ଭୁବନେଶ୍ବର: ଆରମ୍ଭ ହେଲା ଷ୍ଟାର୍ଟଅପ୍ ଓଡ଼ିଶା ଯାତ୍ରା ୨.୦ । ଶୁଭାରମ୍ଭ କଲେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ୬୦ ଦିନରେ ଅନ୍ତର୍ଭୁକ୍ତ ହେବ ୧୦୦ ଶିକ୍ଷାନୁଷ୍ଠାନ । ଯୁବଗୋଷ୍ଠୀଙ୍କ ମଧ୍ୟରେ ଔଦ୍ୟୋଗିକ ଚେତନା ଆଣିବା ପାଇଁ ମୁଖ୍ୟମନ୍ତ୍ରୀଙ୍କ ପ୍ରୟାସ । ୩୦ ଜିଲ୍ଲାର ୬୦ ଶିକ୍ଷାନୁଷ୍ଠାନରେ ହେବ ଷ୍ଟାର୍ଟଅପ୍ ଓଡ଼ିଶା ଯାତ୍ରା । ୨୦୨୫ ସୁଦ୍ଧା ୫ ହଜାର ଷ୍ଟାର୍ଟଅପ୍ ପାଇଁ ମିଶନ । ରାଜ୍ୟରେ ଏବେ ୧୩ ଶହ ସ୍ବୀକୃତିପ୍ରାପ୍ତ ଷ୍ଟାର୍ଟଅପ୍ ରହିଛି । ୧୦ ହଜାର ଚାକିରି ଯୋଗାଉଛନ୍ତି ଷ୍ଟାର୍ଟଅପ୍ ।
୧୩ଟି ନୂଆ ଇକୋ ଟ୍ୟୁରିଜିମ୍ ଓ ନେଚର କ୍ୟାମ୍ପର ହେବ ଉନ୍ନତିକରଣ
ଭୁବନେଶ୍ବର: ରାଜ୍ୟରେ ୧୩ଟି ନୂଆ ସ୍ଥାନରେ ହେବ ଇକୋ ଟ୍ୟୁରିଜିମ ଓ ନେଚର କ୍ୟାମ୍ପର ଉନ୍ନତିକରଣ । ୧୦ଟି ନୂଆ ସ୍ଥାନରେ ଇକୋ ରିଟ୍ରିଟର ଉନ୍ନତିକରଣ କରାଯିବ । ଏଥିରେ ରାତ୍ରିକାଳୀନ ରହଣିର ସୁବିଧା ରହିବ । ସେହିପରି ୩ଟି ନୂଆସ୍ଥାନରେ ନେଚର କ୍ୟାମ୍ପର ଉନ୍ନତିକରଣ କରାଯିବ । ଆଜି ଏକ ଉଚ୍ଚସ୍ତରୀୟ ବୈଠକରେ ଏନେି ଘୋଷଣା କରିଚନ୍ତି ମଚଖ୍ୟ ଶାସନ ସଚିବ ସୁରେଶ ମହାପାତ୍ର । ଏହାର ଉପଯୁକ୍ତ ରକ୍ଷଣାବେକ୍ଷଣ ପାଇଁ ବିଭାଗୀୟ ବନ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି । ଏହାସହ ପ୍ରତ୍ୟେକକଟେଜକୁ ଯାଇ ଏହା ଠିକରେ କାମ କରୁଚି କି ନାହିଁ, ଏହାର ରକ୍ଷଣାବେକ୍ଷଣ ଠିକରେ ହେୁଛି କି ନାହିଁ ତଦାରଖ କରିବାକୁ ନିର୍ଦ୍ଦର୍ଶ ଦେଇଛନ୍ତି । ପର୍ଯ୍ୟଟକଙ୍କ ଆତିଥ୍ୟରେ ସ୍ଥାନୀୟ ଲୋକଙ୍କୁ ନିୟୋଜିତ କରିବାକୁ ମଧ୍ୟ ସେ ନିର୍ଦ୍ଦର୍ଶ ଦେଇଛନ୍ତି । ଏହାଦ୍ବାର ସେମାନେ ରୋଜଗାର କରିବା ସହ ପରିବେଶର ସୁରକ୍ଷା କରିପାରିବେ । ଏହାସହ ଗତ ୫ ବର୍ଷ ମଧ୍ୟରେ ଇକୋ ପର୍ଯ୍ୟଟନ ସ୍ଥଳ
ଇକୋ ରିଟ୍ରିଟରେ କୋରାପୁଟର ଦେଓମାଳି ପର୍ବତମାଳା, କଳାହାଣ୍ଡିର ଜାକମ, ଦକ୍ଷିଣ ସିମିଳିପାଳର ନଓ୍ବାନ, ଫୁଲବାଣୀର ସିଲଭିକଲଚର ଗାର୍ଡନ୍, ପୁରୀ ଅସ୍ତରଙ୍ଗ ମୁହାଣ, କୋରାପୁଟର କୋଟିଆ, ରାଇରଙ୍ଗପୁରର ଖଡ଼ଖାଖ ଡ୍ୟାମ୍, ଗଞ୍ଜାମ ବ୍ରହ୍ମପୁର ପାର୍ଶ୍ବର ମହେନ୍ଦ୍ରଗିରି, କେନ୍ଦୁଝରର କାଞ୍ଜିପାଣି ଘାଟ ଓ ହଦଗଡ଼ ଡ୍ୟାମ ରହିଛି । ସେହିପରି ନେଚର କ୍ୟାମ୍ପରେ କୋରାପୁଟର ରାଣୀ ଡୁଡୁମା, କଟକର ଡାଲଟନଗଡ଼ ଓ ନୟାଗଡ଼ ଝାଡେଶ୍ବରୀ ମନ୍ଦିର ନିକଟ ଭଣ୍ଡାରପାହାଡ଼ ରହିଛି ।
ବର୍ତ୍ତମାନ ରାଜ୍ୟରେ ୫୦ଟି ଇକୋ ରିଟ୍ରିଟ୍ ଓ ନେଚର କ୍ୟାମ୍ପ ରହିଛି । ନୂଆ ୧୩ଟି ଏଥିରେ ସାମିଲ ହେବା ପରେ ଏହି ସଂଖ୍ୟା ରାଜ୍ୟରେ ବଢ଼ି ୬୩ରେ ପହଞ୍ଚି ଯିବ । ଏସବୁ ସ୍ଥାନର କଳେବର ବୃଦ୍ଧି ପରେ ଏହା ପର୍ଯ୍ୟଟକଙ୍କୁ ଆକୃଷ୍ଟ କରିବା ସହ ରାଜସ୍ବ ଆଦାୟ ମଧ୍ୟ ବଢ଼ିଛି । ଏସବୁ ସ୍ଥାନକୁ ଯିବା ପାଇଁ ଅନଲାଇନ୍ରେ ଟିକେଟ୍ ବୁକିଂର ସୁବିଧା ମଧ୍ୟ ରହିଛି । ବର୍ତ୍ତମାନ ସୁଦ୍ଧା ଏସବୁ ପର୍ଯ୍ୟଟନ ସ୍ଥଳର ଉନ୍ନତିକରଣରେ ୯୫ କୋଟି ଟଙ୍କା ବ୍ୟୟ କରାଯାଇଛି ।
ପତ୍ନୀଙ୍କୁ ମୁଖ୍ୟମନ୍ତ୍ରୀ କରିବେ କି ହେମନ୍ତ ସୋରେନ୍, ଜାଣନ୍ତୁ କିଭଳି ରହିଛି ଝାଡ଼ଖଣ୍ଡରେ ରାଜନୖେତିକ ସ୍ଥିତି
ରାଞ୍ଚି: ଖଣି ଲିଜ୍ ଦୁର୍ନିତୀକୁ ନେଇ ବିପଦରେ ପଡିଛି ଝାଡ଼ଖଣ୍ଡର ସୋରେନ ସରକାର। କେଉଁ ମୁହୂର୍ତ୍ତରେ ବି ହାତରୁ ଖସିପାରେ ଝାଡ଼ଖଣ୍ଡ ମୁଖ୍ୟମନ୍ତ୍ରୀ ଆସନ। ଦୁର୍ନିତୀକୁ ନେଇ ନିର୍ବାଚନ ଆୟୋଗ ସୋରେନଙ୍କ ବିଧାୟକ ପଦ ରଦ୍ଦ କରିବା ନେଇ ଚର୍ଚ୍ଚା ହେଉଛି ।
ଝାଡ଼ଖଣ୍ଡ ରାଜନୀତିର ଏଭଳି ଘଡ଼ିସନ୍ଧି ମୁହୁର୍ତ୍ତରେ ବିଜେପି ନେତା ନିଶିକାନ୍ତ ଦୁବେଙ୍କ ଏକ ଟ୍ୱିଟ୍ ହଇଚଇ ସୃଷ୍ଟି କରିଛି। ସେ ଟ୍ୱିଟ୍ କରିଥିଲେ, ପଦରୁ ହଟିବା ପରେ ହେମନ୍ତ ସୋରେନ୍ ନିଜ ପତ୍ନୀଙ୍କୁ ହିଁ ମୁଖ୍ୟମନ୍ତ୍ରୀ କରିବେ । ଯାହା ପରେ କଳ୍ପନା ସୋରେନଙ୍କ ନାମ ଚର୍ଚ୍ଚାରେ ରହିଛି । କଳ୍ପନା ହେଉଛନ୍ତି ମୁଖ୍ୟମନ୍ତ୍ରୀ ହେମନ୍ତଙ୍କ ପତ୍ନୀ। ତେବେ ରାଜ୍ୟ ରାଜନୀତି ସଙ୍କଟ ଭିତରେ କାହିଁକି ଉଠୁଛି କଳ୍ପନାଙ୍କ ନାମ?
କୁହାଯାଉଛି ଝାଡ଼ଖଣ୍ଡ ମୁଖ୍ୟମନ୍ତ୍ରୀ ପତ୍ନୀଙ୍କୁ ରାଜନୀତିରେ ଏଣ୍ଟ୍ରି କରାଇବାକୁ ଚାହୁଁଛନ୍ତି । କେବଳ ଏତିକି ନୁହେଁ ହେମନ୍ତ ୨୫ ବର୍ଷ ପରେ ବିହାରର ଆରଜେଡ଼ି ମୁଖ୍ୟ ଲାଲୁ ପ୍ରସାଦ ଯାଦବଙ୍କ ଇତିହାସ ଦୋହରାଇ ପାରନ୍ତି । ଦିନେ ଲାଲୁ ଯାଦବ ମୁଖ୍ୟମନ୍ତ୍ରୀ ପଦ ଛାଡ଼ିବା ପୂର୍ବରୁ ପତ୍ନୀ ରାବ୍ରି ଦେବୀଙ୍କୁ ମୁଖ୍ୟମନ୍ତ୍ରୀ ଆସନରେ ବସାଇଥିଲେ । ଠିକ୍ ସେହିପରି ଝାଡ଼ଖଣ୍ଡରେ ମଧ୍ୟ ହେମନ୍ତ ରାବ୍ରି ମଡେଲ୍ ଆପଣାଇବେ ବୋଲି ଚର୍ଚ୍ଚା ହେଉଛି । ଯଦି ଏପରି ହୁଏ ତେବେ ଝାଡ଼ଖଣ୍ଡର ମୁଖ୍ୟମନ୍ତ୍ରୀ ଆସନ ସମ୍ଭାଳିବେ କଳ୍ପନା ସୋରେନ୍ । ତେବେ ଆସନ୍ତୁ ଜାଣିବା ରାବ୍ରି ମଡଲ୍ କ’ଣ ଓ କଳ୍ପନା କିଏ…
୧୯୯୬ରେ ବିହାରର ତତ୍କାଳୀନ ମୁଖ୍ୟମନ୍ତ୍ରୀ ଲାଲୁ ପ୍ରସାଦ ଯାଦବଙ୍କ ବିରୋଧରେ ଗୋ-ଖାଦ୍ୟ ଦୁର୍ନିତୀ ମାମଲା ଆସିଥିଲା । ଯାହାପରେ ଲାଲୁଙ୍କ ରାଜନୈତିକ କ୍ୟାରିୟରର ଅନ୍ତ ବୋଲି ଚର୍ଚ୍ଚା ହେଉଥିଲା । କିନ୍ତୁ ଜଣେ ପୋଖତ ରାଜନେତା ଭାବେ ଲାଲୁ ନେଇଥିଲେ ନିଷ୍ପତ୍ତି । ରାଜନୀତି ସମ୍ପର୍କରେ ସମ୍ପୂର୍ଣ୍ଣ ଅଜ୍ଞଥିବା ପତ୍ନୀ ରାବ୍ରି ଦେବୀଙ୍କୁ ମୁଖ୍ୟମନ୍ତ୍ରୀ ପଦ ଦେଇଥିଲେ ଲାଲୁ । ଏହିପରି ଭାବେ ପଦରେ ନରହି ମଧ୍ୟ ସବୁ ନିଷ୍ପତ୍ତି ନେଉଥିଲେ ଲାଲୁ । ହେମନ୍ତ ସୋରେନ ମଧ୍ୟ ଏଭଳି କରିପାରନ୍ତି ବୋଲି ସାଧାରଣରେ ଚର୍ଚ୍ଚା ହେଉଛି ।
ସକ୍ରିୟ ରାଜନୀତରୁ ଖୁବ୍ ଦୂରରେ ରହିଛନ୍ତି କଳ୍ପନା। ଯଦିଓ ସମାଜ ସେବା କାର୍ଯ୍ୟକ୍ରମରେ ନିୟୋଜିତ ରହୁଥିବା କଳ୍ପନାଙ୍କ ଲୋକପ୍ରିୟତା ଖୁବ୍ ରହିଛି । ରାଞ୍ଚିରେ ଏକ ପ୍ଲେ-ସ୍କୁଲ୍ ଚଳାନ୍ତି କଳ୍ପନା । ରାଞ୍ଚିରେ ଜନ୍ମ ଗ୍ରହଣ କରିଥିବା କଳ୍ପନା, ପରିବାର ସହ ଓଡ଼ିଶାର ମୟୁରଭଞ୍ଜରେ ରହୁଥିଲେ । ପରେ ୨୦୦୬ ମସିହାରେ ହେମନ୍ତ ସୋରେନଙ୍କ ସହ ତାଙ୍କର ବିବାହ ହୋଇଥିଲା ।
ଝାଡ଼ଖଣ୍ଡରେ ମେଣ୍ଟ ସରକାର ରହିଛି । ଏହି ମେଣ୍ଟରେ ଝାଡ଼ଖଣ୍ଡ ମୁକ୍ତି ମୋର୍ଚ୍ଚା ସହ କଂଗ୍ରେସ, ଆରଜେଡ଼ି ଓ ଏନସିପି ସାମିଲ ରହିଛି । ଏବେ ଦେଖିବାକୁ ବାକି ରହିଲା କିଏ ହେବେ ଝାଡ଼ଖଣ୍ଡର ନୂଆ ମୁଖ୍ୟମନ୍ତ୍ରୀ?
ଧାର୍ଯ୍ୟ ସମୟରେ ସାର ନଦେଲେ ଚାଷୀ ହଇରାଣ ହେବେ
ଭୁବନେଶ୍ବର: ଧାର୍ଯ୍ୟ ସମୟରେ କେନ୍ଦ୍ର ସାର ଦେଉନି । ମାସିକିଆ କୋଟା ରାଜ୍ୟକୁ ମିଳୁନି । ଚାଷୀମାନେ ସାର ନପାଇ ହନ୍ତସନ୍ତ ହେଉଛନ୍ତି । ଖରିଫ ଋତୁରେ ଡିଏପି ସାର ୩୧ ପ୍ରତିଶତ କମ ମିଳିଛି । ଚାଷୀଙ୍କ ହିତ ପାଇଁ କେନ୍ଦ୍ର ସରକାର ଓଡ଼ିଶାର ମାସିକିଆ କୋଟା ସାର ଯୋଗାଇ ଦେଉ । ଏ ସଂପର୍କରେ କେନ୍ଦ୍ର ରସାୟନ ଓ ସାର ମନ୍ତ୍ରୀ ମନସୁଖ ମାଣ୍ଡଭିୟାଙ୍କୁ ଚିଠି ଲେଖି ଅନୁରୋଧ କରିଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ।
ନବୀନ ଚିଠିରେ ଦର୍ଶାଇଛନ୍ତି, ଓଡ଼ିଶାକୁ ଚାହିଦା ଅନୁସାରେ ଏମଓପି ଏବଂ ଡିଏପି ସାର ମିଳିନି । ଜୁଲାଇ ଶେଷ ସୁଦ୍ଧା ରାଜ୍ୟକୁ ୪୭ ହଜାର ମେଟ୍ରିକ ଟନ ଡିଏପି ଏବଂ ୧ ହଜାର ମେଟ୍ରିକ ଟନ ଏମଓପି ସାର କମ୍ ମିଳିଛି । ରାଜ୍ୟରେ ଏବେ ଖରିଫ ଚାଲିଥିଲା ବେଳେ ଏ ସାରର ଚାହିଦା ଆକାଶଛୁଆଁ ରହିଛି । ଗତବର୍ଷ ରାଜ୍ୟ ୟାସ୍, ଜଓ୍ବାଦ ଓ ଗୁଲାବ ବାତ୍ୟା ପାଇଁ ଚାଷୀକୁଳ ବହୁ କ୍ଷତି ସହିଛି । ଭାରତୀୟ ପାଣିପାଗ ବିଭାଗର ପୂର୍ବାନୁମାନ ଅନୁଯାୟୀ ଏଥର ଭଲ ଫସଲ ପାଇଁ ପାଣିପାଗ ଅନୁକୂଳ ଅଛି । ତେଣୁ ଅଗଷ୍ଟ ଓ ସେପଟେମ୍ବରରେ ଏମଓପି ଏବଂ ଡିଏପି ସାର ଅଧିକ ଦରକାର ହେବ । ଏହାକୁ ଦୃଷ୍ଟିରେ ରଖି କେନ୍ଦ୍ରମନ୍ତ୍ରୀ ବ୍ୟକ୍ତିଗତ ଭାବେ ହସ୍ତକ୍ଷେପ କରିବାକୁ ନବୀନ ଚିଠିରେ ଅନୁରୋଧ କରିଛନ୍ତି ।
ଝାଡ଼ଖଣ୍ଡ ମୁଖ୍ୟମନ୍ତ୍ରୀଙ୍କ ବିଧାୟକ ପଦ ରଦ୍ଦ
ରାଞ୍ଚି: ଝାଡ଼ଖଣ୍ଡ ମୁଖ୍ୟମନ୍ତ୍ରୀ ହେମନ୍ତ ସୋରେନଙ୍କ ବିଧାୟକ ପଦ ରଦ୍ଦ ନେଇ ସୂଚନା । ଅଫିସ ଅଫ୍ ପ୍ରଫିଟ୍ ବିବାଦରେ ଫସିଥିବା ସୋରେନଙ୍କୁ ନେଇ ନିର୍ବାଚନ ଆୟୋଗ ନିଷ୍ପତ୍ତି ନେଇଥିବା ସୂଚନା ମିଳିଛି । ଇସିଙ୍କ ନିଷ୍ପତ୍ତି ନେଇ ବିଧିବଦ୍ଧ ଘୋଷଣା କରିବେ ରାଜ୍ୟପାଳ ।
ଆଜି ସକାଳେ ରାଞ୍ଚି ସ୍ଥିତ ବାସଭବନରେ ମୁଖ୍ୟମନ୍ତ୍ରୀ ହେମନ୍ତ ସୋରେନ ୟୁପିଏର ବୈଠକ ଡାକିଥିଲେ । ସେପଟେ ମେଣ୍ଟ ସରକାର ପ୍ରତି କୌଣସି ବିପଦ ନଥିବା କହିଛି ଝାଡ଼ଖଣ୍ଡ ମୁକ୍ତି ମୋର୍ଚ୍ଚା । ଇସିଙ୍କ ନିଷ୍ପତ୍ତି ନେଇ ସୁପ୍ରିମକୋର୍ଟ ଯିବାକୁ ଧମକ ଦେଇଛି ଜେଏମଏମ । ୮୨ ସଦସ୍ୟ ବିଶିଷ୍ଟ ଝାଡ଼ଖଣ୍ଡ ବିଧାନସଭାରେ ଜେଏମଏମର ୩୦ ବିଧାୟକ ଥିବାବେଳେ କଂଗ୍ରେସର ୧୭ ବିଧାୟକ ଅଛନ୍ତି । ବିଜେପିର ଅଛନ୍ତି ୨୫ ବିଧାୟକ । ମୁଖ୍ୟମନ୍ତ୍ରୀ ହେମନ୍ତ ନିଜ ନାମରେ ମାଇନିଂ ଲିଜ୍ ହାସଲ କରିଥିବା ନେଇ ଅଭିଯୋଗ ମାମଲାର ଶୁଣାଣି ଗତ ସୋମବାର ନିର୍ବାଚନ କମିଶନ ଶେଷ କରିଥିଲେ । ମଙ୍ଗଳବାର ଦିନ ରାଜ୍ୟପାଳ ରମେଶ ବ୍ୟାସଙ୍କ ନିକଟକୁ ଇସି ଏ ସମ୍ପର୍କରେ ପତ୍ର ଲେଖିଥିଲେ । ଗତ ଅଗଷ୍ଟ ୧୮ ତାରିଖରେ ଉଭୟ ବିଜେପି ଓ ଜେଏମଏମ ନିର୍ବାଚନ କମିଶନ ନିକଟରେ ପକ୍ଷ ରଖିଥିଲେ । ପୂର୍ବରୁ ରାଜ୍ୟରେ ଜେଏମଏମ ସରକାରକୁ ଗାଦିଚ୍ୟୁତ କରିବା ଲାଗି ବିଜେପି ଉଦ୍ୟମ କରୁଛି ବୋଲି ଅଭିଯୋଗ କରିଥିଲେ ଜେଏମଏମ ଓ କଂଗ୍ରେସ ।
ଋଷ ବିରୋଧରେ ଭୋଟ ଦେଲା ଭାରତ
ନ୍ୟୁୟର୍କ: ବନ୍ଧୁ ଋଷ ବିରୋଧରେ ଗଲା ଭାରତ । ମିଳିତ ଜାତିସଂଘ ସୁରକ୍ଷା ପରିଷଦରେ ୟୁକ୍ରେନକୁ କଲା ସମର୍ଥନ । ୟୁକ୍ରେନ ଉପରେ ଆକ୍ରମଣକୁ ନେଇ ଋଷ ବିରୋଧରେ ଭୋଟ ଦେଲା ଭାରତ ।
ୟୁକ୍ରେନ-ରୁଷ ଯୁଦ୍ଧ ଆରମ୍ଭ ପରଠୁ ପ୍ରଥମ ଥର ପାଇଁ ଭାରତ ଋଷ ବିରୋଧରେ ଭୋଟ୍ ଦେଇଛି । ଜାତିସଂଘ ସୁରକ୍ଷା ପରିଷଦରେ ୟୁକ୍ରେନ ସଂକ୍ରାନ୍ତୀୟ ଏକ ପ୍ରକ୍ରିୟାଗତ ମତଦାନ ସମୟରେ ଭାରତ ଋଷ ବିରୋଧରେ ଭୋଟ୍ ଦେଇଛି ।
ଜାତିସଂଘ ସୁରକ୍ଷା ପରିଷଦକୁ ଟେଲି କନଫରେନ୍ସ ଜରିଆରେ ୟୁକ୍ରେନ ରାଷ୍ଟ୍ରପତି ଭୋଲଦୋମିର ଜେଲେନସ୍କି ସମ୍ବୋଧନ କରିଥିବା ବେଳେ ଜେଲେନସ୍କିଙ୍କ ପ୍ରସ୍ତାବ ଉପରେ ଭୋଟ ଗ୍ରହଣ କରାଯାଇଥିଲା । ଏଥିରେ ଭାରତ ସମେତ ୧୩ଟି ରାଷ୍ଟ୍ର ୟୁକ୍ରେନକୁ ସମର୍ଥନ କରିଥିବା ବେଳେ ଚୀନ ଭୋଟଦାନରୁ ଦୂରେଇ ରହିଥିଲା । ଫେବୃୟାରୀ ୨୪ରେ ୟୁକ୍ରେନ ଉପରେ ଋଷର ଆକ୍ରମଣ ଜାରି ରହିଛି । ଯୁଦ୍ଧକୁ ୬ମାସ ପୂରିଥିଲେ ବି ଯୁଦ୍ଧର ନିଷ୍କର୍ସ ବାହାରିପାରିନି । ଏବେ ବି ଗୁଳିଗୋଳା ବର୍ଷା, ମିଜାଇଲ ମାଡ଼ରେ କମ୍ପୁଛି ୟୁକ୍ରେନର ଅଧିକାଂଶ ସହର ।
ଏଲଓସିରେ ପାକିସ୍ତାନର ମେଗା ପ୍ଲାନ୍
ଜମ୍ମୁ ଓ କାଶ୍ମୀର: ସତ ହେଲା ଗୁଇନ୍ଦା ବିଭାଗର ସତର୍କ ସୂଚନା । ଭାରତ ବିରୋଧରେ ପାକିସ୍ତାନ ଚଳାଇଛି ମେଗା ପ୍ଲାନ୍ । ସୀମାରେ ୩ ଆତଙ୍କବାଦୀଙ୍କୁ ଭାରତୀୟ ଯବାନ ଏନକାଉଣ୍ଟର କରିବା ପରେ ଗୁଇନ୍ଦା ବିଭାଗର ତଥ୍ୟ ସତ ହେଉଛି ।
ସୂଚନାଯୋଗ୍ୟ, ଜାମ୍ମୁ ଓ କାଶ୍ମୀରର ଉରି ନିକଟ୍ ଏଲଓସିରେ ୩ ଆତଙ୍କବାଦୀଙ୍କ ଅନୁପ୍ରବେଶ ଉଦ୍ୟମ କରିଥିଲେ । ଯାହା ଭାରତୀୟ ସୀମାରେ ଲାଗିଥିବା ଇଲେକ୍ଟ୍ରୋନିକ ସର୍ଭେଲାନ୍ସ ମେସିନ ଜରିଆରେ ଜଣାପଡ଼ି ଯାଇଥିଲା । ଏହାପରେ ଭାରତୀୟ ସୁରକ୍ଷାବାହିନୀ ଆକ୍ସନରେ ଆସିଥିଲେ ଓ ଏନକାଉଣ୍ଟରରେ ସମସ୍ତଙ୍କ ଆତଙ୍କବାଦୀଙ୍କ ମୃତ୍ୟୁ ଘଟିଛି । ଆତଙ୍କବାଦୀମାନେ ଉରି ସେକ୍ଟରର କାମଲକୋଟ ଅଞ୍ଚଳସ୍ଥିତ ମାଦିଆନ ନାନକ ପୋଷ୍ଟ ନିକଟରେ ଅନୁପ୍ରବେଶ କରୁଥିବା ଠାବ କରାଯାଇଥିଲା ।
ତେଣେ ଜାମ୍ମୁ ଓ କାଶ୍ମୀର ବାରମୁଲ୍ଲାରୁ ବିପୁଳ ପରିମାଣରେ ଅସ୍ତ୍ରଶସ୍ତ୍ର ଜବତ ହୋଇଛି । ପାକିସ୍ତାନ ନିଜ ଦେଶରେ ଥିବା ଅନେକ ଆତଙ୍କବାଦୀ ଶିବିର ଓ ଲଞ୍ଚ ପ୍ୟାଡକୁ ଏଲଓସି ନିକଟକୁ ପଠାଇବାରେ ଲାଗିଛି । ସୀମାରୁ ଅଳ୍ପ କିଛି ଦୂରରେ ଏହି କ୍ୟାମ୍ପ ଓ ଲଞ୍ଚ ପ୍ୟାଡ ପ୍ରତିଷ୍ଠା କରାଯାଇଥିବା ଗୁଇନ୍ଦା ସୂତ୍ରରୁ ତଥ୍ୟ ମିଳିଛି । ଭାରତରେ ଅନୁପ୍ରବେଶ ବଢ଼ାଇବା ଲକ୍ଷ୍ୟରେ ପାକିସ୍ତାନ କରିଛି ଏହି ଯୋଜନା । ଆତଙ୍କବାଦୀ ସଂଗଠନ ଲସକର-ଏ- ତଏବା, ଜୈସ-ଏ-ମହମ୍ମଦ ଓ ହିଜବୁଲ ମୁଜାହିଦ୍ଦିନ ସଂଗଠନର ବିଭିନ୍ନ ଶିବିର ଏଲଓସିରେ ପ୍ରତିଷ୍ଠା ହୋଇଥିବା ସୂଚନା ମିଳିଛି । ଗୁଇନ୍ଦା ସୂତ୍ରରୁ କୁହାଯାଇଛି, ଭାରତରେ ପ୍ରବେଶ କରିବା ଲାଗି ତିଆରି କରାଯାଇଛି ଏକାଧିକ ଏଣ୍ଟ୍ରି ପଏଣ୍ଟ । ଅନୁପ୍ରବେଶ ଉଦ୍ୟମ କରୁଥିବା ଆତଙ୍କବାଦୀଙ୍କ ମଧ୍ୟରେ ଆଇଏସଆଇ ତାଲିମପ୍ରାପ୍ତ ଆତଙ୍କବାଦୀ ଅଛନ୍ତି । ଏପରିକି ପାକିସ୍ତାନ ୩୦୦ରୁ ଅଧିକ କ୍ଷୁଦ୍ର ଅସ୍ତ୍ରଶସ୍ତ୍ର ଡ୍ରୋନ ଜରିଆରେ ଶ୍ରୀନଗର ଆଖପାଖରେ ପକାଇଥିବା ସୂଚନା ମିଳିଛି । ଶ୍ରୀନଗରରେ ଲସକର ଓ ଜୈସର ୫୦ ବିଦେଶୀ ଆତଙ୍କବାଦୀ ପ୍ରବେଶ କରିସାରିଥିବା କୁହାଯାଇଛି ।
ଦେଶରେ ୨୧ଟି ନକଲି ବିଶ୍ୱବିଦ୍ୟାଳୟ ଚିହ୍ନଟ କଲା UGC
ନୂଆଦିଲ୍ଲୀ: ଦେଶରେ ୨୧ଟି ନକଲି ବିଶ୍ୱବିଦ୍ୟାଳୟ ଚିହ୍ନଟ କରାଯାଇଛି। ଏହି ତାଲିକା ଜାରି କରିଛି UGC। ଓଡ଼ିଶାରେ ୨ଟି ନକଲି ବିଶ୍ୱବିଦ୍ୟାଳୟ ଚାଲୁଛି। ନକଲି ବିଶ୍ୱବିଦ୍ୟାଳୟ ତାଲିକାରେ ରାଉରକେଲାର ନବଭାରତ ଶିକ୍ଷା ପରିଷଦ ଓ ମୟୂରଭଞ୍ଜର ଉତ୍ତର ଓଡ଼ିଶା କୃଷି ଓ ଯାନ୍ତ୍ରିକ ବିଶ୍ୱବିଦ୍ୟାଳୟ ଅଛି। ଦିଲ୍ଲୀରେ ସର୍ବାଧିକ ୮ଟି ନକଲି ବିଶ୍ୱବିଦ୍ୟାଳୟ ଚାଲୁଥିବା ବେଳେ କର୍ଣ୍ଣାଟକ, କେରଳ, ମହାରାଷ୍ଟ୍ର, ପୁଡୁଚେରୀ ଓ ଆନ୍ଧ୍ରରେ ଗୋଟିଏ ଲେଖାଏଁ ନକଲି ବିଶ୍ୱବିଦ୍ୟାଳୟ ଚାଲିଛି। ପଶ୍ଚିମବଙ୍ଗରେ ୨ଟି ଓ ୟୁପିରେ ୪ଟି ନକଲି ବିଶ୍ୱବିଦ୍ୟାଳୟ ଚିହ୍ନଟ ହୋଇଛି । ତାଲିକାଭୁକ୍ତ ନକଲି ବିଶ୍ୱବିଦ୍ୟାଳୟ କୌଣସି ଡିଗ୍ରୀ ପ୍ରଦାନ କରିପାରିବେ ନାହିଁ । ଛାତ୍ରଛାତ୍ରୀ ଆଡମିଶନ କଲେ UGC ଦାୟୀ ରହିବ ନାହିଁ । UGC ସଚିବ ପ୍ରଫେସର ରଜନୀଶ ଜୈନ ଏହି ସୂଚନା ଦେଇଛନ୍ତି ।
ଘର ଭିତରୁ ମିଳିଲା ଗୋଟିଏ ପରିବାରର ୬ ସଦସ୍ୟଙ୍କ ମୃତଦେହ
ଅମ୍ବାଲା: ଗୋଟିଏ ପରିବାରର ୬ଜଣଙ୍କ ମୃତ୍ୟୁ । ଘଟଣାସ୍ଥଳରୁ ଜବତ ହୋଇଛି ସୁଇସାଇଡ ନୋଟ । ହରିଆଣା ଅମ୍ବାଲାରେ ଘଟିଛି ଏଭଳି ଲୋମହର୍ଷକ ଘଟଣା । ଅମ୍ବାଲାର ବାଲାନା ଗାଁରେ ୬ ଜଣଙ୍କ ମୃତଦେହ ଠାବ ହେବା ପରେ ଶୋକାକୁଳ ପରିବେଶ ସୃଷ୍ଟି ହୋଇଛି । ସେମାନଙ୍କ ମଧ୍ୟରେ ଘରର ମୁଖ୍ୟ ସଙ୍ଗତ ରାମ ଓ ତାଙ୍କ ପତ୍ନୀ ମହିନ୍ଦ୍ରା କୌର ଥିବାବେଳେ ଦୁଇ ଶିଶୁ ମଧ୍ୟ ଅଛନ୍ତି । ଅମ୍ବାଲା ଡିଏସପି ଯୋଗୀନ୍ଦର ଶର୍ମା କହିଛନ୍ତି, ମୃତକଙ୍କ ନିକଟରୁ ଏକ ସୁଇସାଇଡ ନୋଟ ଜବତ କରାଯାଇଛି । ଫରେନସିକ ଟିମ୍ ଘଟଣାର ଯାଞ୍ଚ କରୁଛି । କିଛିଦିନ ତଳେ ଜାମ୍ମୁର ସିଧ୍ରାରେ ଗୋଟିଏ ପରିବାରର ୬ ଜଣ ଆତ୍ମହତ୍ୟା କରିଥିଲେ।
ଏମକେସିଜି ମେଡିକାଲ କଲେଜରେ ନିଆଁ, ୱାର୍ଡରେ ଥିଲେ ୨୦ରୁ ୨୨ ଜଣ ରୋଗୀ
ଗଞ୍ଜାମ: ଟଳିଗଲା ବଡ଼ ବିପଦ। ବ୍ରହ୍ମପୁର ଏମକେସିଜି ମେଡିକାଲ କଲେଜରେ ଲାଗିଥିବା ନିଆଁକୁ ଆୟତ୍ତ କରାଯାଇଛି । ସୁପରସ୍ପେଶିଆଲିଟି ବ୍ଲକର ୫ମ ମହଲାରେ ନିଆଁ ଲାଗିଥିବା ବେଳେ ପୁରା ବିଲ୍ଡିଂ ଧୂଆଁମୟ ହୋଇଯାଇଥିଲା । ରୋଗୀମାନଙ୍କୁ ଅନ୍ୟସ୍ଥାନକୁ ସ୍ଥାନାନ୍ତର କରାଯାଇଥିବା ବେଳେ କେହି ମୃତାହତ ହୋଇ ନଥିବା ମେଡିକାଲ ପକ୍ଷରୁ ସୂଚନା ଦିଆଯାଇଛି । ଅସ୍ତ୍ରୋପଚାର ଚାଲିଥିବା ବେଳେ ନିଆଁ ଲାଗିଥିଲେ ବି କ୍ଷୟକ୍ଷତି ସମ୍ପର୍କରେ କିଛି ଜଣାପଡ଼ିନି। ନିଆଁ ଲାଗିଥିବା ୱାର୍ଡରେ ୨୦ରୁ ୨୨ ଜଣ ରୋଗୀଥିଲେ। ତେବେ ସର୍ଟ ସର୍କିଟ୍ ଯୋଗୁ ନିଆଁ ଲାଗିଥିବା ତାହା ଜଣାପଡ଼ିନି। ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ନିଆଁକୁ ଆୟତ୍ତ କରିଛନ୍ତି।