ମୁମ୍ବାଇ: ଆଗାମୀ ଲୋକସଭା ନିର୍ବାଚନ ପୂର୍ବରୁ ମହାରାଷ୍ଟ୍ର ରାଜନୀତିରେ ପୁଣିଥରେ ବଡ ଧରଣର ହଲଚଲ ହୋଇଛି । ଏନସିପିର ବରିଷ୍ଠ ନେତା ଅଜିତ ପାୱାର ଏକନାଥ ସିନ୍ଦେ ନେତୃତ୍ୱ ଏନଡିଏ ସରକାରରେ ସାମିଲ ହୋଇଛନ୍ତି । ଅଜିତଙ୍କ ପଦକ୍ଷେପ ଦଳର ମୁଖ୍ୟ ଶରଦ ପାୱାରଙ୍କ ପାଇଁ ନୂଆ ଚ୍ୟାଲେଞ୍ଜ ଆଣିଦେଇଛି । କିନ୍ତୁ ମହାରାଷ୍ଟ୍ର ସରକାରରେ ଆସିଥିବା ଝଡକୁ ଏକପ୍ରକାର ଏଡାଇ ଦେଇଛନ୍ତି ଏନସିପିର ବରିଷ୍ଠ ନେତା ଶରଦ ପାୱାର । ‘ସେ କହିଛନ୍ତି ପରିବାରରେ କୌଣସି ସମସ୍ୟା ନାହିଁ । ଏବେ ସୁଦ୍ଧା ମୁଁ କାହା ସହ ସମ୍ପର୍କ କରିନାହିଁ । ମୁଁ ଏବେ ସତାରା ପାଇଁ ବାହାରୁଛି । କାଲି ଠାରୁ ଏ ପର୍ଯ୍ୟନ୍ତ ମୁଁ କାହା ସହ କୌଣସି ସମ୍ପର୍କ କରିନାହିଁ’ ।
ଏନଡିଟିଭିରେ ପ୍ରକାଶିତ ଏକ ରିପୋର୍ଟ ମୁତାବକ ଶରଦ ପାୱାର କହିଛନ୍ତି ଯେ ‘ଆମ ପରିବାରରେ କୌଣସି ସମସ୍ୟା ନାହିଁ । ପରିବାରରେ ଆମେ ରାଜନୀତି ବିଷୟରେ ଚର୍ଚ୍ଚା କରୁନାହୁଁ । ପ୍ରତ୍ୟେକ ସଦସ୍ୟ ନିଜ ନିଜର ନିଷ୍ପତ୍ତି ନେଇଥାନ୍ତି’ । ପାୱାର ଆଜି ସତାରାରେ ଥିବା ସ୍ବତନ୍ତ୍ର ସେନାନୀ ଭାଇବି ଚୌହ୍ବାନଙ୍କ ସ୍ମାରକ ପରିଦର୍ଶନ କରିବେ । ସେଠାରେ ସେ ସ୍ମାରକୀରେ ଶ୍ରଦ୍ଧାଞ୍ଜଳୀ ଦେବା ସହିତ ମହାରାଷ୍ଟ୍ରର ଭବିଷ୍ୟତ ପାଇଁ କାର୍ଯ୍ୟପନ୍ଥା ଗ୍ରହଣ କରିବେ ।
ସେହିପରି ଅଜିତ ପାୱାରଙ୍କ ବିଦ୍ରୋହ ପରେ ପାର୍ଟିର ଆଇନଗତ ଲଢେଇ ଉପରେ କିଛି ମନ୍ତବ୍ୟ ଦେବାକୁ ମନା କରିଦେଇଛନ୍ତି ଶରଦ ପାୱାର । ସେ କହିଛନ୍ତି ତାଙ୍କୁ ଆଇନଗତ ଲଢେଇ ବିଷୟରେ କିଛି ଜଣା ନାହିଁ । ଏନସିପିର ପ୍ରଦେଶ ଅଧ୍ୟକ୍ଷ ଜୟନ୍ତ ପାଟିଲ ଏସବୁ ମାମଲା ବିଷୟରେ ନଜର ରଖିଛନ୍ତି । ସେ ଏହ ପ୍ରଶ୍ନର ଉତ୍ତର ଭଲଭାବେ ଦେଇପାରିବେ । ଗତ ୪ ବର୍ଷ ମଧ୍ୟରେ ବହୁ ବାଦ ବିବାଦ ମଧ୍ୟରେ ମହାରାଷ୍ଟ୍ର ସରକାର ଚାଲି ଆସୁଛି । ବିଧାୟକଙ୍କ ବିଦ୍ରୋହ ହେଉ କି ସରକାର ପତନ ମଧ୍ୟରେ ୪ଟି ଶପଥ ଗ୍ରହଣ ସମାରୋହ ସରିଲାଣି ।
