ଝାରସୁଗୁଡ଼ା : ମହାନଦୀରେ ବୁଡ଼ିଲା ଡଙ୍ଗା l ଝାରସୁଗୁଡା ଜିଲ୍ଲା ଲଖନପୁର ବ୍ଲକ ଶରଧାରୁ ଲୋକେ ବରଗଡ଼ ବାଞ୍ଜିପାଲିକୁ ଯାଉଥିବା ବେଳେ ବୁଡ଼ିଗଲା ଡଙ୍ଗା l ଡଙ୍ଗାରେ ପ୍ରାୟ ୫୦ ରୁ ଉର୍ଦ୍ଧ ମହିଳା, ପୁରୁଷ ଓ ଛୋଟ ଛୁଆ ଥିବା ଜଣା ପଡ଼ିଛି l ନିକଟରେ ଥିବା ମାଛ ଧରାଳି ଡ଼ଙ୍ଗା ଚାଳକ ମାନେ ଉଦ୍ଧାର କାର୍ଯ୍ୟ ଜାରି ରଖିଛନ୍ତି l ଘଟଣା ସ୍ଥଳରେ ଜଣଙ୍କ ମୃତ ହୋଇଥିବା ବେଳେ ୬ ନିଖୋଜ ଥିବା ସୂଚନା । ନିଖୋଜ ୬ଜଣ ଯାତ୍ରୀଙ୍କୁ ଖୋଜାଖୋଜି କରାଯାଉଛି । ଜିଲ୍ଲା ସଦରମହକୁମା ଠାରୁ ୧୦୦ କିମି ଦୁରରେ ଘଟିଛି ଏହି ଅଘଟଣ । ସୂଚନା ଅନୁସାରେ ଯାତ୍ରୀଙ୍କୁ ଶରଧାରୁ ବାଞ୍ଜିପାଲିକୁ ଯାଉଥିବା ବେଳେ ହଠାତ କୌଣସି କାରଣ ବସତ ଡଙ୍ଗା ବୁଡ଼ିଯାଇଥିଲା । ମହାନଦୀରେ ମାଝ ଧରୁଥିବା ମାଛ ଧରାଳି ମାନେ ତୁରନ୍ତ ଉଦ୍ଧାର କାର୍ଯ୍ୟ କରିଥିଲେ ।
ପ୍ରଥମ ପର୍ଯ୍ୟାୟରେ ମଇଦାନରେ ୧ ହଜାରରୁ ଊର୍ଦ୍ଧ୍ବ ପ୍ରାର୍ଥୀ, ୪୫0 ପ୍ରାର୍ଥୀ କୋଟିପତି
ନୂଆଦିଲ୍ଲୀ: ପ୍ରଥମ ପର୍ଯ୍ୟାୟରେ ପ୍ରତିଦ୍ବନ୍ଦ୍ବିତା କରୁଥିବା ପ୍ରାର୍ଥୀଙ୍କୁ ନେଇ ଆସିଛି ରିପୋର୍ଟ । ମଧ୍ୟପ୍ରଦେଶ ଛିନ୍ଦଓ୍ବାରାରୁ ଲଢୁଥିବା କଂଗ୍ରେସ ପ୍ରାର୍ଥୀ ନକୁଳନାଥ ହେଉଛନ୍ତି ସବୁଠାରୁ ଧନୀପ୍ରାର୍ଥୀ । ତାଙ୍କ ସମ୍ପତ୍ତି ପରିମାଣ ୭୧୬ କୋଟି ଟଙ୍କା । ଭୀମ ପାର୍ଟ ମୁଖ୍ୟ ଚନ୍ଦ୍ରଶେଖର ଆଜାଦ ରାବଣଙ୍କ ନାମରେ ରହିଛି ସର୍ବାଧିକ ୩୬ଟି ଅପରାଧିକ ମାମଲା । ସେ ଉତ୍ତରପ୍ରଦେଶ ନଗିନାରୁ ଲଢୁଛନ୍ତି ।
ପ୍ରଥମ ପର୍ଯ୍ୟାୟରେ ମଇଦାନରେ ଅବତୀର୍ଣ୍ଣ ହୋଇଛନ୍ତ ୧ ହଜାର ୬୨୫ ପ୍ରାର୍ଥୀ । ସେମାନଙ୍କ ମଧ୍ୟରୁ ମହିଳା ପ୍ରାର୍ଥୀଙ୍କ ସଂଖ୍ଯା ରହିଛି ୧୩୫ । ୨୫୨ ପ୍ରାର୍ଥୀଙ୍କ ନାମରେ ରହିଛି ଅପରାଧିକ ମାମଲା । ଏହି ୧୦୨ ଆସନରୁ ରେଡ ଆଲର୍ଟ ସିଟ୍ ସଂଖ୍ୟା ୪୨ । ଗୋଟିଏ ଆସନରୁ ଯଦି ଅପରାଧିକ ମାମଲା ଥିବା ୩ରୁ ଅଧିକ ପ୍ରାର୍ଥୀ ଲଢୁଥାନ୍ତି ତେବେ ତାହାକୁ ରେଡ ଆଲର୍ଟ ସିଟ୍ କୁହାଯାଏ ୧୭ ଜଣ ପ୍ରାର୍ଥୀଙ୍କ ନାମରେ ଲାଗିଛି ୩୦୨ ଧାରା ।
୧୯ ପ୍ରାର୍ଥୀଙ୍କ ବିରୋଧରେ ରହିଛି ହତ୍ଯା ଉଦ୍ୟମ ଅଭିଯୋଗ ଅର୍ଥାତ ସେମାନଙ୍କ ବିରୋଧରେ ଲାଗିଛି ଧାରା ୩୦୭ । ୧୮ ପ୍ରାର୍ଥୀଙ୍କ ବିରୋଧରେ ନାରୀ ନିର୍ଯାତନା ମାମଲା । ୪୫୦ ପ୍ରାର୍ଥୀ ଅଛନ୍ତି କୋଟିପତି । ୧୦ ପ୍ରାର୍ଥୀଙ୍କ ନାହିଁ କୌଣସି ସମ୍ପତ୍ତି । ୨୬ ପ୍ରାର୍ଥୀ ଅଛନ୍ତି ଅଶିକ୍ଷିତ । ୪ ପ୍ରାର୍ଥୀଙ୍କ ବୟସ ୮୦ରୁ ଅଧିକ ।
ଆଜିଠୁ ଦେଶରେ ମତଦାନ ଆରମ୍ଭ, ଭୋଟ ଦେବାକୁ ବାଲୁକା କଳାରେ ବାର୍ତ୍ତା ଦେଲେ ସୁଦର୍ଶନ ପଟ୍ଟନାୟକ
ପୁରୀ: ଆଜି ଦେଶର ପ୍ରଥମ ପର୍ଯ୍ୟାୟ ନିର୍ବାଚନ। ପୁରୀ ସ୍ୱର୍ଣ୍ଣାଭ ବେଳାଭୂମିରେ ଆନ୍ତର୍ଜାତୀୟ ବାଲୁକାଶିଳ୍ପୀ ପଦ୍ମଶ୍ରୀ ସୁଦର୍ଶନ ପଟ୍ଟନାୟକ ଏକ ଆକର୍ଷଣୀୟ ବାଲୁକାକଳା ନିର୍ମାଣ କରିଛନ୍ତି। ବାଲୁକା କଳା ମାଧ୍ଯମରେ ସଚେତନତା ବାର୍ତ୍ତା ଦିଆଯାଇଛି।
ସମସ୍ତେ ଗଣତନ୍ତ୍ରର ଏହି ମହାନ୍ ପର୍ବରେ ସାମିଲ୍ ହୋଇ ନିଜ ଅଧିକାର ତଥା ମତଦାନ କରିବାକୁ ସୁଦର୍ଶନ ତାଙ୍କ ବାଲୁକାକଳାରେ ବାର୍ତ୍ତା ଦେଇଛନ୍ତି। ବିଶେଷ କରି ଯୁବପିଢ଼ି ମାନଙ୍କୁ ଏହି ମତଦାନ ପ୍ରକ୍ରିୟାରେ ସାମିଲ ହେବାକୁ ସୁଦର୍ଶନ ଅନୁରୋଧ କରିଛନ୍ତି। ସୁଦର୍ଶନ ତାଙ୍କ ବାଲୁକାକଳାରେ ଦେଶ କା ଗର୍ବ ଏବଂ ଭୋଟ ଫର ସିଓର ବାର୍ତ୍ତା ଲେଖିଛନ୍ତି।
ଗେଷ୍ଟହାଉସରୁ ମିଳିଲା ଶିଳ୍ପପତିଙ୍କ ଶବ, କର୍ପୋରେଟ୍ ମିଟିଂ ପାଇଁ ଭୁବନେଶ୍ବର ଆସିଥିଲେ
ଭୁବନେଶ୍ବର: ଗେଷ୍ଟହାଉସରୁ ମିଳିଲା ଶିଳ୍ପପତିଙ୍କ ଗଳିତ ମୃତଦେହ । ଭୁବନେଶ୍ୱର ମୈତ୍ରିବିହାର ଥାନା ଅଞ୍ଚଳର ଏକ ଗେଷ୍ଟ ହାଉସରୁ ସନ୍ଦେହଜନକ ଅବସ୍ଥାରେ ବ୍ୟବସାୟୀଙ୍କ ମୃତଦେହ ଉଦ୍ଧାର ହୋଇଛି । ମୃତକ ହେଲେ ତପନ ପ୍ରସାଦ ଆଚାର୍ଯ୍ୟ । ଶୁଭମ ବାୟୋ ସିଏନଜି ପ୍ରାଇଭେଟ ଲିମିଟେଡର ମାଲିକ ଥିବା ଜଣାପଡିଛି । ତପନଙ୍କ ଘର ଫୁଲବାଣୀ ସଦର ଥାନା ଲେଙ୍ଗର ସାହି ଅଞ୍ଚଳରେ ।
ସେ ମଙ୍ଗଳବାର ଦିନ କର୍ପୋରେଟ ମିଟିଂ ପାଇଁ ଭୁବନେଶ୍ବର ଆସିଥିବା ବେଳେ ତାଙ୍କର ଗଳିତ ମୃତଦେହ ଉଦ୍ଧାର ଉଦ୍ଧାର କରାଯାଇଛି ।ଗତକାଲି ଅପରାହ୍ନରେ ମୈତ୍ରୀବିହାର ଥାନା ଗଜପତି ନଗରରେ ଥିବା ଶାନ୍ତି ଗେଷ୍ଟ ହାଉସରୁ ଶିଳ୍ପପତି ତପନ ପ୍ରସାଦଙ୍କ ମୃତଦେହ ଉଦ୍ଧାର କରାଯାଇଛି । ପୋଲିସ ମୃତଦେହ ବ୍ୟବଚ୍ଛେଦ ପାଇଁ କ୍ୟାପିଟାଲ ହସ୍ପିଟାଲ ପଠାଇଛି ।
ମଙ୍ଗଳବାର ଶାନ୍ତି ଗେଷ୍ଟ ହାଉସରେ ଚେକ୍ ଇନ୍ କରି ୨୦୨ ନମ୍ବର ରୁମରେ ରହୁଥିଲେ। ଗତକାଲି ତାଙ୍କ ମୃତଦେହ ମିଳିଥିବା ନେଇ ପୋଲିସ ପରିବାର ଲୋକଙ୍କୁ ଖବର ଦେଇଥିଲା । ତେବେ କେମିତି ଶିଳ୍ପପତିଙ୍କ ମୃତ୍ୟୁ ହେଲା, ଏହା ହତ୍ୟା ନା ଆଉ କିଛି କାରଣ ରହିଛି ସେନେଇ କିଛି ସ୍ପଷ୍ଟ ହୋଇନାହିଁ।
ପୋଲିସ ଅଧିକାରୀଙ୍କୁ ଭର୍ତ୍ତୃହରିଙ୍କ ଦୁର୍ବ୍ଯବହାର ଓ ମାଡ଼ମରା ମାମଲା, ୨୪ରେ ଶୁଣାଣି
କଟକ: ପୋଲିସ ଅଧିକାରୀଙ୍କୁ ଦୁର୍ବ୍ଯବହାର ଓ ମାଡ଼ମରା ମାମଲା । ବିଜେପି ନେତା ଭର୍ତ୍ତୃହରି ମହତାବଙ୍କ ବିରୋଧରେ ବିଚାରାଧୀନ ମାମଲାର ଶୁଣାଣି ହୋଇଛି । କଟକ ଜେଏମଏଫସି ଅଦାଲତରେ କରାଯାଇଛି ଶୁଣାଣି । ଏତଲାକାରୀ ପୋଲିସ ଅଧିକାରୀ ଅମିତାଭ ମହାପାତ୍ରଙ୍କୁ ଜେରା କରିଛନ୍ତି ପ୍ରତିପକ୍ଷ ଓକିଲ । ତେବେ ଜେରା ଅସମ୍ପୂର୍ଣ୍ଣ ରହିଥିବାରୁ ଆସନ୍ତା ୨୪ ତାରିଖରେ ମାମଲାର ପରବର୍ତ୍ତୀ ଶୁଣାଣି ପାଇଁ ଦିନ ଧାର୍ଯ୍ୟ ହୋଇଛି ।
୨୦୧୧ ମସିହା ଜାନୁଆରୀ ୨୩ ତାରିଖରେ ନେତାଜୀ ଜନ୍ମସ୍ଥାନ ସଂଗ୍ରହାଳୟରେ ଆୟୋଜିତ ନେତାଜୀ ଜୟନ୍ତୀ ଉତ୍ସବରେ ଏହି ଘଟଣା ଘଟିଥିଲା । ଭିଡ଼ ନିୟନ୍ତ୍ରଣ ଓ ଶାନ୍ତି ଶୃଙ୍ଖଳା ରକ୍ଷା ପାଇଁ ନିୟୋଜିତ ତତ୍କାଳୀନ ପୋଲିସ୍ ଏସଆଇ ତଥା ବର୍ତ୍ତମାନର ଏସିପି ଅମିତାଭ ମହାପାତ୍ର ଓ ଭର୍ତ୍ତୃହରି ମହାତାବଙ୍କ ମଧ୍ୟରେ ବିବାଦ ଲାଗିଥିଲା । ପୋଲିସ ଅଧିକାରୀଙ୍କୁ ଭର୍ତ୍ତୃହରି ଦୁର୍ବ୍ଯବହାର ସହ ମାଡ଼ ମାରିଥିବା ଅଭିଯୋଗ ହୋଇଥିଲା ।
ଏନେଇ ଦରଘା ବଜାର ଥାନାରେ ଅଭିଯୋଗ ପରେ ମାମଲା ରୁଜୁ କରି ତଦନ୍ତ କରିଥିଲା ପୋଲିସ । ୨୦୧୮ ମାର୍ଚ୍ଚ ୧୯ ତାରିଖରେ ଭର୍ତ୍ତୃହରିଙ୍କ ବିରୋଧରେ ପୋଲିସ ଚାର୍ଜସିଟ ଦାଖଲ କରିଥିଲା । କିଛି ଦିନ ତଳେ ମାମଲାରେ ଚାର୍ଜଫ୍ରେମ ହୋଇଥିଲା। ଜେରା ଅସମ୍ପୂର୍ଣ୍ଣ ଥିବାରୁ ଆସନ୍ତା ୨୪ ତାରିଖରେ ମାମଲାର ପରବର୍ତ୍ତୀ ଶୁଣାଣି ହେବ।
ଆଜି ପୁଣି ଥରେ ବରଗଡରୁ ୬ ଲକ୍ଷରୁ ଅଧିକ ଟଙ୍କା ଜବତ
ବରଗଡ଼: ବରଗଡରୁ ପୁଳାପୁଳା ଟଙ୍କା ଜବତ । ଗତକାଲି ୧୦ ଲକ୍ଷ ପରେ ଆଜି ପୁଣି ୬ ଲକ୍ଷରୁ ଅଧିକ ଟଙ୍କା ଜବତ ହୋଇଛି । ଡଭା ଛକରେ ଚେକିଂ ବେଳେ ୬ ଲକ୍ଷ ୫୨ ହଜାର ୮ ଶହ ଟଙ୍କା ଜବତ କରିଛି ଝାରବନ୍ଧ ଥାନା ପୋଲିସ । ବଲାଙ୍ଗୀରର ମିତ୍ରଭାନୁ ସାହୁ ଓ ମନୋଜ ସାହୁଙ୍କ ଠାରୁ ଏହି ଟଙ୍କା ଜବତ ହୋଇଛି ।
ଉଭୟଙ୍କ ଠାରୁ ଟଙ୍କା ସମ୍ପର୍କରେ ସ୍ପଷ୍ଟ ସୂଚନା ମିଳି ନଥିବା ବେଳେ ପୋଲିସ ତଦନ୍ତ ଜାରି ରଖିଛି । ଗତକାଲି ହଲଦିପାଲି ଠାରେ ପୋଲିସ୍ ପକ୍ଷରୁ ନାକା ଚାଲିଥିବା ବେଳେ ଏକ ପିକଅପ୍ ଭ୍ଯାନରୁ ୧୦ ଲକ୍ଷ ଟଙ୍କା ଜବତ ହୋଇଥିଲା ।
ବରପାଲିରୁ ସମ୍ୱଲପୁର ଯାଉଥିବା ବେଳେ ହଳଦୀପାଲି ଛକ ଠାରେ ପୋଲିସ ଭ୍ଯାନ ଯାଞ୍ଚ କରିବା ସମୟରେ ଟଙ୍କା ଜବତ କରିଥିଲା । ତେବେ ଏତେ ଟଙ୍କା କୋଉଠୁ ଆସୁଛି, ଆଉ କେଉଁ ଉଦ୍ଦେଶ୍ଯରେ ଆସୁଛି ସେନେଇ ସସପେନ୍ସ ଲାଗି ରହିଛି । ତଦନ୍ତ ପରେ ସ୍ପଷ୍ଟ ସୂଚନା ମିଳିପାରିବ ବୋଲି ପୋଲିସ କହିଛି ।
ଭୋଟ ଦେଲେ ବିଶ୍ବର ସବୁଠାରୁ କମ୍ ଉଚ୍ଚତା ବିଶିଷ୍ଟ ମହିଳା ଜ୍ୟୋତି ଆମଗେ
ନାଗପୁର: ଭୋଟ ଦେଲେ ବିଶ୍ବର ସବୁଠାରୁ କମ୍ ଉଚ୍ଚତା ବିଶିଷ୍ଟ ମହିଳା ତଥା ଗିନିଜ ଓ୍ବାଲ୍ଡ ରେକର୍ଡଧାରୀ ଜ୍ୟୋତି ଆମଗେ । ଶୁକ୍ରବାର ସକାଳୁ ମହାରାଷ୍ଟ୍ର ନାଗପୁରର ଏକ ମତଦାନ କେନ୍ଦ୍ରରେ ସେ ଭୋଟ ଦେଇଛନ୍ତି । ସରକାରୀ ନିୟମ ଅନୁଯାୟୀ ନିଜର ପରିଚୟ ପତ୍ର ଧରି ବୁଥ ନିକଟରେ ପହଞ୍ଚିଯାଇଥିଲେ ଜ୍ୟୋତି ।
ସାଧାରଣ ଭୋଟରଙ୍କ ପରି ସେ ମଧ୍ୟ ଧାଡ଼ିରେ ଠିଆ ହୋଇ ଅପେକ୍ଷା କରିଥିଲେ । ତାଙ୍କ କ୍ରମାଙ୍କ ଆସିବା ପରେ ସମସ୍ତ ଭୋଟିଂ ପ୍ରକ୍ରିୟା ପୂରଣ କରି ମତଦାନ କରିଥିଲେ । ପରେ ପରେ ବୁଥ ବାହାରକୁ ଆସି କାଳିଲଗା ଆଙ୍ଗୁଠି ପ୍ରଦର୍ଶନ କରିଥିଲେ । ତେବେ ଏଠାରେ କହିରଖୁ ଯେ ପ୍ରଥମ ପର୍ଯ୍ୟାୟ ନିର୍ବାଚନ ପାଇଁ ମହାରାଷ୍ଟ୍ରର ରାମଟେକ, ନାଗପୁର, ଭଣ୍ଡାରା- ଗୋଣ୍ଡିଆ, ଗାଡଚିରୋଲି – ଚିମୁର ଓ ଚନ୍ଦ୍ରପୁରର ପାଞ୍ଚଟି ଆସନ ପାଇଁ ମତଦାନ ହେଉଛି ।
NH ୫୫ର ଦୂରାବସ୍ଥା ଯୋଗୁଁ ଲୋକଙ୍କୁ ମିଳୁନି ଲକ୍ଷ୍ମୀ ବସର ଉପକାରିତା
ଭୁବନେଶ୍ବର: ଏନଏଚ-୫୫ର ଦୂରାବସ୍ଥା ଯୋଗୁଁ ଲୋକଙ୍କୁ ମିଳୁନି ଲକ୍ଷ୍ମୀ ବସର ଉପକାରିତା । ସାରା ରାଜ୍ଯ ଲକ୍ଷ୍ମୀ ବସର ସୁଫଳତା ପାଉଥିବାବେଳେ ସମ୍ବଲପୁର, ଢେଙ୍କାନାଳ ଓ ଅନୁଗୁଳ ଜିଲ୍ଲାର ଲୋକମାନେ ଏହି ସେବା ଭଲରେ ପାଇପାରୁନାହାନ୍ତି । ଅତ୍ଯାଧୁନିକ ଏସି ବିଶିଷ୍ଟ ଲକ୍ଷ୍ମୀ ବସରେ ବି ଆରାମଦାୟକ ଯାତ୍ରା କରିପାରୁନାହାନ୍ତି ଜନସାଧାରଣ । ଏନେଇ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ କରିଛି ବିଜେଡି ।
ବିଜେଡି ରାଷ୍ଟ୍ରୀୟ ମୁଖପାତ୍ର ସସ୍ମିତ ପାତ୍ର କହିଛନ୍ତି, ଗାଁରୁ ବ୍ଲକ ଓ ବ୍ଲକରୁ ଜିଲ୍ଲାକୁ ସଂଯୋଗ କରିବାରେ ଭାରତର ସବୁଠୁ ଭଲ ଯୋଜନା ହେଉଛି ଲକ୍ଷ୍ମୀ । ଲକ୍ଷ୍ମୀ ବସ ଦ୍ବାରା ରାଜ୍ଯର ଶତପ୍ରତିଶତ ଗାଁ ଉପକୃତ ହୋଇଛି । ଏହି ଯୋଜନାରେ ୧୬୦୦ରୁ ଅଧିକ ବସ ଚାଲୁଛି । ୧୨୨ଟି ଜଗନ୍ନାଥ ଏକ୍ସପ୍ରେସ ଶ୍ରୀକ୍ଷେତ୍ରକୁ ଯାଉଛି । ୬୨ ହଜାରରୁ ଅଧିକ ଶିକ୍ଷାନୁଷ୍ଠାନ ଯୋଡ଼ିହେବା ସହ ୩୨ ହଜାର ନୂଆ ନିଯୁକ୍ତି ସୁଯୋଗ ସୃଷ୍ଟି ହୋଇଛି ।
ସାରା ଓଡ଼ିଶାରେ ଗାଁ ଗୁଡ଼ିକରେ ୯ ହଜାରରୁ ଅଧିକ ବସ ଷ୍ଟାଣ୍ଡ ନିର୍ମାଣ ହୋଇଛି । ଲକ୍ଷ୍ମୀ ବସ ଗଡ଼ିବା ଫଳରେ ମାଆ, ବରିଷ୍ଠ ନାଗରିକ ବେଶ୍ ଉପକୃତ ହେଉଛନ୍ତି । ମହିଳା, ଛାତ୍ରଛାତ୍ରୀ, ଦିବ୍ଯାଙ୍ଗମାନେ ମାତ୍ର ୫ ଟଙ୍କାରେ ଯାତାୟାତ କରୁଛନ୍ତି । ଜଗନ୍ନାଥ ଏକ୍ସପ୍ରେସ ବସରେ ବି ମହିଳାଙ୍କ ପାଇଁ ୫୦ ପ୍ରତିଶତ ରିହାତି ଦିଆଯାଉଛି । ଲକ୍ଷ୍ମୀ ବସକୁ ନେଇ ସମସ୍ତେ ଖୁସି ରହିଥିବାବେଳେ ସମ୍ବଲପୁର, ଢେଙ୍କାନାଳ ଓ ଅନୁଗୁଳରେ ଖୁସି ପାଣିଚିଆ ହୋଇଯାଉଛି । କାରଣ ୫୫ ନମ୍ବର ଜାତୀୟ ରାଜପଥରେ ଯିବା ସମୟରେ ଲୋକମାନେ ଅସୁବିଧା ଭୋଗୁଛନ୍ତି ।
ଭଲ ବସ ହୋଇଥିଲେ ବି ମରଣଯନ୍ତା ରାସ୍ତା ଯୋଗୁ ଆରାମଦାୟର ଯାତ୍ରା ସମ୍ଭବ ହୋଇପାରୁନି । ସବୁବେଳେ ଦୁର୍ଘଟଣା ଭୟ ମଧ୍ଯ ଲାଗି ରହୁଛି । ଏସବୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ବାବୁଙ୍କ ବିଫଳତା ଯୋଗୁ ହେଉଛି ବୋଲି କହି ସମାଲୋଚନା କରିଛନ୍ତି ସସ୍ମିତ । ୧୦ ବର୍ଷ ହେଲା କେନ୍ଦ୍ରମନ୍ତ୍ରୀ ଥାଇ ମଧ୍ଯ ସାମାନ୍ଯ ରାସ୍ତାକାମ କରିପାରିନାହାନ୍ତି ଧର୍ମେନ୍ଦ୍ର । ତାଙ୍କ ଉପେକ୍ଷା କାରଣରୁ ଲୋକମାନେ ଆଜି ସମସ୍ଯା ଭୋଗୁଛନ୍ତି ।
ଭୋଟର ଆଇଡି ହଜିଯାଇଛି କି ? ଏହି ୧୧ଟି ପରିଚୟ ପତ୍ର ଥିଲେ ଦେଇପାରିବେ ଭୋଟ
ନୂଆଦିଲ୍ଲୀ: ଦେଶରେ ପ୍ରଥମ ପର୍ଯ୍ୟାୟରେ ୧୦୨ ଆସନରେ ମତଦାନ ଚାଲିଛି । ଆଜି ୨୧ ରାଜ୍ୟ ଓ କେନ୍ଦ୍ରଶାସିତ ଅଞ୍ଚଳରେ ମତଦାନ ସାବ୍ୟସ୍ତ କରୁଛନ୍ତି ମତଦାତା । ଏଭଳି ସ୍ଥିତିରେ ଯଦି ଆପଣଙ୍କ ଭୋଟର ଆଇଡି କେଉଁଠି ହଜିଯାଇଛି ବା ଆପଣ ପାଉନାହାନ୍ତି ତେବେ ଚିନ୍ତା କରନ୍ତୁ ନାହିଁ । ନିର୍ବାଚନ ଆୟୋଗ ଆପଣଙ୍କ ପାଇଁ ୧୧ ପ୍ରକାରର ବିକଳ୍ପ ବ୍ୟବସ୍ଥା କରିଛନ୍ତି । ଏହି ବିକଳ୍ପ ସବୁ ନିର୍ବାଚନ ଆୟୋଗଙ୍କ ୱେବସାଇଟରେ ଉପଲବ୍ଧ ରହିଛି । ଯଦି ଏହି ଦସ୍ତାବିଜ ସହ ଆପଣ ପୋଲିଂ ବୁଥକୁ ଯିବେ ତେବେ ମତଦାନ କରିବା ପାଇଁ ଆପଣଙ୍କୁ କେହି ଅଟକାଇ ପାରିବେ ନାହିଁ ।
ଆପଣ ନିଜ ଆଧାର କାର୍ଡକୁ ଭୋଟର ଆଇଡି ରୂପେ ବ୍ୟବହାର କରିପାରିବେ । ଭୋଟର ଆଇଡି ନଥିଲେ ଆପଣ କେନ୍ଦ୍ର ବା ରାଜ୍ୟ ସରକାରଙ୍କ ୧୧ ପ୍ରକାର ଫଟୋ ଆଇଡି ଦସ୍ତାବିଜ ମଧ୍ୟରୁ କୌଣସି ଗୋଟିଏ କାର୍ଡ ଦ୍ବାରା ଭୋଟ ଦେଇପାରିବେ । ଆପଣଙ୍କ ପାଖରେ ଯଦି ଆଧାର କାର୍ଡ, ପାସପୋର୍ଟ, ଡ୍ରାଇଭିଂ ଲାଇସେନ୍ସ,, କେନ୍ଦ୍ର ବା ରାଜ୍ୟ ସରକାରଙ୍କ ପରିଚୟ ପତ୍ର, ପିଏସୟୁ କମ୍ପାନୀ ଦ୍ବାରା ଜାରି ଆଇ କାର୍ଡ, ବ୍ୟାଙ୍କ ପୋଷ୍ଟ ଅଫିସରୁ ଜାରି ଫଟୋଯୁକ୍ତ ପାସବୁକ, ଫଟୋ ସହ ପେନସନ ଡକ୍ୟୁମେଣ୍ଟ, ପ୍ୟାନ କାର୍ଡ, ଏନପିଆର ଜରିଆରେ RGIରୁ ଜାରି ସ୍ମାର୍ଟକାର୍ଡ, ମନରେଗା ଜବ କାର୍ଡ, କେନ୍ଦ୍ର ସରକାରଙ୍କ ଯୋଜନାରେ ଜାରିସ୍ବାସ୍ଥ୍ୟବୀମା ସ୍ମାର୍ଟ କାର୍ଡ ଓ ସାଂସଦ ବିଧାୟକ ଓ ଏମଏଲସିଙ୍କ ପାଇଁ ଜାରି ଅଧିକାରିକ ଆଇକାର୍ଡ ଥିଲେ ଆପଣ ଭୋଟ ଦେଇପାରିବେ ।
ଆପଣଙ୍କ ପାଖରେ ଭୋଟର ଆଇଡି ଥିଲେ କେବଳ ଆପଣ ଭୋଟ ଦେବା ପାଇଁ ଯୋଗ୍ୟ ତାହା ନୁହେଁ । ଭୋଟ ଦେବା ପାଇଁ ଆପଣଙ୍କ ନାମ ମତଦାତା ତାଲିକାରେ ରହିବା ଆବଶ୍ୟକ । ଦି ଆପଣଙ୍କ ନାମ ମତଦାତା ତାଲିକାରେ ନାହିଁ ତେବେ ନିର୍ବାଚନ ଆୟୋଗଙ୍କ ନିର୍ଦ୍ଦେଶ ମୁତାବକ ୧୧ଟି ପରିଚୟ ପତ୍ର ମଧ୍ୟରୁ ଆପଣଙ୍କ ପାଖରେ କୌଣସି ବି କାର୍ଡ ଥିଲେ ଭୋଟ ଦେବାକୁ ଅନୁମତି ମିଳିବ ନାହିଁ ।
ସକାଳ ସାଢେ ୮ଟା ସୁଦ୍ଧା ତାଳଚେରରେ ସର୍ବାଧିକ ତାପମାତ୍ରା ରେକର୍ଡ
ଭୁବନେଶ୍ବର: ସାରା ରାଜ୍ଯରେ ଅସମ୍ଭାଳ ତାତି। ଆକାଶରୁ ବର୍ଷୁଛି ନିଆଁ । ପ୍ରବଳ ଗ୍ରୀଷ୍ମ ପ୍ରବାହରେ ଅସ୍ତବ୍ଯସ୍ତ ଜନଜୀବନ । ମୁଣ୍ଡ ଫଟା ଖରା ସାଙ୍ଗକୁ ଅସହ୍ଯ ଗୁଳୁଗୁଳି। ଆଜି ସକାଳ ୮ଟା ୩୦ ସୁଦ୍ଧା ରେକର୍ଡ ତାପମାତ୍ରା। ତାଳଚେରରେ 35 ଡିଗ୍ରୀ , ଭବାନୀପାଟଣାରେ 34.5ଡିଗ୍ରୀ, ଟିଟିଲାଗଡ଼ରେ 33.4ଡିଗ୍ରୀ, ଝାରସୁଗୁଡାରେ 33ଡିଗ୍ରୀ, ବାରିପଦାରେ 33 ଡିଗ୍ରୀ, ବାଲେଶ୍ୱରରେ 32.2ଡିଗ୍ରୀ, ଭୁବନେଶ୍ୱରରେ 31.8ଡିଗ୍ରୀ, ଚାନ୍ଦବାଲିରେ 31.6ଡିଗ୍ରୀ, କେନ୍ଦୁଝରରେ 31.6ଡିଗ୍ରୀ, ସମ୍ବଲପୁରରେ 31.6ଡିଗ୍ରୀ, ପୁରୀରେ 31ଡିଗ୍ରୀ, ବୌଦ୍ଧରେ 31ଡିଗ୍ରୀ, ରାଉରକେଲାରେ 30.8ଡିଗ୍ରୀ, ପାରାଦୀପରେ 30.6ଡିଗ୍ରୀ ତାପମାତ୍ରା ରହିଛି।
ଖରାକୁ ଦୃଷ୍ଟିରେ ରଖି ପ୍ରଶାସନ ଓ ଘରୋଇ ଅନୁଷ୍ଠାନ ପକ୍ଷରୁ ବିଭିନ୍ନ ସ୍ଥାନରେ ଖୋଲିଛି ଜଳଛତ୍ର ଓ ସେବା କେନ୍ଦ୍ର। ୧୧ଟା ପରେ ବେପାର ନଥିବାରୁ ଦୋକାନ ସବୁ ବନ୍ଦ ହୋଇଯାଉଛି। ତେବେ ଥଣ୍ଡା ପାନୀୟ ଦୋକାନରେ ଲାଗୁଛି ଭିଡ଼।