ଭୁବନେଶ୍ବର: ଯୁଗେ ଯୁଗେ ଅମର ଅହିଂସାର ପୂଜାରୀ ମହାତ୍ମା ଗନ୍ଧୀ। ୫ବର୍ଷ ପୂରିବାକୁ ଯାଉଛି । ହେଲେ ଜାତିର ପିତା ମହାତ୍ମା ଗାନ୍ଧିଙ୍କ ଏହି ମହାମନ୍ତ୍ରକୁ ସମ୍ବିଧାନର ମୁଖବନ୍ଧରେ ମିଳିଲାନି ସ୍ଥାନ । ପୂରଣ ହେଲାନି ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦାବି । ଗାନ୍ଧୀଙ୍କ ସରଳ ଜୀବନ ଯାପନ ବିଶ୍ବକୁ ଚମକାଇ ଦେଇଛି । ସମାନ ଭାବେ ଦୀର୍ଘ ବର୍ଷ ଧରି କ୍ଷମତା ଓ ଶାସନରେ ଥାଇ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସରଳ ଜୀବନଶୈଳୀ ବିଶ୍ବ ଦରବାରରେ ସ୍ବତନ୍ତ୍ର ପରିଚୟ ସୃଷ୍ଟି କରିଛି । କୋଟିଏ ଦସ୍ତଖତ ସମ୍ବଳିତ ଓଡ଼ିଶାର ଆବେଗକୁ କେନ୍ଦ୍ର ସରକାର ଅଣଦେଖା କରିଚାଲିଛନ୍ତି ।
ଆଣ୍ଠୁ ଉପରକୁ ଲୁଗା, ଫୁଙ୍ଗୁଳା ଦେହ। ବିଂଶ ଶତାବ୍ଦୀର ପ୍ରଥମାର୍ଦ୍ଧରେ ଓଡ଼ିଶା ଖୋଲିଥିଲା ମହାତ୍ମାଙ୍କ ଆଖି। ଓଡ଼ିଶାର ଦାରିଦ୍ର୍ୟତା ଦେଖି ବିଗଳିତ ହୋଇଥିଲା ମହାତ୍ମାଙ୍କ ହୃଦୟ। ପୂର୍ଣ୍ଣ କୁର୍ତ୍ତା ପାଇଜାମା ଛାଡ଼ି ଫୁଙ୍ଗୁଳା ଦେହରେ ମହାତ୍ମା ପିନ୍ଧିଥିଲେ ଆଣ୍ଠୁ ଲୁଚୁନଥିବା ଲୁଗା । ବାପୁଙ୍କ ମନ୍ତ୍ରରେ ଅଭିମନ୍ତ୍ରିତ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ। ୨୦୦୦ମସିହାରୁ ଶାସନ ଗାଦିରେ ରହି ବି ଆପଣାଇଛନ୍ତି ସରଳ ଜୀବନଯାପନ। ଗାନ୍ଧୀଜୀଙ୍କ ୧୫୦ତମ ଜନ୍ମ ବାର୍ଷିକୀ ଅବସରରେ ୨୦୧୮ରୁ ସମ୍ବିଧାନର ମୁଖବନ୍ଧରେ ମହାତ୍ମାଙ୍କ ଅହିଂସାକୁ ସ୍ଥାନିତ କରିବାକୁ ଦାବି ହେଉଛି। ଦାବିକୁ ପୂରିବ ୫ବର୍ଷ, ହେଲେ ପୂରଣ ହୋଇନି ମୁଖ୍ୟମନ୍ତ୍ରୀଙ୍କ ଦାବି। କୋଟିଏ ଦସ୍ତଖତ ସମ୍ବଳିତ ଓଡ଼ିଶାର ଦାବିପତ୍ରକୁ କୋଣଠେସା କରି ପକାଇ ଦେଇଛି କେନ୍ଦ୍ର।
ମହାତ୍ମାଙ୍କ ଅବର୍ତ୍ତମାନରେ ଗାନ୍ଧୀଙ୍କ ବିଚାରଧାରା ଆଜି ବି ପ୍ରାସଙ୍ଗିକତା ରଖୁଛି। କ୍ଷମତାର ଅଳିନ୍ଦ ଭିତରେ ରହି ବି ମୁଖ୍ୟମନ୍ତ୍ରୀ ପାଳନ କରୁଛନ୍ତି ଅହିଂସା, ଅସ୍ତେୟ ସମେତ ଗାନ୍ଧୀଜୀଙ୍କ ଏକାଦଶ ମହାମନ୍ତ୍ରକୁ। ଲୋକଙ୍କ ସେବାକୁ ଜୀବନର ବ୍ରତ ଭାବେ ପାଳନ କରିଆସୁଛନ୍ତି ନବୀନ। । ମୁଖ୍ୟମନ୍ତ୍ରୀଙ୍କ ଶାସନରେ ଗଭୀର ଭାବେ ପ୍ରତିଫଳିତ ହୋଇଛି ମହାତ୍ମା ଗାନ୍ଧୀଙ୍କ ବିଚାରଧାରା। ସେଥିପାଇଁ ରାଜ୍ୟ ପ୍ରଶାସନର ଆଳୟ ଲୋକସେବା ଭବନର ମୁଖ୍ୟ ପ୍ରବେଶରେ ଗାନ୍ଧୀଙ୍କ ପରଶମଣିକୁ ସ୍ଥାନିତ କରିଛନ୍ତି ମୁଖ୍ୟମନ୍ତ୍ରୀ। ଦେଶ ଓ ରାଜ୍ୟ ଏବେ ପ୍ରଗତି ପଥରେ ଆଗେଇ ଚାଲିଛି। ସ୍ବାଧୀନତାର ୭୭ତମ ଦିବସ ଆଜି ଦେଶ ପାଳନ କରୁଛି। କିନ୍ତୁ ସ୍ବାଧୀନତା ପାଇଁ ବଳିଦାନ ଦେଇଥିବା ମହାପୁରୁଷଙ୍କ ଚିନ୍ତା ଓ ଚେତନା ଯୁଗେ ଯୁଗେ ଅମର। ଏବେର କେନ୍ଦ୍ର ସରକାର ଗାନ୍ଧୀଙ୍କ ସ୍ବଚ୍ଛ ଭାରତ ଅଭିଯାନକୁ ଆଗେଇ ନେଇଛନ୍ତି ସତ। ହେଲେ ମହାତ୍ମାଙ୍କ ଅମୂଲ୍ୟ ନିଧି ବୋଲାଉଥିବା ଅହିଂସାକୁ ସମ୍ବିଧାନରେ ସ୍ଥାନ ଦେବା ପାଇଁ କାହିଁକି ପଦକ୍ଷେପ ନେଉନାହନ୍ତି ବୋଲି ପ୍ରଶ୍ନ କରିଛନ୍ତି ବୈଜ୍ଞାନିକ ଓ ବୁଦ୍ଧିଜୀବୀ।
ତ୍ରିରଙ୍ଗାକୁ ସମ୍ମାନ ଦେଇ କେନ୍ଦ୍ର ସରକାର ହର ଘର ତ୍ରିରଙ୍ଗା କାର୍ଯ୍ୟକ୍ରମ ଚଳାଇଛନ୍ତି। ଏହି ତ୍ରିରଙ୍ଗାକୁ ବ୍ରିଟିଶ କବଳରୁ ମୁକ୍ତ କରିବାରେ ଯିଏ ମୁଖ୍ୟ ବିନ୍ଧାଣି ଥିଲେ, ତାଙ୍କ ବିଚାରକୁ ସମ୍ବିଧାନରେ ସ୍ଥାନ ଦେବାରେ କାହିଁକି ଏତେ କାର୍ପଣ୍ୟ ତାକୁ ନେଇ ପ୍ରଶ୍ନ ଉଠାଇଛନ୍ତି ବୁଦ୍ଧିଜୀବୀ।
