ଭୁବନେଶ୍ବର: ପ୍ରକାଶ ପାଇଲା ଜୁନିଅର ଟିଚର ସ୍କିମାଟିକ ଫଳ । ୨୦ ହଜାର ପଦ ପାଇଁ ୯୩ ହଜାର ୯୬୬ ଜଣ ପ୍ରାର୍ଥୀ ପରୀକ୍ଷା ଦେଇଥିଲେ । କମ୍ପ୍ୟୁଟର୍ ବେସଡ ଟେଷ୍ଟ- ସିବିଟି ମାଧ୍ୟମରେ ପରୀକ୍ଷା ହୋଇଥିଲା । ଯେଉଁଥିରେ ୧୮ ହଜାର ୭୮୮ ଜଣ ଉତ୍ତୀର୍ଣ୍ଣ ହୋଇଛନ୍ତି । osepa.odisha. gov.in ରେ ପ୍ରକାଶ ପାଇଛି ପରୀକ୍ଷା ଫଳ । ରାଜ୍ୟର ୫୮ଟି କେନ୍ଦ୍ରରେ ହୋଇଥିଲା ଶିକ୍ଷକ ନିଯୁକ୍ତି ଲାଗି ପରୀକ୍ଷା । ପରୀକ୍ଷାର ସୁପରିଚାଳନା ଦାୟିତ୍ବରେ ଜିଲ୍ଲାପାଳ ଓ ଜିଲ୍ଲା ଆରକ୍ଷୀ ଅଧୀକ୍ଷକ ରହିଥିଲେ । ଜିଲ୍ଲାପାଳଙ୍କ ଦ୍ବାରା ନିଯୁକ୍ତ ନୋଡାଲ୍ ଅଫିସର ଓ ବିଭିନ୍ନ ନିର୍ଦ୍ଦେଶାଳୟର ୧୮ଜଣ ବରିଷ୍ଠ ଅଧିକାରୀ ପରୀକ୍ଷା ଦିନ ଜିଲ୍ଲା ଗସ୍ତ କରି ପରୀକ୍ଷା ତଦାରଖ କରିଥିଲେ । ଏହାସହ ଓଡ଼ିଶା ଶିକ୍ଷା କାର୍ଯ୍ୟକ୍ରମ ପ୍ରାଧିକରଣ ବା ଓସେପା କାର୍ଯ୍ୟାଳୟରେ ଏକ କମାଣ୍ଡ ସେଣ୍ଟର୍ ଖୋଲାଯାଇଥିଲା । ସେଠାରୁ ପରୀକ୍ଷା କେନ୍ଦ୍ରରେ ଲାଗିଥିବା ସିସିଟିଭିରେ ଲାଇଭ୍ ଷ୍ଟ୍ରିମିଂ ଦେଖି ପରୀକ୍ଷା ନିୟନ୍ତ୍ରଣ ସମ୍ପର୍କିତ ନିର୍ଦ୍ଦେଶ ଦିଆଯାଇଥିଲା ।
ଆମେରିକାରେ ୨ ଭାରତୀୟ ଛାତ୍ରଙ୍କ ମୃତଦେହ ଉଦ୍ଧାର
ନନ୍ଦିଘୋଷ ବ୍ୟୁରୋ: ଆମେରିକାରେ ୨ ଭାରତୀୟ ଛାତ୍ରଙ୍କ ମୃତଦେହ ଉଦ୍ଧାର। ମାତ୍ର ୨ ସପ୍ତାହ ହେବ ଉଚ୍ଚଶିକ୍ଷା ନିମନ୍ତେ ଯାଇଥିଲେ ଆମେରିକାକୁ । କୋଠରୀରୁ ଦୁଇ ରୁମମେଟଙ୍କ ମୃତଦେହ ଉଦ୍ଧାର ହୋଇଛି । ମୃତକ ଦୁହେଁ ହେଉଛନ୍ତି ତେଲେଙ୍ଗାନା ୱାନାପାର୍ଥିର ଜି ଦିନେଶ ଏବଂ ଆନ୍ଧ୍ରପ୍ରଦେଶର ଶ୍ରୀକାକୁଲମର ନିକେଶ । ଦୁହିଁଙ୍କ ମୃତଦେହ ତାଙ୍କ ହଷ୍ଟେଲରୁ ଉଦ୍ଧାର ହୋଇଛି । ମୃତ୍ୟୁର କାରଣ ଏବେବି ଅସ୍ପଷ୍ଟ ରହିଛି । ସୂଚନା ମୁତାବକ ଦିନେଶ ଆମେରିକାକୁ ୨୮ ଡିସେମ୍ବର ୨୦୨୩ ଦିନ ଉଚ୍ଚଶିକ୍ଷା ନିମନ୍ତେ ଯାଇଥିଲେ । ସେପଟେ ଦୀନେଶଙ୍କ ମୃତ ଦେହ ଭାରତକୁ ଫେରେଇ ଆଣିବା ନିମନ୍ତେ କେନ୍ଦ୍ର ପର୍ଯ୍ୟଟନ ମନ୍ତ୍ରୀ ଜି କିଶାନ ରେଡ୍ଡୀ ଏବଂ ତେଲେଙ୍ଗାନା ମୁଖ୍ୟମନ୍ତ୍ରୀ ଏ ରେବନ୍ତ ରେଡ୍ଡୀଙ୍କୁ ନିବେଦନ କରିଛନ୍ତି ପରିବାର ଲୋକେ । ଘଟଣାର ତଦନ୍ତ କରୁଛି ପୋଲିସ ।
ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ ପୂର୍ବରୁ ଉଚ୍ଚସ୍ତରୀୟ ବୈଠକରେ ଯୋଗ ଦେଲେ 5T ଅଧ୍ୟକ୍ଷ
ପୁରୀ: ଶ୍ରୀମନ୍ଦିର ପରିକ୍ରମା ପ୍ରକଳ୍ପ ଲୋକାର୍ପଣ ପୂର୍ବରୁ ଉଚ୍ଚସ୍ତରୀୟ ବୈଠକରେ ଯୋଗ ଦେଲେ 5T ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ । ନିଳାଦ୍ରୀ ଭକ୍ତ ନିବାସରେ ଏକ ଉଚ୍ଚସ୍ତରୀୟ ବୈଠକ ସମସ୍ତ କର୍ମକର୍ତ୍ତା ଓ ସେବାୟତଙ୍କ ସହ ଆଲୋଚନା କରିଛନ୍ତି । ସୂଚନା ଲୋକସଂପର୍କ ବିଭାଗ ପ୍ରମୁଖ ସଚିବ ସଞ୍ଜୟ ସିଂ, ଶ୍ରୀମନ୍ଦିର ମୁଖ୍ୟ ପ୍ରଶାସକ, କେନ୍ଦ୍ରାଞ୍ଚଳ ଆଇଜି, ଜିଲ୍ଲାପାଳ, ଏସପି, ବରିଷ୍ଠ ସେବାୟତ, ପରିଚାଳନା କମିଟି ସଦସ୍ୟ, ସାଂଗଠନିକ ସଂପାଦକ ପ୍ରଣବ ପ୍ରକାଶ ଦାସ, ବିଜେଡି ସାଂସଦ ମାନସ ମଙ୍ଗରାଜ ପ୍ରମୁଖ ବୈଠକରେ ଉପସ୍ଥିତି ହୋଇଛି ବିସ୍ତୃତ ଆଲୋଚନା । ଲୋକାର୍ପଣ ଉତ୍ସବ ପୂର୍ବରୁ ବିଭିନ୍ନ ବ୍ୟବସ୍ଥାର ସମୀକ୍ଷା କରାଯାଇଛି । ଲୋକାର୍ପଣ ସମାରୋହରେ ଲକ୍ଷ ଲକ୍ଷ ଶ୍ରଦ୍ଧାଳୁଙ୍କ ସହ ରାଜ୍ୟ ତଥା ରାଜ୍ୟ ବାହାରୁ ସାଧୁ ସନ୍ଥ ଆସିବେ । ଶୃଙ୍ଖଳିତ ଦର୍ଶନ ଓ ଆଇନଶୃଙ୍ଖଳା ବ୍ୟବସ୍ଥାକୁ ଗୁରୁତ୍ବ ଦିଆଯାଇଛି । ଏଥିପାଇଁ ସମସ୍ତଙ୍କ ସହଯୋଗ କାମନା କରାଯାଇଛି ।
ଦୁଲୁକୁଛି ବରଗଡ଼, ଆରମ୍ଭ ହୋଇଛି ବିଶ୍ବ ପ୍ରସିଦ୍ଧ ଧନୁଯାତ୍ରା
ବରଗଡ଼: ଦୁଲୁକୁଛି ବରଗଡ଼ । ସୋମବାରଠାରୁ ଆରମ୍ଭ ହୋଛି ପ୍ରସିଦ୍ଧ ଧନୁଯାତ୍ରା । ୧୧ ଦିନ ଧରି ବରଗଡ଼ ଓ ଅମ୍ବାପାଲିର ସର୍ବବୃହତ୍ତ ରଙ୍ଗମଞ୍ଚରେ ଚାଲିବ ଯାତ୍ରା । ବରଗଡ଼ ସାଜିଲା ମଥୁରା କଟକ ଓ ଅମ୍ବାପାଲି ଗୋପପୁର । ଉଦଘାଟନୀ ଉତ୍ସବରରେ ୧୯ଟି ସାଂସ୍କୃତିକ ଦଳ ସାମିଲ ହୋଇ ନିଜର କଳା ପ୍ରଦର୍ଶନ କରିଥିବାବେଳେ ଦୁଲୁଦୁଲି, ଦଣ୍ଡ ନାଚ, ଘୁଡକି, ଭାଙ୍ଗଡା, ଆଦିବାସୀ ନୃତ୍ୟରେ ଗାନ୍ଧୀଚ୍ଛକ ମାଆ ସମଲେଶ୍ବରୀଙ୍କ ମନ୍ଦିରକୁ ଯାଏଁ ହୋଇଥିଲା ଶୋଭଯାତ୍ରା ।
କମ୍ପିଲା ବରଗଡ଼ । ଆରମ୍ଭ ହୋଇଛି ବିଶ୍ବ ପ୍ରସିଦ୍ଧ ଧନୁଯାତ୍ରା । ୧୧ ଦିନ ଧରି କଂସର ଅଟ୍ଟହାସ୍ୟରେ କମ୍ପିବ ଦରବାର । ବରଗଡ଼ ହେବ ମଥୁରା, ଅମ୍ବାପାଲି ସାଜିର ଗୋପପୁର । ଜିରା ନଦୀରେ ବହିବ ଯମୁନାର ଜୁଆର । ଉଦଘାଟନୀ ଉତ୍ସବରେ ଦୁଲୁକିଛି ବରଗଡ଼ ସହର । ଏକ ବିଶାଳ ଶୋଭାଯାତ୍ରା ଗାନ୍ଧିଛକ ଠାରୁ ବାହାରି ମାଆ ସମଲେଶ୍ବରୀ ମନ୍ଦିରରେ ପହଞ୍ଚିଛି । ସେଠାରୁ ପୂଜାର୍ଚ୍ଚନା ପରେ ହାଟପଦା ସ୍ଥିତ କଂସ ଦରବାରରେ ପହଞ୍ଚିଛି ଶୋଭାଯାତ୍ରା । ଏଥିରେ ୧୯ଟି ସାଂସ୍କୃତିକ ଦଳ ଭାଗ ନେଇଥିଲେ । ଦୁଲୁଦୁଲି, ଦଣ୍ଡ ନାଚ, ଘୁଡକି, ଭାଙ୍ଗଡା, ଆଦିବାସୀ ନୃତ୍ୟରେ କମ୍ପିଥିଲା ପୂରା ଅଞ୍ଚଳ । ଶୋଭାଯାତ୍ରାକୁ ଉଦଘାଟନ କରିଥିଲେ ବରଗଡ଼ ଏସପି ଓ ଜିଲ୍ଲାପାଳ ।
୧୧ ଦିନ ଧରି ବିଶ୍ବର ସର୍ବବୃହତ୍ତ ମୁକ୍ତାକାଶ ରଙ୍ଗମଞ୍ଚରେ ଚାଲିବ ଧନୁଯାତ୍ରା । ବରଗଡ଼ ଓ ଅମ୍ବାପାଲିର ନାଗରିକ ଓ ଦର୍ଶକ ଅଜାଣତରେ ପାଲଟି ଯିବେ ଜଣେ ଜଣେ କଳାକାର । ଜିଲ୍ଲା ପ୍ରଶାସନ ନୁହେଁ ଚାଲିବ କଂସାସୁରର ରାଜୁତି । ଯାତ୍ରା ପାଇଁ ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯାଇଥିବା ବେଳେ ବରଗଡ଼ ଆରକ୍ଷୀ ଅଧିକ୍ଷକ ସମେତ ଜଣେ ଅତିରିକ୍ତ ଏସପି, ୭ ଜଣ ଡିଏସପି, 12ଜଣ ଇନ୍ସପେକଟର, 105ଜଣ ସବ୍ ଇନ୍ସପେକଟର ଓ ASI, 12 ପ୍ଲାଟୁନ ଫୋର୍ସ ଓ 5ରୁ 6 ପ୍ଲାଟୁନ ହୋମ୍ ଗାର୍ଡ ନିଯୁକ୍ତ ରହିବେ ।
ଗ୍ରୀନ ହାଉସ ପ୍ରଭାବରୁ ଓଡ଼ିଶାକୁ ମିଳିବ ମୁକ୍ତି
ଭୁବନେଶ୍ବର: ଓଡ଼ିଶା ଅକ୍ଷୟ ଶକ୍ତି ନୀତି-୨୦୨୨ କାର୍ଯ୍ୟକାରିତା ନେଇ ପରିଚାଳନାଗତ ମାର୍ଗଦର୍ଶିକାକୁ ମୁଖ୍ୟମନ୍ତ୍ରୀ ଅନୁମୋଦନ କରିଛନ୍ତି । ଏଣିକି ରାଜ୍ୟରେ ସୌର, ଜଳ ବିଦ୍ୟୁତ ପ୍ରକଳ୍ପ ଅନୁମୋଦନ ପାଇଁ ନୋଡାଲ୍ ଏଜେନ୍ସି ଭାବେ କାର୍ଯ୍ୟ କରିବ ଗ୍ରିଡକୋ । ୫୦ ଓ୍ବାଟ୍ରୁ ୨୦୦ ମେଗାଓ୍ବାଟ୍ ପର୍ଯ୍ୟନ୍ତ ସିଙ୍ଗଲ୍ ଓ୍ବିଣ୍ଡୋ କ୍ଲିୟରାନ୍ସ୍ ଓ ୨୦୦ ମେଗୋଓ୍ବାଟ୍ରୁ ଅଧିକ କ୍ଷମତା ସମ୍ପନ୍ନ ପ୍ରକଳ୍ପକୁ ଉଚ୍ଚକ୍ଷମତା ସମ୍ପନ୍ନ କମିଟି ଅନୁମୋଦନ କରିବେ । ୨୦୩୦ ସୁଦ୍ଧା ରାଜ୍ୟର ୭୦ ପ୍ରତିଶତ ବିଦ୍ୟୁତ ଚାହିଦା ଅକ୍ଷୟ ଶକ୍ତି ଉତ୍ସରୁ ଯୋଗାଇବା ପାଇଁ ଲକ୍ଷ୍ୟ ରଖିଛନ୍ତି ସରକାର ।
ଗ୍ରୀନ ହାଉସ ପ୍ରଭାବରୁ ଓଡ଼ିଶାକୁ ମିଳିବ ମୁକ୍ତି । ଘରେ ଘରେ ମିଳିବ ଗ୍ରୀନ୍ ଏନର୍ଜି । ତାପଜ ବିଦ୍ୟୁତ ଶକ୍ତି ବଦଳରେ ସୌର, ଜଳ ବିଦ୍ୟୁତ ଶକ୍ତିକୁ ରାଜ୍ୟ ସରକାରଙ୍କ ଗୁରୁତ୍ବ । ୨୦୩୦ ସୁଦ୍ଧା ୭୦ ପ୍ରତିଶତ ବିଦ୍ୟୁତ ଚାହିଦା ମେଣ୍ଟାଇବ ସୌର, ପବନ ଓ ଜଳ ବିଦ୍ୟୁତ ଶକ୍ତି । କାରଣ ଅକ୍ଷୟଶକ୍ତି ପରିଚାଳନା ମାର୍ଗଦର୍ଶିକାକୁ ଅନୁମୋଦନ କରିଛନ୍ତି ମୁଖ୍ୟମନ୍ତ୍ରୀ । ଓଡ଼ିଶା ଅକ୍ଷୟ ଶକ୍ତି ନୀତି-୨୦୨୨ ଅନୁଯାୟୀ ରାଜ୍ୟରେ ଅକ୍ଷୟ ଶକ୍ତି ଉତ୍ପାଦନ, ପରିବହନ ଓ ବିକ୍ରି ପାଇଁ ନୋଡାଲ ଏଜେନ୍ସି ଭାବେ କାର୍ଯ୍ୟ କରିବ ଗ୍ରିଡକୋ । ଏ ନେଇ ଶକ୍ତି ବିଭାଗ ସବୁ ବିଭାଗକୁ ଚିଠି ଲେଖିଛି ।
ପୂର୍ବରୁ ଅକ୍ଷୟ ଶକ୍ତି ଉତ୍ପାଦନ କେବଳ କ୍ୟାପିଟିଭ ପାଓ୍ବାର୍ ପ୍ଲାଣ୍ଟ୍ କରିଥିଲେ । ୨୦୨୨ ଓଡ଼ିଶା ଅକ୍ଷୟ ଶକ୍ତି ନୀତି ଅନଯାୟୀ ଏଣିକି ଘରୋଇ ଡେଭଲପର୍ ଓ ବଡ଼ କମ୍ପାନୀ ବ୍ୟବସାୟିକ ଭିତ୍ତିରେ ଅକ୍ଷୟ ଶକ୍ତି ଉତ୍ପାଦନ କରି ବ୍ୟବସାୟ କରିପାରିବେ । ଆବେଦନ ପୂର୍ବରୁ ରାଜ୍ୟର ଭିତ୍ତିଭୂମି, ସରକାରୀ ପ୍ରୋତ୍ସାହନ, ଜମି ବ୍ୟାଙ୍କ ସମ୍ପର୍କରେ ଡେଭଲପ୍ର୍ ରାଜ୍ୟସ୍ତରୀୟ ସହାୟତା କେନ୍ଦ୍ର-SLFCରୁ ସମସ୍ତ ତଥ୍ୟ ନେଇପାରିବେ । ୫୦ ମେଗାଓ୍ବାଟରୁ ୨୦୦ ମେଗାଓ୍ବାଟ୍ ପର୍ଯ୍ୟନ୍ତ ପ୍ରକଳ୍ପକୁ ସିଙ୍ଗଲ୍ ଓ୍ବିଣ୍ଡୋ ଅନୁମୋଦନ କରିବ । ୨୦୦ ମେଗାଓ୍ବାଟ୍ରୁ ଅଧିକ ହେଲେ ଉଚ୍ଚକ୍ଷମତା ସମ୍ପନ୍ନ କମିଟି କରିବ ଅନୁମୋଦନ । ପ୍ରଥମେ ଡେଭଲପର୍ ନିଜ ପ୍ରକଳ୍ପ ରିପୋର୍ଟ ସହିତ ୧ ଲକ୍ଷ ୧୮ ହଜାର ଟଙ୍କା ଦେଇ ଗ୍ରିଡକୋକୁ ନିର୍ଦ୍ଧାରିତ ଫର୍ମରେ ଆବେଦନ କରିବେ। ଆବେଦନ ପତ୍ର ଗ୍ରହଣ କରିବା ପରେ ଗ୍ରିଡକୋ ପ୍ରକଳ୍ପ ସ୍ଥାପନା ପାଇଁ ପ୍ରାକ୍ ଫିଜିବିଲିଟି ରିପୋର୍ଟ ଦେବ ।
ପୂର୍ବରୁ ଜଳବିଦ୍ୟୁତକୁ ଅକ୍ଷୟ ଶକ୍ତି ଭିତରେ ନିଆ ଯାଉନଥିଲା । ଓଡ଼ିଶା ସରକାରଙ୍କ ବଳିଷ୍ଠ ଯୁକ୍ତି ଆଧାରରେ କେନ୍ଦ୍ର ସରକାର ଜଳ ବିଦ୍ୟୁତକୁ ଅକ୍ଷୟ ଶକ୍ତିରେ ଅନ୍ତର୍ଭୁକ୍ତ କରିଛନ୍ତି । ୨୦୧୬ରେ ରାଜ୍ୟ ସରକାର ଅକ୍ଷୟ ଶକ୍ତି ନୀତି ଆଣିଥିଲେ । ଯେଉଁଥିରେ ଜେଡକଲ୍ ଏବଂ ଓରେଡା ଭଳି ଏଜେନ୍ସି ଅକ୍ଷୟ ଶକ୍ତି ବିକାଶ ପାଇଁ ନିୟୋଜିତ ହୋଇଥିଲେ । ଏବେ ୨୦୨୨ରେ ରାଜ୍ୟ ସରକାର ଆଣିଥିବା ଅକ୍ଷୟ ଶକ୍ତି ନୀତି ସୌର, ପବନ, ଜଳ ବିଦ୍ୟୁତ ପ୍ରକଳ୍ପ ସ୍ଥାପନରେ ପୁଞ୍ଜି ନିବେଶକୁ ଆକୃଷ୍ଟ କରିପାରିଛି । ଅନ୍ୟ ରାଜ୍ୟ ତୁଳନାରେ ରାଜ୍ୟ ସରକାରଙ୍କ ପ୍ରୋତ୍ସାହନ ଓ ଇଜ୍ ଅଫ୍ ଡୁଇଙ୍ଗ ଭଲ ରହୁଥିବାରୁ ବାହାର ଦେଶରୁ ପୁଞ୍ଜି ନିବେଶକାରୀ ଓଡ଼ିଶାରେ ପୁଞ୍ଜି ଲଗାଣ ନେଇ ଆଗ୍ରହ ପ୍ରକାଶ କରିଛନ୍ତି ।
ଶ୍ରୀ ସେତୁରେ ଟ୍ରାଏଲ ରନ୍ ଭାବେ ଗଡ଼ିଛି ଡିଜିପିଙ୍କ କାରକେଡ
ପୁରୀ: ଶ୍ରୀମନ୍ଦିର ପରିକ୍ରମା ପ୍ରକଳ୍ପ ପାଇଁ ସଜେଇ ହୋଇଛି ଶ୍ରୀକ୍ଷେତ୍ର । ବେଦ ଓ ଯଜ୍ଞ ଧ୍ବନୀରେ ଉତ୍ସବ ମୁଖରିତ ପୂରା ସହର। ସବୁ କାମରେ ଦିଆଯାଉଛି ଶେଷ ସ୍ପର୍ଶ। ଶ୍ରୀମନ୍ଦିର ପରିକ୍ରମା ପ୍ରକଳ୍ପର ଭିତର ଓ ବାହାର ବେଢାର ସୌନ୍ଦର୍ଯ୍ୟ ସାଙ୍ଗକୁ ସୁସଜ୍ଜିତ ଆଲୋକମାଳା ଶ୍ରୀକ୍ଷେତ୍ରକୁ ଆହୁରି ରଙ୍ଗୀନ କରିଛି। ସେପଟେ ଶ୍ରୀସେତୁ, ଶ୍ରୀମାର୍ଗ ଏବଂ ଜଗନ୍ନାଥ ବଲ୍ଲଭ ପିଲଗ୍ରିମ ସେଣ୍ଟର ବି ଲୋକାର୍ପଣ ଅପେକ୍ଷାରେ । ଶ୍ରୀ ସେତୁରେ ଟ୍ରାଏଲ ରନ୍ ଭାବେ ଗଡ଼ିଛି ଡିଜିପିଙ୍କ କାରକେଡ । ସୁରକ୍ଷା ବ୍ୟବସ୍ଥାର ଅନୁଧ୍ୟାନ କରିଛନ୍ତି ପୋଲିସ ଡିଜି ଅରୁଣ ଷଡ଼ଙ୍ଗୀ ।
ପୁରୀ ବାଇପାସରୁ ଡାଇରେକ୍ଟ ବଡ଼ଦାଣ୍ଡ। ମାଧ୍ୟମ ଶ୍ରୀସେତୁ ଆଉ ଶ୍ରୀମାର୍ଗ। ଏଥର ଓଡ଼ିଶାର ପ୍ରଥମ ଟ୍ରମ୍ପେଟ ବା ଅଙ୍କାବଙ୍କା ସେତୁ ଉପରେ କାଳିଆ ଧାମରେ ପହଞ୍ଚିବେ ଶ୍ରଦ୍ଧାଳୁ। ଶ୍ରୀମନ୍ଦିର ପରିକ୍ରମା ପ୍ରକଳ୍ପ ସହ ଲୋକାର୍ପଣ ଅପେକ୍ଷାରେ ରହିଛି ଏହି ଐତିହାସିକ ସେତୁ। ଶ୍ରୀସେତୁରୁ ଶ୍ରୀକ୍ଷେତ୍ର, ଭାୟା ଜଗନ୍ନାଥ ବଲ୍ଲଭ ପିଲଗ୍ରିମ ସେଣ୍ଟର। ଏହି ରୁଟ୍ ହିଁ ପର୍ଯ୍ୟଟକଙ୍କ ପାଇଁ ହେବାକୁ ଯାଉଛି ନୂଆ ଗତିପଥ। ଲୋକାର୍ପଣ ପୂର୍ବରୁ ବ୍ରିଜ ଉପରେ ପରୀକ୍ଷାମୂଳକ ଭାବେ ଗଡ଼ିଛି ଡିଜିପିଙ୍କ କାରକେଡ୍। ଖାଲି ସହଜ ଗତିପଥ ନୁହେଁ, ପର୍ଯ୍ୟଟକଙ୍କୁ ସୁନ୍ଦର ଅନୁଭୂତି ଦେବ ଶ୍ରୀସେତୁ। ସ୍ବାଗତ ତୋରଣ ସାଙ୍ଗକୁ ରାସ୍ତା କଡ଼େ କଡ଼େ ପଥରର ବିଶାଳ ଐତିହ୍ୟ ସମ୍ପର୍ଣ୍ଣ ପ୍ରତିମୂର୍ତ୍ତି ଆକର୍ଷିତ କରୁଛି।
ରାସ୍ତା ପାର୍ଶ୍ବରେ କଳା ସ୍ଥାପତ୍ୟର ନିଦର୍ଶନ ଶଙ୍ଖକ୍ଷେତ୍ରର ମହିମାକୁ ଆହୁରି ରୁଦ୍ଧିମନ୍ତ କରୁଛି। ଶ୍ରୀସେତୁ ସହ ସଂଯୋଗ ହୋଇଥିବା ଜଗନ୍ନାଥ ବଲ୍ଲଭ ପିଲଗ୍ରିମ ସେଣ୍ଟର ବି ୧୭ ତାରିଖରେ ଲୋକାର୍ପିତ ହେବ। ମଲ୍ଟି ଲେବୁଲ ପାର୍କିଂ ପାଇଁ ୫ ତାଲା ବିଶିଷ୍ଟ ମହଲାର ବେସମେଣ୍ଟ, ଗ୍ରାଉଣ୍ଡ ଓ ପ୍ରଥମ ମହଲାରେ ଚାରି ଓ ଛଅ ଚକିଆ ଗାଡ଼ି ରହିବା ବ୍ୟବସ୍ଥା କରାଯାଇଛି । ଦ୍ବିତୀୟ ମହଲାରେ ସପିଂ କମ୍ପ୍ଲେକ୍ସ ରହିବ। ପଞ୍ଚମ ମହଲାରେ ପର୍ଯ୍ୟଟକଙ୍କ ପାଇଁ ପ୍ରାଣାୟାମ, ଯୋଗ କେନ୍ଦ୍ର ସହ ଲବି ଏବଂ ଲାଉଞ୍ଜର ବ୍ୟବସ୍ଥା ରହିଛି । ଯାହାକୁ ଇଞ୍ଜିନିୟର ଓ କର୍ମଚାରୀମାନେ ଶେଷ ସ୍ପର୍ଶ ଦେଉଛନ୍ତି। ଏଇଠୁ ଶ୍ରୀମାର୍ଗ ଦେଇ ଶ୍ରୀକ୍ଷେତ୍ର ଯିବେ ଶ୍ରଦ୍ଧାଳୁ। ଏଥିପାଇଁ ଶ୍ରୀମାର୍ଗର ନିର୍ମାଣ କାର୍ଯ୍ୟ ମଧ୍ୟ ଶେଷ ହୋଇଛି।
ଶ୍ରୀମନ୍ଦିର ପରିକ୍ରମା ପ୍ରକଳ୍ପକୁ ନେଇ କେବଳ ପୁରୀ ସହର ନୁହେଁ, ଉତ୍ସବମୁଖର ସାରା ଓଡ଼ିଶା। ଗାଁ ଗାଁରେ ଜଗନ୍ନାଥ ଅର୍ପଣ ରଥ ବୁଲିବା ସହ ସରକାରୀ ଛୁଟି ଘୋଷଣା ସମସ୍ତଙ୍କୁ ଶ୍ରୀକ୍ଷେତ୍ରମୁହାଁ କରିଛି। ଲୋକାର୍ପଣ ଉତ୍ସବରେ ରଥଯାତ୍ରା ଭଳି ଭିଡ଼କୁ ନଜରରେ ରଖି ଚାରି ଥାକିଆ ସୁରକ୍ଷା ବ୍ୟବସ୍ଥା କରାଯାଇଛି। ସୁରକ୍ଷା ଅଧିକାରୀଙ୍କ ୨୪ ଘଣ୍ଟିଆ ନଜରରେ ଶ୍ରୀମନ୍ଦିର ଚାରିକଡ଼େ ଯଜ୍ଞ ଓ ବେଦ ମଣ୍ଡପ। ବଡ଼ଦାଣ୍ଡରେ ଆଇନଶୃଙ୍ଖଳା, ସହରରେ ଟ୍ରାଫିକ ନିମନ୍ତ୍ରଣ, ଓ ବେଳାଭୂମିରେ ଶାନ୍ତିଶୃଙ୍ଖଳା ପାଇଁ ପ୍ରାୟ ୪୦ ପ୍ଲାଟୁନ ପୋଲିସ ଫୋର୍ସ ନିୟୋଜିତ ହେବେ। ୧୨ରୁ ଅଧିକ ଅଧିକାରୀ ସୁରକ୍ଷା ସ୍ଥିତି ଉପରେ ନଜର ରଖିବେ।
ଏଥିପାଇଁ ଟ୍ରେନିଂ ଓ ଡ୍ରିଲିଂ କାମ ଶେଷ ହୋଇଛି। କୌଣସି ବିଶୃଙ୍ଖଳା ବା ଅଘଟଣକୁ ଏଡ଼ାଇବା ପାଇଁ ପ୍ରତ୍ୟେକ ଦିଗକୁ ସ୍ବତନ୍ତ୍ର ଧ୍ୟାନ ଦେଉଛନ୍ତି ଶ୍ରୀମନ୍ଦିର ପ୍ରଶାସକଙ୍କ ସହ ପୁରୀ ଜିଲ୍ଲାପାଳ ଓ ଏସପି। ମୁଖ୍ୟ ଶାସନ ସଚିବ ଗତକାଲି ସ୍ଥିତିର ସମୀକ୍ଷା କରିଥିବା ବେଳେ ଆଜି ପୋଲିସ ଡିଜି ସ୍ଥିତି ଅନୁଧ୍ୟାନ କରିଛନ୍ତି । ମୁଖ୍ୟମନ୍ତ୍ରୀଙ୍କ ହେଲିପ୍ୟାଡଠାରୁ ବଡ଼ଦାଣ୍ଡ, ଶ୍ରୀସେତୁର ବେଳାଭୂମି ଓ ଶ୍ରୀମାର୍ଗରୁ ଯଜ୍ଞ ମଣ୍ଡପ ଯାଏ ସବୁ କିଛି ସର୍ଭେଲାନ୍ସ କ୍ୟାମେରାରେ ନଜର ରଖାଯିବ। ଡଗସ୍କ୍ବାଡ୍, ବମ ସ୍କ୍ବାଡ୍ ଓ ସ୍ବତନ୍ତ୍ର ଗୁଇନ୍ଦା ବିଭାଗ ମଧ୍ୟ ହାଇଆଲର୍ଟରେ ରହିଛି ।
ଗାଡି ପାର୍କିଂକୁ ନେଇ ମାରପିଟ୍, ଜଣଙ୍କୁ ଗୁଳି କରାଯାଇଥିବା ବେଳେ ୩ ଜଣଙ୍କୁ ପିଟିପିଟି ମାରିଦେଲେ
ପାଟନା: କାର ପାର୍କିଂରୁ ତୁମୁଳକାଣ୍ଡ । ୪ଜଣଙ୍କୁ ହତ୍ୟା ଅଭିଯୋଗ । ବିହାରର ଔରଙ୍ଗବାଦରୁ ଆସିଛି ଏଭଳି ଖବର । ନବିନଗର ଥାନା ଅଞ୍ଚଳରେ ଏକ ଦୋକାନ ସମ୍ମୁଖରେ ଗାଡ଼ି ପାର୍କିଂକୁ ନେଇ ବିବାଦ ଦେଖିବାକୁ ମିଳିଥିଲା । ଏହା ଅତି ଉଗ୍ରରୂପ ନେଇଥିବାବେଳେ ଗାଡ଼ି ଚାଳକ ଜଣକ ଦୋକାନୀଙ୍କୁ ଗୁଳି ମାରିଥିଲେ । ପରେ ସେଠାରେ ଥିବା ସ୍ଥାନୀୟ ଲୋକେ ଗାଡ଼ି ଚାଳକଙ୍କ ଉପରେ ଆକ୍ରମଣ କରିଥିଲେ । ପିଟି ପିଟି ତିନି ଜଣଙ୍କୁ ମାରି ଦେଇଥିଲେ । ଘଟଣାସ୍ଥଳରେ ଜଣଙ୍କ ମୃତ୍ୟୁ ହୋଇଥିବାବେଳେ ଦୁଇଜଣଙ୍କ ମେଡିକାଲରେ ମୃତ୍ୟୁ ହୋଇଛି । ଦୋକାନ ସମ୍ମୁଖରେ ଗାଡ଼ି ପାର୍କିଂକୁ ନେଇ ଦୋକାନୀ ଏବଂ ଗାଡ଼ିରେ ବସିଥିବା ୩ଜଣଙ୍କ ମଧ୍ୟରେ ଯୁକ୍ତି ତର୍କ ହୋଇଥିଲା । ତେବେ ସ୍ଥାନୀୟ ଅଞ୍ଚଳରେ ଉତ୍ତେଜନା ଉଗ୍ରରୂପ ନେଇଥିବାବେଳେ ପୋଲିସ ପ୍ରଶାସନ ପକ୍ଷରୁ କ୍ୟାମ୍ପ ପକାଯାଇଛି ।
ଚୟନ କମିଟିରେ ଅଦଳ ବଦଳ କରିପାରେ ବିସିସିଆଇ, ଏହି ଯୋଗ୍ୟାତା ଥିଲେ କରନ୍ତୁ ଆବେଦେନ
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆକୁ ବାଛୁଥିବା ଚୟନ କମିଟିରେ ଅଦଳ ବଦଳ ହେବାକୁ ଯାଉଛି । ଏଥିପାଇଁ ବିସିସିଆଇ ପକ୍ଷରୁ ବିଜ୍ଞାପନ ପ୍ରକାଶ ପାଇଛି । ଚୟନ କମିଟିରେ ମୁଖ୍ୟ ୫ଜଣ ସଦସ୍ୟ ରହିଛନ୍ତି । ପୂର୍ବତନ ଭାରତୀୟ ବୋଲର ଅଜିତ ଅଗରକର ଏହାର ଅଧ୍ୟକ୍ଷ ରହିଛନ୍ତି । ଅନ୍ୟ ୪ ଜଣ ସଦସ୍ୟଙ୍କ ମଧ୍ୟରେ ରହିଛନ୍ତି ସଲିଲ ଅଙ୍କୋଲା, ଶିବସୁନ୍ଦର ଦାସ, ଏସ. ଶରଥ ଏବଂ ସବୁତ୍ର ବାନାର୍ଜୀ । ତେବେ ବିସିସିଆଇ ପକ୍ଷରୁ ନିଜର ଓ୍ବେବସାଇଟରେ ବିଜ୍ଞାପନ ପ୍ରକାଶ ପାଇଛି । ଏଥିପାଇଁ ଜଣେ ମାତ୍ର ସଦସ୍ୟ ଆବଶ୍ୟକ । ତେବେ କାହା ସ୍ଥାନରେ ଏହି ବିଜ୍ଞାପନ ପ୍ରକାଶ ପାଇଛି ତାହା ସ୍ପଷ୍ଠ ହୋଇନାହିଁ ।
BCCIର ନିୟମ ଅନୁଯାୟୀ, ଚୟନ କମିଟିରେ ପ୍ରତି ଜୋନରୁ ଜଣେ ଲେଖାଏଁ ସଦସ୍ୟ ରହିବା ଦରକାର । କିନ୍ତୁ ଓ୍ବେଷ୍ଟ ଜୋନରୁ ଦୁଇଜଣ ସଦସ୍ୟ ରହିଛନ୍ତି । ଅଜିତ ଅଗରକର ଏବଂ ସଲିଲ ଅଙ୍କୋଲା ଦୁଇଜଣ ଓ୍ବେଷ୍ଟ ଜୋନରୁ ରହିଥିବାବେଳେ ଅଗରକର ମୁଖ୍ୟ ଚୟନକର୍ତ୍ତା ରହିଥିବାରୁ ତାଙ୍କ ସ୍ଥାନ ସୁରକ୍ଷିତ ରହିଛି । ସଲିଲ ଅଙ୍କୋଲାଙ୍କ ସ୍ଥାନରେ ବିସିସିଆଇ ନୂଆ ସଦସ୍ୟଙ୍କୁ ନିଯୁକ୍ତି ଦେଇପାରେ । ତେବେ ଏହି ପଦ ପାଇଁ ଯେଉଁମାନେ ଆବେଦନ କରିବେ ସେମାନେ ଅତିକମରେ ୭ଟି ଟେଷ୍ଟ, ୩୦ ଫାଷ୍ଟକ୍ଲାସ୍ କିମ୍ବା ୧୦ଟି ଆନ୍ତର୍ଜାତୀୟ ଦିନିକିଆ ଖେଳିଥିବା ଆବଶ୍ୟକ ।
ଧୁମଧାମରେ ଚାଲିଛି ଘୁମୁରା ଉତ୍ସବ- ୨୦୨୪
କଳାହାଣ୍ଡି: କଳାହାଣ୍ଡିରେ ଧୁମଧାମରେ ଚାଲିଛି କଳା ସଂସ୍କୃତି ମହାକୁମ୍ଭ କଳାହାଣ୍ଡି ଘୁମୁରା ଉତ୍ସବ- ୨୦୨୪। ନାଚ ଗୀତରେ ଦୁଲୁକି ଉଠିଛି ରେଣ୍ଡୋ ମାଝୀ ମଞ୍ଚ। ଭବାନୀପାଟଣା ଲାଲବାହାଦୂର ଷ୍ଟାଡିୟମ୍ ପାଖରେ ଚାଲିଛି ମହୋତ୍ସବ । ଦ୍ୱିତୀୟ ସନ୍ଧ୍ୟାରେ କଳାହାଣ୍ଡିଆ କଳାକାରମାନଙ୍କ ବଜାଶାଲ ଓ ସିଙ୍ଗାରୀ ନାଚରେ ମଞ୍ଚ ଦୁଲୁକି ଉଠିଥିଲା। ମୁଖ୍ୟ ଅତିଥି ଭାବରେ ସାଂସଦ ବସନ୍ତ ପଣ୍ଡା ରହିଥିବା ବେଳେ ସମ୍ମାନୀତ ଅତିଥି ଭାବେ ରାଜ୍ୟ ସଭା ସାଂସଦ ସୁଜିତ୍ କୁମାର, ଜୁନାଗଡ଼ ବିଧାୟକ କ୍ୟାପଟେନ ଦିବ୍ୟ ଶଙ୍କର ମିଶ୍ର, ନର୍ଲା ବିଧାୟକ ଭୂପିନ୍ଦର ସିଂ ,ଜିଲ୍ଲାପାଳ ପି ଅନ୍ଵେଷା ରେଡ୍ଡୀ ଭବାନୀପାଟଣା ପୌର ପରିଷଦର ଅଧ୍ୟକ୍ଷା ସଂଯୁକ୍ତା ବେହେରା ଯୋଗ ଦେଇଥିଲେ । ଏହି ଅବସରରେ କଳାହାଣ୍ଡି ଉତ୍ସବ ଘୁମୁରା ୨୦୨୪ର ସ୍ମରଣିକା “କଳାଝରଣ ” ଅତିଥିଙ୍କ ଦ୍ବାରା ଉନ୍ମୋଚନ ହୋଇଯାଇଛି । କବି ସମ୍ମିଳନୀର କବିତା ପୁସ୍ତକ “ନିଶାନ”ର ମଧ୍ୟ ଉନ୍ମୋଚନ ହୋଇଛି। ଶେଷରେ ବିଭିନ୍ନ ଡ୍ୟାନ୍ସ ଗ୍ରୁପ ମାନଙ୍କ ଦ୍ୱାରା ରଙ୍ଗାରଙ୍ଗ କାର୍ଯ୍ୟକ୍ରମ ପରିବେଷଣ କରାଯାଇଥିଲା ।
ହୃଦୟ ଭାଙ୍ଗିବା ଦୁଃଖର କାରଣ ନାଁ ଏହା ଏକ ରୋଗ, ଜାଣନ୍ତୁ ଏହା ପଛର ମୁଖ୍ୟ କାରଣ
ନନ୍ଦିଘୋଷ ବ୍ୟୁରୋ: ଟିକେ ଦୁଃଖ ହେଲେ ଆମେ କହିଥାଉ କି, ଆମର ହୃଦୟ ଭାଙ୍ଗିଗଲା । ଏହି ଦୁଃଖଦ ଖବର ଆମ ହୃଦୟ ଉପରେ ପକାଇଥାଏ । ତେବେ ଏହାକୁ ମେଡିକାଲ ଭାଷାରେ କୁହାଯାଏ କି, ବ୍ରୋକେନ ହାର୍ଟ ସିଣ୍ଡ୍ରୋମ । ଏହି ସିଣ୍ଡ୍ରୋମ କୌଣସି ମଧ୍ୟ ବୟସରେ ଆସିଥାଏ । ତେବେ ଏହା ଏକ ରୋଗ ବୋଲି କହିପାରିବା । ୧୯୯୦ ମସିହାରେ ପ୍ରଥମେ ଏହି ’ବ୍ରୋକେନ ହାର୍ଟ ସିଣ୍ଡ୍ରୋମ’ ଜାପାନରେ ଚିହ୍ନଟ ହୋଇଥିଲା । ଯେତେବେଳେ ଆମେ ଅତ୍ୟନ୍ତ ଦୁଃଖ ଖବର ପାଇଥାଉ ସେତେବେଳେ ଆମର ହୃଦୟ ଭାଙ୍ଗିଯାଏ । ତେବେ ଗମ୍ଭୀର ଚାପ, ନିଜ ଲୋକଙ୍କ ମୃତ୍ୟୁ, ଧୋକା କିମ୍ବା ଆର୍ଥିକ ଚିନ୍ତା ଗଭୀରଭାବେ ଦୁର୍ଘଟଣା ହେବା କାରଣରୁ ହୃଦୟ ଭାଙ୍ଗିଥାଏ ।
ତେବେ ଯୁବକଙ୍କ କ୍ଷେତ୍ରରେ ଏହା ଅଧିକ ଦେଖାଯାଇଥାଏ । ଏହା ପଛର ମୁଖ୍ୟ କାରଣ ହେଉଛି ଯୁବକମାନେ ଅଧିକ ଚାପରେ ରହିଥାନ୍ତି । ଇମୋସନାଲି ଯୁବକ ଏବଂ ଯୁବତୀମାନେ ରହୁଥିବାବେଳେ ଚାପ ପଡ଼ିବାରୁ ହୃଦୟ ଭାଙ୍ଗି ଯାଇଥାଏ । ଏହି ସିଣ୍ଡ୍ରୋମ ଦ୍ବାରା ହୃଦୟ ଦୁର୍ବଳ ହୋଇଯାଏ, ହାର୍ଟର ଫଙ୍କସନ ଠିକଭାବେ ହୋଇନଥାଏ , ହାର୍ଟ ବ୍ଲାଷ୍ଟ ଏବଂ ଫେଲ ହେବାର ସମ୍ଭାବନା ରହିଥାଏ । କେତେକ ସମୟରେ ଏଭଳି କାରଣରୁ ମୃତ୍ୟୁ ମଧ୍ୟ ହୋଇଥାଏ । ଏଣୁ ହାର୍ଟ ସ୍ପେଶାଲିଷ୍ଟ ମାନେ କହିଛନ୍ତି କି, ସବୁବେଳେ ଚିନ୍ତାମୁକ୍ତ ରହିବା ଉଚିତ । ଯାହାଦ୍ବାରା ଶରୀର ସୁସ୍ଥ ରହିଥାଏ ।