ରାଜ୍ୟରେ ଖୁବ୍ ଶୀଘ୍ର ଲାଗୁ ହେବ ମୁଖ୍ୟମନ୍ତ୍ରୀ ବସ ସେବା- MBS । ଏ ନେଇ ବିଦ୍ୟାଳୟ ଏବଂ ଗଣଶିକ୍ଷା ବିଭାଗ ସହ ଆଲୋଚନା ସରିଛି ବୋଲି କହିଛନ୍ତି ପରିବହନ ମନ୍ତ୍ରୀ । ଯେପରି ପରିବହନ ବିଭାଗ କ୍ଷତି ସହିବନି ସେନେଇ ଆଲୋଚନା ସରିଛି । ମୁଖ୍ୟମନ୍ତ୍ରୀ ବସ ସେବା ଯୋଜନାରେ ଥିବା ୧୪୨୨ଟି ବସ ଯୋଗେ ଏହି ସେବା ସ୍କୁଲ ପିଲାଙ୍କୁ ମାଗଣାରେ ଯୋଗାଇଦିଆଯିବ । କେଉଁ ରୁଟରେ କେତେ ବସ ଚାଲିବା ଦରକାର ତାହା OSRTC ସ୍ଥିର କରିବ ବୋଲି ମନ୍ତ୍ରୀ କହିଛନ୍ତି ।
ଗୋଟିଏ ଦିନରେ ୧୭ ହଜାର ଟଙ୍କା ମହଙ୍ଗା ହେଲା ରୁପା: ସୁନା ଦରରେ ବି ଲାଗୁନି ବ୍ରେକ
ସୁନା ଓ ରୁପା ଦରରେ ବ୍ରେକ ଲାଗୁନି । ପ୍ରତିଦିନ ଏହି ଦୁଇ ଅଳଙ୍କାରର ଦାମ ଦ୍ରୁତ ଭାବେ ବଢ଼ିବାରେ ଲାଗିଛି । ଏପରି ସ୍ଥିତିରେ ଗୋଟିଏ ଦିନରେ ରୂପା ୧୭ ହଜାର ଟଙ୍କା ମହଙ୍ଗା ହୋଇଛି । ଶୁକ୍ରବାର ଦିନ ଏମସିଏକ୍ସରେ ଚାନ୍ଦିର ଦାମ୍ ୧୭ ହଜାର ଟଙ୍କା ବୃଦ୍ଧି ପାଇ ବନ୍ଦ ହୋଇଛି । ସୁନା-ରୂପାର ଦର ଦୀର୍ଘ ଅବଧିରେ ଆହୁରି ବୃଦ୍ଧି ପାଇବ ବୋଲି ଏକ୍ସପର୍ଟ ଅନୁମାନ କରିଛନ୍ତି । ତେଣୁ ଏହି ଦୁଇ ଧାତୁର ଦାମ୍ କାହିଁକି ବଢ଼ୁଛି ସେନେଇ ଜନସାଧାରଣଙ୍କ ମନରେ ପ୍ରଶ୍ନ ଉଠିବା ସ୍ବାଭାବିକ ।
ଡିସେମ୍ବର ୧୯ରେ ୧୦ ଗ୍ରାମ ସୁନାର ଦାମ ୧,୩୪,୧୯୬ ଟଙ୍କା ରହିଥିବା ବେଳେ ଆଜି ତା’ର ମୂଲ୍ୟ ୧.୪୦ ଲକ୍ଷ ପାଖାପାଖି ପହଞ୍ଚି ଯାଇଛି । ଅର୍ଥାତ ଗୋଟିଏ ସପ୍ତାହରେ ଏହି ଦରରେ ୬ ହଜାର ଟଙ୍କା ବୃଦ୍ଧି ଘଟିଛି । ସମାନ ତାରିଖରେ ରୁପା ଦାମ କିଲୋ ପ୍ରତି ୨.୦୮ ଲକ୍ଷ ରହିଥିବା ବେଳେ ଏବେ ୨.୪୦ ଲକ୍ଷରେ ପହଞ୍ଚି ଯାଇଛି । ଅର୍ଥାତ ସପ୍ତାହ ମଧ୍ୟରେ ରୁପା ଦାମ୍ ୩୨ ହଜାର ବୃଦ୍ଧି ଘଟିଛି । ତେବେ ଅଳଙ୍କାରର ଦାମ୍ ବୃଦ୍ଧି ପଛରେ ଏକାଧିକ କାରଣ ରହିଛି ।
ରାଜନୈତିକ ଚାପ, ତୈଳ ବଜାର ଓ ସଂଘର୍ଷ କାରଣରୁ ସଙ୍କଟରୁ ବର୍ତ୍ତିବା ପାଇଁ ନିବେଶକ ସୁନା-ରୁପାରେ ନିବେଶ କରୁଛନ୍ତି । କେନ୍ଦ୍ରୀୟ ବ୍ୟାଙ୍କମାନଙ୍କ ଦ୍ବାରା ଏହି ଧାତୁକୁ ଅଧିକ ମାତ୍ରାରେ କ୍ରୟ କରାଯାଉଛି । ଏହାଫଳରେ ଏହାର ଚାହିଦା ଅଧିକ ବଢ଼ୁଛି ଓ ଦାମ୍ ବଢ଼ୁଛି । ଗୋଲ୍ଡ ଓ ସିଲଭର ETFର ନିବେଶକଙ୍କ ସଂଖ୍ୟା ଦ୍ରୁତ ଭାବେ ବଢ଼ିବାରେ ଲାଗିଛି । ମାର୍କେଟ ନିମ୍ନମୁଖୀ ମଧ୍ୟରେ ଲୋକେ ସୁନା ଓ ଚାନ୍ଦି ଇଟିଏଫ ମାଧ୍ୟମରେ ନିବେଶକୁ ସୁରକ୍ଷିତ ମଣୁଛନ୍ତି । ଡଲାର ଦୁର୍ବଳ ହେଲା ଓ ଫେଡରଲ ରିଜର୍ଭ ଦ୍ବାରା ସୁଧ ହାର ହ୍ରାସ କରାଯାଉଛି । ଯାଦ୍ବାରା ସୁନା ଓ ଚାନ୍ଦିର ଚାହିଦା ବଢ଼ୁଛି ।
ପାଖେଇ ଆସୁଛି ବାଂଲାଦେଶ ନିର୍ବାଚନ: ଅବାଧ ଓ ମୁକ୍ତ ନିର୍ବାଚନ ଲାଗି ପ୍ରସ୍ତାବ ଦେଲା ଭାରତ
ପାଖେଇ ଆସୁଛି ବାଂଲାଦେଶ ନିର୍ବାଚନ। ସେପଟେ ଦେଶରେ ଅବାଧ, ମୁକ୍ତ ନିର୍ବାଚନ ଲାଗି ପ୍ରସ୍ତାବ ଦେଇଛି ଭାରତ। ଦେଶରେ ସଂଖ୍ୟାଲଘୁଙ୍କ ଉପରେ ଆକ୍ରମଣ ବଢିଚାଲିଥିବାରୁ ଏନେଇ ଆଶଙ୍କା ବ୍ୟକ୍ତ କରିଛି ଭାରତ। ସେପଟେ ଫରିଦପୁରରେ ଗାୟକ ନାଗର ବାଉଲ ଜେମସଙ୍କ ଏକ ସଂଗୀତ କାର୍ଯ୍ୟକ୍ରମ ଉପରେ ଆକ୍ରମଣ କରିଛନ୍ତି ଉତ୍ତ୍ୟକ୍ତ ଜନତା। ଏହାକୁ ନେଇ ବାଂଲାଦେଶରେ କଳାକାର ମହଲରେ ଅସନ୍ତୋଷ ପ୍ରକାଶ ପାଇଛି। ସଂଗୀତକୁ କାହିଁକି ଟାର୍ଗେଟ କରାଯାଉଛି ବୋଲି ବିଭିନ୍ନ ମହଲରେ ଉଠିଛି ପ୍ରଶ୍ନ। ଫରିଦପୁରର ଏକ ସ୍କୁଲ ପରିସରରେ ଜେମସଙ୍କ ରକ୍ କନସର୍ଟ ଆୟୋଜିତ ହେବାର ଥିଲା। ମାତ୍ର କିଛି ଲୋକ ସେଠାରେ ପହଞ୍ଚି ଇଟା ମାଡ଼ କରିବା ସହ କାର୍ଯ୍ୟକ୍ରମକୁ ବନ୍ଦ କରିଥିଲେ। ବାଂଲାଦେଶର ଗୁରୁ ଅଫ ରକ୍ ନାମରେ ବେଶ ଜଣାଶୁଣା ଜେମସଙ୍କ କାର୍ଯ୍ୟକ୍ରମ ଉପରେ ହୋଇଥିବା ଆକ୍ରମଣକୁ ବିଭିନ୍ମ ମହଲରେ ନିନ୍ଦା କରାଯାଇଛି। ଏହି ଘଟଣାରେ ୨୦ରୁ ଅଧିକ ଲୋକ ଆହତ ହୋଇଛନ୍ତି।
ସେପଟେ ଘଟଣାକୁ ଗୁରୁତ୍ଵର ସହ ନେଇଛି ଭାରତ। ଆକ୍ରମଣ ଘଟଣାକୁ ଅଣଦେଖା କରାଯାଇପାରିବ ନାହିଁ ବୋଲି କହିଛି ଭାରତ। ବାଂଲାଦେଶରେ ହିଂସା ଆରମ୍ଭ ହେବା ପରଠାରୁ ଦୁଇ ଦୁଇ ଜଣ ହିନ୍ଦୁଙ୍କୁ ପିଟି ପିଟି ହତ୍ୟା କରିଛନ୍ତି। ଭାରତ ବାଂଲାଦେଶର ନାଗରିକଙ୍କ ସହିତ ଭଲ ସମ୍ପର୍କ ସ୍ଥାପନ କରିବାକୁ ପ୍ରତିବଦ୍ଧ ବୋଲି କହିଛନ୍ତି ଭାରତୀୟ ବୈଦେଶିକ ମନ୍ତ୍ରାଳୟ ମୁଖପାତ୍ର ରଣଧୀର ଜୟସ୍ଵାଲ। ବାଂଲାଦେଶରେ ସଂଖ୍ୟାଲଘୁଙ୍କ ଉପରେ ହିଂସା ଚିନ୍ତାର ବିଷୟ। ଦୀପୁ ଦାସଙ୍କ ହତ୍ୟାକୁ ନିନ୍ଦା କରୁଛି ଭାରତ। ଅପରାଧୀମାନଙ୍କୁ ଦଣ୍ଡ ଦିଆଯିବ ବୋଲି ଆଶା କରୁଛୁ ବୋଲି କହିଛି ଭାରତ। ବାଂଲାଦେଶରେ ବର୍ତ୍ତମାନର ସରକାରରେ ହତ୍ୟା, ପୋଡ଼ାଜଳା ଏବଂ ଜମି ହଡ଼ପ ଭଳି ୨ ହଜାର ୯୦୦ ଘଟଣା ରିପୋର୍ଟ ହୋଇଛି। ଭାରତ ବାଂଲାଦେଶରେ ମୁକ୍ତ, ନିରପେକ୍ଷ ନିର୍ବାଚନ ଆଶା କରୁଛି। ଭାରତ ବାଂଲାଦେଶର ନାଗରିକଙ୍କ ସହିତ ଉତ୍ତମ ସମ୍ପର୍କ ସ୍ଥାପନ କରିବାକୁ ପ୍ରତିବଦ୍ଧ। ସେଠାରେ ଶାନ୍ତି ଏବଂ ସ୍ଥିରତା ଆଶା କରୁଛି ବୋଲି କହିଛି ଭାରତ। ଏଥିରେ ସମସ୍ତ ବର୍ଗର ଲୋକ ଅଂଶଗ୍ରହଣ କରିବା ଉଚିତ। ସେପଟେ ଗତକାଲି କୋଲକାତାରେ ବିଭିନ୍ନ ହିନ୍ଦୁ ସଂଗଠନ ପକ୍ଷରୁ ପ୍ରତିବାଦ କରାଯାଇଛି।
ଶ୍ରୀମନ୍ଦିର ରତ୍ନଭଣ୍ଡାରରେ ଥିବା ସୁବର୍ଣ୍ଣ ଅଳଙ୍କାରର କରାଯିବ ମେଳକ ଓ ଗଣତିମଣତି
ଶ୍ରୀମନ୍ଦିର ରତ୍ନଭଣ୍ଡାରରେ ଥିବା ସୁବର୍ଣ୍ଣ ଅଳଙ୍କାରର କରାଯିବ ମେଳକ ଓ ଗଣତିମଣତି। ଏନେଇ ଆଜି ଅପରାହ୍ନରେ ବସିବ ରତ୍ନଭଣ୍ଡାର ଉଚ୍ଚସ୍ତରୀୟ କମିଟି ବୈଠକ। ଜଷ୍ଟିସ ବିଶ୍ୱନାଥ ରଥଙ୍କ ଅଧ୍ୟକ୍ଷତାରେ ବସିବ ବୈଠକ । ରାଜ୍ୟ ସରକାରଙ୍କ ମାର୍ଗଦର୍ଶିକା ଅନୁସାରେ ଆଲୋଚନା କରାଯାଇ ପଦକ୍ଷେପ ନିଆଯିବ।ତେବେ ଆଗକୁ ଇଂରାଜୀ ନବବର୍ଷ ଥିବାରୁ ଶ୍ରୀମନ୍ଦିରକୁ ଲକ୍ଷାଧିକ ଭକ୍ତଙ୍କ ସମାଗମ ହେବ।ତେଣୁ ଏହି ସମୟରେ ରତ୍ନଭଣ୍ଡାର ଖୋଲିବା ସମ୍ଭବ ହୋଇନପାରେ।
ଏଣୁ ବୈଠକରେ ଆସନ୍ତା ଜାନୁଆରୀ ମାସରେ କେଉଁ ତାରିଖରେ ରତ୍ନ ଭଣ୍ଡାର ଖୋଲିବ ସେନେଇ ତିଥି ,ବାର ସହ ମାହେନ୍ଦ୍ର ବେଳା ସ୍ଥିର କରାଯିବ। ସେପଟେ ଗଣତିମଣତି ସମୟରେ ଅଳଙ୍କାରର ସୁରକ୍ଷା ଦୃଷ୍ଟିରୁ ଭକ୍ତଙ୍କ ଦର୍ଶନ କେତେ ସମୟ ପର୍ଯ୍ୟନ୍ତ ବନ୍ଦ କରାଯିବ ତାହା ମଧ୍ୟ ସ୍ଥିରୀକୃତ କରାଯିଵ।ପରେ ଶ୍ରୀମନ୍ଦିର ପରିଚାଳନା କମିଟିରେ ଅନୁମୋଦନ ହେବାପରେ ଖୋଲିବ ରତ୍ନଭଣ୍ଡାର।ମହାପ୍ରଭୁଙ୍କ ରତ୍ନ ଅଳଙ୍କାର ସବୁର ଡିଜିଟାଇଜେସନ କରାଯିବ।୧୯୭୮ ମସିହାର ମେଳକ ସହ ଗଣତି ମଣତି କରାଯିବ।ମାର୍ଗଦର୍ଶିକା ଅନୁସାରେ ସମସ୍ତ କାର୍ଯ୍ୟ କରାଯିବ। ବୈଠକରେ ଶ୍ରୀମନ୍ଦିର ମୁଖ୍ୟ ପ୍ରଶାସକ, ଜିଲ୍ଲାପାଳ,ଏସପି ଏବଂ ରତ୍ନଭଣ୍ଡାର ତଦାରଖ କମିଟିର ସଦସ୍ୟ ମାନେ ଉପସ୍ଥିତ ରହିବେ।
ଦିଲ୍ଲୀରେ କଂଗ୍ରେସ ୱାର୍କିଂ କମିଟିର ଗୁରୁତ୍ଵପୂର୍ଣ୍ଣ ବୈଠକ
ଦିଲ୍ଲୀରେ କଂଗ୍ରେସ ୱାର୍କିଂ କମିଟିର ଗୁରୁତ୍ଵପୂର୍ଣ୍ଣ ବୈଠକ। ଏହି ବୈଠକରେ ଦଳର ସବୁ ପ୍ରମୁଖ ନେତା ଯୋଗ ଦେଇଛନ୍ତି। ଲୋକସଭାରେ ବିରୋଧୀ ଦଳ ନେତା ରାହୁଲ ଗାନ୍ଧି, ୟୁପିଏ ଅଧ୍ୟକ୍ଷା ସୋନିଆ ଗାନ୍ଧି, କଂଗ୍ରେସ ସଭାପତି ମଲ୍ଲିକାର୍ଜୁନ ଖଡ଼ଗେଙ୍କ ସମେତ ସବୁ ବରିଷ୍ଠ ନେତା ଏଥିରେ ଯୋଗ ଦେଇଛନ୍ତି। ଦେଶର ପ୍ରମୁଖ ପ୍ରସଙ୍ଗ ଉପରେ ଏଥିରେ ଆଲୋଚନା ହୋଇଥିବାର ସମ୍ଭାବନା ଅଛି। ବିଶେଷ କରି MNREGA, ଏସଆଇଆର୍ ଓ ଭୋଟ୍ ଚୋରିକୁ ନେଇ ଜୋରଦାର ଆଲୋଚନା ହେବାର ଆଶା ଅଛି। ଏହି ସବୁ ପ୍ରସଙ୍ଗକୁ ନେଇ କେନ୍ଦ୍ର ସରକାରଙ୍କ ବିରୋଧରେ ରାଜନୈତିକ ରଣନୀତି ପ୍ରସ୍ତୁତ କରିପାରେ କଂଗ୍ରେସ। MNREGA ହେଉଛି ୟୁପିଏ ୱାନର ସବୁଠାରୁ ବଡ଼ ଯୋଜନା।
କିଛି ଦିନ ତଳଏ ଏହାକୁ ଅଚଳ କରିଦେଇଛନ୍ତି କେନ୍ଦ୍ର ସରକାର। ଲୋକଙ୍କ ଆଉ ୧୦୦ ଦିନର କାମ ଗ୍ୟାରେଣ୍ଟି ମିଳିବ ନାହିଁ। ଏହା ବିରୋଧରେ କଂଗ୍ରେସ ଯୁଦ୍ଧଂ ଦେହି ଡାକରା ଦେଇପାରେ। ସେହିପରି ଭୋଟ ଚୋରି ଓ SIR ପ୍ରସଙ୍ଗରେ ମଧ୍ୟ ଆଲୋଚନା ହେଉଥିବା ଜଣାପଡ଼ିଛି। ବିହାର ପରାଜୟ ପରେ ଏହା ହେଉଛି ସିଡବ୍ଲୁସିର ପ୍ରଥମ ବୈଠକ। ଆଗକୁ ଆସାମ, କେରଳ, ପଶ୍ଚିମବଙ୍ଗ, ତାମିଲନାଡୁ ଓ ପୁଡୁଚେରିର ନିର୍ବାଚନ ଅଛି। ଏ ସଂପର୍କରେ ମଧ୍ୟ ଆଲୋଚନଚା କରାଯାଇ ପ୍ରସ୍ତୁତ ହେବ ରଣନୀତି।
ଜାନୁଆରୀ ୧ ତାରିଖରୁ ହେବାକୁ ଯାଉଛି ଏହି ୯ଟି ବଡ଼ ପରିବର୍ତ୍ତନ
ବର୍ଷ ୨୦୨୫ ଧୀରେଧୀରେ ସରିବାକୁ ଯାଉଥିବା ବେଳେ ନୂଆବର୍ଷ ୨୦୨୬ ପାଦ ଥାପିବ । ନୂଆବର୍ଷ ଆରମ୍ଭରୁ ଅନେକ ବଡ଼ ଆର୍ଥିକ ପରିବର୍ତ୍ତନ ଦେଖିବାକୁ ମିଳିବ । ଏହା ଆପଣଙ୍କ ପକେଟ ଉପରେ ପ୍ରଭାବ ପକାଇପାରେ । ଏଲପିଜି ଗ୍ୟାସ ଦର ଠାରୁ ଆରମ୍ଭ କରି ପ୍ୟାନ, ଆଧାର, ନୂଆ ପେ କମିସନ ପର୍ଯ୍ୟନ୍ତ ଅନେକ ନିୟମ ବଦଳିବ ।
୧- ଆଧାର କାର୍ଡ ଓ ପ୍ୟାନର ଲିଙ୍କ କରିବାର ତାରିଖ ଡିସେମ୍ବରେ ସମାପ୍ତ ହେବାକୁ ଯାଉଛି । ଯଦି ଆପଣମାନେ ଲିଙ୍କ କରିନଥିବେ, ତେବେ ଜାନୁଆରୀ ପହିଲାରୁ ତାହା ନିଷ୍କ୍ରିୟ ହୋଇଯିବ ।
୨- ବ୍ୟାଙ୍କ ୟୁପିଆଇ ଓ ଡିଜିଟାଲ ପେମେଣ୍ଟ ନିୟମ କଠୋର କରାଯାଉଛି । ଫ୍ରଡକୁ ରୋକିବା ପାଇଁ ସିମ ଭେରିଫିକେସନର ନିୟମକୁ କଡ଼ାକଡ଼ି କରାଯାଉଛି । ହ୍ବାଟସଆପ, ଟେଲିଗ୍ରାମ ଓ ସିଗନାଲ ପରି ଆପରେ ଠକାମିକୁ ରୋକିବାକୁ ପ୍ରୟାସ କରାଯାଉଛି ।
୩- ଏସବିଆଇ, ପିଏନବି ଓ ଏଚଡିଏଫସି ପରି ବ୍ୟାଙ୍କ ପକ୍ଷରୁ ଲୋନ ଦର କମ୍ କରାଯାଇଛି । ଏହା ଜାନୁଆରୀ ପହିଲାରୁ ଲାଗୁ ହେବ । ସେହିପରି ଏହି ତାରିଖରୁ ନୂଆ ସ୍ଥାୟୀ ଜମା ସୁଧ ହାର ମଧ୍ୟ ଲାଗୁ ହେଉଛି ।
୪- ବର୍ଷ ଆରମ୍ଭରୁ ଏଲପିଜି ଗ୍ୟାସ ସିଲିଣ୍ଡର ଦାମରେ ପରିବର୍ତ୍ତନ ହୋଇଥାଏ । ଏଲପିଜି ଦାମରେ ହ୍ରାସ ମଧ୍ୟ ପରିଲକ୍ଷିତ ହୋଇପାରେ ।
୫- ତୈଳ କମ୍ପାନୀମାନେ ପ୍ରତି ମାସରେ ଏଲପିଜି ସହ ସିଏନଜି-ପିଏନଜି ଓ ଜେଟ ଫୁଏଲ (ଏଟିଏଫ) ଦାମ ପରିବର୍ତ୍ତନ କରିଥାନ୍ତି । ବର୍ଷ ଆରମ୍ଭରୁ ଏହି ସବୁ ଦାମରେ ପରିବର୍ତ୍ତନ ଘଟିପାରେ ।
୬- ନୂଆ ଆୟକର ଆକ୍ଟ ୨୦୨୫ ଜାନୁଆରୀ ୧ରୁ ପୂର୍ଣ୍ଣ ଭାବେ ଲାଗୁ ହେବ ନାହିଁ । ମାତ୍ର ସରକାର ଜାନୁଆରୀ ପର୍ଯ୍ୟନ୍ତ ନୂଆ ଆଇଟିଆର (ଟ୍ୟାକ୍ସ ରିଟର୍ଣ୍ଣ) ଫର୍ମ ଓ ନିୟମକୁ ନୋଟିଫାଇ କରିବେ, ଯାହାକି ଏପ୍ରିଲ ୨୦୨୬ ବା ଆର୍ଥିକ ବର୍ଷ ୨୦୨୬-୨୭ ଠାରୁ ଲାଗୁ ହେବ ।
୭- ସରକାର ୮ମ ବେତନ ଆୟୋଗ ଜାନୁଆରୀ ୧ରୁ ଲାଗୁ କରିବେ ବୋଲି ଆଶା କରାଯାଉଛି । ଡିସେମ୍ବର ୩୧ରେ ସପ୍ତମ ବେତନ ଆୟୋଗ ସମାପ୍ତ ହୋଇଯିବ ।
୮- ଉତ୍ତରପ୍ରଦେଶ ପରି ରାଜ୍ୟମାନଙ୍କରେ କିଷାନଙ୍କୁ ପିଏମ-କିଷାନ ଯୋଜନାର ଫାଇଦା ପାଇବାକୁ ୟୁନିକ କିଷାନ ଆଇଡିର ଆବଶ୍ୟକତା ପଡ଼ିବ ।
୯- ଜାନୁଆରୀ ୧ରୁ ଭାରତରେ ଅନେକ ପ୍ରମୁଖ ଅଟୋମୋବାଇଲ କମ୍ପାନୀମାନେ ନିଜର ଗାଡ଼ିର ମୂଲ୍ୟ ବୃଦ୍ଧି କରିବାକୁ ଯାଉଛନ୍ତି । ନିସାନ, ବିଏମଡବ୍ଲ୍ୟୁ, ଜେଏସଡବ୍ଲ୍ୟୁ ଏମଜି ମୋଟର, ରେନଲ୍ଟ ଏଥର ଏନର୍ଜି ଗାଡ଼ିର ଦାମରେ ୩ ହଜାର ଟଙ୍କାରୁ ଆରମ୍ଭ କରି ୩ ପ୍ରତିଶତ ପର୍ଯ୍ୟନ୍ତ ବଢ଼ିବାକୁ ଯାଉଛି । ଟାଟା ମୋଟର୍ସ ଓ ହୋଣ୍ଡା ପରି କମ୍ପାନୀମାନେ ବୃଦ୍ଧି ନେଇ ସଙ୍କେତ ଦେଇସାରିଛନ୍ତି ।
ଜିରୋ ନାଇଟ ସେଲିବ୍ରେସନ ନେଇ କମିସନରେଟ ପୋଲିସର ସୁରକ୍ଷା ବ୍ୟବସ୍ଥା କଡାକଡ଼ି
ଜିରୋ ନାଇଟ ସେଲିବ୍ରେସନ ନେଇ କମିସନରେଟ ପୋଲିସର ସୁରକ୍ଷା ବ୍ୟବସ୍ଥା କଡାକଡ଼ି। ସୁରକ୍ଷା ଲାଗି ୧୫ ପ୍ଲାଟୁନ ପୋଲିସ ଫୋର୍ସ ନିୟୋଜିତ ରହିବେ । ନିଜ ନିଜ ଥାନା ଅଞ୍ଚଳରେ ସ୍ଥିତି ଅନୁଧ୍ୟାନ କରିବାକୁ ସମସ୍ତ ଥାନା ଅଧିକାରୀମାନଙ୍କୁ ନିର୍ଦେଶ ଦିଆଯାଇଛି। ଅଗ୍ନିଶମ ବିଭାଗ ପକ୍ଷରୁ ମଧ୍ୟ ଯାଞ୍ଚ ପ୍ରକ୍ରିୟା ସରିଛି। ସୁରୁଖୁରୁରେ ଜିରୋ ନାଇଟ ସେଲିବ୍ରେସନ କରିବା ଲାଗି ପଦକ୍ଷେପ ନିଆଯାଇଛି। ମଦ୍ୟପ ଗାଡି ଚାଳକମାନଙ୍କ ଉପରେ ନଜର ରହିବ। ସବୁ ବାର, ରେଷ୍ଟୁରାଣ୍ଟ ମାଲିକମାନଙ୍କୁ ମଧ୍ୟ ସଚେତନ ରହିବା ଲାଗି ନିର୍ଦ୍ଦେଶସ ଦିଆଯାଇଛି। ମହିଳାମାନଙ୍କ ସୁରକ୍ଷାକୁ ଅଧିକ ଗୁରୁତ୍ୱ ଦେଇଛି କମିସନରେଟ ପୋଲିସ। ନିର୍ଦ୍ଧାରିତ ସମୟ ସୀମା ଭିତରେ କାର୍ଯ୍ୟକ୍ରମ ସାରିବାକୁ ମଧ୍ୟ ନିର୍ଦେଶ ଦିଆଯାଇଛି।
ମୁଖ୍ୟ ନିର୍ବାଚନ କମିଶନରଙ୍କ ଓଡ଼ିଶା ଗସ୍ତ: ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ
ପୁରୀରେ ମୁଖ୍ୟ ନିର୍ବାଚନ କମିଶନର ଜ୍ଞାନେଶ କୁମାର। ପୁରୀରେ ପହଞ୍ଚିବା ପରେ ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ତାଙ୍କୁ ସ୍ବାଗତ କରିଛନ୍ତି । ପରେ କୋଣାର୍କ ସୂର୍ଯ୍ୟ ମନ୍ଦିର ଗସ୍ତ କରିବେ ସିଇସି l ଓଡ଼ିଶା ଗସ୍ତ ବେଳେ ସେ ବିଭିନ୍ନ କାର୍ଯ୍ୟକ୍ରମରେ ଯୋଗଦେବେ। ଭୁବନେଶ୍ବରରେ ପହଞ୍ଚିବା ପରେ ସେ ଓଡ଼ିଶାବାସୀଙ୍କୁ ଜୟ ଜଗନ୍ନାଥ କହି ଶୁଭେଚ୍ଛା ଜଣାଇଛନ୍ତି। ନିର୍ବାଚନ ପ୍ରକ୍ରିୟା ନେଇ ସେ ବିଏଲଓମାନଙ୍କ ସହ ବୈଠକରେ ଆଲୋଚନା କରିବାର କାର୍ଯ୍ୟକ୍ରମ ରହିଛି। ମୁଖ୍ୟ ନିର୍ବାଚନ କମିଶନର ଆସନ୍ତା ୨୯ ତାରିଖ ସୋମବାର ଅପରାହ୍ନ ୩ଟାରେ ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ ଅଡିଟୋରିୟମରେ ବୁଥ ସ୍ତରୀୟ ଅଧିକାରୀମାନଙ୍କ ସହ ଅନୁଷ୍ଠିତ ହେବାକୁ ଥିବା ବୈଠକରେ ଅଧ୍ୟକ୍ଷତା କରି ସମ୍ବୋଧନ କରିବେ । ସେହିଦିନ ରାତିରେ ଭୁବନେଶ୍ୱରରୁ ପ୍ରତ୍ୟାବର୍ତ୍ତନ କରିବାର କାର୍ଯକ୍ରମ ରହିଛି। ମ
ବିଜେଡି ଶାସନରେ ଓଡ଼ିଶା ଛୁଇଁଥିଲା ବିକାଶର ଶିଖର, ଶହେ ବର୍ଷ ଯାଏଁ ରାଜ୍ୟବାସୀଙ୍କ ସାଜିବ ସ୍ବର: ନବୀନ ପଟ୍ଟନାୟକ
ବିଜେଡି ଶାସନରେ ଓଡ଼ିଶା ଛୁଇଁଥିଲା ବିକାଶର ଶିଖର, ଶହେ ବର୍ଷ ଯାଏଁ ରାଜ୍ୟବାସୀଙ୍କ ସାଜିବ ସ୍ବର: ନବୀନ ପଟ୍ଟନାୟକ
ନନ୍ଦିଘୋଷ ବ୍ୟୁରୋ: ସେବା, ସ୍ବାଭିମାନ ଓ ସଂଗ୍ରାମ । ଏହି ମୂଳମନ୍ତ୍ର ନେଇ ଆଜି ଶଂଖ ଭବନରେ ବେଶ ଉତ୍ସାହ ସହ ବିଜୁ ଜନତା ଦଳ ପାଳିଛି ୨୯ତମ ପ୍ରତିଷ୍ଠା ଦିବସ । ବର୍ତ୍ତମାନ ବିଜେଡି ଏକ ଜନ ଆନ୍ଦୋଳନ ପାଲଟିଥିବା ବିଜୁ ଜନତା ଦଳର ଭବିଷ୍ୟତକୁ ନେଇ ବିଜେଡି ସଭାପତି ନବୀନ ପଟ୍ଟନାୟକ ସ୍ପଷ୍ଟ କରିବା ପରେ ଜନସେବା କାର୍ଯ୍ୟକ୍ରମକୁ ଆହୁରି ଆଗକୁ ନେବାକୁ ସଂକଳ୍ପ ନେଇଛନ୍ତି ଦଳୀୟ ନେତା ଓ କର୍ମୀ । ବିରୋଧୀରେ ଥାଇ ବି ଲୋକଙ୍କ ସ୍ବର ସାଜିବାର କାର୍ଯ୍ୟକ୍ରମ ଜାରି ରଖିବ ବିଜୁ ଜନତା ଦଳ ।
ବିଜେଡିର ୨୯ତମ ପ୍ରତିଷ୍ଠା ଦିବସ । ଏହି ଅବସରରେ ଆଜି ଶଂଖ ଭବନରେ ଦଳୀୟ ନେତା ଓ କର୍ମୀଙ୍କ ଭିଡ଼ ଜମିଥିଲା । ପାରମ୍ପରିକ ନୃତ୍ୟ, ଗୀତ, ବାଦ୍ୟ ଓ ଶଂଖ ଧ୍ବନିରେ ପ୍ରକମ୍ପିତ ହୋଇଥିଲା ପରିବେଶ । ବିରାଟ ପଟୁଆରରେ ଭୁବନେଶ୍ବରର ସମସ୍ତ ନିର୍ବାଚନ ମଣ୍ଡଳୀରୁ ଦଳୀୟ ନେତା ଓ କର୍ମୀ ପଦଯାତ୍ରା ମାଧ୍ୟମରେ ପହଞ୍ଚିଥିଲେ ଶଂଖ ଭବନ । ସକାଳୁ ସକାଳୁ ବିଜେଡି ସଭାପତି ନବୀନ ପଟ୍ଟନାୟକ ବି ଦେଇଥିଲେ ସେବାର ବାର୍ତ୍ତା । ନିଜ ସୋସିଆଲ ମିଡିଆରେ ପ୍ରତିଷ୍ଠା ଦିବସର ଶୁଭେଚ୍ଛା ଜଣାଇ ନବୀନ ଉଲ୍ଲେଖ କରିଥିଲେ ଯେ ଲୋକଙ୍କ ସ୍ବର ହୋଇ ବିଜୁ ଜନତା ଦଳ ସାଜିଛି ଓଡ଼ିଶାର ବଳ । ଓଡ଼ିଶାର ବିକାଶରେ ବିଜୁ ଜନତା ଦଳ ସର୍ବଦା ଅଟଳ । ବିଜୁ ବାବୁଙ୍କ ଆଦର୍ଶ ଏବଂ ଲକ୍ଷ ଲକ୍ଷ କର୍ମୀଙ୍କ ସମର୍ପଣରେ ବିଜୁ ଜନତା ଦଳ ଦେଶର ଶ୍ରେଷ୍ଠ ଆଞ୍ଚଳିକ ଦଳ ହୋଇଛି । ଦଳର ଗୌରବମୟ ୨୯ତମ ପ୍ରତିଷ୍ଠା ଦିବସ ଅବସରରେ ସମସ୍ତେ ସେବା, ସ୍ବାଭିମାନ ଓ ସଂଗ୍ରାମର ମନ୍ତ୍ରରେ ସଂକଳ୍ପବଦ୍ଧ ହୋଇ ଆଗକୁ ବଢ଼ିବାକୁ ନିର୍ଦ୍ଦେଶ ଦେଇଛନ୍ତି ନବୀନ ।
ବିଜେଡି ଦେଶର ଦୃଢ ଆଞ୍ଚଳିକ ଦଳ । କଂଗ୍ରେସର ଜନ ବିରୋଧୀ ହାଓ୍ବା ବିରୋଧରେ ୧୯୯୭ରେ ଜନ୍ମ ନେଇଥିଲା ବିଜେଡି । ଯାହାର ନେତୃତ୍ବ ନେଇ ଅଭାବୀ ଓଡ଼ିଶାକୁ ପ୍ରଭାବୀ ଓଡ଼ିଶାରେ ପରିଣତ କରିବାରେ ସଫଳ ହୋଇଥିଲେ ତତ୍କାଳୀନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ହେଲେ ବିଜେପି ସରକାର ଏ ସବୁ ବିକାଶ ଗୁଡ଼ିକ ବିରୋଧରେ କାମ କରୁଥିବା ଅଭିଯୋଗ କରିଛି ବିଜେଡି । ଏହା ବିରୋଧରେ ନବୀନ ପଟ୍ଟନାୟକଙ୍କ ନେତୃତ୍ବରେ ବିଜେଡି ଓଡ଼ିଶାର ସ୍ବାଭିମାନ ପାଇଁ ସଂଗ୍ରାମ କରିବା ସହ ସେବା ଜାରି ରଖିବା ନେଇ ସଂକଳ୍ପ ନେଇଛି ।
ମହିଳା ସଶକ୍ତିକରଣରୁ ଆରମ୍ଭ କରି ତୃଣମୂଳ ସ୍ତରର ଲୋକଙ୍କ ବିକାଶକୁ ନବୀନ ପଟ୍ଟନାୟକଙ୍କ ନେତୃତ୍ବରେ ଗୁରୁତ୍ବ ଦେଇ ଆସିଛି ବିଜୁ ଜନତା ଦଳ । ସେହିପରି ଯୁବଶକ୍ତି ଦଳର ପୁଞ୍ଜି ବୋଲି ନବୀନ ଆଖ୍ୟା ଦେଇଛନ୍ତି । ଯାହା ମହିଳା, ଯୁବକ ଓ ଛାତ୍ର ପରି ବିଜେଡିର ଛାମୁଆ ସଂଗଠନକୁ ଅଧିକ କ୍ରିୟାଶୀଳ କରିବାକୁ ମାର୍ଗ ଦେଖାଇଛି । ବର୍ତ୍ତମାନର ଆହ୍ବାନକୁ ଭବିଷ୍ୟତ ପାଇଁ ସୁଯୋଗରେ ରୂପାନ୍ତରିତ କରି ଏକ ସଶକ୍ତ ଓଡ଼ିଶା ଗଠନ ଦିଗରେ ବ୍ରତୀ ହେବାକୁ ନବୀନ ସମସ୍ତଙ୍କୁ ପରାମର୍ଶ ଦେଇଛନ୍ତି ।
ବିଜେଡି ଓ ବିକାଶ ଗୋଟାଏ ମୁଦ୍ରାର ଦୁଇଟି ପାର୍ଶ୍ବ । ଦୁଇ ଦଶନ୍ଧିରୁ ଅଧିକ ସମୟ ଧରି ଜନ କଲ୍ୟାଣ ଦିଗରେ ନବୀନ ପଟ୍ଟନାୟକଙ୍କ ସରକାର କାମ କରିଥିଲା । ଯେଉଁଥି ପାଇଁ ଆଜି ବିରୋଧୀରେ ଥିବା ସତ୍ତ୍ବେ, ଦେଶର ସବୁଠାରୁ ଶକ୍ତିଶାଳୀ ଆଞ୍ଚଳିକ ଦଳ ହେବାରେ ସକ୍ଷମ ହୋଇ ପାରିଛି ବିଜୁ ଜନତା ଦଳ ।
ନୂଆବର୍ଷରୁ ରାଜସ୍ବ ସେବା କ୍ଷେତ୍ରରେ ଲୋକଙ୍କୁ ମିଳିବ ସହଜ ଓ ସରଳ ସେବା
ନୂଆବର୍ଷରୁ ରାଜସ୍ବ ସେବା କ୍ଷେତ୍ରରେ ଲୋକଙ୍କୁ ମିଳିବ ସହଜ ଓ ସରଳ ସେବା
ନନ୍ଦିଘୋଷ ବ୍ୟୁରୋ: ଏଣିକି ଲୋକଙ୍କ ପାଇଁ ସହଜ ହେବେ ରାଜସ୍ବ ସେବା । ଆସୁଛି ରାଜସ୍ବ ସଂସ୍କାର । ନୂଆବର୍ଷରୁ ନୂଆ ରୂପରେ ଲୋକଙ୍କୁ ମିଳିବ ରାଜସ୍ବ ସେବା । ରାଜ୍ୟ ସରକାରଙ୍କ ରାଜସ୍ବ ବିଭାଗ ଲୋକଙ୍କ ସହଜ ଓ ସରଳ ଭାବେ ରାଜସ୍ବ ସେବା ପହଞ୍ଚାଇବା ପାଇଁ ନେଇଛନ୍ତି ବହୁବିଧ ପଦକ୍ଷେପ । ଜମିପଟ୍ଟାରେ ଉତ୍ତରାଧିକାରୀଙ୍କ ନାମ ସ୍ବୟଂକ୍ରିୟ ଭାବେ ଉଲ୍ଲେଖ ରହିବ। ଜବରଦଖଲ ଉଚ୍ଛେଦ ଓ ସରକାରୀ ଜମିର ସୁରକ୍ଷା ବି ରାଜସ୍ବ ବିଭାଗ ପାଇଁ ବଡ଼ ଟାସ୍କ । ସରକାରଙ୍କ ଏହି ଆଭିମୁଖ୍ୟକୁ ନେଇ ଆସନ୍ତା ଜାନୁଆରୀରୁ ଆରମ୍ଭ ହେବାକୁ ଯାଉଛି ରାଜସ୍ବ ପାଠଶାଳା । ପ୍ରତି କାର୍ଯ୍ୟଦିବସର ସନ୍ଧ୍ୟାରେ ଘଣ୍ଟାଏ ରାଜସ୍ବ ଅଧିକାରୀମାନଙ୍କୁ ଦିଆଯିବ ପ୍ରଶିକ୍ଷଣ । ସେପଟେ ସରକାରଙ୍କ ନୀତିରେ ଲୋକେ ଉପକୃତ ହେବାକୁ ହେଲେ ରାଜସ୍ବ ଅଧିକାରୀମାନେ ଆନ୍ତରିକତା ଦେଖାଇବା ଉଚିତ ବୋଲି ସମୀକ୍ଷକ ମତ ରଖିଛନ୍ତି ।
ଜାନୁଆରୀରୁ ରାଜସ୍ବ ଅଧିକାରୀ ପଢ଼ିବେ ପାଠ । ନୂଆବର୍ଷରୁ ରାଜସ୍ବ ସେବା କ୍ଷେତ୍ରରେ ଲୋକଙ୍କୁ ମିଳିବ ସହଜ ଓ ସରଳ ସେବା । ଏ ନେଇ ପ୍ରତି କାର୍ଯ୍ୟଦିବସ ସନ୍ଧ୍ୟାରେ ଏକ ଘଣ୍ଟା ପାଇଁ କ୍ଷେତ୍ରୀୟ ସ୍ତରରେ ଥିବା ରାଜସ୍ବ ଅଧିକାରୀ ରାଜସ୍ବ ପାଠଶାଳାରେ ପ୍ରଶିକ୍ଷଣ ପାଇବେ । ସନ୍ଧ୍ୟା ୫ରୁ ୬ ଘଣ୍ଟାଏ ଅନଲାଇନ କ୍ଲାସ ନେବେ ରାଜସ୍ବ ବିଭାଗର ବରିଷ୍ଠ ଅଧିକାରୀ । ଗତ ୧୮ ମାସ ମଧ୍ୟରେ ରାଜସ୍ବ ସେବାକୁ ଲୋକଙ୍କ ନିକଟତର କରିବାକୁ ଅନେକ ପଦକ୍ଷେପ ନିଆଯାଇଛି । ଜମି ବନ୍ଦୋବସ୍ତ କ୍ଷମତା ତହସିଲଦାରଙ୍କୁ ପ୍ରଦାନ କରାଯାଇଛି । ଏହାସହ ଜମି ପଟ୍ଟାରେ ନାମ ଥିବା ବ୍ୟକ୍ତି ଦେହାନ୍ତ ପରେ ତା’ର ଉତ୍ତରାଧିକାରୀଙ୍କ ନାମ ସ୍ବୟଂକ୍ରିୟ ଭାବେ ପଟ୍ଟାରେ ଉଲ୍ଲେଖ ହୋଇଯିବ । ଏହାସହିତ ପାର୍ଟ ପ୍ଲଟ ପଞ୍ଜୀକରଣଠାରୁ ଜବରଦଖଲ ଉଚ୍ଛେଦ ପର୍ଯ୍ୟନ୍ତ ରାଜସ୍ବ ବିଭାଗ ଅଧିକାରୀମାନଙ୍କୁ ଟାର୍ଗେଟ ଦେଇଛି । ସରକାରଙ୍କ ଏହି ବ୍ୟବସ୍ଥାକୁ କାର୍ଯ୍ୟକାରୀ କରିବାରେ ତୃଣମୂଳ ସ୍ତରର ଅଧିକାରୀମାନେ ବାରମ୍ବାର ଝୁଣ୍ଟୁଛନ୍ତି । ସରକାରଙ୍କ ନିଷ୍ପତ୍ତି ଲୋକଙ୍କ ପାଖରେ ପହଞ୍ଚାଇବାକୁ ସକ୍ଷମ ହେଉନାହାନ୍ତି । ରାଜସ୍ବ ପାଠଶାଳାରେ ତହସିଲଦାର, ଅତିରିକ୍ତ ତହସିଲଦାର, ଆରଆଇ, ଅମିନଙ୍କୁ ପ୍ରଶିକ୍ଷଣ ଦିଆଯିବ ।
ସରକାରଙ୍କ ରାଜସ୍ବ ସଂସ୍କାର ନୂଆ କଥା ନୁହେଁ । ପୂର୍ବରୁ ଥିବା ସରକାରଙ୍କ ଅମଳରେ ଏଭଳି ସଂସ୍କାର ରୂପୀ ପଦକ୍ଷେପ ନିଆଯାଇଛି । ହେଲେ ତଳ ସ୍ତରରେ ଥିବା କ୍ଷେତ୍ରୀୟ ଅଧିକାରୀମାନେ ଲୋକଙ୍କୁ ସହଜରେ ସେବା ଦେଉନାହାନ୍ତି । ଫଳରେ ଲୋକେ ଏବେ ନାହିଁ ନଥିବା ଅସୁବିଧାର ସମ୍ମୁଖୀନ ହେଉଛନ୍ତି । ଏବର ସରକାରଙ୍କ ଆଭିମୁଖ୍ୟକୁ ନେଇ ସଂଶୟ ପ୍ରକାଶ କରିଛନ୍ତି ସମୀକ୍ଷକ । କହିଛନ୍ତି, ଗ୍ରାମାଞ୍ଚଳରେ ଲୋକଙ୍କ ଜମିଜମା ସମସ୍ୟା ଅଧିକ ରହିଛି । ତହସିଲ ସ୍ତରରେ ଅଡୁଆ ତୁଟୁ ନଥିବାରୁ ଲୋକେ ଥାନା, କୋର୍ଟ, କଚେରୀ ଦୌଡ଼ୁଛନ୍ତି । ପଟ୍ଟା ଖଣ୍ଡେ ପାଇବାକୁ ମାସ ମାସ ଧରି ଲୋକଙ୍କୁ ଦୌଡ଼ିବାକୁ ପଡ଼ୁଛି । ଜମିର ମାପଚୁପ ପାଇଁ ବର୍ଷ ବର୍ଷ ଅପେକ୍ଷା କରିବାକୁ ପଡୁଛି । ରାଜସ୍ବ ବିଭାଗରେ ଦୁର୍ନୀତି ତଳରୁ ଉପର ଯାଏଁ ଗ୍ରାସ କରିଛି । ବିଜୁ ବାବୁ, ଜାନକୀ ବାବୁ, ନବୀନ ବାବୁଙ୍କ ସରକାରରେ ବି ଅନେକ ସଂସ୍କାର ଆସିଛି । ଏ ସରକାର ବି କିଛି ସଂସ୍କାର ଆଣିଛନ୍ତି । ହେଲେ ଉପରମୁଣ୍ଡର ନିଷ୍ପତ୍ତି ତଳସ୍ତରରେ କାର୍ଯ୍ୟକାରୀ ହୋଇପାରୁନାହିଁ । ଏଥିପାଇଁ ପାଠ ନୁହେଁ, ବରଂ ଅଧିକାରୀଙ୍କ ମାନସିକତା ବଦଳିବା ଦରକାର ବୋଲି ମତ ଦେଇଛନ୍ତି ସମୀକ୍ଷକ ।
ଗତ ୧୮ ମାସରେ ରାଜସ୍ବ ବିଭାଗର ୧୩ଟି କ୍ଷେତ୍ରରେ ସଂସ୍କାର ଆସିଛି । ଉଦ୍ଦେଶ୍ୟ ଲୋକଙ୍କୁ ସହଜ, ସରଳ ରାଜସ୍ବ ସେବା ଯୋଗାଇବା । ବିଭାଗୀୟ ମନ୍ତ୍ରୀ ବାରମ୍ବାର ତାଗିଦ କରିବା ସତ୍ତ୍ବେ ତହସିଲରେ ଚିତ୍ର ବଦଳୁନି । ଏବେ ଅନଲାଇନ୍ କ୍ଲାସ ରାଜସ୍ବ ପାଠଶାଳା କେତେ କାମ ଦେଉଛି, ଲୋକଙ୍କୁ କେମିତି ଫାଇଦା ମିଳୁଛି, ତାହା ଉପରେ ରାଜ୍ୟବାସୀଙ୍କ ନଜର ।