ଭୁବନେଶ୍ବର: ରାଜଧାନୀ ଭୁବନେଶ୍ବରରେ ପିଲା ଚୋରି ଅଭିଯୋଗ । ୨୦ ହଜାର ଟଙ୍କାରେ ୧୧ ବର୍ଷର ପିଲାକୁ ବିକିବାକୁ ଉଦ୍ୟମ । ପିଲା ଚୋରି ଅଭିଯୋଗରେ ସ୍ବାମୀ ସ୍ତ୍ରୀ ଥାନାରେ ଅଟକ । ନୟାଗଡ଼ର ଦମ୍ପତିଙ୍କୁ ଖଣ୍ଡଗିରି ଥାନାରେ ଅଟକ ରଖି ପଚରାଉଚରା କରୁଛି ପୋଲିସ ।
ଗତକାଲି ଜାଗମରା ଗାଁରୁ ୧୧ ବର୍ଷର ପିଲାକୁ ଚୋରି କରିନେଇଥିଲେ ଦମ୍ପତି । ଆଉ ୩ ଜଣ ପିଲାଙ୍କୁ ମଧ୍ୟ ଟଙ୍କା ଲୋଭ ଦେଖାଇ ନେବାକୁ ଚେଷ୍ଟା କରିଥିଲେ । ତେବେ ଖୋର୍ଦ୍ଧା ପୁବୁସାହି ନିକଟରୁ ନିଖୋଜ ପିଲା ଉଦ୍ଧାର ହୋଇଛି । ଘରୋଇ ବସ ଯୋଗେ ରାଜ୍ୟ ବାହାରକୁ ନେବାକୁ ଉଦ୍ୟମ କରିଥିଲେ । ପିଲାଟିକୁ ପରିବାରକୁ ହସ୍ତାନ୍ତର ପରେ ସ୍ବାମୀ ସ୍ତ୍ରୀଙ୍କୁ ପଚରା ଉଚରା କରୁଛି ପୋଲିସ ।
ମସ୍କୋ: ଏବେ ବିପଦରେ ୟୁକ୍ରେନକୁ ସାହାଯ୍ୟ କରୁଥିବା ଦେଶ । ରୁଷ-ୟୁକ୍ରେନ୍ ଯୁଦ୍ଧରେ ଖୋଲାଖୋଲି ୟୁକ୍ରେନକୁ ସାହାଯ୍ୟ କରୁଥିବା ଦେଶଗୁଡ଼ିକପାଇଁ ଏବେ ମହଙ୍ଗା ପଡ଼ିଲାଣି । ଏବେ ନାଟୋ ଦେଶ ଉପରେ ରୁଷ ବିଭିନ୍ନ ପ୍ରକାର ପ୍ରତିବନ୍ଧକ ଲଗାଇବା ଦେଖାଦେଲାଣି ।
ଏବେ ପୋଲାଣ୍ଡ ଏବଂ ବୁଲେଗରିଆକୁ ଗ୍ୟାସ ଏବଂ ତେଲ ରପ୍ତାନି କରିବା ବନ୍ଦ କରିଦେଇଛି ରୁଷ । ଯୁଦ୍ଧ ଆରମ୍ଭ ହେବା ପରେ ଏହି ଦେଶ ଗୁଡିକ ତେଲ ଏବଂ ଗ୍ୟାସ ପାଇଁ ଋଷ ମୁଦ୍ରା ରୁବେଲ ହିସାବରେ ଦାମ୍ ଦେବାକୁ କହିଥିଲେ ବି ଏହାକୁ ଅନ୍ୟ ରାଷ୍ଟ୍ରମାନେ ଗ୍ରହଣ କରିନଥିଲେ । ଏହା ଉପରେ ରୁଷ ରାଗିଯାଇ ପ୍ରତିଶୋଧ ନେବା ଆରମ୍ଭ କରିଛି ।
ପୋଲାଣ୍ଡ ଏବଂ ବୁଲେଗରିଆର କହିବା କଥା ହେଲା ରୁଷର ଦିଗଜ ଉର୍ଜା ନାମକ କମ୍ପାନୀ ଗ୍ୟାସ ଏବଂ ତେଲ ରପ୍ତାନୀ ବନ୍ଦ କରିବା କଥା କହି ସିଧା ବନ୍ଦ କରି ଦେଇଥିଲା ।
ଏଠାରେ ଆମେ କହି ରଖିବାକୁ ଚାହୁଁଛୁ ଯେ, ୟୁକ୍ରେନ ଉପରେ ଋଷର ଆକ୍ରମଣ ପରେ ପୋଲାଣ୍ଡ ଆରମ୍ଭରୁ ହିଁ ୟୁକ୍ରେନକୁ ସହଯୋଗ କରିଆସିଛି । ଯୁଦ୍ଧ ଲଢିବାକୁ ମଧ୍ୟ ୟେୁକ୍ରେନକୁ ଅସ୍ତ୍ର ଯୋଗାଇଛି ପୋଲାଣ୍ଡ । ଏହି ସପ୍ତାହରେ ୟୁକ୍ରେନକୁ ଯୁଦ୍ଧ ଟ୍ୟାଙ୍କ ପଠାଇବାକୁ ମଧ୍ୟ କହିଥିଲେ ପୋଲାଣ୍ଡ ସରକାର । ଏହାକୁ ନେଇ ଏବେ ରାଗିଯାଇଛି ଋଷ । ବହୁ ମାତ୍ରାରେ ରୁଷରୁ ଆସୁଥିବା ବିଜୁଳି ଶକ୍ତି ଏବଂ ଇନ୍ଧନ ଗ୍ୟାସ ରପ୍ତାନିର ସବୁ ବାଟ ବନ୍ଦ କରିଦେଇଛି।
ମନ୍ଦିରରେ ଜୋତା ଚପଲ ହଜିବା କିମ୍ବା ଚୋରି ହେବା ଅତ୍ୟନ୍ତ ସାଧାରଣ କଥା । ସେମିତିରେ ଦେଖିଲେ ଏହା ଏକ କ୍ଷତି । କିନ୍ତୁ ଜ୍ୟୋତିଷ ଶାସ୍ତ୍ର ଅନୁସାରେ ଜୋତା ଚୋରି ହେବା ଏକ ଶୁଭ ସଂକେତ । ବିଶେଷ ରୂପରେ ଶନିବାର ଦିନ ଜୋତା ଚପଲ ଚୋରି ହେଲେ ଖୁବ ଶୀଘ୍ର ଖରାପ ସମୟରୁ ମୁକ୍ତି ମିଳିଥାଏ । ଜ୍ୟୋତିଷ ଶାସ୍ତ୍ର ଅନୁସାରେ ଜୋତା-ଚପଲ ଚୋରି ହେବାର ମାନ୍ୟତା ରହିଛି । କୁହାଯାଏ ଏହା ଦ୍ୱାରା ଦରିଦ୍ରତା ଦୂର ହୋଇଥାଏ ଏବଂ ଗ୍ରହ ଦୋଷ ମଧ୍ୟ ଦୂର ହୋଇଥାଏ ।
ଗ୍ରହ ଦୋଷ ଏବଂ ତାହାର ଉପାୟ
ଜ୍ୟୋତିଷ ଶାସ୍ତ୍ର ଅନୁସାରେ ଯେଉଁ ଲୋକମାନଙ୍କ ଜାତକରେ ଗ୍ରହ ଦୋଷ ଥାଏ ସେମାନଙ୍କୁ ସହଜରେ ସଫଳତା ମିଳି ପାରି ନଥାଏ । ଗ୍ରହ ଗୁଡିକର ଦୋଷକୁ ଦୂର କରିବା ପାଇଁ ଉପାୟ ମଧ୍ୟ ରହିଛି । ଯାହାକୁ କରିବା ଦ୍ୱାରା ଜାବନରେ ସକାରତ୍ମକ ଫଳ ମିଳିବାର ସଂଭାବନା ବଢିଯାଇଥାଏ । ଜାତକର ଦୋଷକୁ ଦୂର କରିବା ପାଇଁ ପ୍ରତ୍ୟେକ ଦିନ ସୂର୍ଯ୍ୟଙ୍କୁ ଜଳ ଅର୍ପଣ କରିବା, ଶିବଲିଙ୍ଗ ଉପରେ ଜଳ ଢାଳିବା, ନିୟମିତ ଭାବେ ମନ୍ଦୀର ଯିବା ଏବଂ ହନୁମାନ ଚାଳିଶା ପାଠ କରିବା ଉଚିତ । ଏହା କରିବା ଦ୍ୱାରା ଜାତକର ସମସ୍ତ ସମସ୍ୟା ଏବଂ ଗ୍ରହ ଦୋଷ ଅନେକ ମାତ୍ରାରେ କମ ହୋଇଥାଏ ।
ମନ୍ଦିରରେ ଜୋତା-ଚପଲ ଚୋରି ହେବା
ଯଦି ଶନିବାର ଦିନ କୌଣସି ବ୍ୟକ୍ତିଙ୍କର ଜୋତା-ଚପଲ ଚୋରି ହୁଏ ତେବେ ଏହା ଏକ ଶୁଭ ସଂକେତ । ଏହାର କାରଣ ଶନିଙ୍କ କାରଣରୁ ସୃଷ୍ଟି ସମସ୍ୟା ସାମ୍ନା କରିବା ପାଇଁ ପଡିବ ନାହିଁ । ଶନିଙ୍କ ନ୍ୟାୟାଧିଶ କୁହାଯାଏ ତେଣୁ ଶନି ଗହ ଅଶୁଭ ହୋଇଥିଲେ କୌଣସି କାମରେ ସଫଳତା ମିଳିନଥାଏ ଏବଂ ବାରମ୍ବାର କାମ ବିଗିଡି ଥାଏ । ଏଥିପାଇଁ ମନ୍ଦୀରରେ ଜୋତା କିମ୍ବା ଚପଲ ଚୋରି ହେବା ଶୁଭ ସଂକେତ ରୂପେ ଗ୍ରହଣ କରାଯାଇଥାଏ ।
ପାଦରେ ବାସ କରିଥାନ୍ତି ଶନି
ଜ୍ୟୋତିଷ ଶାସ୍ତ୍ର ଅନୁସାରେ ମନୁଷ୍ୟ ଶରୀରରେ ସବୁ ଗ୍ରହ ବିଭିନ୍ନ ଅଙ୍ଗରେ ବାସ କରିଥାନ୍ତି । ସେହିପରି ଶନି ପାଦରେ ବାସ କରିଥାନ୍ତି । ଏହି କାରଣରୁ ଜୋତା ଏବଂ ଚପଲର ସମ୍ପର୍କ ପାଦ ସହିତ ଥିବାରୁ ଏହା ଚୋରି ହେବା ଦ୍ୱାରା ଲାଭ ମିଳିଥାଏ । ଏହା ବ୍ୟତୀତ ଜୋତା-ଚପଲ ଦାନ କରିବା ଦ୍ୱାରା ମଧ୍ୟ ଶନି ଦେବ ପ୍ରସନ୍ନ ହୋଇଥାନ୍ତି । ଯଦି ଶନିବାରକୁ ଜୋତା-ଚପଲ ଦାନ କରାଯାଏ ତେବେ ଏହା ଅଧିକ ସୁଫଳ ପ୍ରଦାନ କରିବ ।
ପୁରୀ: ଯେବେ ସାଧାରଣ ଲୋକ ଆଇନ ଭାଙ୍ଗନ୍ତି, ଆଇନ ଅନୁସାରେ କାର୍ଯ୍ୟାନୁଷ୍ଠାନ ହୁଏ । ହେଲେ ଆଇନ ପ୍ରସ୍ତୁତକାରୀ ସାଂସଦ, ସବୁ ଜାଣିଶୁଣି ଯେବେ ଆଇନକୁ ନାଲିଆଖି ଦେଖାନ୍ତି, ସେତେବେଳେ କଣ ହେବ ? ଭୁବନେଶ୍ବର ସାଂସଦ ଅପରାଜିତା ଷଡ଼ଙ୍ଗୀ ଆଗରୁ ଥିଲେ ପ୍ରଶାସିକା, ଏବେ ଜନ ପ୍ରତିନିଧି । ଆଇନ ପ୍ରଣୟନ କରିଛନ୍ତି ଆଇନ ଅନୁସାରେ ଆକ୍ସନ୍ ବି ନେଇଛନ୍ତି । ଆଇନ ଅନୁସାରେ କ’ଣ ଠିକ୍ କ’ଣ ଭୁଲ୍ ସେକଥା ବେଶ୍ ଭଲ କରି ଜାଣିଛନ୍ତି । ଆଉ ଖୋଲା ଉଲ୍ଲଂଘନ କେମିତି କରି ହେବ ସେକଥା ପୁରୀ ବଡ଼ଦାଣ୍ଡରେ ଦେଖାଇଛନ୍ତି । ପଦଯାତ୍ରାକୁ ଅନୁମତି ନମିଳିବା ପରେ କିଛି ସମର୍ଥକଙ୍କ ସହ ପୁରୀରେ ପହଞ୍ଚି ପଦଯାତ୍ରା କରିଛନ୍ତି ସାଂସଦ । ଜଗା ଦର୍ଶନ ଆଳରେ ଅପରାଜିତାଙ୍କ ପଦଯାତ୍ରା ପଲିଟିକ୍ସକୁ ନିନ୍ଦା କରିଛନ୍ତି ପୁରୀବାସୀ । କାର୍ଯ୍ୟାନୁଷ୍ଠାନ ପାଇଁ ଏତଲା କରାଯାଇଥିବା ବେଳେ ଛାତ୍ର କଂଗ୍ରେସ ଟମାଟୋ ମାଡ଼ କରି ବିରୋଧ ପ୍ରଦର୍ଶନ କରିଛି ।
ଜଗା ଦର୍ଶନ ଆଳରେ ସାଂସଦ ‘ପଦଯାତ୍ରା’ ପଲିଟିକ୍ସ କରିଥିବା ଅଭିଯୋଗ । ପୁରୀ ପଚାରୁଛି, ଅମାନିଆ ଅପରାଜିତାଙ୍କ ବିରୋଧରେ ଆକ୍ସନ୍ କେବେ ? ଅନୁମତି ମିଳିଲାନି, ସ୍ଥଗିତ ରହିଲା ଶ୍ରୀମନ୍ଦିର ସୁରକ୍ଷା ଆନ୍ଦୋଳନର ପଦଯାତ୍ରା । ହେଲେ ବିକାଶ ବିରୋଧୀ ମନୋବୃତ୍ତିରେ ଲାଗିଲାନି ବ୍ରେକ୍ । ପଦଯାତ୍ରା ସ୍ଥଗିତ ପରେ ବି ହାତଗଣତି ସମର୍ଥକଙ୍କ ସହ ପଦଯାତ୍ରା କରି ଶ୍ରୀମନ୍ଦିରକୁ ଗଲେ ସାଂସଦ ଅପରାଜିତା ଷଡ଼ଙ୍ଗୀ । ଅନୁମତି ନଥିବା ଜଣାଇଥିଲା ପ୍ରଶାସନ । ଚନ୍ଦନପୁର ନିକଟରେ ଗାଡ଼ି ଅଟକାଇ ଏକା ଯିବାକୁ ଅନୁରୋଧ ବି କରାଯାଇଥିଲା । ହେଲେ ପୋଲିସର ଅନୁରୋଧକୁ ବେଖାତିର କରିଥିଲେ ବିଜେପି ସାଂସଦ । ଜଗା ଦର୍ଶନ ନାଁରେ ଜନପ୍ରତିନିଧିଙ୍କ ହୀନ ରାଜନୀତି ଓ ଏଭଳି ଆଇନ ଉଲ୍ଲଂଘନକୁ ନିନ୍ଦା କରିଛନ୍ତି ଶ୍ରୀମନ୍ଦିର ସେବାୟତ ଓ ବୁଦ୍ଧିଜୀବୀ ।
ସାଂସଦ ହେଉଛନ୍ତି ପୂର୍ବତନ ପ୍ରଶାସିକା, ହେଲେ ଆଇନକୁ କରିଛନ୍ତି ଖୋଲା ବେଖାତିର । ଆଇନକୁ ପାଦରେ ଦଳିଚକଟି ବଡ଼ଦାଣ୍ଡରେ ପଦଯାତ୍ରା କରିଛନ୍ତି ଅପରାଜିତା । ଆଉ ଏଥିପାଇଁ ତାଙ୍କୁ ନିଜ ଦଳରୁ ବି ମିଳିନି ସମର୍ଥନ । ସେପଟେ ସାଂସଦଙ୍କ ଆଇନ୍ ଅମାନ୍ୟ ବିରୋଧରେ ଆକ୍ସନ୍ ଦାବି କରିଛନ୍ତି ଶ୍ରୀକ୍ଷେତ୍ର ବିକାଶ ମଞ୍ଚ ଓ ବୁଦ୍ଧିଜୀବୀ । ପୁରୀ ଟାଉନ ଥାନାରେ ଅପରାଜିତାଙ୍କ ବିରୋଧରେ ଏତଲା ଦାୟର ହୋଇଛି । ସାଂସଦଙ୍କ ପଲିଟିକାଲ୍ ଷ୍ଟଣ୍ଟକୁ ବିରୋଧ କରିଛି ଛାତ୍ର କଂଗ୍ରେସ ପକ୍ଷରୁ କରାଯାଇଛି ଟମାଟୋ ମାଡ଼ ।
ଶ୍ରୀମନ୍ଦିର ବିକାଶର ବାଟ ଓଗାଳି ଚାଲିଛି ରାଜନୀତି । ପୁରୀରେ ସାଂସଦଙ୍କ ପଲିଟିକାଲ୍ ଷ୍ଟଣ୍ଟକୁ ସାରା ରାଜ୍ୟ ନିନ୍ଦା କରୁଛି । ପ୍ରତି ଓଡିଆଙ୍କ ପ୍ରାଣ କାଳିଆ ସାଆନ୍ତଙ୍କ କାମରେ ବାଧା ଦେବା ପାଇଁ ଅପରାଜିତାଙ୍କ ଏଭଳି ପଦଯାତ୍ରାକୁ ସମାଲୋଚନା କରିଛନ୍ତି ପୁରୀବାସୀ । ଆଇନ ଉଲ୍ଲଂଘନ ପାଇଁ ଶୀଘ୍ର କାର୍ଯ୍ୟାନୁଷ୍ଠାନ ନେବାକୁ ଦାବି ହୋଇଛି ।
ଶତାବ୍ଦୀ ଏକ୍ସପ୍ରେସ ନିକଟରେ ଯାତ୍ରୀଙ୍କୁ ଆଶ୍ଚର୍ଯ୍ୟ କରି ଦେଇଛି । ତାହା ମଧ୍ୟ ଖାଦ୍ୟ ପ୍ଲେଟ୍ ପରଶି । ଶାହନବାଜ ନାମକ ଜଣେ ବ୍ୟକ୍ତି ଏହି ନିଜେ ଟ୍ୱିଟ୍ ମାଧ୍ୟମରେ ଦେଇଛନ୍ତି । ବ୍ୟକ୍ତିଙ୍କ ଅନୁସାରେ ଶତାବ୍ଦୀ ଏକ୍ସପ୍ରେସରେ ତାଙ୍କୁ ସାନଦାର ଖାଇବା ଦିଆଯାଇଥିଲା ଏବଂ ତାଙ୍କୁ ସେଦିନ ରୋଜା ଭାଙ୍ଗିବାର ଥିଲା । ତେବେ ଟ୍ରେନରେ ଦିଆଯାଇଥିବା ଖାଦ୍ୟର ଫଟୋ ସେ ସୋସିଅଲ ମିଡିଆରେ ଶେୟାର କରିଛନ୍ତି ।
ଫଟୋ ଶେୟାର କରି ଶାହନବାଜ ଭାରତୀୟ ରେଲଓ୍ୱେକୁ ଧନ୍ୟବାଦ ଜଣାଇଛନ୍ତି । ଫଟୱୋ ସହିତ ଶାହନବାଜ ଲେଖିଛନ୍ତିଯେ, ଭାରତୀୟ ରେଲଓ୍ୱେକୁ ଧନ୍ୟବାଦ । ମୁଁ ପ୍ୟାଣ୍ଟ୍ରି ସଦସ୍ୟଙ୍କୁ ମୋ ପାଇଁ କେବଳ ଚା ଆଣିବାକୁ କହିଥିଲି, କାରଣ ମୋର ରୋଜା ଥିଲା । କିନ୍ତୁ କିଛି ସମୟ ପରେ ମୋ ପାଇଁ ବ୍ୟକ୍ତି ଜଣକ ଏହିଭଳି ଖାଇବା ନେଇ ଆସିଲେ ।
ଅନ୍ୟପଟେ IRCTCର ଅଧିକାରୀଙ୍କ କହିବା ହେଉଛି ଶାହନବାଜଙ୍କ ପାଇଁ ଅନ୍ ବୋର୍ଡ଼ କ୍ୟାଟରିଙ୍ଗ୍ ମ୍ୟାନେଜର ବ୍ୟକ୍ତିଗତ ଭାବରେ ଭୋଜନ ଆୟୋଜନ କରିଥିଲେ । ତେବେ ଅନ ବୋର୍ଡ଼ କ୍ୟାଟରିଙ୍ଗ୍ ସୁପର ଭାଇଜର ପ୍ରକାଶଙ୍କ କହିବା ହେଉଛି, ରେଲଓ୍ୱେ କର୍ମଚାରୀଙ୍କର ମଧ୍ୟ ରୋଜା ଭାଙ୍ଗିବାର ଥିଲା । ଯେଉଁଥିପାଇଁ ଶାହନବାଜଙ୍କ ପାଇଁ ଭୋଜନ ଆୟୋଜନ ସହଜ ହୋଇଗଲା ।
ମୁମ୍ବାଇ: ମାଲାୟାଲମ୍ ଇଣ୍ଡଷ୍ଟ୍ରୀର ପ୍ରସିଦ୍ଧ ଅଭିନେତା ତଥା ନିର୍ମାତା ବିଜୟ ବାବୁ ଏବେ ଅଡୁଆରେ । କାରଣ ତାଙ୍କ ଉପରେ ଲାଗିଛି ଯୌନ ଶୋଷଣର ଅଭିଯୋଗ । ତାଙ୍କ ବିରୋଧରେ କେରଳ ପୋଲିସ ଏକ ମାମଲା ରୁଜୁ କରିଛି। ଜଣେ ମହିଳା ବିଜୟ ବାବୁଙ୍କ ଉପରେ ଏର୍ନାକୁଲମ ପୋଲିସ ନିକଟରେ ଅଭିଯୋଗ କରିଛନ୍ତି ।
ପୋଲିସ ଦେଇଥିବା ସୂଚନା ଅନୁସାରେ, ଏପ୍ରିଲ ୨୨ ରେ ସେ ଏକ ଅଭିଯୋଗ ଗ୍ରହଣ କରିଥିଲେ। ଅଭିଯୋଗରେ କୁହାଯାଇଛି ଯେ, ଅଭିନେତା ମହିଳାଙ୍କୁ ଅନେକ ଥର ଯୌନ ନିର୍ଯାତନା ଦେଇଛନ୍ତି। ଏହା ସହିତ ସେ ଫିଲ୍ମରେ ଏକ ଭୂମିକା ଦେବେ ବୋଲି ମଧ୍ୟ ପ୍ରତିଶୃତି ଦେଇଥିଲେ।
ପୋଲିସ ଆହୁରି କହିଛି ଯେ, ମହିଳା ଦେଇଥିବା ଅଭିଯୋଗରେ ବିଜୟ ବାବୁ ତାଙ୍କୁ କେରଳର କୋଚିର ଏକ ଫ୍ଲାଟରେ ଯୌନ ନିର୍ଯାତନା ଦେଇଛନ୍ତି। ଏବଂ ଏହା ଥରେ ନୁହେଁ ଅନେକ ଥର ଘଟିଛି | ମହିଳା ଜଣକ ନିଜେ କୋଜିକୋଡେ ନିବାସୀ ଅଟନ୍ତି | ବାସ୍ତବରେ ବିଜୟ ତାଙ୍କୁ ଏକ ଫିଲ୍ମରେ ଭୂମିକା ଦେବେ ବୋଲି ପ୍ରତିଶୃତି ଦେଇଥିଲେ। ଯାହା ସେ ଆଜି ପର୍ଯ୍ୟନ୍ତ ଦେଇ ନାହାନ୍ତି । ଯଦିଓ ଏହି ମାମଲା ପଞ୍ଜୀକୃତ ହୋଇଥିଲା, କିନ୍ତୁ ପାଞ୍ଚ ଦିନ ପରେ ମଧ୍ୟ ପୋଲିସ କୌଣସି ପଦକ୍ଷେପ ନେଇ ନ ଥିଲା କି ବିଜୟ ବାବୁଙ୍କୁ ଗିରଫ କରି ନଥିଲା।
ଅଭିଯୋଗକାରୀଙ୍କ କହିବା ଅନୁସାରେ, ବିଜୟ ବାବୁ ମାର୍ଚ୍ଚରୁ ଏପ୍ରିଲ ଭିତରେ ମହିଳାଙ୍କୁ ଶାରୀରିକ ନିର୍ଯାତନା ସହ ଯୌନ ନିର୍ଯାତନା ଦେଇଥିଲେ। ଯେତେବେଳେ ସେ ଇଣ୍ଡଷ୍ଟ୍ରିରେ ନୂଆ ଥିଲେ ସେତେବେଳେ ସେ ଅଭିନେତାଙ୍କୁ ଜାଣିଥିଲେ | ସେ ଲେଖିଛନ୍ତି, ‘ମୁଁ ଫିଲ୍ମ ଇଣ୍ଡଷ୍ଟ୍ରିରେ ନୂଆ ଥିଲି, ମୋତେ କେହି ବି ମାର୍ଗଦର୍ଶନ ଦେଇ ନଥିଲେ, ସେତେବେଳେ ସେ ମୋତେ ବନ୍ଧୁମାନଙ୍କ ପରି ପରାମର୍ଶ ଦେଉଥିଲେ ଏବଂ ଏହା କରି ସେ ମୋର ବିଶ୍ୱାସ ଜିତିଥିଲେ।
ବ୍ୟକ୍ତିଗତ ଏବଂ ବୃତ୍ତିଗତ ସମସ୍ୟାରେ ସେ ମୋ ପାଇଁ ତ୍ରାଣକର୍ତ୍ତା ପରି ଥିଲେ | କିନ୍ତୁ ଏହାର ଉଦ୍ଦେଶ୍ୟରେ ସେ ମୋତେ ଯୌନ ଶୋଷଣ କରୁଥିଲେ। ଯେତେବେଳେ ମୁଁ ସଚେତନ ଥିଲି, ମୁଁ ଯୌନ ସମ୍ପର୍କକୁ ମନା କରିଥିଲି । ସେ ମୋର ଇଚ୍ଛା ବିରୁଦ୍ଧରେ ଯାଇ ମତେ ଦେଢ଼ ମାସ ଧରି ଦୁଷ୍କର୍ମ କରିଥିଲେ’। ସେ ମଦ ପିଇ ତାଙ୍କୁ ଯୌନ ଶୋଷଣ କରିଥିଲେ ବୋଲି ମହିଳା ଜଣଙ୍କ ଅଭିଯୋଗ ଆଣିଛନ୍ତି ।
ତେବେ ବିଜୟ ବାବୁ ଏହି ପ୍ରସଙ୍ଗରେ ପ୍ରତିକ୍ରିୟା ରଖି ସୋସିଆଲ ମିଡିଆରେ ଏକ ଲାଇଭ କରିଥିଲେ । ଏହି ସମସ୍ତ ଅଭିଯୋଗକୁ ସେ ଅସ୍ୱୀକାର କରିଛନ୍ତି।
ଅଭିଯୋଗ ଗ୍ରହଣ କରିବା ପରେ, ପୋଲିସ ଆଇପିସିର ଧାରା ୩୭୬, ୫୦୬ ଏବଂ ୩୨୩ ଅନୁଯାୟୀ ଏକ ମାମଲା ରୁଜୁ କରିଛି। ଏହାପୂର୍ବରୁ ଅଭିନେତା ସାନ୍ଦ୍ରା ଥୋମାସଙ୍କ ଉପରେ ବିଜୟ ବାବୁ ଆକ୍ରମଣ କରିଥିବା ଅଭିଯୋଗ କରିଥିଲେ। କିନ୍ତୁ ପରେ ପ୍ରତ୍ୟାହାର କରିନେଇଥିଲେ ।
ବିଜୟ ବାବୁ ମାଲାୟାଲମ୍ ଇଣ୍ଡଷ୍ଟ୍ରିରେ ଏକ ବଡ଼ ନାଁ | ସେ ତାଙ୍କ ସିନେମା କ୍ୟାରିୟରରେ ଅନେକ ହିଟ୍ ଫିଲ୍ମ ଦେଇଛନ୍ତି | ସେ କେବଳ ଜଣେ ଅଭିନେତା ନୁହଁନ୍ତି, ଚଳଚ୍ଚିତ୍ର ନିର୍ମାଣ ମଧ୍ୟ କରନ୍ତି | ତାଙ୍କର ‘ଶୁକ୍ରବାର ଫିଲ୍ମ ହାଉସ୍’ ନାମକ ଏକ ପ୍ରଡକ୍ସନ୍ ହାଉସ୍ ମଧ୍ୟ ରହିଛି |
ଭୁବନେଶ୍ବର: କଣ୍ଟିଲୋ ନୀଳମାଧବ ପୀଠର ପାରିପାର୍ଶ୍ବିକ ବିକାଶ ପାଇଁ ପ୍ରସ୍ତୁତ ମାଷ୍ଟର ପ୍ଲାନକୁ ଅନୁମୋଦ । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ କଲେ ଅନୁମୋଦନ । ଖର୍ଚ୍ଚ ହେବ ୧୦୦ କୋଟି ଟଙ୍କା । ୧୮ ମାସ ମଧ୍ୟରେ ଶେଷ ହେବ କାମ । ସମନ୍ବିତ ଐତିହ୍ୟ ଓ କୀର୍ତ୍ତିରାଜି ବିକାଶ ଯୋଜନାରେ କାର୍ଯ୍ୟକାରୀ କରାଯିବ ଏହି ପ୍ରକଳ୍ପ । ପ୍ରକଳ୍ପର ସଫଳ କାର୍ଯ୍ୟକାରୀତା ନିମନ୍ତେ ସ୍ଥାନୀୟ ଜନସାଧାରଣ ଓ ସେବାୟତଙ୍କ ସହଯୋଗ କାମନା କଲେ ମୁଖ୍ୟମନ୍ତ୍ରୀ । ମୁଖ୍ୟମନ୍ତ୍ରୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଉଚ୍ଚସ୍ତରୀୟ ବୈଠକରେ ନୀଳମାଧବ ପୀଠର ବିକାଶ ପାଇଁ ପ୍ରସ୍ତୁତ ମାଷ୍ଟର ପ୍ଲାନ ଉପରେ ବିଚାର ବିମର୍ଷ ହୋଇଥିଲା । ଏହାପରେ ପ୍ରକଳ୍ପକୁ ମୁଖ୍ୟମନ୍ତ୍ରୀ ଅନୁମୋଦନ ଦେଇଥିଲେ ।
ଜଗନ୍ନାଥ ସଂସ୍କୃତି ସହ ନୀଳମାଧବ ପୀଠର ନିବିଡ ସଂପର୍କ ରହିଛି । ବିଶ୍ବାସ କରାଯାଏ ଯେ ନୀଳମାଧବ ପୀଠ ବ୍ରହ୍ମାଦ୍ରୀ ପର୍ବତରେ ମହାପ୍ରଭୁ ନୀଳମଣି ଭାବରେ ଶବର ରାଜା ବିଶ୍ବାବସୁଙ୍କ ଦ୍ବାରା ପୂଜା ପାଉଥିଲେ । ମହାପ୍ରଭୁଙ୍କ ଏହି ଆଦିରୂପକୁ ଦର୍ଶନ କରିବା ପାଇଁ ପ୍ରତିଦିନ ହଜାର ହଜାର ଭକ୍ତ ନୀଳମାଧବ ପୀଠକୁ ଆସିଥାନ୍ତି । ବ୍ରହ୍ମାଦ୍ରୀ ପର୍ବତର ଉତ୍ତର ଦିଗରେ ମହାନଦୀର ଭୀମକାନ୍ତ ରୂପ ଅତ୍ୟନ୍ତ ରମଣୀୟ । ପର୍ଯ୍ୟଟକଙ୍କ ପାଇଁ ମଧ୍ୟ ଏହି ସ୍ଥାନ ଅନ୍ୟତମ ପ୍ରମୁଖ ଆକର୍ଷଣ । ଏହି ପବିତ୍ର ପୀଠର ସୁବ୍ୟବସ୍ଥିତ ବିକାଶ ଦ୍ବାରା ଭକ୍ତ ଓ ପର୍ଯ୍ୟଟକ ସହିତ ସ୍ଥାନୀୟ ଅଞ୍ଚଳର ଅର୍ଥନୈତିକ ବିକାଶରେ ମଧ୍ୟ ସହାୟକ ହେବ ।
ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ 5T ସଚିବ ଭି.କେ. ପାଣ୍ଡିଆନ ଗତ ସପ୍ତାହରେ ନୀଳମାଧବ ପୀଠ ପରିଦର୍ଶନ କରି ବିକାଶ ଯୋଜନା ସଂପର୍କରେ ସେବାୟତ ତଥା ସ୍ଥାନୀୟ ଜନସାଧାରଣ ଓ ଜିଲ୍ଲା ପ୍ରଶାସନ ସହ ବିସ୍ତୃତ ଆଲୋଚନା କରି ମାଷ୍ଟର ପ୍ଲାନ ପ୍ରସ୍ତୁତି ପାଇଁ ନିର୍ଦ୍ଦେଶ ଦେଇଥିଲେ । ଏହି ମାଷ୍ଟରପ୍ଲାନରେ ମୁଖ୍ୟତଃ ମନ୍ଦିରର ପୁନରୁଦ୍ଧାର, ଭକ୍ତଙ୍କ ଶୃଙ୍ଖଳିତ ଦର୍ଶନ, ପରିକ୍ରମା ପଥ, ଚନ୍ଦନ ପୁଷ୍କରିଣୀର ପୁନଃରୁଦ୍ଧାର ଓ ସୌନ୍ଦର୍ଯ୍ୟକରଣ ସହିତ ଚତୁପାର୍ଶ୍ବ ରାସ୍ତାର ଉନ୍ନତୀକରଣ, ଛାୟାପ୍ରଦ ବୃକ୍ଷ, ଉଦ୍ୟାନ, ପାର୍କିଂ, ମହାନଦୀ କୂଳର ସୁରକ୍ଷା ଓ ନଦୀପାର୍ଶ୍ବର ସୌନ୍ଦର୍ଯ୍ୟକରଣ ଆଦି ବିଷୟରେ ଗୁରୁତ୍ବ ଦିଆଯାଇଛି ।
ମନ୍ଦିରକୁ ଯାଇଥିବା ତିଖା ପାହାଚ ଶ୍ରେଣୀର ପୁନରୁଦ୍ଧାର କରାଯାଇ ଭକ୍ତ ସୁବିଧାରେ ଯାଇ ପାରିବା ଭଳି ବିକାଶ କରାଯିବା । ଏହାସହ ପୂର୍ବ, ପଶ୍ଚିମ, ଉତ୍ତର, ଦକ୍ଷିଣ ଚାରି ଦ୍ବାରର ଉନ୍ନତୀକରଣ କରାଯିବ । ବୟସ୍କ ଓ ଭିନ୍ନକ୍ଷମ ଭକ୍ତଙ୍କ ଦର୍ଶନ ସୁବିଧା ପାଇଁ ପଶ୍ଚିମ ଦ୍ବାରରେ ଲିଫ୍ଟ ଓ ସ୍କାଏ ବ୍ରିଜ୍ ସୁବିଧାର ବିକାଶ କରାଯିବ । ମନ୍ଦିର ପରିସର ଓ ଆଖପାଖ ଅଞ୍ଚଳରେ ଖଣ୍ଡାଲାଇଟ ପଥର ବିଛାଯିବା ସହିତ ମନ୍ଦିର ଓ ଠାକୁରଙ୍କ ବଗିଚାର ବିକାଶ କରାଯିବ । ଏହାସହିତ ରାସବିହାରୀ ମଣ୍ଡପ, ରଘୁନାଥ ମଠ ଓ ବାଟମଙ୍ଗଳା ମନ୍ଦିରର ମଧ୍ୟ ବିକାଶ କରାଯିବ ।
ଯାତ୍ରୀଙ୍କ ଜିନିଷପତ୍ର ରଖିବା ନିମନ୍ତେ ବ୍ୟବସ୍ଥା (Cloak Room) ଏବଂ ପଦ ପ୍ରକ୍ଷାଳନ ବ୍ୟବସ୍ଥାର ମଧ୍ୟ ନିର୍ମାଣ କରାଯିବ । ମନ୍ଦିରକୁ ପ୍ରବେଶ ପାଇଁ ପୂର୍ବ ପାର୍ଶ୍ବ ସଡକକୁ ୯ ମିଟର ଓ ପଶ୍ଚିମ ପାର୍ଶ୍ବ ସଡକକୁ ୧୨ ମିଟର ପ୍ରଶସ୍ଥ କରାଯିବ । ମହାନଦୀର କୂଳ କ୍ଷୟରୁ ମନ୍ଦିରକୁ ସୁରକ୍ଷା ଦେବା ପାଇଁ ୪ ଶହ ମିଟରର ସୁରକ୍ଷା ପ୍ରାଚୀର ନିର୍ମାଣ କରାଯିବ ।ପ୍ରକଳ୍ପ ପାଇଁ ସମୁଦାୟ ଦୁଇ ଏକର ଜମି ଆବଶ୍ୟକ ପଡିବ । ଏଥିନିମନ୍ତେ ଜିଲ୍ଲା ପ୍ରଶାସନ ପୁନର୍ବାସ ଓ ଥଇଥାନ ନୀତି ଅନୁଯାୟୀ ଜମି ଅଧିଗ୍ରହଣ କରିବେ । ପୂର୍ତ୍ତ ବିଭାଗ ଜରିଆରେ ଏହି ପ୍ରକଳ୍ପ କାର୍ଯ୍ୟକାରୀ ହେବ । ମହାନଦୀ କୂଳ କ୍ଷୟ ରୋକିବା ପାଇଁ ସୁରକ୍ଷା ପ୍ରାଚୀର ଜଳସମ୍ପଦ ବିଭାଗ ନିର୍ମାଣ କରିବ ।
ବୈଠକକୁ 5T ସଚିବ ପରିଚାଳନା କରିଥିଲେ । ବୈଠକରେ ପୂର୍ତ୍ତ ବିଭାଗ ପ୍ରମୁଖ ସଚିବ ବୀର ବିକ୍ରମ ଯାଦବ ପ୍ରକଳ୍ପ ସଂପର୍କରେ ଉପସ୍ଥାପନା କରିଥିଲେ । ମୁଖ୍ୟ ଶାସନ ସଚିବ ସୁରେଶ ଚନ୍ଦ୍ର ମହାପାତ୍ର, ଉନ୍ନୟନ କମିଶନର ପି.କେ. ଜେନା, ଜଳ ସମ୍ପଦ ବିଭାଗ ଅତିରିକ୍ତ ମୁଖ୍ୟ ସଚିବ ଅନୁ ଗର୍ଗ ଏବଂ ନୟାଗଡ ଜିଲ୍ଲପାଳ ପ୍ରମୁଖ ଉପସ୍ଥିତ ଥିଲେ ।
ମୁମ୍ବାଇ: ମଣ୍ଡପ ସଜା ହୋଇଥାଏ, ଡିଜେ ବାଜୁଥାଏ, କନ୍ୟାର ଘର ଦ୍ୱାର ନିକଟରେ ପହଞ୍ଚିଲେ ବରଯାତ୍ରୀ । ବର ତା’ ସାଙ୍ଗ ମାନଙ୍କ ସହିତ ମିଶି ନାଚିବାକୁ ଲାଗିଲା । ଡିଜେର ତାଳେ ତାଳେ ବର ଜଣକ ଏତେ ସମୟ ନାଚିଲେଯେ, ଶେଷରେ କନ୍ୟାଙ୍କ ପିତା ରାଗିଗଲେ । ପରିଣାମ ସ୍ୱରୂପ ବାହାଘରକୁ ଆସିଥିବା ଆଉ ଜଣେ ଯୁବକଙ୍କ ସହିତ ଝିଅକୁ ବାହା କରିଦେଲେ ।
କାହାଣୀଟି ଆପଣଙ୍କୁ କୌଣସି ସିନେମା ଭଳି ମନେ ହେଉଥିବ । କିନ୍ତୁ ଘଟଣାଟି ସତ । ଘଟଣା ମହାରାଷ୍ଟ୍ରର ବୁଲଢ଼ାଣାର ଜିଲ୍ଲାର ମଲକାପନୁର ପଙ୍ଗରା ଗାଁ’ର । ଏପ୍ରିଲ ୨୪ରେ ଥିଲା ବାହାଘର । ଝିଅର ବାପାଙ୍କ ଅଭିଯୋଗ ହେଉଛି ବର ମଦରେ ଟଳମଳ ହେଉଥିଲା, ଯେଉଁଥିପାଇଁ ସେ ତାଙ୍କ ଝିଅକୁ ତା ସହିତ ବାହା କଲେନାହିଁ ।
ଝିଅର ବାପା ଏହା ମଧ୍ୟ ଅଭିଯୋଗ ଆଣିଛନ୍ତିଯେ, ବରଯାତ୍ରୀ ତାଙ୍କ ଘର ଦ୍ୱାର ନିକଟରେ ୪ଟା ବେଳେ ପହଞ୍ଚିଲା, କିନ୍ତୁ ବର ରାତି ୮ଟା ଯାଏଁ ନାଚ କରୁଥାଏ । ଯାହା ସମସ୍ତଙ୍କୁ ବ୍ୟସ୍ତ ବିବ୍ରତ କରି ପକାଇଲା । ବିଳମ୍ବର କାରଣ ପଚାରିବାରୁ ବରଯାତ୍ରୀ ମାରପିଟ୍ ଆରମ୍ଭ କରିଦେଲେ । ଏହାପରେ ଝିଅଘର ବରଯାତ୍ରୀଙ୍କୁ ଖୁବ ପିଟିଲେ ଏବଂ ଖାଇବାକୁ ନ ଦେଇ ବିଦାୟ କରିଦେଲେ । ମାମଲା ଶେଷରେ ପଞ୍ଚାୟତରେ ପହଞ୍ଚିଲା । ଏଥିରେ ଧାର୍ଯ୍ୟ ହେଲାଯେ, ଝିଅର ବାହାଘର ହେବ, କିନ୍ତୁ ଅନ୍ୟ ଜଣେ ଯୁବକଙ୍କ ସହ ।
ଭୁବନେଶ୍ବର: ଗ୍ଲୋବାଲ ଓ୍ବାର୍ମିଂ ବିଶ୍ବ ପାଇଁ ବଡ଼ ଚିନ୍ତାର କାରଣ ପାଲଟିଛି । ଏବେ ବିଶ୍ବ ତାପାୟନ ରୋକିବାକୁ ତତ୍ପର ହୋଇଛି ବିଶ୍ବ ବ୍ୟାଙ୍କ । ଭାରତରେ ୫ଟି ଜାତୀୟ ଉଦ୍ୟାନରେ ଗ୍ରୀନ୍ ଏଜି ପ୍ରୋଜେକ୍ଟ କାର୍ଯ୍ୟକାରୀ କରିବାକୁ ଯୋଜନା କରିଛି ଓ୍ବାର୍ଲ୍ଡ ବ୍ୟାଙ୍କ୍ । ଓଡ଼ିଶାର ଶିମିଳିପାଳ ଜୈବମଣ୍ଡଳରେ ଏହି ପ୍ରକଳ୍ପ କାର୍ଯ୍ୟକାରୀ ହେବ ।
ଶିମିଳିପାଳ ପାଇଁ ବିଶ୍ବ ବ୍ୟାଙ୍କର ସ୍ପେଶାଲ ପ୍ୟାକେଜ୍ । ବଢିବ ଜାତୀୟ ଉଦ୍ୟାନର ଜୈବ ବିବିଧତା । କାର୍ଯ୍ୟକାରୀ ହେବ ଗ୍ରୀନ୍ ଏଜି ପ୍ରୋଜେକ୍ଟ । ଆହୁରି ଘଞ୍ଚ ହେବ ମୟୂରଭଞ୍ଜ ଜିଲ୍ଲାର ଶିମିଳିପାଳ ଅଭୟାରଣ୍ୟ । ଜାତୀୟ ଉଦ୍ୟାନର ସୁରକ୍ଷା ଓ ସଂରକ୍ଷଣ ପାଇଁ ସ୍ବତନ୍ତ୍ର ସହାୟତା ଘୋଷଣା କରିଛି ଓ୍ବାର୍ଲ୍ଡ ବ୍ୟାଙ୍କ୍ । ଗ୍ଲୋବାଲ ଓ୍ବାର୍ମିଂକୁ ନଜରରେ ରଖି ବିଶ୍ବ ବ୍ୟାଙ୍କ ଗ୍ରୀନ୍ ଏଜି ପ୍ରୋଜେକ୍ଟ କାର୍ଯ୍ୟକାରୀ କରିବାକୁ ଯାଉଛି । ଏନେଇ ୫୫ କୋଟି ଟଙ୍କା ବ୍ୟୟ ଅଟକଳ କରାଯାଇଥିବା ବେଳେ ବାରିପଦାରେ ଏକ ତିନି ଦିନିଆ କର୍ମଶାଳା ଅନୁଷ୍ଠିତ ହୋଇଛି ।
ଶିମିଳିପାଳ ଜୈବମଣ୍ଡଳର ଜୈବ ବିବିଧତା ବୃଦ୍ଧି ପାଇଁ ଏହି ପ୍ରକଳ୍ପରେ ୪ଟି ଦିଗ ଉପରେ ଗୁରୁତ୍ବ ଦିଆଯିବ । ଏଥିରେ ମୃତ୍ତିକା ସଂରକ୍ଷଣ, ଜଳ ସଂରକ୍ଷଣ, ଜୀବଜନ୍ତୁଙ୍କ ସୁରକ୍ଷା ଓ ଅଭୟାରଣ୍ୟ ପାଦଦେଶରେ ରହୁଥିବା ଆଦିବାସୀଙ୍କ ଜୀବନ ଜୀବିକା ଉପରେ ବିଶେଷ ଧ୍ୟାନ ଦିଆଯିବ ବୋଲି କର୍ମଶାଳାରେ ଆଲୋଚନା ହୋଇଛି । ପ୍ରାଥମିକ ପର୍ଯ୍ୟାୟରେ ଏହି ପ୍ରକଳ୍ପ ଆଗାମୀ ୩ ବର୍ଷ ପାଇଁ କାର୍ଯ୍ୟକାରୀ ହେବ ।
ଭାରତରେ ଗ୍ରୀନ୍ ଏଜି ପ୍ରୋଜେକ୍ଟ ୫ଟି ଜୈବମଣ୍ଡଳରେ କାର୍ଯ୍ୟକାରୀ ହେବ । ଓଡ଼ିଶା ସମେତ ମଧ୍ୟପ୍ରଦେଶ, ଉତ୍ତରାଖଣ୍ଡ, ରାଜସ୍ଥାନ ଓ ମିଜୋରାମର ଜାତୀୟ ଉଦ୍ୟାନ ଏଥିରେ ରହିଛି ।
