ନୂଆଦିଲ୍ଲୀ: ରାହୁଲ ଗାନ୍ଧୀଙ୍କ ସଦସ୍ୟତା ପଦ ରଦ୍ଦ ପରେ ଲୋକସଭା ବାଚସ୍ପତି ଓମ ବିର୍ଲାଙ୍କ ବିରୋଧରେ ଅନାସ୍ତା ପ୍ରସ୍ତାବ ଆଣିବେ ବିରୋଧୀ । ଆସନ୍ତା ସୋମବାର ବିରୋଧୀ ଦଳ ଏକାଠି ହୋଇ ଅନାସ୍ତା ପ୍ରସ୍ତାବ ଆଣିବେ । ରାହୁଲଙ୍କ ସଦସ୍ୟତା ରଦ୍ଦ କରି ଲୋକସଭା ବାଚସ୍ପତି ଓମ ବିର୍ଲା ଗଣତନ୍ତ୍ରକୁ ହତ୍ୟା କରିଛନ୍ତି । କଂଗ୍ରେସ ପକ୍ଷରୁ ଏଭଳି ଅଭିଯୋଗ କରାଯାଇଛି ।
କଂଗ୍ରେସ ଅନ୍ୟ ବିରୋଧୀ ଦଳଙ୍କ ସହ ଆଲୋଚନା କରୁଛି । ଅନାସ୍ତା ପ୍ରସ୍ତାବ ପାଇଁ ୫୦ ଜଣ ସଦସ୍ୟଙ୍କ ସମର୍ଥନ ରହିବା ନିହାତି ଆବଶ୍ୟକ । ସଂସଦରେ ଏବେ ହଟ୍ଟଗୋଳ ସ୍ଥିତି ଜାରି ରହିଥିବା ବେଳେ ଅନାସ୍ତା ପ୍ରସ୍ତାବ ଆଣିବା ଉପରେ ପ୍ରଶ୍ନ ଉଠାଇଛି ବିଜେପି ।
କେନ୍ଦୁଝର: ଜିଲ୍ଲାସାରା ମହାବଳ ବାଘ ଆତଙ୍କ । ଘଟଗାଁ ରେଞ୍ଜ ଅଟେଇ ସଂରକ୍ଷିତ ଜଙ୍ଗଲରେ ଟ୍ରାପ୍ କ୍ୟାମେରା ରେ ପ୍ରଥମେ ମହାବଳ ବାଘ ଠାବ ହେବା ଓ ପରେ ଗତ ଶୁକ୍ରବାର ବଡ଼ଜାମପଶିରେ ମହାବଳ ବାଘ ୪ଟି ମଇଁଷି ମାରି ଖାଇବା ପରେ ସ୍ଥାନୀୟ ଲୋକଙ୍କ ମନରେ କୋକୁଆ ଭୟ ସୃଷ୍ଟି ହୋଇଛି । ଗତକାଲି ରାତିରେ ଟିକିରା ଗାଁର ନାରାୟଣ ରାଉତ ବଳଦ ଖୋଜି ଯାଉଥିବା ବେଳେ ଗାଁ ନିକଟରେ ଏକ ବାଘ ଦେଖିଥିଲେ । କେବଳ ସେ ନୁହେଁ, ଗାଁର ଅନ୍ୟ ୨ ଜଣ ଲୋକ ମଧ୍ୟ ବାଘ ଦେଖିଥିଲେ ।
ପରେ ଅନ୍ୟ ଲୋକମାନେ ବାଘର ପାଦ ଚିହ୍ନ ଦେଖିଥିଲେ । ଏହା ପ୍ରଚାର ହେବା ପରେ ଘଟଗାଁ ରେଞ୍ଜର ଆଜି ଘଟଣାସ୍ଥଳ ପରିଦର୍ଶନ କରି ନାରାୟଣ ଓ ଗାଁର ଅନ୍ୟମାନଙ୍କ ସହିତ ବାଘ ସମ୍ପର୍କରେ ଆଲୋଚନା କରିଥିଲେ । ଏହାପରେ ସେ ଏହା ବାଘ ନୁହେଁ, ବରଂ ହେଟାବାଘ ବୋଲି କହିଥିଲେ । ଅଟେଇ ଜଙ୍ଗଲରେ ମହାବଳ ବାଘଥିବା କଥା ପ୍ରଚାର ହେବା ପରେ ଲୋକେ ଭୟଭୀତ ହୋଇ ପଡ଼ିଛନ୍ତି । ହେଲେ, ମହାବଳ ବାଘ ଜଙ୍ଗଲ ଛାଡ଼ି ବାହାରକୁ ଆସିବାର ସମ୍ଭାବନା ନଥିବା ବେଳେ, ଲୋକଙ୍କର ଭୟଭୀତ ହେବାର କୋୖଣସି କାରଣ ନଥିବା ସେ କହିଛନ୍ତି ।
ନୂଆଦିଲ୍ଲୀ: ଦୀର୍ଘ ୧୮ ବର୍ଷର ସଂଗ୍ରାମ ପରେ ଡ୍ରାଇଭିଂ ଲାଇସେନ୍ସ ପାଇଲେ ୬୯ ବର୍ଷୀୟ ମହିଳା। ଦକ୍ଷିଣା କୋରିଆର ଜିୟୋଞ୍ଜୁ ସହରର ବାସିନ୍ଦା ହେଉଛନ୍ତି ଚା ସା-ସୁନ୍। ସେ ୯୬୦ ଥର ଡ୍ରାଇଭିଂ ଟେଷ୍ଟ ଦେଇଥିଲେ । ପ୍ରାୟ ୩ ବର୍ଷ ମଧ୍ୟରେ ସପ୍ତାହକୁ ୫ ଥର ଟେଷ୍ଟ ଦେଇଥିଲେ। ସେ ନିଜର ପ୍ରଥମ ଟେଷ୍ଟ ୨୦୦୫ ମସିହାରେ ଦେଇଥିଲେ ।
ରିପୋର୍ଟ ଅନୁସାରେ ପରବର୍ତ୍ତୀ ସମୟରେ ସେ ସପ୍ତାହକୁ ଦୁଇ ଥର ଲିଖିତ ଟେଷ୍ଟ ଦେବା ଆରମ୍ଭ କରିଥିଲେ। ଏଥିରେ ପାସ୍ ହେବାପରେ ସେ ପ୍ରାଟିକାଲ୍ ଟେଷ୍ଟ ଦେଇଥିଲେ। ପାଖାପାଖି ୧୦ ଥର ପ୍ରୟାସ କରିବା ପରେ ସେ ଡ୍ରାଇଭିଂ ଲାଇସେନ୍ସ ପାଇଥିଲେ । ଯାହାକୁ ମିଶାଇ ସେ ୯୬୦ ଥର ପରୀକ୍ଷା ଦେଇଥିଲେ ।
ରିପୋର୍ଟ ଅନୁସାରେ ସା-ସୁନ୍ ଏଥିପାଇଁ ପାଖାପାଖି ୧୧ ଲକ୍ଷ ଟଙ୍କା ଖର୍ଚ୍ଚ କରିଛନ୍ତି। ସେ ପନିପରିବା ବିକି ପରିବାର ପ୍ରତିପୋଷଣ କରୁଥିବା ବେଳେ ଗାଡ଼ି ଚଳାଇବା ତାଙ୍କ ପାଇଁ ନିହାତି ଜରୁରୀ ଥିଲା। ଏଥିପାଇଁ ବାରମ୍ବାର ବିଫଳ ହେବା ସତ୍ୱେ ସେ କେବେ ହାର ମାନିନଥିଲେ ସେ। ଏନେଇ ତାଙ୍କ ଡ୍ରାଇଭିଂ ଇନଷ୍ଟ୍ରକ୍ଟର କହିଛନ୍ତି, ତାଙ୍କୁ ଲାଇସେନ୍ସ ମିଳିବା ପରେ ବହୁତ ଖୁସି ଲାଗୁଛି ।
ଏହି ଖବର ଭାଇରାଲ୍ ହେବା ପରେ ସେ ସେଲିବ୍ରିଟି ପାଲଟିଯାଇଛନ୍ତି । ଏମିତିକି କାର୍ କମ୍ପାନୀ ହୁଣ୍ଡାଇ ପକ୍ଷରୁ ତାଙ୍କୁ ୧୧ ଲକ୍ଷ ଟଙ୍କାର ଏକ କାର୍ ମଧ୍ୟ ଗିଫ୍ଟ କରାଯାଇଛି । ସେ ଦକ୍ଷିଣ କୋରିଆ କମ୍ପାନୀ ‘ହୁଣ୍ଡାଇ’ର ଏକ ବିଜ୍ଞାପନରେ ନଜର ଆସିଛନ୍ତି ।
ଭୁବନେଶ୍ୱର: ଅକ୍ଷୟ ପରିଜା ପ୍ରଡ଼କସନ ହାଉସ ବିରୋଧରେ ପାରିଶ୍ରମିକ ନଦେବା ଅଭିଯୋଗ ଘଟଣା । ପ୍ରତିକ୍ରିୟା ରଖିଛନ୍ତି ପ୍ରଯୋଜକ ଅକ୍ଷୟ ପରିଜା । ଅକ୍ଷୟ କହିଛନ୍ତି, ସେ ଏବେ ବିଦେଶରେ ଅଛନ୍ତି । କିଛି କଳାକାର ତାଙ୍କ ବିରୋଧରେ ଟଙ୍କା ଦେଇନଥିବା ଅଭିଯୋଗ କରିଛନ୍ତି । ତାଙ୍କର ଗୋଟିଏ ବ୍ୟାଙ୍କ ଆକାଉଣ୍ଟ ଟେକନିକାଲ ସମସ୍ୟା ଯୋଗୁ ଫ୍ରିଜ ହୋଇଯାଇଥିଲା । ତାହା ଆଜି କ୍ଳିୟର ହୋଇଛି ।
ଅକ୍ଷୟ ପରିଜା କହିଛନ୍ତି ମୁଁ ଜାତୀୟ ଚ୍ୟାନେଲ ସହିତ କାମ କରୁଛି । ସଂପୃକ୍ତ ଚ୍ୟାନେଲ ଠାରୁ ଦେଢ କୋଟି ଟଙ୍କା ପାଇବାର ଅଛି। ୨୬ ଲକ୍ଷ ଟଙ୍କା କଳକାରଙ୍କୁ ଦେବାର ଅଛି । କାହାରି ଟଙ୍କା ରଖିବାର ଅଭିପ୍ରାୟ ନାହିଁ ବୋଲି ଅକ୍ଷୟ ପ୍ରତିକ୍ରିୟା ଦେଇଛନ୍ତି । କଳାକାରଙ୍କୁ ପାରିଶ୍ରମିକ ମିଳିନଥିବା ଅଭିଯୋଗରେ ଆଜି ଭୁବନେଶ୍ବର କଣ୍ଟାବାଡ଼ରେ ଅକ୍ଷୟ ପରିଜା ପ୍ରଡକ୍ସନ କାର୍ଯ୍ୟାଳୟ ସାମ୍ନାରେ କଳାକାର, ଟେକନିସିଆନ ଧାରଣା ଦେଇଥିଲେ । ଶାନ୍ତି ସିରିଏଲରେ କାମ କରୁଥିବା କଳାକାର ଗତ ୪ ମାସ ହେଲା ପାରିଶ୍ରମିକ ପାଇନଥିବା ଅଭିଯୋଗ ହୋଇଥିଲା ।
ଢେଙ୍କାନାଳ: ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ନିଆରା ପ୍ରତିବାଦ । ନୃତ୍ୟ ଓ ଗୀତ ଗାଇ ଅଭିଯୋଗ ଜଣାଉଛନ୍ତି ଆଦିବାସୀ । ଆରଆଇ ମାନଙ୍କ ମିଛ ରିପୋର୍ଟ ପାଇଁ ବର୍ଷ ବର୍ଷ ଧରି ହଇରାଣ ହେଉଛନ୍ତି ଶବର ଜନଜାତି । ଯେଉଁଥି ପାଇଁ ନିଜ ହକ ପାଇଁ ଆଜି ଶତାଧିକ ଶବର ଢେଙ୍କାନାଳ ଜିଲ୍ଲାପାଳଙ୍କ କାର୍ଯ୍ୟାଳୟ ଆଗରେ ଆଦିବାସୀ ନୃତ୍ୟ କରି ଗିତ ଗାଇ ନିଆରା ଢଙ୍ଗରେ ପ୍ରତିବାଦ କରୁଛନ୍ତି ।
ସହରର ବାଜିଚୌକ ଛକ ନିକଟରୁ ଏକ ବିଶାଳ ଶୋଭାଯାତ୍ରାରେ ଯାଇ ଜିଲ୍ଲାପାଳଙ୍କ କାର୍ଯାଳୟ ପର୍ଯ୍ୟନ୍ତ ଆସି ଧାରଣାରେ ବସିଛନ୍ତି ସମସ୍ତେ । ଜମି ପଟ୍ଟାରେ ଶବର ବଦଳରେ ସଅର କିଭଳି ଲେଖାହେଲା ବୋଲି ପ୍ରଶ୍ନ କରିଛନ୍ତି । ପ୍ରଶାସନିକ ସ୍ତରରେ ଏଭଳି ତ୍ରୁଟିକୁ ନେଇ ପ୍ରଶ୍ନ କରିଛନ୍ତି ଏହି ଆଦିବାସୀ ସମ୍ପ୍ରଦାୟ ।
କୋରାପୁଟ: ମାଟି ଅତଡ଼ା ଖସି ଦୁଇ ମହିଳାଙ୍କର ମୃତ୍ୟୁ । କୋରାପୁଟ ଜିଲ୍ଲା ନନ୍ଦପୁର ଥାନା ହିକମପୁଟ ନିକଟରେ ଅଭାବନୀୟ ଘଟଣା । ମୃତକ ହେଲେ ଗାଗଡ଼ାପଣ୍ଡି ଗାଁର ଦୈମତ କନ୍ତ୍ରୀ ଓ ଶୋଷି ହନ୍ତାଳ । ମାରଡ଼ା ନଦୀରୁ ମାଟି କାଢିବାବେଳେ ମାଟିରେ ପୋତି ହୋଇ ୨ଜଣଙ୍କର ମୃତ୍ୟୁ ହୋଇଛି । ଅନ୍ୟ ଦୁଇଜଣ ଗୁରୁତରଙ୍କୁ କୋରାପୁଟ ସହିଦ ଲକ୍ଷ୍ମଣ ନାୟକ ମେଡିକାଲ କଲେଜକୁ ସ୍ଥାନାନ୍ତର କରାଯାଇଛି ।
ପୁରୀ: ରେଳ ଷ୍ଟେସନ ନିକଟରେ ଅଘଟଣ । ପୁରୀ-ଗୁଣପୁର ଟ୍ରେନ ପଛକୁ ଫେରିବା ବେଳେ ପଛ ଲାଇନଚ୍ୟୁତ ଘଟିଛି ବଗି । ବଗିରେ କୌଣସି ଯାତ୍ରୀ ନଥିଲେ, ତେଣୁ ଦୁର୍ଘଟଣାରେ କେହି ମୃତାହତ ହୋଇନଥିବା ସୂଚନା ମିଳିଛି । ସେପଟେ ବଗିଟି ଲାଇନଚ୍ୟୁତ ଘଟି ଷ୍ଟେସନ ନିକଟରେ ରହିଛି । ସେପଟେ ଘଟଣା ବିଷୟରେ ଖବର ପାଇ ରେଳ ଅଧିକାରୀ ଦୁର୍ଘଟଣାସ୍ଥଳରେ ପହଁଚିଛନ୍ତି ।
କାହିଁକି ଓ କେଉଁ କାରଣରୁ ଦୁର୍ଘଟଣା ଘଟିଲା ସେ ବିଷୟରେ ଅନୁଧ୍ୟାନ କରୁଛନ୍ତି ଅଧିକାରୀ । ଏନେଇ ମଧ୍ୟ ଏକ ଟିମ୍ ତଦନ୍ତ କରିବ ବୋଲି ସୂଚନା ମିଳିଛି । ଯେଉଁଥିରେ କାହିଁକି ଓ କେଉଁ କାରଣରୁ ବଗି ଲାଇନଚ୍ୟୁତ ଘଟିଲା ସ୍ପଷ୍ଟ ହେବ । ସେପଟେ ଯଦି ବଗିରେ ଯାତ୍ରୀ ରହିଥାଆନ୍ତେ, ତେବେ ବଡ଼ ଧରଣର ଅଘଟଣ ଘଟିଥାନ୍ତା ନିଶ୍ଚୟ ।
ନୂଆଦିଲ୍ଲୀ: ସାଧାରଣ ଲୋକଙ୍କୁ ବଡ଼ ଆଶ୍ୱସ୍ତି । ପାନ୍-ଆଧାର ଲିଙ୍କ୍ ଅବଧିକୁ ଆଗକୁ ବଢ଼ାଇବା ପାଇଁ ନିଷ୍ପତ୍ତି ନେଇଛନ୍ତି କେନ୍ଦ୍ର ସରକାର । ଏବେ ପାନ୍ କାର୍ଡକୁ ଆଧାର କାର୍ଡ ସହ ଲିଙ୍କ କରିବାର ଶେଷ ତାରିଖ ୩୦ ଜୁନ ୨୦୨୩ କୁ ବୃଦ୍ଧି କରିଦିଆଯାଇଛି । ପୂର୍ବରୁ ଏହି ଅବଧି ୩୧ ମାର୍ଚ୍ଚ ୨୦୨୩ ଥିଲା । କରଦାତା ଏବେ ୩୦ ଜୁନ ପର୍ଯ୍ୟନ୍ତ ଜରିମାନା ଦେଇ ନିଜ ପାନ୍ କାର୍ଡ, ଆଧାର କାର୍ଡ ସହ ଲିଙ୍କ କରିପାରିବେ ।
ଆଜି ସିବିଡିଟି ପକ୍ଷରୁ ଜାରି ପ୍ରେସ ବିଜ୍ଞପ୍ତିରେ କୁହାଯାଇଛି ଯେ ଟିକସଦାତାଙ୍କୁ ଆହୁରି ଆଶ୍ୱସ୍ତି ଦେବା ପାଇଁ ପାନ୍ କାର୍ଡ ଏବଂ ଆଧାର କାର୍ଡ ଲିଙ୍କ କରିବାର ଶେଷ ତାରିଖକୁ ୩୦ ଜୁନ ୨୦୨୩ କୁ ବୃଦ୍ଧି କରାଯାଇଛି । ଏହା ପଞ୍ଚମ ଥର ଅଟେ ଯେ ସିବିଡିଟି ପାନ୍ କାର୍ଡକୁ ଆଧାର କାର୍ଡ ସହ ଲିଙ୍କ କରିବାର ଶେଷ ତାରିଖରେ ପରିବର୍ତ୍ତନ କରିଛି । ଯଦି କରଦାତା ୩୦ ଜୁନ ୨୦୨୩ ସୁଦ୍ଧା ନିଜ ପାନ୍ ଏବଂ ଆଧାରକୁ ଲିଙ୍କ କରିବାରେ ଅସଫଳ ରୁହନ୍ତି ତେବେ ତାଙ୍କ ପାନ କାର୍ଡ ନିଷ୍କ୍ରିୟ ହୋଇଯିବ । ଅର୍ଥାତ ଆପଣ ଇନକମ୍ ଟ୍ୟାକ୍ସ ରିଟର୍ଣ୍ଣସ ଫାଇଲ କରିପାରିବେନି ।
ଏଥିସହିତ ଆପଣ ଅନେକ ବ୍ୟାଙ୍କିଂ ସର୍ଭିସେଜ ପରଫର୍ମ ବା ଷ୍ଟକ୍ ମାର୍କେଟ ଟ୍ରାଞ୍ଜାକ୍ସନ କରିପାରିବେନାହିଁ । ଯଦି ଆପଣ ଜାଣିବାକୁ ଚାହୁଁଛନ୍ତି ଆପଣଙ୍କ ପାନ୍ ସହ ଆଧାର ଲିଙ୍କ ହୋଇଛି କି ନାହିଁ ତେବେ ଇନକମ୍ ଟ୍ୟାକ୍ସ ଇ-ଫାଇଲିଙ୍ଗ ପେଜକୁ ଭିଜିଟ କରନ୍ତୁ । ଏହାପରେ ପାନ୍ ଲିଙ୍କ ଅପ୍ସନରେ କ୍ଲିକ କରନ୍ତୁ । ୧୦ ଟିକିଆ ପାନ୍ ଏବଂ ୧୨ ଟିକିଆ ଆଧାର ନମ୍ବର ଭରନ୍ତୁ । ସୂଚନା ସଠିକ୍ ଭରିବା ପରେ ନୀଳ ରଙ୍ଗରେ ଭ୍ୟୁ ଲିଙ୍କ ଆଧାର ଷ୍ଟାଟସ୍ ଉପରେ କ୍ଲିକ କରନ୍ତୁ । ଯଦି ଆପଣଙ୍କର ଆଗରୁ ଲିଙ୍କ ହୋଇଥିବ ତେବେ ଏଥିରେ ଲିଙ୍କ୍ ହୋଇଯାଇଛି ବୋଲି ଲେଖିବ ଯଦି କରିନଥିବେ ତେବେ ପ୍ରୋସେସ ଅନୁଯାୟୀ ଆବଶ୍ୟକୀୟ ସୂଚନା ଭରି ଲିଙ୍କ୍ କରିପାରିବେ ।
ମାଲକାନଗିରି: ଫାଇଭ-ଟି ସଚିବ ଭିକେ ପାଣ୍ଡିଆନ ମାଲକାନଗିରି ଗସ୍ତରେ ଅଛନ୍ତି । ମାଥିଲିରେ ପହଞ୍ଚିବା ପରେ ଶିବସାଗର ଯାଇ ଉନ୍ନତିକରଣ ସମୀକ୍ଷା କରିଛନ୍ତି 5T ସଚିବ । ପରେ ପ୍ରସ୍ତାବିତ ରେଳ ଲାଇନ ଓ ସପ୍ତଧରା ଜଳସେଚନ ପ୍ରକଳ୍ପର ଅଗ୍ରଗତି ସମ୍ପର୍କରେ ଅନୁଧ୍ୟାନ କରିଛନ୍ତି । ଏହାପରେ ଲୋକଙ୍କ ସହିତ ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରିଛନ୍ତି ।
ଆଉ କିଛି ସମୟ ପରେ ସୀତାକୁଣ୍ଡରେ ପହଞ୍ଚି ବଣ୍ଡା ହିଲ୍ସର ଉନ୍ନତିକରଣର ସମୀକ୍ଷା କରିବେ ପାଣ୍ଡିଆନ । ପରେ ହନ୍ତଳଗୁଡ଼ା ଭିୟୁ ପଏଣ୍ଟର ନିର୍ମାଣ ଅନୁଧ୍ୟାନ କରି ଲୋକଙ୍କ ସହ ଆଲୋଚନା କରିବେ । ଏହାପରେ ବିଏସଏଫ କ୍ୟାମ୍ପ ଏବଂ ବଡ଼ପଦାରେ ସ୍କୁଲକୁ ଯିବାର କାର୍ଯ୍ୟକ୍ରମ ରହିଛି । ଆସନ୍ତାକାଲି ମଧ୍ୟ ଫାଇଭ-ଟି ସଚିବ ଅନ୍ୟାନ୍ୟ ଉନ୍ନୟନମୂଳକ ପ୍ରକଳ୍ପର ଅନୁଧ୍ୟାନ କରିବେ ।
ଭୁବନେଶ୍ୱର: ପୁଣି ମୋ ବସରୁ ଲୁଟ୍ । ୫୦ ହଜାର ଟଙ୍କା ଲୁଟ୍ । ଲୁଟର ଶିକାର ହୋଇଛନ୍ତି ବାଙ୍କୀ ଅଞ୍ଚଳର ରାଜକିଶୋର ଜେନା । ମୋ ବସ୍ ଭିତରୁ ତାଙ୍କର ୫୦ ହଜାର ଟଙ୍କା ଲୁଟ ହୋଇଥିବା ଅଭିଯୋଗ ହୋଇଛି । ବାହାଘର ପାଇଁ ଲୁଗାପଟା କିଣିବାକୁ ଭୁବନେଶ୍ବର ଆସିବା ବେଳେ ରାଜକିଶୋର ଲୁଟର ଶିକାର ହୋଇଛନ୍ତି । ବାଙ୍କୀ ଥାନା ବିଲୁପଡା ବଡ଼ ପଦନପୂରର ରାଜକିଶୋର ଜେନା ସପରିବାର ଭୁବନେଶ୍ବର ଆସିବା ପାଇଁ ତ୍ରିଶୂଳିଆରୁ ୧୮ ନମ୍ବର ବସରେ ବସିଥିଲେ । ଚନ୍ଦ୍ରଶେଖରପୁର ଅଞ୍ଚଳରେ ତାଙ୍କର ୫୦ ହଜାର ଟଙ୍କା ଚୋରି ହୋଇଥିବା ଜାଣିବାକୁ ପାଇଥିଲେ ରାଜକିଶୋର । ବସ୍ କର୍ମଚାରୀ ବସ ଅଟକାଇ ଯାଞ୍ଚ କଲା ବେଳକୁ ଲୁଟେରାର ପତ୍ତା ମିଳିନଥିଲା । ରାଜକିଶୋର ଏନେଇ ଚନ୍ଦ୍ରଶେଖରପୁର ଥାନାର ଦ୍ବାରସ୍ଥ ହୋଇଛନ୍ତି ।
