ନନ୍ଦିଘୋଷ ବ୍ୟୁରୋ: ଶୀତ ଦିନରେ ସାଧାରଣତଃ ଲୋକେ ବିଭିନ୍ନ ଚର୍ମ ରୋଗରେ ଆକ୍ରାନ୍ତ ହେଉଥିବା ଦେଖିବାକୁ ମିଳିଥାଏ । ତେବେ ଆପଣମାନେ ପ୍ରାୟତଃ ଲକ୍ଷ୍ୟ କରିଥିବେ କି, ଗାଧୋଇବା ପରେ ଅଧିକାଂଶ ଲୋକଙ୍କ ଚର୍ମ ଶୁଖିଲା ଦେଖାଯାଏ । ତେବେ ଏହାର ପଛରେ କଣ ରହିଛି କାରଣ ? ଶୀତ ଦିନରେ ସାଧାରଣତଃ ମୁହଁ ଶୁଖିଲା ଭଳି ଲାଗେ । ମୁଖ୍ୟତଃ ଥଣ୍ଡା ପବନ ପାଇଁ ଚର୍ମ ଶୁଖିଯାଇଥାଏ । ଶୀତଦିନରେ ଲୋକେ ଗରମ ପାଣିରେ ଗାଧୋଇବା ପାଇଁ ଭଲ ପାଇଥାନ୍ତି । ଗରମ ପାଣିରେ ଗାଧୋଇବାକୁ ମଜା ଲାଗେ । ମାତ୍ର ଏହା ତ୍ବଚା ପାଇଁ କ୍ଷତିକାରକ ହୋଇଥାଏ । ଅତ୍ୟଧିକ ଗରମ ପାଣିରେ ଗାଧୋଇବା ଦ୍ବାରା ନାଚୁରାଲ ଅଏଲ ବାହାରିଯାଏ । ଏପରି ପରିସ୍ଥିତିରେ ଚର୍ମକୁ ମଶ୍ଚରାଇଜ୍ କରିବାର ଆବଶ୍ୟକତା ଅଛି । ଅନ୍ୟ ଏକ କାରଣ ହେଉଛି କି, ସାବୁନ ଲଗାଇବା ଦ୍ବାରା ଚର୍ମ ଶୁଖି ଯାଇଥାଏ । ଏଣୁ ଗାଧୋଇବା ପରେ ପ୍ରଥମେ ମଶ୍ଚରାଇଜ କରିବା ଉଚିତ ।
୬ମାସର ଶିଶୁକୁ ଧରି ୧୬ ମହଲାରୁ ଡେଇଁଲେ ମହିଳା
ନୂଆଦିଲ୍ଲୀ: ଦିଲ୍ଲୀର ଗ୍ରେଟର ନୋଏଡାରେ ଘଟିଯାଇଛି ଏକ ଚାଞ୍ଚଲ୍ୟକର ଘଟଣା । ଜଣେ ମହିଳା ନିଜର ୬ ମାସର ନିଷ୍ପାପ ଶିଶୁକୁ ଧରି ଏକ ୧୬ ମହଲା ବିଲ୍ଡିରୁ ଡେଇଁ ଆତ୍ମହତ୍ୟା କରିଛନ୍ତି । ସୂଚନା ପାଇ ପୋଲିସ ଘଟଣାସ୍ଥଳରେ ପହଞ୍ଚି ଉଭୟଙ୍କ ମୃତଦେହକୁ ଜବତ କରିବା ସହ ପୋଷ୍ଟମର୍ଟମ ପାଇଁ ପଠାଇଥିଲା।
ରିପୋର୍ଟ ଅନୁଯାୟୀ, ମୃତ ମହିଳାଙ୍କ ବୟସ ୩୩ ବର୍ଷ। ମହିଳା ଜଣକ ଅସୁସ୍ଥ ଥିବା ବେଳେ ସେ ଡିପ୍ରେସନରେ ମଧ୍ୟ ପୀଡିତ ଥିଲେ ବୋଲି ଜଣାପଡିଛି। ମଙ୍ଗଳବାର ବିଳମ୍ବିତ ରାତିରେ ମହିଳା ଜଣକ ଗ୍ରେଟର ନୋଏଡା ୱେଷ୍ଟର ଏକ ଗ୍ରୁପ୍ ହାଉସିଂ ସୋସାଇଟିର ୧୬ ମହଲାରୁ ଡେଇଁପଡିଥିବା ଅଭିଯୋଗ ହୋଇଛି। ସେ ତାଙ୍କ ଝିଅକୁ ସାଙ୍ଗରେ ଧରି ଡେଇଁପଡିଥିଲେ। ଏହି ଘଟଣାରେ ଉଭୟଙ୍କର ମୃତ୍ୟୁ ହୋଇଛି।
ଜଣେ ପୋଲିସ ଅଧିକାରୀଙ୍କ କହିବାନୁସାରେ, ମହିଳା ଜଣକ ତାଙ୍କ ପରିବାର ସହିତ ଏହି ସୋସାଇଟିରେ ରହୁଥିଲେ। ସେ ଡିପ୍ରେସନରେ ଥିବା ନେଇ ମହିଳାଙ୍କ ଭାଇ ସୂଚନା ଦେଇଛନ୍ତି।
ପ୍ରତ୍ୟକ୍ଷଦର୍ଶୀଙ୍କ ଅନୁଯାୟୀ, ଘଟଣା ପରେ ତୁରନ୍ତ ମା’ ଓ ଝିଅଙ୍କୁ ମେଡିକାଲ୍ ନିଆଯାଇଥିଲା । କିନ୍ତୁ ଡାକ୍ତର ସେମାନଙ୍କୁ ମୃତ ଘୋଷଣା କରିଥିଲେ। ତେବେ ପୋଲିସ ଘଟଣାର ତଦନ୍ତ ଆରମ୍ଭ କରିଥିବା ବେଳେ କୌଣସି ସୁଇସାଇଡ୍ ନୋଟ୍ ମିଳିନଥିବା ଜଣାପଡିଛି ।
ଏସସିବି ମେଡିକାଲରେ ହେବ ରାଜ୍ୟର ପ୍ରଥମ ହାପଲୋ ବୋନ୍ ମ୍ୟାରୋ ଟ୍ରାନ୍ସପ୍ଲାଣ୍ଟ
କଟକ: ଏସସିବି ମେଡିକାଲରେ ହୋଇଛି ରାଜ୍ୟର ପ୍ରଥମ ହାପଲୋ ବୋନ୍ ମ୍ୟାରୋ ଟ୍ରାନ୍ସପ୍ଲାଣ୍ଟ । ପୂର୍ବରୁ ହେମାଟୋଲୋଜି ବିଭାଗରେ ୧୪୬ ବୋନ ମ୍ୟାରୋ ଟ୍ରାନ୍ସପ୍ଲାଣ୍ଟ ହୋଇଥିଲେ ସୁଦ୍ଧା ୫୦ ପ୍ରତିଶତ ଏଚଏଲଏ ମ୍ୟାଚିଂରେ ଏହା ପ୍ରଥମ ଟ୍ରାନ୍ସପ୍ଲାଣ୍ଟ । ରୋଗୀ ଓ ଦାତାଙ୍କ ଏଚଏଲଏ ୫୦ ପ୍ରତିଶତ ମ୍ୟାଚ କରି ଏଭଳି ଅସ୍ତ୍ରୋପଚାର କରାଯାଇଛି । ଖୋର୍ଦ୍ଧା ବାଘମାରି ଅଞ୍ଚଳର ୧୯ ବର୍ଷୀୟ ସବ୍ୟସାଚୀ ସାହୁଙ୍କ ଶରୀରରେ ହୋଇଛି ଏହି ବିରଳ ଅସ୍ତ୍ରୋପଚାର । ଏଥିପାଇଁ ୪୦ ରୁ ୫୦ ଲକ୍ଷ ଟଙ୍କା ଖର୍ଚ୍ଚ ହେଉଥିବା ବେଳେ ରାଜ୍ୟ ସରକାରଙ୍କ ସଯୋଗରୁ ଏସସିବିରେ ରୋଗୀଙ୍କୁ ମାଗଣାରେ ମିଳୁଛି ଏହି ସୁବିଧା ।
ଚିକିତ୍ସା କ୍ଷେତ୍ରରେ ଆଉଏକ ସଫଳତା । ଏସସିବିରେ ରାଜ୍ୟର ପ୍ରଥମ ହାପେଲ ବୋନମ୍ୟାରୋ ଟ୍ରାନ୍ସପ୍ଲାଣ୍ଟ । ରାଜ୍ୟ ସରକାରଙ୍କ ସହଯୋଗରେ ମାଗଣା ଅସ୍ତ୍ରୋପଚାର । କଟକ ଏସସିବିରେ ରାଜ୍ୟର ପ୍ରଥମ ଏଚଏଲଏ ମ୍ୟାଚିଂ ହାପଲୋ ବୋନ୍ ମ୍ୟାରୋ ଟ୍ରାନ୍ସପ୍ଲାଣ୍ଟ ସଫଳତାର ସହିତ କରାଯାଇଛି । ଏହି ପଦ୍ଧତିରେ ରୋଗୀ ଓ ଡୋନର ମଧ୍ଯରେ ମାତ୍ର 50 ପ୍ରତିଶତ HLA ମ୍ୟାଚିଂ ପରେ ଅସ୍ତ୍ରୋପଚାର କରାଯାଇଛି । ପୂର୍ବରୁ ୯୦ ରୁ ୧୦୦ ପ୍ରତିଶତ HLA ମ୍ୟାଚ ନ ହେଲେ ଅସ୍ତ୍ରୋପଚାର ସମ୍ଭବ ନଥିଲା । କେବଳ ଭାଇ କିମ୍ବା ଭଉଣୀ ଡୋନର ହେଲେ ଏହା ସମ୍ଭବ ହେଉଥିଲା । ଫଳରେ ରକ୍ତ କର୍କଟ ରୋଗରେ ପୀଡିତ ରୋଗୀଙ୍କ ମଧ୍ଯରୁ ମାତ୍ର ୧୦ ପ୍ରତିଶତ ରୋଗୀଙ୍କ ସଠିକ ଡୋନର ମିଳୁଥିଲେ । ଏବେ ଏହି ନୂଆ ପଦ୍ଧତିରେ ମାତ୍ର ୫୦ ପ୍ରତିଶତ HLA ମ୍ୟାଚିଂରେ ଟ୍ରାନ୍ସପ୍ଲାଣ୍ଟ ସମ୍ଭବ ହୋଇପାରୁଛି ।
ପୂର୍ବରୁ ହେମାଟୋଲୋଜି ବିଭାଗରେ ୧୪୬ ରୋଗୀଙ୍କର ବୋନ ମ୍ୟାରୋ ଟ୍ରାନ୍ସପ୍ଲାଣ୍ଟ ହୋଇଥିଲା । ଆମେରିକାରେ ମାତ୍ର ୩ ବର୍ଷ ତଳେ ଆରମ୍ଭ ହୋଇଥିଲା ହାପଲୋ ବୋନ୍ ମ୍ୟାରୋ ଟ୍ରାନ୍ସପ୍ଲାଣ୍ଟ । ହେଲେ ରାଜ୍ଯ ସରକାର ଓ ଡାକ୍ତରଙ୍କ ପ୍ରୟାସରୁ ଏବେ ଏସସିବିରେ ମିଳିପାରୁଛି ଏପରି ସୁବିଧା । ଖୋର୍ଦ୍ଧା ବାଘମାରିର ସବ୍ୟସାଚୀ ସାହୁଙ୍କ ଶରୀରରେ ଏହି ଟ୍ରାନ୍ସପ୍ଲାଣ୍ଟ କରାଯାଇଛି । ସବ୍ୟସାଚୀଙ୍କ ସାନ ଭାଇ ୧୫ ବର୍ଷିୟ ପ୍ରଭୁଦତ୍ତ ଡୋନର ଥିଲେ । ଏଥିପାଇଁ ରାଜ୍ୟ ବାହାରେ ୪୦ ରୁ ୫୦ ଲକ୍ଷ ଟଙ୍କା ଖର୍ଚ୍ଚ ହେଉଥିବା ବେଳେ ଏସସିବିରେ ସମ୍ପୂର୍ଣ୍ଣ ମାଗଣାରେ ହୋଇଛି ଏହି ବିରଳ ଅସ୍ତ୍ରୋପଚାର । ଏଥିପାଇଁ ମୁଖ୍ୟମନ୍ତ୍ରୀଙ୍କୁ ଧନ୍ୟବାଦ ଜଣାଇଛନ୍ତି ରୋଗୀ ଓ ତାଙ୍କ ପରିବାର ।
ହାଲୁକା ଶୀତ ସହ ଘନ କୁହୁଡିରେ ଆକ୍ତାମାକ୍ତା ଜନଜୀବନ
ଭୁବନେଶ୍ବର: ହାଲୁକା ଶୀତ ସହ ଘନ କୁହୁଡିରେ ଆକ୍ତାମାକ୍ତା ହେଉଛି ଜନଜୀବନ । ଉପାନ୍ତରୁ ଉପକୂଳ ସବୁଠି ଦେଖାଦେଇଛି ଏଭଳି ପାଗ । ଆସନ୍ତା ୨ ଦିନ ପରେ ପୁଣି ବଢିବ ଶୀତ । ସ୍ବାଭାବିକ ଠାରୁ ୨ ରୁ ୩ ଡିଗ୍ରୀ ପର୍ଯ୍ୟନ୍ତ ତାପମାତ୍ରା କମିବ ବୋଲି ପୂ୍ର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର । ଫଳରେ ପ୍ରବଳ ଜାଡ ସହ ଅତି ଘନ କୁହୁଡି ଦେଖାଦେବ । ମେଘମୁକ୍ତ ଆକାଶ ସହ ବାୟୁମଣ୍ଡଳରେ ଜଳୀୟବାଷ୍ପର ପରିମାଣ ଅଧିକ ରହୁଥିବାରୁ ରାଜ୍ୟରେ ଏଭଳି ପାଗ ଦେଖାଦେଇଛି । ଆସନ୍ତା ୨ ଦିନ ପର୍ଯ୍ୟନ୍ତ ଉପକୂଳ ଓଡ଼ିଶା ସମେତ ଆଭ୍ୟନ୍ତରୀଣ ଓଡ଼ିଶାରେ ଘନ କୁହୁଡି ପାଇଁ ସତର୍କତା ଜାରି କରିଛି ପାଣିପାଗ କେନ୍ଦ୍ର ।
ଘନ କୁହୁଡିର ଚାଦର ତଳେ ରାଜଧାନୀ । ଯୁଆଡେ ଚାହିଁବ ସିଆଡେ ଭାସୁଛି ଧଳା ଧଳା ଜଳକଣା । ଆଗକୁ ୨୦ ମିଟର ଦେଖିବା ବି ଅସମ୍ଭବ । ଦିନ ୧୦ଟା ପର୍ଯ୍ୟନ୍ତ ଆକ୍ତାମାକ୍ତା ଜନଜୀବନ । କଅଁଳ ଖରା ପରେ ଧିରେ ଧିରେ ସ୍ବାଭାବିକ ହେଲା ସ୍ଥିତି । ରାଜଧାନୀ ସମେତ ଖୋର୍ଦ୍ଧା, ଢେଙ୍କାନାଳ ଏବଂ ଚାନ୍ଦବାଲିରେ ସ୍ଥିତି ସଂଘାତିକ । ୨୦ ମିଟରକୁ ଖସିଲା ଦୃଶ୍ୟମାନ କ୍ଷମତା । ସକାଳୁ ସକାଳୁ ଭୁବନେଶ୍ବର ସମେତ ସାରା ରାଜ୍ୟକୁ କୁହୁଡି ଅକ୍ତିଆର କରି ରଖିଥିଲା । କୁହୁଡିର ପ୍ରଭାବ ଏତେ ଥିଲା ଯେ, ଗାଡି ଆଗକୁ ଦେଖିବା ସମ୍ଭବ ହେଉନଥିଲା । ଅତି ଜରୁରୀ କାମରେ ଯାଉଥିବା ଗାଡି ଚାଳକମାନେ ଲିଇଟ୍ ଏବଂ ଇଣ୍ଡିକେଟର ଦେଇ ଧିରେ ଧିରେ ଯିବାକୁ ବାଧ୍ୟ ହେଉଥିଲେ ।
ଆସନ୍ତା ଦୁଇଦିନ ପର୍ଯ୍ୟନ୍ତ ଅତି ଘନ କୁହୁଡି । ଖୋର୍ଦ୍ଧା ସମେତ ପୁରୀ, କଟକ, ଜଗତସିଂହପୁର, କେନ୍ଦ୍ରାପଡା, ସୁନ୍ଦରଗଡ, ଝାରସୁଗୁଡା, କୋରାପୁଟ, ରାୟଗଡା, ଦେବଗଡ, ଅନୁଗୁଳ, ଢେଙ୍କାନାଳ, କଳାହାଣ୍ଡି, କନ୍ଧମାଳ, ଗଞ୍ଜାମ, ଗଜପତି, କେନ୍ଦୁଝର, ବାଲେଶ୍ବର, ଭଦ୍ରକ ଏବଂ ମୟୂରଭଞ୍ଜକୁ ଆଲର୍ଟ ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର । ସେହିଭଳି ୧୨ ତାରିଖ ଦିନ ୧୯ଟି ଜିଲ୍ଲାରେ ଘନ କୁହୁଡି ନେଇ ୟେଲୋ ଆଲର୍ଟ ଜାରି କରାଯାଇଛି । ବର୍ତ୍ତମାନ ମେଘମୁକ୍ତ ଆକାଶ ରହିଥିବା ବେଳେ ଦୁଇ ଦିନ ପର୍ଯ୍ୟନ୍ତ ତାପମାତ୍ରାରେ କୌଣସି ପରିବର୍ତ୍ତନ ହେବ ନାହିଁ । ଦୁଇଦିନ ପରେ ସ୍ବାଭାବିକ ଠାରୁ ୨ ରୁ ୩ ଡିଗ୍ରୀ ପର୍ଯ୍ୟନ୍ତ ତାପମାତ୍ରା କମିବା ସହ କିଛି ଜିଲ୍ଲାରେ ହାଡଭଙ୍ଗା ଶୀତ ଅନୁଭୂତ ହେବ ବୋଲି ପୂର୍ବାନୁମାନ କରିଛି ପାଣିପାଗ କେନ୍ଦ୍ର ।
ଘନ କୁହୁଡିର ମୁକାବିଲା କରିବା ପାଇଁ ସବୁ ଜିଲ୍ଲାର ଜିଲ୍ଲାପାଳଙ୍କ ସହ ପୋଲିସ ଏବଂ ପରିବହନ କମିଶନରଙ୍କୁ ଚିଠି ଲେଖିଛନ୍ତି ଏସ୍ଆରସି । ଦୁର୍ଘଟଣା ପ୍ରବଣ ଅଞ୍ଚଳରେ ପାଟ୍ରୋଲିଂ ବଢାଇବା ସହ ଡ୍ରାଇଭର ମାନଙ୍କୁ ସଚେତନ କରିବା ପାଇଁ ପରାମର୍ଶ ଦିଆଯାଇଛି ।
କ୍ରିକେଟ୍ ଖେଳୁଥିବା ବେଳେ ଚାଲିଗଲା ଇଞ୍ଜିନିୟରଙ୍କ ଜୀବନ
ନୂଆଦିଲ୍ଲୀ: ନୋଏଡାରେ ଚାଲିଥିବା ଏକ କ୍ରିକେଟ୍ ମ୍ୟାଚରେ ଘଟିଯାଇଛି ଅଘଟଣ । ଯାହାର ଭିଡ଼ିଓ ଏବେ ଭାଇରାଲ୍ ହେବାରେ ଲାଗିଛି । ଗତ ସପ୍ତାହରେ ମ୍ୟାଚ୍ ଖେଳୁଥିବା ବେଳେ ଜଣେ ୩୬ ବର୍ଷୀୟ ଇଞ୍ଜିନିୟରଙ୍କ ହୃଦଘାତରେ ମୃତ୍ୟୁ ହୋଇଛି। ବିକାଶ ନେଗି ନାମକ ଜଣେ ବ୍ୟକ୍ତି ରନ୍ ପାଇଁ ଦୌଡୁଥିବା ବେଳେ ହଠାତ୍ ତଳେ ପଡିଯାଇଥିଲେ ।
ଉତ୍ତରପ୍ରଦେଶର ବିକାଶ ନେଗି ସପରିବାର ସହିତ ଦିଲ୍ଲୀର ରୋହିଣୀରେ ରହୁଥିଲେ ଏବଂ ନୋଏଡାସ୍ଥିତ ଏକ ଘରୋଇ କମ୍ପାନୀରେ କାମ କରୁଥିଲେ ବୋଲି ବୁଧବାର ଦିନ ପୋଲିସ ପକ୍ଷରୁ ସୂଚନା ମିଳିଛି। ଏହି ଘଟଣା ଜାନୁଆରୀ ୬ରେ, ସେକ୍ଟର ୧୩୫ରେ ଥିବା ଆରେନା କ୍ରିକେଟ୍ ଗ୍ରାଉଣ୍ଡରେ ସକାଳ ପ୍ରାୟ ୧୧.୪୦ମି. ସମୟରେ ଘଟିଥିଲା।
“ସେ ତଳେ ପଡ଼ିଯିବା ପରେ ତାଙ୍କୁ ସଙ୍ଗେସଙ୍ଗେ ଜୟପି ହସ୍ପିଟାଲରେ ଭର୍ତ୍ତି କରାଯାଇଥିଲା। କିନ୍ତୁ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପୋଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ମୃତଦେହକୁ ପୋଷ୍ଟମର୍ଟମ ପାଇଁ ପଠାଇଥିଲା’’। ତେବେ ଭାଇରାଲ୍ ଭିଡିଓରେ ଦେଖିବାକୁ ମିଳିଛି ଯେ ନେଗି ତଳେ ପଡିଯିବା ପରେ ୱିକେଟ୍ କିପର ଏବଂ ଅନ୍ୟ ଖେଳାଳିମାନେ ତାଙ୍କ ଆଡ଼କୁ ଦୌଡିଥିଲେ।
ସାକାର ହେବାକୁ ଯାଉଛି ପାରାଦ୍ୱୀପରେ ବୃହତ ଷ୍ଟିଲ ପ୍ଲାଣ୍ଟ ନିର୍ମାଣ
ଜଗତସିଂହପୁର: ପାରାଦ୍ୱୀପରେ ବୃହତ ଷ୍ଟିଲ ପ୍ଲାଣ୍ଟ ନିର୍ମାଣର ସ୍ବପ୍ନ ସାକାର ହେବାକୁ ଯାଉଛି । ଓଡିଶାକୁ ଶିଳ୍ପସମୃଦ୍ଧ କରିବାକୁ ନିରନ୍ତର ପ୍ରୟାସ ଜାରିରଖିଥିବା ମୁଖ୍ୟମନ୍ତ୍ରୀଙ୍କ ସ୍ବପ୍ନକୁ ସାକାର କରିବାକୁ ଯାଉଛି ଆର୍ସେଲର ମିତ୍ତଲ ନିପ୍ପନ ଷ୍ଟିଲ । ବାର୍ଷିକ ୭ ନିୟୁତ ମେଟ୍ରିକ ଟନ କ୍ଷମତା ବିଶିଷ୍ଟ ଷ୍ଟିଲ ପ୍ଲାଣ୍ଟ ନିର୍ମାଣ କରିବ । ଯାହାକୁ ନେଇ ଜିଲ୍ଲା ପ୍ରଶାସନ ତରଫରୁ ପାରାଦ୍ୱୀପ ମୁନିସିପାଲିଟି କଲ୍ୟାଣ ମଣ୍ଡପ ଠାରେ ଅନୁଷ୍ଠିତ ହୋଇଯାଇଛି ଜନଶୁଣାଣୀ ଶିବିର । ଏଥିରେ ବିଭିନ୍ନ ପଞ୍ଚାୟତରୁ ହଜାର ହଜାର ସଂଖ୍ୟାରେ ଜନସାଧାରଣ ଯୋଗଦେବା ସହିତ ପ୍ରକଳ୍ପ ନିର୍ମାଣ ଜନିତ ବିଭିନ୍ନ ସମସ୍ୟା ଉପରେ ନିଜର ମତ ରଖିଥିଲେ । ଏଥି ସହିତ ପାରାଦ୍ୱୀପ ଅଞ୍ଚଳରେ ବଢୁଥିବା ଶିଳ୍ପସଂସ୍ଥାକୁ ନେଇ ପ୍ରଦୂଷଣର ମାତ୍ରା ବୃଦ୍ଧି ପାଇବା ସହିତ ଅଞ୍ଚଳବାସୀ ଅନେକ ଦୁରାରୋଗ୍ୟରେ ପୀଡିତ ହେଉଥିବାରୁ ସେଠାରେ ଏକ ସୁପର ସ୍ପେସିଆଲିଟି ହସ୍ପିଟାଲ ନିର୍ମାଣ ଦାବି କରିଥିଲେ ।
ଆଫଗାନିସ୍ତାନ ବିପକ୍ଷ ପ୍ରଥମ ଟି-୨୦ ଖେଳିବେନି କୋହଲି
ନୂଆଦିଲ୍ଲୀ: ବିରାଟଙ୍କ ପ୍ରଶଂସକଙ୍କ ପାଇଁ ଦୁଃଖ ଖବର । ଆଫଗାନିସ୍ତାନ ବିପକ୍ଷ ପ୍ରଥମ ଟି-୨୦ ଖେଳିବେନି ବିରାଟ କୋହଲି । ବ୍ୟକ୍ତିଗତ କାରଣରୁ କୋହଲି ଖେଳିବେ ନାହିଁ ବୋଲି କହିଥିବାବେଳେ ଦଳର ମୁଖ୍ୟ ପ୍ରଶିକ୍ଷକ ରାହୁଲ ଦ୍ରାବିଡ ଏହି ସୂଚନା ଦେଇଛନ୍ତି । ଆସନ୍ତା ୧୧ ତାରିଖରେ ପ୍ରଥମ ଟି-୨୦ ଅନୁଷ୍ଠିତ ହେବାକୁ ଥିବାବେଳେ କୋହଲି ଖେଳିବେ ନାହିଁ । ଜାନୁଆରୀ ୧୧ ତାରିଖରେ କୋହଲିଙ୍କ ଝିଅ ଭାମିକାଙ୍କ ଜନ୍ମଦିନ । ଏହି କାରଣରୁ ସେ ଖେଳିବେ ନାହିଁ ବୋଲି ଅନୁମାନ କରାଯାଉଛି । ତେବେ ସେ ଯାହାବି ହେଉ ବ୍ୟକ୍ତିଗତ କାରଣୁ ପ୍ରଥମ ଟି-୨୦ରୁ ନିଜର ନାମକୁ ପ୍ରତ୍ୟାହାର କରିଛନ୍ତି କୋହଲି । ମାତ୍ର ବାକି ଦୁଇ ମ୍ୟାଚ ଖେଳିବେ । ଜାନୁଆରୀ ୧୪ ଏବଂ ୧୭ରେ ଦ୍ବିତୀୟ ଏବଂ ତୃତୀୟ ମ୍ୟାଚ ଅନୁଷ୍ଠିତ ହେବ । ଏହି ମ୍ୟାଚରେ ଦଳକୁ ଫେରିବେ କୋହଲି । ଦୀର୍ଘ ୧୪ ମାସ ପରେ କୋହଲି ଟି-୨୦ ଦଳକୁ ଫେରିଛନ୍ତି । ଦିନିକିଆ ଏବଂ ଟେଷ୍ଟ ମ୍ୟାଚ ଖେଳୁଥିବା କୋହଲି ଟି-୨୦ ଦଳକୁ ଫେରୁଥିବାବେଳେ ଆଗକୁ ଆସୁଥିବା ଟି-୨୦ ବିଶ୍ବକପରେ ମୁଖ୍ୟ ଭୂମିକା ଗ୍ରହଣ କରିବେ ବୋଲି ଆଶା କରାଯାଉଛି ।
ରୋହିତ ଶର୍ମାଙ୍କ ଅଧିନାୟକତ୍ବରେ ଦଳ ଟି-୨୦ ସିରିଜ ଖେଳିବ । ହାର୍ଦ୍ଦିକ ପାଣ୍ଡ୍ୟା ଆହତ ଥିବାରୁ ସେ ଦଳରୁ ବାଦ ପଡ଼ିଛନ୍ତି । ଏହାସହ ସୂର୍ଯ୍ୟକୁମାର ଯାଦବ ମଧ୍ୟ ଦଳରେ ନାହାନ୍ତି । ଯୁବ ଖେଳାଳିମାନେ ଦଳରେ ସ୍ଥାନ ପାଇଥିବାବେଳେ ଭାରତରେ ଅନୁଷ୍ଠିତ ଏହି ସିରିଜ କାହା ସପକ୍ଷରେ ଯିବା ବେଶ ଗୁରୁତ୍ବ ବହନ କରୁଛି । ଟି-୨୦ ବିଶ୍ବକପ ପୂର୍ବରୁ ଏହା ପ୍ରଥମ ଦ୍ବିପାକ୍ଷିକ ସିରିଜ୍। ଏଣୁ ଖେଳାଳିଙ୍କ ପ୍ରଦର୍ଶନ ବିଶ୍ବକପ ଦଳ ପାଇଁ ବେଶ ଗୁରୁତ୍ବ ବହନ କରୁଛି ।
ଅଭିଜିତଙ୍କ ଚିକିତ୍ସାରେ ଅର୍ଥ ସାଜିଛି ବାଧକ
ନୟାଗଡ଼: ଚିକିତ୍ସା ପାଇଁ ଅର୍ଥ ସାଜିଛି ବାଧକ। ନୟାଗଡ଼ ଜିଲ୍ଲା ଦଶପଲ୍ଲା ବ୍ଲକ ଅନ୍ଧାରକୋଟ ଗାଁର ଅଭିଜିତ ମିଶ୍ର କିଡନୀ ରୋଗରେ ଆକ୍ରାନ୍ତ। ଯବାନ ହୋଇ ଦେଶମାତୃକାର ସେବା କରିବା ପାଇଁ ପ୍ରସ୍ତୁତ ହେଉଥିଲେ ହେଲେ ଆଜି ନିଜ ଜୀବନ ପାଇଁ ଲଢେଇ କରୁଛନ୍ତି । ଚିକିତ୍ସା ପାଇଁ ଦରକାର ୧୦ ରୁ ୧୫ ଲକ୍ଷ ଟଙ୍କା।
ମୋ ସଂସାର ଭାସିଗଲା , ମୋ ପୁଅକୁ ବଞ୍ଚେଇଦିଅ । ଦେଶର ସେବା କରିବା ପାଇଁ ପୁଅ ଦେଖୁଥିଲା ସ୍ବପ୍ନ । ହେଲେ ସବୁ କିଛି ହୋଇଗଲା ଓଲଟ ପାଲଟ । ଏବେ ନିଜ ଜୀବନ ବଞ୍ଚାଇବା ପାଇଁ କରୁଛି ସଂଗ୍ରାମ । ଶଯ୍ୟାରେ ପୁଅକୁ ଦେଖି ମା’ ଆଖିରେ ଶୁଖୁନି ଲୁହ । ନୟାଗଡ଼ ଦଶପଲ୍ଲା ବ୍ଲକ ଅନ୍ଧାରକୋଟ ଗାଁର ଅଭିଜିତ ମିଶ୍ର । ଯବାନ ହୋଇ ଦେଶମାତୃକାର ସେବା କରିବା ପାଇଁ ପ୍ରସ୍ତୁତ ହେଉଥିଲେ ହେଲେ ଆଜି ନିଜ ଜୀବନ ପାଇଁ ଲଢେଇ କରୁଛନ୍ତି । ଚିକିତ୍ସା ପାଇଁ ଦରକାର ୧୦ ରୁ ୧୫ ଲକ୍ଷ ଟଙ୍କା ।
ଅଭିଜିତଙ୍କ ବାପା ପୂଜକ ଭାବେ କାର୍ଯ୍ୟ କରନ୍ତି । ୨୦୨୩ ମସିହା ଜାନୁଆରୀ ମାସରେ ହଠାତ ଅଭିଜିତ ଅସୁସ୍ଥ ହେବା ପରେ ଚିକିତ୍ସା କରିବାରୁ ଜଣାପଡିଲା କିଡ଼ନୀ ଖରାପ ଅଛିl କିଛି ମାସ ପରେ ୨ଟି ଯାକ କିଡ଼ନୀ ସମ୍ପୂର୍ଣ୍ଣ ନଷ୍ଟ ବୋଲି ଡାକ୍ତର କହିଲେ । ଯାହା କିଛି ସଂଚିତ ଅର୍ଥ ଏବଂ ଜାଗା ବାଡ଼ି ଥିଲା ବିକ୍ରି କରି ପୁଅ ଚିକିତ୍ସାରେ ଲଗାଇଲେ ପରିବାର। ହେଲେ କିଡ଼ନୀ ଟ୍ରାନ୍ସପ୍ଲାଣ୍ଟ ଆବଶ୍ୟକ । ଏଥିପାଇଁ ଦରକାର ୧୦ ରୁ ୧୫ ଲକ୍ଷ ଟଙ୍କା l ଚିକିତ୍ସା ପାଇଁ ଅର୍ଥ ସାଜିଛି ବାଧକ । ଲୋକଙ୍କଠାରୁ ଆର୍ଥିକ ସହାୟତାର ଅପେକ୍ଷାରେ ପରିବାର ।
୬ଟି ସ୍ଥାନରେ ଚାଲିଛି ପକ୍ଷୀ ଗଣନା, ପୂର୍ବ ବର୍ଷ ଅପେକ୍ଷା ବଢ଼ିଛି ବିଦେଶୀ ପକ୍ଷୀଙ୍କ ଆଗମନ
ନନ୍ଦିଘୋଷ ବ୍ୟୁରୋ: ବିଭିନ୍ନ ସ୍ଥାନରେ ଚାଲିଛି ପକ୍ଷୀ ଗଣନା । ୬ଟି ସ୍ଥାନରେ ଗଣତି କରୁଛନ୍ତି ୨୦ ଜଣରୁ ଅଧିକ ବନ କର୍ମଚାରୀ । ରାଜ୍ୟରେ ପୂର୍ବ ବର୍ଷ ଅପେକ୍ଷା ବଢ଼ିଛି ବିଦେଶୀ ପକ୍ଷୀଙ୍କ ଆଗମନ । ଏପଟେ ଅସ୍ତରଙ୍ଗ ଓ ବ୍ରହ୍ମଗିରି ଡିଭିଜନରେ ପକ୍ଷୀ ଗଣତି କରୁଛନ୍ତି ବିଶେଷଜ୍ଞ ଟିମ୍। ଚାଲିଛି ପକ୍ଷୀ ଗଣନା । କେନ୍ଦୁଝର ଜିଲ୍ଲାର ୨୧ଟି ସ୍ଥାନରେ ଆରମ୍ଭ ହୋଇଛି ପକ୍ଷୀ ଗଣନା l ଏହି କାର୍ଯ୍ୟରେ ୨୧ଟି ଟିମର ୬୦ଜଣ ପକ୍ଷୀ ଗଣନାକାରୀ ସାମିଲ ହୋଇଛନ୍ତି । ନାଳପଡା ଡ୍ୟାମ, ବଡଶାସନ ପୋଖରୀ , ଟିକରପଡା ଡ୍ୟାମ , ସାପୁଆ ଡ୍ୟାମରେ ଚାଲିଛି ଗଣନା କାର୍ଯ୍ୟ। ଚଳିତ ବର୍ଷ ବିଦେଶାଗତ ପକ୍ଷୀଙ୍କ ସଂଖ୍ୟା ଅଧିକ ଥିବା ନେଇ ଆଶା କରାଯାଉଛି । ସେହିପରି ଡମପଡା ବନ ବିଭାଗ ପକ୍ଷରୁ ମହାନଦୀ ସମେତ ୪ ଟି ସ୍ଥାନରେ ଚାଲିଛି ପକ୍ଷୀ ଗଣନା। ବାଙ୍କୀ ମହାନଦୀ ସମେତ , ଜାରିଆ ପାଟ , ଅରାଚଣ୍ଡୀ ପାଟ , ପାଥପୁର ପାଟରେ ଚାଲିଛି ପକ୍ଷୀ ଗଣନା । ଏଥିରେ ୫ ଟି ଟିମ ନିୟୋଜିତ ହୋଇଛନ୍ତି ।
ରେଢ଼ାଖୋଲ ହରିହର ଜୋର ସମେତ ୩୩ଟି ସ୍ଥାନରେ ଚାଲିଛି ପକ୍ଷୀ ଗଣନା । ହରିହର ଜୋର ଜଳଭଣ୍ଡାରରେ ପକ୍ଷୀ ଗଣନାରେ ସାମିଲ ହୋଇଛନ୍ତି ୩୪ଟି ଟିମର ୫୬ଜଣ ବନ କର୍ମଚାରୀ । ବିଶେଷ ଭାବରେ ବିଦେଶୀ ପକ୍ଷୀ ଉପରେ ନଜର ରଖିଛି ବନ ବିଭାଗ ର । ଗତବର୍ଷ ୪୨ ପ୍ରଜାତି ପକ୍ଷୀ ସହିତ ସର୍ବମୋଟ ୨୩୦୦ ପକ୍ଷୀ ରହିଥିଲେ । ସେହିପରି କୁଳଡିହା ଅଭୟାରଣ୍ୟ ଓ ନୀଳଗିରିରେ ପକ୍ଷୀ ଗଣନା ଆରମ୍ଭ ହୋଇଛି । ୫ଟି ସ୍ଥାନରେ ଚାଲିଛି ଗଣନା । ଗଣନା କାର୍ଯ୍ୟରେ ନିୟୋଜିତ ଅଛନ୍ତି ବନ ବିଭାଗର ୫ଟି ଟିମ୍ ସହ ୨୦ ଜଣରୁ ଅଧିକ ବନ କର୍ମଚାରୀ । କୁଳଡିହା ଅଭୟାରଣ୍ୟ ଭିତରେ ଥିବା ଖୁମକୁଟ, ବୁଗାଳିବନ୍ଧ, ରିଶିଆ, ସାତଘାଟି ଆଦି ସ୍ଥାନରେ ଗଣନା ଚାଲିଥିବା ବେଳେ ନୀଳଗିରି ପଦ୍ମତୋଳା ହ୍ରଦରେ ମଧ୍ୟ ଚାଲିଛି ପକ୍ଷୀ ଗଣନା। ସେପଟେ ପୁରୀ ଡିଭିଜନରେ ଆରମ୍ଭ ହୋଇଛି ପକ୍ଷୀ ଗଣନା । ଏହି ଡିଭିଜନରେ ୫ଟି ରେଞ୍ଜରେ ୨୫ଟି ଟିମ ଗଣନା କାର୍ଯ୍ୟରେ ସାମିଲ ଅଛନ୍ତି । ବ୍ରହ୍ମଗିରି ରେଞ୍ଜ ଅଧୀନରେ ପକ୍ଷୀ ଗଣନା ଆରମ୍ଭ କରାଯାଇଛି। ୪ଟି ଜୋନରେ ୪ଟି ଟିମକୁ ନେଇ ଗଣନା କରାଯାଉଛି ।
ଭାରତ ବିପକ୍ଷ ଟି-୨୦ ସିରିଜ୍ ପୂର୍ବରୁ ଆଫଗାନିସ୍ତାନକୁ ବଡ଼ ଝଟକା, ବାଦ ପଡ଼ିଲେ ରସିଦ୍ ଖାନ୍
ନୂଆଦିଲ୍ଲୀ: ଆସନ୍ତା ୧୧ ତାରିଖରୁ ଭାରତ ଏବଂ ଆଫଗାନିସ୍ତାନ ମଧ୍ୟରେ ୩ ମ୍ୟାଚ ବିଶିଷ୍ଟ ଟି-୨୦ ସିରିଜ ଖେଳାଯିବାକୁ ଯାଉଛି । ତେବେ ଏହି ସିରିଜ ପୂର୍ବରୁ ଆଫଗାନିସ୍ତାନକୁ ଲାଗିଛି ବଡ଼ ଝଟକା । ଏହି ସିରିଜରୁ ବାଦ ପଡ଼ିଛନ୍ତି ଆଫଗାନିସ୍ତାନର ଦକ୍ଷ ଅଲରାଉଣ୍ଡର ରସିଦ ଖାନ୍ । କିଛଦିନ ହେବ ରସିଦ ଖାନ ଆହତ ରହିଥିବାବେଳେ ସିରିଜ ପୂର୍ବରୁ ଠିକ୍ ହୋଇଯିବେ ବୋଲି ଆଶା ରଖାଯାଇଥିଲା । ମାତ୍ର ସେ ଆହତ ରହିଛନ୍ତି । ଯେଉଁ କାରଣରୁ ଏହି ସିରିଜରେ ସମ୍ପୂର୍ଣ୍ଣ ଖେଳିପାରିବେନି ବୋଲି କୁହାଯାଇଛି । କିଛଦିନ ପୂର୍ବରୁ ତାଙ୍କର ଅସ୍ତ୍ରୋପଚାର ହୋଇଛି । ଯେଉଁ କାରଣରୁ ଆଫଗାନିସ୍ତାନ ଦଳ ଘୋଷଣା ହେବା ପୂର୍ବରୁ ରସିଦଙ୍କ ନାମ ଘୋଷଣା ହୋଇନଥିଲା । ତେବେ ବୋଲିଂରେ ନୁର ଅହମ୍ମଦ, ନବୀନ ଉଲ୍ଲହକ, ମୁଜିବ ଏବଂ ମହମ୍ମଦ ସଲିମ ପ୍ରଭୁଖ ବୋଲିଂ ଭାର ସମ୍ଭାଳିବେ।