ଭୁବନେଶ୍ୱର: ଟ୍ବିନସିଟିରେ ପ୍ରବଳ ବର୍ଷା । ଭୁବନେଶ୍ବର, କଟକରେ ଘଡ଼ଘଡ଼ି ସହ ପ୍ରବଳ ବର୍ଷା । ଆକାଶରେ ପ୍ରବଳ ମେଘ ଘୋଟି ଅସିଥିବା ସହ ଜୋରରେ ବର୍ଷା ହେଉଛି । ଫଳରେ ଗରମ ଓ ଗୁଳୁଗୁଳିରୁ ତ୍ରାହି ମିଳିଛି । ସେପଟେ ରାଜ୍ୟରେ ସକ୍ରିୟ ହେଉଛି ଦକ୍ଷିଣ ପଶ୍ଚିମ ମୌସୁମୀ ବାୟୁ । ପୂର୍ବ ଝାଡ଼ଖଣ୍ଡ ଏବଂ ଉତ୍ତର ଓଡ଼ିଶା ଉପକୂଳରେ ସୃଷ୍ଟି ହୋଇଛି ଘୂର୍ଣ୍ଣିବଳୟ । ବାୟୁମଣ୍ଡଳର ଉପରିଭାଗରେ ଦକ୍ଷିଣକୁ ଢଳିରହିଛି ଘୂର୍ଣ୍ଣିବଳୟ । ଯାହା ଫଳରେ ଆସନ୍ତା ୨୪ ଘଣ୍ଟା ମଧ୍ୟରେ ପ୍ରବଳ ବର୍ଷା ସମ୍ଭାବନା ରହିଛି । ବାଲେଶ୍ବର, ଭଦ୍ରକ, ମୟୂରଭଞ୍ଜ, କେନ୍ଦୁଝର, ଯାଜପୁର, କେନ୍ଦ୍ରାପଡ଼ା, ଜଗତସିଂହପୁର, କଟକ, ପୁରୀ, ଖୋର୍ଦ୍ଧାରେ ପ୍ରବଳ ବର୍ଷା ନେଇ ସତର୍କତା ଜାରି ହୋଇଛି । ଅଧିକାଂଶ ସ୍ଥାନରେ ୭୦ ରୁ ୧୧୦ ମିଲିମିଟର ବର୍ଷା ସମ୍ଭାବନା ଥିବା ଟ୍ୱିଟ୍ କରି ସୂଚନା ଦେଲା ଆଞ୍ଚଳିକ ପାଣିପାଗ କେନ୍ଦ୍ର । ଗତକାଲି ସୁଦ୍ଧା ସ୍ବାଭାବିକଠାରୁ ୩୮ ପ୍ରତିଶତ କମ୍ ବର୍ଷା ରେକର୍ଡ ହୋଇଛି ।
ରଥ ଯାତ୍ରା ପାଇଁ ପୁରୀରେ କରାଯିବ ବ୍ୟାପକ ଟିକାକରଣ: ଜନସ୍ୱାସ୍ଥ୍ୟ ନିର୍ଦ୍ଦେଶକ
ଭୁବନେଶ୍ୱର: ଆଗକୁ ରଥ ଯାତ୍ରା ଆସୁଛି । ପୁରୀରେ ଲକ୍ଷ ଲକ୍ଷ ଲୋକଙ୍କ ସମାଗମ ହେବାର ସମ୍ଭାବନା ରହିଛି । ତେଣୁ ପୁରୀରେ ଅଧିକ ଟୀକାକରଣ କରିବାକୁ ପୁରୀ ପ୍ରଶାସନକୁ ଅବଗତ କରାଯାଇଛି । ଯେଉଁମାନେ ଦ୍ୱିତୀୟ ଡୋଜ ବା ପ୍ରିକସନ ଡୋଜ ନେଇନାହାନ୍ତି ସେମାନଙ୍କୁ ଏକ ସ୍ୱତନ୍ତ୍ର କ୍ୟାମ୍ପ କରି ଟୀକା ନେବା ପାଇଁ ଅଗବତ କରାଇଛି ସ୍ୱାସ୍ଥ୍ୟ ବିଭାଗ । ଏହାସହ ପରିମଳ ଓ ସମସ୍ତ ଆନୁସଙ୍ଗିକ ବ୍ୟବସ୍ଥା କରିବାକୁ ନିର୍ଦ୍ଦେଶ ଦିଆଯାଇଛି । କୋଭିଡ ସଂକ୍ରମଣ ରହିଛି ଆଗକୁ ମଧ୍ୟ ରହିଥିବ ।
ରାଜ୍ୟରେ ଯେତିକି ଆକ୍ଟିଭ କେସ୍ ରହିଛି ସେଥିରୁ ବହୁତ କମ୍ ସଂଖ୍ୟାରେ ଆକ୍ରାନ୍ତ ହସ୍ପିଟାଲ ଯାଉଛନ୍ତି । ଯେହେତୁ ରାଜ୍ୟରେ ଭଲ ଭାବରେ ଟୀକାକରଣ ହୋଇଛି ତେବେ ରୋଗର ଭୟ କମ୍ ରହିଛି । ଅନ୍ୟପଟେ ଘର ଘର ବୁଲି ସ୍ୱାସ୍ଥ୍ୟ କର୍ମୀ ଏବଂ ଆଶା କର୍ମୀ ମାନେ ରୋଗ ଚିହ୍ନଟ କରାଯାଉଛି । ଯେହେତୁ ଏହି ସମୟରେ ବିଶେଷ କରି କୋଭିଡ, ଡାଇରିଆ, ଡେଙ୍ଗୁ, ଟିବି ଏବଂ ମେଲେରିଆ ବଢିଥାଏ । ତେବେ ଘର ଘର ବୁଲି ସ୍ୱାସ୍ଥ୍ୟ କର୍ମୀ ମାନେ ଲୋକଙ୍କୁ ଚିହ୍ନଟ କରିବା ପାଇଁ କିଭଳି ଭାବରେ ସେମାନଙ୍କୁ ପରୀକ୍ଷା କରାଯିବ ସେନେଇ ଚିହ୍ନଟ କରାଯାଉଥିବା କହିଛନ୍ତି ଜନସ୍ବାସ୍ଥ୍ୟ ନିର୍ଦ୍ଦେଶକ ନିରଞ୍ଜନ ମିଶ୍ର ।
ଶିବସେନାର ଅଭିଯୋଗ: ସୁରଟ ହୋଟେଲରେ ବିଧାୟକଙ୍କୁ ମାରପିଟ୍ କରିଛି ପୋଲିସ
ସୁରଟ: ମହାରାଷ୍ଟ୍ରରେ ଏକନାଥ ସିନ୍ଦେଙ୍କ ନେତୃତ୍ବରେ ବିଧାୟକଙ୍କର ବିଦ୍ରୋହ ପରେ ସରକାର ଭାଙ୍ଗିବା ନେଇ ଚର୍ଚ୍ଚା ଜୋର ଧରିଛି । ଏହାରି ମଧ୍ୟରେ ଏକ ବଡ ଅଭିଯୋଗ ଆଣିଛି ଶିବସେନା । ଶିବସେନା କହିଛି ଏକନାଥ ସିନ୍ଦେଙ୍କ କ୍ୟାମ୍ପରେ ସାମିଲ ଅକୋଲାରୁ ବିଧାୟକ ନିତିନ ଦେଶମୁଖଙ୍କୁ ସୁରଟ ହୋଟେଲରେ ପୋଲିସ ମାରପିଟ କରିଛି । ସେ ମୁମ୍ବାଇ ଆସିବାକୁ ଚାହହୁଁଥିଲେ, କିନ୍ତୁ ତାଙ୍କୁ ବନ୍ଧକ କରି ଆସମର ଗୌହ୍ବାଟୀ ନିଆଯାଇଛି ।
ସୁରଟର ସ୍ଥାନୀୟ ଶିବସେନା ନେତା ପରେଶ ଖେର ଗଣମାଧ୍ୟମକୁ କହିଛନ୍ତି ନିତିନ ଦେଶମୁଖ ହୋଟେଲରୁ ବାହାରି ଏକ ମାର୍କେଟକୁ ଯାଇଥିଲେ, ସେଠାରେ ସେ ଫୋନ ଯୋଗେ ଆମକୁ ସହାୟତା ମାଗିଥିଲେ ମୁମ୍ବାଇ ଯିବା ପାଇଁ । ଆମେ ମାର୍କେଟରେ ପହଞ୍ଚିବା ବେଳକୁ ପୋଲିସ ତାଙ୍କୁ ଧରି ହୋଟେଲ ନେଇଯାଉଥିଲା । ଆମେ ମଧ୍ୟ ସେମାନଙ୍କ ପଛେ ପଛେ ହୋଟେଲ ପର୍ଯ୍ୟନ୍ତ ଯାଇଥିଲୁ । କିନ୍ତୁ ହୋଟେଲ ବାହାରେ ଆମକୁ ଅଟକାଇ ଦିଆଯାଇଥିଲା । ତେବେ ନିତିନ ମୁମ୍ବାଇ ଯିବେ ବୋଲି ଜିଦ୍ ଧରିବା ପରେ ପୋଲିସ ଅଧିକାରୀ ତାଙ୍କୁ ମାରପିଟ୍ କରିଥିଲେ । ସୂତ୍ରରୁ ମିଳିଥିବା ସୂଚନାନୁଯାୟୀ ପୋଲିସ ଏବଂ ବିଧାୟକଙ୍କ ମଧ୍ୟରେ ହାତାହାତି ମଧ୍ୟ ହୋଇଥିଲା । ଏହାପରେ ଅସୁସ୍ଥ ହୋଇ ନିତିନଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା ।
ଅନ୍ୟପକ୍ଷରେ ଶିବସେନା ନେତା ସଞ୍ଜୟ ରାଉତ କହିଛନ୍ତି ନିତିନ ଦେଶମୁଖଙ୍କୁ ସୁରଟ ହୋଟେଲରେ ହାର୍ଟ ଆଟାକ ଆସିଥିଲା, କିନ୍ତୁ ବିଜେପି ନେତା ତାଙ୍କୁ ବନ୍ଧକ ରଖିଛନ୍ତି । ସେମାନେ ୯ ବିଧାୟକଙ୍କୁ ଅପହରଣ କରି ରଖିଛନ୍ତି । ସେମାନେ ମୁମ୍ବାଇ ଆସିବାକୁ ଚାହୁଁଥିବାରୁ ଅପହରଣ କରାଯାଇଥିବା ସେ ଦାବି କରିଛନ୍ତି । ଅନ୍ୟପକ୍ଷରେ ବିଧାୟକ ନିତିନ ଦେଶମୁଖଙ୍କ ପତ୍ନୀ ପ୍ରାଞ୍ଜଳି ଅକୋଲା ଥାନାରେ ବିଧାୟକଙ୍କ ନିଖୋଜ ରିପୋର୍ଟ ଦେଇଛନ୍ତି । ସେ ଅଭିଯୋଗରେ କହିଛନ୍ତି ତାଙ୍କ ସ୍ବାମୀ ମଙ୍ଗଳବାର ସକାଳ ସୁଦ୍ଧା ଅକୋଲା ସ୍ଥିତ ନିଜ ଘରକୁ ଆସିବାର ଥିଲା, କିନ୍ତୁ ସୋମବାର ସନ୍ଧ୍ୟାରୁ ହିଁ ତାଙ୍କ ଫୋନ ଲାଗୁନି । ତେଣୁ ମୋ ସ୍ବାମୀ ନିଖୋଜ ହୋଇଯାଇଛନ୍ତି ତାଙ୍କ ଜୀବନ ପ୍ରତି ବିପଦ ରହିଛି ବୋଲି ଲିଖିତ ଅଭିଯୋଗରେ ଦର୍ଶାଇଛନ୍ତି ।
ଦୁଇ ଜଣଙ୍କ ଝଗଡ଼ା ପାଇଁ ଥାନାରେ ଅଟକ ରହିଲା ଗାଈ
ଭୁବନେଶ୍ୱର: ଦୁଇ ଜଣଙ୍କ ଝଗଡ଼ା ପାଇଁ ଥାନାରେ ଅଟକ ରହିଲା ଗାଈ । ସମସ୍ୟା ସମାଧାନ ନହେବାରୁ ଧଉଳି ଥାନାରେ ଅଟକ ରହିଛି ଗାଇ । ଏମିତି ଏକ ଅଭାବନୀୟ ଘଟଣା ଦେଖିବାକୁ ମିଳିଛି ଭୁବନେଶ୍ୱର ଉପକଣ୍ଠ ଧଉଳି ଥାନା ଅଞ୍ଚଳରେ । ସୂଚନା ଅନୁସାରେ ୫ ଦିନ ପୂର୍ବରୁ ଖଟୁଆପଡ଼ାର ଜଣଙ୍କ ଗାଈ ହଜିଯାଇଥିଲା । ସେହି ଗାଈ ନଖାଉରପାଟଣାର ଜଣେ ମହିଳାଙ୍କ ଗୁହାଳରେ ଥିଲା । ତେବେ ହଜିଯାଇଥିବା ଗାଈର ମାଲିକ ଉକ୍ତ ମହିଳାଙ୍କ ଗୁହାଳକୁ ଯାଇ ଗାଈ ଫିଟାଇ ନେଇଥିଲେ । ଯାହା ପରେ ଆରମ୍ଭ ହୋଇଥିଲା ବିବାଦ । ଗୋଟିଏ ଗାଈକୁ ଦୁଇ ଜଣ ନିଜର ବୋଲି ଦାବି କରୁଛନ୍ତି । ତେବେ ଏହି ସମସ୍ୟା ସମାଧାନ ନହେବାରୁ ମାମଲା ଥାନାକୁ ଯାଇଛି । ଅନ୍ୟପକ୍ଷରେ ଗାଈର ପ୍ରକୃତ ମାଲିକ କିଏ ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇନାହିଁ ।
କିଏ ଏହି ବ୍ୟକ୍ତି ଯାହାଙ୍କୁ ଲୋକମାନେ ଅମିତାଭ ବଚ୍ଚନ କହୁଛନ୍ତି? ଜାଣନ୍ତୁ ସମ୍ପୂର୍ଣ୍ଣ ଘଟଣା
ନନ୍ଦିଘୋଷ ବ୍ୟୁରୋ: କିଏ ଏହି ବ୍ୟକ୍ତି ଯାହାଙ୍କ ଫଟୋ ଚିତ୍ର ସୋସିଆଲ ମିଡିଆରେ ଚର୍ଚ୍ଚା ସାଉଣ୍ଟୁଛି । ଥଗ୍ସ ଅଫ୍ ହିନ୍ଦୋସ୍ତାନ ବଲିଉଡ ଚଳଚିତ୍ରରେ ଅମିତାଭ ବଚ୍ଚନ ଏହି ଲୁକ୍ ରେ ଥିଲେ ବୋଲି ଅନେକ ପ୍ରଶ୍ନ କରିଛନ୍ତି । କେହି କେହି ଇଣ୍ଟରନେଟ ବ୍ୟବହାରକାରୀ ତାଙ୍କୁ ବଲିଉଡର ବରିଷ୍ଠ ଅଭିନେତା ଅମିତାଭ ବଚ୍ଚନଙ୍କ ସହ ତୁଳନା କରିଛନ୍ତି । ତେବେ କିଏ ଏହି ବ୍ୟକ୍ତି ଏବଂ କାହିଁକି ଲୋକ ତାଙ୍କୁ ବଚ୍ଚନଙ୍କ ସହ ତୁଳନା କରୁଛନ୍ତି । ଜାଣନ୍ତୁ ସମ୍ପୂର୍ଣ୍ଣ ଘଟଣା ।
ବିଶ୍ବବିକ୍ଷ୍ୟାତ ଫଟୋଗ୍ରାଫର ଷ୍ଟିଭ ଏମସିକରି ନିଜ ଇନଷ୍ଟାଗ୍ରାମ ପୋଷ୍ଟରେ ଜଣେ ଆଫଗାନ ଶରଣାର୍ଥୀଙ୍କ ଫଟୋ ପୋଷ୍ଟ କରିଛନ୍ତି । ଫଟୋରେ ଧଳା ଦାଢି ରଖି ଆଖିରେ ଚଷମା ଲଗାଇଥିବା ଜଣେ ବୃଦ୍ଧ ବ୍ୟକ୍ତି ରହିଛନ୍ତି । ସେ ହେଉଛନ୍ତି ଆଫଗାନ ଶରଣାର୍ଥୀ ଶହବୁଜ । ଏବଂ ଏହି ପୋଷ୍ଟରେ ଷ୍ଟିଭ ଲେଖିଛନ୍ତି ପାକିସ୍ତାନରେ ବିଶ୍ବର କୋଣ ଅନୁକୋଣରୁ ଲୋକମାନେ ଆସି ଶରଣାର୍ଥୀ ଭାବେ ରହୁଛନ୍ତି । ତାଙ୍କ ସ୍ଥିତି କଥା ଚିନ୍ତା କଲା ବେଳକୁ ଦୁଃଖ ଲାଗୁଛି । ଆମେ ସମସ୍ତେ ମିଶି ଏମାନଙ୍କୁ ସମର୍ଥନ କରିବା ଆବଶ୍ୟକ । ସେ ଏହି ପୋଷ୍ଟ କରିବା ପରେ ଫଟୋକୁ ୭୭ ହଜାରରୁ ଉର୍ଦ୍ଧ୍ବ ଲାଇକ୍ ମିଳିବା ସହ ସେୟାର କରାଯାଇଛି ।
https://www.instagram.com/p/CfCHGDzOFge/?utm_source=ig_web_button_share_sheet
ଏହି ଫଟୋ ପ୍ରଥମେ ୨୦୧୮ ମସିହାରେ ଭାଇରାଲ୍ ହୋଇଥିଲା । ଏହାପରେ ଲୋକମାନେ ଫଟୋ ଟିକୁ ସେୟାର କରି ଅମିତାଭ ବଚ୍ଚନଙ୍କ ସହ ତୁଳନା କରିଛନ୍ତି । ଥଗ୍ସ ଅଫ୍ ହିନ୍ଦୁସ୍ତାନ ଫିଲ୍ମରେ ଏହିଭଳି ଲୁକରେ ନଜର ଆସିଥିଲେ ବିଗ୍ ବି । ସେହି କାରଣରୁ ସମସ୍ତେ ଆଫଗାନ ଶରଣାର୍ଥୀଙ୍କୁ ବିଗ୍ ବିଙ୍କ ଭଳି ଦେଖାଯାଉଥିବା କଥା କହିଛନ୍ତି ।
ମହାରାଷ୍ଟ୍ରରେ ସରକାର ଭଙ୍ଗ ନେଇ ସଙ୍କେତ ଦେଲେ ସଞ୍ଜୟ ରାଉତ
ମୁମ୍ବାଇ: ମହାରାଷ୍ଟ୍ରରେ ଚାଲିଛି ମହାନାଟକ । କିଏ ମହାରାଷ୍ଟ୍ରରେ ସରକାର କରିବା ତାହା ଏପର୍ଯ୍ୟନ୍ତ ସ୍ପଷ୍ଟ ହୋଇପାରିନାହିଁ । ତେବେ ଏହାରି ମଧ୍ୟରେ ଶିବସେନାର ବରିଷ୍ଠ ନେତା ସଞ୍ଜୟ ରାଉତଙ୍କ ଏକ ଟ୍ୱିଟ ଚର୍ଚ୍ଚାର ବିଷୟ ପାଲଟିଛି । ମହାରାଷ୍ଟ୍ରରେ ଭଙ୍ଗ ହୋଇପାରେ ବିଧାନସଭା । ବିଧାନସଭା ଭଙ୍ଗ ନେଇ ସଙ୍କେତ ଦେଇଛନ୍ତି ସଞ୍ଜୟ ରାଉତ । ଦଳୀୟ ଅନ୍ତକନ୍ଦଳ ଓ ରାଜନୈତିକ ସଙ୍କଟକୁ ନେଇ ସ୍ବୀକାର କରିଛନ୍ତି ଶିବସେନା ନେତା ସଞ୍ଜୟ ରାଉତ । ଦଳ ଭିତରେ ମତଭେଦ ରହିବା ସ୍ବାଭାବିକ, ତେବେ ଏହାର ସମାଧାନ ବାହାର କରାଯିବ ବୋଲି କହିଛନ୍ତି ଶିବସେନା ସାଂସଦ ସଞ୍ଜୟ ରାଉତ ।
महाराष्ट्रातील राजकीय घडामोडींचा प्रवास विधान सभा बरखास्तीचया दिशेने..
— Sanjay Raut (@rautsanjay61) June 22, 2022
ଉଦ୍ଧବ ସରକାର ବିଧାନସଭା ଭଙ୍ଗ ପାଇଁ ସୁପାରିସ କରିପାରନ୍ତି । ମୋଟ ୫୫ ଶିବସେନା ବିଧାୟକଙ୍କ ମଧ୍ୟରୁ ୪୦ ଏକନାଥଙ୍କ ସମର୍ଥନରେ ଥିବା ଦାବି ହେଉଛି । ବିଧାନସଭା ଭଙ୍ଗ ଚର୍ଚ୍ଚା ଭିତରେ ବାୟୋ ବଦଳାଇଛନ୍ତି ଆଦିତ୍ୟ ଠାକରେ । ବାୟୋରୁ ମନ୍ତ୍ରୀ ପଦକୁ ହଟାଇ ଦେଇଛନ୍ତି ଆଦିତ୍ୟ । ରାଜନୈତିକ ସଙ୍କଟ ଭିତରେ ରାଜ୍ୟପାଳଙ୍କ ପରେ କରୋନା ଆକ୍ରାନ୍ତ ହୋଇଛନ୍ତି ଉଦ୍ଧବ ଠାକରେ ।
ଆଫଗାନିସ୍ତାନରେ ଭୂକମ୍ପ, ପ୍ରାୟ ୧୦୦୦ ଜଣଙ୍କ ମୃତ୍ୟୁ
କାବୁଲ: ଆଜି ସକାଳେ ଆଫଗାନିସ୍ତାନରେ ଭୟାବହ ଭୂମିକମ୍ପ ହୋଇଛି । ଭୂମିକମ୍ପରେ ସାରା ଆଫଗାନିସ୍ତାନ ଧ୍ବସ୍ତବିଧ୍ବସ୍ତ ହୋଯାଇଛି । ଏଥିରେ ପ୍ରାୟ ୧୦୦୦ ଜଣଙ୍କ ମୃତ୍ୟୁ ହୋଇଥିବା ବେଳେ ୫୦୦ରୁ ଉର୍ଦ୍ଧ୍ବ ଆହତ ହୋଇଥିବା ସୂଚନା । ରିକ୍ଟର ସ୍କେଲରେ ଏହାର ତୀବ୍ରତା ୬.୧ ମପାଯାଇଛି । ସେହିପରି ପାକିସ୍ତାନରେ ମଧ୍ୟ ଭୂକମ୍ପର ଝଟକା ଅନୁଭୂତ ହୋଇଛି ।
ଆମେରିକୀୟ ଜିଓଲଜିକାଲ ସର୍ଭେର ରିପୋର୍ଟ ମୁତାବକ ଏହି ଭୂମିକମ୍ପର କେନ୍ଦ୍ରବିନ୍ଦୁ ପୂର୍ବ ଆଫଗାନିସ୍ତନର ଖୋସ୍ତ ସହରଠାରୁ ୪୪ କିମି ଦୂରରେ ରହିଥିଲା । ଆଫଗାନିସ୍ତାନର ପାକଟିକା ପ୍ରାନ୍ତରରେ ଭୟଙ୍କର ବିଧ୍ବଂସ ଘଟିଛି । ଏଠି ସର୍ବାଧିକ ୫୦ରୁ ଅଧିକ ଲୋକଙ୍କ ମୃତ୍ୟୁ ହୋଇଥିବା ସୂଚନା । ପାକିସ୍ତାନର ଖୈବର ପଖତୁନଖ୍ବା ପ୍ରାନ୍ତରରେ ଜଣେ ଲୋକର ମୃତ୍ୟୁ ଘଟିଥିବା ସୂଚନା ରହିଛି । କୁହାଯାଉଛି ଯେ ଭୂକମ୍ପ ପ୍ରଭାବରେ ଘରର ଛାତ ପଡି ତାଙ୍କର ମୃତ୍ୟୁ ଘଟିଛି ।
ପାକିସ୍ତାନରେ ପେଶାୱର, ଇସଲାମବାଦ, ଲାହୋର ଏବଂ ପଞ୍ଜାବ ତଥା ଖୈବର ପଖତୁନଖ୍ବା ପ୍ରାନ୍ତରର ବିଭିନ୍ନ ଅଞ୍ଚଳ ଏବଂ ଭାରତ ପର୍ଯ୍ୟନ୍ତ ଏହି ଭୟଙ୍କର ଭୂକମ୍ପର ଝଟକା ଅନୁଭୂତ ହୋଇଛି । ଭୂକମ୍ପର ପ୍ରଭାବ ଏତେ ଭୟଙ୍କର ଥିଲା ଯେ ଆଫଗାନିସ୍ତାନରେ ଅନେକ ବଡ ବଡ କୋଠା ଭୁଶୁଡି ପଡିଛି । ଯାହାଫଳରେ ତଳେ ଚାପି ହୋଇ ଅନେକ ଲୋକଙ୍କ ମୃ୍ତ୍ୟୁ ହୋଇଛି । ମୃତ୍ୟୁ ସଂଖ୍ୟା ଆଗକୁ ବଢିବା ଆଶଙ୍କା କରାଯାଉଛି ।
ବିପଦସଙ୍କୁଳ ଅବସ୍ଥାରେ ଆଇଗିଣିଆ ପାତ୍ରପଡ଼ା ଓଭରବ୍ରିଜ୍, ଖଣ୍ଡ ଖଣ୍ଡ ହୋଇ ଗଳୁଛି ଇଟା
ଭୁବନେଶ୍ୱର: ବିପଦସଙ୍କୁଳ ଅବସ୍ଥାରେ ଆଇଗିଣିଆ ପାତ୍ରପଡ଼ା ଓଭର ବ୍ରିଜ । ୧୬ ନମ୍ବର ଜାତୀୟ ରାଜପଥର ଓଭରବ୍ରିଜ ପାଇଁ ଅପ୍ରୋଚ୍ ରୋଡ ତିଆରି ବେଳେ ଭାଙ୍ଗି ଯାଇଛି ଓଭର ବ୍ରିଜ । NHAI ନିଜେ କରୁଛି ଅପ୍ରୋଚ୍ ରୋଡ । ଭୁବନେଶ୍ୱରରୁ ଖୋର୍ଦ୍ଧା ଯିବା ବେଳେ ଏମ୍ସ ହସପିଟାଲ ଛକରେ ଘଟିଛି ଏହି ଘଟଣା । ଓଭର ବ୍ରିଜ ଉପରେ ଗାଡ଼ି ଯିବା ବେଳେ ଖଣ୍ଡ ଖଣ୍ଡ ହୋଇ ଗଳୁଛି ସିମେଣ୍ଟ ଇଟା, ଚିପ୍ସ ଓ ମୋରମ । ଦୁଇ ଦିନ ହେଲାଣି ୨୦ ଫୁଟ ଓସାରର ଅତଡ଼ା ଖସିପଡ଼ିଛି । ଜାତୀୟ ରାଜପଥ ବିଭାଗ ଗ୍ରୀନ ମ୍ୟାଟ ଢ଼ାଙ୍କିବା ଛଡା ଆଉ କିଛି ପଦକ୍ଷେପ ନେଇନାହିଁ । ଚିରାଚରିତ ଭାବେ ଶହ ଶହ ଗାଡି ଚଳାଚଳ କରୁଛି । ତେବେ ଏପରି ସ୍ଥିତିରେ ଯଦି ଦୁର୍ଘଟଣା ଘଟେ ତାହାଲେ କିଏ ଦାୟୀ ରହିବ ତାହାକୁ ନେଇ ପ୍ରଶ୍ନ ଉଠିଛି ।
ଅଭିନେତ୍ରୀ ରଶ୍ମିରେଖା ଆତ୍ମହତ୍ୟା ମାମଲା: ପୁରୁଷ ବନ୍ଧୁ ସନ୍ତୋଷଙ୍କୁ ଟାର୍ଗେଟ କଲେ ସାଥୀ କଳାକାର
ଭୁବନେଶ୍ୱର: ଟେଲି ଅଭିନେତ୍ରୀ ରଶ୍ମିରେଖା ଓଝା ଆତ୍ମହତ୍ୟା ମାମଲା । ରଶ୍ମିଙ୍କ ମୃତ୍ୟୁକୁ ସହଜରେ ଗ୍ରହଣ କରିପାରୁନାହାନ୍ତି ସାଙ୍ଗସାଥୀ ଓ ସାଥି କଳାକାର । ରଶ୍ମି ଖୁବ୍ ଭଲ ପିଲା ଥିଲେ ତାଙ୍କ ମୃତ୍ୟୁ ହୋଇଯାଇଥିବା ସହଜରେ ବିଶ୍ବାସ କରିହେଉନଥିବା କହିଛନ୍ତି ତାଙ୍କ ସାଥି କଳାକାର ଡାନି । ରଶ୍ମି ଖୁବ୍ ଭଲ ଅଭିନୟ କରୁଥିଲେ । ତାଙ୍କର କ୍ୟାରିୟର ଓ ପରିବାରକୁ ନେଇ ସେ ଖୁବ୍ ଖୁସି ଥିଲେ । ହଠାତ୍ ତାଙ୍କ ଆତ୍ମହତ୍ୟାକୁ ଗ୍ରହଣ କରିହେଉନି ବୋଲି ସେ କହିଛନ୍ତି । ଏହାସହ ତାଙ୍କ ସ୍ବାମୀ ସନ୍ତୋଷ ପାତ୍ରଙ୍କ ସହ ଝଗଡ଼ା ହୋଇଥିଲା । ଯଦି ସନ୍ତୋଷ କିଛି ଭୁଲ୍ କରିନାହାନ୍ତି ତେବେ ସେ କାହିଁକି ସାମ୍ନାକୁ ଆସୁନାହାନ୍ତି ବୋଲି ଡାନି ପ୍ରଶ୍ନ କରିଛନ୍ତି ।
ଅନ୍ୟପକ୍ଷରେ ସନ୍ତୋଷ ଓ ରଶ୍ମିଙ୍କ ପୂର୍ବତନ ପ୍ରେମିକ ରାଜାକୁ ପଚରାଉଚରା କରିବ ପୋଲିସ । ମୋବାଇଲ ଡିଟେଲ୍ସ ସହ ଫେସବୁକ, ହ୍ବାଟ୍ସଆପରେ ରଶ୍ମିରେଖାଙ୍କ ବାବଦରେ ତଥ୍ୟ ମାଗିଛି ପୋଲିସ । ଆତ୍ମହତ୍ୟାର ୫ ଦିନ ପୂର୍ବରୁ ମଧ୍ୟ ହାତ କାଟି ଆତ୍ମହତ୍ୟା ଉଦ୍ୟମ କରିଥିଲେ ରଶ୍ମି । କାହିଁକି କେଉଁ କଥାକୁ ନେଇ ରଶ୍ମି ମାନସିକ ଚାପରେ ଥିଲେ କି । ଅନେକ କିଛି ପ୍ରଶ୍ନର ଉତ୍ତର ଖୋଜୁଛି ପୋଲିସ । ଅନ୍ୟପଟେ ରଶ୍ମିରେଖାଙ୍କ ପରିବାର ସନ୍ତୋଷ ହତ୍ୟା କରିଥିବା ନେଇ ଅଭିଯୋଗ କରୁଥିବା ବେଳେ ସୁଇସାଇଡ ନୋଟରେ କ୍ଳିନଚିଟ୍ ଦେଇଛନ୍ତି ରଶ୍ମିରେଖା । ଆତ୍ମହତ୍ୟା ପଛରେ ତ୍ରିକୋଣୀୟ ପ୍ରେମ କାହାଣୀ ଚର୍ଚ୍ଚା ହେଉଥିବା ବେଳେ ସନ୍ତୋଷ ଫେରାର ଥିବା ଚର୍ଚ୍ଚା ହେଉଛି ।
NDA ରାଷ୍ଟ୍ରପତି ପ୍ରାର୍ଥିନୀ ଦ୍ରୌପଦୀ ମୁର୍ମୁଙ୍କୁ Z+ ସିକ୍ୟୁରିଟି
ଭୁବନେଶ୍ୱର: ଦେଶର ପ୍ରଥମ ଆଦିବାସୀ ମହିଳା ରାଷ୍ଟ୍ରପତି ହୋଇପାରନ୍ତି ଓଡିଆ ନେତ୍ରୀ ଦ୍ରୌପଦୀ ମୁର୍ମୁ । ଝାଡ଼ଖଣ୍ଡର ପୂର୍ବତନ ରାଜ୍ୟପାଳ ଦ୍ରୌପଦୀ ମୁର୍ମୁଙ୍କୁ ରାଷ୍ଟ୍ରପତି ପ୍ରାର୍ଥୀ କରିଛି ଏନଡିଏ । ଏନେଇ ସବୁଜ ସଙ୍କେତ ଦେଇଛି ଏନଡିଏ ସଂସଦୀୟ ବୋର୍ଡର ବୈଠକ । ଏନଡିଏ ରାଷ୍ଟ୍ରପତି ପ୍ରାର୍ଥୀ ଲାଗି କିଛି ଦିନ ଧରି ଚାଲିଥିଲା ବିଚାର ବିମର୍ଷ ।
ରାଷ୍ଟ୍ରପତି ପ୍ରାର୍ଥୀ ଭାବରେ ଦ୍ରୌପଦୀ ମୁର୍ମୁଙ୍କ ନାମ ଘୋଷଣା ପରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି କହିଛନ୍ତି, ସମାଜ ସେବା, ନିଷ୍ପେସିତ ବର୍ଗର ଉନ୍ନତି ଲାଗି ଦ୍ରୌପଦୀ ସାରା ଜୀବନ ସଂଘର୍ଷ କରିଆସିଛନ୍ତି । ଦ୍ରୌପଦୀ ଦେଶରେ ମହାମାନ୍ୟ ରାଷ୍ଟ୍ରପତି ହେବା ନେଇ ସେ ଆଶାବାଦୀ । ସାମାଜିକ ଜୀବନ, ରାଜନୀତି, ଆଦିବାସୀ ବିକାଶ ଲାଗି ଦ୍ରୌପଦୀ ସାରା ଜୀବନ ସଂଗ୍ରାମ କରିଆସିଛନ୍ତି । ପ୍ରାର୍ଥୀ ହେବା ପରେ ଦୌପଦୀ କହିଛନ୍ତି, ମାଟିର ଝିଅ ହୋଇଥିବାରୁ ବିଜେଡିର ସହଯୋଗ ସେ କାମନା କରୁଛନ୍ତି । ରାଷ୍ଟ୍ରପତି ପ୍ରାର୍ଥୀ ହେବା ପରେ ଆଜି ସକାଳୁ ବିଭିନ୍ନ ମନ୍ଦିର ଯାଇ ପୂଜାର୍ଚ୍ଚନା କରିଛନ୍ତି ଦ୍ରୌପଦୀ । ଏନଡିଏର ରାଷ୍ଟ୍ରପତି ପ୍ରାର୍ଥୀ ହୋଇଥିବାରୁ ଦ୍ରୌପଦୀ ମୁର୍ମୁଙ୍କୁ Z+ ସିକ୍ୟୁରିଟି ପ୍ରଦାନ କରାଯାଇଛି ।