କେନ୍ଦୁଝର: କେନ୍ଦୁଝର ବରପଦା ଠାରେ ଥିବା କେ.ଜେ.ଏସ୍. ଆଲୁୱାଲିଆ ସ୍ପଞ୍ଜ ପ୍ଲାଣ୍ଟରେ ବିସ୍ଫୋରଣ। ପ୍ଲାଣ୍ଟର ଇଣ୍ଡକ୍ସନ ଫର୍ଣ୍ଣେସନରେ ବିସ୍ଫୋରଣ ଘଟିଛି । ବିସ୍ଫୋରଣ ଯୋଗୁଁ ଇଣ୍ଡକ୍ସନ ଫର୍ଣ୍ଣେସରୁ ତରଳ ଲୁହା ଛିଟିକି ୧୦ ଜଣ ଶ୍ରମିକ ପୋଡ଼ିହୋଇ ଗୁରୁତର ହୋଇଛନ୍ତି। ସେମାନଙ୍କ ମଧ୍ୟରୁ ୪ ଜଣଙ୍କ ଅବସ୍ଥା ଅତ୍ୟନ୍ତ ଗୁରୁତର ରହିଥିବା ଜଣାପଡିଛି। ସମସ୍ତଙ୍କୁ ଉଦ୍ଧାର କରାଯାଇ କେନ୍ଦୁଝର ମୁଖ୍ୟ ଡାକ୍ତରଖାନରେ ଭର୍ତ୍ତି କରାଯାଇଥିଲା। ସଙ୍କଟାପନ୍ନ ଥିବା ୩ ଜଣ ଶ୍ରମିକଙ୍କୁ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି। ସମସ୍ତ ଶ୍ରମିକ ବାହାର ରାଜ୍ୟର ବୋଲି ଜଣାପଡିଛି। ସୁରକ୍ଷାରେ ଅବହେଳା କାରଣରୁ ବାରମ୍ବାର ଏହି ପ୍ଲାଣ୍ଟରେ ବିସ୍ଫୋରଣ ଘଟି ଶ୍ରମିକଙ୍କ ଜୀବନ ଯାଉଛି। ତଥାପି ପ୍ଲାଣ୍ଟ କର୍ତ୍ତୃପକ୍ଷ ଚେତୁ ନାହାନ୍ତି। ଗତ ୨୦୧୭ ମସିହାରେ ଇଣ୍ଡକ୍ସନ ଫର୍ଣ୍ଣେସରେ ବିସ୍ଫୋରଣ ଘଟି ଶ୍ରମିକଙ୍କ ମୃତ୍ୟୁ ହୋଇଥିଲା।
ନେତାଙ୍କ ମନରେ ଛନକା ପସାଇଲାଣି ଡିପଫେକ୍ ଭିଡିଓ
ନନ୍ଦିଘୋଷ ବ୍ୟୁରୋ: ସାଇବର ଠକେଇ ହେଲେ ଆପଣ କିଭଳି ତୁରନ୍ତ ବର୍ତ୍ତିବେ ? ଥାନା କୁ ନଯାଇ ମଧ୍ୟ କିଭଳି କେସ ରୁଜୁ କରିବେ ? ନିର୍ବାଚନ ସମୟରେ AI ଓ ଡିପ ଫେକ ଭିଡିଓ ରୁ ରାଜନେତା କେମିତି ମୁକ୍ତି ପାଇବେ ? ଏସଂକ୍ରାନ୍ତରେ ଏକ ସାଇବର ସଚେତନତା ବୈଠକ ଅନୁଷ୍ଠିତ ହୋଇଛି ।
ଟେନସନ ଦେଲାଣି ଡିପ୍ ଫେକ୍ ଭିଡିଓ । ନେତାଙ୍କ ମନରେ ଛନକା ପରେ ପୋଲିସର ମାନସମନ୍ଥନ। ଭାଇରାଲ ହୋଇପାରେ ଅନ୍ତରଙ୍ଗ ମୁହୂର୍ତ୍ତର ଭିଡିଓ । ସାଇବର ଏକ୍ସପର୍ଟ ଓ NGO ସହ କମିଶନରେଟ ପୋଲିସର ବୈଠକ । ନେତାଙ୍କୁ ଘାରିଲାଣି ଡିପ ଫେକ ଭିଡିଓ ଚିନ୍ତା । ସାଇବର ଠକ ବା ଶତ୍ରୁପକ୍ଷ ବ୍ଲାକମେଲ ପରେ କରିପାରନ୍ତି ବଦନାମ । ନିକଟ ଅତୀତରେ ଅମିତ ଶାହା, ଅଭିନେତ୍ରୀ ରଶ୍ମିକା ମନ୍ଦାନା ଓ କ୍ୟାଟ୍ରିନା କୈଫଙ୍କ ଡିପ୍ଫେକ୍ ଫଟୋ ଓ ଭିଡିଓ ଭାଇରାଲ୍ ହେବା ପରେ ଆର୍ଟିଫିସିଆଲ୍ ଇଣ୍ଟେଲିଜେନ୍ସର ବ୍ୟବହାରକୁ ନେଇ ଚିନ୍ତା ବଢ଼ିଛି ।
ଜଣେ ବ୍ୟକ୍ତିଙ୍କ ଶରୀରରେ ଅନ୍ୟ ଜଣେ ବ୍ୟକ୍ତିଙ୍କ ମୁହଁକୁ ରଖି ପ୍ରସ୍ତୁତ କରାଯାଉଥିବା ଚିତ୍ର ବା ଭିଡିଓ ଯେଉଁ ପ୍ରଯୁକ୍ତି ମାଧ୍ୟମରେ ତିଆରି କରାଯାଉଛି ତାହାକୁ କମ୍ପ୍ୟୁଟର ବିଜ୍ଞାନ ଭାଷାରେ ଡିପଫେକ୍ କୁହାଯାଉଛି । ଆଗକୁ ସାଧାରଣ ନିର୍ବାଚନ ଥିବା ବେଳେ ରାଜନୈତିକ ବ୍ୟକ୍ତିବିଶେଷ ଙ୍କ ଫେକ ଫଟୋ ଭିଡ଼ିଓ ଭାଇରାଲ ହେବାର ସମ୍ଭାବନା ଥିବାରୁ ଏବେଠୁ ସଜାଗ ହୋଇଛି କମିଶନରେଟ ପୋଲିସ ।
ଇଣ୍ଟରନେଟରେ ପାଖାପାଖି ୧ ଲକ୍ଷ ଡିପଫେକ ପର୍ଣ୍ଣ ଭିଡିଓ ମହଜୁଦ ରହିଥିବା ବେଳେ କିଛିଦିନ ହେବ ପ୍ରତିଦିନ ଶହେରୁ ଅଧିକ ପର୍ଣ୍ଣ ଭିଡିଓ କ୍ଲିପ ଇଣ୍ଟରନେଟରେ ଅପଲୋଡ କରାଯାଉଛି । ଆର୍ଟିଫିସିଆଲ ଇଣ୍ଟେଲିଜେନ୍ସ ମାଧ୍ୟମରେ ଡିପଫେକ ପର୍ଣ୍ଣୋଗ୍ରାଫି ଏକ ବ୍ୟବସାୟ ପାଲଟି ଯାଇଛି ।
ସେପଟେ ନୀତିଦିନ ପରିବାର ର ଜଣଙ୍କ ସହ ବିଭିନ୍ନ ତାରିକାରେ ସାଇବର ଠକେଇ ହେଉଛି । ଏ ନେଇ NGO, ସାଇବର ଏକ୍ସପର୍ଟ ଓ HER ଟିମ ସହ ଆଲୋଚନା କରାଯାଇଛି । ଏଣୁ Golden hour ଭିତରେ ଥାନାକୁ ନଯାଇ ମଧ୍ୟ ଚକ୍ଷୁ ଆପ ଜରିଆରେ ଅନଲାଇନ କେସ ଦେବାକୁ କହିଛନ୍ତି ଏସିପି । ଶୁଣନ୍ତୁ କିଭଳି ଆପଣ ଠକେଇରୁ ବର୍ତ୍ତି ପାରିବେ ।
ସର୍ଭେ ରିପୋର୍ଟ ମୁତାବକ ୨୦୨୨ ତୁଳନାରେ ୨୦୨୩ ରେ ୨୪ ପ୍ରତିଶତ ସାଇବର କ୍ରାଇମ ବଢିଛି । ଏଣୁ ନିର୍ବାଚନ ଭଳି ଘଡିସନ୍ଧି ମୁହୂର୍ତ୍ତରେ ଏହାକୁ କିଭଳି ପ୍ରତିହତ କରାଯାଇପାରିବ ସେ ନେଇ ଚିନ୍ତା ବଢିଛି ।
ହେବିଓ୍ବେଟ୍ ଭରିଲେ ନାମାଙ୍କନ
ନନ୍ଦିଘୋଷ ବ୍ୟୁରୋ: ହାଇଭୋଲଟେଜ ନୋମିନେସନ। ପ୍ରାର୍ଥିପତ୍ର ଦାଖଲ କଲେ ହେଭିଓ୍ବେଟ। ନିଆରା ଷ୍ଟାଇଲରେ ପ୍ରାର୍ଥିପତ୍ର ଦାଖଲ କରିଛନ୍ତି ବିଜେଡି ଭୁବନେଶ୍ବର ଲୋକସଭା ପ୍ରାର୍ଥୀ ମନ୍ମଥ ରାଉତରାୟ। ଆର୍ମି ଅଫିସରରୁ ରାଜନେତା ବନିଥିବା ମନ୍ମଥଙ୍କ ନାମାଙ୍କନ ଦାଖଲ ବେଶ ଚର୍ଚ୍ଚା ସାଉଁଟିଛି। ସକାଳେ ପ୍ରଭୁ ଲିଙ୍ଗରାଜଙ୍କ ଦର୍ଶନ କରି ଏକଦମ ନିଆରା ଢଙ୍ଗରେ ସେ ନାମାଙ୍କନ ଭରିବାକୁ ଯାଇଥିଲେ ଖୋର୍ଦ୍ଧା ଜିଲ୍ଲାପାଳଙ୍କ ଅଫିସକୁ। ସେହିଭଳି ଘଣ୍ଚଘଣ୍ଟା, ସାହିଜାତ, ଗୋଟିପୁଅ ନୃତ୍ଯ ଆଉ ବିରାଟ ଶୋଭାଯାତ୍ରାରେ ଯାଇ ନାମାଙ୍କନ ପତ୍ର ଦାଖଲ କରିଛନ୍ତି ବିଜେଡିର ପୁରୀ ଲୋକସଭା ପ୍ରାର୍ଥୀ ଅରୂପ ପଟ୍ଟନାୟକ । ବଡ଼ଦାଣ୍ଡରେ ବିରାଟ ରାଲିରେ ଜିଲ୍ଲାପାଳଙ୍କ କାର୍ଯ୍ୟାଳୟକୁ ଆସି ପ୍ରାର୍ଥିପତ୍ର ଦାଖଲ କରିଛନ୍ତି ଅରୂପ।
ଏହି ସମୟରେ ଅରୂପଙ୍କ ସହ ସତ୍ଯବାଦୀ ବିଧାୟକ ପ୍ରାର୍ଥୀ ସଞ୍ଜୟ ଦାଶବର୍ମା, ରାଜ୍ଯସଭା ସାଂସଦ ଶୁଭାଶିଷ ଖୁଣ୍ଟିଆ, ବିଜେଡି ନେତା ରାମକୃଷ୍ଣ ଦାସ ମହାପାତ୍ର ଓ ଲୋକସଭା କ୍ଷେତ୍ରର ବରିଷ୍ଠ ନେତା ଉପସ୍ଥିତ ଥିଲେ। କନ୍ଧମାଳ ଲୋକସଭା ଆସନରୁ ସାଂସଦ ପ୍ରାର୍ଥୀ ଅଚ୍ଯୁତ ସାମନ୍ତ ଓ ଫୁଲବାଣୀ ବିଜେଡି ବିଧାନସଭା ପ୍ରାର୍ଥୀ ଜୟଶ୍ରୀ କହଁର ନାମାଙ୍କନ ଦାଖଲ କରିଛନ୍ତି। ବରଗଡ ବିଜେଡି ଲୋକସଭା ପ୍ରାର୍ଥୀ ପରିଣିତା ମିଶ୍ର ବି ବିରାଟ ରାଲିରେ ଯାଇ ପ୍ରାର୍ଥିପତ୍ର ଦାଖଲ କରିଛନ୍ତି । ବିଧାନସଭା ପ୍ରାର୍ଥୀ ଦେବେଶ ଆଚାର୍ଯ୍ୟ ମଧ୍ୟ ଆଜି ନାମାଙ୍କନ ଦାଖଲ କରିଛନ୍ତି।
ଶୋଭାଯାତ୍ରାରେ ବରିଷ୍ଠ ବିଜେଡି ନେତା ତଥା ପୂର୍ବତନ ସାଂସଦ ପ୍ରସନ୍ନ ଆଚାର୍ଯ୍ୟ, ମନ୍ତ୍ରୀ ରିତା ସାହୁ ଓ ପଦ୍ମପୁର ବିଧାୟିକା ବର୍ଷା ସିଂ ବରିହା ସାମିଲ ହୋଇଥିଲେ। ଶୋଭାଯାତ୍ରାରେ ୨୫ ହଜାରରୁ ଅଧିକ ବିଜେଡି କର୍ମୀ ସାମିଲ ହୋଇଥିଲେ । ସେପଟେ ନାମାଙ୍କନ ଦାଖଲ କରିଛନ୍ତି ସମ୍ବଲପୁର ବିଜେପି ସାଂସଦ ପ୍ରାର୍ଥୀ ତଥା କେନ୍ଦ୍ର ମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ଅଧିଷ୍ଠାତ୍ରୀ ଦେବୀ ମା ସମଲେଇ ଙ୍କ ଦର୍ଶନ କରିବା ପରେ ଶୋଭାଯାତ୍ରାରେ ଯାଇ ନାମାଙ୍କନ ଭରିଥିଲେ ଧର୍ମେନ୍ଦ୍ର। ସେହିଭଳି ଭୁବନେଶ୍ବର ବିଜେପି ସାଂସଦ ପ୍ରାର୍ଥୀ ଅପରାଜିତା ଷଡଙ୍ଗୀ ମଧ୍ୟ ଖୋର୍ଦ୍ଧା ଜିଲ୍ଲାପାଳଙ୍କ କାର୍ଯ୍ୟାଳୟରେ ନିଜ ପ୍ରାର୍ଥିପତ୍ର ଦାଖଲ କରିଛନ୍ତି।
ବାଲେଶ୍ବରରେ ଜମୁଛି ପ୍ରଚାର
ବାଲେଶ୍ବର: ବଢୁଛି ତାତି। ତାତି ଯୋଗୁ ସାଧାରଣ ଜୀବନ ଯାତ୍ରା ବ୍ୟାଘାତ ହେଉଛି । ତାପମାତ୍ରା ବୃଦ୍ଧି ଯୋଗୁ ମଧ୍ୟ ନିର୍ବାଚନ ପରିବେଶ ପ୍ରଭାବିତ ହେଉଛି। ପ୍ରାର୍ଥୀମାନେ ସକାଳେ ଓ ସଞ୍ଜରେ ପ୍ରଚାର କରିବାକୁ ପସନ୍ଦ କରୁଛନ୍ତି। ଦ୍ବିପ୍ରହରରେ ଲୋକେ ଘରୁ ବାହାରକୁ ବାହାରୁ ନଥିବାରୁ ପ୍ରଚାର ବନ୍ଦ ରହୁଛି। ହେଲେ ବିଜେଡିର କହିବା କଥା, ଖରା ବର୍ଷା ଆମ ପାଇଁ ସବୁ ସମାନ।
ବଢି ଚାଲିଛି ତାପମାତ୍ରା । ଡ଼ହ ଡ଼ହ ଖରାରେ ସିଜୁଛି ବାଲେଶ୍ବର ସାଙ୍ଗକୁ ସାରା ଓଡ଼ିଶା । ସକାଳ ସାଢେ ୮ଟା ପରେ ଘରୁ ବାହାରିବା ମୁସ୍କିଲ । ଗ୍ରୀଷ୍ମ ପ୍ରବାହକୁ ଦେଖି ବଦଳିଛି ନିର୍ବାଚନ ତରିକା । କଂଗ୍ରେସ ସାଂସଦ ପ୍ରାର୍ଥୀ ଶ୍ରୀକାନ୍ତ ଜେନା ସାକାଳୁ ସକାଳୁ ଆରମ୍ଭ କରିଦେଉଛନ୍ତି ପ୍ରଚାର । ଲୋକଙ୍କ ଘରକୁ ଘର ବୁଲି ନିଜ ସପକ୍ଷରେ ଭୋଟ ଯୋଗାଡ଼ କରିବାକୁ କରୁଛନ୍ତି ପ୍ରୟାସ। ପୁଣି ସଂନ୍ଧ୍ୟାରେ ଚାଲୁଛି ଡ଼ୋର-ଟୁ-ଡ଼ୋର କ୍ୟାମ୍ପେନ୍। ସେହିପରି ବିଜେପି ସାଂସଦ ପ୍ରାର୍ଥୀ ପ୍ରତାପ ଷଢଙ୍ଗୀ ମଧ୍ୟ ସକାଳେ ପ୍ରଚାରକୁ ପସନ୍ଦ କରୁଛନ୍ତି । କର୍ମୀ ସମ୍ମିଳନୀ, ବୁଥ୍ କମିଟି ବୈଠକ, ନିର୍ବାଚନ ମଣ୍ଡଳୀ ସ୍ତରୀୟ ବୈଠକ କରି କର୍ମୀଙ୍କୁ ଉତ୍ସାହିତ କରୁଛନ୍ତି ପ୍ରତାପ । ଆଉ ସଞ୍ଜ ପରେ ଲୋକଙ୍କୁ ଭେଟି ନିର୍ବାଚନ ସମ୍ପର୍କରେ କରୁଛନ୍ତି ଆଲୋଚନା। ହେଲେ ବିଜେଡି ସାଂସଦ ପ୍ରାର୍ଥୀ ଲେଖାଶ୍ରୀ ସାମନ୍ତସିହାରଙ୍କ କଥା ଅଲଗା । ତାଙ୍କ କହିବା କଥା, ସବୁ ପରିସ୍ଥିତିରେ ଲୋକଙ୍କ ପାଇଁ କାମ କରିବାକୁ ପ୍ରେରଣା ପାଇଛୁ । ତେଣୁ ଖରାରେ ଲୋକଙ୍କ ନିକଟକୁ ଯିବା ଆମର କର୍ତ୍ତବ୍ଯ ବୋଲି କହିଛନ୍ତି ଲୋଖାଶ୍ରୀ ।
ବାହାର ତାତି ସାଙ୍ଗକୁ ତାଳ ଦେଇ ବଢୁଛି ନିର୍ବାଚନ ତାତି । ସେପଟେ ଗରମ ପାଇଁ ଦିନ ୧୧ଟା ପରେ ଘରୁ ବାହାରିବା ମୁସ୍କିଲ ହୋଇପଡୁଛି । ଚଳିତ ବର୍ଷ ସହରରେ ସର୍ବାଧିକ ତାପମାତ୍ରା ୪୬ ଡ଼ିଗ୍ରୀରେ ପହଞ୍ଚିଥିଲା । ଆଦ୍ରତା ୪୫ ପ୍ରତିଶତ ଥିବାରୁ ତାପମାତ୍ରା ୪୭ ଡ଼ିଗ୍ରୀ ଭଳି ଅନୁଭବ ହୋଇଥିଲା । ମାତ୍ରାଧିକ ତାପମାତ୍ରା ବୃଦ୍ଧି ପ୍ରଚାର ସାଙ୍ଗକୁ ବ୍ୟବସାୟକୁ ମଧ୍ୟ ପ୍ରଭାବିତ କରିଛି । ତେବେ ଥଣ୍ଡା ପାନୀୟ ଦୋକାନରେ ଓ ଆଖୁ ରସ ଓ ଜୁସ ଦୋକାନରେ ଭିଡ଼ ଜମିବା ସହ ଚାଲୁଛି ରାଜନୈତିକ ଚର୍ଚ୍ଚା ।
ସାଢେ଼ ତିନି ଫୁଟ ଉପରକୁ ଉଠିଲା ଘର
ନନ୍ଦିଘୋଷ ବ୍ୟୁରୋ: ସାଢେ଼ ତିନି ଫୁଟ ଉପରକୁ ଉଠିଲା ଘର। ବିନା କୌଣସି କ୍ଷୟକ୍ଷତିରେ ଘରକୁ ଟେକି ଦିଆଗଲା। ଗଜପତି ଜିଲ୍ଲା ପାରଳାଖେମୁଣ୍ଡି ସହରରେ ଉନ୍ନତ ଜ୍ଞାନ କୌଶଳ ଜରିଆରେ ଘରକୁ ଟେକି ଦିଆଯାଇଛି। ଯାହାକୁ ଦେଖିବାକୁ ଲୋକଙ୍କ ଲାଗିଛି ଭିଡ।
ସାଢେ ତିନି ଫୁଟ ଉପରକୁ ଉଠିଲା ଘର । ଉନ୍ନତ ଜ୍ଞାନ କୌଶଳ ଜରିଆରେ ଘରକୁ ଟେକି ଦିଆଗଲା । ଏ ହେଉଛି ଗଜପତି ଜିଲ୍ଲା ପାରଳାଖେମୁଣ୍ଡି ସହରର ଶ୍ରୀଧର ନଗର ସ୍ଥିତ ରଞ୍ଜିତ ପ୍ରଧାନଙ୍କ ବାସଗୃହ। ପ୍ରାୟ ୨୦ ରୁ ୨୫ ବର୍ଷ ପୂର୍ବରୁ ନିର୍ମାଣ ହୋଇଥିଲା ଘରଟି। ତଳିଆ ଅଞ୍ଚଳ ହେତୁ ବର୍ଷା ଦିନେ ଘରେ ପଶୁଥିଲା ପାଣି । ଫଳରେ ଅସୁବିଧାର ସମ୍ମୁଖୀନ ହୋଇଥିଲେ ପରିବାର ଲୋକ ।
ତେବେ କିଛି ସ୍ଥାନରେ ଘରକୁ ଉପରକୁ ଉଠାଯାଇଥିବା ଖବର ଶୁଣି ନିର୍ମାଣକାରୀ ସଂସ୍ଥା ସହ ଯୋଗାଯୋଗ କରି ଘର ଉପରକୁ ଉଠାଇବା ନିଷ୍ପତ୍ତି ନେଇଥିଲେ ଘରର କର୍ତ୍ତୃପକ୍ଷ । ୯୦୦ ବର୍ଗ ଫୁଟ ବିଶିଷ୍ଟ ଘରକୁ ଉପରକୁ ଉଠାଇବା କାର୍ଯ୍ୟ ଆରମ୍ଭ ହୋଇଥିଲା । ଏବେ ସଫଳତାର ସହ ସାଢ଼େ ତିନି ଫୁଟ ଉପରକୁ ଉଠି ପାରିଛି ଘର। ଯାହାକୁ ନେଇ ଖୁସି ବ୍ୟକ୍ତ କରିଛନ୍ତି ଘର ଲୋକ।
ପାରଳାଖେମୁଣ୍ଡି ସହରରେ ପ୍ରଥମ କରି ଏଭଳି ଏକ ଅସମ୍ଭବ କାର୍ଯ୍ୟ ସମ୍ଭବ କରାଯାଇ ପାରିଛି। ବିନା କୌଣସି କ୍ଷୟକ୍ଷତିରେ ଘରଟିକୁ ଚାରିଫୁଟ ଉପରକୁ ଉଠାଇବାକୁ ଚୁକ୍ତି ସ୍ଵାକ୍ଷର କରିଥିଲେ ହରିୟାଣାର ଏକ ଗୃହ ନିର୍ମାଣ କାରୀ ସଂସ୍ଥା । ଏହି କାର୍ଯ୍ଯରେ ସାମିଲ ହୋଇଥିଲେ ୧୦ ଜଣ ଶ୍ରମିକ । ଅତ୍ଯାଧୁନିକ ଜ୍ଞାନ କୌଶଳ ଜରିଆରେ ବହୁ ପୁରୁଣା ଘରକୁ ସଫଳତାର ସହ ଉପରକୁ ଉଠାଯାଇପାରିଛି ।
ମାଆ ମାଟି ପାଇଁ କିଛି କରିନାହାଁନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ: ମହେଶ ସାହୁ
ନନ୍ଦିଘୋଷ ବ୍ୟୁରୋ: ମାଆ ମାଟି ପାଇଁ କିଛି କରିନାହାଁନ୍ତି କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ। ନାମାଙ୍କନ ଭରିବା ପରେ ଏପରି ଭାବେ ସମ୍ବଲପୁର ଲୋକସଭା ଆସନ ପ୍ରାର୍ଥୀ ଧର୍ମେନ୍ଦ୍ର ପ୍ରଧାନଙ୍କୁ ଟାର୍ଗେଟ କରିଛନ୍ତି ହିନ୍ଦୋଳ ବିଧାନସଭା ପାଇଁ ପ୍ରାର୍ଥୀ ହୋଇଥିବା ବିଜେଡିର ମହେଶ ସାହୁ। କହିଛନ୍ତି, ଧର୍ମେନ୍ଦ୍ର ପ୍ରଧାନ ଉପରେ ପବନରେ ଉଡ଼ିବା ଲୋକ। ରାଜପଥ କଥା ସେ କଣ କହିବେ? ଜାତୀୟ ରାଜପଥ-୫୫ ମରଣଯନ୍ତା ପାଲଟିଛି। ଅଯୋଗ୍ୟ ଲୋକଙ୍କୁ ଜାତୀୟ ରାଜପଥ କାର୍ଯ୍ୟ ଦିଆ ହୋଇଛି । ସେମାନଙ୍କ ଉପରେ କାହାର ଲଗାମ ନାହିଁ ବୋଲି କହିଛନ୍ତି ମହେଶ। ଏ ସଂପର୍କରେ ଅନୁଗୁଳ ଓ ଢେଙ୍କାନାଳରେ ମଧ୍ୟ ମାମଲା ରୁଜୁ ହୋଇଛି। ଢେଙ୍କାନାଳ ସଦାଶିବପୁରରେ ୩ ବର୍ଷ ଧରି ନିର୍ମିତ ତେଲ ଡିପୋ କେବଳ ପାଚେରୀରେ ସୀମିତ। ନିର୍ବାଚନ ପରେ ସଂସଦରେ ଏନଏଚ-୫୫ ପ୍ରସଙ୍ଗରେ ପୁଣି ଉଠାଯିବ ବୋଲି ଚେତେଇ ଦେଇଛନ୍ତି ମହେଶ।
ବିଞ୍ଝାରପୁରରେ ବିଗ୍ ଫାଇଟ୍, ସବୁଦଳ ଖେଳିଛନ୍ତି ମହିଳା କାର୍ଡ
ନନ୍ଦିଘୋଷ ବ୍ୟୁରୋ: ଯାଜପୁର ଜିଲ୍ଲାର ପ୍ରମୁଖ ନିର୍ବାଚନମଣ୍ଡଳୀ ବିଞ୍ଝାରପୁର। ୨୦୦୦ ମସିହାରୁ ଏହା ରହିଆସଛି ବିଜେଡିର ଗଡ଼ । ଚଳିତ ନିର୍ବାଚନରେ ଫୋକସରେ ଅଛନ୍ତି ମହିଳା । ତିନି ପ୍ରମୁଖ ଦଳ ମହିଳା ପ୍ରାର୍ଥୀ ଦେଇଛନ୍ତି। ତେବେ ଚଳିତ ନିର୍ବାଚନରେ କିଏ ହାତେଇବ ବିଞ୍ଝାରପୁର ଆସନ ? ତାକୁ ନେଇ ଚାଲିଛି କଳ୍ପନା ଜଳ୍ପନା । ତେବେ ବିକାଶ ହିଁ ସାଜିଛି ପ୍ରମୁଖ ପ୍ରସଙ୍ଗ ।
ବିଞ୍ଝାରପୁର ସଂରକ୍ଷିତ ଆସନଟି ବିଞ୍ଝାରପୁର ବ୍ଲକର ୨୯ଟି ପଞ୍ଚାୟତ ଓ ଦଶରଥପୁର ବ୍ଲକର ୧୫ଟି ପଞ୍ଚାୟତକୁ ନେଇ ଗଠିତ । ଏଠାରେ ଅଛନ୍ତି ୨ ଲକ୍ଷ ୨୭ ହଜାର ୮୦୬ ଭୋଟର । ପୁରୁଷ ୧ ଲକ୍ଷ ୧୮ ହଜାର ୨ ଓ ମହିଳା ୧ ଲକ୍ଷ ୯ ହଜାର ୮୦୪। ଚଳିତ ନିର୍ବାଚନରେ ବିଞ୍ଝାରପୁରରେ ସବୁଦଳ ମହିଳା କାର୍ଡ ଖେଳିଛନ୍ତି । ବିଜେଡିରୁ ପ୍ରାର୍ଥୀ ହୋଇଛନ୍ତି ପ୍ରମିଳା ମଲ୍ଲିକ, ବିଜେପିରୁ ବବିତା ମଲ୍ଲିକ ଓ କଂଗ୍ରେସରୁ ରଣାଙ୍ଗନକୁ ଓହ୍ଲାଇଛନ୍ତି କନକଲତା ମଲ୍ଲିକ । ପ୍ରମିଳା ରାଜ୍ଯ ସରକାରଙ୍କ ଉନ୍ନିତମୂଳକ କାର୍ଯ୍ଯକୁ ନେଇ ଲୋକଙ୍କ ପାଖକୁ ଯାଉଥିବା ବେଳେ ବିଜେପିର ବବିତା ମଲ୍ଲିକ ମୋଦିଙ୍କ ଲୋକାଭିମୁଖୀ ଯୋଜନାକୁ ନେଇ ପ୍ରଚାର କରୁଛନ୍ତି । କଂଗ୍ରେସ ପ୍ରାର୍ଥୀ କନକଲତା ଦଳର ଗ୍ଯାରେଣ୍ଟି କାର୍ଡ ଲୋକଙ୍କୁ ଦେଇ ପ୍ରଚାର ଚଲାଇଛନ୍ତି । ଏହାରି ଭିତରେ ରୋଚକ ହେବାରେ ଲାଗିଛି ରାଜନୀତି ।
୨୦୦୦ ମସିହା ନିର୍ବାଚନରେ ବିଜେଡିର ପ୍ରମିଳା ମଲ୍ଲିକ ୪୫ ହଜାର ୪୭୬ ଭୋଟ ପାଇ ବିଜୟୀ ହୋଇଥିଲେ । କଂଗ୍ରେସର ଅନାଦି ଚରଣ ଦାସ ୨୧ ହଜାର ୯୭୨ ଓ ସ୍ଵାଧୀନ ପ୍ରାର୍ଥୀ ସୁରେନ୍ଦ୍ର ମଲ୍ଲିକ ପାଇଥିଲେ ୧୩ ହଜାର ୨୫୧ ଭୋଟ । ୨୦୦୪ ନିର୍ବାଚନରେ ପୁଣି ବିଜେଡିରୁ ପ୍ରମିଳା ମଲ୍ଲିକ ୬୦ ହଜାର ୬୭୮ ଭୋଟ ପାଇ ଜିତିଥିଲେ । କଂଗ୍ରେସ ପ୍ରାର୍ଥୀ ଅଶୋକ ଦାସଙ୍କୁ ମିଳିଥିଲା ୪୩ ହଜାର ୪୦୯ ଭୋଟ | ସ୍ୱାଧୀନ ପ୍ରାର୍ଥୀ ସୁରେନ୍ଦ୍ର ମଲ୍ଲିକ ୨ ହଜାର ୬୪୯ ଭୋଟ ପାଇଥିଲେ । ୨୦୦୯ରେ ବିଜେଡି ପ୍ରାର୍ଥୀ ପ୍ରମିଳା ମଲ୍ଲିକ ୬୬ ହଜାର ୫୦୭ ଭୋଟ ପାଇ ଜିତିଥିଲେ । କଂଗ୍ରେସର ବବିତା ମଲ୍ଲିକ ୩୪ ହଜାର ୬୪୬ ଓ ବିଜେପିର ମାନସ ରଞ୍ଜନ ମଲ୍ଲିକଙ୍କୁ ୪ ହଜାର ୧୫୯ ଭୋଟ ମିଳିଥିଲା ।
୨୦୧୪ ନିର୍ବାଚନରେ ବିଜେଡି ପ୍ରାର୍ଥୀ ପ୍ରମିଳା ମଲ୍ଲିକ ୭୪ ହଜାର ୫୩୨ ଭୋଟ ପାଇ ବିଜୟୀ ହୋଇଥିଲେ । କଂଗ୍ରେସର ବବିତା ମଲ୍ଲିକ ୩୬ ହଜାର ୩୪୨ ଓ ବିଜେପିର ଦେବପ୍ରସାଦ ମଲ୍ଲିକଙ୍କୁ ୧୫ ହଜାର ୩୫୮ ଭୋଟ ମିଳିଥିଲା । ୨୦୧୯ ନିର୍ବାଚନରେ ପୂର୍ବପରି ବିଜେଡି ତାହାର ଆଧିପତ୍ଯ ବଜାୟ ରଖିଥିଲା । ବିଜେଡିରୁ ପ୍ରମିଳା ମଲ୍ଲିକ ୭୯ ହଜାର ୮୭ ଭୋଟ ପାଇ ବିଜୟୀ ହୋଇଥିଲେ । କଂଗ୍ରେସ ଛାଡି ବିଜେପିରୁ ପ୍ରାର୍ଥୀ ହୋଇଥିବା ବବିତା ମଲ୍ଲିକଙ୍କୁ ୫୭ ହଜାର ୮୬୧ ଖଣ୍ଡ ମିଳିଥିଲା । କଂଗ୍ରେସ ପ୍ରାର୍ଥୀ ମନୋରଞ୍ଜନ ଦାସ ମାତ୍ର ୩ ହଜାର ୯୯୭ ଭୋଟ ପାଇଥିଲେ । ତେବେ ଚଳିତ ନିର୍ବାଚନରେ ବିଜେଡି ଓ ବିଜେପି ମଧ୍ଯରେ କଡା ଟକ୍କର ହେବ ବୋଲି ଭୋଟରମାନେ ଅନୁମାନ କରୁଛନ୍ତି।
ଗତ ଦୁଇ ଦଶନ୍ଧି ଭିତରେ ବିକାଶର ରଥ ଆଗକୁ ବଢୁଥିବା ବେଳେ ସୃଦୃଢ଼ ହୋଇଛି ପର୍ଯ୍ୟଟନ, ଶିକ୍ଷା, ସ୍ୱାସ୍ଥ୍ୟ ଓ ଗମନାଗମନ ବ୍ୟବସ୍ଥା | ଖରସ୍ରୋତା ନଦୀ ଉପରେ ନିର୍ମାଣ ହୋଇଛି ତିନିଟି ସୁଉଚ୍ଚ ସେତୁ। ଜରି, ବାଛଳ ଓ ଜଗନ୍ନାଥପୁର ଠାରେ ଆଉ ତିନିଟି ନୂଆ ସେତୁ ପାଇଁ ଶିଳାନ୍ୟାସ ହୋଇଛି । ଆହୁରି ଅନେକ ବିକାଶ କାର୍ଯ୍ୟ ନେଇ ବିଜେଡି ପ୍ରଚାର କରୁଥିବା ବେଳେ ବିଜେପି ଓ କଂଗ୍ରେସ ମଧ୍ଯ ଜୋରଦାର ଲାଗିଛନ୍ତି।
ରିଙ୍କୁ ସିଂ ଏବଂ କେ.ଏଲ ରାହୁଲ ଟି-୨୦ ବିଶ୍ବକପ ଦଳରେ ସ୍ଥାନ ନପାଇବା ପଛର କାରଣ କହିଲେ ରୋହିତ
ନନ୍ଦିଘୋଷ ବ୍ୟୁରୋ: ଟି-୨୦ ବିଶ୍ବକପ ପାଇଁ ଘୋଷଣା ହୋଇଛି ଭାରତୀୟ ଦଳ । ଟିମ ଘୋଷଣା ହେବା ପରେ ଗୁରୁବାର ମୁମ୍ବାଇରେ ଟିମ ଇଣ୍ଡିଆର ମୁଖ୍ୟ ଚୟନକର୍ତ୍ତା ଅଜିତ ଅଗରକର ଏବଂ ରୋହିତ ଶର୍ମା ଏକ ପ୍ରେସମିଟ କରିଛନ୍ତି । ସାମ୍ବାଦିକଙ୍କ ବିଭନ୍ନ ପ୍ରଶ୍ନର ଉତ୍ତର ରଖିବା ସହ ବିଶ୍ବକପକୁ ନେଇ ବିଭିନ୍ନ ରଣନୀତି ସମ୍ପର୍କରେ ଆଲୋଚନା କରିଛନ୍ତି । ତେବେ କେଏଲ ରାହୁଲଙ୍କୁ ଦଳରେ କାହିଁକି ସ୍ଥାନ ମିଳିଲା ନାହିଁ ପ୍ରଶ୍ନ କରାଯାଇଥିବାବେଳେ ଅଗରକର କହିଥିଲେ କି, ସଞ୍ଜୁ ସାମସନ ମିଡିଲ ଅର୍ଡର ସାଙ୍ଗକୁ ଟପ ଅର୍ଡରରେ ମଧ୍ୟ ବ୍ୟାଟିଂ କରିପାରିବେ। ଏଣୁ ଦ୍ବିତୀୟ ଅପସନ ଭାବେ କେଏଲ ରାହୁଲଙ୍କ ସ୍ଥାନରେ ତାଙ୍କୁ ଚୟନ କରାଗଲା।
ରିଙ୍କୁ ସିଂଙ୍କୁ କାହିଁକି ଦଳରେ ସାମିଲ କରାଗଲା ନାହିଁ । ଏହି ପ୍ରଶ୍ନର ଉତ୍ତରରେ ଅଗରକର କହିଥିଲେ କି, ରିଙ୍କୁ ସିଂ ହେଉଛନ୍ତି ଜଣେ ଭଲ ଖେଳାଳି। ଟିମ କମ୍ବିନେସନକୁ ଦୃଷ୍ଟିରେ ରଖି ଏଭଳି ନିଷ୍ପତ୍ତି ନିଆଯାଇଛି । ରୋହିତଙ୍କୁ ଟିମରେ ଜଣେ ସ୍ପିନରଙ୍କ ଆବଶ୍ୟକତା ରହିଥିଲା । ଏହାକୁ ଦୃଷ୍ଟିରେ ରଖି ରିଙ୍କୁଙ୍କ ବଦଳରେ ଆମେ ଅଲଗା ବିକଳ୍ପ ନେଲୁ । ତେବେ କିଏ ଓପନିଂ କରିବ ଏହାର ଉତ୍ତରରେ ରୋହିତ କହିଥିଲେ କି, ଆମ ଟିମ ଠିକ ରହିଛି । ପିଚକୁ ଦେଖି ଟିମ ଚୟନ କରାଯିବ ।
କାହାର ହେବ କାକଟପୁର?
ନନ୍ଦିଘୋଷ ବ୍ୟୁରୋ: ସଭା ଓ ଶୋଭାଯାତ୍ରାରେ କମ୍ପୁଛି ମଇଦାନ । ବିଶାଳ ବାଇକ ରାଲି ସାଙ୍ଗକୁ ଜିନ୍ଦାବାଦ ଧ୍ବନିରେ ପ୍ରକମ୍ପିତ ହେଉଛି ପରିବେଶ । ଉଷ୍ମ ହେବାରେ ଲାଗିଛି ପୁରୀ ଜିଲ୍ଲା କାକଟପୁର ବିଧାନସଭା ନିର୍ବାଚନମଣ୍ଡଳୀ । କିଏ ପତାକା ଧରି ବୁଲୁଛନ୍ତି ତ କିଏ ବିକାଶକୁ ମୁଦ୍ଦା କରି ମଇଦାନକୁ ଓହ୍ଲାଇଛନ୍ତି । ତେବେ ଜନତାଙ୍କ ମତ ବିକାଶ ଯେଉଁଠି, ଭୋଟ ଦେବୁ ସେଇଠି ।
ପୁରୀ ଜିଲ୍ଲା କାକଟପୁର ବିଧାନସଭା ନିର୍ବାଚନମଣ୍ଡଳୀରେ ବଢ଼ି ଚାଲିଛି ରାଜନୈତିକ ଉଷ୍ମତା । କାହାକୁ ବାଛିବେ ଜନତା ? କାହାର ହେବ କାକଟପୁର ବିଧାନସଭା ଆସନ ? ଚାଲିଛି ଅଙ୍କକଷା। କାକଟପୁର ବ୍ଲକର ୧୬ଟି ପଞ୍ଚାୟତ, ଅସ୍ତରଙ୍ଗ ବ୍ଲକର ୧୫ ପଞ୍ଚାୟତ, ଗୋପ ବ୍ଲକର ୧୪ଟି ପଞ୍ଚାୟତ, ସମୁଦାୟ ୪୫ଟି ପଞ୍ଚାୟତ ଓ କୋଣାର୍କ ଏନଏସିର ୧୩ଟି ୱାର୍ଡକୁ ନେଇ ଏହି ନିର୍ବାଚନମଣ୍ଡଳୀ ଗଠିତ । ଏଠାରେ ଅଛନ୍ତି ୨ ଲକ୍ଷ ୩୯ ହଜାର ୯୮୩ ଜଣ ଭୋଟର । ପୁରୁଷ ୧ ଲକ୍ଷ ୨୪ ହଜାର ୧୩୦ , ମହିଳା ୧ ଲକ୍ଷ ୧୫ ହଜାର ୮୫୦ ଓ ତୃତୀୟ ଲିଙ୍ଗୀ ଭୋଟର ମାତ୍ର ୩ ଜଣ ଅଛନ୍ତି ।
ଏଠାରେ ହେଉଛି ତ୍ରିମୁଖୀ ଲଢ଼େଇ । ବିଜେଡିରୁ ପ୍ରାର୍ଥୀ ହୋଇଛନ୍ତି ତୁଷାରକାନ୍ତି ବେହେରା, ବିଜେପିରୁ ବାଇଧର ମଲ୍ଲିକ ଓ କଂଗ୍ରେସରୁ ପ୍ରାର୍ଥୀ ହୋଇଛନ୍ତି ବିଶ୍ଵଭୂଷଣ ଦାସ । ତିନି ଦଳ ପକ୍ଷରୁ ଜୋରଦାର ପ୍ରଚାର ଚାଲିଛି । ପ୍ରାର୍ଥୀମାନେ ନିଜ ନିଜ ପ୍ରସଙ୍ଗ ନେଇ ପ୍ରଚାର କରୁଛନ୍ତି।
କାକଟପୁର ୨ ହଜାର ହଜାର ମସିହାରୁ ରହିଆସିଛି ବିଜେଡିର ଗଡ଼ । ୨୦୧୯ ସାଧାରଣ ନିର୍ବାଚନରେ ବିଜେଡି ପ୍ରାର୍ଥୀ ତୁଷାରକାନ୍ତି ବେହେରା ୯୧ ହଜାର ୮୯୭ ଭୋଟ ପାଇ ଜିତିଥିଲେ । କଂଗ୍ରେସର ବିଶ୍ୱଭୂଷଣ ଦାସ ୪୬ ହଜାର ୨୦୬ ଓ ବିଜେପିର ରବି ମଲ୍ଲିକଙ୍କୁ ୩୦ ହଜାର ୭୭୧ ଭୋଟ ମିଳିଥିଲା ।
କାକଟପୁରରେ ରାଜ୍ୟ ସରକାରଙ୍କ ପକ୍ଷରୁ ଅନେକ ଉନ୍ନତିମୂଳକ କାର୍ଯ୍ୟ ହୋଇଛି । ନିର୍ବାଚନମଣ୍ଡଳୀର ଅଧିକାଂଶ ଉଚ୍ଚ ବିଦ୍ୟାଳୟକୁ 5T ଅନ୍ତର୍ଭୁକ୍ତ କରି ରୂପାନ୍ତରଣ କରାଯାଇଛି। ନଦୀବନ୍ଧ ସୁଦୃଢ଼ୀକରଣ, ମେଗା-ପାନୀୟଜଳ ପ୍ରକଳ୍ପ, ମ୍ୟାନଗ୍ରୋଭ ରିଟ୍ରିଟ, ପୀରଜାହାନିଆ ପୀଠର ଉନ୍ନତି ସାଙ୍ଗକୁ ଅସ୍ତରଙ୍ଗରୁ ନିମାପଡ଼ାକୁ ପକ୍କା ରାସ୍ତା ହୋଇଛି।
ଏଥିସହିତ ଗୋପ ଓ କୋଣାର୍କ ଅଞ୍ଚଳରେ ଲକ୍ଷ୍ମୀ ବସ ଯାତାୟତ କରିବା ସାଙ୍ଗକୁ ମହିଳାମାନଙ୍କୁ ସ୍ଵାବଲମ୍ବୀ କରିବା ପାଇଁ ମିଶନ ଶକ୍ତି ମାଧ୍ଯମରେ ଋଣ ଯୋଗାଇ ଦିଆଯାଇଛି। କାକଟପୁର ଅଧିଷ୍ଠାତ୍ରୀ ଦେବୀ ମା’ ମଙ୍ଗଳା ମନ୍ଦିର ଉନ୍ନତି ହୋଇଛି । ରାଜ୍ୟ ସରକାର ତରଫରୁ କାକଟପୁରକୁ ମିଳିଛି NAC ମାନ୍ୟତା । ମୁଖ୍ୟମନ୍ତ୍ରୀଙ୍କ ଯୋଗୁ ବିକାଶର ଧାରା କାକଟପୁର ନିର୍ବାଚନ ମଣ୍ଡଳୀରେ ପହଞ୍ଚିଛି । ବିକାଶ ହିଁ ହୋଇଛି ମୁଖ୍ଯ ପ୍ରସଙ୍ଗ।
କେଶରଗଞ୍ଜରୁ ବିଜେପି ଟିକେଟରେ ନିର୍ବାଚନ ଲଢ଼ିବେ ବ୍ରିଜଭୂଷଣଙ୍କ ସାନପୁଅ କରନ ଭୂଷଣ
ନନ୍ଦିଘୋଷ ବ୍ୟୁରୋ: ଗୁରୁବାର ୨ ଗୁରୁତ୍ବପୂର୍ଣ୍ଣ ଆସନ ପାଇଁ ପ୍ରାର୍ଥୀ ଘୋଷଣା କରିଛି ବିଜେପି । ଏହି ୨ ଲୋକସଭା ଆସନ ହେଲା ଉତ୍ତରପ୍ରଦେଶର କେଶରଗଞ୍ଜ ଏବଂ ରାୟବରେଲୀ । କେଶରଗଞ୍ଜରୁ ସାଂସଦ ଥିବା ବ୍ରିଜଭୂଷଣଙ୍କ ସ୍ଥାନରେ ସାନପୁଅ କରନଭୂଷଣଙ୍କୁ ବିଜେପି ପ୍ରାର୍ଥୀ କରିଛି । ମହିଳା କୁସ୍ତିଯୋଦ୍ଧାଙ୍କୁ ଅସଦାଚରଣ ମାମଲାରେ ଦୀର୍ଘଦିନ ଧରି ଗଣମାଧ୍ୟମରେ ଚର୍ଚ୍ଚାରେ ରହିଥିବାବେଳେ ବ୍ରିଜଭୂଷଣଙ୍କ ଟିକେଟ କାଟିଛି ଦଳ । ତାଙ୍କ ସ୍ଥାନରେ ପୁଅ ଏବେ ମଇଦାନକୁ ଓହ୍ଲାଇବେ । ସେପଟେ ବହୁଚର୍ଚ୍ଚିତ ରାୟବରେଲିରୁ ଦିନେଶ ପ୍ରତାପ ସିଂଙ୍କୁ ପ୍ରାର୍ଥୀ କରିଛି ବିଜେପି । ୨୦୧୯ରେ ମଧ୍ୟ ଏଠାରେ ବିଜେପି ତାଙ୍କୁ ପ୍ରାର୍ଥୀ କରିଥିଲା । ମାତ୍ର ସେ ସୋନିଆ ଗାନ୍ଧୀଙ୍କଠାରୁ ପରାସ୍ତ ହୋଇଥିଲେ । ଏବେ ପୁଣିଥରେ ଦଳ ତାଙ୍କ ଉପରେ ଭରସା କରି ମଇଦାନକୁ ସଡ୍ଲାଇଛି ।