ଭୁବନେଶ୍ବର: ଆସନ୍ତା ଅକ୍ଟୋବର ପହିଲାରୁ ଆରମ୍ଭ ହେବ ଭୁବନେଶ୍ବର ବିମାନବନ୍ଦର ରନୱେ ରି-କାର୍ପେଣ୍ଟିଂ ବା ମରାମତି କାମ । ବର୍ଷା କମ୍ ହେଲେ ବିନା ଗୁଳୁଗୁଳିରେ ଏହି କାମ କରାଯାଏ । ଏହା ତିନି ମାସରେ ସାରିବାକୁ ଲକ୍ଷ୍ୟ ରଖାଯାଇଛି । ଏହି ସମୟରେ ରାତିରେ ୮ଘଣ୍ଟା ବନ୍ଦ ରହିବ ବିମାନସେବା । କ୍ୟାଟ ୨ ଲାଇଟର ଫିଟିଂ ବି ଏହି ସମୟରେ ରନୱେରେ ଲଗାଯିବ । ରନୱେ ରିକାର୍ପେଟିଂ ପାଇଁ ୭୨ କୋଟି ଓ କ୍ୟାଟ୍ ୨ ଲାଇଟ ପାଇଁ ୧୯ କୋଟି ଟଙ୍କା ଖର୍ଚ୍ଚ ହେବ । ଏଇ ସମୟରେ ରାତି ୧୦ରୁ ସକାଳ ୬, କିମ୍ବା ରାତି ୧୧ରୁ ସକାଳ ୭ଟା ଯାଏ ବିମାନ ସେବା ବନ୍ଦ ରହିବ ।
ଦିନିକିଆ ବିଶ୍ବକପ ପାଇଁ ଆଉ ୪ ଲକ୍ଷ ଟିକେଟ୍ ବିକ୍ରି କରିବ ବିସିସିଆଇ
ନନ୍ଦିଘୋଷ ବ୍ୟୁରୋ: ଆଗାମୀ ଦିନିକିଆ ବିଶ୍ବକପ୍ ଚାହିଦାକୁ ଦୃଷ୍ଟିରେ ରଖି ବିସିସିଆଇ ପରବର୍ତ୍ତୀ ପର୍ଯ୍ୟାୟରେ ୪ ଲକ୍ଷ ଟିକେଟ୍ ବିକ୍ରି କରିବାକୁ ଲକ୍ଷ୍ୟ ରଖିଛି। ଆୟୋଜକ ରାଜ୍ୟ ସଂଘମାନଙ୍କ ସହିତ ଆଲୋଚନା କରିବା ପରେ ବିସିସିଆଇ ଏହି ନିଷ୍ପତ୍ତି ନେଇଛି । ପ୍ରଥମେ ୭ଟି ପର୍ଯ୍ୟାୟରେ ଭାରତ ଓ ଅଣଭାରତୀୟ ମ୍ୟାଚ୍ଗୁଡ଼ିକ ସହିତ ଅଭ୍ୟାସ ମ୍ୟାଚ୍ଗୁଡ଼ିକ ପାଇଁ ଟିକେଟ୍ ବିକ୍ରି କରାଯାଇଥିଲା। ହେଲେ ଚାହିଦା ଅଧିକ ରହୁଥିବାରୁ ଅନେକ ସଂଖ୍ୟାରେ ପ୍ରଶଂସକମାନେ ଟିକେଟ୍ ପାଇବାରୁ ବଞ୍ଚିତ ହୋଇଥିଲେ। ତେଣୁ ଏହି ଐତିହାସିକ ଇଭେଣ୍ଟରେ ଅଧିକରୁ ଅଧିକ କ୍ରିକେଟ୍ ପ୍ରିୟ ଦର୍ଶକଙ୍କୁ ମ୍ୟାଚ୍ ଉପଭୋଗ ପାଇଁ ସୁଯୋଗ ଦେବାକୁ ବିସିସିଆଇ ଲକ୍ଷ୍ୟ ରଖିଛି। ଏହାଫଳରେ ମ୍ୟାଚ୍ ଦେଖିବା ପାଇଁ ଆଗ୍ରହ ରଖୁଥିବା ପ୍ରଶଂସକମାନେ ଟିକେଟ ପାଇବାରେ ଆଉ ନିରାଶ ହେବେ ନାହିଁ। ବିସିସିଆଇ ସମସ୍ତ ମ୍ୟାଚ୍ଗୁଡ଼ିକ ପାଇଁ ସେପ୍ଟେମ୍ବର ୮ ତାରିଖ ରାତି ୮ଟାରୁ ୱେବସାଇଟ୍ ଜରିଆରେ ଟିକେଟ୍ ବିକ୍ରି କରିବ।
ଭାରତ ଯୋଡ଼ ଯାତ୍ରାକୁ ବର୍ଷେ
ନୂଆଦିଲ୍ଲୀ: ଦେଶରୁ ବିଦ୍ବେଷଭାବ ଦୂର ହେବା ଯାଏ ଚାଲିବ ଭାରତ ଯୋଡ ଯାତ୍ରା । ଭାରତ ଯୋଡ ଯାତ୍ରାର ବାର୍ଷିକୀ ଅବସରରେ କଂଗ୍ରେସ ନେତା ରାହୁଲ ଗାନ୍ଧୀ କହିଛନ୍ତି- ଭାରତରୁ ବିଦ୍ବେଷଭାବ ଦୂର ହେବା ଯାଏ ତଥା ଭାରତର ଐକ୍ୟ ପ୍ରତିଷ୍ଠା ହେବା ଯାଏ ଏହି ଯାତ୍ରା ଚାଲିବ । ଗତବର୍ଷ କନ୍ୟାକୁମାରୀରୁ କାଶ୍ମୀର ପ୍ରାୟ ୪ ହଜାର କିଲୋମିଟର ଭାରତ ଯୋଡ ଯାତ୍ରା ହୋଇଥିବାବେଳେ ଏହାର ବ୍ୟାପକ ସଫଳତା ପରିଲକ୍ଷିତ ହୋଇଥିଲା । ରାହୁଲ କହିଛନ୍ତି-ଦେଶର ଉତ୍ତମ ଭବିଷ୍ୟତ ଲାଗି ଭାରତ ଯୋଡ ଯାତ୍ରାର ସ୍ବପ୍ନ ସାକାର ହୋଇଛି । ଦେଶର ଐକ୍ୟ ପ୍ରତିଷ୍ଠା ଦିଗରେ ବି ପ୍ରମୁଖ ଭୂମିକା ଗ୍ରହଣ କରିଥିଲା ଏହି ଯାତ୍ରା ।
ଭାରତରେ ସମ୍ପୂର୍ଣ୍ଣ ଐକ୍ୟ ପ୍ରତିଷ୍ଠା ଯାଏ ଏହି ଯାତ୍ରା ଚାଲିବ । ଏହା ତାଙ୍କର ପ୍ରତିଜ୍ଞା । ଏହି ଦୀର୍ଘ ଯାତ୍ରାରେ ୧୨ଟି ସାଧାରଣ ସଭା ଅନୁଷ୍ଠିତ ହୋଇଥିବାବେଳେ ୧୦୦ଟି ପଥପ୍ରାନ୍ତ ସଭା ଓ ୧୩ଟି ସାମ୍ବାଦିକ ସମ୍ମିଳନୀ ହୋଇଥିଲା । ଏହା ସହ ୩୭୫ରୁ ଅଧିକ ଭାବ ବିନିମୟ କାର୍ଯ୍ୟକ୍ରମ ହୋଇଥିଲା । ଏହି ଯାତ୍ରାବେଳେ ଦେଶର ବିଭିନ୍ନ ରାଜ୍ୟର ହଜାର ହଜାର ଲୋକ ସାମିଲ ହୋଇଥିଲେ ।
କମଳ ହାସନ, ପୂଜା ଭଟ୍ଟ, ରିୟା ସେନ, ସ୍ବରା ଭାସ୍କର, ରଶ୍ମୀ ଦେଶାଇ, ଆକାଂକ୍ଷା ପୁରୀ, ଅମୋଲ ପାଲେକର ପ୍ରମୁଖ ଅଭିନେତା ଓ ଅଭିନେତ୍ରୀ ସାମିଲ ହୋଇଥିଲେ । ଏହା ସହ ପୂର୍ବତନ ସେନାମୁଖ୍ୟ ଦୀପକ କାପୁର, ପୂର୍ବତନ ନୌସେନା ଅଧିକାରୀ ଏଲ. ରାମଦାସ, ପୂର୍ବତନ ରିଜର୍ଭ ବ୍ୟାଙ୍କ ଗଭର୍ଣ୍ଣର ରଘୁରାମ ରାଜନ, ପୂର୍ବତନ ଅର୍ଥସଚିବ ଅରବିନ୍ଦ ମାୟାରାମ ପ୍ରମୁଖ ସାମିଲ ହୋଇଥିଲେ । ଏହା ସହ ନ୍ୟାସନାଲ କନଫରେନ୍ସ ନେତା ଫାରୁର ଅବଦୁଲ୍ଲା, ଓମାର ଅବଦୁଲ୍ଲା, ପିଡିପିର ମେହବୁବା ମୁଫତି, ଶିବସେନାର ଆଦିତ୍ୟ ଠାକରେ, ପ୍ରିୟଙ୍କା ଚତୁର୍ବେଦୀ, ସଞ୍ଜୟ ରାଓ୍ବତ, ଏନସିପିର ସୁପ୍ରିୟା ସୁଲେ, କଂଗ୍ରେସ ନେତ୍ରୀ ସୋନିଆ ଗାନ୍ଧୀ, ପ୍ରିୟଙ୍କା ଗାନ୍ଧୀ, ମଲ୍ଲୀକାର୍ଜୁନ ଖଡଗେ ପ୍ରମୁଖ ସାମିଲ ହୋଇଥିଲେ ।
ସେଲଫି ପଠାଇଲା ଆଦିତ୍ୟ-L1
ନନ୍ଦିଘୋଷ ବ୍ୟୁରୋ: ପୃଥିବୀ ଓ ଚନ୍ଦ୍ରର ଫଟୋ ପଠାଇବା ସହ ଏକ ସେଲଫି ପଠାଇଛି ଆଦିତ୍ୟ ଏଲ-୧ । ଏନେଇ ସୂଚନା ଦେଇଛି ମହାକାଶ ଗବେଷଣା ସଂସ୍ଥା ଇସ୍ରୋ । ସୂର୍ଯ୍ୟ ଓ ପୃଥିବୀ ମଧ୍ୟସ୍ଥ ଏଲ୧ ପଏଣ୍ଟରେ ଅବସ୍ଥାପିତ ହେବାକୁ ଯାଉଥିବା ଆଦିତ୍ୟ ଏଲ୧ ବର୍ତ୍ତମାନ ସୁଦ୍ଧା ଦୁଇଟି କକ୍ଷପଥ ପରିବର୍ତ୍ତନ କରିସାରିଲାଣି । ପ୍ରାୟ ୪ ମାସର ଯାତ୍ରା ପରେ ଆଦିତ୍ୟ ସ୍ପେସକ୍ରାଫ୍ଟ ଏଲ୧ ପଏଣ୍ଟରେ ଅବସ୍ଥାପିତ ହେବ । ଆଦିତ୍ୟ ପଠାଇଥିବା ସେଲଫିରେ ଦୁଇଟି ପ୍ରମୁଖ ପେଲୋଡ ଭିଜିବଲ ଏମିସନ ଲାଇନ କରୋନାଗ୍ରାଫ ବା ଭିଇଏଲସି ଓ ସୋଲାର ଅଲଟ୍ରାଭାଓଲେଟ ଇମେଜିଂ ଟେଲିସ୍କୋପ ବା ଏସୟୁଆଇଟି ଦୃଶ୍ୟମାନ ହେଉଛି । ପୃଥିବୀଠାରୁ ପ୍ରାୟ ୧୫ ଲକ୍ଷ କିଲୋମିଟର ଦୂରରେ ଅବସ୍ଥାପିତ ହେବ ଆଦିତ୍ୟ ଏଲ୧ ।
ଭାରତ ଆସିବା ପୂର୍ବରୁ ଦେଶକୁ ନେଇ ଏମିତି କହିଲେ ବ୍ରିଟେନର ପ୍ରଧାନମନ୍ତ୍ରୀ ଋଷି ସୁନକ
ନନ୍ଦିଘୋଷ ବ୍ୟୁରୋ: ଜି-୨୦ ଶିଖର ସମ୍ମିଳନୀରେ ଯୋଗ ଦେବେ ବ୍ରିଟେନର ପ୍ରଧାମନ୍ତ୍ରୀ ଋଷି ସୁନକ । ଭାରତ ଆସିବା ପୂର୍ବରୁ ସେ ଦେଶକୁ ପ୍ରଂଶସା କରିଛନ୍ତି । ଭାରତର ଝିଅଙ୍କୁ ସେ ବିବାହ କରିଥିବାବେଳେ ଦେଶ ସହ ତାଙ୍କର ସମ୍ପର୍କ ଭଲ ରହିଛି । ତେବେ ସୁନକ ଭାରତ ଆସିବା ପୂର୍ବରୁ କହିଛନ୍ତି କି, ମୁଁ ଯେତେବେଳେ ଭାରତ ଆସେ ସେତେବେଳେ ଶାଶୁ-ଶ୍ବଶୁରଙ୍କ ଭେଟେ । ଆମେ ଦୁଇ ଦେଶକୁ ନେଇ କେବେ ମଧ୍ୟ କଥା ହେଇନଥାଉ । ପ୍ରାୟତଃ ଆମର କ୍ରିକେଟକୁ ନେଇ ଚର୍ଚ୍ଚା ହୋଇଥାଏ । ଯେତେବେଳେ କ୍ରିକେଟ ମ୍ୟାଚ ହୁଏ ସେତେବେଳେ ମୋ ଝିଅ ଭାରତକୁ ସପୋର୍ଟ କରେ । ଏବଂ ଫୁଟବଲ ମ୍ୟାଚରେ ବ୍ରିଟେନକୁ ସପୋର୍ଟ କରିଥାଏ । ଏପରିକି ସେ ତାଙ୍କ ଶାଶୁ ଶ୍ବଶୁରଙ୍କ ପାଇଁ ଗର୍ବ ଅନୁଭବ କରନ୍ତି ବୋଲି ମଦ୍ୟ କହିଛନ୍ତି ।
ଆପଣ ଜାଣିଥିବେ ଯେ ଋଷି ସୁନକ ହେଉଛନ୍ତି ୭୩୦ ନିୟୁତ ପାଉଣ୍ଡ୍ ମୂଲ୍ୟର ବ୍ୟକ୍ତିଗତ ସମ୍ପତ୍ତି ଥିବା ବିଶ୍ବର ଅନ୍ୟତମ ବିତ୍ତଶାଳୀ ବିଲିୟନାରିଙ୍କ ମଧ୍ୟରେ ଅନ୍ୟତମ ନାରାୟଣ ମୂର୍ତ୍ତିଙ୍କ ଜ୍ବାଇଁ। ସୁନକ ନାରାୟଣ ମୂର୍ତ୍ତିଙ୍କ ଝିଅ ଅକ୍ଷତା ମୂର୍ତ୍ତିଙ୍କୁ ୨୦୦୯ ମସିହାରେ ବାହା ହୋଇଥିଲେ। ବାହା ହେବା ପରେ ପରେ ଋଷି ସୁନକ ଖୁବ୍ ଶୀଘ୍ର ଉନ୍ନତି ପଥରେ ଅଗ୍ରସର ହୋଇଥିଲେ।
ନାରାୟଣ ମୂର୍ତ୍ତିଙ୍କ ଝିଅ ଅକ୍ଷତା ମଧ୍ୟ ଜଣେ କ୍ଷମତାଶାଳୀ ମହିଳା। ଭାରତରୁ ଯାଇଥିବା ତାଙ୍କ ପିତାମାତା କୋଟି କୋଟି ଟଙ୍କା ମୂଲ୍ୟର ‘ଇମ୍ଫୋସିସ୍ ଟେକ୍ କମ୍ପାନି’ର ମାଲିକ। ୪୨ ବର୍ଷ ବୟସରେ ପ୍ରଧାନମନ୍ତ୍ରୀ ହୋଇଥିବା ଋଷି ଆଧୁନିକ ଇଂଲଣ୍ଡ ଇତିହାସରେ ସର୍ବକନିଷ୍ଠ ପ୍ରଧାନମନ୍ତ୍ରୀ। ମାତ୍ର ୭ ବର୍ଷ ସାଂସଦ ହୋଇ ସେ ଦେଶର ପ୍ରଧାନମନ୍ତ୍ରୀ ହୋଇପାରିଛନ୍ତି।
ଉଦୟନିଧିଙ୍କ ପରେ ଏ.ରାଜା, ସନାତନ ଧର୍ମକୁ HIV ସହ କଲେ ତୁଳନା
ନୂଆଦିଲ୍ଲୀ: ଉଦୟନିଧିଙ୍କ ପରେ ଡିଏମକେ ସାଂସଦଙ୍କ ବିବାଦୀୟ ବୟାନ । ସନାତନ ଧର୍ମକୁ HIV ସହ କଲେ ତୁଳନା । କହିଲେ ସନାତନ ଧର୍ମ HIV ଏବଂ କୁଷ୍ଠ ରୋଗ ଭଳି ସାମାଜିକ କଳଙ୍କ ରୋଗ ବୋଲି ଜାଣିବା ଉଚିତ୍ । ଏ. ରାଜା କହିଛନ୍ତି କି, ଉଦୟନିଧି ଡେଙ୍ଗୁ ଏବଂ ମ୍ୟାଲେରିଆ ସହ ସନାତନ ଧର୍ମକୁ ତୁଳନା କରି ନରମ ବୟାନ ଦେଇଛନ୍ତି । ବାସ୍ତବରେ କିନ୍ତୁ ଏହା HIV ଭଳି ସାମାଜିକ କଳଙ୍କ ରୋଗ ଭଳି । ଏହି ବୟାନ ପରେ ରାଜନୈତିକ ମହଲରେ ହଟଚମଟ ସୃଷ୍ଟି ହୋଇଛି । ପୂର୍ବରୁ ଉଦୟନିଧି ଡେଙ୍ଗୁ ଏବଂ ମ୍ୟାଲେରିଆ ସହ ସନାତନ ଧର୍ମକୁ ତୁଳନା କରିଥିବାବେଳେ ଘଟଣାକୁ ନେଇ ୟୁପିରେ ମାମଲା ମଧ୍ୟ ରୁଜୁ ହୋଇଛି । ସେପଟେ ବିରୋଧୀମାନେ ବାରମ୍ବାର ଅଭିଯୋଗ କରୁଛନ୍ତି କି, ବିଜେପି ସରକାର ଧର୍ମ ନାଁରେ ରାଜନୀତି କରୁଛନ୍ତି ।
ରିଲିଜ୍ ହେଉ ହେଉ ଲିକ୍ ହେଲା ’ଯବାନ’ର HD ପ୍ରିଣ୍ଟ୍ ଭିଡିଓ
ମୁମ୍ବାଇ: ରିଲିଜ ହୋଇଛି ବହୁ ପ୍ରତିକ୍ଷୀତ ଫିଲ୍ମ ଯବାନ । ଶାହାରୁଖ ଖାନଙ୍କ ଅଭିନୀତ ଏହି ଫିଲ୍ମ ଆଡଭାନ୍ସ ଟିକେଟ ବୁକିଂରେ ରେକର୍ଡ କରିଥିବାବେଳେ ଫାଷ୍ଟ ଡେ ଫାଷ୍ଟ ସୋ’ ଦେଖିବା ପାଇଁ ହଲରେ ଲାଗିଛି ଦର୍ଶକଙ୍କ ଭିଡ଼ । ସବୁଠି ମିଠା ଖୁଆଇବା ସହ ନାଚି ଖାଇ ଫ୍ୟାନ୍ସମାନେ ଖୁସି ମନାଇଥିବା ଦେଖିବାକୁ ମିଳିଛି । ଏହି ଫିଲ୍ମ ଭଲ ରୋଜଗାର କରିବା ବୋଲି ଆଗୁଆ ଚର୍ଚ୍ଚା ହେଉଛି । କିନ୍ତୁ ଏହାରି ଭିତରେ ଫିଲ୍ମର HD ପ୍ରିଣ୍ଟ ଲିକ୍ ହୋଇଥିବା ଖବର ସମାନାକୁ ଆସିଛି । କିଛି ସାଇଟରେ ଭିଡିଓ ଲିକ୍ ହୋଇଯାଇଛି । Mp4movies, Vegamovies ଏବଂ Filmyzilla ଭଳି କିଛି ସାଇଟରେ ଲିକ୍ ହୋଇଛି । ଯଦିଓ କିଛି ସାଇଟ୍ ଏହାକୁ ପୁଣିଥିରେ ଡିଲିଟ୍ କରିଛନ୍ତି ତଥାପି କିଛି ସାଇଟରେ ଏବେ ମଧ୍ୟ ଲିଙ୍କ୍ ଉପଲବ୍ଧ ରହିଛି । ଯାହାକି ପ୍ରଯୋଜନା ସଂସ୍ଥା ଉପରେ ବଡ଼ ପ୍ରଭାବ ପକାଇବା ବୋଲି କୁହାଯାଉଛି । କୋଟି କୋଟି ଟଙ୍କାର କ୍ଷତି ସହିପାରେ ପ୍ରଯୋଜନା ସଂସ୍ଥା ।
ଜାପାନର ମୁନ୍ ମିଶନ, ଚନ୍ଦ୍ରକୁ ପଠାଇଲା ଯାନ
ନନ୍ଦିଘୋଷ ବ୍ୟୁରୋ: ଜାପାନର ମୁନ୍ ମିଶନ । ଚନ୍ଦ୍ରକୁ ଯାନ ପଠାଇଲା ଜାପାନ । ଗୁରୁବାର ସକାଳୁ ଜାପାନର ଜାତୀୟ ମହାକାଶ ଗବେଷଣା ସଂସ୍ଥା ମୁନ୍ ଲ୍ୟାଣ୍ଡର ଯାନର ଉତକ୍ଷେପଣ କରିଛି । ଗତ ମାସରେ ଏହି ଉତକ୍ଷେପଣ କରାଯିବାର ଥିଲା । ହେଲେ ଖରାପ ପାଗ ଯୋଗୁଁ ଏହା ସମ୍ଭବ ହୋଇପାରିନଥିଲା । ଜାପାନ ଜାତୀୟ ମହାକାଶ ଏଜେନ୍ସିର ଚନ୍ଦ୍ର ଲ୍ୟାଣ୍ଡରକୁ ନେଇ ଏଚ-୨-ଏ ରକେଟ ଉତକ୍ଷେପଣ କରିଛି । ଗତ ମାସରେ ଖରାପ ପାଗ ଯୋଗୁ ସପ୍ତାହରେ ତିନିଥର ମିଶନକୁ ସ୍ଥଗିତ ରଖିବା ପରେ ଜାପାନ ଶେଷରେ ଏହା କରିବାରେ ସଫଳ ହୋଇଛି ।
ନ୍ୟୁଜ ଏଜେନ୍ସି ରଏଟର୍ସ ଅନୁଯାୟୀ ଜାପାନ ଏରୋସ୍ପେସ ଏକ୍ସପ୍ଲୋରେଶନ ଏଜେନ୍ସି କହିଛି ଏହି ରକେଟ ଦକ୍ଷିଣ ଜାପାନର ତାନେଗାସିମା ସ୍ପେସ ସେଣ୍ଟରରୁ ଉତକ୍ଷେପଣ ହୋଇଛି । ଦୀର୍ଘ ଦିନ ଧରି ଜାପାନ ଏହାର ଚନ୍ଦ୍ର ମିଶନରେ କାର୍ଯ୍ୟ କରିଆସୁଛି । ଏହି ମିଶନ ଅଧୀନରେ ସ୍ମାର୍ଟ ଲ୍ୟାଣ୍ଡରକୁ ଚନ୍ଦ୍ର ଉପରେ ଅନୁସନ୍ଧାନ କରିବାକୁ ଅବତରଣ କରିବାକୁ ପଡିବ । ଆସନ୍ତା ବର୍ଷ ଆରମ୍ଭରେ ଚନ୍ଦ୍ରରେ ଅବତରଣର ସମୟ ଧାର୍ଯ୍ୟ କରାଯାଇଛି ।
ଭାରତ-ପାକିସ୍ତାନ ମ୍ୟାଚ ସମୟରେ ଖେଳାଳିଙ୍କ ବନ୍ଧୁତ୍ବକୁ ନେଇ ଗମ୍ଭୀରଙ୍କ ପ୍ରତିକ୍ରିୟା ଉପରେ ଜବାବ ରଖିଲେ ଆଫ୍ରିଦ୍
ନୂଆଦିଲ୍ଲୀ: ଏସିଆ କପର ଲିଗ ମ୍ୟାଚରେ ଭାରତ-ପାକିସ୍ତାନ ମ୍ୟାଚର କୌଣସି ଫଳାଫଳ ମିଳିନଥିଲା । ଭାରତ ପ୍ରଥମେ ବ୍ୟାଟିଂ କରିଥିବାବେଳେ ପାକିସ୍ତାନ ବ୍ୟାଟିଂ ପୂର୍ବରୁ ବର୍ଷା ମ୍ୟାଚରେ ବାଧକ ସାଜିଥିଲା । ତେବେ ଉଭୟ ଦେଶର ଖେଳାଳିଙ୍କ ବନ୍ଧୁତ୍ବପୂର୍ଣ୍ଣ ଫଟୋ ଏବଂ ସୋସିଆଲି ମିଡିଆରେ ଭାଇରାଲ ହୋଇଥିଲା । ଏକ ଜାତୀୟ ଗଣମାଧ୍ୟମରେ ଏହାକୁ ନେଇ ନିଜର ପ୍ରତିକ୍ରିୟା ଦେଇଥିଲେ ଭାରତୀୟ କ୍ରିକେଟ ଦଳର ପୂର୍ବତନ କ୍ରିକେଟର ଗୌତମ ଗମ୍ଭୀର ସହଜରେ ଗ୍ରହଣ କରିପାରିନଥିଲେ । ସେ କହିଥିଲେ କି ପଡ଼ିଆ ଥିବାବେଳେ ଆକ୍ରୋଶ ହେବା ଆବଶ୍ୟକ । ମଇଦାନରୁ ଆସିବା ପରେ ତୁମେ ବନ୍ଧୁ ହୋଇପାରିବ । ଯାହାକୁ ନେଇ ୟୁଜର୍ସମାନେ ମଧ୍ୟ ଭିନ୍ନ ଭିନ୍ନ ମତ ଦେଇଥିଲେ । ତେବେ ଏହାରି ଭିତରେ ପାକିସ୍ତାନର ପୂର୍ବତନ ଅଧିନାୟକ ସାହିଦ ଆଫ୍ରିଦ୍ ପ୍ରତିକ୍ରିୟା ଦେଇଛନ୍ତି । ସେ କହିଛନ୍ତି କି, ଆମେ କ୍ରିକେଟର ସାଙ୍ଗକୁ ଆମ୍ବାସଡର । ଆମର ସମଗ୍ର ବିଶ୍ବରେ ଫ୍ୟାନ୍ସ ଅଛନ୍ତି । ଏଣୁ ଆମେ ପ୍ରେମ ଏବଂ ସମ୍ପର୍କର ବାର୍ତ୍ତା ଦେବା ଉଚିତ୍ । ହଁ ପଡ଼ିଆରେ ଆକ୍ରମଣାତ୍ମକ ହେବା ଉଚିତ୍ । କିନ୍ତୁ ଏହା ବାହାରେ ମଧ୍ୟ ଆମର ଗୋଟେ ଜୀବନ ରହିଛି ।
ଜଳିଗଲା କପଡ଼ା ବୋଝେଇ ମିନିଟ୍ରକ୍
ବାଙ୍କୀ: ଜଳିଗଲା ଦାମୀ ବ୍ରାଣ୍ଡର କପଡା ଗାଡି । ବୁଧବାର ବିଳମ୍ବିତ ରାତି ପ୍ରାୟ ୨ ସମୟରେ ବାରଙ୍ଗ ଥାନା ଅନ୍ତର୍ଗତ ପୁରୀ କେନାଲ ରୋଡ଼ରେ ଏକ କପଡା ବୋଝେଇ ମିନିଟ୍ରକ ଜଳିଯାଇଛି । ମିନି ଟ୍ରକଟି ଭୁବନେଶ୍ୱରରୁ ଲକ୍ଷାଧିକ ଟଙ୍କାର ବିଭିନ୍ନ ନାମୀ ଦାମୀ ବ୍ରାଣ୍ଡର ଡ୍ରେସ ଓ କପଡା ନେଇ ଅନୁଗୁଳ ଯାଉଥିବା ସମୟରେ ପୁରୀ କେନାଲ ରୋଡ଼ରେ ଜଳି ଯାଇଛି । ସ୍ଥାନୀୟ ଲୋକେ ବାରଙ୍ଗ ଅଗ୍ନିଶମ ବାହିନୀକୁ ଖବର ଦେଇଥିଲେ । ଘଟଣାସ୍ଥଳରେ ବାରଙ୍ଗ ଅଗ୍ନିଶମ ବାହିନୀ ପଂହଁଚି ନିଆଁକୁ ଆୟତ୍ତ କରିଥିବା ବେଳେ ସର୍ଟ ସର୍କିଟରୁ ଅଗ୍ନିକାଣ୍ଡ ହୋଇଥିବା ସନ୍ଦେହ କରାଯାଉଛି ।