ସୁନ୍ଦରଗଡ଼: ସୁନ୍ଦରଗଡ଼ ଜିଲ୍ଲା ବୀରମିତ୍ରପୁରରେ ୧୨ ଘଣ୍ଟିଆ ବନ୍ଦ ପାଳନ କରାଯାଉଛି । ୧୪୩ ନମ୍ବର ଜାତୀୟ ରାଜପଥର ମରାମତି ୧୨ ଘଣ୍ଟିଆ ବୀରମିତ୍ରପୁର ବନ୍ଦ ପାଳନ କରାଯାଉଛି । ଦୋକାନ ବଜାର, ଗାଡି ଚଳାଚଳ ବନ୍ଦ ରହିଥିବା ବେଳେ ଜାତୀୟ ରାଜପଥ ଅବରୋଧ କରି ଆନ୍ଦୋଳନ ଜାରି ରହିଛି । ବୀରମିତ୍ରପୁର ବିକାଶ ମଞ୍ଚ ପକ୍ଷରୁ ୧୨ ଘଣ୍ଟିଆ ବନ୍ଦ ଡାକରା ଦିଆଯାଇଛି। ୧୪୩ ନମ୍ବର ଜାତୀୟ ରାଜପଥର ମରାମତି ପାଇଁ ବାରମ୍ବାର ଦାବି କରାଯାଉଥିଲେ ମଧ୍ୟ ଜାତୀୟ ରାଜପଥ କର୍ତ୍ତୃପକ୍ଷ କୌଣସି ପଦକ୍ଷେପ ନେଉନଥିବା ଅଭିଯୋଗ ହୋଇଛି । ରାଉରକେଲା ସହରର ବେଦବ୍ୟାସ ଠାରୁ ବୀରମିତ୍ରପୁର ପର୍ଯ୍ୟନ୍ତ ଯାଇଥିବା ଜାତୀୟ ରାଜପଥରେ ବଡ ବଡ ଖାଲ ସୃଷ୍ଟି ହୋଇଥିବା ବେଳେ ଧୁଳି ଯୋଗୁ ଗାଡି ଚଳାଚଳ କରିବାରେ ଅସୁବିଧା ହେଉଛି। ତେଣୁ ଜାତୀୟ ରାଜପଥ ମରାମତି କରିବାକୁ ଦାବି ହୋଇଛି।
ଟୁଇଟର ପରେ ମେଟାରେ ଛଟେଇ ଛନକା, ୯ରୁ ଆରମ୍ଭ ହେବ ପ୍ରକ୍ରିୟା
ନୂଆଦିଲ୍ଲୀ: ଟୁଇଟର ପରେ ମେଟାରେ ଛଟେଇ ଛନକା । ଏଇ ସପ୍ତାହରେ ହଜାର ହଜାର କର୍ମଚାରୀଙ୍କୁ ଛଟେଇ କରିବ ଫେସବୁକ ପ୍ୟାରେଣ୍ଟ କମ୍ପାନୀ ମେଟା । ଏ ନେଇ ମ୍ୟାନେଜମେଣ୍ଟ ପକ୍ଷରୁ ଯୋଜନା କରାଯାଉଛି । ଟୁଇଟର ତୁଳନାରେ ଏହି ଛଟେଇ କମ୍ ହେବ ବୋଲି ୱାଶିଂଟନ୍ ପୋଷ୍ଟ ରିପୋର୍ଟ କରିଛି । ଏ ନେଇ ନଭେମ୍ବର ୯ ତାରିଖରେ କମ୍ପାନୀ ପକ୍ଷରୁ ବିଧିବଦ୍ଧ ଘୋଷଣା କରାଯିବ ।
ଏବେ କମ୍ପାନୀର ପ୍ରାୟ ୮୭ ହଜାର କର୍ମଚାରୀ ଅଛନ୍ତି । ଆଗାମୀ ତ୍ରୈମାସିକରେ କମ୍ପାନୀର ଅଭିବୃଦ୍ଧି ହ୍ରାସ ଆଶଙ୍କା ରହିଥିବାରୁ ଷ୍ଟକ୍ ମାର୍କେଟ ଭ୍ୟାଲ୍ୟୁ ୬୭ ଆରବ ଡଲାର କମ୍ ହୋଇପାରେ । ବିଶ୍ୱ ଅର୍ଥନୈତିକ ଅଭିବୃଦ୍ଧିର ଧିମା ଗତି ଯୋଗୁ କମ୍ପାନୀକୁ ଏଭଳି ପରିସ୍ଥିତିର ସାମ୍ନା କରିବାକୁ ପଡୁଛି । ଆପଲ ଦ୍ୱାରା ପ୍ରାଇଭେସି ପଲିସିରେ ପରିବର୍ତ୍ତନ, ମେଟାଭର୍ସ ପାଇଁ କମ୍ପାନୀ ମିଲିଅନ ଡଲାର ଖର୍ଚ୍ଚ କରୁଥିବାରୁ ଖର୍ଚ୍ଚ କାଟ ପାଇଁ ଯୋଜନା କରୁଛି କମ୍ପାନୀ । ତେଣୁ ମେଟା ନିଯୁକ୍ତି ବନ୍ଦ ଓ କର୍ମଚାରୀ ଛଟେଇ କରିବ ବୋଲି ଅନ୍ତର୍ଜାତୀୟ ଗଣମାଧ୍ୟମ ରିପୋର୍ଟ କରିଛି ।
ରକ୍ତର ହୋଲି ଖେଳୁଥିଲା, ରବିନାଙ୍କୁ ପଠାଉଥିଲା ଅଶ୍ଳୀଳ ଫଟୋ
ନୂଆଦିଲ୍ଲୀ: ବଲିଉଡର ପ୍ରସିଦ୍ଧ ଅଭିନେତ୍ରୀଙ୍କ ମଧ୍ୟରେ ରବିନା ଟଣ୍ଡନ ଜଣେ । ଏହି ବଲିଉଡ ସୁନ୍ଦରୀ ଦର୍ଶକଙ୍କ ହୃଦୟରେ ଦିନେ ରାଜ୍ କରୁଥିଲେ । ଏକାଧିକ ହିଟ୍ ଫିଲ୍ମ ଦେଇଛନ୍ତି ରବିନା । ନିଜର ରୋକ୍ ଠୋକ୍ ଜବାବ ପାଇଁ ମଧ୍ୟ ରବିନା ବେଶ୍ ଜଣାଶୁଣା । ଯଦିଓ ଫିଲ୍ମ ଇଣ୍ଡଷ୍ଟ୍ରିରେ ଏବେ ରବିନାଙ୍କୁ ପ୍ରାୟତଃ ଦେଖିବାକୁ ମିଳୁନାହିଁ, ତଥାପି ତାଙ୍କ ଜଲଓ୍ୱା କିଛି କମ୍ ହୋଇନାହିଁ । ଦିନେ ରବିନାଙ୍କର ଜଣେ ଫ୍ୟାନ୍ ତାଙ୍କ ପାଇଁ ସବୁ ସୀମା ଟପି ଯାଇଥିଲା । ତାଙ୍କୁ ରକ୍ତଭରା କାଚ ଏବଂ ଅଶ୍ଳୀଳ ଫଟୋ ପଠାଉଥିଲା ସେହି ଫ୍ୟାନ୍ ।
ନିକଟରେ ଏକ ସାକ୍ଷାତକାରରେ ଏହାର ଖୁଲାସା କରିଛନ୍ତି ରବିନା । ରବିନାଙ୍କ କହିବା ହେଉଛି, ଉକ୍ତ ବ୍ୟକ୍ତି ଜଣକ ରବିନାଙ୍କୁ ପାଗଳ ଭଳି ଭଲ ପାଉଥିଲା ଏବଂ ତାଙ୍କ ପିଲାଙ୍କୁ ନିଜର ପିଲା ବୋଲି କହୁଥିଲା । ରବିନାଙ୍କୁ ରକ୍ତଭରା କାଚ ଏବଂ ଅଶ୍ଳୀଳ ଫଟୋ ପଠାଉଥିଲା । କେବଳ ସେତିକି ନୁହେଁ ଥରେ କେହି ଜଣେ ରବିନାଙ୍କ ସ୍ୱାମୀ ଅନିଲ ଥଡାନୀଙ୍କ କାର୍ ଉପରକୁ କେହି ଜଣେ ଏକ ପଥର ମାରିଥିଲା ବୋଲି ରବିନା ଖୁଲାସା କରିଛନ୍ତି । କେବଳ ସେତିକି ନୁହେଁ ବରଂ ଜଣେ ଫ୍ୟାନ୍ ସବୁବେଳେ ରବିନାଙ୍କ ଘର ସାମ୍ନାରେ ବସି ରହୁଥିଲା ।
ରବିନାଙ୍କ ଓ୍ୱର୍କଫ୍ରଣ୍ଟ କଥା ଯଦି ଆଲୋଚନା କରିବା ତେବେ ଶେଷ ଥର ପାଇଁ ରବିନାଙ୍କୁ କେଜିଏଫ୍ ୨ ଫିଲ୍ମରେ ଦେଖିବାକୁ ମିଳିଥିଲା ।
ଜିନ୍ଦଲ ଷ୍ଟିଲର ଲଜିଷ୍ଟିକ ମ୍ୟାନେଜରଙ୍କ ମୃତ୍ୟୁ, ପିଟି ପିଟି ହତ୍ୟା କରାଯାଇଥିବା ସନ୍ଦେହ
ସୁନ୍ଦରଗଡ଼: ବଣାଇଁ ଲହୁଣିପଡ଼ା ଥାନା ବରସୁଆଁ ତଳ ବଜାରରେ ଅଭାବନୀୟ ଘଟଣା । ଜିନ୍ଦଲ ଷ୍ଟିଲର ଲଜିଷ୍ଟିକ ମ୍ୟାନେଜର ମୋତିଲାଲ ପାଲଙ୍କ ମୃତ୍ୟୁ ହୋଇଛି । ତାଙ୍କୁ କେହି ପିଟି ପିଟି ହତ୍ୟା କରିଥିବା ସନ୍ଦେହ କରାଯାଉଛି । କିଛି ଦିନ ହେଲା ଗେଷ୍ଟ ହାଉସରେ ଏକୁଟିଆ ରହୁଥିଲେ ମୋତିଲାଲ । ରକ୍ତ ଜୁଡୁବୁଡୁ ଅବସ୍ଥାରେ ମୃତଦେହ ପଡିଥିବା ଖବର ପାଇ ପୋଲିସ ଗେଷ୍ଟହାଉସରେ ପହଞ୍ଚି ତଦନ୍ତ ଜାରି ରଖିଛି । ଘଟଣାସ୍ଥଳରେ କମ୍ପାନୀ କର୍ତ୍ତୃପକ୍ଷ, ପୋଲିସ ତଦନ୍ତ ଆରମ୍ଭ କରିଥିବା ବେଳେ କେହି ହତ୍ୟା କରି ପଳାଇ ଥିବା ସନ୍ଦେହ କରାଯାଉଛି । ରାଉରକେଲାରୁ ପୋଲିସ ଓ ସାଇଣ୍ଟିଫିକ୍ ଟିମ୍ ଆସିବା ପରେ ମୃତଦେହ ଉଦ୍ଧାର କରାଯିବ । ପରେ ସବୁ କିଛି ସ୍ପଷ୍ଟ ହେବ ବୋଲି ସୂଚନା ଦେଇଛି ପୋଲିସ।
ଚାକିରିରୁ ଛଟେଇ ପରେ ପୁଣି କର୍ମଚାରୀଙ୍କୁ ଡାକିଲା ଟୁଇଟର
ନୂଆଦିଲ୍ଲୀ: ମନ ବଦଳାଇଲେ ଏଲନ ମସ୍କ । ଚାକିରିରୁ ଛଟେଇ ପରେ ପୁଣି କର୍ମଚାରୀଙ୍କୁ ଡାକିଛି ଟୁଇଟର । ସ୍ମଲ ବ୍ଲଗିଂ ସାଇଟ୍ ଟୁଇଟର ଏଲନ ମସ୍କଙ୍କ ହାତକୁ ଯିବା ପରେ କମ୍ପାନୀରେ ଅନେକ ପରିବର୍ତ୍ତନ କରାଯାଇଛି । ଅଧାରୁ ଅଧିକ କର୍ମଚାରୀଙ୍କୁ ଛଟେଇ କରାଯାଇଥିବା ବେଳେ ଏବେ ପୁଣି ସେମାନଙ୍କୁ କମ୍ପାନୀ ଡକାଇଥିବା ଜଣାପଡ଼ିଛି । ଛଟେଇ ପରେ ଅନ୍ୟ କର୍ମଚାରୀମାନଙ୍କ କାମ ଚାପ ବଢ଼ିଥିବା ବେଳେ ଅନେକ କମ୍ପାନୀରେ ରାତି ସାରା କାମ କରୁଥିବା ଜଣାପଡ଼ିଥିଲା ।
ସୂଚନାଯୋଗ୍ୟ, ନିଜର ଭୂଲ ବୁଝିବା ସହ ଛଟେଇ କର୍ମଚାରୀ ଫେରି ଆସିବାକୁ କମ୍ପାନୀ ଅପିଲ କରିଛି ବୋଲି ଜଣାପଡ଼ିଛି । କମ୍ପାନୀରେ ଏତେ ସଂଖ୍ୟାକ କର୍ମଚାରୀଙ୍କ ଛଟେଇକୁ ନେଇ ପୂର୍ବତନ ମାଲିକ ଜ୍ୟାକ୍ ଡର୍ସି ମଧ୍ୟ ଚିନ୍ତାବ୍ୟକ୍ତ କରିଥିଲେ । ଅନ୍ୟପଟେ ମସ୍କ ଟୁଇଟରକୁ ନେଇ ଆଉ ଏକ ବଡ଼ ନିଷ୍ପତ୍ତି ନେଇଛନ୍ତି । ପରିଚୟ ବଦଳାଇ ଆକାଉଣ୍ଟ ଖୋଲିଥିବା ୟୁଜର୍ସଙ୍କ ଆକାଉଣ୍ଟ ବନ୍ଦ କରିବାକୁ ସେ ଚେତାବନୀ ଦେଇଛନ୍ତି। ସେମାନଙ୍କ ଆକାଉଣ୍ଟକୁ ବିନା ଆଗୁଆ ସୂଚନାରେ ସସ୍ପେଣ୍ଡ କରିଦିଆଯିବ ବୋଲି ମସ୍କ ଟ୍ୱିଟ୍ କରି କହିଛନ୍ତି। ଯଦି କିଛି ପାରୋଡି ଆକାଉଣ୍ଟ ବା ଫ୍ୟାନ୍ ଆକାଉଣ୍ଟ ଥିବ ତେବେ ତାହା ଉପରେ ଏ ନେଇ ସ୍ପଷ୍ଟ ଲେଖାଯିବା ଉଚିତ । ଅନ୍ୟର ନାମ ଓ ଫଟୋ ବ୍ୟବହାର କରୁଥିବା ଆକାଉଣ୍ଟକୁ ବନ୍ଦ କରିଦିଆଯିବ।
ବାହା ନ ହେଲେ ଚ୍ୟାଟ୍ ଲିକ୍ କରିଦେବି, ଗର୍ଲଫ୍ରେଣ୍ଡକୁ ଧମକ ଦେଲେ ଯୁବତୀ
ବାହା ନେହେଲେ ଚ୍ୟାଟ୍ ଲିକ୍ କରିଦେବି । ଯୁବତୀ ହୋଇ ଯୁବତୀଙ୍କୁ ଦେଲେ ବିବାହ ଧମକ ।ରାଜସ୍ଥାନର ନାଗୌରରେ ଘଟିଛି ଏହି ଅଭାବନୀୟ ଘଟଣା । ଯେଉଁଠାରେ ଜଣେ ଯୁବତୀ ତାଙ୍କ ଝିଅ ବନ୍ଧୁଙ୍କ ଘର ସାମ୍ନାରେ ଧମକ ଦେଉଛନ୍ତି । ଯୁବତୀ ଜଣଙ୍କ ବିବାହ କରିବା ପାଇଁ ଚାପ ପକାଉଛନ୍ତି । ଉକ୍ତ ଘଟଣାକୁ ନେଇ ଯୁବତୀ ଜଣକ ଥାନାରେ ଅଭିଯୋଗ କରିଛନ୍ତି । ତେବେ ଅଭିଯୋଗ କରିଥିବା ଯୁବତୀଙ୍କ କହିବା ହେଉଛିଯେ, କିଛି ବର୍ଷ ପୂର୍ବରୁ ଉଭୟଙ୍କର ସୋସିଆଲ ମିଡିଆରେ ଯୋଗାଯୋଗ ହୋଇଥିଲା । ପ୍ରଥମେ ବନ୍ଧୁତା ଏବଂ ପରେ ଉଭୟଙ୍କ ମଧ୍ୟରେ ପ୍ରେମ ସମ୍ପର୍କ ଗଢ଼ି ଉଠିଥିଲା ।
ଖବର ଅନୁସାରେ ଯୁବତୀ ଜଣକ ତାଙ୍କ ପ୍ରେମିକାଙ୍କ ଘର ସାମ୍ନାରେ ଖୁବ୍ ଗଣ୍ଡଗୋଳ କରିଛନ୍ତି । ଏହା ସହିତ ବିବାହ କରିବାକୁ ଧମକ ଦେଉଛନ୍ତି । ପ୍ରେମିକାକୁ ଜବରଦସ୍ତି ସେଠାରୁ ନେଇଯିବାକୁ ଯୁବତୀ ଜଣକ ଉଦ୍ୟମ କରିଥିଲେ । କିନ୍ତୁ ଅନ୍ୟ ଯୁବତୀ ଜଣକ ସେଠାରୁ ଯିବାକୁ ମନା କରି ଦେଇଥିଲେ । ଯାହାପରେ ଯୁବତୀ ଜଣକ ରାଗି ଯାଇ ସୋସିଆଲ ମିଡିଆରେ ଚ୍ୟାଟ୍ ଲିକ୍ କରିଦେବାରେ ଧମକ ଦେଇଥିଲେ । କେବଳ ଏତିକି ନୁହେଁ ପୀତିତ ଯୁବତୀଙ୍କ କହିବା ହେଉଛି ତାଙ୍କ ପ୍ରେମିକା ୧୦ ଲକ୍ଷ ଟଙ୍କ ଦାବି କରିଥିଲେ । ତେବେ ଅଭିଯୋଗ ପରେ ପୋଲିସ୍ ଏକ ମାମଲା ରୁଜୁ କରି ଅଭିଯୁକ୍ତ ଯୁବତୀଙ୍କୁ ଗିରଫ କରିଛି ।
ଜାରି ରହିବ EWS ସଂରକ୍ଷଣ ବ୍ୟବସ୍ଥା, ୧୦ ପ୍ରତିଶତ ସଂରକ୍ଷଣ ସପକ୍ଷରେ ସୁପ୍ରିମକୋର୍ଟ
ନୂଆଦିଲ୍ଲୀ: EWS ସଂରକ୍ଷଣକୁ ନେଇ ସୁପ୍ରିମ ଫଇସଲା। ସାଧାରଣ ବର୍ଗର ଆର୍ଥିକ ଅନଗ୍ରସରଙ୍କ ଲାଗି ୧୦ ପ୍ରତିଶତ ସଂରକ୍ଷଣ ସପକ୍ଷରେ ସୁପ୍ରିମକୋର୍ଟଙ୍କ ରାୟ । ଦେଶରେ ଜାରି ରହିବ EWS ସଂରକ୍ଷଣ ବ୍ୟବସ୍ଥା । ୫ ଜଣ ଜଷ୍ଟିସଙ୍କ ମଧ୍ୟରୁ ୩ ଜଣ ସଂରକ୍ଷଣ ସପକ୍ଷରେ ମତ ରଖିଛନ୍ତି । ସଂରକ୍ଷଣ ସମାନତା ସମ୍ବିଧାନର ଉଲ୍ଲଂଘନ କରୁନାହିଁ ବୋଲି ଜଷ୍ଟିସ ମାହେଶ୍ୱରୀ ଯୁକ୍ତି ରଖିଛନ୍ତି। ପୀଠର ତିନି ଜଣ ଜଷ୍ଟିସ କୋଟା ସପକ୍ଷରେ ରାୟ ରଖିଥିବା ବେଳେ ପ୍ରଧାନ ବିଚାରପତି ଜଷ୍ଟିସ ୟୁୟୁ ଲଳିତ ଓ ଜଷ୍ଟିସ ଏସ ରବୀନ୍ଦ୍ର ଭଟ୍ଟ କୋଟା ବ୍ୟବସ୍ଥାକୁ ବିରୋଧ କରିଛନ୍ତି ।
୨୦୧୯ରେ ସମ୍ବିଧାନ ସଂଶୋଧନ କରାଯାଇ EWS ବର୍ଗ ପାଇଁ ୧୦ ପ୍ରତିଶତ ସଂରକ୍ଷଣ ବ୍ୟବସ୍ଥା କରାଯାଇଥିଲା । ସାଧାରଣ ବର୍ଗର ଗରିବ ପରିବାରର ପିଲାଙ୍କ ଚାକିରି ଓ ପାଠପଢ଼ା କ୍ଷେତ୍ରରେ ସଂରକ୍ଷଣ ପାଇଁ ସଂସଦରେ ଏହି ବିଲ୍ ପାରିତ ହୋଇଥିଲା । ମାତ୍ର ଏହି ନିଷ୍ପତ୍ତିକୁ ବିରୋଧ କରି ସୁପ୍ରିମକୋର୍ଟରେ ୪୦ରୁ ଊର୍ଦ୍ଧ୍ୱ ମାମଲା ରୁଜୁ ହୋଇଥିଲା। ୨୭ ଡିସେମ୍ବରରେ ମାମଲାର ଶୁଣାଣି କରି ରାୟ ସଂରକ୍ଷିତ ରଖିଥିଲେ କୋର୍ଟ । ଇଡବ୍ଲୁଏସ କୋଟା ସମ୍ବିଧାନର ମୌଳିକ ଢାଞ୍ଚାର ଉଲ୍ଲଂଘନ କରିଛି କି ନାହିଁ ତାହାର ଶୁଣାଣି କରିଥିଲେ ୫ଜଣିଆ ସାମ୍ବିଧାନିକ ପୀଠ । ଏହି ମାମଲାର ଶୁଣାଣି ବେଳେ ଆଟର୍ଣ୍ଣି ଜେନେରାଲ କେ.କେ ବେଣୁଗୋପାଳ ଏବଂ ସଲିସିଟର ଜେନେରାଲ ତୁଷାର ମେହେଟ୍ଟା ସରକାରଙ୍କ ପ୍ରତିନିଧିତ୍ୱ କରିଥିବା ବେଳେ ଶିକ୍ଷାବିତ ମୋହନ ଗୋପାଳ ଏବଂ ଅନ୍ୟ ବରିଷ୍ଠ ଓକିଲମାନେ ଇଡବ୍ଲୁଏସ କୋଟା ବିରୋଧରେ ପକ୍ଷ ରଖିଥିଲେ। …
ଶ୍ରୀମନ୍ଦିରରେ ମହିଳା ଭକ୍ତଙ୍କୁ ମାଡ଼ ଅଭିଯୋଗ, ହାବିଲଦାର ନିଲମ୍ବିତ
ପୁରୀ: ଶ୍ରୀମନ୍ଦିରରେ ମହିଳା ଭକ୍ତଙ୍କୁ ମାଡ଼ ଅଭିଯୋଗ। ଜଗମୋହନ ନିକଟରେ ମୁତୟନ ଥିବା ସୁରକ୍ଷା କର୍ମୀ ମହିଳା ଭକ୍ତଙ୍କୁ ବାଡ଼ିରେ ମାରିଥିବା ଅଭିଯୋଗ ହୋଇଛି ।ଘଟଣାରେ ସମ୍ପୃକ୍ତ ହାବିଲଦାର ନିଲମ୍ବିତ ହୋଇଛନ୍ତି । ମହିଳାଙ୍କର ମୁଣ୍ଡରେ ଗଭୀର ଆଘାତ ଲାଗିଛି। ଗୁରୁତର ଅବସ୍ଥାରେ ତାଙ୍କୁ ସଦର ଚିକିତ୍ସାଳୟରେ ଭର୍ତ୍ତି କରାଯାଇଛି ।
ସୂଚନା ମୁତାବକ ଜଗମୋହନ ନିକଟରେ ମୁତୟନ ଥିବା ହାବିଲଦାର ଓ ମହିଳାଙ୍କ ମଧ୍ୟରେ ସାମାନ୍ୟ ଯୁକ୍ତିତର୍କ ହୋଇଥିଲା। ପରେ ହାବିଲଦାର ଜଣଙ୍କ ମହିଳା ଭକ୍ତଙ୍କୁ ବାଡ଼ିରେ ମାରିଥିବା ଅଭିଯୋଗ ହୋଇଥିଲା। ଆହତ ମହିଳା ହେଲେ ବ୍ରହ୍ମପୁରର ମଧୁରୀ ଦାସ। ମହିଳାଙ୍କ ମୁଣ୍ଡରେ ମୁଣ୍ଡରେ ଗଭୀର ଆଘାତ ଲାଗିଛି। ଘଟଣାର ଅନୁଧ୍ୟାନ କରିଥିଲେ ଅତିରିକ୍ତ ଏସପି ଓ ପୋଲିସ କର୍ମଚାରୀ । ତଦନ୍ତ ପରେ ହାବିଲଦାରକୁ ନିଲମ୍ବିତ କରାଯାଇଛି ।
ଆଜିଠୁ ଭାରତୀୟ ସେନାର କମାଣ୍ଡର ସମ୍ମିଳନୀ, ରାଷ୍ଟ୍ରୀୟ ସୁରକ୍ଷାର ଚ୍ୟାଲେଞ୍ଜ ଉପରେ ହେବ ସମୀକ୍ଷା
ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଆଜି ଠାରୁ ସ୍ଥଳସେନାର ପାଞ୍ଚ ଦିନିଆ କମାଣ୍ଡର ସମ୍ମିଳନୀ ଅନୁଷ୍ଠିତ ହେବ । ଏଥିରେ ସେନାର ଉଚ୍ଚସ୍ତରୀୟ କମାଣ୍ଡରମାନେ ଚୀନ ଓ ପାକିସ୍ତାନକୁ ଲାଗିଥିବା ସୀମାରେ ଭାରତର ରାଷ୍ଟ୍ରୀୟ ସୁରକ୍ଷାର ଚ୍ୟାଲେଞ୍ଜ ଗୁଡ଼ିକ ଉପରେ ବ୍ୟାପକ ସମୀକ୍ଷା କରାଯିବ । ଭାରତୀୟ ସେନାବାହିନୀର ଭବିଷ୍ୟତ କାର୍ଯ୍ୟ, ସାଂପ୍ରତିକ ସୁରକ୍ଷା ସମସ୍ୟା ଓ ବିଭିନ୍ନ ପ୍ରଶାସନିକ ବ୍ୟବସ୍ଥାର ବିକାଶ ଆଦି ବିଷୟବସ୍ତୁ ଉପରେ ଆଲୋଚନା ହେବ ।
ସୂଚନାଯୋଗ୍ୟ, ପ୍ରତି ୨ ବର୍ଷରେ ଥରେ ଆୟୋଜିତ ହେଉଥିବା ଶୀର୍ଷ ସମ୍ମିଳନୀରେ ଭାରତୀୟ ସେନାବାହିନୀର ଗୁରୁତ୍ୱପୂର୍ଣ୍ଣ ନିଷ୍ପତ୍ତି ସହିତ ନୀତି ନିର୍ଦ୍ଧାରଣ କରାଯାଏ । ଏହି ସମ୍ମିଳନୀରେ ସେନାବାହିନୀର ବରିଷ୍ଠ ଅଧିକାରୀମାନଙ୍କ ସମେତ ପ୍ରତିରକ୍ଷା ବିଭାଗର ବରିଷ୍ଠ କର୍ମକର୍ତ୍ତାମାନେ ଉପସ୍ଥିତ ରହିବେ।
ବୋଇତ ବନ୍ଦାଣ ଉତ୍ସବ; ରାତି ୨ରୁ ଭୋର ୫ଟା ୪୫ ମଧ୍ୟରେ ହେବ ଡଙ୍ଗା ଭସା
ଭୁବନେଶ୍ୱର: ଆ କା ମା ବୈ,ପାନଗୁଆ ଥୋଇ, ପାନ ଗୁଆ ତୋ’ର, ମାସକ ଧରମ ମୋର। ଏଇ ଗୀତର ଗୁଞ୍ଜରଣ ସହ ବୋଇତ ବନ୍ଦାଇ ଧର୍ମ ଅର୍ଜନ କରିବା ପାଇଁ ଆଜିଠାରୁ ରାଜଧାନୀର ବିନ୍ଦୁସାଗର ଚଳଚଞ୍ଚଳ। ଯଦିଓ ଆଜି ମଧ୍ୟରାତ୍ରୀ ୨ଟାରୁ ଭୋର ୫ଟା ୪୫ ମଧ୍ୟରେ ଡଙ୍ଗା ଭସା ପାଇଁ ସମୟ ରହିଛି, ତେବେ ଚନ୍ଦ୍ରଗ୍ରହଣ ପାଇଁ ଆଜି ଶୀତୁଆ ପାହାନ୍ତି ସକାଳରେ ବିନ୍ଦୁସାଗର ନିକଟରେ ଲୋକେ ଡଙ୍ଗା ଭସାଉଥିବା ଦେଖାଯାଇଛି । ବଡ଼ ଓଷା ଉପବାସ କରିଥିବା ଲୋକେ ଆଜି ସକାଳୁ ନିଜ ପରିବାରର ଶୁଭ ମନାସି ଡଙ୍ଗା ଭସାଇଛନ୍ତି।
ସେପଟେ ବୋଇତ ବନ୍ଦାଣ ଉତ୍ସବ ପାଇଁ କୁଆଖାଇ, ଦୟା ,ବିନ୍ଦୁସାଗରରେ ସଜାଗ ରହିବ ପୋଲିସ ଓ ଅଗ୍ନିଶମ ବିଭାଗ। ଭୁବନେଶ୍ୱରରେ ନିୟୋଜିତ ହେବେ ୫ ପ୍ଲାଟୁନ ପୋଲିସ ଫୋର୍ସ। ଟ୍ରାଫିକ ପରିଚାଳନା ପାର୍କିଂ ପାଇଁ ସ୍ୱତନ୍ତ୍ର ବ୍ୟବସ୍ଥା ହୋଇଛି । ପାଣି ଭିତରକୁ ପଶିବାକୁ ପୋଲିସ ପକ୍ଷରୁ ବାରଣ କରାଯିବା ସହ ଦୁର୍ଘଟଣା ରୋକିବାକୁ ସଜାଗ ରହିବ ଅଗ୍ନିଶମ ଟିମ।