ମୁମ୍ବାଇ: ମହାରାଷ୍ଟ୍ର ରାଜନୈତିକ ସଙ୍କଟ ମଧ୍ୟରେ ଫେସବୁକ୍ ଲାଇଭରେ ରାଜ୍ୟବାସୀଙ୍କୁ ସମ୍ବୋଧନ କଲେ ମହାରାଷ୍ଟ୍ର ମୁଖ୍ୟମନ୍ତ୍ରୀ ତଥା ଶିବସେନା ଅଧ୍ୟକ୍ଷ ଉଦ୍ଧବ ଠାକରେ । ସମ୍ବୋଧନରେ ସେ ବିଦ୍ରୋହୀଙ୍କୁ କଡା ସନ୍ଦେଶ ଦେଇଛନ୍ତି । ବିଦ୍ରୋହୀଙ୍କୁ ସାମ୍ନାକୁ ଆସି ଆଲୋଚନା କରିବା ପାଇଁ ଠାକରେ ଆହ୍ବାନ କରିଛନ୍ତି। ସାମ୍ନାକୁ ଆସିବା ପାଇଁ ସଙ୍କୋଚ ଲାଗୁଥିଲେ ଫୋନ୍ ଯୋଗେ ମଧ୍ୟ ଆମେ କଥା ହୋଇପାରିବା ବୋଲି କହିଛନ୍ତି ଉଦ୍ଧବ ଠାକରେ । ପୂର୍ବରୁ ବାଲାସାହେବଙ୍କ ଯେଉଁ ହିନ୍ଦୁତ୍ବ ଦଳ ଶିବସେନା ଥିଲା ଏବେ ବି ଅଛି ବୋଲି ସେ ଦୃଢୋକ୍ତି ପ୍ରକାଶ କରିଛନ୍ତି ।
ସେ କହିଛନ୍ତି ଯେ, ମୋ ଇସ୍ତଫା ଚାହୁଁଥିଲେ ସାମ୍ନାକୁ ଆସି ସ୍ପଷ୍ଟ ଭାବେ କୁହ । ସୁରଟ ଯିବାର କଣ ଆବଶ୍ୟକତା ଥିଲା । ଯଦି କେହି ବି ଜଣେ ବିଧାୟକ କୁହନ୍ତି ଇସ୍ତଫା କଥା ତେବେ ଇସ୍ତଫା ଦେଇଦେବି । ମୁଖ୍ୟମନ୍ତ୍ରୀ ପଦ ସହ ଶିବସେନା ଅଧ୍ୟକ୍ଷ ପଦ ଛାଡିବା ପାଇଁ ପ୍ରସ୍ତୁତ ଅଛି । ଶିବସୈନିକ ମୋ ସହିତ ବିଶ୍ବାସଘାତକତା କରନ୍ତୁ ନାହିଁ। ମୋ ପରେ ଶିବସୈନିକ ମୁଖ୍ୟମନ୍ତ୍ରୀ ହେଲେ ଖୁସି ହେବି । ମୁଁ କୌଣସି ଚ୍ୟାଲେଞ୍ଜକୁ ଡରି ପଛକୁ ହଟିବି ନାହିଁ ବୋଲି ସ୍ପଷ୍ଟ କହିଛନ୍ତି ଉଦ୍ଧବ ଠାକରେ । ଆଗକୁ ସେ କହିଥିଲେ, ଯଦି ସରକାର ଗଢିବା ପାଇଁ କାହା ପାଖରେ ବହୁମତ ଅଛି ସେ ସରକାର ଗଢନ୍ତୁ । ମୋର କୌଣସି ଆପତ୍ତି ନାହିଁ । ମୁଁ ସବୁବେଳେ ଶିବସୈନିକଙ୍କ ସହ ଛିଡା ଅଛି । ଯଦି ସମସ୍ୟା କିଛି ଅଛି ସାମ୍ନାକୁ ଆସି ଆଲୋଚନା କର ।
ସୂଚନାଯୋଗ୍ୟ ଶିବସେନାର ବରିଷ୍ଠ ନେତା ଏକନାଥ ସିନ୍ଦେ ଗତ ଦୁଇଦିନ ହେବ ୩୦ ରୁ ଉର୍ଦ୍ଧ୍ବ ବିଧାୟକଙ୍କୁ ନେଇ ପ୍ରଥମେ ସୁରଟ ଯାଇଥିଲେ ଏବଂ ଆଜି ଗୌହ୍ବାଟିର ଏକ ହୋଟେଲରେ ଯାଇ ଅଛନ୍ତି । ୪୬ ବିଧାୟକଙ୍କ ସମର୍ଥନ ତାଙ୍କ ପାଖରେ ଥିବା ସିନ୍ଦେ କହିଛନ୍ତି । ଏପଟେ ସରକାର ଭାଙ୍ଗିବା ନେଇ ମଧ୍ୟ ଚର୍ଚ୍ଚା ଜୋର ଧରିଛି । ଶିବସେନା ଯଦି ବିଦ୍ରୋହୀ ବିଧାୟକଙ୍କୁ ମନାଇବାରେ ବିଫଳ ହୁଏ ତେବେ ମହାବିକାଶ ଅଘାଡି ମେଣ୍ଟ ସରକାର ଭାଙ୍ଗିବାର ଆଶଙ୍କା ଅଧିକ ରହିଛି । ଅନ୍ୟପକ୍ଷରେ ବିଜେପି ମଧ୍ୟ ସଠିକ ସମୟକୁ ଅପେକ୍ଷା କରିଛି ସରକାର ଗଠନ କରିବା ପାଇଁ ।
