ନୂଆଦିଲ୍ଲୀ: ଆସନ୍ତାକାଲି ବାଜିବ ନିର୍ବାଚନ ବିଗୁଲ। ଅଷ୍ଟାଦଶ ଲୋକସଭା ଓ ୪ ରାଜ୍ଯର ବିଧାନସଭା ନିର୍ବାଚନ ଲାଗି ଘୋଷଣା ହେବ ତାରିଖ। ୭ କିମ୍ବା ୮ ପର୍ଯ୍ୟାୟରେ ନିର୍ବାଚନ କରିବାକୁ ଘୋଷଣା କରିପାରନ୍ତି ଇସିଆଇ। ୫୪୩ ଲୋକସଭା ଆସନ ଏବଂ ଓଡ଼ିଶା, ଆନ୍ଧ୍ରପ୍ରଦେଶ, ଅରୁଣାଚଳ ପ୍ରଦେଶ ଓ ସିକ୍କିମ ବିଧାନସଭାର ମୋଟ ୪୧୪ ଆସନ ଲାଗି ଘୋଷଣା ହେବ ତାରିଖ। ନିର୍ବାଚନ ତାରିଖ ଘୋଷଣା କରିବେ ମୁଖ୍ଯ ନିର୍ବାଚନ କମିଶନର ରାଜୀବ କୁମାର, ଦୁଇ କମିଶନର ଜ୍ଞାନେଶ କୁମାର ଓ ସୁଖବୀର ସିଂ ସାନ୍ଧୁ।

ଏହା ସହ ଦେଶରେ ଲାଗୁହେବ ନିର୍ବାଚନ ଆଚରଣ ବିଧି। ଆସନ୍ତାକାଲି ବିଜ୍ଞପ୍ତି ପ୍ରକାଶ ପାଇବା ସହ ନାମାଙ୍କନ ଦାଖଲ, ପ୍ରାର୍ଥୀପତ୍ର ପ୍ରତ୍ଯାହାର ଠାରୁ ଆରମ୍ଭ କରି ଚୁଡ଼ାନ୍ତ ପ୍ରାର୍ଥୀ ତାଲିକା ସହ ବିଭିନ୍ନ କଟକଣା ମଧ୍ଯ ଲଗାଇବେ ନିର୍ବାଚନ କମିଶନ। ୨୦୧୯ରେ ୭ ପର୍ଯ୍ୟାୟରେ ଅର୍ଥାତ ୧୧, ୧୮, ୨୩, ୨୯ ଏପ୍ରିଲ ଏବଂ ୬, ୧୨ ଓ ୧୯ ମେରେ ହୋଇଥିଲା ନିର୍ବାଚନ। ୨୦୧୯ ମାର୍ଚ୍ଚ ୧୦ରେ ନିର୍ବାଚନ ତାରିଖ ଘୋଷଣା ହୋଇଥିବାବେଳେ ୨୩ମେ’ ରେ ଫଳାଫଳ ଘୋଷିତ ହୋଇଥିଲା ।

ଚଳିତ ବର୍ଷ ରାଜ୍ଯରେ ହେବ ସପ୍ତଦଶ ବିଧାନସଭା ନିର୍ବାଚନ। ୨୧ଟି ଲୋକସଭା ସହ ୧୪୭ ବିଧାନସଭାରେ ଭୋଟ୍ ଲାଗି ଘୋଷଣା ହେବ ତାରିଖ। ଗତ ୨୦୧୯ରେ ଚାରି ପର୍ଯ୍ୟାୟ ଅର୍ଥାତ ୧୧ ଏପ୍ରିଲରେ ୪ଟି, ୧୮ ଏପ୍ରିଲରେ ୫ଟି, ୨୩ ଏପ୍ରିଲରେ ୬ଟି ଓ ୨୯ ଏପ୍ରିଲରେ ୬ଟି ଲୋକସଭା ଆସନରେ ହୋଇଥିଲା ଭୋଟ। ସେହିପରି ୧୧ ଏପ୍ରିଲରେ ୨୮, ୧୮ ଏପ୍ରିଲରେ ୩୫, ୨୩ ଏପ୍ରିଲରେ ୪୨ ଓ ୨୯ ଏପ୍ରିଲରେ ୪୧ଟି ବିଧାନସଭା ଆସନ ଲାଗି ହୋଇଥିଲା ଭୋଟ। ଓଡ଼ିଶାରେ ୩ କୋଟି ୩୨ ଲକ୍ଷ ଭୋଟର ଥିବା ବେଳେ ପୁରୁଷ ଭୋଟରଙ୍କ ସଂଖ୍ୟା ୧ କୋଟି ୬୮ ଲକ୍ଷ ଏବଂ ମହିଳା ଭୋଟରଙ୍କ ସଂଖ୍ୟା ୧ କୋଟି ୬୪ ଲକ୍ଷ। ରାଜ୍ୟରେ ୩ ହଜାର ୩୮୦ ତୃତୀୟ ଲିଙ୍ଗୀ, ୬ ଲକ୍ଷ ୮୦ ହଜାର ବରିଷ୍ଠ ନାଗରିକ ଥିବାବେଳେ ୧୦୦ ବର୍ଷରୁ ଊର୍ଦ୍ଧ୍ୱ ବୟସ୍କଙ୍କ ସଂଖ୍ୟା ୯ ହଜାର ୬୦। ୧୮ରୁ ୧୯ ବର୍ଷ ବୟସ୍କ ଭୋଟରଙ୍କ ସଂଖ୍ଯା ୭ଲକ୍ଷ ୫୦ ହଜାର ଥିବାବେଳେ ୧୮ରୁ ୧୯ ବର୍ଷ ଭୋଟରଙ୍କ ମଧ୍ଯରେ ମହିଳାଙ୍କ ସଂଖ୍ଯା ୩ ଲକ୍ଷ ୪୦ ହଜାର। ୪ ଲକ୍ଷ ୭୦ ହଜାର ଯୁବକ ପ୍ରଥମ ଥର ପାଇଁ ମତଦାନ କରିବେ। ରାଜ୍ଯରେ ବୁଥ ସଂଖ୍ୟା ୩୭ ହଜାର ୮୦୯ ରହିବ। ୨୨ହଜାର ୬୮୫ ବୁଥରେ ୱେବକାଷ୍ଟିଂ କରାଯିବ। ୩୦୦ ବୁଥକୁ ପରିଚାଳନା କରିବେ ଭିନ୍ନକ୍ଷମ। ସେହିପରି ୭୦୦ ବୁଥକୁ ପରିଚାଳନା କରିବେ ଯୁବକ। ଆଦର୍ଶ ବୁଥ ସଂଖ୍ୟା ରହିବ ୭୦୦। ରାଜ୍ୟର ସବୁଠୁ ଦୁର୍ଗମ ଅଞ୍ଚଳରେ ବି ବୁଥ ପ୍ରତିଷ୍ଠା କରାଯିବ।

ରାଜ୍ଯରେ ବର୍ତ୍ତମାନ ସୁଦ୍ଧା ୧୬ଥର ବିଧାନସଭା ନିର୍ବାଚନ ହୋଇଛି। ୧୯୫୧-୫୨, ୧୯୫୭, ୧୯୬୧, ୧୯୬୭, ୧୯୭୧, ୧୯୭୪, ୧୯୭୭, ୧୯୮୦, ୧୯୮୫, ୧୯୯୦, ୧୯୯୫, ୨୦୦୦, ୨୦୦୪, ୨୦୦୯, ୨୦୧୪ ଓ ଶେଷଥର ଲାଗି ୨୦୧୯ରେ ହୋଇଥିଲା ବିଧାନସଭା ନିର୍ବାଚନ।

ଜୟପୁର: ବଢିଲାଣି ତାତି । ଗ୍ରୀଷ୍ମ ଋତୁ ଆସିଲେ ଜଙ୍ଗଲ ନିଆଁ ସୃଷ୍ଟି କରେ ଆତଙ୍କ । କିନ୍ତୁ ଏହାର ସୁରକ୍ଷା ଦେବାକୁ ଆଗେଇ ଆସିଛନ୍ତି ମହିଳା । ଗତ କିଛିବର୍ଷ ହେଲା ଓଡିଶାର ବିଭିନ୍ନ ଜଙ୍ଗଲରେ ନିଆଁ ଲାଗୁଥିବା ଖବର ଆସୁଥିଲେ ସୁଦ୍ଧା କୋରାପୁଟ ଜିଲ୍ଲାରେ ଏହି ଆଶଂକା କମ ରହିଛି । କାରଣ ଏଠାରେ ଗ୍ରାମ ଜଙ୍ଗଲ ସୁରକ୍ଷା ସମିତି ଓ ଏସଏଚଜି ଗ୍ରୁପ ମିଳିତ ଉଦ୍ଯମ ଯୋଗୁଁ ଏପରି ଜଙ୍ଗଲକୁ ମିଳୁଛି ସୁରକ୍ଷା ।

ଜଙ୍ଗଲ ସୁରକ୍ଷାରେ ଲାଗିଛନ୍ତି ମହିଳା । ଗଛ ବଞ୍ଚାଇବା ସହ ଅଗ୍ନିକାଣ୍ଡ ରୋକୁଛନ୍ତି ମହିଳା । ଗ୍ରାମ ଜଙ୍ଗଲ ସୁରକ୍ଷା ସମିତି ସହଯୋଗରେ ମହିଳାମାନେ ସଜାଗ ପ୍ରହରୀ ସାଜିଛନ୍ତି । ପ୍ରାକୃତିକ ସମ୍ପଦ ଓ ଜଙ୍ଗଲ ଭରା କୋରାପୁଟ ଜିଲ୍ଲା । ଏହି ଜିଲ୍ଲାରେ ୭୦ ଭାଗ ଲୋକ ଜଙ୍ଗଲ ଉପରେ ନିର୍ଭର କରନ୍ତି । ହେଲେ ଖରାଦିନ ଆସିଲେ ଜଙ୍ଗଲ ନିଆଁ ଆତଙ୍କ ସୃଷ୍ଟି କରେ । ସେଥିପାଇଁ ଜଙ୍ଗଲ ସୁରକ୍ଷା ଦିଗରେ ମହିଳାମାନେ ଆଗକୁ ଆସିଛନ୍ତି । ଗ୍ରାମ୍ଯ ଜଙ୍ଗଲ ସୁରକ୍ଷା ସମିତି ମାଧ୍ୟମରେ ଜଙ୍ଗଲକୁ ସୁରକ୍ଷା ଦେଉଛନ୍ତି ବିଭିନ୍ନ ସ୍ବୟଂ ସହାୟକ ଗୋଷ୍ଠୀ । ପ୍ରତିବର୍ଷ ବନ ବିଭାଗ ପକ୍ଷରୁ ଏସଏଚଜି ଗୃପ ଓ ଗ୍ରାମ୍ଯ ଜଙ୍ଗଲ ସୁରକ୍ଷା ସମିତିର ସଦସ୍ଯ ମାନଙ୍କୁ ତାଲିମ ଦିଆଯାଉଛି ।

କୋରାପୁଟ ଜିଲ୍ଲା ବନ ବିଭାଗ ଏହି କାମରେ ମହିଳା ମାନଙ୍କୁ ନିଯୋଜିତ କରି ଜଙ୍ଗଲକୁ ବଞ୍ଚାଇବାରେ ଅନେକାଂଶରେ ସକ୍ଷମ ହୋଇଛନ୍ତି । ଏଥିପାଇଁ ତାଲିମ ସହ ସମସ୍ତ ସହଯୋଗ ଯୋଗାଇ ଦିଆଯାଉଥିବା କହିଛନ୍ତି ଜିଲ୍ଲା ବନଖଣ୍ଡ ଅଧିକାରୀ । ଆଧୁନିକ ଜ୍ଞାନ କୌଶଳ ଦ୍ବାରା କୋରାପୁଟ ଜିଲ୍ଲାର ଜଙ୍ଗଲକୁ ସୁରକ୍ଷା ଦିଆଯାଉଛି । କିଛି ଲୋକ ଜଙ୍ଗଲରେ ନିଆଁ ଲଗାଇ ପଶୁ ଶିକାର କରିବା ସହିତ ଜାଳେଣୀ ପାଇଁ ନିଆଁ ଲଗାଇଦେଉଥିବା ଅଭିଯୋଗ ହୋଇଛି ।

ଗଛକୁ ସୁରକ୍ଷା ଦେବା ସହ ଜଙ୍ଗଲ ଲୁଟେରାଙ୍କ କବଳରୁ ସୁରକ୍ଷା ଦେଉଛନ୍ତି ସ୍ବୟଂ ସହାୟକ ଗୋଷ୍ଠୀ । ଏଥିପାଇଁ ବନ ବିଭାଗ ପକ୍ଷରୁ ସେମାନଙ୍କୁ ପୁରସ୍କୃତ କରାଯାଉଛି ।

କଟକ: ସ୍ୱାସ୍ଥ୍ୟ ସେବା କ୍ଷେତ୍ରରେ ରେକର୍ଡ କରୁଛି SCB ମେଡିକାଲ କଲେଜ ଆଣ୍ଡ ହସ୍ପିଟାଲ । କ୍ଲବ ଫୁଟ ବା ବକ୍ରପାଦ ଚିକିତ୍ସା କ୍ଷେତ୍ରରେ ମିଳିଛି ଅଭୁତପୂର୍ବ ସଫଳତା । ରାଜ୍ଯ ସରକାରଙ୍କ ସହଯୋଗରୁ ବର୍ଷକ ରେ ୮୦  ପ୍ରତିଶତ ବକ୍ରପାଦ ଶିଶୁ ସୁସ୍ଥ ହୋଇ ସାଧାରଣ ଜୀବନ ବିତାଉଛନ୍ତି । ସଚତନତା ଅଭାବରୁ ଶିଶୁଙ୍କ ନିକଟରେ ଏହି ରୋଗ ଦେଖାଦେଉଥିବାରୁ ମାର୍ଚ୍ଚକୁ ସଚେତନତା ମାସ ଭାବେ ପାଳନ କରୁଛି ଅର୍ଥୋପେଡିକ ବିଭାଗ ।

କ୍ଲବ ଫୁଟ୍ ଅର୍ଥାତ ବକ୍ରପାଦ । ଗତ ଏକ ବର୍ଷ ଭିତରେ ୮୦ ପ୍ରତିଶତ ସୁସ୍ଥ ହେଲେଣି । ରାଜ୍ଯ ସରକାରଙ୍କ ସହଯୋଗରୁ ସଫଳ ହେଉଛି ଏସସିବି । ନୂଆ ଜୀବନ ପାଉଛନ୍ତି  ଶିଶୁ । ସଚେତନତା ମାସ ପାଳନ କରୁଛି ଅର୍ଥୋପେଡିକ ବିଭାଗ । ସଚେତନତା ଅଭାବରୁ ଓ ଚିକିତ୍ସାରେ ବିଳମ୍ବ ଯୋଗୁଁ ଶିଶୁମାନେ ଏପରି ରୋଗରେ ଆକ୍ରାନ୍ତ ହୁଅନ୍ତି । ବୟସ ଅତିକ୍ରମ କରିଗଲେ ସାରା ଜୀବନ ଭୋଗିବାକୁ ହୁଏ ଯନ୍ତ୍ରଣା । ତେବେ ରାଜ୍ଯ ସରକାରଙ୍କ ସହଯୋଗରେ ଏଥିରେ ସଫଳତା ହାସଲ କରିଛି କଟକ ଏସସିବି ମେଡିକାଲ । ଏହାର ଚିକିତ୍ସା ପାଇଁ ୨୫ ହଜାରରୁ ଏକଲକ୍ଷ ଟଙ୍କା ଖର୍ଚ୍ଚ ହେଉଥିବାବେଳେ ଏସସିବି ମାଗଣାରେ ମିଳୁଛି ସମସ୍ତ ସୁବିଧା । ରାଷ୍ଟ୍ରୀୟ ବାଲ ସ୍ୱାସ୍ଥ୍ୟ କାର୍ଯ୍ୟକ୍ରମ ଏବଂ ଓଡ଼ିଶା ସରକାରଙ୍କ BSKY ସହାୟତାରେ ମାଗଣାରେ ଚିକିତ୍ସା ପାଇ ସୁସ୍ଥ ହେଉଛନ୍ତି ଶିଶୁ।

ବକ୍ରପାଦ ଏକ ଜନ୍ମଗତ ଶାରୀରିକ ସମସ୍ୟା । ଗୋଡ଼ର ଅସ୍ଥିକୁ ସଂଯୋଗ କରିଥିବା ମାଂସପେଶୀରେ କୋଷ କମ ରହିଲେ ଏଭଳି ସମସ୍ୟା ଦେଖାଦିଏ । କିଛି ଶିଶୁଙ୍କ ଗୋଟିଏ ଗୋଡ଼ ବଙ୍କା ଥିବା ବେଳେ ଅନ୍ୟ କିଛି ଶିଶୁଙ୍କର ଉଭୟ ଗୋଡ଼ ବଙ୍କା ରହିଥାଏ । ଭାରତରେ ୫୦ ହଜାର ଶିଶୁଙ୍କ ନିକଟରେ ଏପରି ଲକ୍ଷଣ ଦେଖିବାକୁ ମିଳିଥାଏ । ଏଥିପାଇଁ ରାଜ୍ୟର ପ୍ରତ୍ୟେକ ଜିଲ୍ଲାରେ DIC ରହିଛି । ନବଜାତ ଶିଶୁଙ୍କ ଏହି ଲକ୍ଷଣ ଦେଖାଦେଲେ ସେହି କେନ୍ଦ୍ରରେ ଶିଶୁର ସ୍ୱାସ୍ଥ୍ୟ ପରୀକ୍ଷା କରାଯାଏ । ଡାକ୍ତରଙ୍କ ପରାମର୍ଶ ପରେ ତାଙ୍କୁ ଏସସିବି ଅଣାଯାଏ । ଅସ୍ଥିଶଲ୍ୟ ବିଭଗରେ ସେମାନଙ୍କର ଚିକିତ୍ସା କରାଯାଏ ।

ଏହି ଚିକିତ୍ସା ସମୟ ସାପେକ୍ଷ ହେଲେ ରୋଗ ଆରୋଗ୍ୟସାଧ୍ୟ । ସଚତନତା ଅଭାବରୁ ଶିଶୁଙ୍କ ନିକଟରେ ଏହି ରୋଗ ଦେଖାଦେଉଥିବାରୁ ମାର୍ଚ୍ଚକୁ ସଚେତନତା ମାସ ଭାବେ ପାଳନ କରୁଛି ଅର୍ଥୋପେଡିକ ବିଭାଗ ।

ପୁରୀ: ପୁରୀ ନିମାପଡା ନୂଆପାଟଣା ଗାଁର ବା ରଞ୍ଜନାବାଳା ପାଳ। ପରିବାର କହିଲେ ଦୁଇପୁଅ ଆଉ ସ୍ୱାମୀ ରବିନାରାୟଣ ପାଳ। ଦିନ ଥିଲା ସ୍ୱାମୀ ରୋଜଗାରରେ ଚଳୁଥିଲା ଘର। ଦଇବର ଇଚ୍ଛା କଣ ଥିଲା କେଜାଣି, ଅକସ୍ମାତ ମାଡି ବସିଲା ଅଜଣା ରୋଗ। ଅକ୍ରମଣ୍ୟ ହେଇଗଲେ ରବିନାରାୟଣ। ସେଇଦିନ ଠୁ ସତେ ଯେମିତି ପରିବାରର ହସ ଖୁସି କୁଆଡେ ହଜିଯାଇଛି। ସ୍ବାମୀ ଅସୁସ୍ଥ ହେବା ପରେ ତାଙ୍କ ଚିକିତ୍ସା ତ ଦୂରର କଥା ଦୁଇ ଓଳି ଦୁଇ ମୁଠା ଖାଇବା ପାଇଁ ମଧ୍ଯ ସଂଘର୍ଷ କରୁଛି ପରିବାର।

ରଞ୍ଜନାଙ୍କ ଦୁଇଟି ପୁଅ। ବଡ ପୁଅ ଶିବପ୍ରସାଦ ପାଳ ଜନ୍ମରୁ ଦିବ୍ୟଙ୍ଗ। ନା କାନକୁ କିଛି ଶୁଣାଯାଏ ନା ସେ କିଛି କହିପାରେ। ସମସ୍ତଙ୍କ ଦୁଃଖ କଷ୍ଟକୁ କାନ୍ଧରେ ବୋହି ରଞ୍ଜନା ଏବେ ପରିବାର ଚଳାଉଛନ୍ତି । ସରକାରୀ ପ୍ରାଥମିକ ବିଦ୍ୟାଳୟରେ ମଧ୍ୟାନ୍ନ ଭୋଜନ ପାଚିକା ରୂପେ କାମ କରୁଛନ୍ତି। ଏଥିସହ ରଞ୍ଜନା ଦିନ ମଜୁରିଆ ରୂପେ କାମ କରିବା ସହ ସୂତା ମଧ୍ୟ କାଟନ୍ତି। ସେତିକିରେ ଚଳିବା କଷ୍ଟ ହେଉଥିବାରୁ ଆର୍ଥିକ ସହାୟତା ପାଇଁ ପରିବାର ନିବେଦନ କରିଛି। ଗରିବ ପରିବାରକୁ କେହି ସହୃଦୟ ବ୍ଯକ୍ତି ସହଯୋଗ କଲେ ପରିବାରର କଷ୍ଟ ଦୂର ହୋଇପାରନ୍ତା।

ଖୋର୍ଦ୍ଧା: ରାଜ୍ୟର ଅନ୍ୟତମ ଶକ୍ତି ପୀଠ ଖୋର୍ଦ୍ଧା ଟାଙ୍ଗି ବ୍ଲକ  ମୂଳିଝର ଗଡ଼ରେ ଥିବା ମା’ ଉଗ୍ରତାରାଙ୍କ ମନ୍ଦିର। ଏହାର ଉନ୍ନତିକରଣ ସହ ମାଙ୍କ ପୀଠର ସୌନ୍ଦର୍ଯ୍ୟକରଣ କାର୍ଯ୍ୟର ହୋଇଛି ଶିଳାନ୍ୟାସ।  ଭିଡିଓ କନଫରେନ୍ସ ମାଧ୍ୟମରେ  ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଦ୍ୱାରା ଏହାର ଶିଳାନ୍ଯାସ ହୋଇଛି। ୨୫ କୋଟି ଟଙ୍କା ବ୍ୟୟରେ ମା ଉଗ୍ରତାରାଙ୍କ ପୀଠର ସୌନ୍ଦର୍ଯ୍ୟକରଣ ହେବ।

ଉଗ୍ରତାରାଙ୍କ ମନ୍ଦିର 16ନଂ ଜାତୀୟ ରାଜପଥଠାରୁ ୩ କିଲୋମିଟର ଦୂର ସହ ଭୂଷଣ୍ଡପୁର ରେଳ ଷ୍ଟେସନ ଠାରୁ ଏକ କିଲୋମିଟର ଦୂରରେ ଅବସ୍ଥିତ। ବହୁ ପୁରାତନ ମନ୍ଦିର ହୋଇଥିବାରୁ ପ୍ରତ୍ଯେକ ଦିନ ଏଠାରେ ଭକ୍ତଙ୍କର ଭିଡ଼ ଜମେ।  ତେଣୁ ଭକ୍ତଙ୍କ ସହ ସ୍ଥାନୀୟ ଲୋକେ ମାଆଙ୍କ ପୀଠର ଉନ୍ନତି ପାଇଁ ଦାବି କରିଆସୁଥିଲେ। 5T  ଅଧ୍ୟକ୍ଷ କାର୍ତିକ ପାଣ୍ଡିଆନ ମାଆ ଉଗ୍ରତାରାଙ୍କ ମନ୍ଦିରକୁ ପରିଦର୍ଶନ କରି ଏହାର ରୂପାନ୍ତରୀଣ ଯୋଜନାର କାର୍ଯ୍ୟ କିପରି ତ୍ୱରାନ୍ୱିତ ହୋଇପାରିବ ତାହା ପରଖି ଥିଲେ। ମା ଉଗ୍ରତାରାଙ୍କ ପରୀକ୍ରମା ମାର୍ଗ ସହ,  ସେବାୟତଙ୍କ ବିଶ୍ରାମ ଭବନ,  ତୀର୍ଥ ଯାତ୍ରୀ ବିଶ୍ରାମ ଗୃହ , ଦୋକାନ ଘର,  ଭୋଗ ମଣ୍ଡପ ଆଦିର ଯୋଜନା ହୋଇଛି। ଶକ୍ତିପୀଠର ବାକିଶମୂଳକ କାର୍ଯ୍ୟ ନେଇ ଅଞ୍ଚଳବାସୀ ଖୁସି।

ନୟାଗଡ: ନୟାଗଡ ଜିଲ୍ଲା ଖଣ୍ଡପଡା ବ୍ଲକ ବିରିଡିହ ଗାଁରେ ଅଲୌକିକ ଘଟଣା । ୪୦୦ ବର୍ଷ ପୁରୁଣା ଷୋଳଶରାଣୀ ଗୁମ୍ଫାରୁ ଉଦ୍ଧାର ହୋଇଛି ମାଙ୍କ ମୂର୍ତ୍ତି । ମାଙ୍କ ଦର୍ଶନ ପାଇଁ ଦୂରଦୂରାନ୍ତରୁ ଛୁଟୁଛି ଭକ୍ତଙ୍କ ସୁଅ । ଗ୍ରାମବାସୀଙ୍କ ସହଯୋଗରେ ପାହାଡ ଉପରୁ ପ୍ରାଚୀନ ମୂର୍ତ୍ତି ଉଦ୍ଧାର ହୋଇଛି । ଫଳରେ ସ୍ଥାନୀୟ ଅଞ୍ଚଳରେ ସୃଷ୍ଟି ହୋଇଛି ଭକ୍ତିମୟ ପରିବେଶ । କିମ୍ବଦନ୍ତୀ ଅନୁସାରେ ରାଜା ରାଜୁଡାଙ୍କ ସମୟରେ ଜଙ୍ଗଲ ପାହାଡ ଘେରା ଗୁମ୍ଫା ଭିତରେ ମା ଷୋଳରାଣି ପୂଜା ପାଉଥିଲେ ।  ତେବେ କାଳକ୍ରମେ ପୂଜା ବନ୍ଦ ହୋଇଯାଇଥିବା ବେଳେ ମାଙ୍କ ବିଗ୍ରହ ଓ ଅଳଙ୍କାର ଚୋରମାନେ ଚୋରି କରିନେଇଥିଲେ ।

କିଛି ଦିନ ତଳେ ବୃନ୍ଦାବନରୁ ଆସିଥିବା ଜଣେ ସାଧୁ ମାଆ ସ୍ଵପ୍ନାଦେଶ କରିଥିଲେ । ପରେ ଗ୍ରାମବାସୀମାନେ ଷୋଳଶରାଣି ଗୁମ୍ଫା ନିକଟରେ ଖୋଜାଖୋଜି କରିବା ପରେ ମାଆଙ୍କ ବିଗ୍ରହ ମାଟିତଳୁ ଉଦ୍ଧାର କରିଛନ୍ତି । ପରେ ସ୍ଥାନୀୟ ଅଞ୍ଚଳରେ ଖୁସିର ଲହରୀ ଖେଳିଯାଇଛି । ଏବେ ମାଆଙ୍କ ବିଗ୍ରହକୁ ଗୁମ୍ଫା ନିକଟରେ ରଖି ପୂଜାର୍ଚ୍ଚନା କରୁଛନ୍ତି ଗ୍ରାମବାସୀ । ତେବେ ମନ୍ଦିର ନିର୍ମାଣ ପାଇଁ ସରକାରଙ୍କ ସହାୟତା ଲୋଡିଛନ୍ତି ଗ୍ରାମବାସୀ ।

ଭୁବନେଶ୍ବର: ବନ୍ଯଜନ୍ତୁଙ୍କ ଫଟୋ ଉଠାଇବା ସହ ସେମାନଙ୍କ ସହ ସେଲଫି ନେଉଛନ୍ତି କି? ବନ୍ଯପ୍ରାଣୀଙ୍କ ବିଭିନ୍ନ ଶରୀର ଅଂଶ ସହ ବି ଫଟୋ କିମ୍ବା ସେଲଫି ନେଉଛନ୍ତି କି? ତେବେ ଏଥିପ୍ରତି ହୁଅନ୍ତୁ ସାବଧାନ। ଏଥିଲାଗି ଭୋଗିପାରେ କଡ଼ା ଦଣ୍ଡ। ବନ୍ଯଜନ୍ତୁଙ୍କ ଫଟୋ କିମ୍ବା ସେମାନଙ୍କ ସହ ସେଲଫି ଉଠାଇ ଲୋକମାନେ ସୋସିଆଲ ମିଡିଆରେ ଫଟୋ ପୋଷ୍ଟ କରୁଛନ୍ତି। ବନ୍ଯଜନ୍ତୁଙ୍କ ଫଟୋ ଉଠାଇବା କିମ୍ବା ସେମାନଙ୍କ ସହ ସେଲଫି ନେବା କେବଳ ସେମାନଙ୍କ ସାଧାରଣ ଜୀବନ ଯାତ୍ରାକୁ ବିଶୃଙ୍ଖଳିତ କରି ନଥାଏ ବରଂ ଏହା ବନ୍ଯଜନ୍ତୁ ସୁରକ୍ଷା ଆଇନ, ୧୯୭୨ର ଧାରା ୯କୁ ଉଲ୍ଲଂଘନ କରିଥାଏ। ଏହି ଅଭିଯୋଗରେ ଆଇନ ଉଲ୍ଲଂଘନକାରୀଙ୍କୁ ୭ ବର୍ଷ ଜେଲଦଣ୍ଡ ଭୋଗିବାକୁ ପଡିପାରେ।

ସେହିପରି ମୃତ ବନ୍ଯଜନ୍ତୁ କିମ୍ବା ବନ୍ଯପ୍ରାଣୀଙ୍କ ଶରୀର ଅଂଶ ସହ ଫଟୋ ଉଠାଇବା ବା ସେଲଫି ନେବା ସହ ତାହାକୁ ସୋସିଆଲ ମିଡିଆରେ ପୋଷ୍ଟ କରିବା ମଧ୍ଯ ବନ୍ଯଜନ୍ତୁ ସୁରକ୍ଷା ଆଇନର ଉଲ୍ଲଂଘନ କରୁଛି। ଏହି ଆଇନର ଉଲ୍ଲଂଘନ ନ କରିବା ଲାଗି ପରାମର୍ଶ ଦେଇଛନ୍ତି ପ୍ରିନ୍ସିପାଲ ଚିଫ କଞ୍ଜରଭେଟର ଅଫ ଫରେଷ୍ଟସ ବା ପିସିସିଏଫ ।