ରାଉରକେଲା: FIH ହକି ପ୍ରୋ ଲିଗର ଚତୁର୍ଥ ମ୍ୟାଚରେ ପୁଣି ଚାଲିଲା ଭାରତର ଜାଦୁ । ପୁଣିଥରେ ବିଶ୍ବ ବିଜେତା ଜର୍ମାନୀକୁ ହରାଇଛି ଟିମ୍ ଇଣ୍ଡିଆ । ଜର୍ମାନୀକୁ ୬-୩ ଗୋଲରେ ପରାସ୍ତ କରି ମ୍ୟାଚ ଜିତିନେଇଛି ଭାରତ । ପୂର୍ବରୁ ଉଦଘାଟନୀ ମ୍ୟାଚରେ ଜର୍ମାନୀ ବିରୋଧରେ ୩-୨ ଗୋଲରେ ଜିତିଥିଲା ଟିମ ଇଣ୍ଡିଆ । କ୍ରୀଡା ମନ୍ତ୍ରୀ ତୁଷାରକାନ୍ତି ବେହେରା ବିର୍ସା ମୁଣ୍ଡା ଷ୍ଟାଡିୟମରେ ମ୍ୟାଚ ଦେଖିଛନ୍ତି । ଭାରତୀୟ ଦଳ ଲଗାତାର ୩ଟି ମ୍ୟାଚ ଜିତିଥିବାରୁ ଖେଳାଳି ଓ ଅଧିନାୟକଙ୍କ ମନୋବଳ ଦୃଢ଼ ରହିଛି । ଗତକାଲି ଅଷ୍ଟ୍ରେଲିଆକୁ ୫-୪ ଗୋଲରେ ପରାସ୍ତ କରିଥିଲା ଭାରତୀୟ ଦଳ ।
ଓଡ଼ିଶା ପାଇଲା ଜାତୀୟ ପୁରସ୍କାର; ଦିଲ୍ଲୀରୁ ଫେରି ମୁଖ୍ୟମନ୍ତ୍ରୀଙ୍କୁ ଭେଟିଲେ ପ୍ରମିଳା
ଭୁବନେଶ୍ୱର: ବିପର୍ଯ୍ୟୟ ପରିଚାଳନା କ୍ଷେତ୍ରରେ ଓସଡମାକୁ ସୁଭାଷଚନ୍ଦ୍ର ବୋଷ ଆପଦା ପ୍ରବନ୍ଧନ ପୁରସ୍କାର-୨୦୨୩ ମିଳିବା ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଭେଟିଛନ୍ତି ରାଜସ୍ବ ମନ୍ତ୍ରୀ ପ୍ରମିଳା ମଲ୍ଲିକ । ମୁଖ୍ୟମନ୍ତ୍ରୀଙ୍କୁ ଭେଟି ସମ୍ମାନ ପ୍ରଦାନ କରିବା ସହ ଏହାର ଶ୍ରେୟ ଦେଇଛନ୍ତି । ତାଙ୍କ ସହିତ ମୁଖ୍ୟ ଶାସନ ସଚିବ ପ୍ରଦୀପ ଜେନା ଓ ଏସଆରସି ନିକୁଞ୍ଜ ଧଳ ମୁଖ୍ୟମନ୍ତ୍ରୀଙ୍କୁ ଭେଟି ଶ୍ରେୟ ଜଣାଇଛନ୍ତି । ପ୍ରାକୃତିକ ବିପର୍ଯ୍ୟୟର ମୁକାବିଲାରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନୀତି ଜିରୋ କାଜୁଆଲଟି ସଫଳ ହୋଇଛି । ସାରା ବିଶ୍ବ ନବୀନଙ୍କ ମଡେଲକୁ ଅନୁକରଣ କରୁଥିବାବେଳେ କେନ୍ଦ୍ର ସରକାର ମଧ୍ୟ ପୁରସ୍କାର ଦେଇଛନ୍ତି ।
ଲୋକ ଓ ଗୃହପାଳିତ ପ୍ରାଣୀଙ୍କୁ ସୁରକ୍ଷିତ ସ୍ଥାନକୁ ନେବା, ମାଗଣା ଖାଦ୍ୟ ଯୋଗାଣ, ଜଳ ନିଷ୍କାସନ ବ୍ୟବସ୍ଥା, ବିପର୍ଯ୍ୟୟ ପରେ ପରେ ରାସ୍ତା ସଫା କରିବା ପରି ପ୍ରାକ୍ ପ୍ରସ୍ତୁତି ଯୋଗୁ ଏହା ସମ୍ଭବ ହୋଇଛି । ବାହାର ରାଜ୍ୟରେ ବନ୍ୟା ସମୟରେ ଓଡ୍ରାଫ୍ ଉଦ୍ଧାର କାର୍ଯ୍ୟରେ ନିୟୋଜିତ ହୋଇଥାଏ । ବିପର୍ଯ୍ୟୟ ପରିଚାଳନା କ୍ଷେତ୍ରରେ ଶ୍ରେଷ୍ଠତା ପାଇଁ ଓଡ଼ିଶାକୁ ସମ୍ମାନିତ କରିଛି କେନ୍ଦ୍ର । ଦିଲ୍ଲୀରେ ଆୟୋଜିତ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଓଡିଶାକୁ ସମ୍ମାନ ଦେବା ସହିତ ପ୍ରଶଂସା କରିଥିଲେ ।
ଭିଜିଲାନ୍ସ ଜାଲରେ ବାଲେଶ୍ୱର ଜଳସେଚନ ବିଭାଗ କ୍ୟାସିୟର ପ୍ରଦୀପ ରାଉତ
ବାଲେଶ୍ୱର: ଭିଜିଲାନ୍ସ ଜାଲରେ ବାଲେଶ୍ବର ଜଳସେଚନ ବିଭାଗ କ୍ୟାସିୟର ପ୍ରଦୀପ ରାଉତ । ଠିକାଦାରଙ୍କ ସିକ୍ୟୁରିଟି ଟଙ୍କା ରିଲିଜ୍ କରିବାକୁ ଲାଞ୍ଚ ନେବାବେଳେ ପ୍ରଦୀପଙ୍କୁ ଧରିଛି ଭିଜିଲାନ୍ସ । ପ୍ରଦୀପଙ୍କ ନିକଟରୁ ୫ହଜାର ଟଙ୍କା ଲାଞ୍ଚ ଅର୍ଥ ଜବତ ହୋଇଛି । ଠିକାଦାର ଲୋକନାଥ ଜେନା ଏକ ଠିକାକାମ ଶେଷ କରିବା ପରେ ସିକ୍ୟୁରିଟି ଟଙ୍କା ଫେରିପାଇବାକୁ ଆବେଦନ କରିଥିଲେ । ଟଙ୍କା ରିଲିଜ କରିବାକୁ ୫ହଜାର ଟଙ୍କା ଦାବି କରିଥିଲେ କ୍ୟାସିୟର । ଏନେଇ ଅଭିଯୋଗ ପରେ ପ୍ରଦୀପଙ୍କୁ ଟଙ୍କା ନେବାବେଳେ ଧରିଥିଲା ଭିଜିଲାନ୍ସ ।
ଲାଞ୍ଚ ନେବାବେଳେ ସମବାୟ ସମିତି ସମ୍ପାଦକଙ୍କୁ ଧରିଲା ଭିଜିଲାନ୍ସ
ଭଦ୍ରକ: ଧାନ କିଣିବାକୁ ଲାଞ୍ଚ ନେବାବେଳେ ଧରାପଡ଼ିଲେ ଭଦ୍ରକ ଜିଲ୍ଲା ଚଣ୍ଡୀଗାଁ ସେବା ସମବାୟ ସମିତିର ସମ୍ପାଦକ ତପନ ନାୟକ । ଚାଷୀଙ୍କଠୁ ଲାଞ୍ଚ ନେବାବେଳେ ତପନଙ୍କୁ ଧରିଲା ଭିଜିଲାନ୍ସ । ଚାଷୀ ଶ୍ରୀଧର ସାମଲ 240 କୁଇଣ୍ଟାଲ ଧାନ ବିକ୍ରି ପାଇଁ ଟୋକନ ପାଇଥିଲେ । ମାତ୍ର ଏଥିପାଇଁ 9 ହଜାର 6ଶହ ଟଙ୍କା ଲାଞ୍ଚ ମାଗିଥିଲେ ତପନ । ସମ୍ପାଦକ ଜଣଙ୍କ ଟଙ୍କା ନେବାବେଳେ ଧରିଥିଲା ଭିଜିଲାନ୍ସ । ଲାଞ୍ଚ ଅର୍ଥ ଜବତ କରିବା ସହ ତପନଙ୍କୁ ଅଟକ ରଖି ତଦନ୍ତ ଜାରି ରଖିଛି ପୋଲିସ ।
ରାଜ୍ୟରେ ଋଣ ଭାର ତୁଳନାରେ ୫.୮ ଗୁଣ ବଢ଼ିଛି ମୁଣ୍ଡ ପିଛା ଆୟ
ଭୁବନେଶ୍ୱର: ଅତୀତ ଏବେ ୧୯୯୯ ମସିହାର ଆର୍ଥିକ ଦୁଃସ୍ଥିତି । ସେତେବେଳେ କର୍ମଚାରୀଙ୍କୁ ଦରମା ଦେବାକୁ ୩୬୪ ଦିନ ଓଭରଡ୍ରାଫ୍ଟ୍ ଉପରେ ନିର୍ଭର କରିବାକୁ ପଡ଼ୁଥିଲା । ଏବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ବରେ ରାଜ୍ୟରେ ବଢୁଛି ମୁଣ୍ଡ ପିଛା ଆୟ । ଋଣଭାର ତୁଳନାରେ ମୁଣ୍ଡପିଛା ଆୟ ବଢିଛି ୫.୮ ଗୁଣ । ବିଧାନସଭା ପ୍ରଶ୍ନକାଳରେ ରାଜ୍ୟର ଋଣଭାର ସ୍ଥିତି ନେଇ ବିରୋଧୀଙ୍କ ପ୍ରଶ୍ନରେ ଏପରି କଡ଼ା ଉତ୍ତର ରଖିଛନ୍ତି ଅର୍ଥମନ୍ତ୍ରୀ ନିରଞ୍ଜନ ପୂଜାରୀ । ୨୦୦୫ରେ ବିତ୍ତୀୟ ପରିଚାଳନା ଆଇନ ୨୦୦୫ରେ ଆସିଲା ।
କିନ୍ତୁ ତାପୂର୍ବରୁ ଦ୍ବାଦଶ ଅର୍ଥ କମିଶନଙ୍କ ସୁପାରିସ ଆଧାରରେ ରାଜ୍ୟ ସରକାର ଆର୍ଥିକ ଶୃଙ୍ଖଳା ଆଣିବା ପାଇଁ କାର୍ଯ୍ୟକ୍ରମ ଆରମ୍ଭ କରିଦେଇଥିଲେ । ଯେଉଁଥିପାଇଁ ୨୦୦୫ରୁ ୨୦୦୯-୧୦ରେ ତତ୍କାଳୀନ କେନ୍ଦ୍ର ସରକାର ବାର୍ଷିକ ୩୮୧.୯୦ କୋଟି ହାରରେ ମୋଟ ୧୯୦୯ କୋଟି ୫୦ ଲକ୍ଷ ଟଙ୍କାର ଋଣ ଛାଡ଼ କରିଥିଲେ । ପରେ ୨୦୧୧-୧୨ରୁ ୨୦୨୦-୨୧ ଆର୍ଥିକ ବର୍ଷ ମଧ୍ୟରେ ବିଭିନ୍ନ ଯୋଜନା ବାବଦରୁ ଛାଡ଼ କରିଛନ୍ତି ୧୩୯କୋଟି ୩୬ ଲକ୍ଷ ଟଙ୍କା । ୧୯୯୯ ମସିହାରେ ରାଜ୍ୟର ମୁଣ୍ଡ ପିଛା ଋଣଭାର ଥିଲା ୪ ହଜାର ୯୧୮ ଟଙ୍କା । ମୁଣ୍ଡ ପିଛା ଆୟ ଥିଲା ୧୩ ହଜାର ୧୨ ଟଙ୍କା । ୨୦୨୨ ମାର୍ଚ୍ଚ ଶେଷ ସୁଦ୍ଧା ମୁଣ୍ଡ ପିଛା ଋଣ ୨୨ ହଜାର ୪୨ ଟଙ୍କା ଥିବାବେଳେ ମୁଣ୍ଡ ପିଛା ଆୟ ୧ ଲକ୍ଷ ୨୮ ହଜାର ୮୭୩ ଟଙ୍କା ରହିଛି ।
ଏଫଆର୍ବିଏମ୍ ଆଇନ ଅନୁଯାୟୀ ରାଜ୍ୟର ଋଣଭାର ସକଳ ଘରୋଇ ଉତ୍ପାଦର ୨୫ ପ୍ରତିଶତ ମଧ୍ୟରେ ରହିବା ଆବଶ୍ୟକ । ଏହାକୁ ହିସାବକୁ ନେଲେ ୨୦୨୧-୨୨ସୁଦ୍ଧା ମହାଲେଖାକାରଙ୍କ ହିସାବ ଅନୁଯାୟୀ ରାଜ୍ୟର ସକଳ ଘରୋଇ ଉତ୍ପାଦ ଅନୁପାତରେ ଋଣ ପରିମାଣ ୧୪.୭ ପ୍ରତିଶତ ରହିଛି । ଏହି ସମୟରେ କେନ୍ଦ୍ର ସରକାର ଲକ୍ଷ ଲକ୍ଷ କୋଟି ଟଙ୍କାର କରଜରେ ବୁଡିଛନ୍ତି । ବିକାଶ ପାଇଁ ଋଣ କରିବା ପାପ ନୁହେଁ । ଓଡ଼ିଶା ସରକାର ମୁଖ୍ୟତଃ ଭିତ୍ତିଭୂମି ବିକାଶ ଯେପରିକି ଜଳସେଚନ, ଶକ୍ତି, ସଡ଼କ, ବିପର୍ଯ୍ୟୟ ପରିଚାଳନା, ସହରାଞ୍ଚଳ ଭିତ୍ତିଭୂମି ନିର୍ମାଣ ପାଇଁ ବିଶ୍ବ ବ୍ୟାଙ୍କ ସମେତ ଏଡିବି, ଆଇଏଫ୍ଏଡି, ଜାଇକା, ବ୍ରିକ୍ସ୍ ବ୍ୟାଙ୍କ, ଏଆଇଆଇବି ସଂସ୍ଥାଠାରୁ ଋଣ କରିଥାନ୍ତି ।
ଦ୍ବାଦଶ ଅର୍ଥ କମିସନଙ୍କ ସୁପାରିସ ଆଧାରରରେ ୨୦୦୫ ମସିହାର ଏପ୍ରିଲ ପହିଲାରୁ ବାହ୍ୟସଂସ୍ଥାଠାରୁ ବ୍ୟାକ୍ ଟୁ ବ୍ୟାକ୍ ଋଣ କରିବାକୁ ରାଜ୍ୟମାନଙ୍କୁ ଅନୁମତି ମିଳିଛି । ୨୦୨୧-୨୨ ସୁଦ୍ଧା ରାଜ୍ୟର ବାହ୍ୟ ଋଣ ପରିମାଣ ୧୮ ହଜାର ୫୦୭ କୋଟି ୮୨ ଲକ୍ଷ ଟଙ୍କା । ରାଜ୍ୟ ସରକାର ୨୦୦୬-୦୭ରୁ ୨୦୧୩-୧୪ ଏବଂ ୨୦୨୧-୨୨ରୁ ଏଯାବତ୍ ଖୋଲାବଜାରରୁ ରାଜ୍ୟ ସରକାର କୌଣସି ଋଣ କରିନାହାନ୍ତି । ଯେଉଁଥିପାଇଁ ଏବେ ଋଣ ଭାର କମିବାରେ ଲାଗିଛି ।
କେବଳ ଓମ୍ବାଡସି ଭଳି ସଂସ୍ଥାରୁ ଅଳ୍ପ ସୁଧରେ ଋଣ ଉଠାଇ ଭିତ୍ତିଭୂମି ବିକାଶ କାର୍ଯ୍ୟରେ ଲଗାଉଛନ୍ତି । ଯେଉଁଥିପାଇଁ ୨୦୨୧-୨୨ ସୁଦ୍ଧା ରାଜ୍ୟର ଋଣଭାର ୯୭ ହଜାର ୨୦୪ କୋଟି ୯୮ ଲକ୍ଷ ଟଙ୍କା ରହିଥିଲା । ଏସବୁ ସମ୍ଭବ ହୋଇପାରିଛି ମୁଖ୍ୟମନ୍ତ୍ରୀଙ୍କ ବଳିଷ୍ଠ ଦୂରଦର୍ଶୀ ପଦକ୍ଷେପ ଯୋଗୁ । ବିକାଶ ପଥରେ ଆଗେଇ ଚାଲିଛି ଓଡ଼ିଶା । କୋଭିଡ ପରି ଆର୍ଥିକ ମାନ୍ଦାବସ୍ଥା ସତ୍ତ୍ବେ ରାଜ୍ୟର ନିଜସ୍ବ ଆୟ କମିଲାନି । ଉତ୍ତମ ବିତ୍ତୀୟ ପରିଚାଳନାକୁ ଭାରତ ସରକାର ବି ପ୍ରଶଂସା କରିଛନ୍ତି । ଖୋଦ ଅର୍ଥ ବିଭାଗର ତଥ୍ୟ କହୁଛି ଧୀରେ ଧୀରେ ରାଜ୍ୟର ଋଣ ପରିମାଣ କମିବାରେ ଲାଗିଛି ।
‘ଅପରାଧୀଙ୍କ ପ୍ରତି ସହାନୁଭୁତି ଦେଖାଇ ବିରୋଧୀ ହୀନ ରାଜନୀତି କରୁଛନ୍ତି’
ଭୁବନେଶ୍ୱର: ଅପରାଧୀଙ୍କ ପ୍ରତି ସହାନୁଭୁତି ଦେଖାଇ ବିରୋଧୀ ହୀନ ରାଜନୀତି କରୁଛନ୍ତି । ମମିତା ମେହେର ହତ୍ୟାକାରୀ ଗୋବିନ୍ଦ ସାହୁର ଜେଲରେ କିପରି ପ୍ରାଣ ଗଲା ସେ ନେଇ ତଦନ୍ତ ଜାରି ରହିଛି । ବିରୋଧୀଙ୍କ ଦ୍ବାରା ଆଗତ ମୁଲତବୀ ଆଲୋଚନାରେ ଭାଗ ନେଇ ଏପରି କଡ଼ା ଜବାବ ଦେଇଛି ବିଜେଡି । ବିଜେଡି ମୁଖପାତ୍ର ଅରୁଣ ସାହୁ ସାମ୍ବାଦିକ ସମ୍ମିଳନୀରେ ବିରୋଧୀଙ୍କ ଉପରେ ବର୍ଷିଛନ୍ତି । ସେ କହିଛନ୍ତି, କ୍ରିମିନାଲ ମାଇଣ୍ଡ୍ କ୍ରିମିନାଲକୁ ସପୋର୍ଟ କରନ୍ତି । ବିରୋଧୀ ଯେପରି ଘଟଣା କିପରି ଘଟିଲା, କାହିଁକି ଏପରି ନ ହୋଇ ଏପରି ହେଲା । ଏଥିରୁ ଜଣାପଡୁଛି ବିରୋଧୀ ପବିତ୍ର ବିଧାନସଭାକୁ କୋର୍ଟରୁମ୍ କରିସାରିଲେଣି ।
କୋଉଠୁ ଏପରି ଉଦ୍ଭଟ ତଥ୍ୟ ବିରୋଧୀ ପାଉଛନ୍ତି ଜଣାନାହିଁ । ରାଜ୍ୟ ସ୍ବାର୍ଥ ପ୍ରସଙ୍ଗରେ ଆଲୋଚନା ପାଇଁ ଅନେକ ପ୍ରସଙ୍ଗ ରହିଛି । କିନ୍ତୁ ବିରୋଧୀଙ୍କୁ ଏହା ଦିଶୁନି । ଜଣେ ହତ୍ୟାକାରୀର ଆତ୍ମହତ୍ୟା ପାଇଁ ସରକାରଙ୍କୁ ସମାଲୋଚନା କରି ନିର୍ବାଚନୀ ବୈତରଣୀ ପାର ହେବାକୁ ଉଦ୍ୟମ ହେଉଛି । ଏଥିରେ ବିରୋଧୀ କେବେ ବି ସଫଳ ହେବେନି । ଗୋଟିଏ ପ୍ରସଙ୍ଗରେ ମୁଲତବୀ ଆଲୋଚନା ପାଇଁ ସମୟ ଧାର୍ଯ୍ୟ ହେଉଛି । କିନ୍ତୁ ବିରୋଧୀ ବିଷୟବସ୍ତୁ ବାହାରକୁ ଯାଇ ଆଲୋଚନା କରୁଛନ୍ତି ବୋଲି ବିଜେଡି ବିରୋଧୀଙ୍କୁ ଟାର୍ଗେଟ୍ କରିଛି ।
ଆହ୍ଲାବାଦ ହାଇକୋର୍ଟ ପରିସରରୁ ୩ମାସ ମଧ୍ୟରେ ହଟାଯାଉ ମସଜିଦ୍: ସୁପ୍ରିମକୋର୍ଟ
ନୂଆଦିଲ୍ଲୀ: ସୋମବାର ସୁପ୍ରିମକୋର୍ଟ ଆହ୍ଲାବାଦ ହାଇକୋର୍ଟ ପରିସସରେ ଥିବା ଏକ ମସଜିଦକୁ ହଟାଇବା ପାଇଁ ନିର୍ଦ୍ଦେଶ ଦେଇଛନ୍ତି । ୩ ମାସ ମଧ୍ୟରେ ଏହି ମସଜିଦକୁ ହଟାଇବା ପାଇଁ ଅଧିକାରୀଙ୍କୁ ନିର୍ଦ୍ଦେଶ ଦେଇଛନ୍ତି ସର୍ବୋଚ୍ଚ ଅଦାଲତ । ମସଜିଦ୍ ହଟାଯିବାକୁ ବିରୋଧ କରୁଥିବା ଆବେଦନକାରୀଙ୍କୁ ସୁପ୍ରିମକୋର୍ଟ କହିଛନ୍ତି ଯେ, ଢ଼ାଞ୍ଚା ଏକ ମିଆଦପୂର୍ଣ୍ଣ ଜମି ଉପରେ ଅବସ୍ଥିତ ଅଛି ଏବଂ ଏହାକୁ ଅଧିକାର ଅନୁଯାୟୀ ବଳବତ୍ତର ରଖିବା ପାଇଁ ଦାବି କରିପାରିବେ ନାହିଁ । ଆବେଦନକର୍ତ୍ତାଙ୍କ ମଧ୍ୟରେ ସାମିଲ ହାଇକୋର୍ଟ ମସଜିଦ ୱକ୍ଫ ଏବଂ ୟୁପି ସୁନ୍ନୀ ସେଣ୍ଟ୍ରାଲ ୱକ୍ଫ ନଭେମ୍ବର ୨୦୧୭ର ଆହ୍ଲାବାଦ ହାଇକୋର୍ଟଙ୍କ ଆଦେଶକୁ ଚ୍ୟାଲେଞ୍ଜ କରିଥିଲେ ।
ହାଇକୋର୍ଟ ସେମାନଙ୍କୁ ମସଜିଦକୁ ପରିସରରୁ ବାହାର କରିବା ପାଇଁ ୩ ମାସର ସମୟ ଦେଇଥଇଲେ । ସୋମବାର ସୁପ୍ରିମକୋର୍ଟ ସେମାନଙ୍କ ଆବେଦନକୁ ଖାରଜ କରିଦେଇଛନ୍ତି । ସୁପ୍ରିମକୋର୍ଟରେ ଜଷ୍ଟିସ ଏମଆର୍ ଶାହ ଏବଂ ଜଷ୍ଟିସ ସିଟି ରବିକୁମାରଙ୍କ ଖଣ୍ଡପୀଠ ଏହି ଶୁଣାଣି କରିଛନ୍ତି । ଖଣ୍ଡପୀଠ ଆବେଦନକାରୀଙ୍କୁ କହିଥିଲେ ଯେ ଜମି ଲିଜରେ ଥିଲା, ଯାହାର ଅବଧି ସମାପ୍ତ ହୋଇଯାଇଥିଲା । ତେଣୁ ସେମାନେ ଅଧିକାର ଅନୁଯାୟୀ ଏହାକୁ କାଏମ ରଖିବାକୁ ଦାବି କରିପାରିବେ ନାହିଁ । ତେଣୁ ଏହି ମସଜିଦକୁ ତିନି ମାସ ଭିତରେ ଭାଙ୍ଗିବା ପାଇଁ ସମୟ ଦିଆଯାଉଛି ଏବଂ ଯଦି ତିନି ମାସ ଅବଧି ଭିତରେ ମସଜିଦ ନହଟାଯାଏ ତେବେ ହାଇକୋର୍ଟ ସମେତ ଅଧିକାରୀମାନଙ୍କ ପାଖରେ ଏହାକୁ ଭାଙ୍ଗିବା ପାଇଁ ସମସ୍ତ ବିକଳ୍ପ ଖୋଲା ରହିବ ।
ସୁନା ଚେନ ଛିଣ୍ଡାଇ ବାଇକରେ ଫେରାର ହେଉଥିଲେ; ତେଲ ସରିଯିବାରୁ ଧରାପଡ଼ି ନିର୍ଦ୍ଧୁମ ଛେଚା ଖାଇଲେ
ସାଲେପୁର: ଲୁଟ ବେଳେ ଧରାପଡି ଛେଚା ଖାଇଲେ ଲୁଟେରା । ସାଲେପୁରରେ ଲୁଟେରାଙ୍କୁ କାବୁ କରି ଉତ୍ତମ ମଧ୍ୟମ ଦେଇଛନ୍ତି ଅଞ୍ଚଳବାସୀ । ଚଳନ୍ତା ଗାଡ଼ିରୁ ଚେନ୍ ଛିଣ୍ଡାଇ ଫେରାର ମାରୁଥିବା ବେଳେ ଗାଡ଼ିରୁ ତେଲ ସରିଯାଇଥିଲା । ତେଲ ପକାଇ ଫେରୁଥିବା ବେଳେ ପିଛା କରିଆସୁଥିବା ଲୋକେ ଦୁଇ ଲୁଟେରାକୁ ମାଡି ବସିଥିଲେ । ସେମାନଙ୍କ ମଧ୍ୟରୁ ଜଣେ ଖସିଯିବାରେ ସକ୍ଷମ ହୋଇଥିବା ବେଳେ ଅନ୍ୟଜଣଙ୍କୁ ଲୋକମାନେ ନିସ୍ତୁକ ମାଡ଼ ମାରିଛନ୍ତି ।
ଲୁଟେରା ଠାରୁ ଗୋଟିଏ ଖେଳଣା ବନ୍ଧୁକ, ଗୋଟିଏ ଛୁରୀ, ନମ୍ବର ପ୍ଲେଟ ସହ ଏକ ବ୍ୟାଗ ଜବତ ହୋଇଛି । କାବୁ ହୋଇଥିବା ଲୁଟେରା ହେଲେ ଯାଜପୁରର ଶଶିକାନ୍ତ ଜେନା । ଖବର ପାଇ ପୋଲିସ ଘଟଣାସ୍ଥଳରେ ପହଞ୍ଚିଛି । ପୂର୍ବରୁ ଅନେକ ରାହାଜାନୀ ମାମଲାରେ ଏମାନଙ୍କ ସମ୍ପୃକ୍ତି ରହିଥିବା କୁହାଯାଉଛି ।
୧୫ ତାରିଖରୁ ସକ୍ରିୟ ହେବ ଆଉ ଏକ ପଶ୍ଚିମା ଝଡ; ପ୍ରଭାବରେ ଘଡ଼ଘଡ଼ି ବିଜୁଳି ସହ ବର୍ଷା ସମ୍ଭାବନା
ଭୁବନେଶ୍ୱର: ଆସୁଛି ବଡ ବର୍ଷା ! ଭିଜିବ ଉପାନ୍ତରୁ ଉପକୂଳ । ୧୫ ତାରିଖରୁ ସକ୍ରିୟ ହେବ ଆଉ ଏକ ପଶ୍ଚିମା ଝଡ । ଏହା ପ୍ରଭାବରେ ୧୭ ତାରିଖ ପର୍ଯ୍ୟନ୍ତ ଘଡଘଡି ବିଜୁଳି ସହ ବର୍ଷା ହେବା ସମ୍ଭାବନା ରହିଛି । ଝଡ ପବନ ସହ ବର୍ଷା ନେଇ ସତର୍କତା ଜାରି କରିଛି ପାଣିପାଗ କେନ୍ଦ୍ର । ଉପକୂଳ ଏବଂ ପାର୍ଶ୍ବବର୍ତ୍ତୀ ଜିଲ୍ଲାରେ ଏହାର ପ୍ରଭାବ ପଡ଼ିବ । ୧୫ ତାରିଖରେ ବାଲେଶ୍ବର, ଭଦ୍ରକ, ମୟୂରଭଞ୍ଜ, କେନ୍ଦୁଝର, ଯାଜପୁର, ଢେଙ୍କାନାଳ, କେନ୍ଦ୍ରାପଡା, କୋରାପୁଟ, ରାୟଗଡା, ଗଜପତିରେ ବିଜୁଳି ଘଡଘଡି ସହ ବର୍ଷା ହେବା ସମ୍ଭାବନା ରହିଛି ।
୧୬ରେ କୋରାପୁଟ, ଗଜପତି, କନ୍ଧମାଳ, ବାଲେଶ୍ବର, ଭଦ୍ରକ, ଯାଜପୁର, ଢେଙ୍କାନାଳକୁ କାଳବୈଶାଖି ସତର୍କତା ଜାରି କରାଯାଇଛି । ୧୭ରେ ଦକ୍ଷିଣ ଓଡ଼ିଶାର ଅଧିକାଂଶ ଜିଲ୍ଲାରେ ବିଜୁଳି ଘଡଘଡି ସହ ବର୍ଷା ହେବା ସମ୍ଭାବନା ରହିଛି ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ଗଞ୍ଜାମ, ଗଜପତି, ମାଲକାନଗିରି, କୋରାପୁଟ, ନବରଙ୍ଗପୁର, କଳାହାଣ୍ଡି, କନ୍ଧମାଳ, ରାୟଗଡ଼ାରେ ବର୍ଷା ସହ ଘଣ୍ଟା ପ୍ରତି ୪୫ ରୁ ୫୦ କିଲୋମିଟର ବେଗରେ ଝଟକା ପବନ ଅନୁଭୂତ ହେବ ବୋଲି ଆଞ୍ଚଳିକ ପାଣିପାଗ କେନ୍ଦ୍ର ସୂଚନା ଦେଇଛି ।
ସମଲିଙ୍ଗୀ ବିବାହ ମାମଲା: ୫ଜଣିଆ ସାମ୍ବିଧାନିକ ଖଣ୍ଡପୀଠ କରିବେ ଶୁଣାଣି
ନୂଆଦିଲ୍ଲୀ: ସମଲିଙ୍ଗୀ ବିବାହକୁ ନେଇ ସୁପ୍ରିମକୋର୍ଟଙ୍କ ବଡ଼ ନିଷ୍ପତ୍ତି । ମାମଲାର ଶୁଣାଣି କରିବେ ୫ଜଣିଆ ସାମ୍ବିଧାନିକ ଖଣ୍ଡପୀଠ । ଆସନ୍ତା ଏପ୍ରିଲ ୧୮ ତାରିଖରେ ମାମଲାରେ ଶୁଣାଣି କରାଯିବ । ସମଲିଙ୍ଗୀ ବିବାହକୁ ନେଇ ହେବାକୁ ଶୁଣାଣିର ଲାଇଭ ଷ୍ଟ୍ରିମିଂ କରିବାକୁ ଦାବି କରିଛନ୍ତି ଆବେଦନକାରୀ । ଗତକାଲି ସମଲିଙ୍ଗୀ ବିବାହକୁ ବିରୋଧ କରି କୋର୍ଟରେ ୫୬ପୃଷ୍ଠାର ସତ୍ୟପାଠ ଦାଖଲ କରିଥିଲେ କେନ୍ଦ୍ର ସରକାର । କେନ୍ଦ୍ର ସରକାର ନିଜ ସତ୍ୟପାଠରେ କହିଥିଲେ ସମଲିଙ୍ଗୀ ବିବାହ ଭାରତୀୟ ସଂସ୍କୃତି ଓ ପରମ୍ପରା ବିରୋଧୀ । ତେଣୁ ଭାରତରେ ଏହାକୁ ଅନୁମତି ନଦିଆଯାଉ । ଆଜି ମାମଲାର ଶୁଣାଣି ସମୟରେ ପ୍ରଧାନ ବିଚାରପତିଙ୍କ ନେତୃତ୍ୱାଧୀନ ତିନି ଜଜ ବିଶିଷ୍ଟ ଖଣ୍ଡପୀଠ ମାମଲାକୁ ସାମ୍ବିଧାନିକ ପୀଠକୁ ପଠାଇବା ପାଇଁ ସୁପାରିଶ କରିଛନ୍ତି । ଆବେଦନକାରୀ ଶୁଣାଣି ସମୟରେ ଲାଇଭ ଷ୍ଟ୍ରିମିଂ ପାଇଁ ମଧ୍ୟ ନିବେଦନ କରିଛନ୍ତି । କେନ୍ଦ୍ର ସରକାରଙ୍କ ସତ୍ୟପାଠ ଉପରେ ଜବାବ ଦାଖଲ କରିବା ପାଇଁ ଆବେଦନକାରୀଙ୍କୁ ତିନି ସପ୍ତାହ ସମୟ ଦିଆଯାଇଛି ।