ନନ୍ଦିଘୋଷ ବ୍ୟୁରୋ : ୧୯୯୩ ମସିହାରେ ମୁମ୍ବାଇରେ ହୋଇଥିବା ସିରିଏଲ ବୋମା ବିସ୍ଫୋରଣର ଅପରାଧି ଟାଇଗର ମେମନଙ୍କୁ ପାକିସ୍ତାନ ଆଶ୍ରୟ ଦେଇଛି । ଯାହାର ଠିକଣା ହାତରେ ଲାଗିଥିବା ଏକ ଜାତୀୟ ଗଣମାଧ୍ୟମ ଦାବି କରିଛି । ୧୯୯୩ ଏପ୍ରିଲ ୧୨ରେ ୧୨ଟି ସ୍ଥାନରେ ଘଟିଥିବା ସିରିଏଲ ବୋମା ବିସ୍ଫୋରଣର ମାଷ୍ଟରମାଇଣ୍ଡର ଫଟୋ ୩୦ ବର୍ଷ ପରେ ପ୍ରଥମ ଥର ପାଇଁ ସାମ୍ନାକୁ ଆସିଛି। କରାଚିରେ ଅବସ୍ଥିତ ତା ଘରର ଫଟୋ ମଧ୍ୟ ସାମ୍ନାକୁ ଆସିଛି । ଟାଇଗର ମେମନ୍ ପାକିସ୍ତାନର କରାଚିର ଡିଫେନ୍ସ ହାଉସିଂ ଅଥରିଟିରେ ନିର୍ମିତ ଏକ ବିଳାସପୂର୍ଣ୍ଣ ବଙ୍ଗଳାରେ ରହୁଛି । କରାଚିର ଏହି ସ୍ଥାନ ପାକିସ୍ଥାନ ସେନା ଦ୍ବାରା ବିକଶିତ ହୋଇଛି । ସେଠାରେ ପାକିସ୍ତାନର ସେନା ଅଧିକାରୀ ଓ ସରକାରୀ କମର୍ଚାରୀ ରୁହନ୍ତି । ଏନଆଇଏ ନିଜ ଡକ୍ୟୁମେଣ୍ଟରେ ପାକିସ୍ତାନରେ ଟାଇଗର ମେମୋନର ଦୁଇଟି ଠିକଣା ଲେଖିଛି । ଯେଉଁଥିରେ ପ୍ରଥମେ ହାଉସ ନଂ-୩୪ଏ, ଷ୍ଟ୍ରିଟ୍-୨୯, ଫେଜ-ପାଞ୍ଚ, ଡିଏଚଏ କରାଚି, ପାକିସ୍ତାନ । ବଙ୍ଗଳା ଚାରିପାଖରେ ସଶସ୍ତ୍ର ସୁରକ୍ଷା କର୍ମୀଙ୍କ ଦ୍ୱାରା ଜଗୁଆଳି ରହିଛନ୍ତି ।
ପାକିସ୍ତାନ ସୁରକ୍ଷାକର୍ମୀଙ୍କ ସୁରକ୍ଷା ବଳୟ ଭିତରେ ଏହି ବଙ୍ଗଳାରେ ସର୍ବାଧିକ ଆତଙ୍କବାଦୀ ରହୁଛନ୍ତି । ପାକିସ୍ତାନୀ ଗୁପ୍ତଚର ଏଜେନ୍ସି ଆଇଏସଆଇ ଏବଂ ସେନା ଅଧିକାରୀମାନେ ଟାଇଗରକୁ ଭେଟିବାକୁ ଆସୁଛନ୍ତି । ଏନ୍ଆଇଏ ଅନୁଯାୟୀ, କରାଚିର ଏହି ଅଞ୍ଚଳରେ ଟାଇଗର ମେମନର ଆଉ ଏକ ବଙ୍ଗଳା ଅଛି ଯାହାର ଠିକଣା ହେଉଛି – ହାଉସ୍ ନଂ- ୧ / ଏ୨, ଗୋଲ୍ଫ୍ କୋର୍ସ ରୋଡ୍ -୧, ଫେଜ୍ ଚାରି, ଡିଏଚଏ କରାଚି, ପାକିସ୍ତାନ । ଏନଆଇଏ ଅନୁଯାୟୀ, କରାଚିରେ ଥିବା ବଙ୍ଗଳାଠାରୁ ଅଳ୍ପ ଦୂରରେ ଏକ ସପିଂ ମଲ୍ ଅଛି ଯେଉଁଠାରେ ଟାଇଗର ମେମନ୍ ରହୁଛି, ଯେଉଁଠାରେ ତାର ଏକ କାର୍ଯ୍ୟାଳୟ ମଧ୍ୟ ଅଛି । କଡା ସୁରକ୍ଷା ମଧ୍ୟରେ ସେ ବେଳେବେଳେ କାର୍ଯ୍ୟାଳୟ ପରିଦର୍ଶନ କରେ । ସେ ଏଠାରୁ ଦାଉଦ ଇବ୍ରାହିମର ଡ୍ରଗ୍ସ ଏବଂ ବ୍ୟବସାୟ ପରିଚାଳନା କରେ । ଏହି ସମଗ୍ର ଅଞ୍ଚଳ ସିସିଟିଭି କଭରେଜ୍ ଭିତରେ ରହିଛି ।
ଟାଇଗର ମେମନର ପ୍ରକୃତ ନାମ ଇବ୍ରାହିମ ମେମନ୍
ଟାଇଗର ମେମନର ପ୍ରକୃତ ନାମ ହେଉଛି ଇବ୍ରାହିମ ମେମନ୍ । ଅଣ୍ଡରୱାର୍ଲ୍ଡକୁ ଆସିବା ପରେ ତାର ନାମ ଇବ୍ରାହିମରୁ ଟାଇଗରକୁ ବଦଳିଗଲା । ୧୯୯୩ ସିରିଏଲ ବିସ୍ଫୋରଣ ଯାହା ମୁମ୍ବାଇକୁ ଥରାଇ ଦେଇଥିଲା ପାକିସ୍ତାନୀ ଗୁପ୍ତଚର ଏଜେନ୍ସି ଆଇଏସଆଇ ସାହାଯ୍ୟରେ ଦାଉଦ ଇବ୍ରାହିମ ନିର୍ଦ୍ଦେଶରେ ଟାଇଗର ମେମନ କରିଥିଲା । ପାକିସ୍ତାନ ଆରଡିଏକ୍ସକୁ ସମୁଦ୍ର ଦେଇ ମୁମ୍ବାଇ ପଠାଇଥିଲା, ଯାହା ଟାଇଗର ଗ୍ରହଣ କରିବା ସହ ତାର ଗ୍ୟାଙ୍ଗକୁ ଦେଇଥିଲା । ବୋମା ବିସ୍ଫୋରଣ ପୂର୍ବରୁ ଦାଉଦ ଏବଂ ଟାଇଗର ମୁମ୍ବାଇରୁ ଦୁବାଇକୁ ପଳାଇଥିଲେ। ପରେ ଆଇଏସଆଇ ଉଭୟଙ୍କୁ ପାକିସ୍ତାନକୁ ସ୍ଥାନାନ୍ତର କରିଥିଲା । ବର୍ତ୍ତମାନ ଦୁହେଁ କରାଚିରେ ରହି ସେଠାରୁ ସେମାନଙ୍କ ବେଆଇନ ଆନ୍ତର୍ଜାତୀୟ ଡ୍ରଗ୍ ନେଟୱାର୍କ ଚଳାଇଛନ୍ତି ।
ଟାଇଗର ମେମନର ପରିବାର ମୁମ୍ବାଇର ଥିଲେ । ଏହି ପରିବାରର ମୁଖ୍ୟ ଥିଲେ ଅବଦୁଲ ରଜାକ ମେମନ୍, ଯିଏ ଜଣେ ବ୍ୟବସାୟୀ ଥିଲେ । ସେ ତାଙ୍କ ପତ୍ନୀ ହନିଫା ଏବଂ ଛଅ ପୁଅଙ୍କ ସହ ମୁମ୍ବାଇର ଭିଣ୍ଡି ବଜାର ଅଞ୍ଚଳରେ ରହୁଥିଲେ। ପରିବାରର ସାନପୁଅ ଇବ୍ରାହିମ୍ ଓରଫ ଟାଇଗର ମେମନ୍ ୮୦ ଦଶକରେ ଅଣ୍ଡରୱାର୍ଲ୍ଡ ଡନ୍ ଦାଉଦ ଇବ୍ରାହିମ ସହ ଯୋଗାଯୋଗରେ ଆସି ତା’ର ବ୍ୟବସାୟରେ ସାମିଲ ହୋଇଥିଲା । ଟାଇଗର ମେମୋନର ଦ୍ୱିତୀୟ ଭାଇ ୟାକୁବ ମେମନ୍ ଜଣେ ଚାର୍ଟାର୍ଡ ଆକାଉଣ୍ଟାଣ୍ଟ ଥିଲେ । ସେ ଟାଇଗରର ବ୍ୟବସାୟରେ ମଧ୍ୟ ଜଡିତ ଥିଲେ। ୟାକୁବର କାମ ଥିଲା ଟାଇଗରର କଳା ଟଙ୍କାକୁ ଏକ ସୁରକ୍ଷିତ କରିବା ।
୧୯୯୪ରେ ଦିଲ୍ଲୀରୁ ୟାକୁବ ମେମନଙ୍କୁ ଗିରଫ କରାଯାଇଥିଲା । ମୁମ୍ବାଇ ବିସ୍ଫୋରଣରେ ଟାଇଗରର ପିତା ରଜାକ, ମା ହନିଫା, ଭାଇ ଇସା ଏବଂ ୟୁସୁଫ, ୟାକୁବଙ୍କ ପତ୍ନୀ ରହୀନା, ବଡ ଭାଇଙ୍କ ପତ୍ନୀ ରହୀନା, ବଡ ଭାଇଙ୍କ ପତ୍ନୀ ରୁବିନା ମଧ୍ୟ ଅଭିଯୁକ୍ତ ହୋଇଥିଲେ। ନଭେମ୍ବର ୨୦୦୬ ରେ ମୁମ୍ବାଇର ସ୍ୱତନ୍ତ୍ର ଟାଡା କୋର୍ଟ ୧୯୯୩ ମସିହାରେ ହୋଇଥିବା ମୁମ୍ବାଇ ସିରିଏଲ ବିସ୍ଫୋରଣ ମାମଲାର ଶୁଣାଣି କରିଥିଲେ । ମୋଟ ୬୦୦ ଜଣଙ୍କ ସାକ୍ଷ୍ୟ ପମାଷକୁ ଆଧାର କରି କରି ୧୦୦ ଜଣ ଏହି ମାମଲାରେ ଦୋଷୀ ସାବ୍ୟସ୍ତ ହୋଇଥିଲେ। ମୁଖ୍ୟ ଅଭିଯୁକ୍ତ ଟାଇଗର ମେମନ୍ ପଳାଉଥିବା ବେଳେ ଯାକୁବ ମେମନ୍, ୟୁସୁଫ୍ ମେମନ୍, ଇସା ମେମନ୍ ଏବଂ ରୁବିନା ମେମନଙ୍କ ନାମ ମଧ୍ୟ ଏହି ଅପରାଧୀଙ୍କ ମଧ୍ୟରେ ରହିଥିଲା ।
ମୁମ୍ବାଇ ବୋମା ବିସ୍ଫୋରଣରେ ସମ୍ପୃକ୍ତ ଥିବାରୁ କୋର୍ଟ ୟାକୁବ ମେମୋନଙ୍କୁ ମୃତ୍ୟୁଦଣ୍ଡ ଦେଇଥିଲେ । ତାଙ୍କୁ ୩୦ଜୁଲାଇ ୨୦୧୫ ରେ ନାଗପୁର କେନ୍ଦ୍ରୀୟ ଜେଲରେ ଫାଶୀ ଦିଆଯାଇଥିଲା। ଟାଇଗରର ପାଣ୍ଠି ପରିଚାଳନା କରିବା, ୧୫ ଜଣ ଯୁବକଙ୍କୁ ଅସ୍ତ୍ରଶସ୍ତ୍ର ଏବଂ ଗୁଳି ଚଳାଇବା ତାଲିମ ଦେବା ପାଇଁ ଏକ ଗୁପ୍ତ ସ୍ଥାନକୁ ପଠାଇବା ଓ ବୋମା ବିସ୍ଫୋରଣ, ଗୁଳି ଓ ଅସ୍ତ୍ରଶସ୍ତ୍ରରେ ବ୍ୟବହୃତ ଗାଡି କିଣିବା ଆଦି ମାମଲାରେ ଟାଡା କୋର୍ଟ ୟାକୁବକୁ ଦୋଷୀ ସାବ୍ୟସ୍ତ କରିଥିଲେ ।
