ଉତ୍ତରକୋରିଆ: ଉତ୍ତର କୋରିଆର ପୁଣି ମନମାନି । ପରୀକ୍ଷା କଲା ଆଉ ଏକ ବାଲିଷ୍ଟିକ ମିସାଇଲ । ଉତ୍ତର କୋରିଆର ଏହି ପରୀକ୍ଷଣ ଯୋଗୁ ସ୍ଥାନୀୟ ଅଞ୍ଚଳରେ ଆଞ୍ଚଳିକ ଭାରସାମ୍ୟ ନଷ୍ଟ ହେବ ବୋଲି କହିଛି ଦକ୍ଷିଣ କୋରିଆ । କୋରିଆନ ପେନିସୁଲାର ପୂର୍ବ ଉପକୂଳରେ ଉତ୍ତର କୋରିଆ ଏହି ମିସାଇଲର ପରୀକ୍ଷଣ କରିଛି । ଗତ ମଙ୍ଗଳବାର ଉତ୍ତର କୋରିଆ ମଧ୍ୟ ଦୁଇଟି ସର୍ଟରେଞ୍ଜ ବାଲିଷ୍ଟିକ ମିସାଇଲ ପରୀକ୍ଷା କରିଥିଲା । ଉତ୍ତର କୋରିଆର ଆଣବିକ ପରୀକ୍ଷା ଓ ମିସାଇଲ ପରୀକ୍ଷା ଜାରି ରହିଥିବାବେଳେ ଆମେରିକା ଓ ଦକ୍ଷିଣ କୋରିଆ ମଧ୍ୟରେ ସାମରିକ ସହଯୋଗ ବୃଦ୍ଧି ପାଇଛି ।
ବିଦେଶରୁ ଫେରି କେନ୍ଦ୍ର ସରକାରଙ୍କ ଉପରେ ବର୍ଷିଲେ ରାହୁଲ
ନୂଆଦିଲ୍ଲୀ: ବିଦେଶରୁ ଫେରି କେନ୍ଦ୍ର ସରକାରଙ୍କ ଉପରେ ବର୍ଷିଛନ୍ତି କଂଗ୍ରେସ ନେତା ରାହୁଲ ଗାନ୍ଧୀ । ସେ କହିଛନ୍ତି- ଆଦାନୀ ପ୍ରସଙ୍ଗରେ ସତ ସାମ୍ନାକୁ ଆସିବା କ୍ଷେତ୍ରରେ ଡରୁଛନ୍ତି ସରକାର । ସେ ନିଶ୍ଚିତ ଯେ ସଂସଦରେ ତାଙ୍କୁ କହିବା ଲାଗି ଅଧିକାର ଦିଆଯିବ ନାହିଁ । ସେ ପାର୍ଲାମେଣ୍ଟରେ ଯାହା କହିଥିଲେ ତାହାକୁ ଉଦ୍ଦେଶ୍ୟମୂଳକ ଭାବେ ହଟାଇ ଦିଆଯାଇଛି । ଦେଶବାସୀଙ୍କ ଦୃଷ୍ଟି ଏଡ଼ାଇବା ଲାଗି ଚାଲିଛି ଅପଚେଷ୍ଟା । ବ୍ରିଟେନରେ ସେ ଭାରତ ସମ୍ପର୍କରେ ଯାହା କହିଥିଲେ ସେଥିଲାଗି ସେ କ୍ଷମା ମାଗିବେନି ।
ଭୁବନେଶ୍ବର ଉପକଣ୍ଠ ତମାଣ୍ଡୋରେ ଡ୍ରାଇଭର-ଡ୍ରାଇଭର ମୁହାଁମୁହିଁ, ରାସ୍ତା କ୍ଲିୟର କରିବାରୁ ପୋଲିସ ସହ ଧସ୍ତାଧସ୍ତି
ଭୁବନେଶ୍ୱର: ଭୁବନେଶ୍ବର ଉପକଣ୍ଠ ତମାଣ୍ଡୋରେ ଡ୍ରାଇଭର-ଡ୍ରାଇଭର ମୁହାଁମୁହିଁ । ରାଜ୍ୟ ଓ ରାଜ୍ୟ ବାହାରର ଡ୍ରାଇଭରଙ୍କ ମଧ୍ୟରେ ଉତ୍ତେଜନାମୂଳକ ସ୍ଥିତି ଉପୁଜିଛି । ୧୬ ନଂ ରାଜପଥରେ କାଲିଠୁ ମାଲ ପରିବହନ ଗାଡି ଛିଡ଼ାହୋଇ ରାସ୍ତା ଜାମ୍ ହୋଇଥିଲା । ଯାହାକୁ ନେଇ ଉଭୟ ଡ୍ରାଇଭରଙ୍କ ମଧ୍ୟରେ ଧସ୍ତାଧସ୍ତି ସ୍ଥିତି ଉପୁଜିଛି । ପୋଲିସ ପହଞ୍ଚି ରାସ୍ତା କ୍ଲିୟର କରି ଗାଡ଼ିଗୁଡ଼ିକୁ ଛାଡ଼ିବାରୁ ପୋଲିସକୁ ମଧ୍ୟ ବିରୋଧ କରିଥିଲେ ଡ୍ରାଇଭର । ଏବେ ରାସ୍ତା କ୍ଲିୟର ହୋଇଥିବା ବେଳେ ଗାଡ଼ି ଚଳାଚଳ ସ୍ବାଭାବିକ ହୋଇଛି ।
ଶଙ୍ଖ ପାଲଟିଛି ସମୃଦ୍ଧିର ପ୍ରତୀକ, ସୋସିଆଲ ମିଡିଆରେ ଟ୍ରେଣ୍ଡ କରୁଛି ‘ଶଙ୍ଖ ମୋ ଗର୍ବ’
ଭୁବନେଶ୍ୱର: ଶଙ୍ଖ ପାଲଟିଛି ସମୃଦ୍ଧିର ପ୍ରତୀକ। ଏବେ ସୋସିଆଲ ମିଡିଆରେ ଟ୍ରେଣ୍ଡ କରୁଛି ବିଜେଡିର ‘ଶଙ୍ଖ ମୋ ଗର୍ବ’ ଅଭିଯାନ। ଦଳୀୟ ନେତାମାନେ ବିଜେଡିର ଚିହ୍ନ ଶଙ୍ଖକୁ ନିଜ ଗର୍ବ ବୋଲି କହିବା ସହ ବିଭିନ୍ନ ସୋସିଆଲ୍ ମିଡ଼ିଆ ପ୍ଲାଟଫର୍ମରେ ପୋଷ୍ଟ କରୁଛନ୍ତି। ଦୁଇ ଦଶନ୍ଧିରୁ ଅଧିକ ସମୟ ଧରି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଶଙ୍ଖବାହିନୀ ରାଜ୍ୟ ବିକାଶରେ ନିଜକୁ ନିୟୋଜିତ କରିଛନ୍ତି।
ନିକଟରେ ଘରେ ଘରେ ଶଙ୍ଖ କାର୍ଯ୍ୟକ୍ରମ ଜରିଆରେ ପ୍ରତି ଘରେ ନବୀନଙ୍କ ବିକାଶମୂଳକ ଯୋଜନା ପହଞ୍ଚାଇଥିଲା ବିଜୁ ଜନତା ଦଳ । ଏବେ ଶଙ୍ଖ ମୋ ଗର୍ବ କ୍ୟାମ୍ପେନ୍ ଜରିଆରେ ନିଜ ଦଳର ଗରିମା ଅକ୍ଷୁଣ୍ଣ ରଖିବା ସହ ବିରୋଧୀଙ୍କ ଅପପ୍ରଚାରକୁ ଜବାବ ଦେବାକୁ ରୋଡମ୍ୟାପ ପ୍ରସ୍ତୁତ କରୁଛି ବିଜେଡି। ବିଜୁ ଜନତା ଦଳର ଏ ଅଭିଯାନକୁ ସୋସିଆଲ୍ ମିଡିଆରେ ଭରପୂର ସମର୍ଥନ ମଧ୍ୟ ମିଳୁଛି ।
ଓଡ଼ିଶା ମୋ ରାଜ୍ୟ, ମୋ ମାଟି ମହାପ୍ରଭୁ ଜଗନ୍ନାଥଙ୍କ ଆଶୀର୍ବାଦରୁ ସୁରକ୍ଷିତ #ଶଙ୍ଖ_ମୋର_ଗର୍ବ
ମୁଁ ଜଣେ ଗର୍ବିତ ଓଡ଼ିଆ #ଶଙ୍ଖ_ମୋ_ଗର୍ବ #ShankhaMoGarba pic.twitter.com/6n7XcThQk3
— Manas Mangaraj (@manasrmangaraj) March 16, 2023
‘ଯିଏ ଭୋଟ୍ ନ ଦେବ ତାଙ୍କୁ ଜୋତାମାଡ଼ର ଆବଶ୍ୟକତା ରହିଛି’: କିରଣ ଖେର
ଚଣ୍ଡୀଗଡ଼: ସୀମା ଟପିଲେ ଚଣ୍ଡୀଗଡ଼ର ବିଜେପି ସାଂସଦ କିରଣ ଖେର । ଏପରିକି ତାଙ୍କୁ ଯିଏ ଭୋଟ୍ ନ ଦେବ ତାଙ୍କୁ ଜୋତାରେ ପିଟିବା ଲାଗି କହିଛନ୍ତି କିରଣ । କିଶନଗଡ଼ରେ ଆୟୋଜିତ ଏକ ଭିତ୍ତିପ୍ରସ୍ତର ପ୍ରତିଷ୍ଠା ଉତ୍ସବରେ ଯୋଗଦେଇ କିରଣ ଏହି ଅଶାଳୀନ ମନ୍ତବ୍ୟ ପ୍ରଦାନ କରିଛନ୍ତି । ଖୋଦ୍ ଚଣ୍ଡୀଗଡ଼ ମେୟର ଅନୁପ ଗୁପ୍ତା ଓ ପୌରନିଗମ କମିଶନର ଅନିନ୍ଦିତା ମିତ୍ରଙ୍କ ଉପସ୍ଥିତିରେ ଏହା କହିଛନ୍ତି କିରଣ । ସେ କହିଥିଲେ- ଚଣ୍ଡୀଗଡ଼ ନିର୍ବାଚନ ମଣ୍ଡଳୀରେ ଥିବା ଦୀପ କମ୍ପ୍ଲେକ୍ସର ବାସିନ୍ଦାଙ୍କ ଲାଗି ସେ ଅନେକ କାମ କରିଛନ୍ତି । ଯଦି ତାଙ୍କୁ କମ୍ପ୍ଲେକ୍ସର କେହି ଜଣେ ଭୋଟ ଦେବେ ନାହିଁ ତେବେ ତାହା ଲଜ୍ଜାର ବିଷୟ । ସେମାନଙ୍କୁ ଜୋତାମାଡ଼ର ଆବଶ୍ୟକତା ରହିଛି ।
କିରଣଙ୍କ ଏହି ମନ୍ତବ୍ୟକୁ ବିରୋଧ କରିଛନ୍ତି ଚଣ୍ଡୀଗଡ଼ ଯୁବ କଂଗ୍ରେସ ନେତା ମନୋଜ ଲୁବାନା । ଗତ ୯ ବର୍ଷ ମଧ୍ୟରେ କିରଣ ପ୍ରଥମ ଥର ଲାଗି କିଶନଗଡ଼ ଆସିଛନ୍ତି । ସେଠାରେ କୌଣସି ବିକାଶମୂଳକ କାର୍ଯ୍ୟ ହୋଇନାହିଁ ବୋଲି ସେ ଅଭିଯୋଗ କରିଛନ୍ତି । ଗତ ୨୦୨୨ ଜୁନରେ ବି କିରଣ ଆପ୍ କାଉନସିଲରମାନଙ୍କୁ ପଶୁ ବୋଲି କହି ବିବାଦରେ ଫସିଥିଲେ ।
ପିଆଜ, କପା ଓ ସୋୟାବିନର ସହାୟକ ମୂଲ୍ୟ ବୃଦ୍ଧି ଦାବି, ମୁମ୍ବାଇ ଅଭିମୁଖେ ମହାରାଲି
ମୁମ୍ବାଇ: ମୁମ୍ବାଇ ଅଭିମୁଖେ ମହାରାଲି । ନାସିକରୁ ମୁମ୍ବାଇ ଯାଏ ଚାଲିଥିବା ରାଲି ପହଞ୍ଚିଛି ସାହାପୁରରେ । ରାଲିରେ ହଜାର ହଜାର ପିଆଜ ଚାଷୀ ସାମିଲ ହୋଇଥିବାବେଳେ କୁମ୍ଭକର୍ଣ୍ଣ ନିଦ୍ରାରେ ଅଛନ୍ତି ମହାରାଷ୍ଟ୍ର ସରକାର । ଲାଲ ପତାକା ସଜ୍ଜିତ ହଜାର ହଜାର ଚାଷୀ ନିଜର ନ୍ୟାଯ୍ୟ ଅଧିକାର ସାବ୍ୟସ୍ତ ଲାଗି କରିଛନ୍ତି ଅଭିଯାନ । ପିଆଜ, କପା ଓ ସୋୟାବିନର ସହାୟକ ମୂଲ୍ୟ ବୃଦ୍ଧି, ଜଙ୍ଗଲ ଅଧିକାର ଆଇନ କାର୍ଯ୍ୟକାରୀ କରିବା ଆଦି ଦାବିରେ ଜାରି ରହିଛି ପଦଯାତ୍ରା । ପଦଯାତ୍ରାବେଳେ ଆନ୍ଦୋଳନକାରୀଙ୍କ ଦୁଃଖ ବଢ଼ିଥିବାବେଳେ ସେମାନଙ୍କ ପାଦ ଫୁଲିଯାଇଥବା ଦେଖିବାକୁ ମିଳିଛି । କିଛି ଆନ୍ଦୋଳନକାରୀ ବି ଗୁରୁତର ହୋଇ ହସ୍ପିଟାଲରେ ଭର୍ତ୍ତି ହୋଇଛନ୍ତି । ପିଆଜ ଅମଳ ଲାଗି ସମୟ ଆସିଥିଲେ ଅର୍ଥ ଅଭାବରେ ତାହାକୁ ଖୋଳାଯାଇପାରୁନାହିଁ ।
ଚାଷୀମାନେ କେନ୍ଦ୍ର ଓ ମହାରାଷ୍ଟ୍ର ସରକାରଙ୍କ ମନମାନି ବିରୋଧରେ ନାରାବାଜି ଚଳାଇଥିବାବେଳେ ନାସିକ, ଅହମ୍ମଦନଗର ଓ ପାଲଘର ଜିଲ୍ଲାର ହଜାର ହଜାର ଚାଷୀ ରାଲିରେ ସାମିଲ ହୋଇଛନ୍ତି । ସିପିଏମ ନେତୃତ୍ବରେ ଚାଲିଥିବା ଏହି ମହାଅଭିଯାନରେ ଚାଷୀମାନେ ପ୍ରାୟ ୨୦୦ କିଲୋମିଟର ଯାତ୍ରା କରିବେ । ବଡ଼କଥା ହେଉଛି ଏହି ମହାରାଲିରେ ସାମିଲ ହୋଇଛନ୍ତି ଆଶାକର୍ମୀ ଓ ବିଭିନ୍ନ ଆଦିବାସୀ ସଂଗଠନ । ପିଆଜ ଚାଷୀଙ୍କୁ କ୍ବିଣ୍ଟାଲ ପିଛା ୬୦୦ ଟଙ୍କା ସହାୟତା ଦେବା ଲାଗି ମଧ୍ୟ ଦାବି କରାଯାଇଛି । ଏହା ସହ ପୁରୁଣା ପେନସନ ସ୍କିମ୍ କାର୍ଯ୍ୟକାରୀ କରିବା ଲାଗି ମଧ୍ୟ ଆନ୍ଦୋଳନକାରୀ ଦାବି କରିଛନ୍ତି ।
ୟୁରୋପରେ ଘନଉଛି ବ୍ୟାଙ୍କିଂ ସଙ୍କଟ, ଦେବାଳିଆ ସ୍ଥିତିରେ କ୍ରେଡିଟ ସୁଇସ୍
ୟୁରୋପରେ ଘନଉଛି ବ୍ୟାଙ୍କିଂ ସଙ୍କଟ । ସପ୍ତାହକ ଭିତରେ ଆମେରିକାର ଦୁଇଟି ବ୍ୟାଙ୍କ ବୁଡ଼ି ଯାଇଥିବା ବେଳେ ଆଉ ଏକ ବିଶ୍ବସ୍ତରୀୟ ବ୍ୟାଙ୍କ ବୁଡିଯିବା ଭଳି ସ୍ଥିତି ଉପୁଜିଛି । ଆମେରିକା ପରେ ୟୁରୋପରେ ବି ସ୍ଥିତି ଜଟିଳ ହେବାରେ ଲାଗିଛି। ୟୁରୋପର ସବୁଠୁ ବଡ଼ ବ୍ୟାଙ୍କ କ୍ରେଡିଟ ସୁଇସ ଏବେ ଦେବାଳିଆ ସ୍ଥିତିରେ ।
ଗୋଟିଏ ଦିନରେ କ୍ରେଡିଟ ସୁଇଓ ସେୟାର ୨୫ପ୍ରତିଶତ ହ୍ରାସ ପାଇଛି । ଗତ ତିନି ମାସ ମଧ୍ୟରେ ବ୍ୟାଙ୍କିଂ ଷ୍ଟକ ମୂଲ୍ୟ ଅନେକ ମାତ୍ରାରେ ହ୍ରାସ ପାଇଛି । ଲେହମ୍ୟାନ ବ୍ରଦର୍ସ ବୁଡିଯିବ ବୋଲି ଆଶଙ୍କା କରିଥିବା ଓ୍ବାଲ ଷ୍ଟ୍ରିଟ ଆନାଲିଷ୍ଟ ରବର୍ଟ କିୟୋସାକି କ୍ରେଡିଟ ସୁଇସ ବୁଡିବାକୁ ଯାଉଥିବା ଆକଳନ କରିଛନ୍ତି। ବଣ୍ଡ ବଜାରରେ ଦେଖାଦେଇଥିବା ଅସ୍ଥିରତା ବ୍ୟାଙ୍କିଂ ସେକ୍ଟର ପାଇଁ ସବୁଠୁ ବଡ଼ ବିପଦ ଭାବେ ଉଭା ହୋଇଛି।
କ୍ରେଡିସ ସୁଇସ ହେଉଛି ବିଶ୍ବର ଅଷ୍ଟମ ବୃହତ ଇନଭେଷ୍ଟମେଣ୍ଟ ବ୍ୟାଙ୍କ। ନିକଟରେ ଆମେରିକାର ଦୁଇଟି ବଡ଼ ବଡ଼ ବ୍ୟାଙ୍କ ସିଲିକନ ଭ୍ୟାଲି ଓ ସିଗ୍ନେଚର ବ୍ୟାଙ୍କ ବୁଡ଼ି ଯାଇଥିଲା ।
ସଂସଦ ଭବନ ବାହାରେ ଜେପିସି ଗଠନ ଦାବିରେ ବିରୋଧୀଙ୍କ ମାନବ ଶୃଙ୍ଖଳ
ନୂଆଦିଲ୍ଲୀ : ଆଜି ବି ସଂସଦରେ ହଙ୍ଗାମା । ଆରମ୍ଭରୁ ଆଦାନୀ ପ୍ରସଙ୍ଗରେ ତାତିଲା ଗୃହ । ବିଜେପି- ଆଦାନୀ ଭାଇ ଭାଇ ନାରାରେ କମ୍ପିଲା ପାର୍ଲାମେଣ୍ଟ । ଜେପିସି ଗଠନ ଦାବିରେ ବିରୋଧୀ ସାଂସଦଙ୍କ ହଲ୍ଲାବୋଲ ପରେ ଉଭୟ ଗୃହକୁ ମୁଲତବି କରି ଦିଆଯାଇଛି । ଯୁଗ୍ମ ସଂସଦୀୟ କମିଟି ଗଠନ ଦାବିରେ ସଂସଦ ଭବନ ବାହାରେ ବିରୋଧୀ ସାଂସଦମାନେ ମାନବ ଶୃଙ୍ଖଳ ଗଠନ କରିଛନ୍ତି ।
ନାରାବାଜି ହଟ୍ଟଗୋଳ ଭିତରେ ବିଦେଶ ଗସ୍ତରୁ ଫେରିବା ପରେ ପାର୍ଲାମେଣ୍ଟରେ ପହଞ୍ଚିଛନ୍ତି କଂଗ୍ରେସ ସାଂସଦ ରାହୁଲ ଗାନ୍ଧୀ । ଲଣ୍ଡନରେ ଭାରତ ବିରୋଧୀ ମନ୍ତବ୍ୟ ଦୋଇନାହିଁ ଓ ଯଦି ଅନୁମତି ମିଳେ ସମାନ ବୟାନ ସଂସଦରେ ମଧ୍ୟ ରଖିବି ବୋଲି ରାହୁଲ ଗଣମାଧ୍ୟମକୁ କହିଛନ୍ତି ।
ସେପଟେ ଉଭୟ ଗୃହକାର୍ଯ୍ୟ ସ୍ଥଗିତ ହେବାକୁ ନେଇ ଶାସକ ଦଳ ବା ଭାରତୀୟ ଜନତା ପାର୍ଟିକୁ ଦାୟୀ କରିଛି କଂଗ୍ରେସ । ଗୃହରେ ଚର୍ଚ୍ଚା, ଆଲୋଚନା ଚାହୁଁନି ବିଜେପି । ଜାଣିଶୁଣି ଶାସକ ଦଳର ସାଂସଦ ଗୃହ ଚଲାଇ ଦେଉନାହାନ୍ତି ବୋଲି କଂଗ୍ରେସ ନେତା ପଓ୍ବନ ଖେରା କହିଛନ୍ତି ।
କେତେ ଘାତକ H3N2 ଭାଇରସ୍? କେମିତି ବର୍ତ୍ତିବେ ଭାଇରସ୍ କବଳରୁ
ନୂଆଦିଲ୍ଲୀ: ସାରା ଦେଶରେ H3N2 ଭାଇରସ୍ କାୟା ମେଲାଇବାରେ ଲାଗିଛି । ଦିଲ୍ଲୀ, ମହାରାଷ୍ଟ୍ର ଓ ଗୁଜରାଟ୍ ସମେତ ଅନେକ ରାଜ୍ୟରେ ଏହି ଭାଇରସ ଚିହ୍ନଟ ହୋଇଥିବା ବେଳେ ଏହାକୁ ନେଇ ଲୋକଙ୍କ ମଧ୍ୟରେ ଆତଙ୍କ ଖେଳିଯାଇଛି । ମିଡିଆ ରିପୋର୍ଟ ଅନୁଯାୟୀ, ସଂକ୍ରମଣରେ ଅନେକ ଲୋକଙ୍କ ଜୀବନ ଗଲାଣି । ଡାକ୍ତରଙ୍କ ମତରେ H3N2 ଭାଇରସ୍ ବହୁତ ସଂକ୍ରାମକ । ତେବେ ଜାଣନ୍ତୁ ଏହା ସମ୍ପର୍କରେ…
ନୂଆଦିଲ୍ଲୀର ସାର୍ ଗଙ୍ଗାରାମ ହସ୍ପିଟାଲର ପ୍ରିଭେନଟିଭ୍ ହେଲଥ ଡିପାର୍ଟମେଣ୍ଟର ଡାଇରେକ୍ଟରଙ୍କ ମତରେ H3N2 ଭାଇରସ୍ ଇନଫ୍ଲୁଏଞ୍ଜା ଏ’ର ସବଟାଇପ୍ । ଏହା ଏକ ଭାଇରାଲ୍ ଇନଫେକସନ୍ । ଯାହା ଜଣଙ୍କ ଠାରୁ ଅନ୍ୟଜଣଙ୍କୁ ଖୁବ୍ ଶୀଘ୍ର ବ୍ୟାପିଥାଏ । ଏହି ସଂକ୍ରମଣ ହେଲେ ଥଣ୍ଡା, ଜ୍ୱର, ତଣ୍ଟି ଦରଜ, ନିଶ୍ୱାସ ପ୍ରଶ୍ୱାସ ନେବାରେ ସମସ୍ୟା, କାଶ, ଛିଙ୍କ, ଦେହ ଦରଜ ଭଳି ଲକ୍ଷଣ ଦେଖାଯାଇଥାଏ । କାଶ, ଛିଙ୍କ କିମ୍ବା ସଂକ୍ରମିତ ବ୍ୟକ୍ତିଙ୍କ ସଂସ୍ପର୍ଶରେ ଆସିଲେ ଖୁବ୍ ଶୀଘ୍ର ବ୍ୟାପିଥାଏ । ଏହା ଶରୀରର ହ୍ୱାଇଟ୍ ବ୍ଲଡ୍ ସେଲକୁ କ୍ଷତି ପହଞ୍ଚାଇଥାଏ । ଯେଉଁମାନଙ୍କର ଇମ୍ୟୁନିଟି ପାୱାର କମ୍ କିମ୍ବା ଗଭୀର ରୋଗରେ ପିଡିତ ସେମାନେ ଏହି ସଂକ୍ରମଣରୁ ନିହାତି ବର୍ତ୍ତିବା ଉଚିତ୍ ।
କେଉଁ ରୋଗୀ ରହିବେ ସାବଧାନ
ଡାକ୍ତରଙ୍କ କହିବାନୁଯାୟୀ, ଖାସକରି ବ୍ଲଡ ପ୍ରେସର, ମହୁମେହ, ଆଜମା, ନିଶ୍ୱାସ ପ୍ରଶ୍ୱାସ ରେ ସମସ୍ୟା ଭୋଗୁଥିବା ଲୋକଙ୍କ ପାଇଁ ଘାତକ ହୋଇପାରେ H3N2 ଭାଇରସ୍ । ଏଭଳି ବ୍ୟକ୍ତିଙ୍କୁ ସଂକ୍ରମଣ ହେଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ଉଚିତ୍ ।
ଏହି ଭାଇରସରେ ସଂକ୍ରମିତ ହେଲେ ଠିକ୍ ହେବାକୁ ପ୍ରାୟ ଏକ ସପ୍ତାହ ଲାଗିଥାଏ । ହେଲେ ୩ରୁ ୪ ସପ୍ତାହ ଲାଗିଥାଏ କାଶ ଠିକ୍ ହେବା ପାଇଁ । ସଂକ୍ରମଣର ଲକ୍ଷଣ ଅନୁସାରେ ଚିକିତ୍ସା କରାଯାଇଥାଏ । କିନ୍ତୁ ଡାକ୍ତରଙ୍କ ବିନା ଅନୁମତିରେ ଆଣ୍ଟିବାୟୋଟିକ୍ ଖାଇବା ଅନୁଚିତ୍ ।
କେମିତି ବର୍ତ୍ତିବେ ଭାଇରସ୍ କବଳରୁ
ସଂକ୍ରମିତ ଲୋକଙ୍କ ଠାରୁ ଦୂରତା ବଜାୟ ରଖନ୍ତୁ । ବାହାରକୁ ବାହାରିଲେ ମାସ୍କ ବ୍ୟବହାର କରନ୍ତୁ । ଯଥାସମ୍ଭବ ପାଣି ପିଅନ୍ତୁ ଏବଂ ହାତ ସାନିଟାଇଜ କରନ୍ତୁ ।
ଅରୁଣାଚଳ ପ୍ରଦେଶରେ ସେନା ହେଲିକପ୍ଟର କ୍ରାସ, ପାଇଲଟଙ୍କ ତଲାସ ଜାରି
ନୂଆଦିଲ୍ଲୀ: ଅରୁଣାଚଳ ପ୍ରଦେଶରେ ସେନା ଚିତା ହେଲିକପ୍ଟର କ୍ରାସ୍ । ଦିରାଙ୍ଗ ବମଦିଲ୍ଲାଟାଉନଠାରେ ହେଲିକପ୍ଟର କ୍ରାସ୍ । ମଣ୍ଡଲା ପର୍ବତ ଆଖପାଖରେ ହେଲିକପ୍ଟର ଦୁର୍ଘଟଣାଗ୍ରସ୍ତ ହୋଇଥିବା ବେଳେ ପାଇଲଟଙ୍କୁ ଖୋଜିବାକୁ ସର୍ଚ୍ଚ ଅପରେସନ ଜାରି ରହିଛି ।
ସୂଚନା ଅନୁଯାୟୀ, ସକାଳ ପ୍ରାୟ ୯ ଟା ୧୫ମି.ରେ ଏଟିସି ସହ ଏହି ସେନା ହେଲିକପ୍ଟରର ସମ୍ପର୍କ ଛିନ୍ନ ହୋଇଥିଲା ।
Indian Army Cheetah helicopter has crashed near Mandala hills area of Arunachal Pradesh. Search operation for the pilots has started. More details awaited: Army sources pic.twitter.com/fqD0uu767w
— ANI (@ANI) March 16, 2023