ଜଗତସିଂହପୁର: ବହୁଚର୍ଚ୍ଚିତ ଜଗତସିଂହପୁର ପ୍ରମୋଦିନ ରାଉଳଙ୍କୁ ଏସିଡ ମାଡ଼ ମାମଲାର ପ୍ରକାଶ ପାଇଁ ଦଣ୍ଡ ବିଧାନ । ଦୁଇ ଅଭିଯୁକ୍ତ ସନ୍ତୋଷ ବେଦାନ୍ତ ଏବଂ ଅନୀଲ ଦଳସିଂରାୟଙ୍କୁ ୧୪ ବର୍ଷ ସଶ୍ରମ କାରାଦଣ୍ଡାଦେଶ ଶୁଣାଇଛନ୍ତି ଜଗତସିଂହପୁର ଏଏସଜେ ମହିଳା କୋର୍ଟ । ୧୪ ବର୍ଷ ଜେଲ ସହ ୧୪ ହଜାର ଟଙ୍କା ଜରିମାନା କରାଯାଇଛି । ୨୦୦୯ ଏପ୍ରିଲ ୧୮ ତାରିଖରେ ପ୍ରମୋଦିନୀକୁ କନକପୁରଠାରେ ଏସିଡ଼ ମାଡ଼ ହୋଇଥିଲା ।
ଜଗତସିଂହପୁର ଜିଲ୍ଲା ତିର୍ତ୍ତୋଲ କନକପୁରର ପ୍ରମୋଦିନୀ ମଣିଚରଣ ଶାରଳା ଏକାଡେମୀ କଲେଜରେ ୨୦୦୯ରେ ଯୁକ୍ତଦୁଇରେ ଅଧ୍ୟୟନ କରୁଥିଲେ । ୨୦୦୯ ଏପ୍ରିଲ ୧୮ ତାରିଖ ସନ୍ଧ୍ୟା ୭ଟା ୧୫ ମିନିଟ ସମୟରେ ପ୍ରମୋଦିନୀ ତାଙ୍କ ଭାଇଙ୍କ ସହ ପାଖରେ ଥିବା ମାଉସୀଙ୍କ ଘରକୁ ଯାଉଥିବା ବେଳେ ଘର ପାଖ ମନ୍ଦିର ପଛପଟେ ଦୁଇ କଣ ଯୁବକ ଏକ ବାଇକରେ ଆସି ସାଙ୍ଗରେ ଯିବାକୁ କହିଥିଲେ । ପ୍ରମୋଦିନୀ ଏହାକୁ ବିରୋଧ କରିବା ସହ ପ୍ରମୋଦିନୀଙ୍କ ଭାଇ ମଧ୍ୟ ଏହାର ଦୃଢ ବିରୋଧ କରିଥିଲେ । ତା’ପରେ ଅଭିଯୁକ୍ତ ସନ୍ତୋଷ କୁମାର ବେଦାନ୍ତ ଏକ ଏସିଡ ବୋତଲ ବାହାର କରି ପ୍ରମୋଦିନୀଙ୍କ ମୁଣ୍ଡ ଓ ଦେହକୁ ଫିଙ୍ଗିବାରୁ ପ୍ରମୋଦିନୀ ଗୁରୁତର ହୋଇ ପଡ଼ିଥିଲେ । ସଙ୍ଗେ ସଙ୍ଗେ ତାଙ୍କୁ ଜଗତସିଂହପୁର ଓ ପରେ କଟକ ବଡ଼ ମେଡିକାଲରେ ଚିକିତ୍ସା ନିମନ୍ତେ ଭର୍ତ୍ତି କରାଯାଇଥିଲା । ପ୍ରମୋଦିନୀଙ୍କୁ ଅଭିଯୁକ୍ତ ସନ୍ତୋଷ ଏକ ତରଫା ଭଲ ପାଉଥିଲେ । ହେଲେ ପ୍ରମୋଦିନୀ ସନ୍ତୋଷକୁ ବିରୋଧ କରିଆସୁଥିଲେ । ଆଉ ଏଥିରେ ସନ୍ତୋଷକୁ ସାହାଯ୍ୟ କରୁଥିଲେ ନୟାଗଡ଼ର ଅନିଲ ଦଳସିଂହରାୟ । ଏମାନଙ୍କ ନାଁରେ ତିର୍ତ୍ତୋଲ ଥାନାରେ ମାମଲା ରୁଜୁ ହୋଇଥିଲା ।
