ଭଦ୍ରକ: ପ୍ରାୟ ଦେଢ଼ ମାସ ହେଲା ମିଳୁନି ଝିଅର ପତ୍ତା । ଥାନାରୁ ନିରାଶ ହେବାପରେ ଏସପିଙ୍କ ଦ୍ବାରସ୍ଥ ହେଲେ ପରିବାର ଲୋକ । ଭଦ୍ରକ ଜିଲ୍ଲା ଧାମନଗର ଥାନା ଗୋପାଳପୁରର ଗୋବିନ୍ଦ ସୁତାରଙ୍କ ନାବାଳିକା ଝିଅ ଗତ ମାର୍ଚ୍ଚ ମାସ ୨୫ ତାରିଖରୁ ନିଖୋଜ ଅଛନ୍ତି । କଲେଜକୁ ପାଠ ପଢ଼ିବାକୁ ଯାଇ ଫେରିନାହାନ୍ତି ।
ଜଳମଣ୍ଡୁଆ ଗାଁର ଜଣେ ଯୁବକ ନାବାଳିକାଙ୍କୁ ଅପହରଣ କରିଥିବା ନେଇ ଥାନାରେ ଅଭିଯୋଗ କରିଥିଲେ ବାପା । ପୋଲିସ ଏତଲା ଗ୍ରହଣ କରି କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରୁନଥିବା ଅଭିଯୋଗ ହୋଇଛି । ଏନେଇ ଏସପିଙ୍କୁ ଫେରାଦ ହୋଇ ଅଭିଯୋଗ ଜଣାଇଛନ୍ତି ପରିବାର ଲୋକ ।
ଭୁବନେଶ୍ୱର: ଏସିଆନ ୟୁଥ ଆଥଲେଟିକ୍ସ ଚାମ୍ପିୟନସିପରେ ଜଲଓ୍ବା ଦେଖାଇବା ପରେ ଓଡ଼ିଶା ଫେରିଛନ୍ତି ବାପି ହାଂସଦା ଓ ରିୟାନ । ଭୁବନେଶ୍ବର ବିମାନ ବନ୍ଦରରେ ଉଭୟଙ୍କୁ ସ୍ବାଗତ କରାଯାଇଛି । ଉଜବେକିସ୍ତାନର ତାସକେଣ୍ଟରେ ଖେଳାଯାଇଥିବା ପଞ୍ଚମ ଯୁବ ଏସିୟ ଦୌଡ଼କୁଦ ୪୦୦ ମିଟର ହର୍ଡଲ୍ସରେ ରୌପ୍ୟ ପଦକ ଜିତିଛନ୍ତି ବାପି । ୫୧.୩୮ ସେକେଣ୍ଡରେ ଦୂରତା ଅତିକ୍ରମ କରିଥିଲେ । ସେହିଭଳି ରିୟାନ ରିଲେରେ ମଧ୍ୟ ରୌପ୍ୟ ପଦକ ହାସଲ କରିଛନ୍ତି ।
ନବରଙ୍ଗପୁର: ନବରଙ୍ଗପୁର ଜିଲ୍ଲା ଉମରକୋଟ ପୋଲିସକୁ ବଡ଼ ସଫଳତା । ଲୁଟ୍ ମାମଲାରେ ତିନି ଜଣଙ୍କୁ ଗିରଫ କରିଛି ପୋଲିସ । ସେମାନଙ୍କ ନିକଟରୁ ୧ ଲକ୍ଷ ୮୪ ହଜାର ଟଙ୍କା ସହ ଗୋଟିଏ ମୋବାଇଲ ଫୋନ୍ ଜବତ ହୋଇଛି । ୨ ଲକ୍ଷରୁ ଅଧିକ ଟଙ୍କା ଧରି ଘରକୁ ଫେରିବାବେଳେ ନିଧନ ଗୌଡ଼ଙ୍କ ଠାରୁ ଲୁଟ୍ ହୋଇଥିଲା ଟଙ୍କା । ଜାମପାଣି ଗାଁର ପଦ୍ମନ୍ ଗୌଡ଼, କେଶବ ଗୌଡ଼ ଓ ଜଗନ୍ନାଥ ଗୌଡ ତାଙ୍କୁ ଆକ୍ରମଣ କରି ଟଙ୍କା ଲୁଟିନେଇଥିଲେ । ଏନେଇ ଉମରକୋଟ ଥାନାରେ ଅଭିଯୋଗ ପରେ ତଦନ୍ତ କରି ତିନି ଅଭିଯୁକ୍ତଙ୍କୁ କୋରାପୁଟ ଜିଲ୍ଲାରୁ ଗିରଫ କରିଛି ପୋଲିସ ।
ବେଙ୍ଗାଲୁରୁ: ସିଏମ ଚେହେରା ଟପରେ କଂଗ୍ରେସ, ଭ୍ରଷ୍ଟାଚାରରେ ଟପରେ ବିଜେପି । ନିର୍ବାଚନ ୭ ଦିନ ପୂର୍ବରୁ ସର୍ଭେରେ ମତ ଦେଇଛନ୍ତି କର୍ଣ୍ଣାଟକ ଭୋଟର । ଜାତୀୟ ଗଣମାଧ୍ୟମ ପକ୍ଷରୁ କରାଯାଇଥିବା ସର୍ଭେରେ ବିଜେପିକୁ ଦୁର୍ନୀତିଗ୍ରସ୍ତ କହିଛନ୍ତି ଜନତା । ୨୦୨୪ ସାଧାରଣ ନିର୍ବାଚନ ପୂର୍ବରୁ କର୍ଣ୍ଣାଟକରେ ସେମି ଫାଇନାଲ । ୨୪ରେ କ’ଣ ରହିବ ରାଜନୈତିକ ପାଣିପାଗ ତାହା କର୍ଣ୍ଣାଟକ ରେଜଲ୍ଟ ଉପରେ ନିର୍ଭର କରେ । କାହା ସପକ୍ଷରେ ଯିବ ଜନମତ ? କାହାକୁ ଭରସା କରିବେ ଭୋଟର ? ବିଜେପି ନା କଂଗ୍ରେସକୁ କ୍ଷମତା ଭେଟିଦେବେ କର୍ଣ୍ଣାଟକ ଜନତା ? ତା’ ଉପରେ ପୂରା ଦେଶର ନଜର ରହିଥିବା ବେଳେ ମୁଖ୍ୟମନ୍ତ୍ରୀ ଫେସ୍ ବିନା ହିଁ ଉଭୟ ବିଜେପି ଓ କଂଗ୍ରେସ ମୈଦାନରେ ବଳ କସୁଛନ୍ତି । ସେପଟେ କର୍ଣ୍ଣାଟକର ସମ୍ଭାବ୍ୟ ସିଏମ ପ୍ରାର୍ଥୀଙ୍କୁ ନେଇ ଜାତୀୟ ଗଣମାଧ୍ୟମ କରିଥିବା ଏକ ରିପୋର୍ଟରେ ସିଦ୍ଧରମୈୟା ଟପରେ ରହିଛନ୍ତି ।
ସିଏମ ଫେସ୍ ପାଇଁ ଲୋକପ୍ରିୟ ହେଉଛନ୍ତି କଂଗ୍ରେସର ପ୍ରାର୍ଥୀ ତଥା ପୂର୍ବତନ ମୁଖ୍ୟମନ୍ତ୍ରୀ ସିଦ୍ଧରମୈୟା । କର୍ଣ୍ଣାଟକର ୪୦ ପ୍ରତିଶତ ଲୋକ ସିଦ୍ଧରମୈୟାଙ୍କୁ ମୁଖ୍ୟମନ୍ତ୍ରୀ ଭାବେ ଦେଖିବାକୁ ଚାହୁଁଥିବା କହିଛନ୍ତି । ବିଜେପି ପ୍ରାର୍ଥୀ ତଥା ବର୍ତ୍ତମାନର ମୁଖ୍ୟମନ୍ତ୍ରୀ ବାସବରାଜ ବୋମାଇ ଜନତାଙ୍କ ଦ୍ବିତୀୟ ପସନ୍ଦ ହୋଇଥିବା ବେଳେ ତାଙ୍କୁ ୨୨ ପ୍ରତିଶତ ଲୋକଙ୍କ ସମ୍ମତି ମିଳିଛି । ସେହିପରି ଜେଡିଏସର ଏଚ ଡି କୁମାରସ୍ବାମୀଙ୍କୁ ୧୫ ପ୍ରତିଶତ, ପିସିସି ସଭାପତି ଡି କେ ଶିବକୁମାରଙ୍କୁ ୪ ପ୍ରତିଶତ, ପୂର୍ବତନ ମୁଖ୍ୟମନ୍ତ୍ରୀ ବିଏସ ୟେଦ୍ୟୁରପ୍ପାଙ୍କୁ ୫ ପ୍ରତିଶତ ଲୋକଙ୍କ ସପୋର୍ଟ ମିଳିଛି । ଏହାଛଡ଼ା ୧୨ ପ୍ରତିଶତ ଜନତା ଅନ୍ୟାନ୍ୟ ବୋଲି ମତ ଦେଇଛନ୍ତି । ବୟସ୍କ ଭୋଟର ସିଦ୍ଧରମୈୟାଙ୍କୁ ପସନ୍ଦ କରୁଥିବା ବେଳେ ଯୁବଗୋଷ୍ଠୀ ବୋମ୍ମାଇଙ୍କୁ ସମର୍ଥନ ଦେଇଛନ୍ତି । ସର୍ଭେରେ ଜନତାଙ୍କୁ ଦଳ ଓ ପ୍ରାର୍ଥୀଙ୍କ ସମ୍ପର୍କରେ ପଚରା ଯାଇଥିବା ବେଳେ ୫୬ ପ୍ରତିଶତ ଲୋକ ଦଳକୁ ଦେଖି ଭୋଟ ଦେଉଥିବା କହିଥିଲେ । ୩୮ ପ୍ରତିଶତ ଲୋକ ପ୍ରାର୍ଥୀ ଦେଖି ମତଦାନ କରୁଥିବା କହିଥିଲେ । ସର୍ଭେରେ ଭ୍ରଷ୍ଟାଚାର, ପରିବାରବାଦ ଓ ବିକାଶକୁ ନେଇ ପ୍ରଶ୍ନ କରାଯାଇଥିବା ବେଳେ ୫୯ ପ୍ରତିଶତ ଲୋକ ବିଜେପିକୁ ସବୁଠୁ ଦୁର୍ନୀତିଗ୍ରସ୍ତ ଦଳ ବୋଲି ଉତ୍ତର ରଖିଛନ୍ତି ।
ପୁରୀ: ପୁରୀ ସମୁଦ୍ରରେ ବୁଡ଼ି ଦୁଇ ମୃତ। ଗାଧୋଉଥିବା ବେଳେ ସମୁଦ୍ରରେ ବୁଡିଗଲେ ତିନି ପର୍ଯ୍ୟଟକ। ଦୁଇ ଜଣଙ୍କର ମୃତ୍ୟୁ ହୋଇଥିବା ବେଳେ ଅନ୍ୟ ଜଣଙ୍କୁ ଗୁରୁତର ଅବସ୍ଥାରେ ଉଦ୍ଧାର କରାଯାଇଛି। ପର୍ଯ୍ୟଟକମାନେ ପଶ୍ଚିମବଙ୍ଗ ହାୱଡା ଅଞ୍ଚଳରୁ ଆସିଥିବା ଜଣାପଡ଼ିଛି।
ତେବେ ଗୁରୁତର ଯୁବକଙ୍କୁ ଅଗ୍ନିଶମ ଓ ଲାଇଫ ଗାର୍ଡ ଟିମ୍ ଉଦ୍ଧାର କରି ହସ୍ପିଟାଲରେ ଭର୍ତ୍ତି କରିଛନ୍ତି। ସମୁଦ୍ରର ୧୩ ନମ୍ବର ଜୋନ ଅଞ୍ଚଳରେ ଗାଧୋଉଥିବା ବେଳେ ଅଘଟଣ ଘଟିଥିବା ଜଣାପଡ଼ିଛି।
ଭୁବନେଶ୍ୱର: ଲଗାତର ଭାବେ ମେ ମାସରେ ବାତ୍ୟା ହେଉଛି। ତେବେ ମୁକାବିଲା ପାଇଁ ସରକାର ପ୍ରସ୍ତୁତ ଅଛନ୍ତି ବୋଲି କହିଛନ୍ତି ରାଜସ୍ବ ମନ୍ତ୍ରୀ ପ୍ରମିଳା ମଲ୍ଲିକ। ସତର୍କ ରହିବାକୁ ସମସ୍ତ ବିଭାଗକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ସମସ୍ତ ବିଭାଗ ସଜାଗ ଅଛି । ସମସ୍ତ ଜିଲ୍ଲପାଳଙ୍କୁ ଆଲର୍ଟ ରଖାଯାଉଛି ।
ବାତ୍ୟା ଆଶ୍ରୟସ୍ଥଳୀ ପ୍ରସ୍ତୁତ ରଖିବାକୁ ମୁଖ୍ୟମନ୍ତ୍ରୀ ନିର୍ଦ୍ଦେଶ ଦେଇଛନ୍ତି । ଜିଲ୍ଲାପାଳ ଅଫିସ ଓ ରାଜ୍ୟସ୍ତରରେ ୨୪ ଘଣ୍ଟିଆ କଣ୍ଟ୍ରୋଲ ରୁମ ଖୋଲାଯିବ ବୋଲି କହିଛନ୍ତି ରାଜସ୍ବ ମନ୍ତ୍ରୀ।
ନୂଆଦିଲ୍ଲୀ: ରେସଲର ଫେଡେରେସନ ସଭାପତିଙ୍କ ବିରୋଧରେ ଯୌନ ଶୋଷଣ ମାମଲା। ବନ୍ଦ ଲଫାପାରେ ପ୍ରମାଣ ମାଗିଲେ ସୁପ୍ରିମକୋର୍ଟ। ବନ୍ଦ ଲଫାପାରେ ପ୍ରମାଣ ଦାଖଲ କରିବାକୁ କହିଛନ୍ତି ସର୍ବୋଚ୍ଚ କୋର୍ଟ। ଧାରଣାସ୍ଥଳରେ ପହଞ୍ଚି କୁସ୍ତିଯୋଦ୍ଧାଙ୍କ ସହ ଆଲୋଚନା କରିଛନ୍ତି ଇଣ୍ଡିଆନ ଅଲିମ୍ପିକ ଆସୋସିଏସନ ସଭାପତି ତଥା ରାଜ୍ୟସଭା ସାଂସଦ ପିଟି ଉଷା।
ସେପଟେ କ୍ଷମତା ଓ ପଦରେ ରହିଥିବା ବ୍ୟକ୍ତିଙ୍କ ବିରୋଧରେ ଲଢ଼େଇ ଜାରି ରଖିବା କଷ୍ଟକର। ଯୌନ ଶୋଷଣ ଭଳି ସଂଗୀନ ମାମଲା, ପୋକସୋ ଆକ୍ଟ ଲାଗୁ ପରେ ବି ବିଜେପି ବାହୁବଳି ନେତା ବ୍ରିଜଭୂଷଣଙ୍କୁ ପଦରୁ ବିଦା ନକରାଯାଇ ପୀଡ଼ିତାଙ୍କୁ ନିରାଶ କରାଯାଉଛି। ଯୌନ ଶୋଷଣ ମାମଲାର ଅଭିଯୁକ୍ତ ବ୍ରିଜଭୂଷଣ ବିରୋଧରେ କାର୍ଯ୍ୟାନୁଷ୍ଠାନ ନିଆନଯିବାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି ଧାରଣାରତ କୁସ୍ତିଯୋଦ୍ଧା। ଅଭିଯୁକ୍ତ ପାଓ୍ବାରରେ ଥିବା ବେଳେ ତଦନ୍ତ ପ୍ରକ୍ରିୟାରେ ବାଧା ଉପୁଜିବା ସ୍ବାଭାବିକ ବୋଲି ଧାରଣାରତ ଅଲିମ୍ପିଆନ କହିଛନ୍ତି ।
ଅପରପକ୍ଷେ କେବଳ କମିଟି ଗଠନ କରିଦେଇ କ୍ରୀଡ଼ା ମନ୍ତ୍ରୀ ଅନୁରାଗ ଠାକୁର ମାମଲାକୁ ଚପାଇ ଦେବାକୁ ଉଦ୍ୟମ କରିଥିଲେ ବୋଲି କହିଛନ୍ତି ଅଲିମ୍ପିଆନ ଭିନେଶ ଫୋଗଟ। କ୍ରୀଡ଼ାମନ୍ତ୍ରୀଙ୍କ ସହ ଆଲୋଚନା ପରେ କୁସ୍ତି ଯୋଦ୍ଧା ଧାରଣାରୁ ଉଠିଥିଲେ। ମାତ୍ର ସେ ଅଭିଯୁକ୍ତଙ୍କ ବିରୋଧରେ ଆକ୍ସନ ନେବା ବଦଳରେ କମିଟି ଗଠନ କରି ମାମଲା ଚପାଇ ଦେବାକୁ ଚେଷ୍ଟା କରିଥିଲେ ବୋଲି ଭିନେଶ କହିଛନ୍ତି। ସେପଟେ ନୂଆ ଅଲିମ୍ପିକ ନିୟମକୁ ନେଇ ରେସଲର ଧାରଣା ଦେଇଥିବା ଅଭିଯୋଗକୁ ଖଣ୍ଡନ କରିଛନ୍ତି ବଜରଙ୍ଗ ପୁନିଆ । ଧାରଣା ଅଲିମ୍ପିକ ନିୟମକୁ ନେଇ ନୁହେଁ, ମହିଳା ଖେଳାଳିଙ୍କ ପ୍ରତି ହୋଇଥିବା ଅନ୍ୟାୟ ପାଇଁ ଧାରଣାରେ ବସିଛୁ ବୋଲି ସେ କହିଛନ୍ତି ।
କଟକ: କଟକର ଭଣ୍ଡ ବାବା କୈଫ ଖାନ ନାଁରେ ଆଉ ଏକ ଠକେଇ ମାମଲା ରୁଜ୍ଜୁ ହୋଇଛି। କେଶରପୁର ଅଞ୍ଚଳର ଶେଖ ଆଦିଲ ଦେଲେ ଲିଖିତ ଏତଲା। ତାଙ୍କ ଠାରୁ ଠକ ୫ଲକ୍ଷ ଠକି ନେଇଥିଲା। ଏହି ମାମଲାକୁ ମିଶାଇ ମଙ୍ଗଳାବାଗ ଓ ସଦରରେ ଭଣ୍ଡବାବା ବିରୁଦ୍ଧରେ ୬ଟି ମାମଲା ରୁଜ୍ଜୁ ହୋଇଛି। ଏବେ ୪ଦିନର ରିମାଣ୍ଡ ରେ ଅଛି କୈଫ୍ ।
ଆଜିଠୁ ୪ ଦିନିଆ ରିମଣ୍ଡରେ ନେଇଛି ପୋଲିସ୍। ଖୋଲିବ ଭଣ୍ଡ ତାନ୍ତ୍ରିକ କୈଫ ଖାନର କଳା ଦୁନିଆର ରହସ୍ୟ। କେବେଠାରୁ ଲୋକଙ୍କୁ ଠକୁଥିଲା ? କେଉଁଠି ଲଗାଇଛି ଲୋକଙ୍କୁ ଠକିଥିବା କୋଟି କୋଟି ଟଙ୍କା? କୈଫ୍ ପାଖରେ କେମିତି ପହଞ୍ଚୁଥିଲେ ଗ୍ରାହକ ? ଘରେ ମନ୍ତ୍ରତନ୍ତ୍ର ବେଳେ କାହିଁକି ଅନ୍ଧାର କରିବାକୁ କହୁଥିଲା କୈଫ?
ସେହିପରି ଲୋକଙ୍କୁ ମନ୍ତରା ପାଣି ଦେଇ ସମ୍ମୋହିତ କରୁଥିଲା କି ? ରିମାଣ୍ଡ ଅବଧି ମଧ୍ୟରେ ତାକୁ ସହଯୋଗ କରୁଥିବା ମଧ୍ୟସ୍ଥଙ୍କ ସଂପର୍କରେ ଅଧିକ ମଧ୍ୟ ତଥ୍ୟ ହାସଲ କରିବାକୁ ଚେଷ୍ଟା କରିବ ପୋଲିସ ।
ଭୁବନେଶ୍ୱର: ୯ତାରିଖରେ ବାତ୍ୟା ସମ୍ଭାବନା। ଆଇଏମଡି ଡିଜି ମୃତ୍ୟୁଞ୍ଜୟ ମହାପାତ୍ର ଏନେଇ ସୂଚନା ଦେଇଛନ୍ତି। ଦକ୍ଷିଣ ପୂର୍ବ ବଙ୍ଗୋପସାଗରରେ ୬ତାରିଖରେ ଘୂର୍ଣ୍ଣିବଳୟ ହେବ। ୭ତାରିଖରେ ଲଘୁଚାପ କ୍ଷେତ୍ର ସୃଷ୍ଟି ହୋଇପାରେ। ୮ତାରିଖରେ ଏହା ଘନୀଭୂତ ହୋଇ ଅବପାତର ରୂପ ନେଇପାରେ।
ଏହାପରେ ଅବପାତ ଉତ୍ତର ଦିଗକୁ ଗତି କରିବା ସମ୍ଭାବନା ରହିଛି। ପରବର୍ତ୍ତୀ ସମୟରେ ଅଧିକ ଘନୀଭୂତ ହୋଇ ୯ତାରିଖ ବେଳକୁ ବାତ୍ୟା ରୂପ ନେଇପାରେ।
ତେବେ ଲଘୁଚାପ କ୍ଷେତ୍ର ସୃଷ୍ଟି ହେବା ପରେ ଏହାର ତୀବ୍ରତା, ଗତିପଥ ସଂପର୍କରେ ଜଣାପଡିବ ବୋଲି ପାଣିପାଗ ବିଭାଗ କହିଛି। ୭ତାରିଖ ପରଠୁ ସମୁଦ୍ର ଅଶାନ୍ତ ରହିବା ସହ ଘଣ୍ଟାପ୍ରତି ୪୦ରୁ ୫୦ କିମି ବେଗରେ ପବନ ବହିବ। ତେଣୁ ମତ୍ସ୍ୟଜୀବୀଙ୍କୁ ୭ତାରିଖ ପରଠୁ ଦକ୍ଷିଣ ପୂର୍ବ ବଙ୍ଗୋପସାଗର ଆଡକୁ ନଯିବାକୁ ପରାମର୍ଶ ଦିଆଯାଇଛି।
ଭୁବନେଶ୍ୱର: ବିଜେଡିରେ ମିଶିଲେ ଝାରସୁଗୁଡା ଜିଲ୍ଲା ବିଜେପି ସଭାପତି ମଙ୍ଗଳ ସାହୁ। ମଙ୍ଗଳ ଦୁଇ ଥର ବିଜେପି ରାଜ୍ୟ ପରିଷଦରେ କାମ କରିଛନ୍ତି । ସେ ପୂର୍ବତନ କେନ୍ଦ୍ର ମନ୍ତ୍ରୀ ଦେବେନ୍ଦ୍ର ପ୍ରଧାନଙ୍କ ସାଂସଦ ପ୍ରତିନିଧି ଥିଲେ । ଧର୍ମେନ୍ଦ୍ର ପ୍ରଧାନ ଦେବଗଡ଼ ସାଂସଦ ଥିବା ସମୟରେ ବି ସାଂସଦ ପ୍ରତିନିଧି ଥିଲେ । ୨୫ ବର୍ଷରୁ ବିଜେପି ସହ ଥିଲେ ।
ବିଜେପି ସଂଗଠନ ମଜବୁତ କରିବାକୁ ଦିନରାତି ପରିଶ୍ରମ କରିଥିବା ମଙ୍ଗଳ କହିଛନ୍ତି। ହେଲେ ପୁରୁଣା ନେତା ଯେଉଁ ନୀତି ଆଦର୍ଶରେ ଯୋଗ ଦେଇଥିଲୁ, ତାହା ଆଉ ନାହିଁ କ୍ଷୋଭ ସହ ଅଛୁ। ଅଣଦେଖା ହୋଇଛୁ ନବ ଦାସ ହତ୍ୟା ପାଇଁ ଆମେ ଦୁଃଖିତ । ତେଣୁ ଆମେ ତଦନ୍ତ ଚାହୁଁଛୁ ହେଲେ ଏହାକୁ ରାଜନୀତି ମୁଦ୍ଦା ନ କରାଯାଉ । ଅନେକ ଅଲଗା ପ୍ରସଙ୍ଗ ବି ଅଛି ସେ ସବୁ ମୁଖ୍ୟମନ୍ତ୍ରୀଙ୍କ ଦୃଷ୍ଟିକୁ ଆସିନି । ବିଜେଡିକୁ ମଜବୁତ କରିବାକୁ କାମ କରିବେ ବୋଲି ମଙ୍ଗଳ କହିଛନ୍ତି।
ବିଜେପିରେ ଶୃଙ୍ଖଳିତ କର୍ମୀ ଥିଲି ହେଲେ କାମ କରିବା ସମୟରେ କଷ୍ଟ ହେଉଛି । ସେଥିପାଇଁ ମୁଁ ବିଜେଡିରେ ଯୋଗ ଦେଲି, ଆଗକୁ ଆହୁରି ମିଶିବେ । ମୋ ପାଇଁ ବିଜେଡି ଲାଭ ପାଇବ । ଯେଉଁ ସବୁ ବିଷୟ ଅଛି ଝାରସୁଗୁଡାରେ, ତାହା ମୁଖ୍ୟମନ୍ତ୍ରୀଙ୍କ ଦୃଷ୍ଟିକୁ ଆଣିବି ଆଉ ତାହା ସମାଧାନ ହେବ । ମୋର ପଦବୀ ଆଶା ନାହିଁ, ମୁଖ୍ୟମନ୍ତ୍ରୀଙ୍କ ଆଦର୍ଶରେ ଅନୁପ୍ରାଣିତ ହୋଇଛି ।
ଏହି ଅବସରରେ ସମସ୍ତଙ୍କୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ପକ୍ଷରୁ ସ୍ୱାଗତ କରିଛନ୍ତି ସାଂସଦ ମାନସ ମଙ୍ଗରାଜ । ମୁଖ୍ୟମନ୍ତ୍ରୀଙ୍କ ଆଦର୍ଶରେ ଅନୁପ୍ରାଣିତ ହୋଇ ପ୍ରତିଦିନ ବିଭିନ୍ନ ଦଳରୁ କର୍ମୀମାନେ ଆସି ବିଜେଡିରେ ମିଶୁଥିବା ନେଇ ମାନସ ମଙ୍ଗରାଜ କହିଛନ୍ତି।
