ଭୁବନେଶ୍ୱର: ବିଧାନସଭାର ବଜେଟ ଅଧିବେଶନରେ ରାଜ୍ୟପାଳଙ୍କ ଅଭିଭାଷଣ ସମୟରେ ବିରୋଧୀଙ୍କ କକ୍ଷତ୍ୟାଗକୁ ଦୁର୍ଭାଗ୍ୟଜନକ ବୋଲି କହିଲେ ସରକାରୀ ଦଳ ମୁଖ୍ୟ ସଚେତକ ପ୍ରଶାନ୍ତ ମୁଦୁଲି । ଯାହା ନାଁ ୧୬ଟି ଅପରାଧିକ ମାମଲା ରହିଛି , ଯିଏ ନିଜ ସଭାପତିଙ୍କୁ ମାଡ଼ ମାରି ଲହୁଲୁହାଣ କରିଥିଲେ, ଜଣେ କାର୍ଯ୍ୟରତ ମହିଳା ପୋଲିସଙ୍କୁ ଧକ୍କା ମାରିଥିଲେ ତାଙ୍କଠାରୁ ଆଉ ଅଧିକ କ’ଣ ଆଶା କରିବା ବୋଲି ବିରୋଧି ଦଳ ନେତା ଜୟନାରାୟଣ ମିଶ୍ରଙ୍କୁ ଟାଗେର୍ଟ କରିଛନ୍ତି ପ୍ରଶାନ୍ତ ମୁଦୁଲି । ବିଜେପି ସୁରକ୍ଷା କଥା କହୁଛନ୍ତି ସେମାନେ ପ୍ରଥମେ ତାଙ୍କ ବିରୋଧୀ ଦଳ ନେତା ଜୟନାରାୟଣ ମିଶ୍ରଙ୍କ ଠାରୁ ଦୂରେଇ ରୁହନ୍ତୁ ବୋଲି କହିଛନ୍ତି ପ୍ରଶାନ୍ତ । ମାନସିକ ସନ୍ତୁଳନ ଠିକ୍ ଥିବା ବ୍ୟକ୍ତି ଏମିତି କାର୍ଯ୍ୟ କେବେ କରନ୍ତିନି । ତେଣୁ ଗଣମାଧ୍ୟମ ପ୍ରତିନିଧିମାନେ ମଧ୍ୟ ଜୟନାରାୟଣ ମିଶ୍ରଙ୍କ ଠାରୁ ଦୂରେଇ ରୁହନ୍ତୁ ବୋଲି କହିଛନ୍ତି ସରକାରୀ ଦଳର ମୁଖ୍ୟ ସଚେତକ ପ୍ରଶାନ୍ତ ମୁଦୁଲି ।
ଓଡ଼ିଶାରୁ ଦୂର ହେବ ମ୍ୟାଲେରିଆ, ନୋ ମୋର ମ୍ୟାଲେରିଆ ସହ ରାଜ୍ୟ ସ୍ବାସ୍ଥ୍ୟ ବିଭାଗର ଚୁକ୍ତି ସ୍ଵାକ୍ଷରିତ
ଭୁବନେଶ୍ୱର: ଓଡ଼ିଶାରୁ ଦୂର ହେବ ମ୍ୟାଲେରିଆ l ନୋ ମୋର ମ୍ୟାଲେରିଆ ସହ ରାଜ୍ୟ ସ୍ବାସ୍ଥ୍ୟ ବିଭାଗ ସହ ଚୁକ୍ତି ସ୍ଵାକ୍ଷରିତ ହୋଇଛି l ଆଗାମୀ ୨୦୨୭ ସୁଦ୍ଧା ଓଡ଼ିଶାରୁ ମ୍ୟାଲେରିଆ ସମ୍ପୂର୍ଣ୍ଣ ଦମନ କରିବା ପାଇଁ ଲକ୍ଷ୍ୟ ରଖିଛି ସ୍ୱାସ୍ଥ୍ୟ ବିଭାଗ l ୨୦୨୭ ସୁଦ୍ଧା ଓଡ଼ିଶାରେ ମ୍ୟାଲେରିଆ ଦମନ ପାଇଁ ସ୍ୱାସ୍ଥ୍ୟ ବିଭାଗ ଚୁକ୍ତି କରିଛି l ଆଗାମୀ ୫ ବର୍ଷ ପାଇଁ ନୋ ମୋର ମ୍ୟାଲେରିଆ ସହ ଓଡ଼ିଶା ସ୍ୱାସ୍ଥ୍ୟ ବିଭାଗର MOU ସ୍ବାକ୍ଷର ହୋଇଛି । ଓଡ଼ିଶାରେ ୧୦ଟି ମ୍ୟାଲେରିଆ ପ୍ରବଣ ଜିଲ୍ଲାରେ ଆହୁରି ବ୍ୟାପକ ହେବ କାର୍ଯ୍ୟକ୍ରମ ଓ ସଚେତନତା l କୋରାପୁଟ ଓ ମାଲକାନଗିରି ଜିଲ୍ଲା ଉପରେ ଅଧିକ ଫୋକସ କରାଯିବ l
ସେପଟେ ୨୦୨୭ ସୁଦ୍ଧା ଓଡ଼ିଶାରେ ମ୍ୟାଲେରିଆ ସମ୍ପୂର୍ଣ୍ଣ ମୁକ୍ତ କରିବା ଲକ୍ଷ୍ୟକୁ ସଫଳ କରିବା ପାଇଁ ସ୍ୱାସ୍ଥ୍ୟ ବିଭାଗ ସହ ଯୋଡ଼ି ହୋଇଥିବା ସଂସ୍ଥାମାନେ ସମସ୍ତଙ୍କ ସହଯୋଗ ଲୋଡ଼ିଛନ୍ତି l ରାଜ୍ୟରେ ମ୍ୟାଲେରିଆ ନିୟନ୍ତ୍ରଣ ଓ ବିଲୋପ କାର୍ଯ୍ୟକ୍ରମକୁ ଏମ. ଏନ.ଏମ ୨୦୧୮ ମସିହାରୁ ଓଡ଼ିଶା ସରକାରଙ୍କୁ ସମର୍ଥନ କରିଆସୁଛି l ସେପଟେ ଏହି ଚୁକ୍ତି ଦ୍ୱାରା ଉଭୟ ଫର୍ମାଲ ଓ ଇନଫର୍ମାଲ ବେସରକାରୀ ସ୍ୱାସ୍ଥ୍ୟ କ୍ଷେତ୍ରରେ ମ୍ୟାଲେରିଆ ଚିହ୍ନଟ ଓ ଚିକିତ୍ସାକୁ ତ୍ୱରାନ୍ୱିତ କରିବ l ଅନ୍ୟପଟେ ମ୍ୟାଲେରିଆ ସମ୍ପୂର୍ଣ୍ଣ ଦମନ ପାଇଁ ତୃଣମୂଳସ୍ତରରୁ ଲୋକମାନଙ୍କୁ ସଚେତନ କରିବା ସହ ସଠିକ କାର୍ଯ୍ୟକ୍ରମ ନିହାତି ଜରୁରୀ ବୋଲି କହିଛନ୍ତି ଜନସ୍ୱାସ୍ଥ୍ୟ ନିର୍ଦେଶକ ଓ ବିଭାଗ ସ୍ୱତନ୍ତ୍ର ସଚିବ ।
ପୋଲିସ ହାତରେ ଛିନତାଇ ଗ୍ୟାଙ୍ଗ୍, ୨ ଜଣଙ୍କୁ ଗିରଫ କଲା କ୍ୟାପିଟାଲ ପୋଲିସ
ଭୁବନେଶ୍ୱର: କ୍ୟାପିଟାଲ ଥାନା ପୋଲିସ ହାତରେ ଛିନତାଇ ଗ୍ୟାଙ୍ଗ୍ । ୨ ଜଣଙ୍କୁ ଗିରଫ କଲା କ୍ୟାପିଟାଲ ଥାନା ପୋଲିସ । ଗିରଫ ୨ ଅଭିଯୁକ୍ତ ହେଲେ ସୁଶାନ୍ତ ମହାରଣା ଓ ତ୍ରିଲୋଚନ ନାଥ । ସେମାନଙ୍କ ନାଁରେ ବିଭିନ୍ନ ଥାନାରେ ୩୪ଟି ମାମଲା ରହିଛି । ଗତ ୧୯ ତାରିଖରେ ସୂର୍ଯ୍ୟନଗର ଭେନୋସିନ ରେଷ୍ଟୁରାଣ୍ଟ ସମ୍ମୁଖରୁ ମୋଟର ସାଇକେଲରେ ଯାଉଥିବା ଦମ୍ପତିଙ୍କଠାରୁ ଲୁଟ୍ କରିଥିଲେ ଏହି ଅଭିଯୁକ୍ତ । ଅଭିଯୋଗ ପରେ କ୍ୟାପିଟାଲ ଥାନା ଓ POPD ଟିମ୍ ପକ୍ଷରୁ ବିଭିନ୍ନ ସ୍ଥାନରେ ଚଢ଼ାଉ କରାଯାଇଥିଲା ।
ଆଜି ଭୋର୍ ପ୍ରାୟ ୪ଟା ସମୟରେ ପୋଲିସ ପାଟ୍ରୋଲିଂ ବେଳେ ଭୁବନେଶ୍ୱର କ୍ଲବ ପଛପଟୁ ସନ୍ଦିଗ୍ଧ ଅବସ୍ଥାରେ ଦୁଇ ଅଭିଯୁକ୍ତଙ୍କୁ ପୋଲିସ ଧରିଛି । ସେମାନଙ୍କଠାରୁ ଗୋଟିଏ ପଲସର ବାଇକ, ୫ଟି ମୋବାଇଲ ଫୋନ୍, ଗୋଟିଏ ଭ୍ୟାନିଟି ବ୍ୟାଗ, ଗୋଟିଏ ATM କାର୍ଡ, ୨୦ ଗ୍ରାମ ରୁପା ଓ ୧୦ ହଜାର ଟଙ୍କା ଜବତ କରିଛି କ୍ୟାପିଟାଲ ଥାନା ପୋଲିସ।
ମୋ ବାପାଙ୍କ ମୃତ୍ୟୁକୁ ରାଜନୀତିର ରଙ୍ଗ ଦିଆନଯାଉ : ଦିପାଳୀ ଦାସ
ଭୁବନେଶ୍ବର : ସ୍ୱର୍ଗତ ନବ କିଶୋର ଦାସଙ୍କ ହତ୍ୟାକୁ ନେଇ ମୁହଁ ଖୋଲିଲେ ଝିଅ ଦିପାଳୀ ଦାସ । ରାଜନୀତିର ରଙ୍ଗ ବୋଳା ଯାଉଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଉପରେ ମୋର ସମ୍ପୂର୍ଣ୍ଣ ଭରସା ରହିଛି । ଆମକୁ ସର୍ବଦା ଭଲ ପାଇବା ଦେଇଛନ୍ତି ମୁଖ୍ୟମନ୍ତ୍ରୀ । ମୋ ବାପାଙ୍କ ମୃତ୍ୟୁ ଘଟଣାରେ ତଦନ୍ତ ପକ୍ରିୟାକୁ ନେଇ ଆମ ପରିବାରର ଭରସା ଅଛି । କ୍ରାଇମ୍ ବ୍ରାଞ୍ଚର ପ୍ରୋସେସ ଚାଲିଛି । ତଦନ୍ତ ସଠିକ ଦିଗରେ ଚାଲିଛି । ଜଣେ ଅବସରପ୍ରାପ୍ତ ବିଚାରପତିଙ୍କୁ ନେଇ ତଦନ୍ତ ଚାଲିଛି । ତେଣୁ ଏହାକୁ ନେଇ ରାଜନୀତିର ରଙ୍ଗ ନଦିଆଯାଉ ବୋଲି କହିଛନ୍ତି ଦୀପାଳି ଦାସ ।
ନବକିଶୋର ଦାସଙ୍କ ଆକସ୍ମିକ ଦେହାନ୍ତ ପୂରା ପରିବାରକୁ ମାନସିକ ଆଘାତ ଦେଇଛି। ଏଭଳି ସଂକଟ ସମୟରେ ଯେଉଁଭଳି ଭାବେ ଓଡ଼ିଶାବାସୀ ସମବେଦନା ଦେଖାଇଛନ୍ତି ସେଥିପାଇଁ ଦୀପାଳି କୃତଜ୍ଞତା ଜଣାଇଛନ୍ତି। ନବକିଶୋରଙ୍କ ଦେହାନ୍ତ ପରେ ମୁଖ୍ୟମନ୍ତ୍ରୀ ବାପା ପରି ତାଙ୍କ ପରିବାର ସହ ଠିଆ ହୋଇଛନ୍ତି। ଆଶୀର୍ବାଦର ଛାୟା ଦେଇଛନ୍ତି। ସେଥିପାଇଁ ସେ ଓ ତାଙ୍କ ପରିବାର ସବୁବେଳେ କୃତଜ୍ଞତା ଜଣାଇବେ।
ଝାରସୁଗୁଡାବାସୀ, ବିଜେଡି ଓ ଅନ୍ୟ ଦଳର ନେତାଙ୍କୁ ମଧ୍ୟ କୃତଜ୍ଞତା ଜଣାଇଛନ୍ତି ଦୀପାଳି। ଜଣେ ଭଲ ଜଜଙ୍କ ତଦାରଖରେ ବାପାଙ୍କ ହତ୍ୟା ମାମଲାର ତଦନ୍ତ କ୍ରାଇମବ୍ରାଞ୍ଚ କରୁଛି। ସମ୍ବେଦନଶୀଳ ମାମଲା ହୋଇଥିବାରୁ କ୍ରାଇମବ୍ରାଞ୍ଚ ସମୟ ନେଇ ତଦନ୍ତ କରୁଛି । ପୂରା ପରିବାରକୁ ନ୍ୟାୟ ମିଳିବ ବୋଲି ଭରସା ରହିଛି। ତେବେ ଏହାକୁ ରାଜନୈତିକ ପ୍ରସଙ୍ଗ ନକରିବାକୁ ପରିବାର ତରଫରୁ ହାତ ଯୋଡ଼ି ନିବେଦନ କରିଛନ୍ତି ଦୀପାଳି ଦାସ।
ରାଜ୍ୟରେ ରହିବନି ଡାକ୍ତର ଅଭାବ; ଚଳିତବର୍ଷରୁ କଳାହାଣ୍ଡି ମେଡିକାଲ କଲେଜରେ ନାମଲେଖା
କଳାହାଣ୍ଡି : କଳାହାଣ୍ଡି ଚଳିତ ଶିକ୍ଷା ବର୍ଷରୁ କଳାହାଣ୍ଡି ମେଡିକାଲ କଲେଜରେ ହେବ ନାମଲେଖା। ଆସନ୍ତା ବର୍ଷ ଯାଜପୁର ଓ କନ୍ଧମାଳରେ ପାଠପଢା ଆରମ୍ଭ ହେବ। ୨୦୨୬ ସୁଦ୍ଧା ତାଳଚେରରେ ମଧ୍ୟ କାର୍ଯ୍ୟକ୍ଷମ ହେବ ମେଡିକାଲ କଲେଜ। ଏନେଇ ସୂଚନା ଦେଇଛନ୍ତି ଡିଏମଇଟି ଡାକ୍ତର ସଚ୍ଚିଦାନନ୍ଦ ମହାନ୍ତି।
ଆଗକୁ ସବୁ ଜିଲ୍ଲା ସଦର ମହକୁମାରେ ମେଡିକାଲ କଲେଜ ଖୋଲିବାକୁ ଯୋଜନା ରଖିଛନ୍ତି ରାଜ୍ୟ ସରକାର। ଏବେ ରାଜ୍ୟରେ ବ୍ରହ୍ମପୁର, କଟକ ଓ ବୁର୍ଲା ସମେତ ମୋଟ ୧୦ଟି ସରକାରୀ ମେଡିକାଲ କଲେଜ ରହିଛି। ଏହା ସହିତ ୨ଟି ପୋଷ୍ଟ ଗ୍ରାଜୁଏଟ ଓ ଡେଣ୍ଟାଲ ମେଡିକାଲ କଲେଜ ରହିଛି। ପ୍ରତ୍ୟେକ ନୂଆ ମେଡିକାଲ କଲେଜରେ ଶହେଟି ଲେଖାଏଁ ସିଟ ରହିଛି।
୧୦ଟି ମେଡିକାଲ କଲେଜରେ ମୋଟ ୧୪ଶହ ଏମବିବିଏସ ସିଟ ରହିଛି। ସବୁ ଜିଲ୍ଲାରେ ମେଡିକାଲ ଖୋଲିବା ପରେ ରାଜ୍ୟର ଡାକ୍ତର ଅଭାବ ସମସ୍ୟା ଦୂର ହେବ। ଏଥିପାଇଁ ରାଜ୍ୟ ସରକାର ଭିତ୍ତିଭୂମିର ବିକାଶ କରୁଛନ୍ତି। ଏମବିବିଏସ ଡିଗ୍ରୀ ହାସଲ ପରେ ରାଜ୍ୟ ବାହାରକୁ ନଯିବା ପାଇଁ ଦୁଇ ବର୍ଷ ବଣ୍ଡ ବା ଚୁକ୍ତି କରାଯାଉଛି। ନକଲି ଡାକ୍ତରଙ୍କୁ ଚିହ୍ନଟ କରିବା ପାଇଁ ସ୍ୱତନ୍ତ୍ର ଟିମ ଗଠନ କରାଯାଇ ଖୁବଶୀଘ୍ର ଆବଶ୍ୟକ ପଦକ୍ଷେପ ନିଆଯିବ ବୋଲି ଡିଏମଇଟି ଡାକ୍ତର ସଚ୍ଚିଦାନନ୍ଦ ମହାନ୍ତି ସୂଚନା ଦେଇଛନ୍ତି।
ସତ ଦେଖାଉଛି ନନ୍ଦିଘୋଷ ଟିଭି, ରାଗ ସୁଝାଉଛନ୍ତି ଜୟନାରାୟଣ
ଭୁବନେଶ୍ବର : ମାନସିକ ଭାରସାମ୍ୟ ହରାଇଲେଣି ବିରୋଧୀ ଦଳ ନେତା ଜୟନାରାୟଣ ମିଶ୍ର। ନିଜ ଦୋଷ ଦୁର୍ବଳତା ଓ ଅପରାଧକୁ ଲୁଚାଇବାକୁ ଗଣମାଧ୍ୟମ ଉପରେ ଦାଉ ସାଜୁଛନ୍ତି। ମହିଳା ଆଇଆଇସିଙ୍କୁ ଆକ୍ରମଣ କରି ଜୟନାରାୟଣ ନିଜ ସବୁ ପଦ ମର୍ଯ୍ୟାଦାକୁ ଧୂଳିସାତ୍ କରି ସାରିଛନ୍ତି। ଯେଉଁଥିପାଇଁ ବିଭିନ୍ନ ମହଲରୁ ଜୟନାରାୟଣ ବିରୋଧୀ ଦଳ ନେତା ପଦରେ ରହିବା ଉଚିତ ନୁହେଁ ବୋଲି ଦାବି ହେଉଥିଲା।
ଏକ ଦାୟିତ୍ବ ସମ୍ପନ୍ନ ଗଣମାଧ୍ୟମ ଭାବେ ନନ୍ଦିଘୋଷ ଟିଭି ଏହି ଖବରକୁ ନିୟମିତ ପ୍ରସାରିତ କରିଆସୁଛି। ମହିଳା ଆଇଆଇସିଙ୍କ ଉପରେ ଆକ୍ରମଣ ସାଙ୍ଗକୁ ଜୟନାରାୟଣଙ୍କର ଅପରାଧିକ ପୃଷ୍ଠଭୂମିର ମଧ୍ୟ ଖୁଲାସା ବି କରିଥିଲା ନନ୍ଦିଘୋଷ ଟିଭି। ଏଥିପାଇଁ ନନ୍ଦିଘୋଷ ଟିଭି ଉପରେ ରାଗ ସୁଝାଉଛନ୍ତି ଜୟନାରାୟଣ ମିଶ୍ର। ବିଧାନସଭାରେ ସିଧାସଳଖ ଭାବେ ନନ୍ଦିଘୋଷ ଟିଭିକୁ ପ୍ରତିକ୍ରିୟା ଦେବେ ନାହିଁ ବୋଲି ମନା କରିଛନ୍ତି ଜୟନାରାୟଣ ।
ଉତ୍କଳ ବିଶ୍ଵବିଦ୍ୟାଳୟ ଗଣ୍ଡଗୋଳ ଘଟଣା : ଅଭିଯୁକ୍ତଙ୍କ ବିରୋଧରେ ଲାଗିଲା ୧୧୦ ଦଫା
ଭୁବନେଶ୍ବର : ଉତ୍କଳ ବିଶ୍ଵବିଦ୍ୟାଳୟ ପିଜି କାଉନ୍ସିଲ ଅଡିଟୋରୀୟମ ଗଣ୍ଡଗୋଳ ଘଟଣା । ଦୁଇ ଅଭିଯୁକ୍ତ ଏବିଭିପିର ଛାତ୍ରନେତା ମାନସ ସାହୁ ଓ ସଞ୍ଜୟ ମଲ୍ଲିକଙ୍କ ବିରୋଧରେ ଲାଗିଲା ଦଫା ୧୧୦ । ସେମାନେ ଦୁଇଜଣ ପେଶାଦାର ଅପରାଧୀ ହୋଇଥିବାରୁ ୧୧୦ଦଫା ଲାଗୁ କରିଛି ପୋଲିସ । ସିଟିଜେନ
ଫୋରମ ପକ୍ଷରୁ ‘ଭାରତୀୟ ସମ୍ବିଧାନର ପ୍ରଭାବ’ ଆଲୋଚନା ବେଳେ ଗଣ୍ଡଗୋଳ ହୋଇଥିଲା । ଏହି ଧସ୍ତାଧସ୍ତିରେ ଜେଏନୟୁର ଅର୍ଥନୀତି ପ୍ରଫେସର ସୁରଜିତ ମଜୁମଦାରଙ୍କୁ ମରଣାନ୍ତକ ଆକ୍ରମଣ କରିଥିଲେ ଏହି ଦୁଇ ଛାତ୍ର ନେତା । ଘଟଣା ଦିନ ରାତିରେ ଦୁଇ ଅଣଛାତ୍ରଙ୍କୁ ଗିରଫ କରିଥିଲା ପୋଲିସ ।ପୂର୍ବରୁ ଭିସିଙ୍କ ଗାଡି ପୋଡିବା, ରାଗିଂ,କ୍ୟାମ୍ପସରେ ବୋମା ଫିଙ୍ଗିବା ଭଳି କେସ ସେମାନଙ୍କ ନାଁରେ ରହିଛି
ଦିବଙ୍ଗତ ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ସମ୍ମାନର୍ଥେ ଗୃହ ବନ୍ଦ
ଭୁବନେଶ୍ୱର: ଦିବଙ୍ଗତ ସ୍ୱାସ୍ଥ୍ୟମନ୍ତ୍ରୀ ନବ କିଶୋର ଦାସଙ୍କ ସମ୍ମାନରେ ଗୃହ ବନ୍ଦ । ଆସନ୍ତାକାଲି ଅର୍ଥାତ ବୁଧବାର ପୂର୍ବାହ୍ନ ୧୦.୩୦ ଯାଏଁ ଗୃହ ମୁଲତବୀ ଘୋଷଣା କରାଯାଇଛି । ବାଚସ୍ପତି ବିକ୍ରମ କେଶରୀ ଆରୁଖ ଗୃହକୁ ମୁଲତବୀ ଘୋଷଣା କରିଛନ୍ତି । ପ୍ରଥମେ ଗହରେ ଶୋକ ପ୍ରସ୍ତାବ ଆଗତ ହୋଇଥିଲା । ସ୍ୱର୍ଗତ ନବଦାସଙ୍କ ସ୍ମୃତିରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଶ୍ରଦ୍ଧାଞ୍ଜଳି ଜଣାଇଥିଲେ ।
ନବଦାସଙ୍କ ଦେହାନ୍ତଙ୍କୁ ନେଇ ମର୍ମାହତ ବୋଲି କହିଥିଲେ ମୁଖ୍ୟମନ୍ତ୍ରୀ । ଓଡିଶାରେ ସ୍ୱାସ୍ଥ୍ୟ କ୍ଷେତ୍ରରେ ବୈପ୍ଳବିକ ପରିବର୍ତ୍ତନ ପାଇଁ ସ୍ୱର୍ଗତ ଦାସଙ୍କ ଅବଦାନ ଅତୁଳନୀୟ । କୋଭିଡ ମହାମାରୀ ସମୟରେ ଓଡିଶାରେ ଯେପରି ଭାବରେ ପରିଚାଳନା କରିଛନ୍ତି ତାହା ସର୍ବଦା ମନେ ରହିବ । ମେଡିକାଲ କଲେଜ ନିର୍ମାଣ ଠାରୁ କୋଭିଡ ପରିଚାଳନାରେ ନବଦାସଙ୍କ ଭୂମିକା ରାଜ୍ୟବାସୀଙ୍କ ମନରେ ସର୍ବଦା ମନେ ରହିବ ବୋଲି ଉଲ୍ଲେଖ କରିଥିଲେ ମୁଖ୍ୟମନ୍ତ୍ରୀ ।
ସେହିପରି ବିରୋଧିଦଳ ନେତା ଏବଂ କଂଗ୍ରେସ ବିଧାୟକ ଦଳ ନେତା ମଧ୍ୟ ଶ୍ରଦ୍ଧାଞ୍ଜଳି ଜ୍ଞାପନ କରିଥିଲେ । ଶୋକ ପ୍ରସ୍ତାବ ପରେ ଗୃହରେ ସମସ୍ତ ସଦସ୍ୟ ନିରବ ପ୍ରାର୍ଥନା କରିଥିଲେ । ସ୍ୱର୍ଗତ ସଦସ୍ୟଙ୍କ ସ୍ମୃତିଚାରଣ କରିଥିଲେ । ଏହାପରେ ଗୃହକାର୍ଯ୍ୟକୁ ଆଜି ପାଇଁ ସ୍ଥଗିତ ରଖାଯାଇଥିଲା । ସ୍ୱର୍ଗତ ନବକିଶୋର ଦାସଙ୍କ ସମ୍ମାନର୍ଥେ ଆସନ୍ତା କାଲି ପର୍ଯ୍ୟନ୍ତ ଗୃହକୁ ମୁଲତବୀ ରଖିବା ପାଇଁ ଘୋଷଣା କରିଥିଲେ ବାଚସ୍ପତି ବିକ୍ରମ କେଶରୀ ଆରୁଖ ।
କନ୍ୟାଶ୍ରମରେ ଭାଇରାଲ ଏନସେଫାଲାଇଟିସ୍, ଆଜି ଆଉ ୪ ଛାତ୍ରୀ ଗୁରୁତର
ସୋର : ଚିନ୍ତା ବଢ଼ାଇଛି ସୋରର ପୁରୁବାଈ କନ୍ୟାଶ୍ରମରେ ଜାପାନୀଜ୍ ଜ୍ବର । ଆଜି ଆଉ ୪ ଗୁରୁତର ଛାତ୍ରୀଙ୍କୁ ବାଲେଶ୍ବର ମେଡିକାଲକୁ ସ୍ଥାନାନ୍ତର କରାଯାଇଛି । ବାଲେଶ୍ବର ମେଡିକାଲରେ ମୋଟ୍ ୧୨ ଜଣଙ୍କର ଚିକିତ୍ସା ଚାଲିଥିବା ବେଳେ, ଏବେ ସୁଦ୍ଧା ୫ ଜଣଙ୍କର ରିପୋର୍ଟ ପଜିଟିଭ୍ ଆସିଛି । ବାକି ୭ ଛାତ୍ରୀ ଗୁରୁତର ଥିବାରୁ ଚିକିତ୍ସା ଚାଲିଛି ।
ସେପଟେ ସାମାନ୍ୟ ଲକ୍ଷଣ ଥିବା ୧୪ ଛାତ୍ରୀଙ୍କର ସୋର ମେଡିକାଲରେ ଚାଲିଛି ଚିକିତ୍ସା । କନ୍ୟାଶ୍ରମରେ ସାମାନ୍ୟ ଲକ୍ଷଣ ଥିବା କିମ୍ବା ଲକ୍ଷଣ ନଥିବା ଛାତ୍ରୀଙ୍କୁ ଅବଜରଭେସନରେ ରଖାଯାଇଛି । ସ୍ବତନ୍ତ୍ର ଡାକ୍ତରୀ ଟିମ୍ ୨ଦିନ ହେବ ଚିକିତ୍ସା କରୁଛନ୍ତି । ସୋର ଗାନ୍ଧି ସେବା ସଂଘ ପୁରୁବାଈ କନ୍ୟାଶ୍ରମରେ ଗତ ଚାରିଦିନ ତଳେ ଜଣେ ଦଶମ ଶ୍ରେଣୀ ଛାତ୍ରୀଙ୍କର ମୃତ୍ୟୁ ହୋଇଥିଲା ।
ଜାପାନୀ ଜ୍ବର ମଶା କାମୁଡ଼ିବା ଓ ଘୁଷୁରୀଙ୍କ ଦ୍ବାରା ହେଉଛି । ତେଣୁ ପ୍ରଶାସନିକ ସ୍ତରରେ ତତ୍ପରତା ପ୍ରକାଶ ପାଇଛି । କନ୍ୟାଶ୍ରମ ପରିସର ଥିବା ପରିମଳ ବ୍ୟବସ୍ଥା ସଜଡା ଯାଇଛି । ଜିଲ୍ଲାପାଳ ଦତ୍ତାତ୍ରେୟ ଭାଉସାହେବ ସିନ୍ଧେ, ସୋର ବିଧାୟକ, ମୁନିସିପlଲିଟି ଅଧ୍ୟକ୍ଷ ସ୍ଵାସ୍ଥ୍ୟ ବିଭାଗ କର୍ମଚାରୀ ପଦକ୍ଷେପ ଗ୍ରହଣ କରିଥଲେ l
ବିଧାନସଭାର ରାଜ୍ୟପାଳଙ୍କ ଅଭିଭାଷଣ, ସରକାରଙ୍କ ବିକାଶମୂଳକ କାର୍ଯ୍ୟକୁ ଭୂୟସୀ ପ୍ରଶଂସା
ଭୁବନେଶ୍ୱର : ରାଜ୍ୟପାଳଙ୍କ ଅଭିଭାଷଣରୁ ଆରମ୍ଭ ହୋଇଛି ବିଧାନସଭାର ବଜେଟ୍ ଅଧିବେଶନ । ଅଭିଭାଷଣରେ ରାଜ୍ୟ ସରକାରଙ୍କ ବିକାଶମୂଳକ କାର୍ଯ୍ୟକୁ ପ୍ରଶଂସା କରିଛନ୍ତି ରାଜ୍ୟପାଳ ପ୍ରଫେସର ଗଣେଶୀ ଲାଲ୍ । ସରକାରଙ୍କ ସଫଳତା ଏବଂ ଜନହିତକର ଯୋଜନା ସମ୍ବନ୍ଧରେ ଗୃହରେ ଉଲ୍ଲେଖ କରିଛନ୍ତି ରାଜ୍ୟପାଳ । ସ୍କୁଲ ରୂପାନ୍ତରଣ କାର୍ଯ୍ୟକୁ ରାଜ୍ୟପାଳ ପ୍ରଶଂସା କରିଛନ୍ତି । ଶିଳ୍ପକ୍ଷେତ୍ରରେ ବିକାଶକୁ ରାଜ୍ୟ ସରକାର ଗୁରୁତ୍ବ ଦେଉଛନ୍ତି । ରାଜ୍ୟରେ ପୁଞ୍ଜିନିବେଶର ସମ୍ଭାବନା ସୃଷ୍ଟି କରିଛି ମେକ୍ ଇନ୍ ଓଡ଼ିଶା କନକ୍ଲେଭ୍ ।
ମୁଖ୍ୟମନ୍ତ୍ରୀ କୃଷି ଉଦ୍ୟୋଗ ଯୋଜନା କରିବାରେ ଆଗରେ ଓଡ଼ିଶା ଅଛି ବୋଲି ଅଭିଭାଷଣରେ କହିଛନ୍ତି ରାଜ୍ୟପାଳ । ଖରିଫ ଋତୁରେ ଫସଲ ଋଣ ପ୍ରଦାନ ଲକ୍ଷ୍ୟ 9 ହଜାର କୋଟି ଟଙ୍କା ରହିଛି । ୧୮ ଲକ୍ଷ କୃଷକଙ୍କୁ 8,711 କୋଟି ଟଙ୍କା ପ୍ରଦାନ କରାଯାଇଛି । ଜାଗା ମିଶନରେ ବସ୍ତିକୁ ଆଦର୍ଶ କଲୋନୀରେ ରୂପାନ୍ତରିତ କରାଯାଇଛି । ଗରିବଙ୍କୁ ପକ୍କା ଘର ଯୋଗାଇବାକୁ ସରକାର ପ୍ରତିବଦ୍ଧ ଅଛନ୍ତି । ସେହିପରି ଧାନ ସଂଗ୍ରହ କରିବାରେ ଓଡ଼ିଶାକୁ ମିଳିଛି ସଫଳତା ।
ବସୁଧା ଯୋଜନାରେ ପାନୀୟ ଜଳ ବ୍ୟବସ୍ଥା କରାଯାଇଛି । ଗ୍ରାମାଞ୍ଚଳ ଓ ସହରାଞ୍ଚଳକୁ ପାନୀୟ ଜଳ ଯୋଗାଣ ବ୍ୟବସ୍ଥା କରିଛନ୍ତି ରାଜ୍ୟ ସରକାର । 2024 ସୁଦ୍ଧା ସବୁ ଗାଁକୁ ବିଶୁଦ୍ଧ ପାନୀୟ ଜଳ ମିଳିବ ବୋଲି ଅଭିଭାଷଣରେ କହିଛନ୍ତି ରାଜ୍ୟପାଳ । ସେହିପରି କଟକ ଆଚଚାର୍ଯ୍ୟ ହରିହର କ୍ୟାନସର ହସପିଟାଲରେ କ୍ୟାନସର ରୋଗୀଙ୍କୁ ମାଗଣାରେ ପିଇଟି-ସିଟି ସ୍କାନ ସୁବିଧା । ନୂଆ ଡାକ୍ତର ଓ ପାରାମେଡିକାଲ ପଦବୀ ସୃଷ୍ଟି କରିଛନ୍ତି ସରକାର । ତେବେ ଚିକିତ୍ସା କ୍ଷେତ୍ରରେ ବରଦାନ ସାଜିଛି ବିଏସକେଓ୍ବାଇ । ସ୍ବାସ୍ଥ୍ୟକ୍ଷେତ୍ରରେ ଓଡ଼ିଶାର ଅଭୂତପୂର୍ବ ଭାବେ ଅଗ୍ରଗତି କରିଛି ।
ଉପକୂଳବର୍ତ୍ତୀ ଜିଲ୍ଲାରେ ଲୁଣାବନ୍ଧ ନିର୍ମାଣ ଓ ସୁଦୃଢ଼ୀକରଣ ହୋଇଛି । ସମନ୍ବିତ ଜଳସମ୍ପଦ ବିକାଶ, ଜଳ ସଂରକ୍ଷଣ ଉପରେ ଗୁରୁତ୍ବ ଦେଇଛନ୍ତି ସରକାର । କୃଷକଙ୍କ ପାଇଁ ଜଳସେଚନ ସୁବିଧା କରିଛନ୍ତି ସରକାର । ମହାନଦୀ ଚିତ୍ରୋତ୍ପଳା ଦ୍ବୀପାଞ୍ଚଳରେ ଜଳସେଚନ ପ୍ରକଳ୍ପ ଶେଷ ହୋଇଛି ବୋଲି ଅଭିଭାଷଣରେ କହିଛନ୍ତି ରାଜ୍ୟପାଳ । ଏହାଛଡ଼ା ଆଭ ଆଇଡି ସୃଷ୍ଟି କରିବାରେ ଓଡ଼ିଶା ପ୍ରଥମ । ରକ୍ତହୀନତା ମୁକ୍ତ ଲକ୍ଷ୍ୟ ଅଭିଯାନ ଅମ୍ଳାନ ଆରମ୍ଭ ହୋଇଛି ।
ବଳକା ଖାଦ୍ୟଶସ୍ୟ ଉତ୍ପାଦନ ରାଜ୍ୟ ଭାବେ ଓଡ଼ିଶା ଦେଶରେ ପ୍ରଥମ । ମାଣ୍ଡିଆ ଓ ବାଜରା ଜାତୀୟ ଫସଲକୁ ବିଶ୍ବସ୍ତରରେ ମାନ୍ୟତା ମିଳିଛି । ଦେଶରେ ପ୍ରଥମ ରାଜ୍ୟ ଭାବେ ଓଡ଼ିଶା ପାଳୁଛି ମିଲେଟ୍ ଦିବସ । କାଳିଆ ଯୋଜନାରେ ଭୂମିହୀନ କୃଷି ପରିବାରଙ୍କୁ ସହାୟତା ପଦାନ କରିଛନ୍ତି ରାଜ୍ୟ ସରକାର । କାଳିଆ ସ୍କଲାରସିପ୍ ଯୋଜନାରେ 765 ଛାତ୍ରଛାତ୍ରୀଙ୍କୁ ସାମିଲ କରାଯାଇଛି ।
ରାଜ୍ୟରେ 25 କୋଟି ଶ୍ରମ ଦିବସ ସୃଷ୍ଟି କରିବାକୁ ଲକ୍ଷ୍ୟ ରଖିଛନ୍ତି ରାଜ୍ୟ ସରକାର । 30 ଲକ୍ଷ ପରିବାର ଓ 46 ଲକ୍ଷ ଶ୍ରମଜୀବୀଙ୍କୁ ମିଳିବ ରୋଜଗାର । ମୁକ୍ତା ଯୋଜନାରେ 700 କୋଟି ଟଙ୍କା ବିନିଯୋଗ ହେବ । 6320 ସହରାଞ୍ଚଳ ଭିତ୍ତିଭୂମି ପ୍ରକଳ୍ପ ଆରମ୍ଭ ହେବ । ଆଦିବାସୀ ଛାତ୍ରଛାତ୍ରୀଙ୍କ ପାଇଁ 8ଟି ଆକାଂକ୍ଷା ଛାତ୍ରାବାସ ନିର୍ମାଣ ହୋଇଛି ବୋଲି ଅଭିଭାଷଣରେ କହିଛନ୍ତି ରାଜ୍ୟପାଳ ।