ଘଟଗାଁ : ରାସ୍ତାକଡ଼ରେ କୁଢ଼କୁଢ଼ ଅଳିଆ ଆବର୍ଜନା । ଗନ୍ଧରେ ଫାଟି ପଡୁଛି ସମଗ୍ର ଅଞ୍ଚଳ । ରାସ୍ତାରେ ଯିବା ଆସିବା କଷ୍ଟକର ହୋଇପଡୁଛି । କେନ୍ଦୁଝର ଅଧିଷ୍ଠାତ୍ରୀ ଘଟଗାଁ ମା ତାରିଣୀ ପୀଠ ରାସ୍ତାକଡ଼ରେ ଏପରି ଦେଖିବାକୁ ମିଳିଛି । ପ୍ରତିଦିନ ଏଠାକୁ ହଜାର ହଜାର ସଂଖ୍ୟାରେ ଭକ୍ତଙ୍କ ସୁଅ ଛୁଟିଥାଏ । କିନ୍ତୁ ପରିତାପର ବିଷୟ ଘଟଗାଁକୁ ସଫା ରଖିବା ପାଇଁ କାହାର ନିଘା ନାହିଁ । ଆଉ ଦିନ କେଇଟା ପରେ ମା ତାରିଣୀଙ୍କ ବିଶ୍ଵ ପ୍ରସିଦ୍ଧ ଚଇତି ପର୍ବ ପାଳିତ ହେବ । ଏଥିପାଇଁ ଲକ୍ଷ ଲକ୍ଷ ଭକ୍ତଙ୍କ ସମାଗମ ହେବ । ମାଙ୍କୁ ଦର୍ଶନ ପାଇଁ ଆସିଥିବା ଭକ୍ତ ରାସ୍ତା ପାର୍ଶ୍ୱରେ ପଡ଼ିଥିବା କୁଢ଼ କୁଢ଼ ଅଳିଆ ଆବର୍ଜ୍ଜନା ଦେଇ ଯିବା ସହ ଅସନ୍ତୋଷ ପ୍ରକାଶ କରିଛନ୍ତି।
ଘଟଗାଁ ବଜାରର ଅଳିଆ ଆବର୍ଜ୍ଜନା ଓ ସ୍ଥାନୀୟ ହୋଟେଲ୍ ଗୁଡିକରୁ ବାହାରୁଥିବା ଅଇଁଠା ଖଲି ରାସ୍ତା କଡ଼ରେ ପକାଉଥିବାରୁ ରାସ୍ତା ପାର୍ଶ୍ବ ଦୁର୍ଗନ୍ଧରେ ଫାଟି ପଡୁଛି। ରାସ୍ତା କଡରେ ଏପରି ଅଳିଆ ଆବର୍ଜ୍ଜନା ଦେଖି ନାକ ଟେକି ଫେରିଯାଉଛନ୍ତି ଭକ୍ତ। ଆବର୍ଜ୍ଜନା ପକାଇବା ପାଇଁ ଏକ ନିର୍ଦ୍ଦିଷ୍ଟ ଜାଗାର ଆବଶ୍ୟକ ଥିବା ବେଳେ ଏଥିପ୍ରତି କାହାର ଦୃଷ୍ଟି ପଡିନାହିଁ । ତେବେ ଯଥାଶୀଘ୍ର ଅଳିଆ ପକାଉଥିବା ଦୋକାନୀଙ୍କୁ ନୋଟିସ କରିବା ସହ ମାଇକ ଯୋଗେ ସଚେତନ କରିବାକୁ ଦାବି ହୋଇଛି। ପୀଠକୁ ପ୍ରତିଦିନ ହଜାର ହଜାର ଭକ୍ତଙ୍କ ସୁଅ ଛୁଟୁଥିବାବେଳେ ଅଳିଆ ଉଠାଇବା ସହ ପରିବେଶକୁ ସ୍ବଚ୍ଛ ରଖିବା ଜରୁରୀ ହୋଇପଡିଛି।

ତାଲଚେର : ଡହ ଡହ ଖରାରେ ପାନୀୟ ଜଳ ସଙ୍କଟ । ୪ ଦିନ ଧରି ବନ୍ଦ ରହିଛି ପାନୀୟ ଜଳ ଯୋଗାଣ । ତାଳଚେର କଣିହାଁ ବ୍ଲକ ଏବଂ ତାଳଚେର ବ୍ଲକ ଅଞ୍ଚଳର ବିଭିନ୍ନ ସ୍ଥାନରେ ଦେଖାଯାଇଛି ପାନୀୟ ଜଳ ସଙ୍କଟ । ପାଣି ପାଇଁ ଆଉଟୁପାଉଟୁ ହେଉଛନ୍ତି ଲୋକେ। ଯାହାକୁ ବିରୋଧ କରି ବିକ୍ଷୋଭ ପ୍ରଦର୍ଶନ କରିଛନ୍ତି ସ୍ଥାନୀୟ ମହିଳା । ଏହି ସଙ୍କଟ ପ୍ରାୟୋଜିତ ହୋଇଥିବା ବେଳେ ଏହାକୁ ଦୃଢ଼ ବିରୋଧ କରିଛନ୍ତି ଗ୍ରାମବାସୀ । ଦୀର୍ଘ ବର୍ଷ ଧରି ଠିକାଦାର ମାନେ କରିଥିବା କାମର ବିଲ୍ ନ ହୋଇଥିବାରୁ ଆନ୍ଦୋଳନକୁ ଓହ୍ଲାଇଥିଲେ ଠିକାଦାର। ବଲାଙ୍ଗି ଠାରେ ଥିବା ୱାଟର ଟ୍ରିଟମେଣ୍ଟ ପ୍ଲାଣ୍ଟ ଗେଟରେ ତାଲା ପକାଇଥିଲେ । ଫଳରେ କାର୍ଯ୍ୟାଳୟ ଭିତରକୁ ଯାଇପାରିନଥିଲେ କର୍ମଚାରୀ। ପାଣି ପମ୍ପ ନ ଚାଲିବା ଯୋଗୁଁ ଓଭର ହେଡ ଟାଙ୍କି ଗୁଡିକୁ ପାଣି ଯୋଗାଣ ବନ୍ଦ ଥିଲା । ଯାହାକୁ ନେଇ ଉଭୟ ଗ୍ରାମବାସୀ ଏବଂ ଠିକାଦାରଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ପାନୀୟ ଜଳ ଯୋଗାଣ ସ୍ୱାଭାବିକ ନହେଲେ ଗ୍ରାମବାସୀ ରାଜରାସ୍ତାକୁ ଓହ୍ଲାଇବାକୁ ଚେତାବନୀ ଦେଇଛନ୍ତି ।

ଫୁଲବାଣୀ : କନ୍ଧମାଳ ଜିଲ୍ଲା ଟିକାବାଲି ବନାଞ୍ଚଳ ଅଧୀନ ରିଙ୍ଗିବାଡ଼ି ଗାଁ ନିକଟରେ ବନ ବିଭାଗର ଚଢ଼ାଉ । ଏକ କଲରାପତରିଆ ବାଘଛାଲ ଜବତ କରିବା ସହ ଜଣଙ୍କୁ ଗିରଫ କରିଛି ବନ ବିଭାଗ । ବାଘଛାଲର ଲମ୍ବ ୧୬୮ ସେଣ୍ଟିମିଟର ରହିଛି । ଅଭିଯୁକ୍ତ ପଙ୍କଜ କହଁରକୁ ବନ ବିଭାଗ ଗିରଫ କରି କୋର୍ଟ ଚାଲାଣ କରିଛି । ପଙ୍କଜ ବାଘଛାଲକୁ ବିକ୍ରି କରିବାକୁ ଆଣୁଥିବା ବେଳେ ଟିକାବାଲି ବନ କର୍ମଚାରୀ କୌଣସି ସୂତ୍ରରୁ ଖବର ପାଇ ଚଢ଼ାଉ କରି ଏହାକୁ ଜବତ କରିଥିଲେ । ଅଭିଯୁକ୍ତକୁ ଅଧିକ ପଚାରଉଚରା କରାଯାଉଥିବା କହିଛନ୍ତି ଫୁଲବାଣୀ ଏସିଏଫଓ ।

ଟାଙ୍ଗୀ : ଖୋର୍ଦ୍ଧା ଜିଲ୍ଲା ୧୬ ନମ୍ବର ଜାତୀୟ ରାଜପଥ ଚାନ୍ଦପୁର ଗୌରଚନ୍ଦ୍ରପୁର ଓଭର ବ୍ରିଜ ନିକଟରେ ଦୁର୍ଘଟଣା । ତୀର୍ଥଯାତ୍ରୀ ଗାଡିକୁ ଧକ୍କା ଦେଲା ଟ୍ରକ । ଦୁର୍ଘଟଣାରେ ୫ ଯାତ୍ରୀ ଗୁରୁତର ହୋଇଛନ୍ତି । ତୀର୍ଥ ଯାତ୍ରୀମାନେ ଦୁଇଟି କାରରେ ଆନ୍ଧ୍ର ପ୍ରଦେଶରୁ ଅଯୋଧ୍ୟା ଯାଉଥିଲେ । ଚାନ୍ଦପୁର ବାଇପାସ ଗୌରଚନ୍ଦ୍ରପୁର ନିକଟରେ କାର ଦୁଇଟିକୁ ପାର୍କିଂ କରି ଚା ପାଉଥିବା ବେଳେ ଗୋଟିଏ କାରକୁ ପଛ ପଟୁ ଏକ ଟ୍ରକ ଧକ୍କା ଦେଇଥିଲା । ଫଳରେ ୫ ଜଣ ଯାତ୍ରୀ ଗୁରୁତର ହୋଇଥିଲେ । ଗୁରୁତରଙ୍କୁ ଚାନ୍ଦପୁର ବସନ୍ତ ମଞ୍ଜରୀ ମେଡିକାଲରେ ଭର୍ତ୍ତି କରାଯାଇଛି । ଖବର ପାଇ ଚାନ୍ଦପୁର ପୋଲିସ ୨ ଗାଡିକୁ ଜବତ କରି ତଦନ୍ତ କରୁଛି ପୋଲିସ ।

କୋଣାର୍କ : ବାଲି ଚଲାଣକୁ ବିରୋଧ କରିବାରୁ ଫୁଟିଲା ଗୁଳି ସହ ବୋମା । ନ୍ୟାୟ ପାଇଁ ଥାନାରେ ଅଭିଯୋଗ କଲେ ଶତାଧିକ ଗ୍ରାମବାସୀ । ଗତକାଲି ବିଳମ୍ବିତ ରାତିରେ ପୁରୀ ଜିଲ୍ଲା କାକଟପୁର ଥାନା ବାଲିକୂଳ ନିକଟରେ ବାଲି ଉଠାଣକୁ ନେଇ ଅଞ୍ଚଳବାସୀ ବିରୋଧ କରିଥିଲେ । ଅନ୍ଧାର ରାତିର ସୁଯୋଗ ନେଇ ବାଲି ଉଠାଣସ୍ଥାନରେ ବୋମାମାଡ଼ କରିବା ସହ ଫାଙ୍କା ଗୁଳି ଚାଳନା କରିଥିଲେ ଦୁର୍ବୃତ୍ତ। ଘଟଣାସ୍ଥଳରେ ଉତ୍ତେଜନା ସୃଷ୍ଟି ହୋଇଥିଲା । କାକଟପୁର ପୋଲିସ ତଦନ୍ତ ଜାରି ରଖିଛି । ଅନ୍ୟପଟେ କାକଟପୁର ଥାନାରେ ନିମାପଡା ଏସଡିପିଓ ପହଂଚି ତଦନ୍ତ କରୁଛନ୍ତି । ଘଟଣାସ୍ଥଳରେ ପୋଲିସ ମୁତୟନ ହୋଇଛନ୍ତି । ନିର୍ଦ୍ଧାରିତ ଲିଜ ଏରିଆକୁ ବାଦ ଦେଇ ଅନ୍ୟ ସ୍ଥାନରୁ ବାଲି ଉଠାଉଛନ୍ତି ଲିଜଧାରୀ। ବାଲି ଲୁଟ ଫଳରେ ନଦୀ ଜଳର ଗତିପଥ ବଦଳିବା ସହ ନଦୀ କୂଳ ଖାଇଯାଉଛି । ଯାହାକୁ ନେଇ ଆତଙ୍କିତ ଅବସ୍ଥାରେ ଦିନ କାଟୁଛନ୍ତି ବାଲିକୂଳ, ମୁତୁଣିଆ, ଡାହାଣୀ ଖିଆ ଗାଁ ଲୋକେ। ଗାଁ ଗୁଡିକ ନଦୀ ଗର୍ଭରେ ଲୀନ ହେବାକୁ ବସିଥିବା ବେଳେ ବାଲି ଉଠାଣକୁ ବିରୋଧ କରିଛନ୍ତି ଗାଁ ଲୋକ ।

ଭୁବନେଶ୍ବର : ରାଜଧାନୀରେ ମଦ୍ୟପ ଯୁବକଙ୍କ ଉନ୍ମତ୍ତକାଣ୍ଡ । ହୋଟେଲ କର୍ମଚାରୀଙ୍କୁ ଗୋଡେଇ ଗୋଡେଇ ହାଣିଲେ ୪ ମଦ୍ୟପ ଯୁବକ । ଖାରବେଳ ନଗର ଥାନା ୟୁନିଟ ୪ ମାଛ ମାର୍କେଟ ନିକଟରେ ଏଭଳି ଘଟଣା ଦେଖିବାକୁ ମିଳିଛି । ଗତକାଲି ରାତିରେ ହୋଟେଲରୁ କାମସାରି ଫେରୁଥିବା ବେଳେ, ୨ ଜଣ ଯୁବକ ଆସି ହୋଟେଲ କର୍ମଚାରୀଙ୍କୁ ଧକ୍କା ଦେଇଥିଲା । ଧକ୍କା ଦେବା ପରେ ଉଭୟଙ୍କ ଭିତରେ ପାଟିତୁଣ୍ଡ ହୋଇଥିଲା । ଏହି ସମୟରେ ଆଉ ୨ ଜଣ ଯୁବକ ଆସି ହୋଟେଲ କର୍ମଚାରୀଙ୍କୁ ମାଡପିଟ କରିବା ସହ ଗୋଡାଇ ଗୋଡାଇ ହାଣିଥିଲେ। ଆହତ ଯୁବକ ହେଲେ ପଶ୍ଚିମବଙ୍ଗ ମେଦିନାପୁରର ବୁଦ୍ଧ ଭୂୟାଁ। ତାଙ୍କ ମୁଣ୍ଡ ଓ ଗୋଡ଼ରେ ଗଭୀର ଆଘାତ ଲାଗିଛି । ଗୁରୁତର ଅବସ୍ଥାରେ ତାଙ୍କୁ କ୍ୟାପିଟାଲ ହସ୍ପିଟାଲରେରେ ଭର୍ତ୍ତି କରାଯାଇଛି । ଘଟଣାସ୍ଥଳରୁ ୪ ଦୁର୍ବୃତ୍ତ ଫେରାର ହୋଇଯାଇଛନ୍ତି । ଘଟଣାର ତଦନ୍ତ କରୁଛି ଖାରବେଳ ନଗର ଥାନା ପୋଲିସ।

ଜଳେଶ୍ବର : ମୁଣ୍ତରେ ବନ୍ଧୁକ ଲଗାଇ ଗହଣା ଭର୍ତ୍ତି ବ୍ୟାଗ ଝାମ୍ପିନେଲେ ଦୁର୍ବୃତ୍ତ । ଗତକାଲି ରାତିରେ ବାଲେଶ୍ବର ଜିଲ୍ଲା ବସ୍ତା ଥାନା ଅମର୍ଦ୍ଦାରେ ଲୁଟ ହୋଇଛି । ଅମର୍ଦ୍ଦା ବଜାରରେ ଥିବା ଲକ୍ଷ୍ମୀ ଜୁଏଲାରୀ ମାଲିକ ଗଗନ ପ୍ରଧାନ ଦୋକାନ ବନ୍ଦ କରି ଘରକୁ ଫେରୁଥିବା ବେଳେ ଲୁଟର ଶିକାର ହୋଇଛନ୍ତି । ୩ ଜଣ ଦୁର୍ବୃତ୍ତ ଗଗନଙ୍କୁ ଆକ୍ରମଣ କରିବା ସହ ମୁଣ୍ତରେ ବନ୍ଧୁକ ଲଗାଇ ଗହଣା ଭର୍ତ୍ତି ବ୍ୟାଗ ଝାମ୍ପି ନେଇ ଚମ୍ପଟ ମାରିଥିଲେ । ଲୁଟ ଗହଣାର ଆନୁମାନିକ ମୂଲ୍ୟ ୧୦ ଲକ୍ଷ ଟଙ୍କାରୁ ଉର୍ଦ୍ଧ୍ବ ହେବ ବୋଲି ଦୋକାନୀ କହିଛନ୍ତି । ଖବର ପାଇ ବସ୍ତା ଥାନା ପୋଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛି ।