ଭୁବନେଶ୍ୱର: ଲଘୁଚାପ ବର୍ଷାରେ ଭିଜିବ ପୂଜା ବଜାର । ଉତ୍ତର ପୂର୍ବ ସଂଲଗ୍ନ ପୂର୍ବ କେନ୍ଦ୍ରୀୟ ବଙ୍ଗୋପସାଗରରେ ଦାନା ବାନ୍ଧୁଛି ଆଉ ଏକ ଲଘୁଚାପ । ୧ ତାରିଖରେ ଘୂର୍ଣ୍ଣିବଳୟ ସୃଷ୍ଟି ହୋଇ ପରେ ଲଘୁଚାପର ରୂପ ନେବ । ଏହାର ପ୍ରଭାବରେ ଉପକୂଳ ଓଡିଶାରେ ପ୍ରବଳ ବର୍ଷା ହେବ । ୨ତାରିଖରୁ ବର୍ଷାର ପରିମାଣ ବୃଦ୍ଧି ପାଇବ । ୧ରୁ ୫ ତାରିଖ ପର୍ଯ୍ୟନ୍ତ ପ୍ରବଳ ବର୍ଷା ନେଇ ପୂର୍ବାନୁମାନ କରିଛନ୍ତି ଭୁବନେଶ୍ୱର ଅଞ୍ଚଳିକ ପାଣିପାଗ କେନ୍ଦ୍ର । ୧ ତାରିଖରେ ଜଗତସିଂହପୁର, କେନ୍ଦ୍ରାପଡା, ଭଦ୍ରକ, ବାଲେଶ୍ଵର, ମୟୁରଭଂଜରେ ପ୍ରବଳ ବର୍ଷା ନେଇ ୟେଲୋ ଆଲର୍ଟ ଜାରି ହୋଇଛି । ୨ ତାରିଖରେ ଉପକୂଳ ଓଡ଼ିଶା ଓ ୩ରେ କେନ୍ଦ୍ରୀୟ ଓ ପଶ୍ଚିମ ଓଡ଼ିଶାରେ ବର୍ଷା ହେବ । ୨ରେ ବାଲେଶ୍ବର, ଭଦ୍ରକ, ଯାଜପୁର, କେନ୍ଦ୍ରାପଡା, କଟକ, ଜଗତସିଂହପୁର, ପୁରୀ, ଖୋର୍ଦ୍ଧା, ନୟାଗଡ଼, ଗଞ୍ଜାମ, କେନ୍ଦୁଝର, ମୟୁରଭଂଜ, ଢେଙ୍କାନାଳ ଓ କନ୍ଧମାଳରେ ପ୍ରବଳ ବର୍ଷା
ବିଜେଡିର ପଦଯାତ୍ରା ପାଇଁ ଆଜି ବସିବ ପ୍ରସ୍ତୁତି ବୈଠକ
ଭୁବନେଶ୍ୱର: ବିଜେଡିର ପଦଯାତ୍ରା ପାଇଁ ଆଜି ବସିବ ପ୍ରସ୍ତୁତି ବୈଠକ । ଆଜି ଓ କାଲି ଦୁଇ ଦିନ ଯାକ ଜନସଂପର୍କ ପଦଯାତ୍ରାର ରୋଡମ୍ୟାପ ସଂପର୍କରେ ଦଳୀୟ କର୍ମୀଙ୍କୁ ଅବଗତ କରିବ ବିଜେଡି । କିପରି ମାସେ ବ୍ୟାପୀ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଜନକଲ୍ୟାଣକାରୀ ଯୋଜନା ସଂପର୍କରେ ଲୋକଙ୍କୁ ଅବଗତ କରାଯିବ, ସେ ଦିଗରେ ଦଳର ବରିଷ୍ଠ ନେତା ଉଦବୋଧନ ଦେବେ। ଭୁବନେଶ୍ୱର ବରମୁଣ୍ଡା ପଡ଼ିଆରେ ସକାଳ ୯ ସୁଦ୍ଧା ପହଞ୍ଚିବେ ନେତା ଓ କର୍ମୀ । ୯.୪୫ରୁ ଆରମ୍ଭ ହେବ କାର୍ଯ୍ୟକ୍ରମ । ଭର୍ଚ୍ଚୁଆଲରେ ଯୋଗଦେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଦୁଇଟି ପର୍ଯ୍ୟାୟରେ କାର୍ଯ୍ୟକ୍ରମ ହୋଇ ସଂଧ୍ୟା ୫ଟାରେ ସରିବ । ଆଜି ଦଳର ବରିଷ୍ଠ ନେତା ଜିଲ୍ଲା, ଜୋନ, ବ୍ଲକ, ପୌରର ଯୁବ, ଛାତ୍ର ଓ ମହିଳା ସଭାପତିଙ୍କ ସମେତ କଟକ ଭୁବନେଶ୍ୱରର ଛାତ୍ର ବିଜେଡି କ୍ୟାମ୍ପସ କମିଟିର ସଦସ୍ୟଙ୍କୁ ବିଭିନ୍ନ ପ୍ରସଙ୍ଗ ନେଇ ବୁଝାଇବେ । ସଂଘୀୟ ବ୍ୟବସ୍ଥାରେ ଓଡ଼ିଶାର ହକ୍, ୫Tରେ ଓଡ଼ିଶା ରୂପାନ୍ତର, ଓଡ଼ିଶା ନବନିର୍ମାଣରେ ଯୁବ, ଛାତ୍ର ଓ ମହିଳାଙ୍କ ଭୂମିକା ପରି ପ୍ରସଙ୍ଗ ଉପରେ ଆଲୋଚନା ହେବ। ସଂଗଠିତ ହୋଇ କାମ କରି ପଦଯାତ୍ରାକୁ ସଫଳ କରିବା ପାଇଁ ନେତା ଓ କର୍ମୀଙ୍କ ମନୋବଳ ବୃଦ୍ଧି କରିବେ ମୋଟିଭେସନାଲ ସ୍ପିକର।
ଜାନକୀ ପଟ୍ଟନାୟକଙ୍କ ପତ୍ନୀ ଜୟନ୍ତୀ ପଟ୍ଟନାୟକଙ୍କ ଦେହାନ୍ତ
ଭୁବନେଶ୍ୱର: ପୂର୍ବତନ ମୁଖ୍ୟମନ୍ତ୍ରୀ ଜାନକୀ ପଟ୍ଟନାୟକଙ୍କ ପତ୍ନୀ ଜୟନ୍ତୀ ପଟ୍ଟନାୟକଙ୍କ ଦେହାନ୍ତ। ମୃତ୍ୟୁବେଳକୁ ତାଙ୍କୁ ୯୦ ବର୍ଷ ବୟସ ହୋଇଥିଲା । ଓଡ଼ିଶାରୁ ଲୋକସଭାକୁ ନିର୍ବାଚିତ ହୋଇଥିବା ପ୍ରଥମ ମହିଳା ସାଂସଦ ଥିଲେ ଜୟନ୍ତୀ ପଟ୍ଟନାୟକ । ଏଥିସହ ଜାତୀୟ ମହିଳା କମିଶନର ପ୍ରଥମ ଅଧକ୍ଷା ମଧ୍ୟ ଥିଲେ ଜୟନ୍ତୀ।
ସେ ଏକାଧାରରେ ଜଣେ ରାଜନେତ୍ରୀ ସହ ଜଣେ ସାହିତ୍ୟିକା, ଅନୁବାଦିକା ଓ ସାହିତ୍ୟ ସଂଗଠିକା ମଧ୍ୟ ଥିଲେ। ୧୯୮୧ରେ କଂଗ୍ରେସ ଟିକେଟରେ କଟକରୁ ନିର୍ବାଚିତ ହୋଇଥିଲେ ଜୟନ୍ତୀ । କେବଳ ଏତିକି ନୁହେଁ ସେ ଜଣେ ସମାଜସେବିକା ଓ ବକ୍ତାଭାବେ ମଧ୍ୟ ସୁପରିଚିତ ଥିଲେ। ପ୍ରତିଷ୍ଠିତ ପୌରୁଷ ପତ୍ରିକାର ସମ୍ପାଦନା କରୁଥିଲେ ଜୟନ୍ତୀ ।
ସେ ୧୯୯୨ରେ ସର୍ବଶ୍ରେଷ୍ଠ ନାରୀ ପ୍ରତିଭା ଭାବେ ମହିଳା ଶିରୋମଣି ଉପାଧି ଲାଭ କରିବା ସହ ୧୯୯୬ରେ ମହିଳା ଗୌରବ ସମ୍ମାନରେ ସମ୍ମାନିତ ମଧ୍ୟ ହୋଇଥିଲେ
ନବୀନଙ୍କ ପ୍ରତିଶ୍ରୁତି; ଏକ୍ସ ନୁହେଁ ଓଡ଼ିଶା ଦେବ ଏକ୍ସ ପ୍ଲସର ସୁବିଧା
ବେଙ୍ଗାଲୁରୁ: ଏକ୍ସ ନୁହେଁ ଓଡ଼ିଶା ଦେବ ଏକ୍ସ ପ୍ଲସର ସୁବିଧା । ଅନ୍ୟ ରାଜ୍ୟଗୁଡିକ ଶିଳ୍ପାୟନ ଲାଗି ଏକ୍ସ ଦେଲେ ଓଡ଼ିଶା ଦେବ ଏକ୍ସ ପ୍ଲସ । ବେଙ୍ଗାଳୁରୁ ଇନଭେଷ୍ଟର୍ସ ମିଟରେ ଏପରି ପ୍ରତିଶ୍ରୁତି ଦେଇଛନ୍ତି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ବେଙ୍ଗାଲୁରୁ ସମ୍ମିଳନୀରେ୪ ଶହରୁ ଅଧିକ ଶିଳ୍ପ ପ୍ରତିନିଧିଙ୍କୁ ଓଡ଼ିଶାରେ ନିବେଶ ଲାଗି ଆହ୍ୱାନ ଦେଇଛନ୍ତି । କାହିଁକି ଓଡ଼ିଶା ଶିଳ୍ପ ଅନୁକୂଳ ବଡ଼ ବଡ଼ କମ୍ପାନୀ ସିଇଓଙ୍କୁ ବୁଝାଇ କହିଛନ୍ତି ନବୀନ ।
ଓଡ଼ିଶା ଦ୍ରୁତ ପ୍ରଗତି ପଥରେ ଆଗେଇ ଚାଲିଥିବାବେଳେ ପ୍ରାକୃତିକ ସଂପଦ, ମାନବ ସମ୍ବଳ, ସ୍ଥିର ସରକାର ମୁଖ୍ୟ କାରଣ ସାଜିଛି । ଶିଳ୍ପାୟନ ଓ ପୁଞ୍ଜିନିବେଶରେ ସାରା ଦେଶରେ ଓଡ଼ିଶା ଆଗୁଆ । ଭୁବନେଶ୍ୱରରେ ବହୁ ଆଇଟି କମ୍ପାନୀ ପ୍ରତିଷ୍ଠା ହେଲାଣି । ସରକାର ସମସ୍ତ ପ୍ରକାର ସୁବିଧା ସୁଯୋଗ ଯୋଗାଇ ଦେଉଛନ୍ତି । ଏପରିକି ପ୍ରତିଶ୍ରୁତିଠାରୁ ଅଧିକ ସୁବିଧା ସୁଯୋଗ ଗ୍ରାଉଣ୍ଡ ଜିରୋରେ ସରକାର ଶିଳ୍ପପତିଙ୍କୁ ଯୋଗାଇ ଦେଉଛନ୍ତି ବୋଲି କହିଛନ୍ତି ନବୀନ । ତାର ପ୍ରମାଣ ହେଉଛି ଇଜ ଅଫ ଡୁଇଙ୍ଗ ବିଜିନେସ ରେଟିଂ । ଯେଉଁଥିରେ ଓଡ଼ିଶା ଦେଶର ଲାଇଭ ମାନ୍ୟୁଫାକ୍ସଚରିଙ୍ଗ ଇନଭେଷ୍ଟମେଣ୍ଟ ବର୍ଗରେ ‘ଆଚିଭର’ ଆଖ୍ୟା ପାଇଛି । ଷ୍ଟାର୍ଟଅପ୍ ଇକୋ ସିଷ୍ଟମକୁ ସରକାର ପ୍ରୋତ୍ସାହନ ଦେଉଛନ୍ତି । ସେଥିଲାଗି ଓଡ଼ିଶା ଆସି ପୁଞ୍ଜିନିବେଶ କଲେ ସ୍ୱାଗତ କରାଯିବ ବୋଲି ଉଦବୋଧନରେ କହିଛନ୍ତି ମୁଖ୍ୟମନ୍ତ୍ରୀ ।
ମେକ ଇନ ଓଡ଼ିଶା ପ୍ଲାଟଫର୍ମ ଦ୍ୱାରା ଓଡ଼ିଶାରେ ଶିଳ୍ପାୟନର ସୁବିଧାକୁ ବସ୍ତୃତ ଭାବେ ଦର୍ଶାଯାଉଛି । ନଭେମ୍ବର ୩୦ରୁ ଡିସେମ୍ବର ୪ ଓଡ଼ିଶା କନକ୍ଲେଭରେ ସାମିଲ ହେବା ଲାଗି ସେ ସମସ୍ତ ଶିଳ୍ପ ପ୍ରତିନିଧିଙ୍କୁ ଆସିବା ଲାଗି ନବୀନଙ୍କ ନିମନ୍ତ୍ରଣ କରିଛନ୍ତି। ନୂଆ ଶିଳ୍ପାୟନ ଓଡ଼ିଶାରେ ପାର୍ଟନର ହେବାକୁ ସେ ଆହ୍ୱାନ ଦେଇଛନ୍ତି।
ଲେଫ୍ଟନେଣ୍ଟ ଜେନେରାଲ ଅନିଲ ଚୌହାନ ହେଲେ ନୂଆ ସିଡିଏସ୍
ନୂଆଦିଲ୍ଲୀ: ଦେଶକୁ ମିଳିଲା ନୂଆ ସିଡିଏସ୍ । ଲେଫ୍ଟନେଣ୍ଟ ଜେନେରାଲ ଅନିଲ ଚୌହାନ ହେଲେ ନୂଆ CDS। ବିପିନ ରାୱତଙ୍କ ପରେ ସେ ଦ୍ୱିତୀୟ ସିଡିଏସ୍ ହେବେ। ୪୦ ବର୍ଷ ଧରି ସେନାରେ କାର୍ଯ୍ୟ କରିଥିବା ଅନିଲ ଚୌହାନ କେବଳ ଗତ ବର୍ଷ ଅବସର ନେଇଥିଲେ। ପ୍ରତିରକ୍ଷା ମନ୍ତ୍ରଣାଳୟ ଦ୍ୱାରା ପ୍ରକାଶିତ ସୂଚନା ଅନୁଯାୟୀ ସେ ଭାରତ ସରକାରଙ୍କ ସାମରିକ ବ୍ୟାପାର ବିଭାଗର ସଚିବ ଭାବରେ ମଧ୍ୟ କାର୍ଯ୍ୟ କରିବେ।
୪୦ ବର୍ଷର ସେନା କ୍ୟାରିୟର ଭିତରେ, ଜମ୍ମୁ ଓ କଶ୍ମୀରରେ ଏବଂ ଉତ୍ତର-ପୂର୍ବ ଭାରତରେ ଆତଙ୍କବାଦ ବିରୋଧୀ ଅଭିଯାନରେ ତାଙ୍କର ବିଶେଷ ଉପଲବ୍ଧି ରହିଛି। ଅବସର ଗ୍ରହଣ କରିବା ପର୍ଯ୍ୟନ୍ତ ସେ ଇଷ୍ଟର୍ଣ୍ଣ କମାଣ୍ଡର ଜେନେରାଲ୍ ଅଫିସର୍ କମାଣ୍ଡିଂ-ଇନ୍-ଚିଫ୍ ଥିଲେ । ପରମ ବିଶିଷ୍ଟ ସେବା ମେଡାଲ୍, ଉତ୍ତମ ଯୁଦ୍ଧ ସେବା ମେଡାଲ୍, ଅତି ବିଶିଷ୍ଟ ସେବା ମେଡାଲ୍, ସେନା ମେଡାଲ୍ ଓ ବିଶିଷ୍ଟ ସେବା ମେଡାଲର ଅଧିକାରୀ ଲେଫ୍ଟେନାଣ୍ଟ ଜେନେରାଲ୍ ଅନୀଲ ସିଡିଏସ୍ ଭାବେ ଦାୟିତ୍ୱ ଗ୍ରହଣ ପରେ ଜେନେରାଲ୍ ଅନୀଲ ଚୌହାନ ଭାବେ ପରିଚିତ ହେବେ।
ବେଙ୍ଗାଲୁରୁରେ ଆରମ୍ଭ ଇନଭେଷ୍ଟର୍ସ ମିଟ୍; ଉଦ୍ୟୋଗପତିଙ୍କୁ ଭେଟ୍ଟୁଛନ୍ତି ମୁଖ୍ୟମନ୍ତ୍ରୀ
ବେଙ୍ଗାଲୁରୁ: ଆରମ୍ଭ ହୋଇଛି ବେଙ୍ଗାଳୁରୁ ଇନଭେଷ୍ଟର୍ସ ମିଟ୍ । ସିଲିକନ୍ ସିଟିରେ ଶିଳ୍ପପତିଙ୍କୁ ଭେଟିବା ପରେ ରୋଡ୍ ଶୋ’କୁ ସମ୍ବୋଧନ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ଦିନ ତମାମ ବଡ଼ ବଡ଼ କମ୍ପାନୀ କ୍ୟାପଟେନ୍ଙ୍କୁ ଭେଟିବା ପରେ ଏବେ ୫ଶହରୁ ଅଧିକ ଶିଳ୍ପ ପ୍ରତିନିଧିଙ୍କୁ ଓଡ଼ିଶା ଶିଳ୍ପାୟନର ପ୍ରେଜେଣ୍ଟେସନ୍ ଦିଆଯାଉଛି । କାହିଁକି ଓଡ଼ିଶା ହେବାକୁ ଯାଉଛି ଇଣ୍ଡଷ୍ଟ୍ରିଆଲ୍ ହବ୍? କିଭଳି ସିଙ୍ଗିଲ୍ ଓ୍ବିଣ୍ଡୋରେ ମିଳୁଛି ସବୁ ସୁବିଧା? ଜମି ଅଧିଗ୍ରହଣରୁ ବିଜୁଳି ସମସ୍ୟାର ଚୁଟ୍କିରେ କିପରି ହେଉଛି ସମାଧାନ? ବିସ୍ତୃତ ଭାବେ ବୁଝାଇ କହୁଛନ୍ତି ନବୀନ ଆଣ୍ଡ କୋ।
ମୁଖ୍ୟମନ୍ତ୍ରୀ ପେଜ ଇଣ୍ଡଷ୍ଟ୍ରିଜର ସିଇଓ ଭି ଜି ଗଣେଶ, ଟିଟିକେ ପ୍ରେଷ୍ଟିଜର ପି ସତ୍ୟନାରାୟଣ, ଆକ୍ସେଞ୍ଚରର ଅଜୟ ଭିଜ୍, ଫ୍ଲିପକାର୍ଟର ରଜନୀଶ କୁମାର, ଗ୍ଲୋବାଲ ଫାଉଣ୍ଡ୍ରିର ଜିତେନ୍ଦ୍ର ଚଡ୍ଡା, ଆର୍ଣ୍ଣେଷ୍ଟ ଆଣ୍ଡ ୟଙ୍ଗର ଗୌତମ ତନେଜା ଓ ଇଣ୍ଡୋ-ନିଶାନ ଫୁଡ୍ କମ୍ପାନୀର ଗୌତମ ଶର୍ମାଓଫଙ୍କୁ ଭେଟିଛନ୍ତି । ସେମାନଙ୍କୁ ଓଡ଼ିଶାରେ ନିବେଶ କରିବାକୁ ନିମନ୍ତ୍ରଣ କରିବା ସହ ପୁଞ୍ଜି ନିବେଷଶ ପାଇଁ ଓଡ଼ିଶାରେ କ’ଣ କ’ଣ ସୁବିଧା ରହିଛି ସେ ସମ୍ପର୍କରେ କହିଛନ୍ତି। ନିବେଶକ ସମ୍ମିଳନୀରେ ଆଇଟି ସହ ଇଏସଡିଏମ୍, ଟେକ୍ସଟାଇଲ୍ ଆପାରେଲ୍, ଫୁଡ ପ୍ରୋସେସିଂ, ଇ-ଭେହିକିଲ୍, ଅଟୋ ଆଣ୍ଡ ଅଟୋ କମ୍ପୋନେଟ, ଏରୋସ୍ପେସ୍ ଓ ପ୍ରତିରକ୍ଷା କ୍ଷେତ୍ରକୁ ଫୋକସ୍ କରାଯାଇଛି ।
AICC ଅଧକ୍ଷ ପାଇଁ ନିର୍ବାଚନ ଲଢ଼ିବେ ଦିଗବିଜୟ ସିଂ
ନୂଆଦିଲ୍ଲୀ: AICC ଅଧ୍ୟକ୍ଷ ପଦ ପାଇଁ ନିର୍ବାଚନ ଲଢ଼ିବେ ମଧ୍ୟପ୍ରଦେଶର ପୂର୍ବତନ ମୁଖ୍ୟମନ୍ତ୍ରୀ ତଥା ରାଜ୍ୟସଭା ଏମପି ଦିଗବିଜୟ ସିଂ । ଆଜି ରାତିରେ ସେ ଦିଲ୍ଲୀ ଗସ୍ତ କରିପାରନ୍ତି । ଖୁବଶୀଘ୍ର ସେ ଅଧ୍ୟକ୍ଷ ପଦ ପାଇଁ ନାମାଙ୍କନ ଭରିବେ ବୋଲି ବିଶେଷ ସୂତ୍ରରୁ ଜଣାପଡ଼ିଛି । ସେପଟେ ରାଜସ୍ଥାନ କଂଗ୍ରେସ କଳି ସମାଧାନ ହୋଇପାରିନଥିବା ବେଳେ ଆଜି ସୋନିଆଙ୍କୁ ଭେଟିବେ ମୁଖ୍ୟମନ୍ତ୍ରୀ ଅଶୋକ ଗେହେଲଟ।
ଏଆଇସିସି ସଭାପତି ପଦଲାଗି ସେ ପ୍ରତିଦ୍ୱନ୍ଦ୍ୱିତା କରି ପାରିବେ କି ନାହିଁ ସେ ନେଇ ସୋନିଆଙ୍କ ସହ ଆଲୋଚନା କରିବେ। ସଚିନ ପାଇଲଟ ମୁଖ୍ୟମନ୍ତ୍ରୀ ହେବାକୁ ବିରୋଧ କରି ରାଜସ୍ଥାନର ୯୦ ବିଧାୟକ ଇସ୍ତଫା ଦେବାକୁ ଧମକ ଦେଇଥିଲେ। ଗେହେଲଟ ଉଭୟ AICC ସଭାପତି ଓ ରାଜସ୍ଥାନ ମୁଖ୍ୟମନ୍ତ୍ରୀ ପଦରେ ରୁହନ୍ତୁ ବୋଲି ଦାବି କରିଥିଲେ ଗେହେଲଟଙ୍କ ଗୋଷ୍ଠୀର ବିଧାୟକ।
SCB ମେଡିକାଲରେ ଶିଶୁ କନ୍ୟା ଚୋରି ଘଟଣା; ସୁରକ୍ଷାକର୍ମୀଙ୍କୁ ବହିଷ୍କୃତ,୩ ନର୍ସଙ୍କୁ କାରଣଦର୍ଶାଅ ନୋଟିସ
କଟକ: SCB ମେଡିକାଲରେ ଶିଶୁ କନ୍ୟା ଚୋରି ଘଟଣା। SNCU ଭିତରକୁ ଅବାଧ ପ୍ରବେଶକୁ ନେଇ କର୍ତ୍ତୃପକ୍ଷଙ୍କ କାର୍ଯ୍ୟାନୁଷ୍ଠାନ । ଜଣେ ସୁରକ୍ଷାକର୍ମୀଙ୍କୁ ବହିଷ୍କୃତ କରାଯାଇଛି । ୩ଜଣ ନର୍ସଙ୍କୁ କାରଣଦର୍ଶାଅ ନୋଟିସ ଜାରି ହୋଇଛି । ୩ଦିନ ଭିତରେ ଉତ୍ତର ଦାଖଲ କରିବାକୁ ନିର୍ଦ୍ଦେଶ ଦିଆଯାଇଥିବା ଏସସିବି ପ୍ରଶାସନିକ ଅଧିକାରୀ ଅବିନାଶ ରାଉତ ସୂଚନା ଦେଇଛନ୍ତି ।
ଗତ ୨୬ ତାରିଖ ଦିନ ଏସସିବିରୁ ଡିସଚାର୍ଜ ହେବାକୁ ଥିବା ଶିଶୁର ନିଖୋଜ ନେଇ ହଇଚଇ ସୃଷ୍ଟି ହୋଇଥିଲା । ବାପା, ମା’ଙ୍କ ଅଭିଯୋଗ ପରେ ଆରମ୍ଭ ହୋଇଥିଲା ତନାଘନା । ଗଣମାଧ୍ୟମରେ ଖବର ପ୍ରସାରଣ ପରେ ମିଛ ଆଳ ଦେଖାଇ ପିଲାଟିକୁ ଫେରାଇ ଦେଇଥିଲେ ସୁଇଟି ଓ ତାଙ୍କ ସ୍ୱାମୀ । ଶିଶୁ ଚୋରି ଘଟଣାକୁ ପ୍ରଶାସନିକ ସ୍ତରରେ ଗୁରୁତ୍ୱ ଦିଆଯାଇଛି । ମଙ୍ଗଳାବାଗ ଥାନାରେ ଏନେଇ ଲିଖିତ ଅଭିଯୋଗ ହୋଇଛି। ସଂପୃକ୍ତ ମହିଳାଙ୍କ ସହ ତିନିଜଣଙ୍କୁ ଅଟକ ରଖିଛି ପୋଲିସ । ଶିଶୁ କନ୍ୟା ଫେରିବା ପରେ ତାର ଚିକିତ୍ସା ଚାଲିଛି। ଶିଶୁଟି ସୁସ୍ଥ ଥିବା ଏସସିବି ପକ୍ଷରୁ ସୂଚନା ମିଳିଛି। ଆଗକୁ ଏପରି ଘଟଣାର ପୁନରାବୃତ୍ତି ଯେପରି ନହୁଏ ସେନେଇ ଖୁବ୍ ଶୀଘ୍ର ସ୍ଵତନ୍ତ୍ର ନିୟମ କରାଯିବ ବୋଲି ଏସସିବି ପ୍ରଶାସନିକ ଅଧିକାରୀ ଅବିନାଶ ରାଉତ କହିଛନ୍ତି।
ହାଇ ସିକ୍ୟୁରିଟି ନମ୍ବର ପ୍ଲେଟ ଡେଡଲାଇନକୁ ନାପସନ୍ଦ କଲେ ହାଇକୋର୍ଟ
କଟକ: ହାଇକୋର୍ଟରେ ହାଇ ସିକ୍ୟୁରିଟି ନମ୍ବର ପ୍ଲେଟ ମାମଲା । ବ୍ୟବସ୍ଥା ନ ଥାଇ ଡେଡଲାଇନକୁ ନାପସନ୍ଦ କଲେ ହାଇକୋର୍ଟ । ରାଜ୍ୟର ସମସ୍ତ ଲୋକଙ୍କ ପାଖରେ ଅନଲାଇନ ବ୍ୟବସ୍ଥା ନାହିଁ । ତେଣୁ HSRPରେ ବୁକିଂ କରିବା ସମ୍ଭବ ହେଉନାହିଁ । କ’ଣ ବିକଳ୍ପ ବ୍ୟବସ୍ଥା କରାଯିବ, ସେନେଇ ହାଇକୋର୍ଟଙ୍କୁ ଅବଗତ କରାଇବାକୁ ନିର୍ଦ୍ଦେଶ ଦେଇଛନ୍ତି କୋର୍ଟ । ଆସନ୍ତା ୩୦ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ । ଅକ୍ଟୋବର ୧ରୁ ଚେକିଂ କଡାକଡି କରିବାକୁ ପରିବହନ ବିଭାଗର ନିଷ୍ପତ୍ତି ନେଇଛି। ପରିବହନ ବିଭାଗରୁ ମତାମତ ଆଣି କୋର୍ଟରେ ଉପସ୍ଥାପନ କରିବାକୁ ସରକାରୀ ଓକିଲଙ୍କୁ ନିର୍ଦ୍ଦେଶ ଦେଇଛନ୍ତି କୋର୍ଟ ।
ପାଇଲଟ୍ ହେବାର ସ୍ୱପ୍ନ ଦେଖୁଥିବା ଛାତ୍ରୀଙ୍କୁ ବିଜୁ ପଟ୍ଟନାୟକଙ୍କ ଜୀବନୀ ପୁସ୍ତକ ପଠାଇଲେ 5T ସଚିବ
ସୁନ୍ଦରଗଡ଼: ଛାତ୍ରୀଙ୍କ ସ୍ୱପ୍ନକୁ ଉଡାଣ ଦେବାକୁ ଫାଇବ-ଟି ସଚିବଙ୍କ ପ୍ରଶଂସନୀୟ ଉଦ୍ୟମ। ପାଇଲଟ୍ ହେବାର ସ୍ୱପ୍ନ ଦେଖୁଥିବା ସୁନ୍ଦରଗଡ଼ର ଛାତ୍ରୀ ଭୂମିକାଙ୍କୁ ପ୍ରେରଣା ଦେବାକୁ ବିଜୁ ପଟ୍ଟନାୟକଙ୍କ ଜୀବନୀ ପୁସ୍ତକ ପଠାଇଲେ ‘୫ଟି’ ସଚିବ। ସୁନ୍ଦରଗଡ଼ ଜିଲ୍ଲାର ହାଇସ୍କୁଲ ରୂପାନ୍ତରଣ ବେଳେ ଭର୍ଚୁଆଲରେ ଭି.କେ ପାଣ୍ଡିଆନ ପିଲାଙ୍କୁ ଭବିଷ୍ୟତରେ କ’ଣ ହେବେ ବୋଲି ପଚାରିଥିଲେ । ପାଇଲଟ୍ ହେବାର ସ୍ୱପ୍ନ ଥିବା କହିଥିଲେ ସୁନ୍ଦରଗଡ଼ ଜିଲ୍ଲା ହେମଗିର ବ୍ଲକ ଡୁଡୁକା ହାଇସ୍କୁଲର ଦଶମ ଶ୍ରେଣୀର ଛାତ୍ରୀ ଭୂମିକା ପ୍ରଧାନ। ତେଣୁ ତାଙ୍କୁ ଏକ ପ୍ରେରଣାଦାୟୀ ବହି ପଠାଇବେ ବୋଲି କହିଥିଲେ ଭି.କେ ପାଣ୍ଡିଆନ।
ତେବେ ବର୍ତ୍ତମାନ 5T ସଚିବ ଭୂମିକାଙ୍କ ପାଇଁ ସାହସୀ ପାଇଲଟ୍ ଏବଂ ବିଶିଷ୍ଟ ରାଜନୀତିଜ୍ଞ ସ୍ୱର୍ଗତଃ ବିଜୁ ପଟ୍ଟନାୟକଙ୍କ ଜୀବନୀ ଉପରେ ଆଧାରିତ ଏକ ଲୋକପ୍ରିୟ କମିକ୍ ପୁସ୍ତକ ‘ଦ ଆଡଭେଞ୍ଚରସ୍ ଅଫ୍ ଦ ଡେୟାରଡେଭିଲ ଡେମୋକ୍ରାଟ୍’ ପଠାଇଛନ୍ତି । ବହିଟି ଭୂମିକାଙ୍କ ପାଇଁ ପ୍ରେରଣାଦାୟୀ ହେବ ବୋଲି ଜିଲ୍ଲାପାଳ ଆଶା ବ୍ୟକ୍ତ କରିଛନ୍ତି। ଭୂମିକା ତାଙ୍କ ବାପାଙ୍କ ସହ ଆସି ଜିଲ୍ଲାପାଳଙ୍କଠାରୁ ବହିଟି ଗ୍ରହଣ କରିଥିଲେ। ଏହି ପ୍ରେରଣାଦାୟୀ ପଦକ୍ଷେପ ପାଇଁ ଭୂମିକା ଓ ତାଙ୍କ ବାପା ମୁଖ୍ୟମନ୍ତ୍ରୀ ଓ ୫ଟି ସଚିବଙ୍କୁ ଧନ୍ୟବାଦ ଜଣାଇଛନ୍ତି। ପୁସ୍ତକ ପ୍ରଦାନ ସମୟରେ ସୁନ୍ଦରଗଡ଼ଠାରେ ଜିଲ୍ଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ତଥା କାର୍ଯ୍ୟ ନିର୍ବାହୀ ଅଧିକାରୀ ଭୈରବ ସିଂହ ପଟେଲ, ଜିଲ୍ଲା ଶିକ୍ଷା ଅଧିକାରୀ ଅମୂଲ୍ୟ କୁମାର ପଧାନ ଓ ଡୁଡୁକା ହାଇସ୍କୁଲର ପ୍ରଧାନ ଶିକ୍ଷକ ଦିନେଶ ଚନ୍ଦ୍ର ପଟେଲ ଉପସ୍ଥିତ ଥିଲେ।