ଭୁବନେଶ୍ବର: କଂଗ୍ରେସ ଭବନରେ ଟିକେଟ ଆଶାୟୀଙ୍କ ଅଭିନବ ପ୍ରତିବାଦ। ଆସ୍କା ଅଂଚଳର ଜଣେ ଟିକେଟ ପାଇଁ ଆଶାୟୀ ଥିବା ନେତା ଭିମ୍ ଲିକୁଇଡ୍ ଦେହରେ ପକେଇ ଆତ୍ମହତ୍ୟା ଉଦ୍ୟମ କରୁଥିଲେ । ବେଶ କିଛି ସମୟ ଧରି ୫ରୁ ୬ଜଣ ସମର୍ଥକଙ୍କ ସହ ଆଶାୟୀ ବ୍ୟକ୍ତି ଏପରି ପ୍ରତିବାଦ କରିଥିଲେ । ପରେ କଂଗ୍ରେସ ଭବନରେ ଥିବା କିଛି ଯୁବନେତା ପ୍ରତିବାଦ କରୁଥିବା ଲୋକଙ୍କୁ ଠେଙ୍ଗାରେ ଗୋଡ଼ାଇ ଗୋଡ଼ାଇ ପିଟିଥିଲେ । ଯାହା ୨୦୨୪ ରାଜନୀତିରେ ଏକ ରୋଚକ ଦୃଶ୍ୟ ଦେଖିବାକୁ ମିଳିଥିଲା କଂଗ୍ରେସ ଭବନରେ । ପରେ ପୋଲିସ କଂଗ୍ରେସ ଭବନରେ ପହଞ୍ଚି ଘଟଣାର ତନାଘନା କରିବା ସହ କଂଗ୍ରେସ ଭବନର କର୍ମଚାରୀଙ୍କ ସହ ଆଲୋଚନା କରିଥିଲେ । ୨୦୨୪ ଟିକେଟ ବଣ୍ଟନ ଓ ଟିକେଟ ପାଇବା ପରେ ପ୍ରାର୍ଥୀ ଟିକେଟ କଟିବାକୁ ନେଇ କଂଗ୍ରେସ ଭବନରୁ ତୃଣମୂଳସ୍ତର ଯାଏ ହାତ ଶିବିରରେ ଅସନ୍ତୋଷ ବଢିବାରେ ଳାଗିଛି ।
ପାଲଲହଡ଼ାରେ ସରଗରମ ରାଜନୀତି
ନନ୍ଦିଘୋଷ ବ୍ୟୁରୋ: ନିର୍ବାଚନ ପାଇଁ ପାଲଲହଡ଼ା ବିଧାନସଭା ନିର୍ବାଚନମଣ୍ଡଳୀରେ ସରଗରମ ହେବାରେ ଲାଗିଛି ରାଜନୈତିକ ପରିବେଶ। ଚାଲିଛି ଜୋରଦାର ପ୍ରଚାର । ହେଉଛି ତ୍ରିମୁଖୀ ଲଢ଼େଇ। ବିଗତ ୩ଟି ନିର୍ବାଚନରେ ବିଜେଡିର ଗଡ଼ ଥିବା ଏହି ନିର୍ବାଚନମଣ୍ଡଳୀରେ ଏଥର କିଏ ଜିତିବେ ତାକୁ ନେଇ ଆରମ୍ଭ ହୋଇଯାଇଛି ଅଙ୍କକଷା ।
୨୦୦୯ରୁ ବିଜେଡିର ଗଡ଼ ଭାବରେ ପରିଚିତ ଅନୁଗୁଳ ଜିଲ୍ଲା ପାଲଲହଡ଼ା ବିଧାନସଭା ନିର୍ବାଚନମଣ୍ଡଳୀ । ପାଲଲହଡ଼ା ବ୍ଲକର ୨୭ଟି ପଞ୍ଚାୟତ ଓ କଣିହାଁ ବ୍ଲକର ୧୯ଟି ପଞ୍ଚାୟତକୁ ନେଇ ଏହା ଗଠିତ । ଏଠାରେ ଅଛନ୍ତି ୧ ଲକ୍ଷ ୭୭ ହଜାର ୯୨୨ ଭୋଟର । ପୁରୁଷ ୯୦ ହଜାର ୯୫୨, ମହିଳା ୮୬ ହଜାର ୯୫୫ ଏବଂ ତୃତୀୟ ଲିଙ୍ଗୀ ଭୋଟର ୧୫ ଜଣ ଅଛନ୍ତି । ନୂତନ ଭାବେ ମତଦାନ କରିବେ ୯ ହଜାର ୯୫୮ ଜଣ ଯୁବ ଭୋଟର । ଏଠାରେ ତ୍ରିମୁଖୀ ତ୍ରିମୁଖୀ ଲଢ଼େଇ ହେଉଛି । ବିଜେଡି ପକ୍ଷରୁ ମଇଦାନକୁ ଓହ୍ଲାଇଛନ୍ତି ମୁକେଶ କୁମାର ପାଲ । ବିଜେପିରୁ ଅଶୋକ ମହାନ୍ତି ଏବଂ କଂଗ୍ରେସରୁ ପ୍ରାର୍ଥୀ ହୋଇଛନ୍ତି ଫକୀର ସାମଲ । ତିନି ଦଳ ପକ୍ଷରୁ ଜୋରଦାର ଚାଲିଛି ପ୍ରଚାର ।
୨୦୦୯ ନିର୍ବାଚନରେ ବିଜେଡି ପ୍ରାର୍ଥୀ ରବି ନାରାୟଣ ପାଣି ୪୦ ହଜାର ୯୮୦ ଭୋଟ ପାଇ ବିଜୟୀ ହୋଇଥିଲେ । ବିଜେପିରୁ ଧର୍ମେନ୍ଦ୍ର ପ୍ରଧାନ ୩୫ ହଜାର ୫୧୩ ଓ କଂଗ୍ରେସରୁ ବିବୁଧେନ୍ଦ୍ର ପ୍ରତାପ ଦାଶ ପାଇଥିଲେ ୨୧ ହଜାର ୨୫୮ ଭୋଟ। ୨୦୧୪ରେ ବିଜେଡି ପ୍ରାର୍ଥୀ ମହେଶ ସାହୁ ୪୪ ହଜାର ୨୬୪ ଭୋଟ ପାଇ ଜିତିଥିଲେ । ବିଜେପିର ଅଶୋକ ମହାନ୍ତି ୩୮ ହଜାର ୯୭୦ ଓ କଂଗ୍ରେସର ସୁବୋଧ ପାଣିଙ୍କୁ ୧୮ ହଜାର ୪୮୭ ଭୋଟ ମିଳିଥିଲା । ୨୦୧୯ ନିର୍ବାଚନରେ ବିଜେଡି ପ୍ରାର୍ଥୀ ମୁକେଶ କୁମାର ପାଲ ୫୯ ହଜାର ୩୫୦ ଭୋଟ ପାଇ ବିଜୟୀ ହୋଇଥିଲେ । ବିଜେପିର ଅଶୋକ ମହାନ୍ତି ୫୩ ହଜାର ୧୩୬ ଓ କଂଗ୍ରେସର ସୁବ୍ରତ ଗଡ଼ନାୟକଙ୍କୁ ୧୨ ହଜାର ୨୬୬ ଭୋଟ ମିଳିଥିଲା । ଏଥର ଭଲ ପ୍ରାର୍ଥୀ ଓ ଅଞ୍ଚଳର ବିକାଶକୁ ଦେଖି ଭୋଟ ଦେବେ ବୋଲି ଭୋଟରମାନେ କହିଛନ୍ତି ।
ରାଜ୍ଯ ସରକାରଙ୍କ ପ୍ରଚେଷ୍ଟାରେ ପାଲଲହଡ଼ା ଅଞ୍ଚଳ ବିକାଶର ଶୀର୍ଷ ଛୁଇଁଛି । ରାସ୍ତାଠାରୁ ଆରମ୍ଭ କରି, ଡାକ୍ତରଖାନା, ସ୍କୁଲ , ଖେଳ ପଡ଼ିଆ, ମନ୍ଦିର ଆଦିର ବିକାଶ ହୋଇଛି। ଏହା ହିଁ ପାଲଟିଛି ନିର୍ବାଚନର ମୁଖ୍ୟ ପ୍ରସଙ୍ଗ।
ସାମ୍ନାକୁ ଆସିଲା କେନ୍ଦ୍ରମନ୍ତ୍ରୀଙ୍କ ଅସଲ ଚିତ୍ର, ନିଜ ଗାଁ ପ୍ରତି କରୁଛନ୍ତି ଚରମ ଅବହେଳା
ନନ୍ଦିଘୋଷ ବ୍ୟୁରୋ: ଡବଲ ଇଞ୍ଜିନର ନାରା ଦେଇ ନିର୍ବାଚନ ପ୍ରଚାର କରୁଥିବା ବିଜେପି ନେତାଙ୍କ ଅସଲ ଚିତ୍ର ଦେଖିବା ତାଙ୍କ ନିଜ ଗାଁରୁ । କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ଗାଁ ତାଳଚେରର ବିକଳ କାହାଣୀ । ତାଳଚେରରୁ ବାହାରକୁ ବାହାରିବାକୁ ହେଲେ ରେଳ ଧାରଣା ପାର ହୋଇ ଯିବାକୁ ହୋଇଥାଏ । ରେଳଧାରଣା ସବୁବେଳେ ବିପଦ ସଂକୁଳ ହୋଇରହିଥିଲେ ମଧ୍ୟ, ଓଭର ବ୍ରିଜ ନଥିବାରୁ ପ୍ରତିଦିନ ଘଟୁଛି ଦୂର୍ଘଟଣା । ହେଲେ ଦିନେ ମଧ୍ୟ କେନ୍ଦ୍ରମନ୍ତ୍ରୀ ଏ ସଂପର୍କରେ ଚିନ୍ତା କରିନାହାଁନ୍ତି । ଯଦି ନିଜ ଗାଁକୁ ଯିଏ ହତାଦର କରିଛି, ସିଏ ରାଜ୍ୟ ଓ ସମ୍ବଲପୁରର କଣ ବିକାଶ କରିବ ବୋଲି ସ୍ଥାନୀୟ ଲୋକମାନେ ପ୍ରଶ୍ନ କରିଛନ୍ତି ।
କେନ୍ଦ୍ର ସରକାରଙ୍କ ବୈମାତୃକ ମନୋଭାବ ସାଙ୍ଗକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନିଜ ଗାଁକୁ ଅବହେଳା ଏବେ ଲୋକଙ୍କ ପାଇଁ କାଳ ସାଜିଛି । ଗୋଟିଏ ପଟେ ଚରମ ପ୍ରଦୂଷଣ ଅନ୍ୟପଟେ ଯିବା ଆସିବା ପାଇଁ ରେଳଧାରଣା ପାଲଟିଛି ମୃତ୍ୟୁର ଯନ୍ତା । କଳାହୀରାର ସହର ତାଳଚେର ଏବେ ଅବହେଳିତ । ତାଳଚେରରୁ ଦୈନିକ ହଜାର ହଜାର ଟନ୍ କୋଇଲା ରାଜ୍ୟ ତଥା ରାଜ୍ୟ ବାହାରର ବିଭିନ୍ନ ସ୍ଥାନକୁ ପରିବହନ ହେଉଛି ।
କେନ୍ଦ୍ର ସରକାର ଦୈନିକ କୋଟି କୋଟି ଟଙ୍କା ରାଜସ୍ବ ମଧ୍ୟ ପାଉଛନ୍ତି କିନ୍ତୁ, କୋଇଲା ପରିବହନ ପାଇଁ ପଡ଼ିଥିବା ରେଳ ଧାରଣା ଗୁଡିକ ତାଳଚେର ସହର ପାଇଁ ପାଲଟିଛି ଅଭିଶାପ । ବୁଢିଆଣୀ ଜାଲ ପରି ଛନ୍ଦି ହୋଇଥିବା ରେଳ ଧାରଣା ଲୋକଙ୍କ ଜୀବନକୁ ଦୁର୍ବିସହ କରିଦେଇଛି । ଫଳରେ ଘରୁ ବାହାରିଲେ ରେଳ ଧାରଣା କଡରେ ଘଣ୍ଟାଘଣ୍ଟା ଅପେକ୍ଷା କରିବାକୁ ପଡୁଛି । ଓଭରବ୍ରିଜ ପାଇଁ ଲୋକଙ୍କ ଦାବି ପଡିଯାଇଛି ଶୀତଳ ଭଣ୍ଡାରରେ । ଲୋକଙ୍କ କହିବା ହେଲା, ଯଦି କେନ୍ଦ୍ରମନ୍ତ୍ରୀ ନିଜ ଭିଟାମାଟି ପାଇଁ କିଛି କରିପାରିନାହାଁନ୍ତି, ସେ ରାଜ୍ୟ ଓ ସମ୍ବଲପୁର ପାଇଁ କଣ କରିବେ ।
ତାଳଚେରରେ ଥିବା ରେଳ ଧାରଣା ଗୁଡ଼ିକୁ ଅତିକ୍ରମ କରିବା ପାଇଁ ପ୍ରାୟ ଅଧିକାଂଶ ସ୍ଥାନରେ ରେଲୱେ ଓଭରବ୍ରିଜର ଆବଶ୍ୟକତା ଥିବା ବେଳେ କେବଳ ଘଣ୍ଟପଡା ଠାରେ ଓଭରବ୍ରିଜ ନିର୍ମାଣ ପାଇଁ ନିଷ୍ପତ୍ତି ହୋଇଛି । କିନ୍ତୁ ତାହା ମଧ୍ୟ ଅଧାପନ୍ତରିଆ ହୋଇ ପଡ଼ି ରହିଛି । ୨୦୧୨ ଜୁନ ପହିଲାରେ ତତ୍ କାଳୀନ କୋଇଲା ମନ୍ତ୍ରୀ ଶ୍ରୀପ୍ରକାଶ ଜେସ୍ୱାଲଙ୍କ ଦ୍ଵାରା ଏହି ବ୍ରିଜର ଶିଳାନ୍ୟାସ କରିଥିଲେ । ପ୍ରାୟ ୩୭ କୋଟି ୨୧ ଲକ୍ଷ ବ୍ୟୟ ଅଟକଳରେ ୨୦୧୬ ମସିହା ଅକ୍ଟୋବର ମାସରେ ନିର୍ମାଣ କାର୍ଯ୍ୟ ଆରମ୍ଭ ହୋଇଥିଲା । ଏହି କାର୍ଯ୍ୟ ୨୦୧୮ ଅକ୍ଟୋବର ମାସରେ ଶେଷ କରିବା ପାଇଁ ଲକ୍ଷ ଧାର୍ଯ୍ୟ ହୋଇଥିଲା । ହେଲେ ଆଜିପର୍ଯ୍ୟନ୍ତ ୩୦ ପ୍ରତିଶତ କାର୍ଯ୍ୟ ବି ଶେଷ ହୋଇନାହିଁ ।
ଓଭରବ୍ରିଜ କାର୍ଯ୍ୟ ମନ୍ଥର ଗତିରେ ଚାଲୁଥିବାରୁ ଅଞ୍ଚଳବାସୀଙ୍କ ମଧ୍ୟରେ ଆନ୍ଦୋଳନାତ୍ମକ ପ୍ରତିକ୍ରିୟା ପ୍ରକାଶ ପାଉଛି । ଆଗାମୀ ଦିନରେ ଭୋଟ ମାଧ୍ୟମରେ ଏହାର କଡା ଜବାବ ଦିଆଯିବା ନେଇ ତାଳଚେର ଭୋଟର ମତ ପ୍ରକାଶ କରିଛନ୍ତି । ଅପରପକ୍ଷେ ତାଳଚେର ମାଟିର ପୁଅ ଧର୍ମେନ୍ଦ୍ର ପ୍ରଧାନ କେନ୍ଦ୍ରରେ ମନ୍ତ୍ରୀ ଥାଇ ମଧ୍ୟ ତାଳଚେରରେ ମୁଖ୍ୟ ସମସ୍ୟା ପାଲଟିଥିବା ରେଳ ଧାରଣା ଏବଂ ରେଳ ଫାଟକ ପାଇଁ କୌଣସି ଆଖିଦୃଶିଆ ପଦକ୍ଷେପ ଗ୍ରହଣ ନ କରିବା ନିହାତି ନିନ୍ଦନୀୟ । ଏବେ ଶ୍ରୀ ପ୍ରଧାନ ସମ୍ବଲପୁର ଲୋକସଭା ପ୍ରାର୍ଥୀ ଭାବେ ନିର୍ବାଚନ ଲଢୁଥିବା ବେଳେ ଲୋକସଭା ଅନ୍ତର୍ଗତ ଭୋଟର ମାନେ ଶ୍ରୀ ପ୍ରଧାନ ନିଜ ମାଟି ପାଇଁ କେଉଁ ସବୁ ଉନ୍ନତି ମୂଳକ କାର୍ଯ୍ୟ କରିଛନ୍ତି ସେ ବାବଦରେ ପ୍ରଶ୍ନ କରନ୍ତୁ ବୋଲି ତାଳଚେରର ବୁଦ୍ଧିଜୀବୀ ମାନେ ଦାବି କରିଛନ୍ତି ।
କଥାରେ ଅଛି ଯିଏ ନିଜ ମାଟିର ହେଲାନି, ସେ କାହାର ହେବନି । ୧୦ବର୍ଷ କେନ୍ଦ୍ରମନ୍ତ୍ରୀ ଥାଇ ରାଜ୍ୟ କଥା ଛାଡ ,ଧର୍ମେନ୍ଦ୍ର ନିଜ ଭିଟାମାଟିର କିଛି ବି ଉନ୍ନତି କରିପାରିଲେ ନାହିଁ । ଖାଲି ମିଠି କଥା କହି ପ୍ରଚାର କଲେ, ସମ୍ବଲପୁରର ସ୍ବାଭିମାନୀ ଭୋଟର ତାର ନିଶ୍ଚିତ ଜବାବ ଦେବେ ।
ନିର୍ବାଚନ ପାଇଁ କମ୍ପୁଛି ରେଢ଼ାଖୋଲ
ନନ୍ଦିଘୋଷ ବ୍ୟୁରୋ: ପଶ୍ଚିମ ଓଡ଼ିଶାର ଏକ ପ୍ରମୁଖ ବିଧାନସଭା ଆସନ ହେଉଛି ରେଢ଼ାଖୋଲ। ଏଥର ଏହି ବିଧାନସଭା ନିର୍ବାଚନମଣ୍ଡଳୀଟି କାହା ଦଖଲକୁ ଯିବ ? ତାକୁ ନେଇ ଚାଲିଛି କଳ୍ପାନା ଜଳ୍ପନା । ତିନି ପ୍ରମୁଖ ଦଳ ମଧ୍ଯରେ ହେଉଛି କଡ଼ା ଟକ୍କର । ଜୋରଦାର ଚାଲିଛି ପ୍ରଚାର। ଦେଖିବା ରେଢ଼ାଖୋଲର ସ୍ଥିତି କ’ଣ।
ସଭା ସମିତି ଓ ଶୋଭାଯାତ୍ରାରେ କମ୍ପୁଛି ରେଢ଼ାଖୋଲ । ନିର୍ବାଚନ ପାଇଁ ପରିବେଶ ପୂରା ଗରମ । ଏହି ନିର୍ବାଚନମଣ୍ଡଳୀରେ ରେଢ଼ାଖୋଲ ବ୍ଲକର ୧୪ଟି ପଞ୍ଚାୟତ, ନାକଟିଦେଉଳ ବ୍ଳକର ୧୪ଟି ପଞ୍ଚାୟତ, ଯୁଯୁମରା ବ୍ଲକର ୧୮ଟି ପଞ୍ଚାୟତ, ମାନେଶ୍ବର ବ୍ଲକର ୭ଟି ପଞ୍ଚାୟତ ଓ ରେଢ଼ାଖୋଲ ଏନଏସସିର ୧୩ଟି ୱାର୍ଡ ରହିଛି । ଏଠାରେ ଅଛନ୍ତି ୨ ଲକ୍ଷ ୨ ହଜାର ୫୯୦ ଭୋଟର । ୧୯୫୧ଠାରୁ ୨୦୦୪ ମସିହା ପର୍ଯ୍ଯନ୍ତ ରେଢାଖୋଲ ବିଧାନସଭା ଆସନଟି ଅନୁସୂଚିତ ଜାତିଙ୍କ ପାଇଁ ଉଦ୍ଦିଷ୍ଟ ଥିଲା । ୨୦୦୯ରୁ ଅଣସଂରକ୍ଷିତ ହୋଇଯାଇଛି। ଏଥର ଏଠାରେ ତ୍ରିମୁଖୀ ଲଢ଼େଇ ହେଉଛି । ବିଜେଡି ପକ୍ଷରୁ ପ୍ରସନ୍ନ ଆଚାର୍ଯ୍ଯ ଓ ବିଜେପିରୁ ଦେବେନ୍ଦ୍ର ମହାପାତ୍ର ପ୍ରାର୍ଥୀ ହୋଇଛନ୍ତି । କଂଗ୍ରେସରୁ ଲଢୁଛନ୍ତି ଆସଫ ଅଲ୍ଲୀ ଖାନ୍ । ତିନି ପ୍ରାର୍ଥୀ ଜୋରଦାର ପ୍ରଚାର ଚଳାଇଛନ୍ତି।
ରେଢ଼ାଖୋଲ ବିଧାନସଭା ନିର୍ବାଚନମଣ୍ଡଳୀଟି ବିଜେଡିର ଗଡ଼ ପାଲଟିଛି । ୨୦୦୪ରେ ବିଜେପି ସହ ମେଣ୍ଟ ବେଳେ ବିଜେଡି ପ୍ରାର୍ଥୀ ସନାତନ ବିଶି ୩୬ ହଜାର ୨୬୦ ଭୋଟ ପାଇ ବିଜୟୀ ହୋଇଥିଲେ । କଂଗ୍ରେସର ରାମକୃଷ୍ଣ ମହାନନ୍ଦଙ୍କୁ ୨୪ ହଜାର ୪୬୫ ଓ ସ୍ଵାଧୀନ ପ୍ରାର୍ଥୀ ନାଉରୀ ନାଏକଙ୍କୁ ୨୨ ହଜାର ୭୭୬ ଭୋଟ ମିଳିଥିଲା । ୨୦୦୯ରେ ବିଜେଡି ପ୍ରାର୍ଥୀ ପ୍ରସନ୍ନ ଆଚାର୍ଯ୍ଯ ୩୭ ହଜାର ୭୧୮ ଭୋଟ ପାଇ ଜିତିଥିଲେ । କଂଗ୍ରେସର ଆସଫ ଅଲ୍ଲୀ ଖାନ୍ ୨୭ ହଜାର ୯୫୪ ଓ ବିଜେପି ପ୍ରାର୍ଥୀ ଶରତ ଚନ୍ଦ୍ର ସାହୁଙ୍କୁ ୧୯ ହଜାର ୨୧୭ ଭୋଟ ମିଳିଥିଲା । ୨୦୧୪ରେ ରୋହିତ ପୂଜାରୀ ବିଧାୟକ ଭାବେ ଜୟଯୁକ୍ତ ହୋଇଥିଲେ । ୨୦୧୯ରେ ବିଜେଡି ପ୍ରାର୍ଥୀ ରୋହିତ ପୂଜାରୀ ୫୭ ହଜାର ୧୧୧ ଭୋଟ ପାଇ ବିଜୟୀ ହୋଇଥିଲେ । କଂଗ୍ରେସର ଆସଫ ଅଲ୍ଲୀ ଖାନ୍ ୪୨ ହଜାର ୪୭୯ ଓ ବିଜେପିର ଦେବେନ୍ଦ୍ର ମହାପାତ୍ର ପାଇଥିଲେ ୪୨ ହଜାର ୨୭ ଖଣ୍ଡ ଭୋଟ । ଶୁଣନ୍ତୁ, ଫଳାଫଳ ନେଇ ବୁଦ୍ଧିଜୀବୀମାନେ କ’ଣ କହୁଛନ୍ତି ।
ରେଢ଼ାଖୋଲ ନିର୍ବାଚନମଣ୍ଡଳୀରେ ପିଇବା ପାଣି ସୁବିଧା ସାଙ୍ଗକୁ ପ୍ରତି ଘରକୁ ବିଦ୍ଯୁତ ସଂଯୋଗ ହୋଇଛି । ସନ୍ଥକବି ଭୀମ ଭୋଇଙ୍କ ସ୍ମୃତିପୀଠ, ଟାଉନ ହଲ, ଆଦର୍ଶ ବିଦ୍ୟାଳୟ, ନୂତନ ବସଷ୍ଟାଣ୍ଡ, ପଞ୍ଚଖଣ୍ଡା ମନ୍ଦିର, ଜଗନ୍ନାଥ ମନ୍ଦିର ଓ ଖେଳ ପଡ଼ିଆ ଆଦିର ହୋଇଛି ଉନ୍ନତି। ସବୁ ପ୍ରାର୍ଥୀ ନିଜ ନିଜ ପ୍ରସଙ୍ଗ ଧରି ଭୋଟ୍ ମାଗୁଥିବା ବେଳେ ଲୋକ ବିକାଶମୂଳକ କାମକୁ ଫୋକସ୍ କରୁଛନ୍ତି ।
ନାମାଙ୍କନ ଭରିଲେ କେନ୍ଦୁଝର ବିଜେଡି ସାଂସଦ ପ୍ରାର୍ଥୀ ଧନୁର୍ଜୟ ସିଦ୍ଧୁ
କେନ୍ଦୁଝର: ନାମାଙ୍କନ ଭରିଲେ କେନ୍ଦୁଝର ବିଜେଡି ସାଂସଦ ପ୍ରାର୍ଥୀ ଧନୁର୍ଜୟ ସିଦ୍ଧୁ। ଜିଲ୍ଲାପାଳଙ୍କ ନିକଟ ପହଞ୍ଚି ନିଜର ପ୍ରାର୍ଥୀପତ୍ର ଦାଖଲ କରିଛନ୍ତି । ସ୍ଥାନୀୟ କାଳୀ ପଡିଆ ଠାରୁ ହଜାର ହଜାର ବିଜେଡି କର୍ମୀ ଓ ନିଜର ସମର୍ଥକ ଙ୍କ ସହ ଆଦିବାସୀ ନୃତ୍ୟ , ମାଦଳ , ଢୋଲ ବଜାଇ ନାଚ ଗୀତ ତାଳେ ତାଳେ ଏକ ବିରାଟ ଶୋଭାଯାତ୍ରାରେ ବାହାରିଥିଲେ। ଶୋଭାଯାତ୍ରାରେ ଆସି ଜିଲ୍ଲାପାଳଙ୍କ ନିକଟରେ କେନ୍ଦ୍ରୀୟ ପର୍ଯ୍ୟବେକ୍ଷକଙ୍କ ସମ୍ମୁଖରେ ନିଜର ପ୍ରାର୍ଥୀ ପତ୍ର ଦାଖଲ କରିଛନ୍ତି । ନାମାଙ୍କନ ଦାଖଲ ସମୟରେ ଘସିପୁରା ବିଧାୟକ ପ୍ରାର୍ଥୀ ବଦ୍ରିନାରାୟଣ ପାତ୍ର,ଚମ୍ପୁଆ ବିଧାୟକ ପ୍ରାର୍ଥୀ ସନାତନ ମହାକୁଡ଼, ତେଲକୋଇ ବିଧାୟକ ପ୍ରାର୍ଥୀ ମାଧବ ସର୍ଦାର, ଉପସ୍ଥିତ ଥିଲେ। ପାଟଣା ବିଧାୟକ ପ୍ରାର୍ଥୀ ଜଗନ୍ନାଥ ନାୟକ, କେନ୍ଦୁଝର ବିଧାୟକ ପ୍ରାର୍ଥୀନୀ ମୀନା ମାଝୀ, କରଞ୍ଜିଆ ବିଧାୟକ ପ୍ରାର୍ଥୀ ବାସନ୍ତୀ ହେମ୍ବ୍ରମ,ଜିଲ୍ଲା ବିଜେଡି ସଭାପତି କୁଶ ଆପଟ, ଯୁବ ବିଜେଡି ରାଜ୍ୟ ଉପସଭାପତି ସୌମ୍ୟ ଶଙ୍କର ଚକ୍ରଙ୍କ ସହିତ ହଜାର ହଜାର ବିଜେଡି ନେତା ଓ କର୍ମୀ ଉପସ୍ଥିତ ଥିଲେ। ପ୍ରାର୍ଥୀ ପତ୍ର ଦାଖଲ ପରେ ଜିଲ୍ଲାର ବିକାଶ ପାଇଁ କାମ କରିବି ବୋଲି କହିଛନ୍ତି ଧନୁର୍ଜୟ ସିଦ୍ଧୁ।
ଜନ୍ମଦିନରେ ଜାଣନ୍ତୁ ଆଶିଷ ନେହେରାଙ୍କ ପ୍ରେମ କାହାଣୀ
ନନ୍ଦିଘୋଷ ବ୍ୟୁରୋ: ଟିମ ଇଣ୍ଡିଆର ପୂର୍ବତନ କ୍ରିକେଟର ଆଶିଷ ନେହେରା । ଆଜି ହେଉଛି ଏହି ମହାନ ବୋଲରଙ୍କ ଜନ୍ମଦିନ । ୪୫ ବର୍ଷରେ ପାଦ ଥାପିଛନ୍ତି ନେହେରା । ତେବେ ନେହେରାଙ୍କ ଜନ୍ମଦିନରେ ଆସନ୍ତୁ ଜାଣିବା ତାଙ୍କ ପ୍ରେମ କାହାଣୀ ସମ୍ପର୍କରେ । ନେହେରା ଅଭିନେତ୍ରୀ ରୁଷମାଙ୍କୁ ବିବାହ କରିଛନ୍ତି । ତେବେ ସେମାନଙ୍କ ସାକ୍ଷାତ ପ୍ରଥମେ କ୍ରିକେଟ ଗ୍ରାଉଣ୍ଡରେ ହୋଇଥିଲା । ୨୦୦୨ରେ ଇଂଲଣ୍ଡ ବିପକ୍ଷ ଭାରତ ଓବାଲରେ ମ୍ୟାଚ ଖେଳୁଥିଲା । ଏହି ସମୟରେ ପ୍ରଥମେ ଉଭୟଙ୍କ ଭେଟ ହୋଇଥିଲା । ଏହାପରେ ଉଭୟଙ୍କ ସମ୍ପର୍କ ବଢ଼ିଥିଲା । ପ୍ରଥମେ ବନ୍ଧୁତା ଏବଂ ପରେ ପ୍ରେମ ହୋଇଥିଲା । ୭ ବର୍ଷ ଧରି ଉଭୟ ଡେଟ୍ କରିଥିଲେ । ପରେ ନେହେରା ତାଙ୍କୁ ବିବାହ କରିବା ପାଇଁ କହିଥିଲେ । ପ୍ରଥମେ ଏହାକୁ ବିଶ୍ବସ କରି ନଥିଲେ ରୁଷମା । ମାତ୍ର ପରଦିନ ପୁଣିଥରେ ବିବାହ କରିବା କଥା କହିଥିବାବେଳେ ସେ ଏହାକୁ ବିଶ୍ବାସ କରିଥିଲେ ।
ତେବେ ନେହେରା ଏକ ଇଣ୍ଟଭିୟ୍ୟୁରେ କହିଥିଲେ କି, ବିବାହ ପାଇଁ ଯୋଜନା ମାତ୍ର ୧୫ ମିନିଟରେ ସ୍ଥିର କରାଯାଇଥିଲା । ସାଙ୍ଗମାନଙ୍କ ସହ କଥା ହେବାବେଳେ ହଠାତ ଏଭଳି ଯୋଜନା କରିଥିଲେ । ଏପ୍ରିଲ ୨, ୨୦୦୯ରେ ଉଭୟ ବିବାହ ବନ୍ଧନରେ ବାନ୍ଧି ହୋଇଥିଲେ । କହି ରଖୁଛୁ କି, ୧୯୯୯ ମସିହାରେ ଶ୍ରୀଲଙ୍କା ବିପକ୍ଷରେ ଆନ୍ତର୍ଜାତୀୟ କ୍ରିକେଟରେ ଡେବ୍ୟୁ କରିଥିଲେ ନେହେରା । ସେ ଭାରତ ପାଇଁ ୧୭ଟି ଟେଷ୍ଟ, ୧୨୦ଟି ଦିନିକିଆ ଏବଂ ୨୭ଟି ଟି-୨୦ ଖେଳିଛନ୍ତି । ୨୦୦୩ ବିଶ୍ବକପରେ ଇଂଲଣ୍ଡ ବିପକ୍ଷରେ ମାତ୍ର ୨୩ ରନ ବିନିମୟରେ ୬ଟି ଓ୍ବିକେଟ ଅକ୍ତିଆର କରିଥିଲେ । ଯାହାକି ନେହେରାଙ୍କ ରେକର୍ଡ ମଧ୍ୟ ରହିଛି । ତେବେ ୨୦୧୧ ବିଶ୍ବକପରେ ଭାରତ ଚାମ୍ପିୟନ ଟିମରେ ନେହେରା ମଧ୍ୟ ଅଂଶ ଥିଲେ ।
ନୂଆ ଅବତାରରେ ଆସିବେ ନଜର, ’ରାକ୍ଷସ’ରେ ରଣବୀର
ନନ୍ଦିଘୋଷ ବ୍ୟୁରୋ: ରଣବୀର ସିଂଙ୍କ ଅଭିନୟ ସବୁବେଳେ ଚର୍ଚ୍ଚାରେ ରହିଥାଏ । ଏକ ମାଥୋଲୋଜିକାଲ ଫିଲ୍ମରେ ନଜର ଆସିବେ ରଣବୀର ସିଂ । ’ହନୁମାନ’ର ନିର୍ଦ୍ଦେଶକ ପ୍ରଶାନ୍ତ ବର୍ମାଙ୍କ ଦ୍ବାରା ଏହା ନିର୍ଦ୍ଦେଶନା ଦିଆଯିବ । ପ୍ରଥମ ବଲିଉଡ ଫିଲ୍ମରେ ନିର୍ଦ୍ଦେଶନା ଭାର ସମ୍ଭାଳିବେ ପ୍ରଶାନ୍ତ । ଏହା ଏକ ମେଗା ବଜେଟ ଫିଲ୍ମ ହେବ ବୋଲି ସୂଚନା ମିଳିଛି । ତେବେ ଏହି ଫିଲ୍ମର ପ୍ରଯୋଜନା ପାଇଁ ଏକ ପ୍ରଡକ୍ସନ ପାର୍ଟନର ମିଳିଯାଇଛି । ତେବେ ଏହି ଫିଲ୍ମର ସୁଟିଂ ଖୁବଶୀଘ୍ର ଆରମ୍ଭ ହେବାକୁ ଯାଉଛି । ଫିଲ୍ମକୁ ନେଇ ଏକ ବଡ଼ ଅପଡେଟ୍ ସମାନାକୁ ଆସିଛି । ଏହି ଫିଲ୍ମର ନାମ ରହିବ ’ରାକ୍ଷସ’ । ଯଦିଓ ଏନେଇ ପ୍ରଯୋଜନା ପକ୍ଷରୁ କୌଣସି ସୂଚନା ଦିଆଯାଇନାହିଁ କିନ୍ତୁ ରଣବୀର ସିଂଙ୍କ ଆଗାମୀ ଫିଲ୍ମର ନାମ ରହିଛି ରାକ୍ଷସ । ନକିଟରେ ହନୁମାନ ଜୟନ୍ତୀ ଅବସରରେ ଫିଲ୍ମର ସୁଟିଂ ପୂର୍ବରୁ ପୂଜାର୍ଚ୍ଚନା କରାଯାଇଛି ।
ବିଶାଳ ଶୋଭାଯାତ୍ରାରେ ଆସି ନାମାଙ୍କନ ଭରିଲେ ବାଲିଗୁଡ଼ା ବିଜେଡି ବିଧାୟକ ପ୍ରାର୍ଥୀ ଚକ୍ରମଣୀ କହଁର
ନନ୍ଦିଘୋଷ ବ୍ୟୁରୋ: କନ୍ଧମାଳ ଜିଲ୍ଲା ବାଲିଗୁଡ଼ାରେ ବିଜେଡ଼ିର ବିଶାଳ ଶୋଭାଯାତ୍ରା। ବିଶାଳ ଶୋଭାଯାତ୍ରାରେ ଆସି ନାମାଙ୍କନ ଭରିଲେ ବାଲିଗୁଡ଼ା ବିଧାୟକ ପ୍ରାର୍ଥୀ ଚକ୍ରମଣୀ କହଁର। ଉପଜିଲ୍ଲାପାଳଙ୍କ କାର୍ଯ୍ୟାଳୟରେ ପହଞ୍ଚି ନାମାଙ୍କନପତ୍ର ଦାଖଲ କରିଛନ୍ତି। ଚକ୍ରମଣୀ କହଁରଙ୍କ ନାମାଙ୍କନ ପତ୍ର ଦାଖଲ ଅବସରରେ ଜନ ସମୁଦ୍ର ପାଲଟିଲା ବାଲିଗୁଡ଼ା ସହର। ସଂଯୋଜକ ଟୁନା ଦାସଙ୍କ ନେତୃତ୍ୱରେ ବାଲିଗୁଡ଼ା ନିର୍ବାଚନ ମଣ୍ଡଳୀର ଚାରୋଟି ବ୍ଲକର ପ୍ରାୟ ୩୦ ହଜାର ସମର୍ଥକଙ୍କ ସହ ବିଶାଳ ପଟୁଆରରେ ଆସିଥିଲେ ଚକ୍ରମଣୀ । କନ୍ଧମାଳ ସାଂସଦ ପ୍ରାର୍ଥୀ ଡ଼.ଅଚ୍ୟୁତ ସାମନ୍ତ, ଜିଲ୍ଲା ପର୍ଯ୍ୟବେକ୍ଷକ ବିଜୟ ନାୟକ, ବାଲିଗୁଡ଼ା ନିର୍ବାଚନ ମଣ୍ଡଳୀ ପର୍ଯ୍ୟବେକ୍ଷକ ଅଜୟ ମହାରଣା ଉପସ୍ଥିତ ଥିଲେ। ଜିଲ୍ଲା ପରିଷଦ ଅଧ୍ୟକ୍ଷାଙ୍କ ସମେତ ଚାରୋଟି ବ୍ଲକର ସଭାପତି, ବହୁ ନେତା ଓ ବରିଷ୍ଠ କର୍ମକର୍ତ୍ତା ସାମିଲ୍ ହୋଇଥିଲେ। ବିଜୁ ଜନତା ଦଳ ପ୍ରତି ସମସ୍ତଙ୍କର ଆଶୀର୍ବାଦ ରହିଛି। ବିପୁଳ ପରିମାଣରେ ଶଙ୍ଖ ଚିହ୍ନରେ ଭୋଟ୍ ଦେଇ ବିଜୟୀ କରାଇବା ପାଇଁ ଭୋଟରଙ୍କୁ ନିବେଦନ କରିଛନ୍ତି ଚକ୍ରମଣୀ କହଁର।
କଲବଲ କରୁଛି ଖରା, ତାତିରୁ ମିଳୁନି ନିସ୍ତାର
ଭୁବନେଶ୍ବର: ତାତିରୁ ନାହିଁ ନିସ୍ତାର । ସୋମବାର ଦିନ ସାଢେ ଦୁଇଟା ସୁଦ୍ଧା କେନ୍ଦୁଝର ହୋଇଛି ସବୁଠୁ ଉତ୍ତପ୍ତ । କେନ୍ଦୁଝରରେ ସର୍ବାଧିକ ୪୩ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ଝାରସୁଗୁଡାରେ ୪୨.୮, ସମ୍ବଲପୁରରେ ୪୨.୬, ହୀରାକୁଦରେ ୪୧.୮, ରାଉରକେଲାରେ ୪୧.୮, ବାଲେଶ୍ୱରରେ ୪୧.୪ ଡିଗ୍ରୀ ତାପମାତ୍ରା ରେକର୍ଡ ହୋଇଛି । ଆଜି ରାଜଧାନୀ ଭୁବନେଶ୍ବରର ତାପମାତ୍ରା ରହିଛି ୪୧.୩ । ସେହିପରି ଚାନ୍ଦବାଲିରେ ୪୦.୭, ପୁରୀରେ ୩୪.୬, ଗୋପାଳପୁରରେ ୩୩.୨ ଓ ପାରାଦୀପରେ ୩୩.୧ ଡିଗ୍ରୀ ତାତି ରହିଛି । ଆହୁରି ୩ ଦିନ ପ୍ରବଳ ଗ୍ରୀଷ୍ମ ପ୍ରବାହ ଜାରି ରହିବ ବୋଲି ସତର୍କତା ଜାରି କରିଛି ଆଞ୍ଚଳିକ ପାଣିପାଗ କେନ୍ଦ୍ର। ଆସନ୍ତା ୨୪ ଘଣ୍ଟା ପାଇଁ ସିଭିୟର ହିଟ ୱେବ ଜାରି କରାଯାଇଛି ।
୧୦ଟି ଜିଲ୍ଲା ବାଲେଶ୍ୱର, ମୟୂରଭଞ୍ଜ, କେନ୍ଦୁଝର, ଢେଙ୍କାନାଳ, ବୌଦ୍ଧ, ଅନୁଗୁଳ,ନୟାଗଡ, ଖୋର୍ଦ୍ଧା, କଟକକୁ ରେଡ୍ ୱାର୍ଣ୍ଣିଂ ଜାରି ହୋଇଥିବାବେଳେ ଏହି ଜିଲ୍ଲା ଗୁଡ଼ିକରେ ୪୦ ଡିଗ୍ରୀ ଉପରେ ରହିବ ତାପମାତ୍ରା । ସେହିପରି ବଲାଙ୍ଗୀର, ସୋନପୁର, ଗଞ୍ଜାମ, ମାଲକାନଗିରି, ଭଦ୍ରକ, ଜୟପୁର, ଦେବଗଡ, ସମ୍ବଲପୁର, ନୂଆପଡା, ଝାରସୁଗୁଡା, ଗଜପତି, ସୁନ୍ଦରଗଡ ଜିଲ୍ଲାକୁ ଅରେଞ୍ଜ ଆଲର୍ଟ ଜାରି ହୋଇଛି । ରାଜ୍ୟରେ ଲଗାତାର ୧୪ ଦିନ ଧରି ହିଟୱେବ ଜାରି ରହିଛି । ଦିନ ୧୧ଟାରୁ ୩ଟା ମଧ୍ଯରେ ଖରାକୁ ନବାହାରିବାକୁ ପରାମର୍ଶ ଦିଆଯାଇଛି । ଉପକୂଳରେ ତାପମାତ୍ରା ୨ରୁ ୩ ଡିଗ୍ରୀ ଖସିବା ସହ ଆର୍ଦ୍ରତା ପ୍ରଭାବରେ ଲାଗି ରହିବ ଗୁଳୁଗୁଳି । ମାତ୍ର ଆଭ୍ୟନ୍ତରୀଣ ଓଡ଼ିଶାରେ ତାପମାତ୍ରାରେ ବିଶେଷ ପରିବର୍ତ୍ତନ ହେବନି । ସାମୁଦ୍ରିକ ଝଡ଼ର ପ୍ରଭାବ ରହିଲେବି ରାଜ୍ୟରେ ଉଷ୍ମ ଦିନ ଅନୁଭୂତ ହେବ । ୫ ତାରିଖ ବେଳକୁ କାଳବୈଶାଖୀ ହେବାର ସମ୍ଭାବନା ରହିଛି । ବଙ୍ଗୋପସାଗର ପବନ ବହିଲା ପରେ ସାମାନ୍ୟ ତାପମାତ୍ରା ହ୍ରାସ ପାଇବ ବୋଲି ଆକଳନ କରିଛି ପାଣିପାଗ ବିଭାଗ ।
ଅମିତ ଶାହଙ୍କ ଭିଡିଓ ଭାଇରାଲ ପ୍ରସଙ୍ଗ, ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡିଙ୍କୁ ସମନ
ନନ୍ଦିଘୋଷ ବ୍ୟୁରୋ: କେନ୍ଦ୍ର ଗୃହମନ୍ତ୍ରୀ ଅମିତ ଶାହଙ୍କ ଏକ ଫେକ୍ ଭିଡିଓ ଭାଇାଲ ମାମଲା । ତେଲେଙ୍ଗାନା ମୁଖ୍ୟମନ୍ତ୍ରୀ ରେବନ୍ତ ରେଡ୍ଡିଙ୍କୁ ସମନ । ଦିଲ୍ଲୀ ପୋଲିସ ରେବନ୍ତଙ୍କ ପଚରା ଉଚରା କରିବା ପାଇଁ ସମନ ପଠାଇଛି । ତେବେ ଏହା ପୂର୍ବରୁ ଦିଲ୍ଲୀ ପୋଲିସର ସାଇବର ସ୍ପେଶାଲ ସେଲର ସାଇବର ୟୁନିଟ୍ IFSOର ଏକ ଟିମ ସୋମବାର ସକାଳୁ ତେଲେଙ୍ଗାନାରେ ପହଞ୍ଚି ମାମଲାର ତଦନ୍ତ ଆରମ୍ଭ କରିଛି । ଏହି ଘଟଣାରେ ୫ ଜଣଙ୍କୁ ଚିହ୍ନଟ କରାଯାଇଛି । ସେମାନଙ୍କୁ ପଚରା ଉଚରା କରାଯାଉଥିବାବେଳେ ଏହି ଘଟଣାରେ ରେବନ୍ତ ରେଡ୍ଡିଙ୍କୁ ସମନ କରାଯାଇଛି ।
କହି ରଖୁଛୁ କି, AI ଦ୍ବାରା ଏକ ଭିଡିଓ ପ୍ରସ୍ତୁତ କରାଯାଇ ଭାଇରାଲ ହେଉଛି । ଯେଉଁଥିରେ ସଂରକ୍ଷଣ ବ୍ୟବସ୍ଥାକୁ ନେଇ ଅମିତ ଶାହଙ୍କ ଏକ ବକ୍ତବ୍ୟ ଭାଇରାଲ ହେଉଛି । ବାସ୍ତବରେ ଏହା ଅମିତ ଶାହ କହିନଥିବା ସ୍ପଷ୍ଠ ହେବା ପରେ ଅଭିଯୋଗ କରାଯାଇଛି । ଏହି ଆଧାରରେ ସାଇବର ସେଲ ପକ୍ଷରୁ ତଦନ୍ତ ଆରମ୍ଭ କରାଯାଇଛି । ବିଜେପି ଆଇଟି ସେଲ ମୁଖ୍ୟ ଅମିତ ମାଲବିୟ କହିଛନ୍ତି କି, ଏହା ଏକ ଫେକ୍ ଭିଡିଓ । ଯାହାକୁ ନେଇ ରବିବାର ବିଜେପି ପକ୍ଷରୁ ଅଭିଯୋଗ କରାଯାଇଥିବାବେଳେ ଦିଲ୍ଲୀ ପୋଲିସ ପକ୍ଷରୁ ସୋମବାର ଯାଞ୍ଚ ଆରମ୍ଭ ହୋଇଛି ।