ନୂଆଦିଲ୍ଲୀ: ଭେଣ୍ଟିଲେଟରରେ କମେଡିଆନ ରାଜୁ ଶ୍ରୀବାସ୍ତବ । ଦିଲ୍ଲୀ ଏମସରେ ରାଜୁ ଶ୍ରୀବାସ୍ତବଙ୍କ ଚାଲିଛି ଚିକିତ୍ସା । ତେବେ ଶ୍ରୀବାସ୍ତବଙ୍କ ସ୍ୱାସ୍ଥ୍ୟ ଅପଡେଟ ନେଇ କୌଣସି ସୂଚନା ଦିଆଯାଇନାହିଁ । ଗତ ମଙ୍ଗଳବାର ଜିମ୍ ଓ୍ୱାର୍କଆଉଟରେ କରୁଥିବାବେଳେ ସେ ହୃଦଘାତର ସମ୍ମୁଖୀନ ହୋଇଥିଲେ । ପରେ ତାଙ୍କୁ ଏମସ୍ ହସ୍ପିଟାଲରେ ଭର୍ତ୍ତି କରାଯାଇଥିଲା । ତେବେ ତାଙ୍କ ସ୍ୱାସ୍ଥ୍ୟାବସ୍ଥା ସ୍ଥିର ରହିଥିବା ସୂଚନା ମିଳିଛି । ଡାକ୍ତରମାନେ ରାଜୁଙ୍କ ସ୍ୱାସ୍ଥ୍ୟ ପ୍ରତି ଗୁରୁତ୍ୱ ଦେଇ ଚିକିତ୍ସା ଜାରି ରଖିଛନ୍ତି । ବଲିଉଡ ଅଭିନେତା ଓ ରାଜନେତାଙ୍କ ନକଲ କରି ବେଶ୍ ଚର୍ଚ୍ଚାରେ ଅଛନ୍ତି ରାଜୁ । ଦି ଗ୍ରେଟ ଇଣ୍ଡିଆନ ଲଫର ଚାଲେଞ୍ଜ, କମେଡି କା ମହା ମୁକାବିଲା, କମେଡି ସର୍କସ, କମେଡି ନାଇଟ୍ସ ଓ୍ୱିଥ କପିଲ ଆଦି କାର୍ଯ୍ୟକ୍ରମରେ ସେ ଯଥେଷ୍ଟ ଖ୍ୟାତି ଅର୍ଜନ କରିଛନ୍ତି ।
ମହଙ୍ଗା ପଡ଼ିଲା ଅମୀରଙ୍କ ମନ୍ତବ୍ୟ, ବକ୍ସ ଅଫିସରେ ଫିକା ପଡ଼ିଲା ‘ଲାଲ ସିଂ ଚଡ୍ଡା’
ମୁମ୍ବାଇ: ରିଲିଜ୍ ହୋଇଛି ବହୁ ପ୍ରତୀକ୍ଷିତ ଫିଲ୍ମ ’ଲାଲ୍ ସିଂ ଚଢ଼ା’ । ଅମୀର ଖାନଙ୍କ ଫିଲ୍ମକୁ ଦେଖିବା ପାଇଁ ଦର୍ଶକଙ୍କ ମଧ୍ୟରେ ବେଶ୍ ଉତ୍ସାହ ରହିଥାଏ । କିନ୍ତୁ ଚଳିତ ଥର ଦର୍ଶକଙ୍କ ମଧ୍ୟରେ ଏଭଳି ଉତ୍ସାହ ଦେଖିବାକୁ ମିଳିନାହିଁ । ଅମୀର ଖାନଙ୍କ ଫିଲ୍ମ ରିଲିଜ୍ ପୂର୍ବରୁ ସୋସିଆଲ ମିଡିଆରେ ଟ୍ରେଣ୍ଡ କରିଥିଲା ’ବଏକଟ୍ ଲାଲ୍ ସିଂ ଚଢ଼ା’ । ଫିଲ୍ମ ବିରୋଧରେ ଦର୍ଶକଙ୍କ ଏଭଳି ପ୍ରତିକ୍ରିୟା ଦେଖି ଚିନ୍ତାରେ ପଡ଼ିଯାଇଥିଲେ ଅମୀର । ତେବେ ଆଜି ଫିଲ୍ମ ରିଲିଜ୍ ପରେ ଯାହା ଆଶା କରାଯାଉଥିଲା ତାହା ଦେଖିବାକୁ ମିଳିଛି । ଅମୀରଙ୍କ ଫିଲ୍ମ ରିଲିଜ୍ ହେଲେ ଯେଉଁଠି ହଲରେ ଟିକେଟ ମିଳେ ନାହିଁ ଏବେ ସେହି ହଲରେ ବହୁ ସଂଖ୍ୟାରେ ସିଟ୍ ଖାଲି ପଡ଼ୁଥିବାରୁ ଦେଖିବାକୁ ମିଳିଛି । ଦେଶର ବିଭିନ୍ନ ଫିଲ୍ମ ହଲରେ ଦର୍ଶକଙ୍କ ଭିଡ଼ ପରିଲିକ୍ଷିତ ହେଉନାହିଁ । ବିଭିନ୍ନ ହଲର ଟିକେଟ ମଧ୍ୟ ପୂରା ବିକ୍ରି ହେଉନାହିଁ ।
ସେପଟେ ଏହି ଫିଲ୍ମ ଏକ ନିରାଶ ଜନକ ଫିଲ୍ମ ବୋଲି କହିଛନ୍ତି ଫିଲ୍ମ ସମୀକ୍ଷକ ତରୁଣ ଆଦର୍ଶ । ସେ ଟ୍ୱିଟ୍ କରି ଲେଖିଛନ୍ତି ଯେ ଅମୀର ଖାନଙ୍କ ‘ଲାଲ୍ ସିଂ ଚଡ୍ଡା’ର ତେଲ ରାସ୍ତା ମଝିରେ ହିଁ ସରିଗଲା । ଫିଲ୍ମରେ ରୋମାଞ୍ଚିତ କରିବା ଭଳି କିଛି ଚିତ୍ରନାଟ୍ୟର ଅଭାବ ରହିଛି । ଫିଲ୍ମର ଇଣ୍ଟରଭାଲ ପରେ ଫିଲ୍ମ ଅଧିକ ନିରାଶ କରୁଛି । ଫିଲ୍ମରେ କିଛି ଜବରଦସ୍ତ କ୍ଷଣ ରହିଛି । କିନ୍ତୁ ମୋଟା ମୋଟି ଭାବରେ ଏହି ଫିଲ୍ମଟି ନିରାଶଜନକ ବୋଲି କହିଛନ୍ତି ଫିଲ୍ମ ସମୀକ୍ଷକ ତରୁଣ ଆଦର୍ଶ ।
#OneWordReview…#LaalSinghChaddha: DISAPPOINTS.
Rating: ⭐️⭐️#AamirKhan’s comeback vehicle #LSC runs out of fuel midway… Lacks a captivating screenplay to enthrall you [second half goes downhill]… Has some terrific moments, but lacks fire in totality. #LaalSinghChaddhaReview pic.twitter.com/rTuYfJT629— taran adarsh (@taran_adarsh) August 11, 2022
ତେବେ କିଛି ଦିନ ହେବ ସୋସିଆଲ ମିଡିଆରେ ’ବୟକଟ୍ ଲାଲ୍ ସିଂ ଚଢ଼ା’ ଯେଉଁ ଟ୍ରେଣ୍ଡ ଚାଲିଥିଲା ତାହାକୁ ନେଇ ମୁଁହ ମଧ୍ୟ ଖୋଲିଥିଲେ ଅମୀର । ସେ କହିଥିଲେ କି ଯଦି ମୁଁ କାହା ମନରେ କୌଣସି ପ୍ରକାରେ କଷ୍ଟ ଦେଇଥାଏ, ତେବେ ସେଥିପାଇଁ ମୁଁ କ୍ଷମା ମାଗୁଛି । କାହା ମନରେ ଆଘାତ ଦେବାକୁ ମୁଁ ଚାହେ ନାହିଁ । ଯଦି କିଏ ଫିଲ୍ମ ଦେଖିବାକୁ ନ ଚାହାନ୍ତି, ମୁଁ ତାଙ୍କ ଭାବନାକୁ ସମ୍ମାନ ଦେଉଛି। କିନ୍ତୁ ଯଦି ସେମାନେ ଫିଲ୍ମ ଦେଖିବାକୁ ଯିବେ ତେବେ ମୁଁ ଖୁସି ହେବି ଏବଂ ଆମର ଶ୍ରମ ସାର୍ଥକ ହେବ। ବହୁ ଲୋକ ଏଥିପାଇଁ କଠିନ ପରିଶ୍ରମ କରିଛନ୍ତି। ମୁଁ ଆଶା କରୁଛି ଲୋକଙ୍କୁ ଏହା ଭଲ ଲାଗିବ। ତେବେ ଅମୀର କ୍ଷମା ମାଗିବା ପରେ ମଧ୍ୟ ପ୍ରଥମ ଦିନରେ ପୂରା ଭାରତରେ ତାଙ୍କ ଫିଲ୍ମକୁ ଭଲ ରେସପନ୍ସ ମିଳିନଥିବା ଦେଖିବାକୁ ମିଳିଛି ।
ଆଇଟି ରେଡର ଫିଲ୍ମି କାହାଣୀ, ୧୨୦ ଗାଡ଼ିରେ ଲାଗିଥିଲା ଦୁଲହନ୍ ହମ୍ ଲେ ଜାୟେଙ୍ଗେର ଷ୍ଟିକର
ମୁମ୍ବାଇ: ୨୬୦ ବରଯାତ୍ରୀ, ୧୨୦ ଗାଡ଼ିରେ ଦୁଲହନ୍ ହମ୍ ଲେ ଜାୟେଙ୍ଗେର ଷ୍ଟିକର । ମହାରାଷ୍ଟ୍ର ଜଲନାରେ ବ୍ୟବସାୟୀଙ୍କ ଘରେ ଆୟକର ରେଡର କାହାଣୀ ବେଶ୍ ଫିଲ୍ମି । ବ୍ୟବସାୟୀଙ୍କ ଘରେ ବେନାମୀ ସଂପତ୍ତିର ପାହାଡ଼ ଥିବା ନେଇ ପକ୍କା ଖବର ପାଇବା ପରେ, ରେଡ୍ ପାଇଁ ପ୍ଲାନିଂ ଆରମ୍ଭ କରିଥିଲା ଆୟକର ବିଭାଗ । ନାସିକ, ପୁନେ, ଥାନେ ଓ ମୁମ୍ବାଇର ୨୬୦ ଅଧିକାରୀଙ୍କୁ ରେଡରେ ସାମିଲ କରାଯାଇଥିଲା । ରେଡର ଖବର ଯେପରି ଲିକ୍ ନ ହେବ, ସେଥିପ୍ରତି ସ୍ୱତନ୍ତ୍ର ଦୃଷ୍ଟି ରଖାଯାଇଥିଲା ।
ରେଡରେ ବ୍ୟବହାର ହେବାକୁ ଥିବା ସବୁ ଗାଡ଼ିରେ ଲାଗିଥିଲା ସମାନ ପ୍ରକାରର ଷ୍ଟିକର । ଆୟକର ବିଭାଗର କର୍ମଚାରୀ ଓ ଅଧିକାରୀ ରେଡ୍ ନୁହେଁ ବରଂ କାହା ବିବାହ ଉତ୍ସବରେ ଯୋଗ ଦେବାକୁ ଯାଉଥିବା ଭଳି ଯେପରି ଲାଗିବ, ସେଥିପାଇଁ ଏପରି ବ୍ୟବସ୍ଥା କରାଯାଇଥିଲା । ସବୁ ଗାଡ଼ିର କୋଡ୍ ଓ୍ୱାର୍ଡ ଥିଲା ଦୁଲହନ୍ ହମ୍ ଲେ ଜାୟେଙ୍ଗେ । ଜଲାନା ପହଞ୍ଚିବା ପରେ ବ୍ୟବସାୟୀଙ୍କ ଘର, ଅଫିସ୍, କାରଖାନାରେ ରେଡ୍ ଆରମ୍ଭ କରିଥିଲେ ଆୟକର ଅଧିକାରୀ ଓ କର୍ମଚାରୀ । ଅଗଷ୍ଟ ୧ରୁ ୮ ତାରିଖ ମଧ୍ୟରେ ହୋଇଥିବା ରେଡରେ ୩୯୦ କୋଟିର ବେନାମୀ ସଂପତ୍ତିର ଖୁଲାସା ହୋଇଛି । ଟଙ୍କା ଗଣିବାକୁ ୧୩ ଘଣ୍ଟା ସମୟ ଲାଗିଥିଲା ।
ରାଜଧାନୀରେ ମାସ୍କ ବାଧ୍ୟତାମୂଳକ, ନିୟମ ଉଲ୍ଲଂଘନ କଲେ ୫୦୦ ଟଙ୍କା ଜରିମାନା
ନୂଆଦିଲ୍ଲୀ: ବଢ଼ିଲା କରୋନା, ଫେରିଲା କଟକଣା । ନୂଆଦିଲ୍ଲୀରେ ସର୍ବସାଧାରଣ ସ୍ଥାନରେ ମାସ୍କ ପିନ୍ଧିବା ବାଧ୍ୟତାମୂଳକ କରାଯାଇଛି । ମାସ୍କ ନପିନ୍ଧି ଧରାପଡ଼ିଲେ ୫୦୦ ଟଙ୍କା ଜରିମାନା ଦେବାକୁ ପଡ଼ିବ । ତେବେ ଘରୋଇ ଚାରି ଚକିଆ ଯାନରେ ଲୋକେ ମାସ୍କ ନପିନ୍ଧିଲେ ଜରିମାନା ଦେବାକୁ ପଡିବନି। ଦିଲ୍ଲୀରେ ଗତ ୨୪ଘଣ୍ଟା ମଧ୍ୟରେ ୨୧ଶହ ୪୬ ସଂକ୍ରମିତ ହୋଇଥିବା ବେଳେ ୮ଜଣଙ୍କ ମୃତ୍ୟୁ ହୋଇଛି। ପ୍ରାୟ ୧୮୦ ଦିନ ପରେ ସଂକ୍ରମଣ ସବୁଠୁ ଅଧିକ ରହିଛି । ଏହାପୂର୍ବରୁ ଫେବ୍ରୁଆରୀରେ କରୋନାରେ ୧୨ଜଣଙ୍କ ମୃତ୍ୟୁ ହୋଇଥିଲା। ମଙ୍ଗଳବାର ଦିଲ୍ଲୀରେ ୨୪ଶହ ୯୫ଜଣ ସଂକ୍ରମିତ ହୋଇଥିଲେ। ପଜିଟିଭିଟି ରେଟ୍ ୧୫.୪୧ ପ୍ରତିଶତ ଥିଲା ।
ଚତୁର୍ଦ୍ଦଶ ଉପରାଷ୍ଟ୍ରପତି ଭାବେ ଶପଥ ନେଲେ ଜଗଦୀପ ଧନଖଡ଼, ଶପଥପାଠ କରାଇଲେ ରାଷ୍ଟ୍ରପତି
ନୂଆଦିଲ୍ଲୀ: ଚତୁର୍ଦ୍ଦଶ ଉପରାଷ୍ଟ୍ରପତି ଭାବେ ଶପଥ ନେଲେ ଜଗଦୀପ ଧନଖଡ଼ । ରାଷ୍ଟ୍ରପତି ଭବନରେ ଆୟୋଜିତ ସ୍ୱତନ୍ତ୍ର ଉତ୍ସବରେ ଜଗଦୀପଙ୍କୁ ଶପଥ ପାଠ କରାଇଲେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ଗତ ୬ ତାରିଖରେ ହୋଇଥିବା ଉପରାଷ୍ଟ୍ରପତି ନିର୍ବାଚନରେ ବିରୋଧୀଦଳ ପ୍ରାର୍ଥୀ ମାର୍ଗାରେଟ ଆଲଭାଙ୍କୁ ପରାସ୍ତ କରି ବିଜୟୀ ହୋଇଥିଲେ ଏନଡିଏ ପ୍ରାର୍ଥୀ ଧନଖଡ଼ । ଜଗଦୀପ ଧନଖଡ଼ ୫୨୮ ଭୋଟ ପାଇଥିବାବେଳେ ଆଲଭା ପାଇଥିଲେ ୧୮୨ ଭୋଟ୍ । ଧନଖଡ଼ ପାଇଥିବା ଭୋଟ ହାର ରହିଥିଲା ୭୪.୩୬ ପ୍ରତିଶତ । ୧୯୯୭ ପରଠାରୁ ଦେଶରେ ଅନୁଷ୍ଠିତ ୬ଟି ଉପରାଷ୍ଟ୍ରପତି ନିର୍ବାଚନରେ ସର୍ବାଧିକ ବ୍ୟବଧାନରେ ବିଜୟୀ ହୋଇଥିଲେ ଧନଖଡ଼ । ୭୮୦ ସାଂସଦଙ୍କ ମଧ୍ୟରୁ ୭୨୫ ସାଂସଦ ଭୋଟ ଦେଇଥିବାବେଳେ ୧୫ ଭୋଟ ନାକଚ ହୋଇଥିଲା । ଭୋଟ ହାର ଥିଲା ୯୨.୯୪ ପ୍ରତିଶତ ।
ରାଜସ୍ଥାନର ଝୁନଝୁଲୁ ଜିଲ୍ଲାରେ ୧୯୫୧ ମେ ୧୮ ତାରିଖରେ ଜନ୍ମଗ୍ରହଣ କରିଥିଲେ ଧନଖଡ଼ । ସେ ଚିତ୍ତୋରଗଡ଼ର ସୈନିକସ୍କୁଲରୁ ଶିକ୍ଷାଲାଭ କରିବା ପରେ ରାଜସ୍ଥାନ ବିଶ୍ୱବିଦ୍ୟାଳୟରୁ ଏଲଏଲବି ପାସ୍ କରିଥିଲେ । ଧନଖଡ଼ ରାଜସ୍ଥାନ ହାଇକୋର୍ଟ ଓ ସୁପ୍ରିମକୋର୍ଟରେ ଆଇନଜୀବୀ ଭାବେ କାର୍ଯ୍ୟରତ ଥିଲେ । ୧୯୮୯ରେ ସେ ଝୁନଝୁନୁ ଲୋକସଭା ଆସନରୁ ସାଂସଦ ଭାବେ ନିର୍ବାଚିତ ହୋଇଥିଲେ ।
ହନିଟ୍ରାପରେ ଫସିଲେ ବାଲେଶ୍ବରର ସରକାରୀ ଅଧିକାରୀ, ଫେସବୁକରେ ଚାଟ୍ କରି ହରାଇଲେ ୩୦ ଲକ୍ଷ
ବାଲେଶ୍ୱର: ବାଲେଶ୍ୱର ପୋଲିସ ହାତରେ ନାଇଜେରିଆ ସାଇବର ଠକ । ଫେସବୁକରେ ଚାଟକରି ହନିଟ୍ରାପ ମାଧ୍ୟମରେ ଠକେଇ କରିଥିବା ଯୁବକକୁ ଦିଲ୍ଲୀରୁ ଗିରଫ କରିବାରେ ସଫଳ ହୋଇଛି ପୋଲିସ । ଠକ ନିକଟରୁ ୨ଟି ନକଲି ପାସପୋର୍ଟ, ଲାପଟପ୍, ମୋବାଇଲ ଜବତ ହୋଇଛି । ଠକ ନାଇଜେରିଆ ନାଗରିକ ସାମସଙ୍ଗର ଦୁଇଟି ଫେକ୍ ବ୍ୟାଙ୍କ୍ ଆକାଉଣ୍ଟକୁ ଅଚଳ କରିଛି ପୋଲିସ । ସେହି ଆକାଉଣ୍ଟରେ ୬ ଲକ୍ଷ ଟଙ୍କା ଥିବା ପୋଲିସ ସୂଚନା ଦେଇଛି ।
ଅଭିଯୋଗକାରୀ ଜଣେ ସରକାରୀ କର୍ମଚାରୀ । ତାଙ୍କୁ ଫେସବୁକ ମାଧ୍ୟମରେ ଚାଟ୍ କରି ଜଣେ ଯୁବତୀ ବନ୍ଧୁତା କରିଥିଲେ । ପରେ ଉପହାର ପଠାଇବା ବାହାନାରେ ଯୁବତୀ ଜଣକ ସରକାରୀ ଅଧିକାରୀଙ୍କଠାରୁ ପର୍ଯ୍ୟାୟ କ୍ରମେ ୩୦ ଲକ୍ଷ ଟଙ୍କା ଠକି ନେଇଥିଲେ । ଅଭିଯୋଗକାରୀ ସାଇବର ଥାନାରେ ଅଭିଯୋଗ କରିବା ପରେ ପୋଲିସର ୩ ଜଣିଆ ଟିମ୍ ଦିଲ୍ଲୀ ଯାଇ କିଶନନଗରରୁ ସାମସଙ୍ଗକୁ ଗିରଫ କରିଛି ।
ଗୋ-ଚାଲାଣ ମାମଲାରେ ଟିଏମସି ନେତା ଅନୁବ୍ରତ ମଣ୍ଡଳଙ୍କୁ ଗିରଫ କଲା ସିବିଆଇ
କୋଲକାତା: ସିବିଆଇ ପଞ୍ଝାରେ ବୀରଭୂମ ଜିଲ୍ଲାର ବାହୁବଳୀ । ପୂର୍ବତନ ମନ୍ତ୍ରୀ ପାର୍ଥ ଚାଟାର୍ଜୀଙ୍କ ପରେ ଏବେ ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଘନିଷ୍ଠ ସହଯୋଗୀଙ୍କୁ ଟାର୍ଗେଟ । ଟିଏମସି ବୀରଭୂମ ଜିଲ୍ଲା ସଭାପତି ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତାଙ୍କ ସହଯୋଗୀ ଅନୁବ୍ରତ ମଣ୍ଡଳଙ୍କୁ ଗିରଫ କରିଛି ସିବିଆଇ । ୨୦୨୦ ଗୋ ଚାଲାଣ ମାମଲାରେ ଗିରଫ ହୋଇଛନ୍ତି ଅନୁବ୍ରତ । ବୀରଭୂମ ଜିଲ୍ଲା ଅନ୍ତର୍ଗତ ବାସଭବନରୁ ଅନୁବ୍ରତଙ୍କୁ ଗିରଫ କରିଛି ସିବିଆଇ । ଲଗାତାର ୧୦ଟି ସମନ ସତ୍ତ୍ୱେ ସେ ହାଜର ନ ହେବାରୁ ତାଙ୍କୁ ସିବିଆଇ ଗିରଫ କରିଛି । ପୂର୍ବରୁ ତାଙ୍କୁ ଏହି ମାମଲାରେ ସିବିଆଇ ଦୁଇ ଥର ଜେରା କରିଥିଲା ।
CBI arrests TMC Birbhum district chief Anubrata Mondal in connection with cattle smuggling case
Read @ANI Story | https://t.co/iEA0zC0aZ0#CBI #TMC #anubratamondal #CattleSmuggling #CBIArrestsAnubrataMondal pic.twitter.com/wPvVPcmjcf
— ANI Digital (@ani_digital) August 11, 2022
୨୦୧୫ରୁ ୨୦୧୭ ମଧ୍ୟରେ ପ୍ରାୟ ୨୦ ହଜାର ଗୋରୁଗାଈଙ୍କୁ ଦେଶର ସୀମା ବାହାରକୁ ଚାଲାଣ କରାଯାଇଥିଲା ଏବଂ ଏହି ଘଟଣାରେ ୨୦୨୦ରେ ସିବିଆଇ ଏକ ମାମଲା ରୁଜୁ କରିଥିଲା । ମାମଲାରେ ଅନୁବ୍ରତଙ୍କ ନାମ ରହିଥିଲା । ଗୋଚାଲାଣ ମାମଲା କ୍ରମେ ସିବିଆଇ ଗତ କିଛି ଦିନ ଧରି ପଶ୍ଚିମବଙ୍ଗର ବିଭିନ୍ନ ସ୍ଥାନରେ ରେଡ କରିବା ସହ ଅନୁବ୍ରତଙ୍କ ଅଙ୍ଗରକ୍ଷୀ ସାଇଗଲ ହୋସେନଙ୍କୁ ଗିରଫ କରିଥିଲା ।
ମହାରାଷ୍ଟ୍ରରେ ଦେଶର ସବୁଠୁ ବଡ଼ ରେଡ୍, ୩୯୦ କୋଟି ଟଙ୍କାର ସମ୍ପତ୍ତି ଜବତ
ମୁମ୍ବାଇ: ଦେଶର ବୃହତ୍ତମ ଆୟକର ରେଡ୍ । ୩୯୦ କୋଟି ଟଙ୍କାର ସମ୍ପତ୍ତି ଜବତ ହୋଇଥିବାବେଳେ ଠାବ ହୋଇଛି ଅପର୍ଯ୍ୟାପ୍ତ ବେନାମୀ ସମ୍ପତ୍ତି । ମହାରାଷ୍ଟ୍ର ଜଲନା ଓ ଔରାଙ୍ଗାବାଦରେ ଶୁଳ୍କ ଠକେଇ ଅଭିଯୋଗ କ୍ରମେ ହୋଇଥିବା ରେଡରେ ଜବତ ହୋଇଛି ନଗଦ ୫୮ କୋଟି ଟଙ୍କା ଏବଂ ୧୪ କୋଟି ଟଙ୍କାର ସୁନା, ହୀରା, ମୋତି । ଏହି ସମସ୍ତ ଅଳଙ୍କାରର ଓଜନ ପ୍ରାୟ ୩୨ କିଲୋଗ୍ରାମ । ଜଲନାର ଜଣେ ଷ୍ଟିଲ ଓ ଲୁଗା ବ୍ୟବସାୟୀ ତଥା ଜଣେ ରିୟଲ ଇଷ୍ଟେଟ କମ୍ପାନି ମାଲିକଙ୍କ ଘରେ ଓ ବ୍ୟବସାୟ ପ୍ରତିଷ୍ଠାନରେ ହୋଇଥିବା ରେଡରେ ଟେରା ହୋଇଯାଇଛି ଆୟକର ବିଭାଗ ।
Maharashtra | Income Tax conducted a raid at premises of a steel, cloth merchant & real estate developer in Jalna from 1-8 Aug. Around Rs 100 cr of benami property seized – incl Rs 56 cr cash, 32 kgs gold, pearls-diamonds & property papers. It took 13 hrs to count the seized cash pic.twitter.com/5r9MHRrNyR
— ANI (@ANI) August 11, 2022
ଆୟକର ବିଭାଗର ଚଢ଼ାଉ ବେଳେ ଜବତ ହୋଇଥିବା ଟଙ୍କାର ପରିମାଣ ଏତେ ଥିଲା ଯେ ଟଙ୍କା ଗଣତି ପାଇଁ ଲାଗିଯାଇଥିଲା ୧୩ ଘଣ୍ଟା । ଗତ ୧ ତାରିଖଠାରୁ ୮ ତାରିଖ ଯାଏ ଏହି ବିଶାଳ ରେଡ୍ ଚାଲିଥିଲା । ଚଢାଉ କାର୍ଯ୍ୟରେ ନିୟୋଜିତ ଥିଲେ ଆୟକର ବିଭାଗର ୫ଟି ଟିମର ପ୍ରାୟ ୨୬୦ କର୍ମଚାରୀ । ଆୟକର ବିଭାଗର ନାସିକ ଓ୍ୱିଙ୍ଗ ପକ୍ଷରୁ ଏହି ରେଡ୍ ହୋଇଥିଲା । ଏହା ସହ ଏହି ଅପରେସନରେ ସାମିଲ ହୋଇଥିଲା ୧୨୦ରୁ ଅଧିକ ଗାଡ଼ି ।
ହୀରାକୁଦରେ ବଢ଼ୁଛି ଜଳସ୍ତର, ଖୋଲିବ ୧୦ ଗେଟ୍
ସମ୍ବଲପୁର: ଛତିଶଗଡ଼ରେ ଜାରି ରହିଛି ଲଗାଣ ବର୍ଷା । ଲଗାଣ ବର୍ଷା ଫଳରେ ହୀରାକୁଦ ଜଳ ଭଣ୍ଡାରରେ ବଢ଼ୁଛି ଜଳସ୍ତର । ଜଳଭଣ୍ଡାରକୁ ପ୍ରତି ସେକେଣ୍ଡରେ ୨ ଲକ୍ଷ ୯୬ ହଜାର ଘନଫୁଟ ବନ୍ୟାଜଳ ପ୍ରବେଶ କରୁଛି । ହୀରାକୁଦରେ ବଢ଼ୁଥିବା ଜଳସ୍ତରକୁ ଦୃଷ୍ଟିରେ ରଖି ଆଜି ଦିନ ସାଢ଼େ ୧୧ଟାରେ ପର୍ଯ୍ୟାୟ କ୍ରମେ ୧୦ଟି ସ୍ଲୁଇସ ଗେଟ ଖୋଲାଯିବ ବୋଲି ସୂଚନା ଦେଇଛନ୍ତି ହୀରାକୁଦ ବନ୍ଧ ମୁଖ୍ୟଯନ୍ତ୍ରୀ । ବର୍ତ୍ତମାନ ୬୧୨ ଫୁଟରେ ଜଳସ୍ତର ଥିବା ବେଳେ, ୬୩୦ ଫୁଟ ରହିଛି ସର୍ବାଧିକ ଜଳଧାରଣ କ୍ଷମତା ରହିଛି । ତେଣୁ ଆବଶ୍ୟକ ହେଲେ ଅଧିକ ଗେଟ ଖୋଲାଯିବାର ସମ୍ଭାବନା ରହିଛି ବୋଲି ସେ କହିଛନ୍ତି ।
ଗୋଟିଏ ଛାତ ତଳେ ରହିବ ରାଜସ୍ୱ ବିଭାଗର ସମସ୍ତ କାର୍ଯ୍ୟାଳୟ, ବିଜେବିନଗରରେ ହେବ ରାଜସ୍ୱ ଭବନ
ଭୁବନେଶ୍ୱର: ଭୁବନେଶ୍ୱର କୋର୍ଟ ଛକରୁ ହଟିବ ଟ୍ରାଫିକ ସମସ୍ୟା । ଏଥିପାଇଁ ସରକାରୀସ୍ତରରେ ନିଆଯାଇଛି ବଡ଼ ନିଷ୍ପତ୍ତି । ଗୋଟିଏ ଛାତ ତଳେ ରହିବ ରାଜସ୍ୱ ବିଭାଗର ସମସ୍ତ କାର୍ଯ୍ୟାଳୟ । କୃଷି ଭବନ, ଖାରବେଳ ଭବନ ଓ ରାଜୀବ ଭବନ ସଦୃଶ ନିର୍ମାଣ ହେବ ରାଜସ୍ୱ ଭବନ । ଗୋଟିଏ କୋଠାରେ ରହିବ ଭୁବନେଶ୍ୱର ତହସିଲ କାର୍ଯ୍ୟାଳୟ, ଉପଜିଲ୍ଲାପାଳଙ୍କ କାର୍ଯ୍ୟାଳୟ, ଅତିରିକ୍ତ ଜିଲ୍ଲାପାଳଙ୍କ କାର୍ଯ୍ୟାଳୟ, ଉପନିବନ୍ଧକଙ୍କ କାର୍ଯ୍ୟାଳୟ, ଖୋର୍ଦ୍ଧା ଜିଲ୍ଲାପାଳ ଓ କେନ୍ଦ୍ରାଞ୍ଚଳ ରାଜସ୍ୱ କମିଶନରଙ୍କ କ୍ୟାମ୍ପ କୋର୍ଟ । ମୁଖ୍ୟ ଶାସନ ସଚିବଙ୍କ ଅଧ୍ୟକ୍ଷତାରେ ଅନୁଷ୍ଠିତ ବୈଠକରେ ଏନେଇ ହୋଇଛି ଚୂଡ଼ାନ୍ତ ନିଷ୍ପତ୍ତି ।
ବିଜେବି ନଗରରେ ଚିହ୍ନଟ ହୋଇଛି ୪ ଏକର ୯୩୩ ଡେସିମିଲ ସରକାରୀ ଜମି । କେନ୍ଦ୍ରାଞ୍ଚଳ ରାଜସ୍ୱ କମିଶନର ଓ ଖୋର୍ଦ୍ଧା ଜିଲ୍ଲାପାଳଙ୍କ ସମେତ ବରିଷ୍ଠ ଅଧିକାରୀଙ୍କ ଉପସ୍ଥିତିରେ ସରିଛି କ୍ଷେତ୍ର ପରିଦର୍ଶନ । କ୍ଷତିଗ୍ରସ୍ତ ହେବାକୁ ଥିବା ବସ୍ତିର ୧୨୦ ପରିବାର ଓ ଉଠା ଦୋକାନୀଙ୍କ ଥଇଥାନ ପାଇଁ ବିକଳ୍ପ ବ୍ୟବସ୍ଥା କରିବାକୁ ବିଏମସିକୁ ଦିଆଯାଇଛି ନିର୍ଦ୍ଦେଶ । ସେହିପରି ଉଚ୍ଛେଦ ହେବ ସାଧାରଣ ପ୍ରଶାସନ ବିଭାଗର ପୁରୁଣା କ୍ୱାର୍ଟର ।