ଭୁବନେଶ୍ବର: ଉତ୍ତର ବଙ୍ଗୋପସାଗରରେ ସୃଷ୍ଟି ହେଲା ଘୂର୍ଣ୍ଣିବଳୟ । ପରବର୍ତ୍ତୀ ୪୮ ଘଣ୍ଟା ମଧ୍ୟରେ ଘନୀଭୂତ ହୋଇ ଏକ ଲଘୁଚାପ କ୍ଷେତ୍ରରେ ପରିଣତ ହେବାର ସମ୍ଭାବନା ରହିଛି । ଆଭ୍ୟନ୍ତରୀଣ ଓଡିଶା ଉପର ବାୟୁମଣ୍ଡଳର ୪.୫ କିମିରୁ ୫.୮ କିମି ମଧ୍ୟରେ ଏକ ଘୂର୍ଣ୍ଣିବଳୟ ସକ୍ରିୟ ରହିଛି । ଏହାର ପ୍ରଭାବରେ ଆଗାମୀ ୨ ଦିନ ରାଜ୍ୟରେ ବିସ୍ତୃତି ବର୍ଷା ହେବ । ୭ ତାରିଖ ଯାଏଁ କିଛି ଜିଲ୍ଲାରେ ପ୍ରବଳରୁ ଅତି ପ୍ରବଳ ବର୍ଷା ହେବ । ଆଜି ଓ ଆସନ୍ତାକାଲି କିଛି ଜିଲ୍ଲାରେ ବିଜୁଳି ଘଡଘଡି ଜନିତ ବର୍ଷା ସମ୍ଭାବନା ରହିଛି । ଏଥିପାଇଁ ୧୭ ଜିଲ୍ଲାକୁ ସତର୍କତା ଜାରି ହୋଇଛି ।
କୋହଲିଙ୍କ ସୁନ୍ଦରୀ ପାକିସ୍ତାନୀ ପ୍ରଶଂସକ, ବାବରଙ୍କୁ ଦେଖାଇଲେ ନାଲି ଆଖି
କାଣ୍ଡି: ଶନିବାର ଶ୍ରୀଲଙ୍କାର କାଣ୍ଡିରେ ଭାରତ ଓ ପାକିସ୍ତାନ ମଧ୍ୟରେ ଏସିଆ କପର ଗ୍ରୁପ୍ ମ୍ୟାଚ ଖେଳାଯାଇଥିଲା । କିନ୍ତୁ ବର୍ଷା କାରଣରୁ ଏହି ମ୍ୟାଚ ଅଧାରୁ ବାତିଲ ହୋଇଥିଲା । ଏହି ହାଇଭୋଲଟେଜ୍ ମ୍ୟାଚରେ ପ୍ରଥମେ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିଲା ଟିମ୍ ଇଣ୍ଡିଆ । ଭାରତ ପ୍ରଥମ ଇନିଂସରେ ୨୬୬ ରନ କରିଥିଲା । ତେବେ ପ୍ରଥମ ଇନିଂସ ପରେ ବର୍ଷା କାରଣରୁ ମ୍ୟାଚ୍ ଆଉ ଆରମ୍ଭ ହୋଇପାରିନଥିଲା । ତେବେ ମ୍ୟାଚ ବାତିଲ ହେବା କାରଣରୁ ଷ୍ଟାଡିୟମରେ ପହଞ୍ଚି ଥିବା ଫ୍ୟାନ୍ସମାନେ ନିରାଶ ହୋଇଥିଲେ । କାହିଁକି ସମସ୍ତେ ଚାହୁଁଥିଲେ ଏହି ଦୁଇ ପାରମ୍ପାରିକ ପ୍ରତିଦ୍ୱନ୍ଦୀଙ୍କ ମଧ୍ୟରେ ଏକ ହାଇଭୋଲଟେଜ୍ ମ୍ୟାଚ୍ ଦେଖିବାକୁ ।
https://twitter.com/SillyMessiKohli/status/1698027322740453796?s=20
ତେବେ ଏସବୁ ମଧ୍ୟରେ ଜଣେ ପାକିସ୍ତାନୀ ଫ୍ୟାନ୍ ଗାର୍ଲଙ୍କ ଭିଡିଓ ସୋସିଆଲ ମିଡିଆରେ ଖୁବ୍ ଭାଇରାଲ ହେବାରେ ଲାଗିଛି। ସେ କହିଛନ୍ତି ଯେ ସେ କେବଳ ଭାରତର ବିରାଟ କୋହଲିଙ୍କୁ ଦେଖିବାକୁ ଷ୍ଟାଡିୟମକୁ ଆସିଛନ୍ତି। ଭାଇରାଲ ହେଉଥିବା ଭିଡିଓରେ ପ୍ରଶଂସକ ଜଣଙ୍କ କହିଛନ୍ତି, ‘ ବିରାଟ କୋହଲି ମୋର ପ୍ରିୟ ଖେଳାଳି ଏବଂ ମୁଁ ବିରାଟ କୋହଲିଙ୍କୁ ଦେଖିବାକୁ ବିଶେଷ ଭାବେ ଆସିଥିଲି। ମୁଁ ଆଶା କରୁଥିଲି ସେ ଏକ ଏଠାରେ ଶତକ ହାସଲ କରିବେ । କିନ୍ତୁ ତାହା ହୋଇପାରିଲାନି ମୋର ହୃଦୟ ଭାଙ୍ଗିଗଲା’ ।
ପାକିସ୍ତାନରୁ ଆସିଥିବା ଏହି ଫ୍ୟାନ୍ ଗାର୍ଲ ସମସ୍ତଙ୍କ ସାମ୍ନାରେ ବିରାଟ କୋହଲିଙ୍କୁ ସମର୍ଥନ କରୁଥିଲେ । ଏହି ସମୟରେ ଜଣେ ପାକିସ୍ତାନୀ ପ୍ରଶଂସକ କହିଥିଲେ କି ସେ ଭାରତକୁ ସମର୍ଥନ କରୁନାହାନ୍ତି ବରଂ ବିରାଟଙ୍କୁ ସମର୍ଥନ କରୁଛନ୍ତି । ତେବେ ଏହାର ଜବାବରେ ଫ୍ୟାନ୍ ଗାର୍ଲ ଜଣଙ୍କ କହିଥିଲେ କି ’ଚାଚା ପଡ଼ୋଶୀଙ୍କୁ ଭଲ ପାଇବା କିଛି ଖରାପ ଜିନିଷ ନୁହେଁ’ । ଏହା ପରେ ସାମ୍ବାଦିକ ତାଙ୍କୁ ପଚାରିଥିଲେ ଯେ ଯଦି ଆପଣ ବିରାଟ କୋହଲି ଏବଂ ବାବର ଆଜାମଙ୍କ ମଧ୍ୟରେ ବାଛିବାକୁ ପଡିବ, ତେବେ ଆପଣ କାହାକୁ ବାଛିବେ? ଏହି ପ୍ରଶ୍ନର ଉତ୍ତରରେ ସେ ବିରାଟ କୋହଲିଙ୍କୁ ବାଛିବେ ବୋଲି କହିଥିଲେ । ଏହି ଫ୍ୟାନ୍ ଗାର୍ଲଙ୍କ ଭିଡିଓ ଏବେ ସୋସିଆଲ ମିଡିଆର ଖୁବ୍ ଭାଇରାଲ ହେଉଛି ।
ଭାରତ-ପାକିସ୍ତାନ ଖେଳାଳିଙ୍କ ବନ୍ଧୁତାକୁ ନେଇ ଏମିତି କହିଲେ ଗୌତମ ଗମ୍ଭୀର
ନନ୍ଦିଘୋଷ ବ୍ୟୁରୋ: ଶନିବାର ଏସିଆ କପର ଏକ ଗୁରୁତ୍ବପୂର୍ଣ୍ଣ ମ୍ୟାଚରେ ଭାରତ ଏବଂ ପାକିସ୍ତାନ ମଧ୍ୟରେ ଅନୁଷ୍ଠିତ ହୋଇଥିଲା । ଏହି ମ୍ୟାଚରେ ବର୍ଷା ବାଧକ ସାଜିଥିବାବେଳେ ଉଭୟ ଦଳ ପଏଣ୍ଟ ଭାଗ ବାଣ୍ଟିଛନ୍ତି । ଭାରତ ପ୍ରଥମେ ବ୍ୟାଟିଂ କରି ସମସ୍ତ ଓ୍ବିକେଟ ହରାଇ ୨୬୬ ରନ ସଂଗ୍ରହ କରିଥିଲା । ୨୬୭ ରନର ଟାର୍ଗେଟ ରହିଥିବାବେଳେ ବର୍ଷା କାରଣରୁ ପାକିସ୍ତାନ ଗୋଟିଏ ବି ବଲ ଖେଳିପାରିନାହିଁ । ସେପଟ ଖେଳ ସମୟରେ ଉଭୟ ଦଳର ଖେଳାଳିଙ୍କ ମଧ୍ୟରେ ବନ୍ଧୁତାର କିଛି ଦୃଶ୍ୟ ନଜରକୁ ଆସିଥିଲା । ଯାହାକି ସୋସିଆଲ ମିଡିଆରେ ମଧ୍ୟ ବେଶ ଭାଇରାଲ ହୋଇଛି । ମାତ୍ର ପୂର୍ବତନ ଭାରତୀୟ କ୍ରିକେଟର ଗୌତମ ଗମ୍ଭୀର ଏହାକୁ ସହଜରେ ଗ୍ରହଣ କରିପାରିନାହାନ୍ତି ।
ଗମ୍ଭୀର କହିଛନ୍ତି କି, ଯେତେବେଳେ ଆପଣ ପଡ଼ିଆରେ ଜାତୀୟ ଦଳ ପାଇଁ ଖେଳନ୍ତି, ସେତେବେଳେ ଆପଣଙ୍କୁ ବନ୍ଧୁତାକୁ ସୀମାଠାରୁ ଦୂରେଇ ରଖିବାକୁ ପଡିବ। ଏକ ଖେଳ ଚେହେରା ରହିବା ଜରୁରୀ | ବନ୍ଧୁତା ବାଉଣ୍ଡୁରୀ ବାହାରେ ରହିବା ଉଚିତ୍ | ସାତ ଘଣ୍ଟିଆ ମ୍ୟାଚ୍ ପରେ ଆପଣ ବନ୍ଧୁ ହୋଇପାରିବେ | ଖେଳ ସମୟ ବେଶ ଗୁରୁତ୍ବପୂର୍ଣ୍ଣ | କାରଣ ଆପଣ କୋଟି କୋଟି ଲୋକଙ୍କୁ ପ୍ରତିନିଧିତ୍ୱ କରୁଛନ୍ତି |
କାମରନ୍ ଅକମଲଙ୍କ ଉଦାହରଣ ଦେଇ ଗମ୍ଭୀର କହିଛନ୍ତି, “ମୁଁ ଏବଂ କାମ୍ରାନ୍ ଆକମଲ ବହୁତ ଭଲ ବନ୍ଧୁ। କାମ୍ରାନ୍ ମୋତେ ଏକ ବ୍ୟାଟ୍ ଦେଇଥିଲେ। ମୁଁ ତାଙ୍କୁ ବ୍ୟାଟ୍ ମଧ୍ୟ ଦେଇଥିଲି | ମୁଁ ସିଜିନ୍ ପାଇଁ ତାଙ୍କ ଦ୍ୱାରା ଦିଆଯାଇଥିବା ବ୍ୟାଟ୍ ସହିତ ଖେଳିଛି | ଆମେ ମଧ୍ୟ ଅଧ ଘଣ୍ଟା ପାଇଁ କଥା ହୋଇଥିଲୁ | ଆପଣ ପଡ଼ିଆରେ ଜଣେ ଖେଳାଳିଙ୍କୁ ସ୍ଲେଡ୍ କରିଥିଲେ | ଆମେ ପଡ଼ିଆରେ ମୁହାଁମୁହିଁ ହୋଇଥିଲୁ । କିନ୍ତୁ ଉଭୟ ଆମେ ଭଲ ବନ୍ଧୁ । ମାତ୍ର ପଡ଼ିଆରେ ସବୁବେଳେ ଆକ୍ରମଣାତ୍ମକଭାବେ ଖେଳିବା ଆବଶ୍ୟବ ।
ହାତୀପଲଙ୍କ ଉତ୍ପାତ
କାମାକ୍ଷାନଗର: କାମାକ୍ଷାନଗର ମହାବିରୋଡ଼ ରେଞ୍ଜ ଡିହଡୋଳ ଫରେଷ୍ଟ ସେକ୍ସନ ଜଟିଆ ଗାଁରେ ୨୫ ଟିକିଆ ହାତୀ ପଲଙ୍କ ଉତ୍ପାତ । ଯାହାକୁ ନେଇ ଚାଷୀ ଓ ଅଞ୍ଚଳବାସୀ ଆତଙ୍କିତ ଅବସ୍ଥାରେ ରହିଥିବା ଦେଖିବାକୁ ମିଳିଛି । ବନ ବିଭାଗ ପକ୍ଷରୁ ହାତୀ ଗୁଡିକ ଘଉଡାଇବା ପାଇଁ ପ୍ରୟାସ ଜାରି ରହିଛି । ତେବେ ହାତୀ ଗୁଡିକ ନିକଟସ୍ଥ ପିତିରି ସଂରକ୍ଷିତ ଜଙ୍ଗଲରେ ରହି ଆସୁଥିବା ବନ ବିଭାଗ ପକ୍ଷରୁ ସୂଚନା ମିଳିଛି ।ଗତ କିଛି ବର୍ଷ ହେବ ହାତୀଙ୍କ ଉତ୍ପାତକୁ ନେଇ ଜଟିଆ ଓ ଡମୋଳ ଗାଁର ଲୋକମାନେ ଚାଷ କାର୍ଯ୍ୟ ଛାଡି ଦେଇଛନ୍ତି ।
କମାଣ୍ଡ ଅନୁସାରେ କାର୍ଯ୍ୟ କରୁଛି ଆଦିତ୍ୟ ଏଲ 1
ନନ୍ଦିଘୋଷ ବ୍ୟୁରୋ: ବେଶ୍ କାର୍ଯ୍ୟଦକ୍ଷତା ଦେଖାଉଛି ଆଦିତ୍ୟ ଏଲ୧ । ପ୍ରଥମ କକ୍ଷପଥ ପରିବର୍ତ୍ତନ କରିଛି ସ୍ପେସକ୍ରାଫ୍ଟ । ବର୍ତ୍ତମାନ ନିଜ କକ୍ଷ ପଥରେ ଆଦିତ୍ୟ ଏଲ୧ ସମ୍ପୂର୍ଣ୍ଣ ସଫଳ ହେଉଛି ଏବଂ କମାଣ୍ଡ ଅନୁସାରେ କାର୍ଯ୍ୟ କରୁଛି । ବେଙ୍ଗାଳୁରୁସ୍ଥିତ ଆଇଏସଟିଆରଏସିରୁ ଆଦିତ୍ୟ ଏଲ୧ ସୁପରିଚାଳିତ ହେଉଛି । ପ୍ରଥମ ଆର୍ଥ ବାଉଣ୍ଡ ମାନୋଭର ବା ଇବିଏନର ବର୍ତ୍ତମାନ ୨୪୫ କିଲୋମିଟର ଗୁଣନ ୨୨ ହଜାର ୪୫୯ କିଲୋମିଟର କକ୍ଷପଥରେ ରହିଛି । ଆସନ୍ତା ୫ ତାରିଖ ଅପରାହ୍ଣ ୩ଟାରେ ପରବର୍ତ୍ତୀ କକ୍ଷପଥ ପରିବର୍ତ୍ତନ ହେବ ବୋଲି ଇସ୍ରୋ କହିଛି । ୧୬ ଦିନ ଯାଏ ଆଦିତ୍ୟ ଏଲ୧ ପୃଥିବୀଭିତ୍ତିକ କକ୍ଷପଥରେ ରହିବ । ଏହି ସମୟ କାଳ ମଧ୍ୟରେ ୫ଟି କକ୍ଷପଥ ପରିବର୍ତ୍ତନ ପ୍ରକ୍ରିୟା ରହିଛି । ପରେ ନିଜର ଯାତ୍ରା ଲାଗି ଏହା ସମ୍ପୂର୍ଣ୍ଣ ଗତିକ୍ଷମତା ଲାଭ କରିବ । ପରେ ଆଦିତ୍ୟ ଏଲ୧ ‘ଟ୍ରାନସ ଲାଗରେଞ୍ଜିଆନ୧ରେ ପ୍ରବେଶ କରିବ । ଏହା ପରେ ୧୧୦ ଦିନ ଲାଗି ଆଦିତ୍ୟ ଏଲ୧ ଗତି କରିବା ସହ ଏଲ୧ ପଏଣ୍ଟରେ ଅବସ୍ଥାପିତ ହେବ । ଏଲ୧ ପଏଣ୍ଟରେ ପ୍ରବେଶ କରିବା ପରେ ସୂର୍ଯ୍ୟ ଓ ପୃଥିବୀ ମଧ୍ୟରେ ରହିଥିବା ଭାରସାମ୍ୟମୂଳକ ପଏଣ୍ଟରେ ଏହା ଅବସ୍ଥାପିତ ହେବ । ପ୍ରାୟ ୪ ମାସ ପରେ ଏଲ୧ ଅବଜର୍ଭେସନ ପଏଣ୍ଟରେ ପହଞ୍ଚିବ ଯାହାକି ପୃଥିବୀଠାରୁ ୧୫ ଲକ୍ଷ କିଲୋମିଟର ଦୂରରେ ଅବସ୍ଥିତ ।
ସନାତନ ଧର୍ମକୁ ମ୍ୟାଲେରିଆ ସହ ତୁଳନା କରି ଫସିଲେ ଉଦୟନିଧି ଷ୍ଟାଲିନ୍
ନୂଆଦିଲ୍ଲୀ: ତାମିଲନାଡୁ ସରକାରରେ ମନ୍ତ୍ରୀ ତଥା ମୁଖ୍ୟମନ୍ତ୍ରୀ ଏମକେ ଷ୍ଟାଲିନଙ୍କ ପୁଅ ଉଦୟନିଧି ଷ୍ଟାଲିନଙ୍କ ସନାତନ ଧର୍ମକୁ ନେଇ ବୟାନ ବିବାଦୀୟ ହେବାରେ ଲାଗିଛି । ଏକ ସଭାକୁ ସମ୍ବୋଧିତ କରିବା ସମୟରେ ଡିଏମକେ ନେତା ଉଦୟନିଧି ସନାତନ ଧର୍ମକୁ ମ୍ୟାଲେରିଆ ଓ ଡଙ୍ଗୁ ସହ ତୁଳନା କରିଥିଲେ । ଯାହାକୁ ନେଇ ବିବାଦୀୟ ହୋଇ ପଡ଼ିଛନ୍ତି ଉଦୟନିଧି । ତାଙ୍କ ବୟାନକୁ ନେଇ ଥାନାରେ ଏତଲା ମଧ୍ୟ ହୋଇଛି । ଏପରିକି ବିଜେପି ଏହାକୁ ଇଣ୍ଡିଆ ମେଣ୍ଟ ସହ ଯୋଡ଼ିବା ସହ ଏହା କଂଗ୍ରେସର ହିନ୍ଦୁ ବିରୋଧୀ ମନୋଭାବ ବୋଲି କହି ଆକ୍ଷେପ କରିଛି ।
ସୁପ୍ରିମକୋର୍ଟ ଓକିଲ ତଥା ସମାଜିକ କର୍ମୀ ବିନିତ ଜିନ୍ଦଲ ଉଦୟନିଧି ଷ୍ଟାଲିନଙ୍କ ବିରୋଧରେ ସନାତନ ଧର୍ମ ବିରୋଧରେ ଉତ୍ତେଜକ ଭାଷଣ ଦେବା ଓ ମାନହାନୀ କରିବା ଭଳି ବୟାନ ଦେବା ପ୍ରତିବାଦରେ ଦିଲ୍ଲୀ ପୋଲିସ ପାଖରେ ଏତଲା ଦେଇଛନ୍ତି । ଏହାସହ ହିନ୍ଦୁ ସେନା ପକ୍ଷରୁ ମଧ୍ୟ ଉଦୟନିଧି ଷ୍ଟାଲିନଙ୍କ ବିରୋଧରେ ଦିଲ୍ଲୀରେ ଏତଲା ଦିଆଯାଇଛି ।
କ’ଣ କହିଥିଲେ ଉଦୟନିଧି ?
ଉଦୟନିଧି ନିଜ ଭାଷଣରେ ସନାତନ ଧର୍ମକୁ ମ୍ୟାଲେରିଆ ଓ ଡେଙ୍ଗୁ ସହ ତୁଳନା କରିଥିଲେ । ସେ କହିଥିଲେ, ‘ସନାତନକୁ କେବଳ ବିରୋଧ କରା ନଯାଇ ତାହାକୁ ଶେଷ କରିଦିଆ ଦରକାର ।’
ଅଭିଯୋଗ ଅନୁସାରେ ସନାତନ ବିଲୟ ସମ୍ମିଳନୀରେ ମନ୍ତବ୍ୟ ଦେଇ ଉଦୟନିଧି କହିଥିଲେ, ‘ସନାତନ ନାଁ ସଂସ୍କୃତରୁ ଆସିଛି । ସନାତନ ଧର୍ମ ସାମାଜିକ ନ୍ୟାୟ ଓ ସମାତନାର ବିରୋଧୀ । କିଛି ଜିନିଷର ବିରୋଧ କରାଯାଇ ପାରିବ ନାହିଁ, ଏହାକୁ ଶେଷ କରିଦିଆଯିବା ଉଚିତ । ଆମେ ଡେଙ୍ଗୁ, ମଶା, ମ୍ୟାଲେରିଆ ଓ କରୋନାକୁ ବିରୋଧ କରିପାରିବା ନାହିଁ । ଆମକୁ ଏହାକୁ ଶେଷ କରିବାକୁ ପଡ଼ିବ । ସେହିପରି ଆମକୁ ସନାତନ ଧର୍ମକୁ ଶେଷ କରିବାକୁ ପଡ଼ିବ ।’
ଦେଶର ୮୦ ପ୍ରତିଶତ ଲୋକଙ୍କ ନରସଂହାର ପାଇଁ ଆହ୍ବାନ !
ଉଦୟନିଧିଙ୍କ ବୟାନକୁ ନେଇ ବିଜେପି ଟାର୍ଗେଟ କରିଛି । ବିଜେପି ଆଇଟି ସେଲ୍ ମୁଖ୍ୟ ଅମିତ ମାଲଭିଅ ଉଦୟନାଥଙ୍କୁ ଟାର୍ଗେଟ କରିଛନ୍ତି । ସେ କହିଛନ୍ତି, ‘ଉଦୟନିଧି ସନାତନ ଧର୍ମକୁ ଡେଙ୍ଗୁ ଓ ମ୍ୟାଲେରିଆ ସହ ତୁଳନା କରିଛନ୍ତି । ତାଙ୍କ ମତରେ ଏହାକୁ ବିରୋଧ କରାଯାଇ ପାରିବନି, ଶେଷ କରିବାକୁ ପଡ଼ିବ । ପରୋକ୍ଷରେ ସେ ସନାତନ ଧର୍ମକୁ ମାନୁଥିବା ଦେଶର ୮୦ ପ୍ରତିଶତ ଲୋକଙ୍କ ନରସଂହାର ପାଇଁ ଆହ୍ବାନ ଦେଇଛନ୍ତି । ଡିଏମକେ ବିରୋଧୀ ମେଣ୍ଟର ଏକ ପ୍ରମୁଖ ଅଂଶ ଓ କଂଗ୍ରେସର ଦୀର୍ଘକାଳୀନ ସହଯୋଗୀ । କ’ଣ ମୁମ୍ବାଇ ବୈଠକରେ ଏହାକୁ ନେଇ ସହମତି ହୋଇଥିଲା ?’
ସୋସିଆଲ ମିଡିଆରେ ଅମିତ ମାଲଭିଅ ଟାର୍ଗେଟ କରିବା ପରେ ଏହାର ଜବାବ ରଖିଛନ୍ତି ଉଦୟନିଧି । ସେ କହିଛନ୍ତି, ମୁଁ ସନାତନ ଧର୍ମକୁ ମାନୁଥିବା ଲୋକଙ୍କ ନରସଂହାର କରିବାକୁ ଆହ୍ବାନ ଦେଇନାହିଁ । ସନାତନ ଧର୍ମ ପାଇଁ ନିର୍ଯାତିତ ହେଉଥିବା ଦଳିତ ସମ୍ପ୍ରଦାୟଙ୍କ ପାଇଁ କହିଛି । ଆଗକୁ ସେ କହିଛନ୍ତି, ‘ମୋ ମନ୍ତବ୍ୟକୁ ନେଇ ମୁଁ ଯେକୌଣସି ଆଇନଗତ ଚ୍ୟାଲେଞ୍ଜର ସମ୍ମୁଖୀନ ହେବାକୁ ପ୍ରସ୍ତୁତ ଅଛି । ଡିଏମକେ ସରକାର ଏମକେ ଷ୍ଟାଲିନଙ୍କ ନେତୃତ୍ବରେ ସାମାଜିକ ନ୍ୟାୟ ସନ୍ତୁଳିତ ରଖିବାକୁ ଓ ସମାନତାବାଦୀ ସମାଜ ସ୍ଥାପନ କରିବାକୁ ସଂଘର୍ଷ ଜାରି ରଖିଛି ।’
ଗତକାଲି ବଜ୍ରପାତରେ ରାଜ୍ୟରେ ୧୨ ଜଣଙ୍କ ମୃତ୍ୟୁ ହୋଇଛି, ମୃତକଙ୍କ ପରିବାରକୁ ୪ ଲକ୍ଷ ଟଙ୍କା ସହାୟତା ଘୋଷଣା
ଭୁବନେଶ୍ୱର: ଗତକାଲି ସାରା ରାଜ୍ୟରେ ପ୍ରବଳ ବର୍ଷା ସହ ବିଜୁଳି ଘଡ଼ଘଡ଼ି ମାରିଥିଲା । ଏହି ସମୟ ମଧ୍ୟରେ ରାଜ୍ୟର ବିଭିନ୍ନ ସ୍ଥାନରେ ବଜ୍ରାଘାତରେ ୧୨ ଜଣଙ୍କ ମୃତ୍ୟୁ ହୋଇଛି । ସେହିପରି ୧୪ ଜଣ ଆହତ ହୋଇଛନ୍ତି । ୮ ଗାଈଗୋରୁ ମୃତାହତ ହୋଇଥିବା ନେଇ ଏସଆରସି ପକ୍ଷରୁ ସୂଚନା ଦିଆଯାଇଛି । କେଉଁ ଜିଲ୍ଲାରେ କେତେଜଣ ମୃତାହତ ହୋଇଛନ୍ତି ତାର ସୂଚୀ ଜାରି କରାଯାଇଛି । ଏଥିସହିତ ପ୍ରତ୍ୟେକ ମୃତକଙ୍କ ପରିବାରକୁ ୪ ଲକ୍ଷ ଟଙ୍କା ଲେଖାଏଁ ଅନୁକମ୍ପାମୂଳକ ରାଶି ଦିଆଯିବା ନେଇ ମଧ୍ୟ ଘୋଷଣା କରାଯାଇଛି । ଗାଈଗୋରୁଙ୍କ ମୃତ୍ୟୁ କ୍ଷେତ୍ରରେ ଆବଶ୍ୟକୀୟ ସହାୟତା ରାଶି ଦିଆଯିବ ବୋଲି ଏସଆରସି ପକ୍ଷରୁ ସୂଚନା ଦିଆଯାଇଛି ।
କେଉଁ ଜିଲ୍ଲାରେ କେତେ ମୃତାହତ ହୋଇଛନ୍ତି…..
ଆମେରିକାରେ ବଢୁଛି ଟୁଥପେଷ୍ଟ ଓ ଚକୋଲେଟ ଚୋରି
ଓ୍ବାସିଂଟନ: ଆମେରିକାରେ ଅଦ୍ଭୁତ ଧରଣର ଚୋରି । ବଢ଼ିବାରେ ଲାଗିଛି ଟୁଥପେଷ୍ଟ, ଚକୋଲେଟ, ଓ୍ବାସିଂ ପାଉଡର ଓ ଡିଓଡରାଣ୍ଟର ଚୋରି । ଏହି କାରଣରୁ କଡ଼ା ସୁରକ୍ଷା ମଧ୍ୟରେ ଏସବୁ ଦ୍ରବ୍ୟକୁ ରଖୁଛନ୍ତି ରିଟେଲର । ଯାହା ଦର ବୃଦ୍ଧିର କାରଣ ପାଲଟିଛି ।
ଦେଶରେ ଏହି ସବୁ ଜିନିଷର ଚୋରି ବୃଦ୍ଧି ପାଉଥିବା ସହ ସଂଗଠିତ ଅପରାଧମାନ ଘଟୁଥିବାରୁ ଏହାକୁ ନେଇ ଉଦବେଗ ପ୍ରକାଶ କରିଛନ୍ତି ରିଟେଲର ଓ୍ବାଲମାର୍ଟ ଆଣ୍ଟ ଟାର୍ଗେଟ, ସିଭିଏସ, ଓ୍ବାଲଗ୍ରୀନ, ହୋମଡିପୋ, ଜୋତା ବିକ୍ର ସଂସ୍ଥା ଫୁଟ ଲକର । ଚୋରିକୁ କେନ୍ଦ୍ର କରି ବହୁ ହିଂସା ଘଟୁଥିବାରୁ ଏହି ସଂସ୍ଥାମାନେ ଉଦବେଗ ପ୍ରକାଶ କରିଛନ୍ତି । ଦେଶରେ ସଂଗଠିତ ଖୁଚୁରା ଅପରାଧ ଓ ଚୋରି ଆଦି ବୃଦ୍ଧି ପାଉଥିବାରୁ ଉଦବେଗ ପ୍ରକାଶ କରିଛନ୍ତି ସ୍ପୋର୍ଟିଂ ଗୁଡସର ସିଇଓ ଲରେନ ହୋବାର୍ଟ ।
ଚଳିତବର୍ଷର ପ୍ରଥମ ୫ ମାସରେ ଆମେରିକାରେ ଥିବା ଏହି ସଂସ୍ଥାଗୁଡିକରେ ଚୋରି ସଂଖ୍ୟା ୧୨୦ ପ୍ରତିଶତ ବୃଦ୍ଧି ପାଇଛି । ନ୍ୟାସନାଲ ରିଟେଲ ଫେଡେରେସନର ରିପୋର୍ଟ ଅନୁସାରେ ୨୦୨୨ରେ ରିଟେଲର ସଂସ୍ଥାମାନେ ଚୋରି, ଦୋକାନରୁ ଲୁଟ, ପ୍ରଶାସନିକ ତ୍ରୁଟି ଆଦି କାରଣରୁ ୯୪.୫ ବିଲିୟନ ଡଲାର କ୍ଷତିରେ ପଡିଥିଲେ । ଚୋରଙ୍କ ଦାଉରୁ ରକ୍ଷା କରିବା ଲାଗି ଦୋକାନୀମାନେ ରେଫ୍ରିଜେରେଟରରେ ପ୍ୟାଡଲକଡ ଚେନ ଲଗାଇବା ସହ ଅନ୍ୟାନ୍ୟ ମାଧ୍ୟମ ଆପଣାଉଛନ୍ତି । ଓ୍ବାଶିଂଟନ ସୁପର ମାର୍କେଟରେ ବି ଚୋରି ଓ ହିଂସା ବଢୁଥିବା ସୂଚନା ମିଳିଛି । ଗତ ଅଗଷ୍ଟ ୧୨ ତାରିଖରେ ଲସ ଏଞ୍ଜେଲସରେ ନର୍ଡଷ୍ଟର୍ମ ଷ୍ଟୋରରେ ପ୍ରାୟ ୩୦ ଜଣ ମୁଖାପିନ୍ଧା ଦୁର୍ବୃତ୍ତ ୩ ଲକ୍ଷ ଡଲାରରୁ ଅଧିକ ମୂଲ୍ୟର ସାମଗ୍ରୀ ଲୁଟ୍ କରିଥିଲେ ।
କୁଚକ୍ରୀ ଗୋଷ୍ଠୀଙ୍କ ଉପରେ ବର୍ଷିଲେ ପରିବହନ ମନ୍ତ୍ରୀ ଟୁକୁନି ସାହୁ
ଭୁବନେଶ୍ୱର: କୁଚକ୍ରୀ ଗୋଷ୍ଠୀଙ୍କ ଉପରେ ବର୍ଷିଲେ ପରିବହନ ମନ୍ତ୍ରୀ ଟୁକୁନି ସାହୁ । ସେ କହିଛନ୍ତି ବିଭ୍ରାନ୍ତିକର ତଥ୍ୟ ଦେଇ ଲୋକମାନଙ୍କୁ ଭ୍ରମିତ କରୁଛନ୍ତି କୁଚକ୍ରୀ ଗୋଷ୍ଠୀ । ଟୁକୁନି ସାହୁ ଟ୍ୱିଟ୍ କରି କୁଚକ୍ରୀ ଗୋଷ୍ଠୀଙ୍କୁ ଜବାବ ଦେଇଛନ୍ତି । ସେ କହିଛନ୍ତି, ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ଯେଉଁଭଳି ଭାବେ ଲୋକଙ୍କ ସମସ୍ୟା ବୁଝୁଛି ଓ ସମାଧାନ କରୁଛି, ସେଥିରେ ବିରୋଧୀ ବ୍ୟତିବ୍ୟସ୍ତ ହୋଇପଡିଛନ୍ତି। ସେଥିପାଇଁ ବିଭ୍ରାନ୍ତିକର ବୟାନ ଦେଉଛନ୍ତି । ବିରୋଧୀ ଚାହୁଁନଥିଲେ ଲୋକଙ୍କ ସମସ୍ୟାର ସମାଧାନ ହେଉ। ସେଥିପାଇଁ ବିଭ୍ରାନ୍ତିକର ବକ୍ତବ୍ୟ ଦେଉଛନ୍ତି। କିଏ କହୁଛି ହେଲିକପଟରରେ ଗସ୍ତ ବାବଦକୁ ୩୦୦ କୋଟି ଖର୍ଚ୍ଚ ହୋଇଛି ତ କିଏ କହୁଛି ୫୦୦ କୋଟି ।
ବିରୋଧୀଙ୍କ ନିଜ କଥାରେ ବି ତାଳମେଳ ନାହିଁ। ପ୍ରକୃତରେ ଗତ ୫ବର୍ଷରେ ହେଲିକପଟରରେ ଗସ୍ତ ବାବଦକୁ ପ୍ରାୟ ୫୦କୋଟି ଖର୍ଚ୍ଚ ହୋଇଛି । ଅର୍ଥାତ୍ ବର୍ଷକୁ ହାରାହାରି ୧୦ରୁ ୧୨ କୋଟି ଟଙ୍କା ବ୍ୟୟ ହୋଇଛି। ଆସନ୍ତା ବିଧାନସଭା ଅଧିବେଶନରେ ସେ ଏନେଇ ତଥ୍ୟ ରଖିବେ ବୋଲି ଟୁକୁନି ସାହୁ କହିଛନ୍ତି । ନିଜର ବ୍ୟକ୍ତିଗତ ସ୍ୱାର୍ଥ ପାଇଁ ବିରୋଧୀ ଏପରି ମିଥ୍ୟା ପ୍ରଚାର କରୁଛନ୍ତି, ସେମାନଙ୍କୁ ଲଜ୍ଜା ଲାଗିବା ଦରକାର । ସାମାନ୍ୟ ଲଜ୍ଜା ଥିଲେ ବିଭ୍ରାନ୍ତିକର ତଥ୍ୟ ପ୍ରଚାର କରୁଥିବାରୁ ଓଡିଶାବାସୀଙ୍କ ନିକଟରେ କ୍ଷମା ପ୍ରାର୍ଥନା କରିବାକୁ ଟୁକୁନି ସାହୁ କହିଛନ୍ତି ।
ଶପଥ ନେବେ ହାଇକୋର୍ଟର ଦୁଇ ନୂଆ ବିଚାରପତି
କଟକ: ମଙ୍ଗଳବାର ଶପଥ ନେବେ ଓଡ଼ିଶା ହାଇକୋର୍ଟର ଦୁଇ ନୂଆ ବିଚାରପତି । ଶିବଶଙ୍କର ମିଶ୍ର ଏବଂ ଆନନ୍ଦ ଚନ୍ଦ୍ର ବେହେରାଙ୍କୁ ନୂଆ ବିଚାରପତି ଭାବେ ନିଯୁକ୍ତି ମିଳିଛି ।
ଅଗଷ୍ଟ ୧୭ ତାରିଖରେ ଓଡ଼ିଶା ହାଇକୋର୍ଟର ଦୁଇ ବିଚାରପତିଙ୍କ ନିଯୁକ୍ତି ପାଇଁ ସୁପ୍ରିମକୋର୍ଟ କଲେଜିୟମ ସୁପାରିସ କରିଥିଲେ । ରାଷ୍ଟ୍ରପତିଙ୍କ ଅନୁମୋଦନ ପରେ ଦୁଇ ବିଚାରପତିଙ୍କୁ ନିଯୁକ୍ତି ମିଳିଛି । ୧୯୬୮ ମସିହା ମେ’ ୩ ତାରିଖରେ ଜୟପୁରରେ ଶିବଶଙ୍କର ମିଶ୍ର ଜନ୍ମଗ୍ରହଣ କରିଥିଲେ । ଜୟପୁର ଆଇନ ମହାବିଦ୍ୟାଳୟରୁ LLB ଡିଗ୍ରୀ ହାସଲ ପରେ ୧୯୯୧ ମସିହାରୁ ଆଇନ ବ୍ୟବସାୟ ଆରମ୍ଭ କରିଥିଲେ । ଏବେ ସେ ସୁପ୍ରିମକୋର୍ଟରେ ଆଇନଜୀବୀ ରହିଛନ୍ତି ।
ସେହିପରି ୧୯୬୪ ମସିହା ଜନ୍ମିତ ଆନନ୍ଦ ଚନ୍ଦ୍ର ବେହେରା ଓଡ଼ିଶାର ବିଭିନ୍ନ ଅଦାଲତରେ ବିଚାର ବିଭାଗୀୟ ଅଧିକାରୀ ଭାବେ କାର୍ଯ୍ୟ କରିଛନ୍ତି । ଏବେ ସେ ରାଜ୍ୟ ଭିଜିଲାନ୍ସରେ ଳିଗାଲ ଆଡଭାଇଜର ଭାବେ କାର୍ଯ୍ୟରତ ଅଛନ୍ତି । ଦୁଇ ନୂଆ ବିଚାରପତିଙ୍କ ନିଯୁକ୍ତି ପରେ ହାଇକୋର୍ଟରେ ବିଚାରପତିଙ୍କ ସଂଖ୍ୟା ୨୨ରେ ପହଞ୍ଚିଛି ।