କେନ୍ଦୁଝର : କେନ୍ଦୁଝର ଜିଲ୍ଲାରେ ରାଜ୍ୟ ସରକାରଙ୍କ ପକ୍ଷରୁ ଆରମ୍ଭ ହୋଇ ଆମ ଓଡ଼ିଶା, ନବୀନ ଓଡ଼ିଶା କାର୍ଯ୍ୟକ୍ରମ । ଘସିପୁରା ବ୍ଲକରୁ ଏହି କାର୍ଯ୍ୟକ୍ରମର ଶୁଭାରମ୍ଭ ହେଇଛି । ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହାର ଶୁଭାରମ୍ଭ କରିଛନ୍ତି । ପ୍ରତି ଗାଁ ହେବ ସଶକ୍ତ ଓଡ଼ିଶାର ପ୍ରତିଛବି । ଏହି ନାରାରେ ଯୋଜନାର ଶୁଭାରମ୍ଭ ହୋଇଛି । ଏହି ଯୋଜନାରେ କେନ୍ଦୁଝର ଜିଲ୍ଲାରେ ୧୪୮ କୋଟି ୫୦ ଲକ୍ଷ ଟଙ୍କା ବ୍ୟୟରେ ୩ ହଜାର ୫୬୮ଟି ବିଭିନ୍ନ ଉନ୍ନୟନ ପ୍ରକଳ୍ପ ସାମିଲ ହୋଇଛି । ସେଥିମଧ୍ୟରୁ ଘସିପୁରା ବ୍ଲକର ୨୫ଟି ପଞ୍ଚାୟତକୁ ୧୨ କୋଟି ୫୦ ଲକ୍ଷ ଟଙ୍କା ପ୍ରଦାନ କରାଯାଇଛି । ଏହି ଅବସରରେ ଘସିପୁରା ବିଧାୟକ ବଦ୍ରିନାରାୟଣ ପାତ୍ର, ବିଡିଓ ମାନସ ରଞ୍ଜନ ସାମଲ, ସମସ୍ତ ପଞ୍ଚାୟତର ସରପଞ୍ଚ, ସମିତି ସଭ୍ୟ ଓ ଏସଏସଜି ମା’ମାନେ ଉପସ୍ଥିତ ଥିଲେ ।
ପାଲେଷ୍ଟାଇନ ଉପରେ ଇସ୍ରାଏଲର ଘନଘନ ଆକ୍ରମଣ,୧୬ ଶହ ଟପିଲା ମୃତ୍ୟୁସଂଖ୍ୟା
ନୂଆଦିଲ୍ଲୀ : ଇସ୍ରାଏଲ ଓ ପାଲେଷ୍ଟାଇନ ମଧ୍ୟରେ ଚାଲିଛି ଘମାଘୋଟ ସଂଘର୍ଷ । ବର୍ତ୍ତମାନ ସୁଦ୍ଧା ୧୬ଶହରୁ ଅଧିକ ନାଗରିକଙ୍କ ମୃତ୍ୟୁ ଘଟିଛି । ବର୍ତ୍ତମାନ ସୁଦ୍ଧା ଇସ୍ରାଏଲର ୯ଶହ ଜଣଙ୍କ ମୃତ୍ୟୁ ହୋଇଥିବାବେଳେ ଗାଜାରେ ୬୮୭ ଜଣଙ୍କ ମୃତ୍ୟୁ ଘଟିଥିବା ଜଣାପଡିଛି । ଇସ୍ରାଏଲର ୨୬ଶହରୁ ଅଧିକ ଲୋକ ଆହତ ହୋଇ ବିଭିନ୍ନ ମେଡିକାଲରେ ଭର୍ତ୍ତି ହୋଇଛନ୍ତି ।
ସେପଟେ ଇସ୍ରାଏଲ ସୈନ୍ୟଙ୍କ ଆକ୍ରମଣରେ ପ୍ରାୟ ୩ ହଜାର ପାଲେଷ୍ଟାଇନ ନାଗରିକ ଆହତ ହୋଇଛନ୍ତି । ଇସ୍ରାଏଲର ଶହ ଶହ ସଂଖ୍ୟାରେ ନାଗରିକଙ୍କୁ ପଣବନ୍ଦୀ କରି ରଖିଛନ୍ତି ହମାସ ଆତଙ୍କବାଦୀ । ପଣବନ୍ଦୀ ନାଗରିକଙ୍କ ମଧ୍ୟରେ ଆମେରିକା ସମେତ ଅନ୍ୟ ଦେଶର ନାଗରିକ ରହିଛନ୍ତି । ଆତଙ୍କବାଦୀ ଆକ୍ରମଣର ଯବାବରେ ଇସ୍ରାଏଲ ଗାଜା ଉପରେ ପ୍ରତି ଆକ୍ରମଣ ଜାରି ରଖିଥିବାବେଳେ ପଣବନ୍ଦୀ କରି ରଖିଥିବା ନାଗରିଙ୍କୁ ହତ୍ୟା କରିବାକୁ ଧମକ ଦେଇଛନ୍ତି ହମାସ ଆତଙ୍କବାଦୀ ।
ଏବେ ଗାଜାକୁ ଘେରି ରହିଛନ୍ତି ୧ ଲକ୍ଷରୁ ଅଧିକ ଇସ୍ରାଏଲୀ ଯବାନ । ପ୍ରଧାନମନ୍ତ୍ରୀ ବେଂଜାମିନ ନେତନ୍ୟାହୁ ପାଲେଷ୍ଟାଇନକୁ କଡ଼଼ା ଚେତାବନୀ ଦେଇଛନ୍ତି। ଗାଜା ଉପରେ ଆକ୍ରମଣ କରିବାକୁ ପ୍ରାୟ ୩ ଲକ୍ଷ ସେନା ଯୋଗାଡ କରୁଛି ଇସ୍ରାଏଲ। ଗାଜା ଯୁଦ୍ଧ ଆରମ୍ଭ କରିଥିବାରୁ ଆମେ ଏହାକୁ ଶେଷ କରିବୁ ବୋଲି ଚେତାବନୀ ଦେଇଛନ୍ତି ଇସ୍ରାଏଲ ପ୍ରଧାନମନ୍ତ୍ରୀ ବେଂଜାମିନ ନେତନ୍ୟାହୁ । ଇସ୍ରାଏଲ ଉପରେ ଆକ୍ରମଣ ଗାଜାକୁ ମହଙ୍ଗା ପଡ଼ିବ। ଦଶନ୍ଧୀ ଧରି ହମାସ ସହ ଅନ୍ୟ ଶତ୍ରୁପକ୍ଷ ଇସ୍ରାଏଲର ଯବାବକୁ ମନେ ରଖିବେ ବୋଲି କହିଛନ୍ତି ନେତନ୍ୟାହୁ । ଗାଜା ଉପରେ ଇସ୍ରାଏଲର ଆକ୍ରମଣକୁ ସମର୍ଥନ କରିବା ସହ ଯୁଦ୍ଧ ବିମାନ ଓ ଯୁଦ୍ଧ ପୋତ ପଠାଇଛି ଆମେରିକା । ତେବେ ଯୁଦ୍ଧରେ ଆମେରିକା ସୈନ୍ୟ ସାମିଲ ହେବେ ନାହିଁ ବୋଲି ସ୍ପଷ୍ଟ କରିଛି ହ୍ବାଇଟ ହାଉସ ।
ଦିଲ୍ଲୀରେ ଆମ ଆଦମୀ ପାର୍ଟି ବିଧାୟକ ଅମାନତୁଲ୍ଲା ଖାନଙ୍କ ଘରେ ଇଡି ରେଡ
ନୂଆଦିଲ୍ଲୀ : ଦିଲ୍ଲୀରେ ଆମ ଆଦମୀ ପାର୍ଟି ବିଧାୟକଙ୍କ ଘରେ ଇଡି ରେଡ୍ । ଅର୍ଥ ହେରଫେର ମାମଲାରେ ଆମ ଆଦମୀ ପାର୍ଟି ବିଧାୟକ ଅମାନତୁଲ୍ଲା ଖାନଙ୍କ ଘରେ ପ୍ରବର୍ତ୍ତନ ନିର୍ଦ୍ଦେଶାଳୟର ଚଢାଉ କରିଛି । ଅର୍ଥ ହେରଫେର ସହ ଅନ୍ୟ କିଛି ମାମଲାରେ ମଧ୍ୟ ଏହି ରେଡ୍ ଚାଲିଥିବା ସୂଚନା ମିଳିଛି । ପିଏମଏଲଏ ଆକ୍ଟ ଅନୁଯାୟୀ ବିଧାୟକ ଅମାନତୁଲ୍ଲା ଖାନଙ୍କ ଘରେ ଖାନତଲାସି କରିଛି ଇଡି । ଦିଲ୍ଲୀର ଓଖଲା ନିର୍ବାଚନମଣ୍ଡଳୀରୁ ଆମ ଆଦମୀ ପାର୍ଟି ବିଧାୟକ ଅଛନ୍ତି ଅମାନତୁଲ୍ଲା ଖାନ । ଦିଲ୍ଲୀର ଆଣ୍ଟି କରପସନ ବ୍ୟୁରୋ ଏବଂ ସିବିଆଇର ଏତଲାକୁ ନେଇ ଚଢାଉ କରିଛି ପ୍ରବର୍ତ୍ତନ ନିର୍ଦ୍ଦେଶାଳୟ ।
କଥା ଦେଇ କଥା ରଖିଲେ 5T ସଚିବ; ବେଗୁନିଆରେ ହେବ ୧୦୦ ଶଯ୍ୟା ବିଶିଷ୍ଟ ଉପଖଣ୍ଡସ୍ତରୀୟ ମେଡିକାଲ୍
ଖୋର୍ଦ୍ଧା : କଥା ଦେଇ କଥା ରଖିଲେ 5T ସଚିବ । ବେଗୁନିଆରେ ନିର୍ମାଣ ହେବ ୧୦୦ ଶଯ୍ୟା ବିଶିଷ୍ଟ ଉପଖଣ୍ଡସ୍ତରୀୟ ମେଡିକାଲ୍ । ଗତ ଅଗଷ୍ଟ ୨୨ ତାରିଖରେ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶ କ୍ରମେ ବେଗୁନିଆ ଗସ୍ତରେ ଆସିଥିଲେ 5T ସଚିବ ଭି କେ ପାଣ୍ଡିଆନ । ଏହି ସମୟରେ ସ୍ଥାନୀୟବାସିନ୍ଦା ଅଞ୍ଚଳରେ ଥିବା ସ୍ବାସ୍ଥ୍ୟ ସେବା ସମସ୍ୟା 5T ସଚିବଙ୍କୁ ଜଣାଇଥିଲେ । ଏହାସହ ଅଞ୍ଚଳ ପାଇଁ ସିଏଚସି ପାଇଁ ଅନୁରୋଧ କରିଥିଲେ ।
ଏହି ସମ୍ୟାର ଅତିଶୀଘ୍ର ସମାଧାନ ପାଇଁ 5T ସଚିବ ମଧ୍ୟ ପ୍ରତିଶ୍ରୁତି ଦେଇଥିଲେ । ବେଗୁନିଆରେ ୧୦୦ ଶଯ୍ୟା ବିଶିଷ୍ଟ ଉପଖଣ୍ଡ ସ୍ତରୀୟ ମେଡିକାଲ୍ ପାଇଁ ଚିଠି ଆସିଛି । ରାଜ୍ୟ ସରକାରଙ୍କ ସ୍ବାସ୍ଥ୍ୟ ଏବଂ ପରିବାର କଲ୍ୟାଣ ବିଭାଗ ତରଫରୁ ଏହି ଚିଠି ଆସିଥିବାରୁ ଅଞ୍ଚଳରେ ଖୁସିର ମାହୋଲ ଦେଖିବାକୁ ମିଳିଛି । ଏନେଇ ସମସ୍ତେ ମୁଖ୍ୟମନ୍ତ୍ରୀ ଏବଂ 5T ସଚିବ ଙ୍କ ନିକଟରେ କୃତଜ୍ଞତା ଜଣାଇଛନ୍ତି ସ୍ଥାନୀୟବାସୀ । ବେଗୁନିଆରେ ସମସ୍ତେ ଏଇ ଖୁସିକୁ ବାଜା ବଜାଇ, ବାଣ ଫୁଟାଇ, ପରଷ୍ପର ମଧ୍ୟ ରେ ମିଠା ଖୁଆଇ ପାଳନ କରିଛନ୍ତି ।
ପୂର୍ବତନ ପୋଲିସ ଡିଜି ଶରତ ଚନ୍ଦ୍ର ମିଶ୍ରଙ୍କ ପରଲୋକ
ଭୁବନେଶ୍ଟର : ପୂର୍ବତନ ପୋଲିସ ଡିଜି ଶରତ ଚନ୍ଦ୍ର ମିଶ୍ରଙ୍କ ପରଲୋକ ହୋଇଛି । ମୃତ୍ୟୁ ବେଳକୁ ତାଙ୍କୁ ୮୮ ବର୍ଷ ହୋଇଥିଲା । ଏନେଇ ତାଙ୍କ ଭାଇ ତଥା ପୂର୍ବତନ ପୋଲିସ ଡିଜି ବିପିନ ବିହାରୀ ମିଶ୍ର ସୂଚନା ଦେଇଛନ୍ତି । ୧୯୫୯ ମସିହା ବ୍ୟାଚର ଆଇପିଏସ୍ ଶରତ ଚନ୍ଦ୍ର ମିଶ୍ର ଡେଙ୍ଗୁରେ ଆକ୍ରାନ୍ତ ଥିଲେ ।
ସେ ରାଜଧାନୀର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିଲେ । ନିଜର ସାହିତ୍ୟକୃତି ପାଇଁ ଓଡ଼ିଶା ସାହିତ୍ୟ ଏକାଡେମୀ ପୁରସ୍କାର ପାଇଥିଲେ ଶରତ ମିଶ୍ର । ସେ ଜଣେ ମେଳାପି ଏବଂ ଅମାୟିକ ବ୍ୟକ୍ତି ଥିଲେ । ଦୀର୍ଘ ଦିନ ଧରି Raw ପାଇଁ କାମ କରିଥିଲେ । ତାଙ୍କ ବିୟୋଗରେ ବିଭିନ୍ନ ମହଲରେ ଶୋକର ଛାୟା ଖେଳିଯାଇଛି । ପୋଲିସ କମିଶନରଙ୍କ ସମେତ ବହୁ ବରିଷ୍ଠ ପୋଲିସ ଅଧିକାରୀ ଶେଷ ଦର୍ଶନ କରିଛନ୍ତି ।
ଜାମୁ କାଶ୍ମୀର ସୋପିଆନ ଅଞ୍ଚଳରେ ୨ ଆତଙ୍କବାଦୀ ନିପାତ
ଶ୍ରୀନଗର : ଜାମ୍ମୁ କାଶ୍ମୀର ସୋପିଆନ ଅଞ୍ଚଳରେ ସେନାର ଏନକାଉଣ୍ଟର । ଗୁଳିବିନିମୟରେ ସୁରକ୍ଷାକର୍ମୀଙ୍କ ଗୁଳିରେ ୨ ଆତଙ୍କବାଦୀ ନିହତ ହୋଇଛନ୍ତି । ଦୁଇ ଆତଙ୍କବାଦୀ ଲସକର ଏ ତୋଇବା ସଂଗଠନର ସଦସ୍ୟ ବୋଲି ଜଣାପଡିଛି । ଦୁଇ ନିହତ ଆତଙ୍କବାଦୀ ସ୍ଥାନୀୟ ଅଂଚଳର । ମୃତ ଆତଙ୍କବାଦୀଙ୍କ ମଧ୍ୟରେ ଅବରାର ନାମକ ଆତଙ୍କବାଦୀ କାଶ୍ମୀର ପଣ୍ଡିତଙ୍କ ନରସଂହାରରେ ଜଡ଼ିତ ଥିଲା । ଗତ ଫେବୃଆରୀରେ ପୁଲୱାମା ଅଂଚଳରେ କାଶ୍ମୀର ପଣ୍ଡିତ ସଂଜୟ ଶର୍ମାଙ୍କ ହତ୍ୟାରେ ସାମିଲ ଥିଲା ଜାସିମ ଫାରୁକ ଓରଫ ଅବରାର ।
ଗତକାଲି ରାତିରୁ ଚାଲିଥିଲା କାଶ୍ମୀର ପୋଲିସ ଓ ସେନାର ମିଳିତ ଏନକାଉଣ୍ଟର ।ସୋପିଆନ ଜିଲ୍ଲାର ଆସିପୋରା ଗାଁ ନିକଟରେ ସେନା ଓ ଆତଙ୍କବାଦୀ ମୁହାଁମୁହିଁ ହୋଇଥିଲେ । ପାକିସ୍ତାନର ନିଶିଦ୍ଧ ଆତଙ୍କବାଦୀ ସଂଗଠନ ଲସ୍କର ଏ ତୋଇବା ସହ ସମ୍ପର୍କରେ ଏହି ଦୁଇ ଆତଙ୍କବାଦୀ କାର୍ଯ୍ୟକଳାପ ଚଲାଇ ଆସୁଥିଲେ । ମାସକ ମଧ୍ୟରେ ସେନା ଓ ଆତଙ୍କବାଦୀ ମଧ୍ୟରେ ଏହା ତୃତୀୟ ଗୁଳିବିନିମୟ । ଏନକାଉଣ୍ଟରରେ ୩୦ ଦିନ ମଧ୍ୟରେ ସେନାର ଗୁଳିରେ ୬ ଆତଙ୍କବାଦୀ ନିହତ ହୋଇଛନ୍ତି । ଏହି ବର୍ଷ ବର୍ତ୍ତମାନ ସୁଦ୍ଧା ସୁରକ୍ଷାକର୍ମୀ ୫୪ ଆତଙ୍କବାଦୀକୁ ସଫା କରିସାରିଲେଣି । ସେମାନଙ୍କ ମଧ୍ୟରେ ଅଧିକାଂଶ ବିଦେଶୀ ଆତଙ୍କବାଦୀ ରହିଛନ୍ତି ।
ଘରକୁ ଫେରିଲେ ସୁନ୍ଦରଗଡରୁ ଉଦ୍ଧାର ଦୁଇ ମହିଳା, ପରିବାର ଲୋକଙ୍କୁ କରାଗଲା ହସ୍ତାନ୍ତର
ସୁନ୍ଦରଗଡ଼ : ଘରକୁ ଫେରିଲେ ସୁନ୍ଦରଗଡରୁ ଉଲଗ୍ନ ଭାବେ ଉଦ୍ଧାର ଦୁଇ ମହିଳା । ମାନସିକ ବିକୃତ ମାଆ ଓ ଝିଅଙ୍କୁ ପରିବାର ଲୋକଙ୍କୁ କରାଗଲା ହସ୍ତାନ୍ତର । ପରିବାର ଲୋକେ ସେମାନଙ୍କୁ ନେଇଯିବା ପାଇଁ ଇଚ୍ଛା ପ୍ରକାଶ କରିବା ପରେ ସୁନ୍ଦରଗଡ଼ ପୋଲିସ ଓ ସାମାଜିକ ସୁରକ୍ଷା ବିଭାଗ ଏନେଇ ପଦକ୍ଷେପ ଗ୍ରହଣ କରିଛନ୍ତି । ଗତକାଲି ସୁନ୍ଦରଗଡ଼ ଟାଉନ ଥାନା SDPOଙ୍କ ନେତୃତ୍ବରେ ଏକ୍ ଟିମ୍ ଉଦ୍ଧାର ମହିଳାଙ୍କ ଗାଁ ଛତିଶଗଡର ଖାରିବହାଲ ଯାଇଥିଲା ।
ସେଠାରୁ ଉଦ୍ଧାର ମହିଳାଙ୍କ ବଡ ଭଉଣୀ ଏବଂ ସାନ ଝିଅକୁ ସୁନ୍ଦରଗଡ ଆଣି ବୟାନ ରେକର୍ଡ କରିଥିଲା । ପରେ ଜିଲ୍ଲା ପ୍ରଶାସନର ସହାୟତାରେ ଉଭୟ ମାଆ ଝିଅ ଙ୍କୁ ରାଞ୍ଚି ମାନସିକ ରୋଗୀ ଚିକିତ୍ସାଳୟକୁ ପଠାଇବାର ସମସ୍ତ ବ୍ୟବସ୍ଥା ଆରମ୍ଭ କରାଯାଇଥିଲା । ଗତକାଲି ସଂଧ୍ୟାରେ ମହିଳାଙ୍କ ଭାଇ ଆସି ତାଙ୍କୁ ଘରକୁ ନେଇଯିବା ପାଇଁ ଇଚ୍ଛା ପ୍ରକାଶ କରିଥିଲେ । ଆଜି ପରିବାର ଲୋକଙ୍କୁ ଉଭୟ ମା’ ଓ ଝିଅଙ୍କୁ ହସ୍ତାନ୍ତର କରାଯାଇଛି । ଗତ ଶୁକ୍ରବାର ଦୁଇ ଜଣ ମହିଳା ଉଲଗ୍ନ ଅବସ୍ଥାରେ ସୁନ୍ଦରଗଡ଼ ଇବ ନଦୀ ପୋଲ ଉପରୁ ଉଦ୍ଧାର ହୋଇଥିଲେ । ସେହି ସମୟରେ ତାଙ୍କ ସହିତ ବାରମ୍ବାର ଦୁଷ୍କର୍ମ ହୋଇଥିବା ଅଭିଯୋଗ ହୋଇଥିଲା । କିନ୍ତୁ ସେମାନଙ୍କ ପରିବାର ଲୋକେ ସୁନ୍ଦରଗଡ ଆସିବା ପରେ ଦୁହେଁ ମାନସିକ ରୋଗୀ ବୋଲି ଜଣାପଡ଼ିଥିଲା ।
ଗାଁ ଗାଁରେ ହେବ ଐତିହ୍ୟ ସ୍ଥଳର ବିକାଶ, ଜଗନ୍ନାଥ ସଂସ୍କୃତିର ହେବ ପ୍ରସାର
ଭୁବନେଶ୍ୱର : ଆଜି ଆମ ଓଡ଼ିଶା, ନବୀନ ଓଡ଼ିଶା କାର୍ଯ୍ୟକ୍ରମର ଶୁଭାରମ୍ଭ କରିବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ଗାଁ ଗାଁରେ ଐତିହ୍ୟ ସ୍ଥଳର ବିକାଶ କରାଯିବ । ଜଗନ୍ନାଥ ସଂସ୍କୃତିର ପ୍ରଚାର ପ୍ରସାର ମଧ୍ୟ କରାଯିବ । ଡିଜିଟାଲ ସଂଯୋଗୀକରଣ ପାଇଁ ଭିତ୍ତିଭୂମିର ବିକାଶ କରାଯିବ । ମିଶନ ଶକ୍ତି ପାଇଁ ଅତିରିକ୍ତ ଭିତ୍ତିଭୂମି ସୃଷ୍ଟି ହେବା ସହ କ୍ରୀଡ଼ାର ବିକାଶ କରାଯିବ ।
ମୁଖ୍ୟମନ୍ତ୍ରୀ ଆଜି ଏହି ଯୋଜନାର ଶୁଭାରମ୍ଭ କରିବା ସହ ଭର୍ଚୁଆଲରେ ପଞ୍ଚାୟତ ପ୍ରତିନିଧିଙ୍କ ସହ କଥା ହେବେ । ବ୍ଲକ ଓ ଜିଲ୍ଲାସ୍ତରରେ ବି ଏହି ଯୋଜନା ପାଇଁ କାର୍ଯ୍ୟକ୍ରମର ଆୟୋଜନ କରାଯାଇଛି । ଗତ ଜୁଲାଇ ୧୦ତାରିଖରେ ଆମ ଓଡ଼ିଶା, ନବୀନ ଓଡ଼ିଶା ପାଇଁ ୪ହଜାର କୋଟି ବ୍ୟୟ ଅଟକଳକୁ କ୍ୟାବିନେଟ ମଞ୍ଜୁରୀ ମିଳିଥିଲା । ଯୋଜନା ଜରିଆରେ ଗ୍ରାମାଞ୍ଚଳରେ ବ୍ୟାଙ୍କିଂ ସୁବିଧା ଯୋଗାଇବାକୁ ଡିଜିଟାଲ ସଂଯୋଗୀକରଣ ଉପରେ ଗୁରୁତ୍ବ ଦିଆଯିବ ।
ଗାଁମାନଙ୍କରେ ଥିବା ଧାର୍ମିକ ପୀଠର ବିକାଶ, ଐତିହ୍ୟସ୍ଥଳର ଉନ୍ନତିକରଣ ସହ ଶ୍ରଦ୍ଧାଳୁଙ୍କ ସୁବିଧା ପାଇଁ ୧୦ଲକ୍ଷ ଟଙ୍କାର ଅନୁଦାନ ମିଳିବ । ମହିଳା, ଯୁବକଙ୍କୁ ସଶକ୍ତ କରିବାକୁ ଯୋଜନା ହାତକୁ ନିଆଯିବ । ପ୍ରାଥମିକ ଶିକ୍ଷା ବ୍ୟବସ୍ଥାରେ ଥିବା କ୍ରିଟିକାଲ ଗ୍ୟାପ ପୂରଣ ପାଇଁ ଅନୁଦାନ ମିଳିବ। ଏହା ସହ ପ୍ରତି ଗାଁରେ ଖେଳପଡ଼ିଆର ବିକାଶ, ସାଇନ୍ସ ପାର୍କ, ଦକ୍ଷତା ପ୍ରଶିକ୍ଷଣ କେନ୍ଦ୍ର ପ୍ରତିଷ୍ଠା ପାଇଁ ପଦକ୍ଷେପ ନିଆଯିବ । ଗାଁ ପିଲାଙ୍କ ପାଇଁ ହକି, ଫୁଟବଲ, ଭଲିବଲ, ବାସ୍କେଟ ବଲ, କ୍ୟାରମ, ଚେସ୍ ଉପକରଣ ଯୋଗାଇବାକୁ ପ୍ରତି ପଞ୍ଚାୟତକୁ ଅଢେଇ ଲକ୍ଷ ମିଳିବ। ମୁଖ୍ୟମନ୍ତ୍ରୀଙ୍କ ପରିକଳ୍ପନାରେ ଏହି ଯୋଜନା ଆରମ୍ଭ ହେବାକୁ ଯାଉଥିବା ବେଳେ ଗ୍ରାମାଞ୍ଚଳ ବିକାଶକୁ ଅଧିକ ଫୋକସ କରାଯିବ।
ଆଜି ବିଶ୍ବ ମାନସିକ ସ୍ବାସ୍ଥ୍ୟ ଦିବସ : ମାନସିକ ଚାପ, ଅସ୍ଥିରତା, ଅବସାଦ ଦୂର ଲାଗି ଆହ୍ବାନ
ଭୁବନେଶ୍ୱର : ଆଜି ଅକ୍ଟୋବର ୧୦, ବିଶ୍ବ ମାନସିକ ସ୍ବାସ୍ଥ୍ୟ ଦିବସ । ସାରା ବିଶ୍ବରେ ପାଳିତ ହେଉଛି ଏହ ଦିବସ । ମାନସିକ ସ୍ବାସ୍ଥ୍ୟ ପ୍ରତି ଆସୁଥିବା ଚାଲେଞ୍ଜର ମୁକାବିଲା ଲାଗି ଲୋକଙ୍କୁ ସଚେତନ କରିବା ଏହି ଦିବସର ମୁଖ୍ୟ ଉଦ୍ଦେଶ୍ୟ । ମଣିଷ ଅନେକ ସମୟରେ ପରିସ୍ଥିତି ଚାପରେ ମାନସିକ ଆଘାତର ସମ୍ମୁଖୀନ ହୋଇଥାଏ । ଏପରିକି ଚରମ ପଥ ନେବାକୁ ପଛାଏ ନାହିଁ । ତେବେ ପରିସ୍ଥିତିର ମୁକାବିଲା କରିବା ସହ ସମସ୍ତ ନକାରାତ୍ମକ ଦିଗକୁ ତ୍ୟାଗ କରିବା ଲାଗି ଆହ୍ବାନ ଦେଇଥାଏ ଏହି ଦିବସ ।
୧୯୯୨ରୁ ମାନ୍ୟତା ଲାଭ କରିଆସିଥିବା ଏହି ଦିବସକୁ ବିଶ୍ବର ପ୍ରାୟ ୧୨୦ ଦେଶରେ ପାଳନ କରାଯାଉଛି । ମାନସିକ ଚାପ, ଅସ୍ଥିରତା, ଅବସାଦ ଆଦି ସମ୍ପର୍କିତ ମାନସିକ ସ୍ବାସ୍ଥ୍ଯାବସ୍ଥା କ୍ଷେତ୍ରରେ ସଚେତନତା ସୃଷ୍ଟି ଲାଗି ୧୯୯୨ରେ ଏକ ପ୍ରାଥମିକ ପଦକ୍ଷେପ ନେଇଥିଲା ବିଶ୍ବ ମାନସିକ ସ୍ବାସ୍ଥ୍ୟ ସଂଗଠନ ବା WFMH ।
ମାନସିକ ଅସ୍ଥିରତା, ଚାପ ଆଦି କ୍ଷେତ୍ରରେ ନିଜେ କୌଣସି ପଥ ନ ବାଛି ଅନ୍ୟର ସହାୟତା ଆବଶ୍ୟକ କରିବା ଲାଗି ଲୋକଙ୍କୁ ପରାମର୍ଶ ଦେଇଥାଏ ସଂଗଠନ । ବିଶେଷ କରି କୋଭିଡ ପରେ ଲୋକଙ୍କ ମଧ୍ଯରେ ସୃଷ୍ଟି ହୋଇଥିବା ଅବସାଦ, ଚାପ, ଦୁର୍ଦ୍ଦଶା, ଅର୍ଥନୈତିକ ଦୁର୍ଗତି, ସାମାଜିକ ସଙ୍କଟର ମୁକାବିଲା କ୍ଷେତ୍ରରେ ମାନସିକ ସ୍ତରରେ ଦୃଢ଼ ରହିବା ଲାଗି ପରାମର୍ଶ ଦେଉଛି ସଂଗଠନ । ୨୦୨୩ର ଆଜିର ଦିବସର ଥିମ ରହିଛି ମାନସିକ ସ୍ବାସ୍ଥ୍ୟ ଏକ ସାର୍ବଜନୀନ ମାନବାଧିକାର । ଏଥିଲାଗି ସଚେତନତା ସୃଷ୍ଟି, ମାନସିକ ସ୍ବାସ୍ଥ୍ୟର ସୁରକ୍ଷା ଦିଗରେ କାର୍ଯ୍ୟ କରିବା ଲାଗି ଆହ୍ବାନ ଦେଇଛି ବିଶ୍ବ ସ୍ବାସ୍ଥ୍ୟ ସଂଗଠନ । ମାନସିକ ଅବସ୍ଥାର ସୁରକ୍ଷା ଦିଗରେ ଲୋକଙ୍କୁ ପ୍ରୋତ୍ସାହନ ଦେବା ଏହି ଦିବସର ବାର୍ତ୍ତା ।
ଶ୍ରୀମନ୍ଦିର ପ୍ରବେଶ ଲାଗି ପିନ୍ଧିବାକୁ ପଡିବ ଶାଳୀନତାପୂର୍ଣ୍ଣ ପୋଷାକ
ପୁରୀ : ଶ୍ରୀମନ୍ଦିର ପ୍ରବେଶ କରିବାକୁ ହେଲେ ପିନ୍ଧିବାକୁ ପଡିବ ଶାଳୀନତାପୂର୍ଣ୍ଣ ପୋଷାକ । ଆଜିଠାରୁ ଶ୍ରୀମନ୍ଦିର ପ୍ରଶାସନ ପକ୍ଷରୁ ପ୍ରାଥମିକ ଭାବେ ଭକ୍ତଙ୍କ ମଧ୍ୟରେ ଏନେଇ ସଚେତନତା ସୃଷ୍ଟି କରାଯିବ । ଧାର୍ମିକ ମନୋଭାବ ଓ ଆଧ୍ୟାତ୍ମିକତା ଭାବନାକୁ ନେଇ ଭକ୍ତମାନେ ପୋଷାକ ପରିଧାନ ଦିଗରେ ଗୁରୁତ୍ବ ଦେବାକୁ ଅନୁରୋଧ କରାଯାଇଛି ।
ସିଂହଦ୍ଵାରରେ ମୁତୟନ ଜେଟିପି ଓ ଶ୍ରୀମନ୍ଦିର ଭିତରେ ରହୁଥିବା ପ୍ରତିହାରୀ ସେବକ ଭକ୍ତଙ୍କ ପୋଷାକ ତଦାରଖ ଉପରେ ଗୁରୁତ୍ବ ଦେବେ । ଭକ୍ତମାନେ ଶାଳୀନତା ଭାବେ ପୋଷାକ ପିନ୍ଧି ଶ୍ରୀମନ୍ଦିର ପ୍ରବେଶ କରିବା ନେଇ ସେବାୟତ ଓ ବୁଦ୍ଧିଜୀବୀ ମାନଙ୍କ ତରଫରୁ ପ୍ରଶାସନକୁ ଅନୁରୋଧ କରାଯାଇଥିଲା । ଏନେଇ ଗତକାଲି ଶ୍ରୀମନ୍ଦିର କାର୍ଯ୍ୟାଳୟରେ ନୀତି ସବକମିଟି ବୈଠକରେ ଏହି ପ୍ରସଙ୍ଗକୁ ନେଇ ଗୁରୁତ୍ବପୂର୍ଣ୍ଣ ଆଲୋଚନା କରାଯାଇ ନିଷ୍ପତ୍ତି ନିଆଯାଇଥିଲା ।