ସମ୍ବଲପୁର: ବୁର୍ଲା ଭିସୁଟରେ ବାତିଲ ହେଲା ଅଫଲାଇନ ପରୀକ୍ଷା ଓ ପାଠପଢା | କ୍ୟାମ୍ପସ ଛାଡିଲେ ଛାତ୍ରଛାତ୍ରୀ । ଭିସୁଟରେ ଲଗାତାର ଛାତ୍ରଛାତ୍ରୀ କରୋନା ସଂକ୍ରମିତ ହେବା ପରେ ଏଭଳି ନିଷ୍ପତ୍ତି ନିଆଯାଇଛି । ଆସନ୍ତା ୧୦ ତାରିଖ ଯାଏଁ ସମସ୍ତ ଅଫଲାଇନ କ୍ଲାସ ବାତିଲ କରାଯାଇଛି ।
ରାଜ୍ୟରେ କରୋନା ସଂକ୍ରମଣ ବଢ଼ି ଚାଲିଥିବା ବେଳେ ଓମିକ୍ରନ ମୁଣ୍ଡବିନ୍ଧାର କାରଣ ପାଲଟିଛି । ଯଦିଓ ରାଜ୍ୟରେ ଓମିକ୍ରନ ସଂକ୍ରମଣ ସେମିତି ହୋଇନାହିଁ, ହେଲେ ଅନ୍ୟ ରାଜ୍ୟରେ ଏହାର ହାରକୁ ଦେଖି ରାଜ୍ୟ ସରକାର ମୁକାବିଲା ପାଇଁ ଜୋରଦାର ପ୍ରସ୍ତୁତି କରିଛନ୍ତି ।
ନୂଆଦିଲ୍ଲୀ: ଦିନକୁ ଦିନ ଆହୁର ଭୟଙ୍କର ହେଉଛି କରୋନା । ବିଭିନ୍ନ ଭାରିଆଣ୍ଟର ରୂପ ନେଇ ଲୋକଙ୍କୁ କରୁଛି ସଂକ୍ରମଣ । ବର୍ତ୍ତମାନ ଭାରତରେ ଓମିକ୍ରନ ଭାରିଆଣ୍ଟକୁ ନେଇ କୋକୁଆ ଭୟ । ଓମିକ୍ରନର କିଛି ଲକ୍ଷଣ ସାମ୍ନାକୁ ଆସିଥିଲା । ଏବେ ଆସିଛି ଆଉ କିଛି ନୂଆ ଲକ୍ଷଣ । ଶରୀରର ରଙ୍ଗରୁ ଜାଣି ହେବ ଆପଣ ଓମିକ୍ରନ ଆକ୍ରାନ୍ତ କି ନୁହେଁ । ଓଠ, ଚର୍ମ ଓ ନଖରୁ ମିଳିବ କରୋନା ସଂକ୍ରମଣର ସୂଚନା ।
ଆମେରିକାରର ଡାକ୍ତରଙ୍କ କହିବା ଅନୁଯାୟୀ, ଯଦି ଓଠ, ଚର୍ମ ଓ ନଖର ରଙ୍ଗ ବଦଳି ଧୂସର ହୋଇଯାଉଛି ତେବେ ଏହା ଓମିକ୍ରନ୍ ସଂକ୍ରମଣର ସଙ୍କେତ ହୋଇପାରେ । ଡାକ୍ତରୀ ଟଇମ୍ ଏହାକୁ ଏମର୍ଜେନ୍ସି ୱାର୍ଣ୍ଣିଂ ସାଇନ ବୋଲି କହିଛନ୍ତି । ଆମେରିକା ସେଣ୍ଟର ଫର ଡିଜିଜ କଣ୍ଟ୍ରୋଲ ଆଣ୍ଡ ପ୍ରିଭେନସନ ରଙ୍ଗ ପରିବର୍ତ୍ତନକୁ ତତ୍କାଳ ମେଡିକାଲ ଆଟେନସନର ଆବଶ୍ୟକତା ବୋଲି କହିଛନ୍ତି ।
ମହାମାରୀ ଆରମ୍ଭ ହେବା ପରଠାରୁ ଆମେରିକାର ସ୍ବାସ୍ଥ୍ୟ ମୁଖ୍ୟ ମଧ୍ୟ ଏହି ଲକ୍ଷଣଗୁଡିକୁ ଏମେର୍ଜେନ୍ସି ମେଡିକାଲର ଆବଶ୍ୟକତା ବୋଲି କହିଥିଲେ । ତେବେ ଓମିକ୍ରନ ମାମଲାରେ ଏଭଳି ଲକ୍ଷଣ ଚିହ୍ନଟ କରାଯାଇଛି ।
ସିଡିଏସ କୋଭିଡ ପାଇଁ ୧୧ ଲକ୍ଷଣ ଚିହ୍ନଟ କରିଛନ୍ତି ଯେଉଁଥିରେ ମୁଣ୍ଡବିନ୍ଧା, ଗଳାରେ ଯନ୍ତ୍ରଣା, ଅସହଜ ଆଦି ସାମିଲ । ଅପରପକ୍ଷରେ ରାଷ୍ଟ୍ରୀୟ ସ୍ବାସ୍ଥ୍ୟ ସେବା (NHS) ମଧ୍ୟ ୩ଟି ଲକ୍ଷଣ ଚେତାବନୀର ଘଣ୍ଟି ବୋଲି କହିଛି। ଏହି ସଂକେତଗୁଡିକ ହେଲା ଜ୍ବର, ଲଗାତାର କାଶ, ସ୍ବାଦ ଓ ଗନ୍ଧ ବାରି ନ ପାରିବା। ଓଠ, ଚର୍ମ ଓ ନଖର ରଙ୍ଗ ପରିବର୍ତ୍ତନକୁ ଏନଏଚଏସ ୱାର୍ଣ୍ଣିଂ ସାଇନ ବୋଲି ମାନୁନାହିଁ । କିନ୍ତୁ ରିପୋର୍ଟରେ କୁହାଯାଇଛି ଯେ, ଯଦି ଶିଶୁଙ୍କ ଓଠ, ଚର୍ମ ଓ ନଖର ରଙ୍ଗ ଧୂସର, ନୀଳ ବା ଗ୍ରେ ହୋଇଯାଉଛି ତାହେଲେ ତୁରନ୍ତ ଡାକ୍ତରଙ୍କୁ ପରାମର୍ଶ କରିବା ଉଚିତ ।
ଲଣ୍ଡନ କିଙ୍ଗ୍ସ କଲେଜର ରିସର୍ଚ୍ଚର ନିଜ ବିଶ୍ଳେଷଣ ଆଧାରରେ ଜାଣିବାକୁ ପାଇଛନ୍ତି ଯେ ଭ୍ୟାକସିନ ନେଇଥିବା ଲୋକଙ୍କ ମଧ୍ୟରେ ସାଧାରଣତଃ ସାମାନ୍ୟ ଲକ୍ଷଣ ଦେଖାଦେଉଛି । ଏଗୁଡିକ ହେଲା ଛିଙ୍କ, ମୁଣ୍ଡବିନ୍ଧା, ଥଣ୍ଡା, ସ୍ବାଦ ବାରି ନ ପାରିବା, ଜ୍ବର ହେବା, ଗଳାରେ ଯନ୍ତ୍ରଣା ଇତ୍ୟାଦି। ଅପରପକ୍ଷରେ ନଖର ରଙ୍ଗ ବଦଳିବା ଆଇରନ ଅଭାବର ସଂକେତ ମଧ୍ୟ ହୋଇଥାଏ । ନଖର ରଙ୍ଗ ଗ୍ରେ ହେବା ଅର୍ଥ ଉକ୍ତ ବ୍ୟକ୍ତିଙ୍କ ଶରୀରର ପ୍ରମୁଖ ଅଙ୍ଗରେ ଅକ୍ସିଜେନ ଅଭାବ ରହିଛି । ଚର୍ମ ଓ ଓଠ ଗ୍ରେ ହେବାର ଅର୍ଥ ଶରୀରରେ ରକ୍ତ ସଂଚାଳନ ଠିକ ଭାବେ ହେଉନାହିଁ ଏବଂ ଅକ୍ସିଜେନ ସପ୍ଲାଏ ମଧ୍ୟ ଠିକ ଭାବେ ହେଉନାହିଁ । ଏହାଦ୍ବାରା ଶ୍ବାସ ରୋଗ, ନିମୋନିଆ ଓ ହୃଦରୋଗର ବିପଦ ରହିଛି ।
ଭୁବନେଶ୍ବର: ସ୍ବାସ୍ଥ୍ୟ ମନ୍ତ୍ରୀ ନବ କିଶୋର ଦାସଙ୍କୁ କରୋନା । ଟ୍ବିଟ୍ କରି ଆକ୍ରାନ୍ତ ହୋଇଥିବା ସୂଚନା ଦେଲେ ମନ୍ତ୍ରୀ । ଲକ୍ଷଣବିହୀନ କୋଭିଡ ଆକ୍ରାନ୍ତ ହୋଇଥିବା ସେ ଜଣାଇଛନ୍ତି । ଏବେ ସେ ହୋମ୍ ଆଇସୋଲେସନରେ ଅଛନ୍ତି । ଗତ ୩ଦିନ ମଧ୍ୟରେ ତାଙ୍କ ସଂସ୍ପର୍ଶରେ ଆସିଥିବା ଲୋକ ନିଜକୁ ଆଇସୋଲେଟ୍ କରନ୍ତୁ ଏବଂ କୋଭିଡ ଟେଷ୍ଟ କରାଇନିଅନ୍ତୁ ବୋଲି ଟ୍ବିଟ୍ କରି ଜଣାଇଛନ୍ତି ସ୍ବାସ୍ଥ୍ୟମନ୍ତ୍ରୀ ।
ନୂଆଦିଲ୍ଲୀ: କଲବଲ କରୁଛି କରୋନା ଭୂତାଣୁ । ମାଡ଼ି ମାଡ଼ି ଚାଲିଛି । ଲୋକଙ୍କ ପାଖରୁ ଲୋକଙ୍କ ପାଖକୁ ଡେଉଁଛି । ଦେଶରେ ଲକ୍ଷେ ଟପିଛି ଦୈନିକ ସଂକ୍ରମଣ । ଦିନକରେ ଏକ ଲକ୍ଷ ୧୭ ହଜାର ଶହେ ପିଜିଟିଭ ଚିହ୍ନଟ ହୋଇଛନ୍ତି । ୩୦୨ ଆକ୍ରାନ୍ତଙ୍କ ଜୀବନ ନେଇଛି କିଲର କରୋନା । ୩୦ ହଜାର ୮୩୬ ସଂକ୍ରମିତ ସୁସ୍ଥ ହୋଇଥିବା ସୂଚନା ମିଳିଛି ।
ଦେଶର ଦୈନିକ ପିଜିଟିଭିଟି ୭.୭୪ ପ୍ରତିଶତ ରହିଛି । କରୋନା ଆକ୍ଟିଭ କେସ୍ ୩ ଲକ୍ଷ ୭୧ ହଜାର ୩୬୩ ଥିବା ବେଳେ ମୋଟ୍ ମୃତ୍ୟୁସଂଖ୍ୟା ୪ ଲକ୍ଷ ୮୩ ହଜାର ୧୭୮ । ଏପଟେ ଜୋରସୋରରେ ଚାଲିଛି ଟିକାକରଣ । ୧୪୯.୬୬ କୋଟି ଟିକାକରଣ ହୋଇଥିବା କେନ୍ଦ୍ର ସ୍ବାସ୍ଥ୍ୟ ଓ ପରିବାର କଲ୍ୟାଣ ମନ୍ତ୍ରାଳୟ ପକ୍ଷରୁ ସୂଚନା ଦିଆଯାଇଛି ।
ସେପଟେ ଦେଶରେ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ୩ ହଜାର ୭କୁ ବୃଦ୍ଧି ପାଇଛି । ୧୧୯୯ ଜଣ ଓମିକ୍ରନରୁ ସୁସ୍ଥ ହୋଇଥିବା ସୂଚନା ମିଳିଛି । ମହାରାଷ୍ଟ୍ରରୁ ସର୍ବାଧିକ ୮୭୬ ଓମିକ୍ରନ ଆକ୍ରାନ୍ତ ଚିହ୍ନଟ ହୋଇଥିବା ବେଳେ, ସୁସ୍ଥ ହେଲେଣି ୩୮୨ ଓମିକ୍ରନ ଆକ୍ରାନ୍ତ ।
ଭୁବନେଶ୍ବର: ଓଡ଼ିଶା ସରକାରଙ୍କ ପଞ୍ଚାୟତିରାଜ ଓ ପାନୀୟ ଜଳ ବିଭାଗ ଅଧୀନରେ ଥିବା ଓରମାସ ତରଫରୁ ଆୟୋଜିତ ଜାତୀୟ ସ୍ତରୀୟ ପ୍ରଦର୍ଶନୀ ଶିଶିର ସରସ ଉଦଯାପିତ ହୋଇଯାଇଛି । ମେଳାରେ ମୋଟ ୮ କୋଟିରୁ ଅଧିକ ଟଙ୍କାର ବ୍ୟବସାୟ ହୋଇଛି । ୨୨ଟି ରାଜ୍ୟର ଗ୍ରାମୀଣ କାରିଗରଙ୍କ ସହ ଓଡ଼ିଶାର ସମସ୍ତ ଜିଲ୍ଲାର ସ୍ବୟଂ ସହାୟିକ ଗୋଷ୍ଠୀ ଓ ଉତ୍ପାଦକ ଗୋଷ୍ଠୀର ସଦସ୍ୟମାନେ ଅଂଶଗ୍ରହଣ କରି ହାତ ତିଆରି ଜିନିଷ ବିକ୍ରି କରିଥିଲେ । ଚଳିତବର୍ଷ ମେଳାରେ ମୋଟ ୩୦୦ଟି ଷ୍ଟଲ ଖୋଲିଥିଲା । ଶେଷ ଦିନରେ ମୋଟ ୯ଟି ବର୍ଗରେ ପୁରସ୍କାର ପ୍ରଦାନ କରାଯାଇଛି । ମେଳାରେ କୋଭିଡ ନିୟମାବଳୀ କଡ଼ାକଡ଼ି କରାଯିବା ସହ ଭିଡ଼ ନିୟନ୍ତ୍ରଣ ଓ ଶାନ୍ତିଶୃଙ୍ଖଳା ରକ୍ଷା ପାଇଁ ବ୍ୟାପକ ସୁରକ୍ଷାକର୍ମୀ ଓ ପୋଲିସ ନିୟୋଜିତ ହୋଇଥିଲେ ।
ଭୁବନେଶ୍ବର: ସରକାର ଦେବେ ଟଙ୍କା । ଲୋକେ କରିବେ ଘର ମରାମତି । ବିଜୁ ପକ୍କା ଘର ପାଇଥିବା ଓ ପାଇନଥିବା ଯୋଗ୍ୟ ପରିବାରଙ୍କ ପାଇଁ ରାଜ୍ୟ ସରକାର ନେଇଛନ୍ତି ଗୁରୁତ୍ବପୂର୍ଣ୍ଣ ନିଷ୍ପତ୍ତି । ପକ୍କା ଘର ପାଇଥିବା ପ୍ରତ୍ୟେକ ପରିବାରଙ୍କୁ ୩ ହଜାର ଟଙ୍କାର ଘର ମରାମତି ସହାୟତା ଦେବେ ସରକାର । ଆଜି ଏହାର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ଏଥିପାଇଁ ସରକାର ୧ ହଜାର ୪୪୪ କୋଟି ଟଙ୍କା ଖର୍ଚ୍ଚ କରିବେ । ହିତାଧିକାରୀଙ୍କ ବ୍ୟାଙ୍କ ଖାତାକୁ ସିଧାସଳଖ ଯିବ ଏହି ସହାୟତା ଟଙ୍କା । ଏହାଦ୍ବାରା ଉପକୃତ ହେବେ ରାଜ୍ୟର ୩୦ ଲକ୍ଷ ପରିବାର । ଗତ ୨୧ ତାରିଖରେ ହୋଇଥିବା କ୍ୟାବିନେଟ୍ ବୈଠକରେ ଏନେଇ ନିଷ୍ପତ୍ତି ହୋଇଥିଲା । ବିଜୁ ପକ୍କା ଘର ପାଇଥିବା ହିତାଧିକାରୀଙ୍କୁ ଘର ମରାମତି ପାଇଁ ୩ ହଜାର ଟଙ୍କା ପ୍ରଦାନ କରିବାକୁ ଘୋଷଣା ପରେ ସବୁଠି ଖୁସିର ଲହରୀ ଖେଳିଯାଇଥିଲା । ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଥିଲେ ହିତାଧିକାରୀ ।
ବ୍ରହ୍ମପୁର: ବ୍ରହ୍ମପୁର ବ୍ରହ୍ମାନଗରର ଚର୍ଚ୍ଚିତ ସୁମିତ ତପସ୍ବିନୀଙ୍କ ପାରିବାରିକ ବିବାଦରେ ନୂଆ ଟ୍ବିଷ୍ଟ । ତପସ୍ବିନୀଙ୍କ ଘର ପ୍ରବେଶ ପରେ ରାତି ଅଧରେ ଘର ଛାଡ଼ି ରାତିରେ ବାହାରେ ବୁଲିଲେ ଶ୍ବଶୁର କୁମାର ସାହୁ । ଆଣିଲେ ଜୀବନ ପ୍ରତି ବିପଦ ଥିବା ଅଭିଯୋଗ ।
ରାତିରେ ରାସ୍ତାରେ ବୁଲିବା ସହ ଭିଡିଓ ଜାରି କହି ଅସହାୟତା ପ୍ରକାଶ କଲେ ପ୍ରମୋଦ । କହିଲେ-ପ୍ରଶାସନିକ ଅଧିକାରୀ ବେଆଇନ୍ ଭାବେ ବୋହୂକୁ ଘରେ ପ୍ରବେଶ କରାଇଛନ୍ତି । କୋର୍ଟଙ୍କ ରାୟକୁ ନେଇ ଦ୍ବନ୍ଦରେ ଥିଲି । ବୁଝିବାକୁ ଚେଷ୍ଟା କରିଥିଲି । ହେଲେ ସେମାନେ ଇଚ୍ଛା ବିରୋଧରେ ତପସ୍ପିନୀଙ୍କୁ ଘରେ ପୁରାଇଛନ୍ତି ।
ସେ ଆହୁରି କହିଛନ୍ତି, ‘ନିଜକୁ ସୁରକ୍ଷିତ ନମଣି ଅଧରାତିରେ ଘର ଛାଡ଼ି ପଳାଇ ଆସିଛି । ପୂର୍ବରୁ ମୋ ବୋହୂ ମୋ ନାଁରେ ଓ ମୋ ପରିବାର ବିରୋଧରେ ଅନେକ ଅଭିଯୋଗ ଆଣିଛନ୍ତି । ଏଥିପାଇଁ ମୁଁ ଅତ୍ୟନ୍ତ ଭୟଭୀତ ହୋଇ ଘର ଛାଡ଼ି ପଳାଇ ଆସିଛି । ପରବର୍ତ୍ତୀ ସମୟରେ ମୁଁ ଘରକୁ ଫେରିବିନି ।’
ଭୁବନେଶ୍ବର: ପୁଣି ଭିଜିବ ଓଡ଼ିଶା । ଘୂର୍ଣ୍ଣିବଳୟ ପ୍ରଭାବରେ ରାଜ୍ୟର ଉପାନ୍ତରୁ ଉପକୂଳ ସବୁଠି ହେବ ବର୍ଷା । ଏକ ଘନୀଭୂତ ପଶ୍ଚିମା ଝଡ ଆଜିଠୁ ଅଧିକ ଘନୀଭୁତ ହୋଇ ଉତ୍ତର ପଶ୍ଚିମ ରାଜସ୍ଥାନ ତଥା ତାର ପାର୍ଶ୍ବବର୍ତ୍ତୀ ଅଞ୍ଚଳରେ ଘୂର୍ଣ୍ଣିବଳୟ ରୂପ ନେବ । ଏହାର ପ୍ରଭାବରେ ଆସନ୍ତା ୧୦ ତାରିଖରୁ ଓଡ଼ିଶାରେ ବର୍ଷା ହେବାର ସମ୍ଭାବନା ରହିଛି ।
ବିଶେଷ କରି ସୁନ୍ଦରଗଡ, ଝାରସୁଗୁଡା, କେନ୍ଦୁଝର, ଦେବଗଡ, ସମ୍ବଲପୁର, ବରଗଡ, ସୁବର୍ଣ୍ଣପୁର, ବଲାଙ୍ଗୀର, ନୂଆପଡା, କଳାହାଣ୍ଡି ଏବଂ ନବରଙ୍ଗପୁରରେ ବର୍ଷା ହେବ ବୋଲି ପାଣିପାଗ କେନ୍ଦ୍ର ସୂଚନା ଦେଇଛି । ଏହାସହ ଉପକୂଳ ଓଡ଼ିଶାର କିଛି ଜିଲ୍ଲାରେ ପ୍ରବଳ ବର୍ଷା ହେବାର ସମ୍ଭାବନା ରହିଛି । ୧୧ ତାରିଖରୁ ୧୪ ତାରିଖ ମଧ୍ୟରେ ଆଭ୍ୟନ୍ତରୀଣ ଓଡ଼ିଶାରେ ସ୍ବଳ୍ପରୁ ମଧ୍ୟମଧରଣର ବର୍ଷା ହେବ ।
ଅନ୍ୟପଟେ ଓଡିଶାକୁ ଜଳୀୟବାଷ୍ପ ପୂର୍ଣ୍ଣ ଉଷ୍ଣ ପବନ ଓଡ଼ିଶା ମଧ୍ୟକୁ ପ୍ରବେଶ କରୁଥିବାରୁ ତାପମାତ୍ରା ବୃଦ୍ଧି ପାଉଛି । ଆସନ୍ତା ୨ରୁ ୩ ଦିନ ମଧ୍ୟରେ ୨ରୁ ୪ ଡିଗ୍ରୀ ପର୍ଯ୍ୟନ୍ତ ତାପମାତ୍ରା ବୃଦ୍ଧି ହେବାର ସମ୍ଭାବନା ରହିଛି । ଆସନ୍ତା ୨୪ ଘଣ୍ଟା ପର୍ଯ୍ୟନ୍ତ ଘନ କୁହୁଡି ପାଇଁ ୪ଟି ଜିଲ୍ଲା କନ୍ଧମାଳ, କଳାହାଣ୍ଡି, ନବରଙ୍ଗପୁର ଏବଂ କୋରାପୁଟକୁ ୟେଲୋ ଆଲର୍ଟ ଜାରି ହୋଇଛି । କୁହୁଡି ପାଇଁ ଗାଡିଚାଳକଙ୍କୁ ସତର୍କ ରହିବା ପାଇଁ ପରାମର୍ଶ ଦେଇଛି ଆଞ୍ଚଳିକ ପାଣିପାଗ କେନ୍ଦ୍ର ।
ଭୁବନେଶ୍ବର: ରାଜ୍ୟରେ ବଢି ଚାଲିଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ଆଜିଠାରୁ ରାଜ୍ୟରେ ନାଇଟ୍ କର୍ଫ୍ୟୁ ଲାଗୁ ହେବାକୁ ଯାଉଛି । ବିଶେଷ କରି ଭୁବନେଶ୍ବରରେ ସଂକ୍ରମିତଙ୍କ ସଂଖ୍ୟା ଅଧିକ ରହିଥିବାରୁ ଗାଇଡଲାଇନ୍ ଜାରି କରିଛି ବିଏମସି । ବିମାନରେ ଭୁବନେଶ୍ବର ଆସୁଥିବା ସମସ୍ତ ଯାତ୍ରୀଙ୍କର ଆଜିଠୁ ଆରଟିପିସିଆର୍ ଟେଷ୍ଟ ବାଧ୍ୟତାମୂଳକ କରାଯାଇଛି । ବିଏମସି ପକ୍ଷରୁ ସମସ୍ତ ଯାତ୍ରୀଙ୍କ ଆରଟିପିସିଆର୍ ଟେଷ୍ଟ କରାଯିବ । ଯାତ୍ରୀମାନେ ଡବଲ ଡୋଜ ଟିକା ନେଇଥିଲେ ବା ନେଗେଟିଭ ରିପୋର୍ଟ ଥିଲେ ମଧ୍ୟ ସେମାନଙ୍କର ଆର୍ଟିପିସିଆର୍ ଟେଷ୍ଟ କରାଯିବ। ରିପୋର୍ଟ ଆସିବା ପର୍ଯ୍ୟନ୍ତ ଯାତ୍ରୀମାନେ ହୋମ୍ ଆଇସୋଲେସନରେ ରହିବେ । ଯଦି ରିପୋର୍ଟ ପଜିଟିଭ୍ ଆସେ, ତେବେ ପରବର୍ତ୍ତୀ ସମୟରେ ସମସ୍ତ ନିୟମ ମାନିବାକୁ କୁହାଯାଇଛି ।
ଭୁବନେଶ୍ବର: ଓମିକ୍ରନ୍ ସଂକ୍ରମଣ ବଢ଼ିବା ସହ ଫେରୁଛି କଟକଣା । ଆଜିଠୁ ରାଜ୍ୟରେ ଲାଗୁ ହୋଇଛି ନୂଆ କଟକଣା । ସକାଳ ୫ଟାରୁ ସମସ୍ତ ସହରାଞ୍ଚଳରେ ଲାଗୁ ହୋଇଛି ନୂଆ କଟକଣା । ଆଜିଠୁ ରାତି ୯ରୁ ସକାଳ ୫ଟା ଯାଏଁ ଲାଗିବ ନାଇଟ କର୍ଫ୍ୟୁ । ଏହି ସମୟରେ ଅତ୍ୟାବଶ୍ୟକ ସାମଗ୍ରୀ ମିଳିବ ବୋଲି ସ୍ପଷ୍ଟ କରିଛନ୍ତି ଏସଆରସି ।
ବିବାହ ଉତ୍ସବରେ ମାତ୍ର ୧୦୦ ଜଣଙ୍କୁ ଅନୁମତି । ୩୦ ଜଣ ବରଯାତ୍ରୀଙ୍କୁ ମଧ୍ୟ ଅନୁମତି ମିଳିଛି । ଅନ୍ତ୍ୟେଷ୍ଟି କାର୍ଯ୍ୟରେ ସର୍ବାଧିକ ୫୦ ଲୋକଙ୍କୁ ଅନୁମତି ଦିଆଯାଇଛି । ସାମାଜିକ ଓ ଧାର୍ମିକ କାର୍ଯ୍ୟକ୍ରମ ଉପରେ କଟକଣା ଲଗାଯାଇଛି । କୌଣସି ଶିକ୍ଷାନୁଷ୍ଠାନ ପିକ୍ନିକ୍ ଆୟୋଜନ କରିପାରିବେ ନାହିଁ । ହୋଟେଲ ଓ ରେଷ୍ଟୁରାଣ୍ଟ ୫୦ ପ୍ରତିଶତ ଗ୍ରାହକରେ ଚାଲିବ । ସିନେମା ହଲ ଓ ଥିଏଟର ୫୦ ପ୍ରତିଶତ କ୍ଷମତାରେ ଚାଲିବ । କୌଣସି ଶିକ୍ଷାନୁଷ୍ଠାନ ପିକ୍ନିକ୍ ଆୟୋଜନ କରିପାରିବେ ନାହିଁ । ୫୦ ଜଣ ଲୋକଙ୍କୁ ନେଇ ସୁଟିଂ ହେବ । ନନ୍ଦନକାନନ ଯିବା ପାଇଁ ହେଲେ ଅନ୍ଲାଇନ୍ ଟିକେଟ କାଟିବେ ପର୍ଯ୍ୟଟକ । କଟକଣାରେ ଇନଡୋର ଏବଂ ଆଉଟଡୋର ଫିଲ୍ମ ସୁଟିଂ ହୋଇପାରିବ । ମକର ସଂକ୍ରାନ୍ତି ପାଇଁ କେବଳ ନୀତି ହେବ । ଦୋକାନ କିମ୍ବା ମଲରେ ଭିଡ ଜମିଲେ ସଂପୃକ୍ତ ସଂସ୍ଥାର ମାଲିକ ଦାୟୀ ରହିବେ ବୋଲି ଏସଆରସି କହିଛନ୍ତି । ସେପଟେ ଆଜିଠୁ ୫୦ ପ୍ରତିଶତ କର୍ମଚାରୀରେ ଚାଲିବ ସରକାରୀ ଅଫିସ୍ । ଆବଶ୍ୟକୀୟ ସେବା ପାଇଁ ଥିବା କାର୍ଯ୍ୟାଳୟ କଟକଣାରୁ ମୁକ୍ତ ରହିବ । ଫାୟାର ଷ୍ଟେସନ, ପୋଲିସ, ନିର୍ବାଚନ କମିଶନଙ୍କ ଅଫିସ୍ କଟକଣାରୁ ମୁକ୍ତ ରହିବ । ଓପିଏସସି, ଓଏସଏସସି କାର୍ଯ୍ୟାଳୟ ୭୫ ପ୍ରତିଶତ କ୍ଷମତାରେ ଚାଲିବ । ଏହି କଟକଣା ଆସନ୍ତା ୩୧ ତାରିଖ ପର୍ଯ୍ୟନ୍ତ ଲାଗୁ ରହିବ । ସଂକ୍ରମଣ ଉପରମୁହାଁ ଥିବାରୁ କାମ ନଥିଲେ ଅଯଥା ଭିଡ ନକରିବାକୁ ପରାମର୍ଶ ଦିଆଯାଇଛି ।
