ଭୁବନେଶ୍ବର : ରାଜଧାନୀରେ ପୁଣି ଏକ ମର୍ଡର । ସ୍ତ୍ରୀକୁ ପିଟି ପିଟି ହତ୍ୟା କଲା ନୃଶଂସ ସ୍ୱାମୀ । ନୟାପଲ୍ଲୀ ଥାନା ଅଞ୍ଚଳରେ ଘଟିଛି ଅଘଟଣ । ପାରିବାରିକ କନ୍ଦଳରୁ ସ୍ତ୍ରୀକୁ ମାରିଲା ସ୍ବାମୀ । ଏକ ନିର୍ମାଣଧୀନ ଆପାର୍ଟମେଣ୍ଟରେ କାମ କରୁଥିଲେ ମହିଳା । ମହିଳାଙ୍କ ଘର ନୟାଗଡ଼ । ପତ୍ନୀହନ୍ତା ସ୍ବାମୀକୁ ଥାନାରେ ଅଟକ ରଖିଛି ପୋଲିସ ।
ଦିଲ୍ଲୀ ହିଟ୍ ଆଣ୍ଡ ରନ୍ କେସ୍ : ସ୍କୁଟିରେ ଅଞ୍ଜଳି ସହ ଥିଲେ ଆଉ ଜଣେ ବନ୍ଧୁ
ନୂଆଦିଲ୍ଲୀ : ଦିଲ୍ଲୀ ହିଟ୍ ଆଣ୍ଡ ରନ୍ କେସ୍ରେ ନୂଆ ଖୁଲାସା । ସ୍କୁଟିରେ ମୃତ ଅଞ୍ଜଳିଙ୍କ ସହ ଅନ୍ୟ ଜଣେ ବନ୍ଧୁ ମଧ୍ୟ ଥିଲେ । ଅଞ୍ଜଳି ଗାଡ଼ି ଚଳାଉଥିବା ବେଳେ ପଛରେ ବସିଥିଲେ ନିଧି । ସ୍କୁଟିକୁ କାର୍ ଧକ୍କା ଦେବା ବେଳେ ନିଧି ସାମାନ୍ୟ ଆହତ ହୋଇଥିବା ବେଳେ ଅଞ୍ଜଳିଙ୍କ ଗୋଡ଼ କାରରେ ଲାଖି ଯିବା ଯୋଗୁ ସେ ଘୋଷାଡି ହୋଇ ଯାଇଥିଲେ ।
୧୨ କିମିରୁ ଅଧିକ ରାସ୍ତା ଘୋଷାଡି ହୋଇଯିବା ପରେ ଅଞ୍ଜଳିଙ୍କ ମୃତଦେହ ଗାଡ଼ି ଚକାରୁ ବାହାର କରି ଫିଙ୍ଗି ଦେଇ ଫେରାର ହୋଇଯାଇଥିଲେ ୫ ଅଭିଯୁକ୍ତ । ଆଜି ନିଧିଙ୍କ ବୟାନ ରେକର୍ଡ କରିବ ପୋଲିସ । ଦୁର୍ଘଟଣା ପରେ ଭୟରେ ନିଧି ଘରକୁ ଚାଲି ଆସିଥିବା ପୋଲିସ କହିଛି ।
ସେପଟେ ୫ ଅଭିଯୁକ୍ତଙ୍କ ମଧ୍ୟରେ ଜଣେ ବିଜେପି ନେତା ଥିବାରୁ ଜିରୋ ନାଇଟରେ ହୋଇଥିବା ବୀଭତ୍ସକାଣ୍ଡକୁ ନେଇ ଜୋର ଧରିଛି ରାଜନୀତି । ଅଭିଯୁକ୍ତ ମନୋଜ ମିତ୍ତଲ ବିଜେପି ନେତା ହୋଇଥିବାରୁ ପୋଲିସ ତଦନ୍ତ ଉପରେ ପ୍ରଶ୍ନ ଉଠାଇଛି ଆମ ଆଦମୀ ପାର୍ଟି । ଅନ୍ୟପଟେ ଦିଲ୍ଲୀ ପୋଲିସ କମିଶନର ସଞ୍ଜୟ ଆରୋରାଙ୍କୁ ତଦନ୍ତ ରିପୋର୍ଟ ମାଗିଛନ୍ତି ଗୃହମନ୍ତ୍ରୀ ଅମିତ ଶାହ । ଗୃହମନ୍ତ୍ରୀ ରିପୋର୍ଟ ମାଗିବା ପରେ ସ୍ପେଶାଲ କମିଶନର ସାଲିନି ସିଂ ଘଟଣାର ତଦନ୍ତ ଦାୟିତ୍ବ ନେଇଛନ୍ତି ।
ପୁଣି ଜଣେ ଋଷୀୟ ନାଗରିକଙ୍କର ସନ୍ଦେହଜନକ ମୃତ୍ୟୁ
ପାରାଦୀପ : ପୁଣି ଜଣେ ଋଷୀୟ ନାଗରିକଙ୍କ ସନ୍ଦେହଜନକ ମୃତ୍ୟୁ । ପାରାଦୀପ -ବନ୍ଦରାଞ୍ଚଳରେ ଘଟିଛି ଏଭଳି ଅଘଟଣ । ଏମ୍ .ଭି. ଅଲଦାନା ନାମକ ଜାହାଜର ଚିଫ୍ ଇଞ୍ଜିନିୟର ମିଲ୍ ଯାକୁବ ସର୍ଜଇଙ୍କ ସନ୍ଦେହ ଜନକ ମୃତ୍ୟୁ ହୋଇଛି । ଜାହାଜଟି ଅଙ୍କରେଜରେ ଥିବା ବେଳେ ଏହି ଅଘଟଣ ଘଟିଛି । ମୃତ୍ୟୁର କାରଣ ଅସ୍ପଷ୍ଟ ଥିବା ବେଳେ ହୃଦଘାତରେ ମୃତ୍ୟୁ ହୋଇଥିବା ଅନୁମାନ କରାଯାଉଛି । ତଦନ୍ତ ପରେ ମୃତ୍ୟୁର କାରଣ ଜଣାପଡିବ ବୋଲି ବନ୍ଦର କର୍ତ୍ତୃପକ୍ଷ ସୂଚନା ଦେଇଛନ୍ତି ।
ଗତକାଲି ସନ୍ଧ୍ୟାରେ ଏହି ଜାହାଜ ଆଙ୍କରେଜରେ ଲାଗିଥିଲା । ଆଜି ଜେଏସଡବ୍ଲ୍ୟ ବର୍ଥରୁ ଆଇରନ ଓର ନେବାର ଥିଲା । ମାତ୍ର ଭୋର ୪ଟା ୧୫ ସମୟରେ ଜାହାଜର ଚିଫ୍ ଇଞ୍ଜିନିୟର ଗୁରୁତର ଥିବା ନେଇ ବନ୍ଦରକୁ ମେସେଜ ଦିଆଯାଇଥିଲା। ବନ୍ଦର ପକ୍ଷରୁ ଡକ୍ ବୋଟ୍ ସହାୟତାରେ ଏକ ଡାକ୍ତରୀ ଟିମକୁ ଜାହାଜ ନିକଟକୁ ପଠାଯାଇଥିଲା । ମାତ୍ର ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ବନ୍ଦର ପକ୍ଷରୁ ପାରାଦୀପ ଥାନାରେ ଏତଲା ଦିଆଯିବା ପରେ ଜାହାଜରୁ ମୃତଦେହକୁ ବ୍ୟବଚ୍ଛେଦ କରିବା ପାଇଁ ବ୍ୟବସ୍ଥା କରାଯାଇଛି । ଏହାସହ ଋଷୀୟା ଦୂତାବାସ ସହିତ ମଧ୍ୟ ଯୋଗାଯୋଗ କରାଯାଉଛି।
ଆଜି ଭାରତ- ଶ୍ରୀଲଙ୍କା ପ୍ରଥମ ଟି-୨୦, ହାର୍ଦ୍ଦିକଙ୍କ ଉପରେ ଭାରତର ଭାଗ୍ୟ
ମୁମ୍ବାଇ : ନୂଆ ବର୍ଷରେ ନୂଆ ସିରିଜ । ଆଜି ଭାରତ ଓ ଶ୍ରୀଲଙ୍କା ମଧ୍ୟରେ ଖେଳାଯିବ ପ୍ରଥମ ଟି-୨୦ । ମୁମ୍ବାଇର ଓ୍ବାଙ୍ଖେଡେ ଷ୍ଟାଡିୟମରେ ରାତି ୭ଟାରେ ଖେଳାଯିବ ମ୍ୟାଚ୍ । ଭାରତର ୩ ସୁପରଷ୍ଟାର ରୋହିତ ଶର୍ମା, ବିରାଟ କୋହଲି ଓ ଲୋକେଶ ରାହୁଲଙ୍କ ବିନା ପଡିଆକୁ ଓହ୍ଲାଇବ ଦଳ । ସେଥିପାଇଁ ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ହାତରେ ଭାରତର ଭାଗ୍ୟ ନିର୍ଭର କରୁଛି । ହାର୍ଦ୍ଦିକ୍ ପାଣ୍ଡ୍ୟାଙ୍କ ନେତୃତ୍ୱରେ ତିନି ଟିକିଆ ଟି-୨୦ ସିରିଜ୍ ଖେଳିବ ଦଳ । ନୂଆ ଖେଳାଳି, ନୂଆ ଟିମ୍ ଓ ନୂଆ ମ୍ୟାନେଜମେଣ୍ଟ ସହ ଭାରତର ଟି-୨୦ର ଅଭିଯାନ ଆରମ୍ଭ ହେବ ।
ଆଜି ଶ୍ରୀଲଙ୍କା ପାଇଁ ଘାତକ ସାଜିବେ ଯୁବ ପେସ୍ ବାହିନୀ । ଆଜିର ପେସ୍ ବିଭାଗ ସମ୍ଭାଳିବେ ଅର୍ଶଦୀପ ସିଂହ । ତାଙ୍କ ସହ ଉମ୍ରାନ୍ ମଲ୍ଲିକ, ଶିବମ ମାଭି, ମୁକେଶ କୁମାର ଓ ହର୍ଷଲ ପଟେଲ ପେସ୍ ବୋଲର ଭାବେ ରହିଛନ୍ତି । ଦଳକୁ ଉଚିତ୍ ମାର୍ଗ ଦେଖାଇବାକୁ ମୁଖ୍ୟ ଦାୟିତ୍ବରେ ରହିବେ ହାର୍ଦ୍ଦିକ୍ ପାଣ୍ଡ୍ୟା । ଏହି ସିରିଜରେ ଭାରତ ଓପନିଂରେ ନୂଆ ଯୋଡି ଇଶାନ କିସାନ ଓ ଋତୁରାଜ ଗାଏକ୍ବା ଖେଳିବେ । ନଂ-୩ରେ ସୂର୍ଯ୍ୟକୁମାର ଯାଦବ ଖେଳିବେ । ଯଦି ବୋଲିଂ ଲାଇନ ଅପ୍ କଥା କହିବା ତାହେଲେ ଓ୍ବିକେଟକିପର ସଞ୍ଜୁ ସାମସନ ନଂ-୪ରେ ଖେଳିବେ ।
ଅନ୍ୟପକ୍ଷରେ ଯଦି ଶ୍ରୀଲଙ୍କା କଥା କହିବା ତାହାଲେ ଗତ ଟି-୨୦ ବିଶ୍ୱକପ ପରେ ଦଳ କୌଣସି ଆନ୍ତର୍ଜାତୀୟ ଟି-୨୦ ମ୍ୟାଚ ଖେଳିନାହିଁ । କିନ୍ତୁ ଶ୍ରୀଲଙ୍କା ପ୍ରିମିୟର ଲିଗରେ ଦଳର ସମସ୍ତ ଖେଳାଳି ଭଲ ପ୍ରଦର୍ଶନ କରିଥିଲେ । ଗତ ଏସିଆ କପରେ ମଧ୍ୟ ଶ୍ରୀଲଙ୍କା ଭଲ ପ୍ରଦର୍ଶନ କରିଥିଲା ଏବଂ ଚମ୍ପିଆନ ହୋଇଥିଲା । ଶ୍ରୀଲଙ୍କାର ବ୍ୟାଟିଂ ବିଭାଗ ସନ୍ତୁଳିତ ଥିବାବେଳେ ବୋଲିଂ ବିଭାଗର ନେତୃତ୍ୱ ନେବେ ହସରଙ୍ଗାଙ୍କ ଉପରେ ରହିବ । ତେଣୁ ଏହି ସିରିଜରେ ଭାରତକୁ କଡ଼ା ଟକ୍କର ଦେଇପାରେ ଶ୍ରୀଲଙ୍କା ।
ଅଷ୍ଟମ ଦିନରେ କଂସର ଚିଟାଉ ନେଇ ଗୋପପୁର ଯିବେ ଅକ୍ରୁର
ବରଗଡ଼ : ମୃତ୍ୟୁକୁ ନେଇ ଭୟଭୀତ ମହାରାଜା କଂସ । କଳେବଳେ କୌଶଳେ ନିଜର କାଳ ହୋଇ ଗୋପରେ ବଢୁଥିବା କୃଷ୍ଣଙ୍କୁ ମାରିବାକୁ କରିଛି ଯୋଜନା । ନାରଦଙ୍କ ପରାମର୍ଶ କ୍ରମେ ମଥୁରାରେ ଆୟୋଜନ କରିଛି ଧନୁଯାତ୍ରା । ଏଥିପାଇଁ ନିଜର ସମର୍ଥିତ ସମସ୍ତ ଅସୁର ରାଜାଙ୍କ ସହଯୋଗ ଲୋଡିଛି । ଆଜି ବରଗଡ଼ ଧନୁଯାତ୍ରାର ଅଷ୍ଟମ ଦିନରେ କଂସର ଚିଟାଉ ନେଇ ଅକ୍ରୁର ଗୋପପୁର ଯାତ୍ରା କରିବେ ।
ଯମୁନାରେ ଶ୍ରୀକୃଷ୍ଣଙ୍କ ପାଦ ଚିହ୍ନ ଦେଖି ଭାବବିହ୍ବଳ ହେବେ ଭକ୍ତ ଅକ୍ରୁର । ଏହାପରେ କୃଷ୍ଣ ବଳରାମଙ୍କ ସହ ସାକ୍ଷାତ କରିବେ । ସେପଟେ ଗୋପରେ ଇନ୍ଦ୍ରଙ୍କ ଗର୍ବ ଭାଙ୍ଗିବେ ଗର୍ବଗଞ୍ଜନ ଭଗବାନ ଶ୍ରୀକୃଷ୍ଣ । ବର୍ଷା ଓ ଝଡରୁ ଗୋପପୁରବାସୀଙ୍କୁ ଲକ୍ଷା କରିବାକୁ ନିଜର ଆଙ୍ଗୁଠିରେ ଧାରଣ କରିବେ ଗିରି ଗୋବର୍ଦ୍ଧନ ।
ଯାତ୍ରାର ସପ୍ତମ ଦିନରେ ଗୋପରେ ରାଧାକୃଷ୍ଣଙ୍କ ନାବକେଳି ଦେଖିବାକୁ ଜମିଥିଲା ହଜାର ହଜାର ଦର୍ଶକଙ୍କ ଭିଡ଼ । ଦେବଗଡ଼ ମନୋବନ୍ଧରେ ଏହି ଦୃଶ୍ୟକୁ ଦେଖିବାକୁ ଅପେକ୍ଷା କରିଥିଲେ ଦର୍ଶକ । ସେହିପରି ଗୋପରେ କଂସଙ୍କ ଅସୁର ରାଜାଙ୍କ ସହ ମନ୍ତ୍ରଣା, ବିଭିନ୍ନ ଅଫିସରଙ୍କ ସହ ଆଲୋଚନା ସାଙ୍ଗକୁ ଦୁର୍ଗା ମନ୍ଦିରରେ ପୂଜା ଦୃଶ୍ୟ ଅଭିନିତ ହୋଇଥିଲା ।
ଦିଲ୍ଲୀରୁ ଆଜି ପୁଣି ଆରମ୍ଭ ଭାରତ ଯୋଡୋ ଯାତ୍ରା
ନୂଆଦିଲ୍ଲୀ : ଦିଲ୍ଲୀ ଯମୁନା ବଜାରସ୍ଥିତ ହନୁମାନ ମନ୍ଦିରରୁ ଆଜି ଆରମ୍ଭ ହେବ ଭାରତ ଯୋଡୋ ଯାତ୍ରା । ଏହି ଯାତ୍ରା ଉତ୍ତରପ୍ରଦେଶ ଘାଜିଆବାଦ ଅଭିମୁଖେ ଯିବ । ରାହୁଲ ଗାନ୍ଧିଙ୍କ ନେତୃତ୍ବରେ ବାହାରିବାକୁ ଥିବା ଏହି ଯାତ୍ରାରେ ଭାଗ ନେବେ ବହୁ ହେଭିଓ୍ବେଟ ଓ ଶହ ଶହ କର୍ମୀ । ଉତ୍ତରପ୍ରଦେଶରେ ୧୨୦ କିଲୋମିଟର ଯାତ୍ରା ପରେ ଏହି ଅଭିଯାନ ଆସନ୍ତା ୫ ତାରିଖରେ ହରିଆଣାର ପାନିପଥରେ ପ୍ରବେଶ କରିବ ।
ଘାଜିଆବାଦ ଅତିକ୍ରମ କରିବା ପରେ ଅଭିଯାତ୍ରୀମାନେ ବାଗପତସ୍ଥିତ ମାବିକାଲାଠାରେ ରାତ୍ରୀଯାପନ କରିବେ । ଯାତ୍ରା ଅବସରରେ ବିଜେପିର କୁଶାସନ ବିରୋଧରେ ଲୋକଙ୍କୁ ସଚେତନ କରାଯିବା ସହ ଦଳକୁ ମଜଭୁତ କରିବା ଲାଗି ଆହ୍ବାନ ଦିଆଯିବ । ପ୍ରଥମ ପର୍ଯ୍ୟାୟରେ ଦିଲ୍ଲୀରୁ ପ୍ରାୟ ଅଢେଇ ହଜାର କର୍ମୀ ସାମିଲ ହୋଇଥିବା ସୂଚନା ମିଳିଛି । ଉତ୍ତରପ୍ରଦେଶର ସମସ୍ତ ୭୫ଟି ଜିଲ୍ଲାର କର୍ମୀ ବିଭିନ୍ନ ପର୍ଯ୍ୟାୟରେ ସାମିଲ ହେବେ । ଗତ ୨୪ ତାରିଖରେ ଦିଲ୍ଲୀରେ ଭାରତ ଯୋଡୋ ଯାତ୍ରା ପହଞ୍ଚିବା ପରେ କିଛିଦିନ ଲାଗି ଏହାକୁ ସ୍ଥଗିତ ରଖାଯାଇଥିଲା ।
ସେପଟେ ଭାରତ ଯୋଡୋ ଯାତ୍ରାରେ ସାମିଲ ହେବା ଲାଗି ରାହୁଲ ଗାନ୍ଧି କରିଥିବା ଅନୁରୋଧକୁ ସ୍ବାଗତ କରିଛନ୍ତି ସମାଜବାଦୀ ପାର୍ଟି ନେତା ଅଖିଳେଶ ସିଂ ଯାଦବ । ଭାରତ ଯୋଡୋ ଯାତ୍ରାର ସଫଳତା କାମନା କରିଛନ୍ତି ଅଖିଳେଶ । ଭ୍ରାତୃତ୍ବବୋଧ, ଅହିଂସା, ସହଯୋଗ, ସଂହତିର ବାର୍ତ୍ତା ନେଇ ଚାଲିଥିବା ଯାତ୍ରାକୁ ସେ ଶୁଭେଚ୍ଛା ଜଣାଇଛନ୍ତି ।
ଯାତ୍ରା ଲାଗି ଦିଲ୍ଲୀ ପୋଲିସ ପକ୍ଷରୁ ଟ୍ରାଫିକ ଆଜଭାଇଜରି ଜାରି କରାଯାଇଛି । ମାର୍ଗାରେଟ ଓ୍ବାଲେ ବାବା, ହନୁମାନ ମନ୍ଦିର, ଲୋନି ବର୍ଡର, ଶାସ୍ତ୍ରୀ ପାର୍କ ମେଟ୍ରୋ ଷ୍ଟେସନ, ପୁରୁଣା ଜିଟି ରୋଡ, ଫର୍ଣ୍ଣିଟର ମାର୍କେଟ, ଅନସାରୀ ରୋଡ, ମଉଜପୁରୀ, ବାବରପୁର, ଓ୍ବାଜିରାବାଦ ରୋଡ ଆଦି ଇଲାକାରେ ପୋଲିସ ପକ୍ଷରୁ ନିରାପତ୍ତାମୂଳକ ପଦକ୍ଷେପ ନିଆଯାଇଛି ।
ଦୁର୍ଦ୍ଦଶାରେ ଟେସଲା ଓ ସ୍ପେସଏକ୍ସ ଓନର ; ବିକୁଛନ୍ତି କମ୍ପାନିର ଫର୍ଣ୍ଣିଚର ଓ କିଚେନ ସାମଗ୍ରୀ
ଓ୍ବାଶିଂଟନ : ବିଲିୟନେୟାରଙ୍କ ବଢୁଛି ଦୁର୍ଦ୍ଦଶା । ଟୁଇଟର ମାଲିକ ଏଲନ ମସ୍କଙ୍କ ଲାଗି ଆସିଛି ଅତି ଖରାପ ସମୟ । ନା ଦେଇପାରୁଛନ୍ତି ଅଫିସ ଭଡ଼ା ନା ସୁଧାରିପାରୁଛନ୍ତି କମ୍ପାନି ସ୍ଥିତି । ରାତାରାତି ୨୦୦ ବିଲିୟନ ଡଲାର କ୍ଷତି ସହିଥିବା ଟୁଇଟର, ଟେସଲା ଓ ସ୍ପେସଏକ୍ସ ମାଲିକ ମସ୍କ ଏବେ ଗଭୀର ଚିନ୍ତାରେ । ଟୁଇଟର ଅଧିକୃତ କରିବା ପରେ ସେ ବିଶ୍ବସ୍ତରରେ ପ୍ରାୟ ୫୦ ଭାଗ କର୍ମଚାରୀଙ୍କୁ ଛଟେଇ କରିସାରିଲେଣି ।
କମ୍ପାନିର ସ୍ଥିତି ଏପରି ହେଲାଣି ଯେ କର୍ମଚାରୀଙ୍କ ଲାଗି ରହିଥିବା ସୁବିଧା ଗୁଡିକୁ ସେ ହଟାଇ ନେଲେଣି । କେବଳ ଏତିକି ନୁହେଁ ସେ କମ୍ପାନିର ଫର୍ଣ୍ଣିଚର, କିଚେନ ସାମଗ୍ରୀ ଆଦି ବିକ୍ରି କରିବା ଆରମ୍ଭ କଲେଣି । ବର୍ତ୍ତମାନ ସୁଦ୍ଧା ସାନଫ୍ରାନସିସ୍କୋ ଅଫିସ ଭଡା ପରିମାଣ ହେଲାଣି ୧ କୋଟି ୧୨ ଲକ୍ଷ ଟଙ୍କା , ଯାହା ଦେଇ ପାରିନାହାନ୍ତି ମସ୍କ । ହେଡକ୍ବାର୍ଟର୍ସର ଅଫିସଗୁଡିକୁ ମସ୍କ ବେଡରୁମରେ ପରିଣତ କରିସାରିଲେଣି । ଏହାର ଉଦ୍ଦେଶ୍ୟ ହେଉଛି କର୍ମଚାରୀମାନେ ସାରା ଦିନ କମ୍ପାନି ଲାଗି କାର୍ଯ୍ୟ କରିବେ
ଭୁବନେଶ୍ୱର ସାଂସଦ ଅପରାଜିତା ଷଡ଼ଙ୍ଗୀଙ୍କୁ କେଦାରପଲ୍ଲୀ ବସ୍ତିରେ ତୀବ୍ର ବିରୋଧ
ଭୁବନେଶ୍ୱର: ସାଢେ ୩ବର୍ଷ ଯାଏ କୁଆଡ଼େ ଯାଇଥିଲେ । ଆଜି କେମିତି ଆମେ ମନେପଡ଼ିଗଲୁ । ଭୁବନେଶ୍ବରରେ ଭୁବନେଶ୍ବର ସାଂସଦ ଅପରାଜିତା ଷଡ଼ଙ୍ଗୀଙ୍କ ବିରୋଧରେ ଜନ ଆକ୍ରୋଶ । କେଦାରପଲ୍ଲୀ ବସ୍ତିରେ ସାଂସଦ ଅପରାଜିତା ଷଡ଼ଙ୍ଗୀଙ୍କୁ ପ୍ରବଳ ବିରୋଧ । ସାଢେ ୩ବର୍ଷ ପରେ କୁଆଡ଼େ ଆସିଛ ବୋଲି ପ୍ରଶ୍ନ କଲେ ଜନସାଧାରଣ । ଭୋଟ ବେଳକୁ ଆସି ସ୍ବପ୍ନ ଦେଖାଇଥିଲ, ତାପରେ କୁଆଡ଼େ ହଜିଗଲ ବୋଲି ସାଂସଦଙ୍କୁ ସାମ୍ନାରେ ପାଇ ପ୍ରଶ୍ନ କରିଥିଲେ ବସ୍ତିବାସିନ୍ଦା ।
୨୦୧୯ ନିର୍ବାଚନରେ ଭୋଟ ମାଗିବାକୁ ବସ୍ତିକୁ ଆସିଥିଲେ ଅପରାଜିତା । ତାପରେ ମ୍ୟାଡାମଙ୍କର ଆଉ ଦେଖା ମିଳିନଥିଲା । ସାଢେ ୩ବର୍ଷ ଧରି ଲୋକଙ୍କ ପାଖକୁ ଆସିନଥିଲେ ସାଂସଦ ଅପରାଜିତା । ଆଜି ବସ୍ତିକୁ ଆସିଥିବାବେଳେ ଲୋକ କୁଆଡ଼େ ଆସିଛ ବୋଲି ପ୍ରଶ୍ନ କରି ଅସନ୍ତୋଷ ପ୍ରକାଶ କରିଥିଲେ । ବିରୋଧକୁ ସାମ୍ନା କରିନପାରି ଘଟଣାସ୍ଥଳରୁ ଫେରିଯାଇଥିଲେ ଅପରାଜିତା ଷଡ଼ଙ୍ଗୀ । ଘଟଣାର ଭିଡିଓ କରିବାରୁ ଜଣେ ଯୁବକଙ୍କ ମୋବାଇଲ ଅପରାଜିତାଙ୍କ ସମର୍ଥକ ଛଡ଼ାଇ ନେଇଥିବା ଅଭିଯୋଗ ହୋଇଛି । ଘଟଣାସ୍ଥଳରେ କିଛି ସମୟ ପାଇଁ ଉତ୍ତେଜନା ସ୍ଥିତି ଲାଗି ରହିଥିଲା ।
ଜାନୁଆରୀ ୩୧ରୁ ସଂସଦର ବଜେଟ ଅଧିବେଶନ
ନୂଆଦିଲ୍ଲୀ: ଆସନ୍ତା ଜାନୁଆରୀ ୩୧ରୁ ସଂସଦର ବଜେଟ ଅଧିବେଶନ । ଫେବ୍ରୁଆରୀ ୧ରେ ଆସିପାରେ ବଜେଟ । ଏହି ଅଧିବେଶନ ଆସନ୍ତା ଏପ୍ରିଲ ୬ ଯାଏ ଚାଲିବା ସମ୍ଭାବନା ରହିଛି । ପ୍ରଥମ ଦିନ ସଂସଦର ମିଳିତ ଅଧିବେଶନରେ ଉଦବୋଧନ ଦେବେ ରାଷ୍ଟ୍ରପତି ଦ୍ରୌପଦୀ ମୁର୍ମୁ । ସଂସଦର ମିଳିତ ଅଧିବେଶନରେ ପ୍ରଥମ ଥର ଲାଗି ଉଦବୋଧନ ଦେବେ ରାଷ୍ଟ୍ରପତି । ବଜେଟ ଅଧିବେଶନ ଆରମ୍ଭର ପ୍ରଥମ ଦିନରେ ଆଗତ ହେବ ଅର୍ଥନୈତିକ ସର୍ଭେ ରିପୋର୍ଟ । ଫେବ୍ରୁଆରୀ ୧ରେ ଅର୍ଥମନ୍ତ୍ରୀ ନିର୍ମଳା ସୀତାରମଣ କେନ୍ଦ୍ରୀୟ ବଜେଟ ଉପସ୍ଥାପନ କରିବେ । ଆସନ୍ତା ଫେବ୍ରୁଆରୀ ୧୦ ଯାଏ ଚାଲିବ ସଂସଦର ପ୍ରଥମ ପର୍ଯ୍ୟାୟ । ସଂସଦର ଦ୍ବିତୀୟ ପର୍ଯ୍ୟାୟ ଅଧିବେଶନ ମାର୍ଚ୍ଚ ୬ରୁ ଆରମ୍ଭ ହୋଇ ଏପ୍ରିଲ ୬ରେ ସରିବ ।
ଜୋମାଟୋରୁ ଇସ୍ତଫା ଦେଲେ ଚତୁର୍ଥ କୋ-ଫାଉଣ୍ଡର ଗୁଞ୍ଜନ ପଟିଦାର
ନୂଆଦିଲ୍ଲୀ: ଖାଦ୍ୟ ଓ ପାନୀୟ ସାମଗ୍ରୀର ଅନଲାଇନ୍ ଡେଲିଭରି ସୁବିଧା ଦେଉଥିବା ପ୍ଲାଟଫର୍ମ ଜୋମାଟୋର କୋ-ଫାଉଣ୍ଡର ଏବଂ ଚିଫ୍ ଟେକ୍ନୋଲୋଜି ଅଫିସର ଗୁଞ୍ଜନ ପଟିଦାର ଇସ୍ତଫା ଦେଇ ଦେଇଛନ୍ତି । ଗତ କିଛି ସମୟ ହେବ କମ୍ପାନୀରୁ ଅନେକ ବଡ଼ ଅଧିକାରୀ ଇସ୍ତଫା ଦେଇ ବାହାରିଯାଇଛନ୍ତି ଏବଂ ଗୁଞ୍ଜନ ପଟିଦାର ଏହି କ୍ରମରେ ନୂଆ ନାଁ ଅଟେ । ପଟିଦାରଙ୍କ ଇସ୍ତଫାର କିଛି ସପ୍ତାହ ପୂର୍ବରୁ କମ୍ପାନୀର ଆଉ ଜଣେ କୋ-ଫାଉଣ୍ଡର ମୋହିତ ଗୁପ୍ତା ମଧ୍ୟ ଇସ୍ତଫା ଦେଇଥିଲେ । କମ୍ପାନୀର ନ୍ୟୁ ଇନିସିଏଟିଭ ହେଡ ଏବଂ ପୂର୍ବତନ ଫୁଡ ଡେଲିଭରି ଚିଫ ରାହୁଲ ଗାଞ୍ଜୁ ଏବଂ ଏହାର ଇଣ୍ଟରସିଟି ଲିଜେଡ ସର୍ଭିସେଜର ହେଡ ସିଦ୍ଧାର୍ଥ ଝବାର ମଧ୍ୟ ନିକଟରେ କମ୍ପାନୀରୁ ଇସ୍ତଫା ଦେଇଥିଲେ ।
ପଟିଦାର ଜୋମାଟୋର କିଛି କର୍ମଚାରୀମାନଙ୍କ ମଧ୍ୟରେ ସାମିଲ ଥିଲେ ଏବଂ ସେ କମ୍ପାନୀର କୋର ଟେକ ସିଷ୍ଟମକୁ ବିକଶିତ କରିବାରେ ଗୁରୁତ୍ୱପୂର୍ଣ୍ଣ ଦାୟିତ୍ୱ ତୁଲାଇଥିଲେ । କମ୍ପାନୀ ସେୟାର ମାର୍କେଟକୁ ପଠାଇଥିବା ସୂଚନାରେ କହିଛି ଯେ ଗତ ୧୦ରୁ ଅଧିକ ବର୍ଷରେ ସେ ଜମାଟୋର ଟେକ ଲିଡରସିପ୍ ଟିମକୁ ମଧ୍ୟ ଛିଡ଼ା କରାଇଥିଲେ । ୨୦୨୨ ବର୍ଷରେ ଟେକ ସେୟାରରେ ହ୍ରାସ ମଧ୍ୟରେ ଜୋମାଟୋର ସେୟାର ନିଜର ୧୬୨ ଟଙ୍କାର ପିକରୁ ପ୍ରାୟ ୫୦ ପ୍ରତିଶତରୁ ଅଧିକ ହ୍ରାସ ପାଇ ସାରିଛି । ଜୋମାଟୋର ସେୟାର ଆଜି ବିଏସଇରେ ୧.୬୯ ପ୍ରତିଶତ ହ୍ରାସ ପାଇ ୬୦.୩୦ ଟଙ୍କାରେ ବନ୍ଦ ହୋଇଛି ।