ଭୁବନେଶ୍ୱର: କମିଲା ବସ୍ ଭଡ଼ା । ତୈଳ ଦର କମିବା ପରେ କମିଛି ବସ୍ ଭଡ଼ା । କିଲୋମିଟର ପିଛା ଅର୍ଡିନାରୀ ବସ୍ ଭଡ଼ା ୯୨ରୁ ୮୯ ପଇସାକୁ ହ୍ରାସ ପାଇଛି । ଏକ୍ସପ୍ରେସ ଭଡ଼ା ୯୬ ପଇସାରୁ ୯୩ ପଇସା, ଡିଲକ୍ସ ଦର ୧ ଟଙ୍କା ୩୫ ପଇସାରୁ ୧ ଟଙ୍କା ୨୯ ପଇସାକୁ କମିଛି । ସେହିପରି ଏସି ଡିଲକ୍ସ ବସ ଭଡ଼ା ୧ ଟଙ୍କା ୬୩ ପଇସାରୁ ୧ ଟଙ୍କା ୫୭ ପଇସାକୁ ହ୍ରାସ ପାଇଛି । ସୁପର ପ୍ରିମିୟମ ବସ ଭଡ଼ା ୨ ଟଙ୍କା ୫୩ ପଇସାରୁ ୨ ଟଙ୍କା ୪୪ ପଇସାକୁ କମିଛି । ଅଟୋମେଟିକ ମେକାନିଜିମ୍ ପ୍ରଣାଳୀରେ ତୈଳ ଦର ହ୍ରାସ ପାଇବା ପରେ ବସଭଡ଼ା କମିଛି । ଆଜିଠାରୁ ଏହି ଦର ଲାଗୁ ହୋଇଛି । ବସଭଡା ହ୍ରାସ ନେଇ ଘରୋଇ ବସ୍ ମାଲିକ ସଂଘ ପକ୍ଷରୁ ସୂଚନା ଦିଆଯାଇଛି ।
ଯୌନକର୍ମୀଙ୍କ ପ୍ରତି ସଭ୍ୟ ଆଚରଣ ପାଇଁ ନିର୍ଦ୍ଦେଶ ଦେଲେ ସୁପ୍ରିମକୋର୍ଟ
ନୂଆଦିଲ୍ଲୀ: ଯୌନକର୍ମୀଙ୍କ ଉପରେ ପୋଲିସ ଦାଦାଗିରି ଚଳିବ ନାହିଁ । ଯୌନକର୍ମୀ ଓ ସେମାନଙ୍କ ସନ୍ତାନ ସନ୍ତତିଙ୍କ ପ୍ରତି ସଭ୍ୟ ଓ ଶାଳୀନତାପୂର୍ଣ୍ଣ ବ୍ୟବହାର କରିବା ଲାଗି ସମସ୍ତ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳର ପୋଲିସକୁ ନିର୍ଦ୍ଦେଶ ଦେଇଛନ୍ତି ସୁପ୍ରିମକୋର୍ଟ । କୌଣସି ଯୌନକର୍ମୀଙ୍କ ପ୍ରତି ମୌଖିକ ବା ଶାରୀରିକ ଭାବେ ନିର୍ଯାତନା ନ ଦେବା ଲାଗି ତାଗିଦ କରିଛନ୍ତି ସର୍ବୋଚ୍ଚ ଅଦାଲତ । ଜଷ୍ଟିସ ଏଲ. ନାଗେଶ୍ୱର ରାଓ, ଜଷ୍ଟିସ ବି.ଆର.ଗାଭାଇ ଓ ଜଷ୍ଟିସ ଏ.ଏସ.ବୋପାନ୍ନାଙ୍କୁ ନେଇ ଗଠିତ ଖଣ୍ଡପୀଠ କହିଛନ୍ତି, ଦେଶର ସମସ୍ତ ନାଗରିକଙ୍କୁ ସାମ୍ବିଧାନିକ ଅଧିକାର ପ୍ରଦାନ କରାଯାଇଛି ଏବଂ ଅନୈତିକ ଚାଲାଣ ନିରାକରଣ ଆଇନ ୧୯୫୬ ଅନୁସାରେ ପଦକ୍ଷେପ ନେବା ବେଳେ ଏଥିପ୍ରତି ଗୁରୁତ୍ୱ ଦେବାକୁ ହେବ ।
ଯୌନଗତ ନିର୍ଯାତନାର ଶିକାର ହୋଇଥିବା କୌଣସି ଯୌନକର୍ମୀଙ୍କୁ ମେଡିକାଲ ସମେତ ସମସ୍ତ ପ୍ରକାର ସହାୟତା ଯୋଗାଇ ଦେବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଯୌନକର୍ମୀଙ୍କ ଅଧିକାରର ସୁରକ୍ଷା ଲାଗି ପୋଲିସ ଓ ଅନ୍ୟାନ୍ୟ ଆଇନ କାର୍ଯ୍ୟକାରୀ ସଂସ୍ଥାଗୁଡିକୁ ସଚେତନ କରାଯିବାକୁ କୋର୍ଟ ପରାମର୍ଶ ଦେଇଛନ୍ତି । ସେହିପରି ଗିରଫଦାରୀ, ରେଡ୍ ଓ ରେସ୍କ୍ୟୁ ଅପରେସନ ସମୟରେ ଯୌନକର୍ମୀଙ୍କ ପରିଚୟ ସମ୍ପୂର୍ଣ୍ଣ ଗୋପନ ରଖିବା ଲାଗି କୋର୍ଟ କହିଛନ୍ତି । ଏନେଇ ମିଡିଆ ଉଦ୍ଦେଶ୍ୟରେ ଉପଯୁକ୍ତ ଗାଇଡଲାଇନ ଜାରି କରିବା ଲାଗି ପ୍ରେସ କାଉନସିଲ ଅଫ ଇଣ୍ଡିଆକୁ ଅଦାଲତ ନିର୍ଦ୍ଦେଶ ଦେଇଛନ୍ତି । ସେମାନଙ୍କର କୌଣସି ଫଟୋକୁ ପ୍ରକାଶନ ଓ ଟେଲିକାଷ୍ଟ ଉପରେ ବି ରୋକ ଲଗାଇବା ଦିଗରେ ପଦକ୍ଷେପ ନେବାକୁ ପିସିଆଇକୁ କୋର୍ଟ କହିଛନ୍ତି ।
ନୂତନ ଭାବେ ଲାଗୁ ହୋଇଥିବା ଆଇପିସିର ୩୫୪-ସି ଧାରା ଅନୁସାରେ ଯୌନକର୍ମୀଙ୍କ ଫଟୋ ପ୍ରକାଶନ କ୍ଷେତ୍ରରେ ଇଲେକ୍ଟ୍ରୋନିକ ମିଡିଆ ବିରୋଧରେ ଯେଉଁ କଟକଣା ରହିଛି, ତାହାକୁ କଡ଼ାକଡ଼ି ପାଳନ କରିବାକୁ କୋର୍ଟ ନିର୍ଦ୍ଦେଶ ଦେଇଛନ୍ତି । ଏହା ସହ ବିଭିନ୍ନ ସ୍ଥାନରେ ରହିଥିବା ଆଶ୍ରୟସ୍ଥଳୀ ଗୁଡିକ ଉପରେ ଏକ ସର୍ଭେ କରିବା ଲାଗି ରାଜ୍ୟ ସରକାରଙ୍କୁ କୋର୍ଟ ନିର୍ଦ୍ଦେଶ ଦେଇଛନ୍ତି ।
ନନ୍ଦନକାନନକୁ ଆସିବେ ନୂଆ ଅତିଥି, ବିଦେଶରୁ ଧଳାସିଂହ ଆଣିବାକୁ ଚିଠି
ଭୁବନେଶ୍ୱର: ନନ୍ଦନକାନନକୁ ଆସିବେ ନୂଆ ଅତିଥି । ବିଦେଶର ପ୍ରଥମ ଥର ପାଇଁ ଧଳା ସିଂହ ଆଣିବା ପାଇଁ ଚିଠି ହୋଇଛି । ଜେବ୍ରା ଓ କଙ୍ଗାରୁ ଆଣିବାକୁ ନୂଆ ଖୁଆଡ଼ ପ୍ରସ୍ତୁତ ହେଉଛି । ବର୍ଷା ଋତୁ ଆସିଲେ ଜନ୍ତୁଙ୍କୁ ଆଣିବାକୁ ଯୋଜନା କରାଯାଉଛି ବୋଲି ନନ୍ଦନକାନନ କର୍ତ୍ତୃପକ୍ଷ ସୂଚନା ଦେଇଛନ୍ତି । ସେହିପରି ନନ୍ଦନକାନନ ପ୍ରାଣୀ ଉଦ୍ୟାନକୁ ଇନ୍ଦୋର ପ୍ରାଣୀ ଉଦ୍ୟାନରୁ ଜନ୍ତୁ ଅଦଳ ବଦଳ ପ୍ରକ୍ରିୟାରେ ଆସିବେ ନୂଆ ଅତିଥି । କେନ୍ଦ୍ରୀୟ ଚିଡିଆଖାନା କର୍ତ୍ତୃପକ୍ଷଙ୍କ ଅନୁମୋଦନ ପରେ ନନ୍ଦନକାନନର ଧଳା ବାଘ ଅଦଳ ବଦଳ ପ୍ରକ୍ରିୟା ଦ୍ୱାରା ଆସିବେ ଗଣ୍ଡା, ବିଗଟେଲ ମକାକ, ଓଲୋ ଗିବନ ।
ଜେଲରେ କିରାଣୀ କାମ କରିବେ ନବଜୋତ ସିଂ ସିଦ୍ଧୁ, ଦୁଇଟି ସିପ୍ଟରେ କରିବେ ଡ୍ୟୁଟି
ଚଣ୍ଡିଗଡ଼: ଠିକଣା ବଦଳିବା ପରେ ବଦଳିଛି ପ୍ରଫେସନ । ପୂର୍ବତନ କ୍ରିକେଟରରୁ ପଞ୍ଜାବ ପଲିଟିକ୍ସର ବଡ଼ ଚେହେରା ଆଉ ଏବେ ଏବେ ଜେଲର କିରାଣି । ୩୪ ବର୍ଷ ତଳର ରୋଡରେଜ୍ ମାମଲାରେ ବର୍ଷେ ଜେଲଦଣ୍ଡ ପରେ ବଦଳିଛି ସିଦ୍ଧୁଙ୍କ ଲାଇଫ ଷ୍ଟାଇଲ । ପଟିଆଲା ସେଣ୍ଟ୍ରାଲ ଜେଲରେ କିରାଣି କାମ ପାଇଁ ସିଦ୍ଧୁଙ୍କୁ ଦିନକୁ ମିଳିବ ମାତ୍ର ୯୦ ଟଙ୍କା ଦରମା । ୧୯୮୮ ମସିହା ରୋଡରେଜ୍ ମାମଲାରେ ବର୍ଷେ ଜେଲ ଦଣ୍ଡ ପରେ ପଟିଆଲା ସେଣ୍ଟ୍ରାଲ ଜେଲରେ ଅଛନ୍ତି ପଞ୍ଜାବ କଂଗ୍ରେସ ନେତା ନବଜୋତ ସିଂ ସିଦ୍ଧୁ । ବାରାକ ନମ୍ବର ୭ରେ କଏଦୀ ସାଜିଛନ୍ତି ସିଦ୍ଧୁ ।
ପ୍ରଥମ ତିନି ମାସ ସିଦ୍ଧୁଙ୍କୁ ଜେଲ ଅଫିସିଆଲ କାଗଜପତ୍ର କରିବା ପାଇଁ ତାଲିମ ଦିଆଯିବ । ଜେଲ ନିୟମ ଅନୁସାରେ ତାଙ୍କୁ ପ୍ରଥମ ତିନି ମାସ ଦରମା ଦିଆଯିବ ନାହିଁ । ଏହାପରେ ତାଙ୍କୁ ଦୈନିକ ୪୦ରୁ ୯୦ ଟଙ୍କା ମଧ୍ୟରେ ଦରମା ଦିଆଯିବ । ତାଙ୍କ ଦକ୍ଷତା ଆଧାରରେ ଦରମା ନିର୍ଦ୍ଧାରଣ କରାଯିବ । ଏହାସହ ତାଙ୍କ ବ୍ୟାଙ୍କ ଆକାଉଣ୍ଟକୁ ଦରମା ପଠାଯିବ । ତେବେ ପଟିଆଲା ସେଣ୍ଟ୍ରାଲ ଜେଲରେ ସିଦ୍ଧୁ ଜଣେ ହାଇପ୍ରୋଫାଇଲ କଏଦୀ ହୋଇଥିବାରୁ ସେ ତାଙ୍କ ସେଲରୁ ହିଁ ଫାଇଲ କାମ କରିବେ ବୋଲି ଜେଲର ଜଣେ କର୍ମଚାରୀ ସୂଚନା ଦେଇଛନ୍ତି । ଦିନକୁ ଦୁଇଟି ସିଫ୍ଟରେ କାମ କରିବେ । ସକାଳ ୯ଟାରୁ ୧୨ ଓ ଅପରାହ୍ନ ୩ଟାରୁ ୫ଟା ପର୍ଯ୍ୟନ୍ତ ରହିବ ଡ୍ୟୁଟି ଟାଇମ । ସିଦ୍ଧୁ ରହୁଥିବା ବାରାକର ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଥିବା ବେଳେ ୫ ଜଣ ଓ୍ୱାଡେନ ଓ ଚାରି ଜଣ ଜେଲ ଅନ୍ତେବାସୀ ସିଦ୍ଧୁଙ୍କ ଉପରେ ନଜର ରଖିଛନ୍ତି ।
ବଢ଼ିଲା ତାଇଓ୍ୱାନ ଟେନସନ, ଚାରିପଟେ ସମରାଭ୍ୟାସ ଲାଗି ଚୀନର ଘୋଷଣା
ନୂଆଦିଲ୍ଲୀ: ତାଇଓ୍ୱାନକୁ ନେଇ ବଢ଼ିଲା ଟେନସନ । ଆମେରିକା ରାଷ୍ଟ୍ରପତି ଜୋ ବାଇଡେନଙ୍କ ବିରୋଧ ସତ୍ତ୍ୱେ ତାଇଓ୍ୱାନ ଚାରିପଟେ ସମରାଭ୍ୟାସ କରିବା ଲାଗି ଚୀନର ଘୋଷଣା । ବଳପୂର୍ବକ ଯଦି ତାଇଓ୍ୱାନକୁ ଚୀନ ସହ ମିଶାଇବା ଲାଗି ପଦକ୍ଷେପ ନିଆଯାଏ, ତେବେ ଆମେରିକା ହସ୍ତକ୍ଷେପ କରିବ ବୋଲି ବାଇଡେନ ଧମକ ଦେଇଥିବା ସତ୍ତ୍ୱେ ଚୀନ ସମରାଭ୍ୟାସ ଘୋଷଣା କରିଛି । ଦୀର୍ଘ ଦିନ ଧରି ତାଇଓ୍ୱାନକୁ ନିଜର ଏକ ପ୍ରଜାତନ୍ତ୍ର ବୋଲି ଚୀନ ଦାବି କରି ଆସୁଥିବା ବେଳେ ଆମେରିକା ଏହାର ବିରୋଧ କରିଆସୁଛି ।
ତାଇଓ୍ୱାନ ସହ ଆମେରିକାର ମେଣ୍ଟକୁ ବିରୋଧ କରି ପିପୁଲ୍ସ ଲିବରେସନ ଆର୍ମି ସମରାଭ୍ୟାସ କରିବ ବୋଲି ଚୀନ ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ କୁହାଯାଇଛି । ଗତ ସୋମବାର ତାଇଓ୍ୱାନ ଚାରିପାଖେ ପିଏଲଏ ଇଷ୍ଟର୍ଣ୍ଣ ଥିଏଟର କମାଣ୍ଡ ପକ୍ଷରୁ ଏକ ଯୁଦ୍ଧ ସଂକ୍ରାନ୍ତ ପ୍ରସ୍ତୁତି ଶେଷ ହୋଇଥିଲା । ସମୁଦ୍ର ଓ ଆକାଶରେ ବିଭିନ୍ନ ବାହିନୀ ରଣକୌଶଳ ପ୍ରଦର୍ଶନ କରିଥିଲେ । ପିପୁଲ୍ସ ଲିବରେସନ ଆର୍ମିକୁ ହାଇଆଲର୍ଟରେ ରଖାଯାଇଛି ଏବଂ ବାହ୍ୟ ଶକ୍ତିର ଯେକୌଣସି ପ୍ରକାର ମୁକାବିଲା ଲାଗି ସୈନ୍ୟବାହିନୀ ପ୍ରସ୍ତୁତ ବୋଲି ଚୀନ ପ୍ରତିରକ୍ଷା ମନ୍ତ୍ରାଳୟ ପକ୍ଷରୁ କୁହାଯାଇଛି । କ୍ୱାଡ ସମ୍ମିଳନୀରେ ଜାପାନ ପ୍ରଧାନମନ୍ତ୍ରୀ କିସିଦା ଫୁମିଓଙ୍କ ସହ ବାଇଡେନ ତାଇଓ୍ବାନ ପ୍ରସଙ୍ଗରେ ଆଲୋଚନା କରିଥିଲେ ଏବଂ ତାଇଓ୍ବାନର ନିରାପତ୍ତାକୁ ଆମେରିକା ଅଗ୍ରାଧିକାର ଦେବ ବୋଲି କହିଥିଲେ ।
ସରକାର ବଦଳିବା ପରେ ବି ଜଳୁଛି ଇସଲାମାବାଦ, ଆଜାଦୀ ମାର୍ଚ୍ଚ ବେଳେ ଭୟଙ୍କର ହିଂସା
ଇସଲାମାବାଦ: ସରକାର ବଦଳିବା ପରେ ବି ଜଳୁଛି ଇସଲାମାବାଦ । ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଆଜାଦୀ ମାର୍ଚ୍ଚ ବେଳେ ହିଂସାକାଣ୍ଡ । ତୁରନ୍ତ ନିର୍ବାଚନ କରିବା ଦାବିରେ ଇମରାନଙ୍କ ଦଳ ପିଟିଆଇ ପକ୍ଷରୁ ବିକ୍ଷୋଭ କରାଯାଉଥିବା ବେଳେ ପୋଲିସ ଓ PTI କର୍ମୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା । ତେବେ ଏହି ହିଂସାକାଣ୍ଡ ପରେ ସୁପ୍ରିମକୋର୍ଟ, ପାର୍ଲାମେଣ୍ଟ, ପିଏମ୍ ଆବାସ ଆଗରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ଦେଶରେ ଏକ ଆମଦାନିଭିତ୍ତିକ ସରକାର ଚାଲିଛି ଏବଂ ତୁରନ୍ତ ଦେଶରେ ସାନି ନିର୍ବାଚନ କରିବା ଲାଗି ଦାବି କରିଛନ୍ତି ଇମ୍ରାନ ।
ଇସଲାମାବାଦର ବିଭିନ୍ନ ସ୍ଥାନରେ ପୋଲିସ ସହ ପିଟିଆଇ କର୍ମୀଙ୍କ ଧସ୍ତାଧସ୍ତି ହୋଇଥିବାବେଳେ ଆନ୍ଦୋଳନକାରୀଙ୍କ ଉପରକୁ ଲୁହବୁହା ଗ୍ୟାସ ପ୍ରୟୋଗ କରିଛି ପୋଲିସ । ଇମ୍ରାନଙ୍କ ଆହ୍ୱାନ କ୍ରମେ ଇସଲାମାବାଦର ଡି-ଚୌକରେ ଆନ୍ଦୋଳନକାରୀମାନେ ଏକାଠି ହୋଇଛନ୍ତି । ରାଜଧାନୀରେ ପ୍ରତିବାଦ ରାଲି ଲାଗି ସୁପ୍ରିମକୋର୍ଟ ଅନୁମତି ଦେଇଥିବାରୁ କୋର୍ଟଙ୍କୁ ଧନ୍ୟବାଦ ଦେଇଛନ୍ତି ଇମ୍ରାନ । ହଜାର ହଜାର ଆନ୍ଦୋଳନକାରୀ ବ୍ୟାରିକେଡ ହଟାଇବା ସହ ପୋଲିସ ସହ ସଂଘର୍ଷ କରିଛନ୍ତି । ସେପଟେ ଏହି ରାଲିକୁ ବିରୋଧ କରିଛି ଶାସକ ଦଳ ।
ରାଜ୍ୟସଭା ଉପନିର୍ବାଚନ ପାଇଁ ପ୍ରକାଶ ପାଇଲା ବିଜ୍ଞପ୍ତି, ଜୁନ୍ ୧୩ରେ ହେବ ଭୋଟ ଗ୍ରହଣ
ଭୁବନେଶ୍ୱର: ରାଜ୍ୟସଭା ଉପନିର୍ବାଚନ ପାଇଁ ପ୍ରକାଶ ପାଇଲା ବିଧିବଦ୍ଧ ବିଜ୍ଞପ୍ତି । ବିଧାନସଭା ପକ୍ଷରୁ ପ୍ରକାଶ ପାଇଲା ବିଧିବଦ୍ଧ ବିଜ୍ଞପ୍ତି । ଆଜିଠୁ ଜୁନ ୨ ଯାଏ ହେବ ନାମାଙ୍କନ । ଜୁନ ୩ ତାରିଖରେ ହେବ ଯାଞ୍ଚ । ଆସନ୍ତା ୧୩ ତାରିଖରେ ସକାଳ ୯ଟାରୁ ଅପରାହ୍ନ ୪ଟା ପର୍ଯ୍ୟନ୍ତ ଚାଲିବ ଭୋଟ ଗ୍ରହଣ । ସୁବାସ ସିଂ ଇସ୍ତଫା ଦେବା ପରେ ହେଉଛି ଉପନିର୍ବାଚନ । ଏଯାଏ ୫ ସେଟ୍ ନାମାଙ୍କନ ନିଆଯାଇଥିବା ଜଣାପଡିଛି ।
କୋଲକାତାରେ ଜୀବନ ହାରିଲେ ବଙ୍ଗୀୟ ଅଭିନେତ୍ରୀ ବିଦିଶା ମଜୁମଦାର
କୋଲକାତା: ଅଭିନେତ୍ରୀଙ୍କ ଆତ୍ମହତ୍ୟା । ପ୍ରେମରେ ଧୋକା ପରେ ଆତ୍ମହତ୍ୟା କରିଛନ୍ତି ବଙ୍ଗୀୟ ଅଭିନେତ୍ରୀ । କୋଲକାତା ନାଗେର ବଜାର କଲୋନୀସ୍ଥିତ ଘରୁ ଅଭିନେତ୍ରୀ ବିଦିସା ମଜୁମଦାରଙ୍କ ଝୁଲନ୍ତା ମୃତଦେହ ଉଦ୍ଧାର କରିଛି ପୋଲିସ । ମୃତଦେହ ସହ ପୋଲିସ ସେହି ଘରୁ ଏକ ସୁଇସାଇଡ ନୋଟ୍ ମଧ୍ୟ ଜବତ କରିଛି । ମାନସିକ ଚାପରେ ଥିବାରୁ ଆତ୍ମହତ୍ୟା କରିଛି ବୋଲି ସୁଇସାଇଡ ନୋଟରେ ଉଲ୍ଲେଖ ରହିଛି ।
ଅନ୍ୟପଟେ ବିଦିସାଙ୍କୁ ତାଙ୍କ ପୁରୁଷ ବନ୍ଧୁ ଧୋକା ଦେବାରୁ ସେ ଆତ୍ମହତ୍ୟା କରିଛନ୍ତି ବୋଲି ନୋଟରେ ଲେଖାଯାଇଛି । ଦୀର୍ଘଦିନ ଧରି ବିଦିସାଙ୍କୁ ଇଣ୍ଡଷ୍ଟ୍ରୀରେ କାମ ମିଳୁ ନଥିବା ବେଳେ ପ୍ରେମିକଙ୍କ ଧୋକା ଯୋଗୁ ସେ ଆତ୍ମହତ୍ୟା କରିଥାଇପାରନ୍ତି ବୋଲି ସନ୍ଦେହ କରୁଛି ପୋଲିସ । ସେପଟେ ବିଦିସାଙ୍କ ରୁମରୁ ମିଳିଥିବା ସୁଇସାଇଡ ନୋଟକୁ ନେଇ ପୋଲିସ ତଦନ୍ତ ଆରମ୍ଭ କରିଛି ।
ରଥଯାତ୍ରା ପାଇଁ ଚାଲିଛି ଜୋରସୋର ପ୍ରସ୍ତୁତି, ସରିଲାଣି ୩୧ ଚକ ନିର୍ମାଣ
ପୁରୀ: ବିଶ୍ୱପ୍ରସିଦ୍ଧ ରଥଯାତ୍ରା ପାଇଁ ଜୋରସୋରରେ ଚାଲିଛି ପ୍ରସ୍ତୁତି । ଆଗେଇ ଚାଲିଛି ରଥ ନିର୍ମାଣ । ଏପର୍ଯ୍ୟନ୍ତ ତିନି ରଥର ୪୨ଟି ଚକ ମଧ୍ୟରୁ ୩୧ଟିର ନିର୍ମାଣ ଶେଷ ହୋଇଛି । ପ୍ରତି ରଥର ତିନୋଟି ଲେଖାଏ ଭୂଇଁରେ ୧୨ଟି ଚଉତା କାଠ ରହିଥାଏ । ପ୍ରତି ରଥ ପାଇଁ ଆବଶ୍ୟକ ୪ଟି ଲେଖାଏ ମୁହାଁଟି ଓ ନିରାଡ଼ି କାର୍ଯ୍ୟ ଶେଷ ହୋଇଛି । ପହିରେ ବିନ୍ଧ ସରିବା ପରେ ଏବେ ଏଥିରେ ବିଲେଇବାଡ଼ିଆ ପଦ୍ଧତିରେ ସିଙ୍ଗଡ଼ା ଲାଗି ହେଉଛି । ରୂପକାର ସେବକମାନେ କଣ ଗୁଜରେ ନୃସିଂହ ମୂର୍ତ୍ତି ଖୋଦେଇ କରୁଥିବା ବେଳେ ଦୋଳବେଦିରେ ଘଡ଼ି ମୁହଁ ଦଣ୍ଡା କଣ୍ଟା ନିର୍ମାଣରେ ଲାଗିଛନ୍ତି ଓଝା ସେବକମାନେ । ସମସ୍ତ ଚକ ଓ ଅଖ ସଂଯୁକ୍ତ ହେଲେ ରଥର ମୂଳଦୁଆ ପଡ଼ିବ । ଶୀତଳଷଷ୍ଠୀ ସୁଦ୍ଧା ସମସ୍ତ ଚକ କାମ ସାରିବାକୁ ଲକ୍ଷ୍ୟ ରହିଛି ।
ସେପଟେ ଛତିଶା ନିଯୋଗ ବୈଠକରେ ରଥଯାତ୍ରା ସମ୍ପର୍କରେ ହୋଇଛି ବିସ୍ତୃତ ଆଲୋଚନା । ଭକ୍ତମାନେ ସ୍ନାନ ମଣ୍ଡପ ଉପରେ ଜଳଲାଗି ଓ ହାତୀବେଶ ଦର୍ଶନ ପାଇଁ ସୁଯୋଗ ପାଇବେ । ତେବେ କେହି ବିଗ୍ରହଙ୍କୁ ସ୍ପର୍ଶ କରିପାରିବେ ନାହିଁ । ସ୍ନାନ ପୂର୍ଣ୍ଣିମାଠାରୁ ନିଳାଦ୍ରୀ ବିଜେ ପର୍ଯ୍ୟନ୍ତ ନୀତି ସମ୍ପର୍କରେ ନୀତି ସବକମିଟି ବୈଠକରେ ଆଲୋଚନା ପରେ ଏହାକୁ ଛତିଶା ନିଯୋଗ ବୈଠକରେ ଅନୁମୋଦନ କରାଯାଇଛି । ପ୍ରଭୁଙ୍କ ଜଳଲାଗିକୁ ଶୃଙ୍ଖଳିତ କରିବା ଓ ହାତୀବେଶ ଓଲାଗି ସମୟରେ ଶୃଙ୍ଖଳା ରକ୍ଷା କରିବା ପାଇଁ ସମ୍ପୃକ୍ତ ସେବାୟତମାନଙ୍କୁ ପରାମର୍ଶ ଦିଆଯାଇଛି ।
କଳାହାଣ୍ଡିରେ ମାତିଲେ ମାଓବାଦୀ, ଭବାନୀପାଟଣା ସଦର ଥାନା ସାନ ପିପିଲି ଗାଁରେ ଲଙ୍କାକାଣ୍ଡ
ଭବାନିପାଟଣା: କଳାହାଣ୍ଡି ଜିଲ୍ଲା ଭବାନିପାଟଣା ସଦର ଥାନା ଅଧୀନ ସାନ ପିପିଲି ଗାଁରେ ମାଓବାଦୀଙ୍କ ଲଙ୍କାକାଣ୍ଡ । ରାସ୍ତାକାମକୁ ବିରୋଧ କରି ୩ଟି ଟ୍ରାକ୍ଟର, ଗୋଟିଏ ଜେସିବି ଦୁଇଟି ଟିପର ଜାଳିଦେଲେ ମାଓବାଦୀ । ଗତକାଲି ବିଳମ୍ବିତ ରାତିରେ ମାଓବାଦୀମାନେ ଏଭଳି କାଣ୍ଡ ଭିଆଇଛନ୍ତି । ପିପିଲି ଗ୍ରାମର ପୋକାରିଘାଟଠାରୁ ମନସ୍କ ପର୍ଯ୍ୟନ୍ତ ଚାଲିଥିବା ରାସ୍ତା କାର୍ଯ୍ୟ ବନ୍ଦ କରିବାକୁ ଠିକାଦାରଙ୍କୁ ପୂର୍ବରୁ ମାଓବାଦୀମାନେ ତାଗିଦ କରିଥିଲେ । ମାତ୍ର ଠିକାଦାର ଏହାକୁ ଶୁଣିନଥିଲେ । ତେବେ ଭବାନୀପାଟଣା ସହରଠାରୁ ମାତ୍ର ୧୫ କିମି ଦୂରରେ ମାଓବାଦୀଙ୍କ ଏଭଳି କାଣ୍ଡ ଯୋଗୁ ସ୍ଥାନୀୟ ଲୋକେ ଭୟଭୀତ ଅବସ୍ଥାରେ ରହିଛନ୍ତି ।