ହେବେ । ଏହି ସେମିଫାଇନାଲ ମୁକାବିଲାରେ ଟସ୍ ଜିତି ପ୍ରଥମେ ବ୍ୟାଟିଂ ନିଷ୍ପତ୍ତି ନେଇଥିଲା ଟିମ୍ ଇଣ୍ଡିଆ । ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ଓଭରରେ ୮ ଓ୍ୱିକେଟ ହରାଇ ଭାରତ ୨୪୩ ରନ କରିଥିଲା । ଭାରତ ପକ୍ଷରୁ ଶୈକ ରସିଦ୍ ୯୦ ରନ କରିଥିଲେ । ବାଂଲାଦେଶ ପକ୍ଷରୁ ଅଧିନାୟକ ରକିବୁଲ ହାସନ ୩ ଓ୍ୱିକେଟ ଅକ୍ତିଆର କରିଥିଲେ ।
#ACC #U19AsiaCup #Final, here we come! 👏 👏
India U19 beat Bangladesh U19 by 103 runs in the semifinal and seal a place in the summit clash. 👌 👌#INDVBAN#BoysInBlue
📸 📸: ACC pic.twitter.com/CPvKNKkyfs
— BCCI (@BCCI) December 30, 2021
ସେମିଫାଇନାଲରେ ବିଜୟର ପ୍ରକୃତ ହିରୋ ଥିଲେ ଭାରତୀୟ ବୋଲର । ଭାରତୀୟ ବୋଲରଙ୍କ ଆଗରେ ଅଧିକ ସମୟ ତିଷ୍ଠି ପାରିନଥିଲେ ବାଂଲାଦେଶର ବ୍ୟାଟ୍ସମ୍ୟାନ । ଯାହା ଫଳରେ ବାଂଲାଦେଶ ମାତ୍ର ୧୪୦ ରନ କରିପାରିଥିଲା । ବାଂଲାଦେଶ ପକ୍ଷରୁ ୬ ଜଣ ବ୍ୟାଟ୍ସମ୍ୟାନ ଦୁଇ ଅଙ୍କ ଛୁଇଁ ପାରିନଥିଲେ । ଭାରତ ପକ୍ଷରୁ ରାଜବର୍ଦ୍ଦନ ହଙ୍ଗରଜେକର, ରବି କୁମାର, ରାଜ୍ ବଓ୍ୱା ଓ ଭିକି ଓ୍ୱସ୍ତଓ୍ୱାଲ ଦୁଇଟି ଲେଖାଏଁ ଓ୍ୱିକେଟ ଅକ୍ତିଆର କରିଥିବାବେଳେ ନିଶାନ୍ତ ସିନ୍ଧୁ ଓ କୈଶାଲ ତାମ୍ବେ ଗୋଟିଏ ଲେଖାଏଁ ଓ୍ୱିକେଟ ହାସଲ କରିଥିଲେ । ସେମିଫାଇନାଲରେ ବିଜୟ ପରେ ଅଣ୍ଡର-୧୯ ଏସିଆ କପ୍ ଫାଇନାଲରେ ଭାରତ ଡିସେମ୍ବର ୩୧ରେ ଶ୍ରୀଲଙ୍କାକୁ ଭେଟିବ । ଫାଇନାଲ ମ୍ୟାଚକୁ ଜିତି ଏସିଆର ବସ୍ ହେବାକୁ ଚେଷ୍ଟା କରିବ ଟିମ୍ ଇଣ୍ଡିଆ ।
ଭୁବନେଶ୍ୱର: ଅବେଳରେ ‘କିଶୋର’ ଅସ୍ତ । ରାଜନୀତି କରିବା ବୋଧ ହୁଏ ରକ୍ତରେ ଲେଖା ଥିଲା । ସେଥିପାଇଁ ଅନ୍ୟାୟ ବିରୋଧରେ ଛାତ୍ର ରାଜନୀତିରୁ ଦୃଢ ପ୍ରତିବାଦ କରିଆସୁଥିଲେ । ସେଥିପାଇଁ ସେ ଜନନେତା । ପଶ୍ଚିମ ଓଡ଼ିଶାର ଦାଦା । ୪ ଥରର ବିଧାୟକ । ଏଭଳି ସମୟରେ ହଠାତ ବ୍ରଜରାଜନଗର ବିଧାୟକଙ୍କ ବିୟୋଗକୁ କେହି ଗ୍ରହଣ କରିପାରୁ ନାହାଁନ୍ତି । ମୁଖ୍ୟମନ୍ତ୍ରୀ କିଶୋରଙ୍କ ଦେହାନ୍ତରେ ଗଭୀର ଶୋକ ପ୍ରକାଶ କରିଛନ୍ତି । ପୂର୍ବତନ ବାଚସ୍ପତି କିଶୋର ମହାନ୍ତିଙ୍କ ଆକସ୍ମିକ ବିୟୋଗରେ ମୁଖ୍ୟମନ୍ତ୍ରୀ ଦଃଖ ପ୍ରକାଶ କରିଛନ୍ତି ।
ଏକ ଶୋକବାର୍ତ୍ତାରେ ମୁଖ୍ୟମନ୍ତ୍ରୀ କହିଛନ୍ତି ଯେ ଏହି ଦୁଃଖଦ ଖବରରେ ସେ ଗଭୀର ଭାବରେ ମର୍ମାହତ ହୋଇଛନ୍ତି । ସେ ଜଣେ ଜନପ୍ରିୟ ନେତା ଭାବରେ ଦଳମତ ନିର୍ବିଶେଷରେ ସମସ୍ତଙ୍କର ପ୍ରିୟପାତ୍ର ଥିଲେ। ବାଚସ୍ପତି ଭାବେ ଉଚ୍ଚ ସଂସଦୀୟ ପରମ୍ପରା ବଜାୟ ରଖିବା ସହିତ ସବୁ ଦଳର ବିଧାୟକ ମାନଙ୍କ ସମ୍ମାନର ଅଧିକାରୀ ହୋଇପାରିଥିଲେ । ମନ୍ତ୍ରୀ ତଥା ବିଧାୟକ ଭାବରେ ଓଡିଶାର ବିକାଶ ପାଇଁ ତାଙ୍କର ଗୁରୁତ୍ବପୂର୍ଣ୍ଣ ଅବଦାନ ରହିଛି ।
ପଶ୍ଚିମ ଓଡିଶା ବିକାଶ ପରିଷଦର ଅଧ୍ୟକ୍ଷ ଭାବରେ ମଧ୍ୟ ସେ ଅନେକ ବିକାଶମୂଳକ କାର୍ଯ୍ୟକ୍ରମ ଆରମ୍ଭ କରିଥିଲେ । କିଭଳି ଭାବରେ ପଶ୍ଚିମ ଓଡ଼ିଶାର ସାମଗ୍ରିକ ବିକାଶ ହୋଇପାରିବ । କିଭଳି ଉକ୍ତ ଜିଲ୍ଲା ମାନଙ୍କର ଲୋକଙ୍କ ପାଖରେ ଆବଶ୍ୟକୀୟ ସୁବିଧା ସୁଯୋଗ ପହଁଚିପାରିବ ସେନେ ସଦା ଚେଷ୍ଟିତ ଥିଲେ । ସେହିପରି ପଶ୍ଚିମ ଓଡିଶାରେ ବିଜୁ ଜନତା ଦଳର ସାଂଗଠନିକ କାର୍ଯ୍ୟକ୍ରମକୁ ଦୃଢ ନେତୃତ୍ୱ ଦେଇଥିଲେ । ସେବା ଓ ପ୍ରତିବଦ୍ଧତା ତାଙ୍କ ବ୍ୟକ୍ତିତ୍ବର ଅନନ୍ୟ ଦିଗ ଥିଲା । ପରଲୋକଗତ ଆତ୍ମାର ସଦ୍ଗତି କାମନା କରିବା ସହିତ ମୁଖ୍ୟମନ୍ତ୍ରୀ ଶୋକସନ୍ତପ୍ତ ପରିବାରବର୍ଗଙ୍କୁ ଗଭୀର ସମବେଦନା ଜଣାଇଛନ୍ତି ।
ସେହିପରି ବାଚସ୍ପତି ସୂର୍ଯ୍ୟ ନାରାୟଣ ପାତ୍ର କିଶୋର ମହାନ୍ତିଙ୍କ ପରଲୋକାଗତ ଖବର ତାଙ୍କୁ ମର୍ମାହତ କରିଛି ବୋଲି କହିଛନ୍ତି । ଏହି ଖବର ଗ୍ରହଣ ହେଉନାହିଁ । କିଶୋର ମୋର ଜଣେ ସାନ ଭାଇ ଥିଲା । ଅନେକ ସମୟରେ ବିଭିନ୍ନ କଥା ଆଲୋଚନା କରୁଥିଲା । ନିଜ ଅଞ୍ଚଳର ବିକାଶ ପକ୍ରିୟାକୁ ନେଇ ସର୍ବଦା ବିଧାନସଭାରେ ମୁଦ୍ଦା ଉଠାଉଥିଲେ । ମୁଁ ଆଜି ଜଣେ ସାନ ଭାଇଙ୍କୁ ହରାଇଥିବା କହିଛନ୍ତି ବାଚସ୍ପତି ସୂର୍ଯ୍ୟ ନାରାୟଣ ପାତ୍ର । ସେହିପରି ବରିଷ୍ଠ ନେତା ପ୍ରଶନ୍ନ ଆଚାର୍ଯ୍ୟ, ସ୍ୱାସ୍ଥ୍ୟମନ୍ତ୍ରୀ ନବ ଦାସ, ବରିଷ୍ଠ ବିଧାୟକ ଅମର ସତପଥି, ସ୍ନେହାଙ୍ଗୀନି ଛୁରିଆ, ପ୍ରଭାତ ତ୍ରିପାଠୀ, ଦାମୋଦର ରାଉତ ଦୁଃଖ ପ୍ରକାଶ କରିଛନ୍ତି ।
ଭୁବନେଶ୍ୱର: ବ୍ରଜରାଜନଗର ବିଧାୟକଙ୍କ କିଶୋର ମହାନ୍ତିଙ୍କ ଅକାଳ ବିୟୋଗ । ହୃଦଘାତରେ କିଶୋରଙ୍କ ପରଲୋକ ଘଟିଥିବା ସୂଚନା । ୬୩ ବର୍ଷ ବୟରେ ହୃଦଘାତରେ ଦେହାନ୍ତ ଘଟିଛି । କିଶୋର ମହାନ୍ତି ପଶ୍ଚିମ ଓଡ଼ିଶାର ଜଣେ ଟାଣୁଆ ନେତା ଥିବାବେଳେ ଓଡ଼ିଶା ବିଧାନସଭାରେ ପୂର୍ବରୁ ବାଚସ୍ପତି ଭାବେ ଦାୟିତ୍ୱ ନିଭାଇଥିଲେ ।
ଝାରସୁଗୁଡାରୁ ତିନି ଥର ବିଧାୟକ ଥିଲେ କିଶୋର । ପରେ ପ୍ରଥମ ଥର ପାଇଁ ବ୍ରଜରାଜନଗର ଆସନରୁ ବିଧାୟକ ହୋଇଥିଲେ । 1990ରେ ପ୍ରଥମ ଥର ବିଧାନସଭାକୁ ନିର୍ବାଚିତ ହୋଇଥିଲେ କିଶୋର ମହାନ୍ତି । ହୃଦଘାତରେ ଆକ୍ରାନ୍ତ ହୋଇଥିବାବେଳେ ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିଲେ । ସଂଧ୍ୟାରେ ହୃଦଘାତରେ କିଶୋର ମହାନ୍ତିଙ୍କ ଅକାଳ ବିୟୋଗ ହୋଇଛି ।
ଦିବଙ୍ଗତ ବିଧାୟକ କିଶୋର ମହାନ୍ତିଙ୍କ ରାଜନୈତିକ ଜୀବନି ଜଟିଳତା ଭିତରେ ପ୍ରବାହ କରିଛି । ୨୦୦୪ରୁ ୨୦୦୮ ଯାଏଁ ବିଜେଡ଼ିର ସରକାରୀ ମୁଖ୍ୟ ସଚେତକ ଦାୟିତ୍ୱ ତୁଲାଇଥିଲେ । ୨୦୦୮ରୁ ୨୦୦୯ ଯାଏଁ ବାଚସ୍ପତି ପଦବୀରେ ବସିଥିଲେ କିଶୋର ମହାନ୍ତି । ୨୦୦୯ରୁ ୨୦୧୨ ଯାଏଁ ବିଜେଡିରୁ ରାଜ୍ୟସଭାକୁ ନିର୍ବାଚିତ ହୋଇଥିଲେ । ସେହିପରି ୨୦୧୪ରୁ ୨୦୧୯ ଯାଏ ସେ ପଶ୍ଚିମ ଓଡ଼ିଶା ବିକାଶ ପରିଷଦ ଦାୟିତ୍ୱ ତୁଲାଇଥିଲେ କିଶୋର ମହାନ୍ତି ।
ପଶ୍ଚିମ ଓଡ଼ିଶାର ଜଣେ ଟାଣୁଆ ପ୍ରଭାବଶାଳୀ ନେତା ଭାବେ ଜଣାଶୁଣା ଥିଲେ କିଶୋର ମହାନ୍ତି । ନୂଆ ଝାରସୁଗୁଡ଼ା ଜିଲ୍ଲାର ବିନ୍ଧାଣୀ ଭାବେ ତାଙ୍କୁ କୁହାଯାଏ । ଛାତ୍ର ଜୀବନରୁ ରାଜନୀତିକୁ ଆସିଥିବା କିଶୋର ବିଭିନ୍ନ ଶ୍ରମିକ ସଙ୍ଗଠନ ସହ ଓତପ୍ରୋତଃ ଭାବେ ଜଡ଼ିତ ଥିଲେ । ୧୯୭୭ରେ ଜନତା ଦଳରେ ଯୋଗ ଦେଇ ପ୍ରତ୍ୟକ୍ଷ ରାଜନୀତିକୁ ଆସିଥିଲେ । ୧୯୮୪ରେ ଝାରୁସୁଗୁଡ଼ାର କାଉନସିଲରୁ ରାଜନୈତିକ କ୍ୟାରିୟର ଆାରମ୍ଭ କରିଥିଲେ ସେ । ୧୯୯୨ରୁ ୧୯୯୫ ପର୍ଯ୍ୟନ୍ତ ଝାରୁସୁଗୁଡ଼ାର ପୌରାଧ୍ୟକ୍ଷ ଥିଲେ । ଅଚାନକ କିଶୋରଙ୍କ ଦେହାନ୍ତ ପଶ୍ଚିମ ଓଡ଼ିଶାବାସୀଙ୍କୁ ସ୍ତମ୍ବୀଭୁତ କରିଦେଇଛି ।
ଭୁବନେଶ୍ୱର: ୨୦୨୧ ମସିହାରେ ଭୁବନେଶ୍ୱର ସହରାଞ୍ଚଳ ପୁଲିସ୍ ଜିଲ୍ଲା ଅଧୀନରେ ଥିବା ସମସ୍ତ ଥାନା ମାନଙ୍କରେ ତା ୩୦.୧୧.୨୦୨୧ ମଧ୍ୟରେ ସମୁଦାୟ ୨୫୮ ଟି ଅପହରଣ ମାମଲା ରୁଜୁ କରାଯାଇଥିଲା। ସେଥିମଧ୍ୟରୁ ନୟାପଲ୍ଲୀ ଥାନାରେ ସର୍ବାଧିକ ୨୩ ଟି, ମଞ୍ଚେଶ୍ଵର ଥାନାରେ ୨୦ ଟି, କ୍ୟାପିଟାଲ ଥାନା ଏବଂ ବଡଗଡ ଥାନାରେ ୧୭ ଟି, ସହିଦନଗର ଓ ଚନ୍ଦ୍ରଶେଖରପୁର ଥାନାରେ ୧୫ ଟି, ଖାରବେଳନଗର ଓ ବାଲିଅନ୍ତା ଥାନାରେ ୧୩ ଟି ମାମଲା ରୁଜୁ ହୋଇଥିଲା। ସେହିପରି ନନ୍ଦନକାନନ ଥାନାରେ ସର୍ବନିମ୍ନ ୩ଟି ମାମଲା ରୁଜୁ ହୋଇଥିବା ବେଳେ ଧଉଳି ଥାନାରେ ୫ଟି, ଇନ୍ଫୋସିଟି ଥାନାରେ ୮ଟି ତଥା ଏୟାରପୋର୍ଟ, ଏୟାରଫିଲ୍ଡ, ତମାଣ୍ଡୋ ଓ ଲକ୍ଷ୍ମୀସାଗର ଥାନାରେ ୯ ଟି ଲେଖାଏଁ ଅପହରଣ ଜନିତ ମାମଲା ରୁଜୁ ହୋଇଥିଲା।
ପୂର୍ବ ବର୍ଷ ମାନଙ୍କର ବକେୟା ଅପହରଣ ମାମଲା ତଥା ଏ ବର୍ଷ ରୁଜୁ ହୋଇଥିବା ଅପହରଣ ମାମଲା ମଧ୍ୟରୁ ସମସ୍ତ ଥାନା ତଥା କିଛି ମାସ ତଳୁ ଡିସିପି ଅଫିସରେ ଗଠିତ ହୋଇଥିବା କିଡ୍ ନାପିଙ୍ଗ ଓ ମ୍ୟାନ୍ ମିସିଂ ସେଲର ମିଳିତ ଉଦ୍ୟମରେ ସର୍ବମୋଟ ୧୪୭ ଟି ମାମଲାର ତଦନ୍ତ ଶେଷ କରିଛନ୍ତି। କିଡନାପିଙ୍ଗ ଓ ମ୍ୟାନ୍ ମିସିଂ ସେଲ୍ ସର୍ବମୋଟ ୧୫୪ଟି ନାବାଳକ ତଥା ନାବାଳିକା ମାନଙ୍କୁ ଠାବ କରିବା ସହ ୫୯ ଟି ମାମଲାର ତଦନ୍ତ ଶେଷ କରିବାରେ ସାହାଯ୍ୟ କରିଥିବାବେଳେ ମଞ୍ଚେଶ୍ଵର ଥାନାର ସର୍ବାଧିକ ୧୭ ଟି, ନୟାପଲ୍ଲୀ ଥାନାର ୧୩ ଟି, କ୍ୟାପିଟାଲ ଥାନା ୧୧ ଟି ମାମଲାର ତଦନ୍ତ ଶେଷ ହୋଇଛି । ଏହି ବର୍ଷ ୩୦.୧୧.୨୦୨୧ ମଧ୍ୟରେ ଅପହରଣ ମାମଲାରେ ଜଡ଼ିତ ୪୦ ଜଣ ଅପରାଧିଙ୍କୁ ଗିରଫ କରି କୋର୍ଟ ଚାଲାଣ କରାଯାଇଛି।
ସୂଚନାଯୋଗ୍ୟ ଯେ, ଗତ ମେ ମାସରୁ ଡି.ସି.ପି ଅଫିସ, ଭୁବନେଶ୍ୱରେ ରେ ଗଠିତ ହୋଇଥିବା Kidnapping ଓ Man Missing Cell ୨୦୦୮ ମସିହାରୁ ରାଜଧାନୀ ର ବିଭିନ୍ନ ଥାନା ମାନଙ୍କରେ ରୁଜୁ ହୋଇଥିବା ଅପହରଣ ମାମଲାର ତଦନ୍ତରେ ତଦନ୍ତକାରି ଅଫିସର ମାନଙ୍କୁ ଉଚିତ ସହାୟତା ଯୋଗାଇ ଆସୁଛି I ୧୮ ବର୍ଷ ରୁ କମ୍ ବୟସର ନାବାଳକ ଓ ନାବାଳିକା ସ୍ଵଇଚ୍ଛାରେ ପାରିବାରିକ ଗଣ୍ଡଗୋଳ କିମ୍ବା ପ୍ରେମ ସମ୍ପର୍କ ଥାଇ ଘରୁ ପଳାୟନ କଲେ ମଧ୍ୟ ଆଇନ ଗତ ଦୃଷ୍ଟି କୋଣରୁ ଅପହରଣ ମାମଲା ରୁଜୁ କରାଯିବାର ପ୍ରାବଧାନ ରହିଛି I କିନ୍ତୁ Kidnapping ଓ Man Missing Cell ର ପ୍ରଚେଷ୍ଟା କ୍ରମେ ଭୁବନେଶ୍ୱର ସହରାଞ୍ଚଳ ଜିଲ୍ଲାର ବିଭିନ୍ନ ଥାନା ମାନଙ୍କରେ ୨୦୦୮ ମସିହାରୁ ରୁଜୁ ହୋଇଥିବା ଅପହରଣ ମାମଲା ମଧ୍ୟରୁ ଗତ ମେ ମାସରୁ ଏଯାବତ ସମୁଦାୟ ୧୧୬୯ ଜଣ ଅଭିଯୋଗକାରୀ ତଥା ଅପହରଣ ମାମଲାରେ ଅନ୍ତର୍ଭୁକ୍ତ ଥିବା ନାବାଳକ ଓ ନାବାଳିକା ମାନଙ୍କୁ ଠାବ କରାଯାଇ ସେଲ ତରଫରୁ ସମ୍ପର୍କ କରାଯାଇଛି I
ଉଲ୍ଲେଖଯୋଗ୍ୟ ଯେ ବହୁତ ଜଣ ନାବାଳକ ଓ ନାବାଳିକା ସ୍ଵ-ଇଛା ରେ ପ୍ରେମ ସମ୍ପର୍କ କିମ୍ବା ପାରିବାରିକ ଗଣ୍ଡଗୋଳରୁ ଉତକ୍ଷିପ୍ତ ହୋଇ ଘରୁ ପଳାୟନ କରିଥିଲେ । ତେଣୁ ଭୁବନେଶ୍ୱର ସହରାଞ୍ଚଳ ଜିଲ୍ଲା ର ସ୍କୁଲ ଓ କଲେଜ ପିଲା ମାନଙ୍କୁ ଏହି ବାବଦରେ ସଚେତନ କରିବା ପାଇଁ ଡି.ସି.ପି ଅଫିସ ଭୁବନେଶ୍ୱର ପକ୍ଷରୁ “ପ୍ରାରମ୍ଭ” ନାମକ ଏକ କାର୍ଯ୍ୟକ୍ରମର ଶୁଭାରମ୍ଭ କରାଯାଇଛି । ଏହି କାର୍ଯ୍ୟକ୍ରମରେ ସର୍ବ ପ୍ରଥମେ ରମାଦେବୀ ବିଶ୍ଵବିଦ୍ୟାଳୟ ର ଛାତ୍ରୀ ମାନଙ୍କୁ ନେଇ ଏକ ସଚେତନତା କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା ।
ଭୁବନେଶ୍ୱର: ରାଜ୍ୟରେ ବଢ଼ୁଛି ଓମିକ୍ରନ ଆକ୍ରାନ୍ତଙ୍କ ସଂଖ୍ୟା । ଏପରି ସ୍ଥିତିରେ ଆଗକୁ ଆସୁଛି ନୂଆବର୍ଷ । ନୂଆବର୍ଷକୁ ଦୃଷ୍ଟିରେ ରଖି ଆଗୁଆ ପଦକ୍ଷେପ ନେଇଛନ୍ତି ରାଜ୍ୟ ସରକାର । ନୂଆ ବର୍ଷକୁ ଦୃଷ୍ଟିରେ ରଖି ଜାରି ହୋଇଛି ସ୍ୱତନ୍ତ୍ର ମାର୍ଗଦର୍ଶିକା । ଡିସେମ୍ବର ୩୧ରୁ ଜାନୁଆରୀ ୩ ପର୍ଯ୍ୟନ୍ତ କଟକଣା ଲଗାଇଛନ୍ତି ରାଜ୍ୟ ସରକାର । ରାଜ୍ୟ ସରକାର ବିଭିନ୍ନ କଟକଣା ଜାରି କରିଥିବା ବେଳେ ଭୁବନେଶ୍ୱରରେ ନୂଆ ଗାଇଡ ଲାଇନ୍ସ ଜାରି କରିଛି ଭୁବନେଶ୍ୱର ମହାନଗର ନିଗମ । ନୂଆ ବର୍ଷରେ ବିଭିନ୍ନ ଧାର୍ମିକ ଅନୁଷ୍ଠାନରେ ଭିଡ ହେବାର ଆଶଙ୍କା ଥିବାରୁ ଏଥି ପାଇଁ ଆଗାମୀ ତିନି ଦିନ ପାଇଁ ସମସ୍ତ ଧାର୍ମିକ ଅନୁଷ୍ଠାନକୁ ବନ୍ଦ କରିଛି ବିଏମସି ।
ଭୁବନେଶ୍ୱର ମହାନଗର ନିଗମ ଅଧିନରେ ଆସୁଥିବା ସମସ୍ତ ମନ୍ଦିର, ମସଜିଦ୍, ଚର୍ଚ୍ଚ ଓ ଗୁରୁଦ୍ୱାରାକୁ ଆସନ୍ତା ୩ ଦିନ ପାଇଁ ବନ୍ଦ ରଖିବାକୁ ନିଷ୍ପତ୍ତି ନେଇଛି ବିଏମସି । କେବଳ ଧାର୍ମିକ ଅନୁଷ୍ଠାନ ନୁହେଁ ପ୍ଲାନଟେରିୟମ ଓ ନନ୍ଦନକାନନରେ ସର୍ବସାଧାରଣଙ୍କ ପ୍ରବେଶ ଉପରେ ରୋକ୍ ଲଗାଯାଇଛି । ସେହିଭଳି ହୋଟେଲ, ପବ୍ଲିକ୍ ଓ ବିଭିନ୍ନ ପାର୍କରେ ମଧ୍ୟ ନୂତନ ବର୍ଷ ପାଳନକୁ ନିଷେଧ କରାଯାଇଛି । ତେବେ ଏହି ନିୟମ ଖିଲାପ କଲେ ଦୃଢ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ବିଏମସି ପକ୍ଷରୁ କୁହାଯାଇଛି । ଏଥିପାଇଁ ୩ଟି ଜୋନରେ ମୋଟ ୧୩ଟି ଏନଫୋର୍ସମେଣ୍ଟ ସ୍କ୍ବାଡ ଗଠନ କରାଯାଇଛି ।
