କଟକ: ବାଲେଶ୍ବର ବାହାନଗା ଟ୍ରେନ୍ ଦୁର୍ଘଟଣାରେ ଗଲା ଆଉ ଜଣଙ୍କ ଜୀବନ । ଚିକିତ୍ସାଧୀନ ଅବସ୍ଥାରେ ଏସସିବିରେ ଆଉ ଜଣଙ୍କ ମୃତ୍ୟୁ ହୋଇଛି । ମୃତକ ବିହାରର ବିଜୟ ଦର୍ଶନ । ସେଣ୍ଟ୍ରାଲ ଆଇସିୟୁରେ ଚିକିତ୍ସିତ ହେଉଥିଲେ ବିଜୟ । ମୃତଦେହକୁ ପ୍ରଶାସନ ଗାଡ଼ି ଯୋଗେ ବିହାର ପଠାଇବ । ଗତ ଜୁନ୍ ୨ ତାରିଖ ଶୁକ୍ରବାର ସନ୍ଧ୍ୟାରେ ହୋଇଥିଲା ଭୟଙ୍କର ଟ୍ରେନ୍ ଦୁର୍ଘଟଣା । ଦୁର୍ଘଟଣାର ୧୨ ଦିନ ପରେ ଚିକିତ୍ସାଧୀନ ଅବସ୍ଥାରେ ବିଜୟଙ୍କ ମୃତ୍ୟୁ ହୋଇଛି ।
ଜୁଲାଇ ୧୨ରୁ ୧୯ ତାରିଖ ମଧ୍ୟରେ ଲଞ୍ଚ ହେବ ଚନ୍ଦ୍ରାୟନ ୩
ନୂଆଦିଲ୍ଲୀ: ଜୁଲାଇ ୧୨ରୁ ୧୯ ତାରିଖ ମଧ୍ୟରେ ଲଞ୍ଚ ହେବ ଚନ୍ଦ୍ରାୟନ ୩ । ଚନ୍ଦ୍ରକୁ ଭାରତର ମିଶନର ଏହା ହେବ ତୃତୀୟ ଅଧ୍ୟାୟ । ଏନେଇ ଘୋଷଣା କରିଛନ୍ତି ଭାରତୀୟ ମହାକାଶ ଗବେଶଷଣା ସଂସ୍ଥା ବା ଇସ୍ରୋ ଅଧ୍ୟକ୍ଷ ଏସ. ସୋମନାଥ । କୋଟାୟମଠାରେ ଏକ କଲେଜରେ ଇସ୍ରୋ ପକ୍ଷରୁ ଆୟୋଜିତ ଦିନିକିଆ ଓ୍ବାର୍କସପରେ ଏନେଇ ଇସ୍ରୋ ଅଧ୍ୟକ୍ଷ ସୂଚନା ଦେଇଛନ୍ତି । ଶ୍ରୀହରିକୋଟାସ୍ଥିତ ସତୀଶ ଧାଓ୍ବନ ସ୍ପେସ୍ ଷ୍ଟେସନ ଲଞ୍ଚ ପ୍ୟାଡରେ ଚନ୍ଦ୍ରାୟନ ପହଞ୍ଚି ସାରିଛି । ଚଳିତ ମାସ ଶେଷ ସୁଦ୍ଧା ସମସ୍ତ ପ୍ରକ୍ରିୟା ଶେଷ ହେବ । LVM-3 ରକେଟ ଯୋଗେ ଚନ୍ଦ୍ରାୟନ-୩ ଉତକ୍ଷେପଣ କରାଯିବ । ଏହି ଅଭିଯାନ ଲାଗି ଆବଶ୍ୟକ ଏକ ସ୍ବଦେଶୀ ଲ୍ୟାଣ୍ଡର ମଡ୍ୟୁଲ, ଏକ ପ୍ରପଲସନ ମଡ୍ୟୁଲ ଓ ଏକ ରୋଭର ।
ଚନ୍ଦ୍ରପୃଷ୍ଠରେ ସେଫ ଓ ସଫ୍ଟ ଲ୍ୟାଣ୍ଡିଂ ଓ ରୋଭିଂକୁ ଅଧିକ ସୁଗମ କରିବା ଲାଗି ଚନ୍ଦ୍ରୟାନ-୩ ଅଭିଯାନ ଆରମ୍ଭ ହେବ । ଏହା ସହ ଚନ୍ଦ୍ର ପୃଷ୍ଠରେ ରୋଭରର ପ୍ରଶିକ୍ଷଣ, ବିଭିନ୍ନ ବୈଜ୍ଞାନିକ ଗବେଷଣା ଆଦି ଲାଗି ଏହି ଅଭିଯାନ ଉଦ୍ଦିଷ୍ଟ । ୨୦୦୮-୦୯ରେ ଚନ୍ଦ୍ରୟାନ-୧ ହୋଇଥିବାବେଳେ ଚନ୍ଦ୍ର ପୃଷ୍ଠରେ ଜଳର ସନ୍ଧାନ ମିଳିଥିଲା । ୨୦୧୯ ଅଗଷ୍ଟରେ ହୋଇଥିବା ଚନ୍ଦ୍ରୟାନ-୨ ବିଫଳ ହୋଇଥିଲା । ମାତ୍ର ଚନ୍ଦ୍ରଯାନ-୨ରେ ଚନ୍ଦ୍ର ପୃଷ୍ଠକୁ ପଠାଯାଇଥିବା ଅର୍ବିଟର ଏବେ ବି ସଫଳତାର ସହ କାର୍ଯ୍ୟ କରୁଛି ।
ଅସହ୍ୟ ତାତି ଓ ଗୁଳୁଗୁଳିରୁ ସାମାନ୍ୟ ଆଶ୍ବସ୍ତି, ଉପକୂଳରେ ଜାରି ରହିଛି କାଳବୈଶାଖୀ
ଭୁବନେଶ୍ୱର: ସିଭିୟର ହିଟ୍ ଓ୍ବେଭ ପରେ ବଦଳିଲା ଉପକୂଳ ଓଡ଼ିଶାର ପାଗ । କାଳବୈଶାଖୀ ବର୍ଷାରେ ପୁରୀ, ଖୋର୍ଦ୍ଧା, କଟକ, ଜଗତସିଂହପୁର, କେନ୍ଦ୍ରାପଡ଼ା, ଯାଜପୁର, ଭଦ୍ରକ, ବାଲେଶ୍ବର, ଗଞ୍ଜାମ, ଗଜପତି ଓ ନୟାଗଡ଼ରେ ଝିପି ଝିପି ବର୍ଷା ସହ ପବନ ଜାରି ରହିଛି । ଆଜି ଉପକୂଳରେ ମେଘ ସମୁହ ଏକାଠି ହେଉଥିବା ବେଳେ, ଦିନ ତମାମ ଆକାଶ ମେଘାଚ୍ଛନ୍ନ ରହିବ ବୋଲି ଆକନ କରିଛି ପାଣିପାଗ ବିଭାଗ । ଝିପି ଝିପି ବର୍ଷାରୁ ଅସହ୍ୟ ଗରମ ଓ ଗୁଳିଗୁଳିରୁ ସାମାନ୍ୟ ଆଶ୍ବସ୍ତି ମିଳିଛି । ସେପଟେ ପଶ୍ଚିମ ଓଡ଼ିଶାରେ ଜାରି ରହିଛି ତାତି । ଆଜି ଝାରସୁଗୁଡ଼ା, ସମ୍ବଲପୁର, ବରଗଡ଼, ସୋନପୁର, ବୌଦ୍ଧ ଓ ବଲାଙ୍ଗୀରରେ ସିଭିୟର ହିଟ୍ ଓ୍ବେଭ୍ ପାଇଁ ଅରେଞ୍ଜ ଆଲର୍ଟ ଜାରି କରାଯାଇଛି ।
ସେହିପରି ଦକ୍ଷିଣ ଓ ଆଭ୍ୟନ୍ତରୀଣ ଓଡ଼ିଶାର ୧୩ଟି ଜିଲ୍ଲାକୁ ୟେଲୋ ଆଲର୍ଟ ଜାରି ହୋଇଛି । ଅନ୍ୟପଟେ ଆରବ ସାଗରରେ ସୃଷ୍ଟ ବାତ୍ୟା ବିପର୍ଯ୍ୟୟ ଭୀଷଣ ବାତ୍ୟା ପରିଣତ ହୋଇ ଉପକୂଳ ମୁହାଁ ହୋଇଛି । ଫଳରେ ଓଡ଼ିଶାକୁ ଜଳୀୟ ବାଷ୍ପପୂର୍ଣ୍ଣ ବାୟୁ ପ୍ରବାହ ଆରମ୍ଭ ହୋଇଛି । ଏହା ସହ ଦକ୍ଷିଣ-ପଶ୍ଚିମ ମୌସୁମୀ ବାୟୁ ସକ୍ରିୟ ହେବା ସହ ଧିରେ ଧିରେ ଅଗ୍ରସର ହେଉଛି । ଦିନେ ଦୁଇ ଦିନ ମଧ୍ୟରେ ଓଡ଼ିଶାରେ ପ୍ରାକ୍ ମୌସୁମୀ ବର୍ଷା ହେବାର ସମ୍ଭାବନା ରହିଛି ।
ଜ୍ବରରେ କମ୍ପୁଛନ୍ତି ମହାପ୍ରଭୁ, ଆଜି ଦଶମୀରେ ସମ୍ପନ୍ନ ହେବ ଚକା ବିଜେ ନୀତି
ପୁରୀ: ଜ୍ବରରେ କମ୍ପୁଛନ୍ତି ମହାପ୍ରଭୁ । ନିଶବ୍ଦ, ଅନ୍ଧକାର ଓ ରୁଦ୍ଧଦ୍ବାରର ତାଟି କୋଠରୀ ମଧ୍ୟରେ ଚାଲିଛି ଗୁପ୍ତ ଉପଚାର । ମହାପ୍ରଭୁଙ୍କ ନିକଟରେ ଷଷ୍ଠୀରୁ ଓଷ ଲାଗି ନୀତି ଚାଲିଥିବାବେଳେ ଆଜି ଦଶମୀରେ ଚକା ବିଜେ ନୀତି ସମ୍ପନ୍ନ ହେବ । ଶ୍ରୀବୈଦ୍ୟଙ୍କ ଘରୁ ପ୍ରସ୍ତୁତ ଦଶମୂଳ ଔଷଧ ଶ୍ରୀମନ୍ଦିରକୁ ବିଜେ କରିବାର ପରମ୍ପରା ରହିଛି । ଶ୍ରୀବୈଦ୍ୟଙ୍କ ଦ୍ବାରା ଏହି ଔଷଧ ପ୍ରସ୍ତୁତି କରାଯାଇଥାଏ । ବିଭିନ୍ନ ପ୍ରକାର ଆୟୁର୍ବେଦ ଚେରମୂଳିରେ ଏହି ଦିବ୍ୟ ଔଷଧ ପ୍ରସ୍ତୁତ କରାଯାଇଥାଏ ।
ଏହାପରେ ଏକାଦଶୀରେ ଦଶମୂଳ ମୋଦକ, ଖଡି ପ୍ରସାଦ ବିଜେ, ଦ୍ବାଦଶୀରେ ରାଜପ୍ରସାଦ ବିଜେ, ଖଳିଲାଗି ଓ ଘଣା ଲାଗି ନୀତି ସମ୍ପନ୍ନ ହେବ । ପରେ ମହାପ୍ରଭୁ ସୁସ୍ଥ ହୋଇ ନବଯୌବନ ବେଶରେ ଦର୍ଶନ ଦେଇ ରଥାରୂଢ଼ ହେବେ । ଗୁପ୍ତସେବା ସମୟରେ ମହାପ୍ରଭୁଙ୍କୁ ଅନ୍ନଭୋଗ ବଦଳରେ ଲାଗି ହେଉଛି ଚକଟା ଓ ପଣା ଭୋଗ । କ୍ଷୀର, ଛେନା, ସର, ଖୁଆରେ ବିଭିନ୍ନ ଫଳମୂଳ ମିଶାଇ ଚକଟା ଭୋଗ ପ୍ରସ୍ତୁତ ହେଉଛି । ପ୍ରସାଦକୁ ଦଇତାପତି ସେବାୟତ ସେବନ କରିବା ପରେ ବଳକା ଚକଟାରେ ସର୍ବସାଧାରଣଙ୍କ ପାଇଁ ପ୍ରସ୍ତୁତ ହେଉଛି ଅଣସର ପଣା ।
କୋଭିଡ ପରଠାରୁ ଚୀନରେ ବିଚିତ୍ର ସ୍ଥିତି, ୨୦୨୧ ତୁଳନାରେ ୨୦୨୨ରେ ୮ ଲକ୍ଷ ବିବାହ କମ୍
ବେଜିଂ: ଚୀନରେ ବ୍ୟାପକ ହ୍ରାସ ପାଉଛି ବିବାହ । ଦେଶର ଜନସଂଖ୍ୟା ଲଗାତାର ହ୍ରାସ ପାଇବାରେ ଲାଗିଥିବାବେଳେ ଗତବର୍ଷ ବିବାହ ସଂଖ୍ୟା ସର୍ବାଧିକ ହ୍ରାସ ପାଇଥିବା ରିପୋର୍ଟରେ ଦର୍ଶାଯାଇଛି । ଲଗାତାର କିଛି ବର୍ଷ ଧରି ଏହି ହାର କମୁଥିବା ଯୋଗୁ ଉଦବେଗ ପ୍ରକାଶ ପାଇଛି । ବିଶେଷ କରି କୋଭିଡ ଲକଡାଉନ ପରଠାରୁ ଏହି ଅବସ୍ଥା ଅଧିକ ଉତ୍କଟ ହୋଇଛି । ୨୦୨୨ରେ ଦେଶରେ ୬.୮୩ ନିୟୁତ ବିବାହ ପଞ୍ଜିକୃତ ହୋଇଥିବାବେଳେ ଏହି ସଂଖ୍ୟା ୨୦୨୧ ତୁଳନାରେ ୮ ଲକ୍ଷ କମ୍ ଥିବା ସୂଚନା ମିଳିଛି । ଗତବର୍ଷ କୋଭିଡ କଟକଣା କାରଣରୁ ଲକ୍ଷ ଲକ୍ଷ ଲୋକ ଘର ଭିତରେ ବା କମ୍ପାଉଣ୍ଡ ପରିସରରେ ରହିବାକୁ ବାଧ୍ୟ ହୋଇଥିଲେ । ଏହି କାରଣରୁ ଦେଶରେ ବିବାହ ହାର ହ୍ରାସ ପାଉଥିବା ସହ ଜନ୍ମହାର ଓ ତଦଜନିତ ଜନସଂଖ୍ୟା ବି କମିବା ଦେଖାଯାଇଛି ।
୨୦୨୨ରେ ପ୍ରଥମ ଥର ଲାଗି ଗତ ୬ ଦଶନ୍ଧିରେ ଚୀନ ଜନସଂଖ୍ୟା ହ୍ରାସ ପାଇଥିଲା । ଗତବର୍ଷ ଦେଶର ଜନ୍ମହାର ପ୍ରତି ୧ ହଜାର ଲୋକଙ୍କ କ୍ଷେତ୍ରରେ ଥିଲା ୬.୭୭ ପ୍ରତିଶତ । ଏହି ହାର ଚୀନ ଇତିହାସରେ ପ୍ରଥମ ବୋଲି କୁହାଯାଇଛି । ୨୦୨୧ରେ ଏହି ହାର ଥିଲା ୭.୫୨ ପ୍ରତିଶତ । ଜନସଂଖ୍ୟା ବିଶାରଦଙ୍କ ମତରେ ଚୀନର ଏହି ଅବସ୍ଥା ଦେଶ ଲାଗି ଶୁଭଙ୍କର ନୁହେଁ ଏବଂ ଏହା ଯୋଗୁ ଦେଶର ଶ୍ରମଶକ୍ତି ହ୍ରାସ ପାଇବ ଏବଂ ବୟସ୍କ ଲୋକଙ୍କ ଲାଗି ଅଧିକ ବ୍ୟୟ ବରାଦ ହେଉଥିବାରୁ ଜାତୀୟ ଅର୍ଥନୀତି ଉପରେ କୁପ୍ରଭାବ ପଡ଼ିବ । ଆଞ୍ଚଳିକ ସରକାରମାନେ ବି ଆର୍ଥିକ ସଂକଟର ସମ୍ମୁଖୀନ ହେବେ । ଏହାକୁ ଦୃଷ୍ଟିରେ ରଖି ଦେଶର ୨୦ଟି ସହରରେ ବିବାହ ସମ୍ପର୍କରେ ସଚେତନତା ସୃଷ୍ଟି କରିବା ସହ ଗର୍ଭଧାରଣ ସଂସ୍କୃତିକୁ ଅଧିକ ବ୍ୟାପ୍ତ କରିବା ଲାଗି ପାଇଲଟ ପ୍ରକଳ୍ପ ଆରମ୍ଭ କରାଯାଇଛି । ଏପରିକି କେତେକ ପ୍ରଜାତନ୍ତ୍ରରେ ନବବିବାହିତଙ୍କୁ ସବେତନ ବୈବାହିକ ଛୁଟି ପ୍ରଦାନ କରୁଛନ୍ତି କେତେକ ପ୍ରଜାତନ୍ତ୍ର ।
ହ୍ବାଇଟ ହାଉସରୁ ଗୁରୁତ୍ବପୂର୍ଣ୍ଣ ଦସ୍ତାବିଜ ନେବା ଅଭିଯୋଗ ପ୍ରସଙ୍ଗ, ଟ୍ରମ୍ପଙ୍କ ବିରୋଧରେ ମିଆମି କୋର୍ଟରେ ଆଜି ଶୁଣାଣି
ଓ୍ୱାଶିଂଟନ: ହ୍ବାଇଟ ହାଉସରୁ ପେଣ୍ଟାଗନ, ସିଆଇଏ, ନ୍ୟାସନାଲ ସିକ୍ୟୁରିଟି ଏଜେନ୍ସିର ଅନେକ ନଥି ନେବା ଘଟଣା । ଆଜି ମିଆମି କୋର୍ଟରେ ଆମେରିକାର ପୂର୍ବତନ ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ବିରୋଧରେ ମାମଲାର ହେବ ଶୁଣାଣି । ୪୯ ପୃଷ୍ଠାର ଚାର୍ଜସିଟରେ ଅନେକ ଗୁରୁତର ଅଭିଯୋଗ ଦର୍ଶାଯାଇଥିବାବେଳେ ବିଭିନ୍ନ ମାମଲାର ଶୁଣାଣି ହେବ । ହ୍ବାଇଟ ହାଉସ ପରିତ୍ୟାଗ କରିବା ପରେ ସେ ଆଣବିକ ଓ ପ୍ରତିରକ୍ଷା ସମ୍ପର୍କିତ ଅନେକ ଗୁରୁତ୍ବପୂର୍ଣ୍ଣ ଦସ୍ତାବିଜ ଫ୍ଲୋରିଡାସ୍ଥିତ ନିଜ ମାର-ଏ-ଲାଗୋ ପ୍ରାସାଦକୁ ନେଇଥିଲେ ବୋଲି ଚାର୍ଜସିଟରେ ଦର୍ଶାଯାଇଛି । ଟ୍ରମ୍ପ ନେଇଥିବା ଡକ୍ୟୁମେଣ୍ଟ ମଧ୍ୟରେ ରହିଛି ପେଣ୍ଟାଗନ, ସିଆଇଏ, ନ୍ୟାସନାଲ ସିକ୍ୟୁରିଟି ଏଜେନ୍ସିର ଅନେକ ଗୁରୁତ୍ବପୂର୍ଣ୍ଣ ରେକର୍ଡ । ଏପରିକି ଆମେରିକାର ମିଲିଟାରୀ ଅପରେସନ ସଂକ୍ରାନ୍ତ କେତେକ ଦଲିଲକୁ ସେ ନ୍ୟୁଜର୍ସି ଗଲଫ୍ କ୍ଲବରେ ପ୍ରଦର୍ଶିତ କରିଥିଲେ ବୋଲି ଦର୍ଶାଯାଇଛି ।
ଟ୍ରମ୍ପଙ୍କୁ ଏହି ସବୁ ଘଟଣାରେ ସହାୟତା କରିବା ଅଭିଯୋଗରେ ସହଯୋଗୀ ଓ୍ବାଲ୍ଟ ନାଉଟାଙ୍କ ନାମ ବି ଚାର୍ଜସିଟରେ ସ୍ଥାନ ପାଇଛି । ଏପରିକି ପ୍ରତିରକ୍ଷା ଓ ଆମେରିକା ତଥା ଅନ୍ୟାନ୍ୟ ଦେଶର ଅସ୍ତ୍ରଶସ୍ତ୍ର ସାମର୍ଥ୍ୟ ସଂକ୍ରାନ୍ତ ଦଲିଲକୁ ମଧ୍ୟ ଟ୍ରମ୍ପ ନେଇଯାଇଥିଲେ ବୋଲି ଗୁରୁତର ଅଭିଯୋଗ ଅଣାଯାଇଛି । ଏହାସହ ଆମେରିକାର ସବୁଠାରୁ ଗୋପନୀୟ ଆଣବିକ କାର୍ଯ୍ୟକ୍ରମ, ସାମରିକ ଆକ୍ରମଣ ଓ ଏହାର ମୁକାବିଲା କ୍ଷେତ୍ରରେ ଆମେରିକା ଓ ସହଯୋଗୀ ରାଷ୍ଟ୍ରର ଦୁର୍ବଳତା ସଂକ୍ରାନ୍ତ ଫାଇଲ ବି ଟ୍ରମ୍ପ ନେଇଥିଲେ ବୋଲି ଚାର୍ଜସିଟରେ ଉଲ୍ଲେଖ ରହିଛି ।
କାଲି ମାଟି ଓ ଆକାଶର ମିଳନର ପର୍ବ ରଜ, ଉତ୍ସବମୁଖର ଗାଁଠୁ ସହର
ଭୁବନେଶ୍ୱର: ଆସନ୍ତାକାଲି ମାଟି ଓ ଆକାଶର ମିଳନର ପର୍ବ ରଜ । ଏହାପୂର୍ବରୁ ଆଜି ହେଉଛି ସଜବାଜ । ରଜ ସଜବାଜକୁ ନେଇ ଉତ୍ସବମୁଖର ହୋଇପଡ଼ିଲାଣି ଗାଁଠୁ ସହର । ସଜବାଜରେ ଲାଗିପଡ଼ିଲେଣି ଝିଅବୋହୂ । ପରସ୍ପରକୁ ଅଳତା, କୁଂକୁମ, ମେହେନ୍ଦୀ ଲଗାଇ ଦେବା ସହ ଦୋଳି ଖେଳିବା ପାଇଁ ପ୍ରସ୍ତୁତ ହେଲେଣି । ରଜ ସଜବାଜରୁ ହିଁ ଗାଁରେ ତାସ୍, ଲୁଡୁ ଏବଂ ଚେସ୍ ଖେଳର ଆସର ଜମିଲାଣି । ଜ୍ୟେଷ୍ଠ ମାସ ଶେଷ ଓ ଆଷାଢ଼ର ପହିଲି ପୁଲକରେ ଆସେ ରଜ ପର୍ବ । ଆଜି ସଜବାଜ ହୋଇଥିବାବେଳେ କାଲି ପହିଲି ରଜ, ଦ୍ବିତୀୟ ଦିନ ରଜ ସଂକ୍ରାନ୍ତି, ତୃତୀୟ ଦିନ ଭୂମିଦାହ ବା ଭୂମି ଦହନ ଓ ଚତୁର୍ଥ ଦିନ ବସୁମତୀ ସ୍ନାନ ଭାବେ ପାଳନ କରାଯାଏ ।
ଆଷାଢର ପ୍ରଥମ ଜଳରେ ମା’ ମାଟି ହୁଏ ରଜସ୍ବଳା । ଏଥିପାଇଁ ଏହିଦିନ କୃଷିକର୍ମ ନିଷେଧ କରାଯାଇଥାଏ । ରଜ ପର୍ବରେ କୁଆଁରୀ ଝିଅ ଓ ବୋହୂ ମାକୁ ସମ୍ମାନ ଦିଆଯାଇଥାଏ । ତେଣୁ ଏହି ୪ ଦିନ ସେମାନେ କୌଣସି କାମ କରିବାକୁ ବାରଣ କରାଯାଇଛି । ଏପରିକି ଫୁଙ୍ଗୁଳା ପାଦ ଧରିତ୍ରୀ ଉପରେ ରଖିବା ବି ମନା । ଏଥିପାଇଁ ଝିଅମାନେ ପାଦରେ ବାନ୍ଧିଥାନ୍ତି କଦଳି ପାଟୁକା । ରଜରେ ପାରମ୍ପରିକ ପିଠା ଖାଇ ଦୋଳିରେ ଝୁଲନ୍ତି କୁମାରୀ । ଗାଁ ଗାଁରେ ରଜଗୀତ ସାଙ୍ଗକୁ ରଜ ପାନରେ ମହକିବ ପରିବେଶ । ସଜେଇ ହୋଇ ଫୁଲ ଦୋଳିରେ ଝୁଲି ଝୁଲି ଭାଇର ମଙ୍ଗଳ ମନାସିବେ ଭଉଣୀ ।
ମୌସୁମୀ ପୂର୍ବରୁ ରାଜଧାନୀର ସବୁ ଡ୍ରେନ୍ ସଫା ହେବ
ଭୁବନେଶ୍ୱର: ମୌସୁମୀ ପୂର୍ବରୁ ରାଜଧାନୀର ସବୁ ଡ୍ରେନ୍ ସଫା ହେବ । ସପ୍ତାହକରେ ଡ୍ରେନ୍ ସଫା ପାଇଁ ନିର୍ଦ୍ଦେଶ ଦେଲେ ବିଏମସି ମେୟର ସୁଲୋଚନା ଦାସ । ମୁକୁଳା ଡ୍ରେନ୍ ପାଖରେ ନିର୍ମାଣ ହେବ ବ୍ୟାରିକେଡ୍ । ବିଏମସି କାର୍ଯ୍ୟାଳୟରେ ପ୍ରାକ୍ ମୌସୁମୀ ନେଇ ବୈଠକ ଅନୁଷ୍ଠିତ ହୋଇଥିଲା । କେତେକ ୱାର୍ଡରେ ଶତ ପ୍ରତିଶତ ଡ୍ରେନ୍ ସଫା ହୋଇସାରିଥିବା ବେଳେ କେତେକ ୱାର୍ଡରେ ୯୦ ଓ ଆଉ କେତେକ ୱାର୍ଡରେ ୬୦ରୁ ୮୦ ପ୍ରତିଶତ ଡ୍ରେନ୍ ସଫା ହୋଇସାରିଛି । ବାକି ଥିବା ଡ୍ରେନଗୁଡିକୁ ମୌସୁମୀ ବର୍ଷା ଆସିବା ପୂବରୁ ତୁରନ୍ତ ସାରିବାକୁ ନିର୍ଦେଶ ଦିଆଯାଇଛି । ଏଜେନ୍ସିଗୁଡିକ ମଧ୍ୟ ଆସନ୍ତା ୭ ଦିନ ମଧ୍ୟରେ ଅଧିକ ଲୋକ ଲଗାଇ ଡ୍ରେନଗୁଡିକୁ ସଫା କରିବା ପାଇଁ ପ୍ରତିଶୃତି ଦେଇଛନ୍ତି । ଏହି କାର୍ଯ୍ୟରେ କର୍ପୋରେଟରମାନେ ସହଯୋଗ କରିବାକୁ ମେୟର ଅନୁରୋଧ କରିଛନ୍ତି ।
କେବଳ ସେତିକି ନୁହେଁ, କେତେକ ମୁକୁଳା ଡ୍ରେନ୍ ପାର୍ଶ୍ବରେ ବ୍ୟାରିକେଡ ହୋଇନାହିଁ । ବ୍ୟାରିକେଡ ହୋଇନଥିବା ଡ୍ରେନ୍ ପାଖରେ ଶୀଘ୍ର ନିର୍ମାଣ ପାଇଁ କୁହାଯାଇଛି । ଆଗକୁ ରଥ ଯାତ୍ରା ଆସୁଛି । ଚଳିତ ବର୍ଷ ଭୁବନେଶ୍ୱରରେ ୫୭ଟି ରଥ ବାହାରିବା ପାଇଁ ନିଷ୍ପତି ହୋଇଛି । ସେଥିପାଇଁ ଡ୍ରେନ୍ ସହ ପରିମଳ ବ୍ୟବସ୍ଥାରେ ଯେପରି କୌଣସି ବ୍ୟତିକ୍ରମ ନ ହୁଏ, ସେଥିପ୍ରତି ସତର୍କ ଦୃଷ୍ଟି ଦେବାକୁ କୁହାଯାଇଛି । କେଉଁ ୱାର୍ଡରେ କେତେ କିଲୋମିଟର ଡ୍ରେନ୍ ଓ ରାସ୍ତା ରହିଛି, ତାହାକୁ ମାପିବା ପାଇଁ ବୈଠକରେ ନିଷ୍ପତି ହୋଇଛି । ପ୍ରତ୍ୟେକ ୱାର୍ଡର କର୍ପୋରେଟର, ସଂପୃକ୍ତ ଏଜେନ୍ସି ଏବଂ ସାନିଟାରୀ ଇନ୍ସପେକ୍ଟର ମିଳିତ ଭାବେ ଏହି ମାପ କରିବେ । ଦୁଇ ଦିନ ମଧ୍ୟରେ ରାସ୍ତା ଓ ଡ୍ରେନ୍ ମାପ ଶେଷ କରିବାକୁ ନିଷ୍ପତି ହୋଇଛି । ବୈଠକ ଆରମ୍ଭ ପୂର୍ବରୁ ବାହାନଗା ଟ୍ରେନ୍ ଦୁର୍ଘଟଣାରେ ପ୍ରାଣ ହରାଇଥିବା ଯାତ୍ରୀଙ୍କ ଅମର ଆତ୍ମାର ସଦଗତି କାମନା କରି ଏକ ମିନିଟ ନୀରବ ପ୍ରାର୍ଥନା କରାଯାଇଥିଲା ।
ଗୁରୁବାର ମଧ୍ୟାହ୍ନ ସୁଦ୍ଧା ସୌରାଷ୍ଟ୍ର ଓ କଚ୍ଛ ଅତିକ୍ରମ କରିବ ବାତ୍ୟା ‘ବିପର୍ଯ୍ୟୟ’, ବହିପାରେ ୧୫୦ କିମି ବେଗରେ ପବନ
ଗାନ୍ଧିନଗର: ଅତିଭୟଙ୍କର ବାତ୍ୟା ’ବିପର୍ଯ୍ୟୟ’ ଲାଗି ହାଇଆଲର୍ଟ । ଗୁଜରାଟରେ ’ବିପର୍ଯ୍ୟୟ’ଗୁରୁବାର ମଧ୍ଯାହ୍ନ ସୁଦ୍ଧା ସୌରାଷ୍ଟ୍ର ଓ କଚ୍ଛ ଅତିକ୍ରମ କରିବ । ସେତେବେଳେ ପବନର ବେଗ ଘଣ୍ଟାପ୍ରତି ୧୨୫ରୁ ୧୫୦ କିଲୋମିଟର ରହିବ ବୋଲି କହିଛି ଆଇଏମଡି । ଅତି ଭୟଙ୍କର ବାତ୍ୟାକୁ ଦୃଷ୍ଟିରେ ରଖି ଗୁଜରାଟରେ ୧୪ ତାରିଖରେ ଅରେଞ୍ଜ ଆଲର୍ଟ ଓ ୧୫ ତାରିଖରେ ରେଡ୍ ଆଲର୍ଟ ଜାରି କରାଯାଇଛି । ବାତ୍ୟା ସ୍ଥିତି ନେଇ କେନ୍ଦ୍ର ଗୃହମନ୍ତ୍ରାଳୟ ଲଗାତାର ସମୀକ୍ଷା କରୁଛି । ଗୁଜରାଟରେ ୧୨ଟି ଏନଡିଆରଏଫ ଟିମ୍ ମୁତୟନ ହୋଇଥିବାବେଳେ ସେନା, ବାୟୁସେନା, ନୌସେନା, ତଟରକ୍ଷୀ ବାହିନୀ ଏନଡିଆରଏଫ ମୁତୟନ ହୋଇଛନ୍ତି । ଉଦ୍ଧାର କାର୍ଯ୍ୟ ଲାଗି ଜାହାଜ ଓ ହେଲିକପ୍ଟର ନିୟୋଜିତ ହୋଇଛି । ତିନିବାହିନୀର ବିପର୍ଯ୍ୟୟ ରିଲିଫ ଟିମ୍ ଓ ମେଡିକାଲ ଟିମ୍ ବି ସତର୍କ ରହିଛନ୍ତି ।
ବାତ୍ୟାର ସ୍ଥିତି ନେଇ ସମୀକ୍ଷା କରିଛନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦି । କଚ୍ଛ, ଜାମନଗର, ମୋର୍ବି, ଗିର ସୋମନାଥ, ପୋରବନ୍ଦର, ଦେବଭୂମି ଦ୍ବାରକାରେ ବାତ୍ୟାର ପ୍ରଭାବ ବେଶୀ ପଡ଼ିବା ଆଶଙ୍କା ରହିଛି । କଚ୍ଛରେ ଲୋକଙ୍କୁ ସ୍ଥାନାନ୍ତର ପ୍ରକ୍ରିୟା ଆରମ୍ଭ ହୋଇଛି । ବାତ୍ୟା ପ୍ରତି ସତର୍କ ରହିବା ଲାଗି ଗୁଜରାଟ, କେରଳ, କର୍ଣ୍ଣାଟକ, ମହାରାଷ୍ଟ୍ର, ଗୋଆ ଓ ଲକ୍ଷାଦ୍ବୀପ ପ୍ରଶାସନକୁ ପରାମର୍ଶ ଦିଆଯାଇଛି ।
ଆକାଶରୁ ବର୍ଷୁଛି ଅଗ୍ନି ପିଣ୍ଡୁଳା, ୫ ଦିନ ଯାଏ ସିଭିୟର ହିଟଓ୍ବେଭ୍ ଆଲର୍ଟ
ଭୁବନେଶ୍ୱର: ଆକାଶରୁ ବର୍ଷୁଛି ଅଗ୍ନି ପିଣ୍ଡୁଳା । ତତଲା ତାଓ୍ବାରେ ପଶ୍ଚିମ ଓଡ଼ିଶା । ୪୫ ଡିଗ୍ରୀ ପାର କରିଛି ପାରଦ । ଆସନ୍ତା ୫ ଦିନ ଯାଏଁ ସିଭିୟର ହିଟଓ୍ବେଭ୍ ଆଲର୍ଟ। ସ୍ବାଭାବିକଠାରୁ ୬ରୁ ୭ ଡିଗ୍ରୀ ଉପରେ ରହିବ ପାରଦ । ଆଜି ୬ ଜିଲ୍ଲାକୁ ଅରେଞ୍ଜ ଏବଂ ୧୪ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି । ସେହିପରି ଆସନ୍ତାକାଲି ୧୩ ଜିଲ୍ଲା ଏବଂ ୧୫ରେ ୧୨ ଜିଲ୍ଲାକୁ ଅରେଞ୍ଜ ଆଲର୍ଟ ଜାରି ହୋଇଛି । ଏସବୁ ଜିଲ୍ଲା ଗୁଡିକରେ ସ୍ବାଭାବିକଠାରୁ ୬.୫ ଡିଗ୍ରୀ କିମ୍ବା ତାଠାରୁ ଅଧିକ ତାପମାତ୍ରା ରହିବ।
ରାଜ୍ୟକୁ ସାମୁଦ୍ରିକ ପବନ ପ୍ରବାହ କମିବା ସହ ଉତ୍ତର-ପଶ୍ଚିମ ଦିଗରୁ ଶୁଷ୍କ ଏବଂ ଗରମ ପବନ ପ୍ରବାହିତ ହେଉଛି। ଏହା ସହିତ ପ୍ରାକ୍ ମୌସୁମୀ ବର୍ଷାର ଅଭାବ ପାଇଁ ମଧ୍ୟ ତାପମାତ୍ରା ଜୁନ୍ ମାସରେ ଅଧିକ ରହିଛି । ରାଜ୍ୟରେ ହେଉଥିବା କାଳବୈଶାଖୀ ବର୍ଷା ମଧ୍ୟ ପ୍ରଭାବ ପକାଇବାରେ ସକ୍ଷମ ହେଉନି । ଆବଶ୍ୟକ ନଥିଲେ ଦିନ ୧୧ଟାରୁ ୩ଟା ମଧ୍ୟରେ ଯାତାୟତରୁ ନିବୃତ ରହିବା ସହ ପର୍ଯ୍ୟାପ୍ତ ପାନୀୟ ଗ୍ରହଣ କରିବାକୁ ପରାମର୍ଶ ଦିଆଯାଇଛି । ଗତକାଲି ରାଜ୍ୟର ୧୦ ସହରର ତାପମାତ୍ରା ୪୦ ଡିଗ୍ରୀ ଉପରେ ରହିଥିଲା ।