ଭୁବନେଶ୍ୱର : ଓଡ଼ିଶା ଖଦି ଓ ଗ୍ରାମ୍ୟ ଉଦ୍ୟୋଗ ବୋର୍ଡ ସଭାପତି ପଦରୁ ଇସ୍ତଫା ଦେଲେ ସଂଗ୍ରାମ କେଶରୀ ପାଇକରାୟ। IMSME ବିଭାଗକୁ ପଠାଇଲେ ଇସ୍ତଫା ପତ୍ର। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ବରେ ୨ ଥର ସଭାପତି ଦାୟିତ୍ୱରେ ଥିଲେ ସଂଗ୍ରାମ କେଶରୀ । ୩୧ ଅଗଷ୍ଟ ୨୦୧୯ରୁ ୫ ଜୁନ ୨୦୨୨ ପର୍ଯ୍ୟନ୍ତ ଦାୟିତ୍ୱରେ ଥିଲେ। ଏହା ପରେ ୨୧ ଅକ୍ଟୋବର ୨୦୨୨ରୁ ୮ ଜୁନ ୨୦୨୪ ପର୍ଯ୍ୟନ୍ତ ସଭାପତି ଦାୟିତ୍ୱରେ ଥିଲେ। ତାଙ୍କ ଅମଳରେ ଖଦି ବୋର୍ଡ଼ର ଥିବା ଅନେକ ଜାଗାକୁ ଜବରଦଖଲ ମୁକ୍ତ କରାଯାଇଛି। ରାଜ୍ୟ ସରକାରଙ୍କ ନିଷ୍ପତ୍ତି କ୍ରମେ ଭୀମପୁରୀ ୟୁଟିଲିଟି ମଲର କାମ ଆରମ୍ଭ ହୋଇଛି। ସେହି ସମୟରେ ୩ ହଜାରରୁ ଅଧିକ ଯୁବପୀଢ଼ିଙ୍କୁ ଗ୍ରାମଉଦ୍ୟୋଗ ଆରମ୍ଭ କରିବା ପାଇଁ ଲୋନ ଦିଆଯାଇଛି। ରାଜ୍ୟରେ ମହୁ ଚାଷର ପ୍ରଚାର ପ୍ରସାର ପାଇଁ ମହୁ ବାକ୍ସ, ମହୁ ମାଛି ଦଳ ତଥା ଆନୁସଙ୍ଗିକ ଉପକରଣ ଯୋଗାଇ ଦିଆଯାଇଛି।
ଶପଥଗ୍ରହଣ ଉତ୍ସବ ଲାଗି ଦିଲ୍ଲୀରେ ହାଇସିକ୍ଯୁରିଟି ଆଲର୍ଟ
ନୂଆଦିଲ୍ଲୀ : ଜବାହାରଲାଲ ନେହେରୁଙ୍କ ପରେ ୩ଥର ପାଇଁ କ୍ରମାଗତ ତୃତୀୟ ଥର ଲାଗି ପ୍ରଧାନମନ୍ତ୍ରୀ ଦାୟିତ୍ବ ସମ୍ଭାଳିବେ ନରେନ୍ଦ୍ର ମୋଦୀ । ନବଗଠିତ ମନ୍ତ୍ରିମଣ୍ଡଳ ବି ଶପଥ ନେବ । ଉତ୍ସବରେ ସାମିଲ ହେବେ ୮ ହଜାରରୁ ଅଧିକ ଅତିଥି । ଶପଥ ଗ୍ରହଣ ସମାହାରରେ ବିଦେଶୀ ନେତାଙ୍କ ସୁରକ୍ଷାକୁ ଦୃଷ୍ଟିରେ ରଖି ସଂସଦ ଭବନ , ରାଷ୍ଟ୍ରପତି ଭବନ ଏବଂ ଉତ୍ତର- ଦକ୍ଷିଣ ବ୍ଲକର ପ୍ରତ୍ୟେକ କୋଣ ଅନୁକୋଣରେ କମାଣ୍ଡା ଏବଂ ପୋଲିସ କର୍ମଚାରୀ ନିୟୋଜିତ ରହିବେ । ଏହା ସହିତ ୧୪୪ ଧାରା ଲାଗୁ ହେବା ସହ ୫୦୦ ସିସିଟିଭି କ୍ୟାମେରା ମଧ୍ୟ ଲଗାଯାଇଛି ।
ସେପଟେ ଦିଲ୍ଲୀରେ ହାଇସିକ୍ଯୁରିଟି ବ୍ଯବସ୍ଥା କରାଯାଇଛି । ରାଜଧାନୀର ପ୍ରମୁଖ ହୋଟେଲ ଲୀଲା, ତାଜ, ଆଇଟିସି ମୌର୍ଯ୍ୟ, କ୍ଲାରିଜସ, ଓବରୟକୁ କଡା ସୁରକ୍ଷା ବଳୟରେ ରଖାଯାଇଛି । ଦିଲ୍ଲୀରେ ତ୍ରିସ୍ତରୀୟ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି । ୨୫୦୦ ପୋଲିସ ଫୋର୍ସ, ୫ କମ୍ପାନୀ ପାରାମିଲିଟାରି ଫୋର୍ସ, ଏନଏସଜି କମାଣ୍ଡୋ ସହ ଡ୍ରୋନ ଏବଂ ସ୍ନାଇପରଙ୍କୁ ମୁତୟନ କରାଯାଇଛି ।
ଶପଥ ପାଇଁ ସମ୍ଭାବ୍ୟ ମନ୍ତ୍ରୀଙ୍କୁ ଫୋନ୍ କଲ୍
ନୂଆଦିଲ୍ଲୀ : ଆଜି ଏନଡିଏ ସଂସଦୀୟ ଦଳର ନେତା ତଥା ଲଗାତାର ୩ୟ ଥର ପ୍ରଧାନମନ୍ତ୍ରୀ ପଦବୀରେ ଶପଥ ଗ୍ରହଣ କରିବେ ନରେନ୍ଦ୍ର ମୋଦୀ । ଏହା ମଧ୍ୟରେ ନେତା ମାନଙ୍କୁ କ୍ୟାବିନେଟରେ ସାମିଲ ହେବାକୁ ଫୋନ କଲ୍ ଆସିବା ଆରମ୍ଭ ହୋଇ ଗଲାଣି । ସୂଚନା ଅନୁସାରେ ଅମିତ ଶାହ, ନୀତିନ ଗଡ଼କରୀଙ୍କୁ ଫୋନ କଲ୍ ଆସି ସାରିଛି । ରାଜନାଥ ସିଂ, ପ୍ରହଲ୍ଲାଦ ଯୋଶୀ, ଟିଡିପି ସାଂସଦ ରାମମୋହନ ନାଇଡୁ, ଜୀତନ ରାମ ମାଝୀ, ଜୟନ୍ତ ଚୌଧୁରୀ , ଅନୁପ୍ରିୟା ପଟେଲ, ପି ଚନ୍ଦ୍ରଶେଖର ସୁଦେଶ ମହତେ, ଏଚ୍ ଡି କୁମାର ସ୍ୱାମୀ ଆଦିଙ୍କୁ କ୍ୟାବିନେଟରେ ଶପଥ ନେବାକୁ ଫୋନ କଲ୍ ଆସିଥିବା ସୂଚନା ମିଳିଛି ।
ସର୍ବାନନ୍ଦ ସୋନୱଲ,ଏସ୍ ଜୟଶଙ୍କର, ଧର୍ମେନ୍ଦ୍ର ପ୍ରଧାନ, ଜୁଏଲ ଓରାମ, ଚିରାଗ ପାଶ୍ଵାନ, ଶିବରାଜ ସିଂହ ଚୌହାନ, ଚନ୍ଦ୍ରଶେଖର ପ୍ରେମାସାନି, ଲଲନ ସିଂହ, ରାମନାଥ ଠାକୁର ପ୍ରମୁଖଙ୍କୁ ଆଜି ପିଏମଓ ପକ୍ଷରୁ ଫୋନ୍ କଲ୍ ଆସିଥିଲା। ସମ୍ଭାବ୍ଯ କେନ୍ଦ୍ରମନ୍ତ୍ରୀମାନଙ୍କୁ ମୋଦିଙ୍କ ସରକାରୀ ବାସଭବନକୁ ଡକା ଯାଇଥିଲା। ସମସ୍ତଙ୍କୁ ଚା ପାନ ପାଇଁ ଡାକିଥିଲେ ମୋଦି। ମନ୍ତ୍ରିମଣ୍ଡଳରେ ଏମାନେ ସମସ୍ତେ ସାମିଲ ହେବାର ସମ୍ଭାବନା ଅଛି।
୪ ଦିନ ପୂର୍ବରୁ ଓଡ଼ିଶା ଛୁଇଁଲା ମୌସୁମୀ , ଦକ୍ଷିଣ ଓଡ଼ିଶାରେ ବର୍ଷା ଜାରି
ଭୁବନେଶ୍ୱର : ଓଡ଼ିଶା ଛୁଇଁଛି ମୌସୁମୀ । ସ୍ବାଭାବିକ ସମୟର ୪ ଦିନ ପୂର୍ବରୁ ମୌସୁମୀର ଓଡ଼ିଶା ପ୍ରବେଶ । ଗତକାଲି ମାଲକାନଗିରି ଜିଲ୍ଲାରେ ଦକ୍ଷିଣ ପଶ୍ଚିମ ମୌସୁମୀ ବାୟୁ ସକ୍ରିୟ ହୋଇଛି। ଆଗାମୀ ୪ ଦିନ ମଧ୍ୟରେ ଦକ୍ଷିଣ ଓଡ଼ିଶାର ବାକି ଜିଲ୍ଲାରେ ସକ୍ରିୟ ହେବାନେଇ ପାଗ ଅନୁକୁଳ ରହିଛି। ପର୍ଯ୍ୟାୟକ୍ରମେ ରାଜ୍ଯର ଅନ୍ୟ ଜିଲ୍ଲାକୁ ଏହା ଅଗ୍ରସର ହେବ ।
ଓଡ଼ିଶାରେ ମୌସୁମୀ ଛୁଇଁବାର ସ୍ବାଭାବିକ ସମୟ ଜୁନ୍ ୧୨ ତାରିଖ ରହିଥିବା ବେଳେ ୪ ଦିନ ପୂର୍ବରୁ ମୌସୁମୀ ଛୁଇଁଛି । ଯାହା ଚାଷୀଙ୍କ ପାଇଁ ଖୁସି ଆଣିଦେଇଛି। ଦକ୍ଷିଣକୁ ମୌସୁମୀ ଛୁଇଁଥିବାବେଳେ ଜଳୁଛି ପଶ୍ଚିମ ଓଡ଼ିଶା । ବଲାଙ୍ଗିର, ବରଗଡ, ନୂ୍ଆପଡା, ସୋନପୁର, ବୌଦ୍ଧ ଜିଲ୍ଲାରେ ଜାରି ରହିଛି ହିଟ୍ ଓ୍ବେଭ୍ କଣ୍ଡିସନ୍ । ଏହି ସବୁ ଜିଲ୍ଲାରେ ୪୦ ରୁ ୪୫ ଡିଗ୍ରୀ ମଧ୍ୟରେ ତାପମାତ୍ରା ରେକର୍ଡ ହେଉଛି ।
ସେହିଭଳି ଉତ୍ତର ଉପକୂଳ ସମେତ ଦକ୍ଷିଣ ଓଡ଼ିଶାର ୧୧ଟି ଜିଲ୍ଲାରେ ହଟ୍ ଆଣ୍ଡ ହ୍ୟୁମିଡ୍ ସ୍ଥିତି ଜାରି ରହିବ। ଏଥିପାଇଁ ୧୧ ଜିଲ୍ଲାକୁ ୟେଲୋ ଆଲର୍ଟ ଜାରି କରାଯାଇଛି। ୧୨ ତାରିଖ ପର୍ଯ୍ୟନ୍ତ ଏଭଳି ଗ୍ରୀଷ୍ମପ୍ରବାହ ଜାରି ରହିବ ବୋଲି ଆକଳନ କରିଛି ପାଣିପାଗ କେନ୍ଦ୍ର। ଗରମ ଗୁଳିଗୁଳି ଭିତରେ କିଛି ଜିଲ୍ଲାରେ ଘଡଘଡି ବିଜୁଳି ସହ ବର୍ଷା ପବନ ହେବାର ସମ୍ଭାବନା ରହିଛି।
ଜମ୍ମୁ- କାଶ୍ମୀରରେ ବିଧାନସଭା ନିର୍ବାଚନ ପାଇଁ ପ୍ରସ୍ତୁତି ଆରମ୍ଭ, ଖୁବ୍ ଶୀଘ୍ର ହେବ ତାରିଖ ଘୋଷଣା
ନୂଆଦିଲ୍ଲୀ : ଖୁବ୍ ଶୀଘ୍ର ଜମ୍ମୁ- କାଶ୍ମୀରରେ ହେବ ନିର୍ବାଚନ । ତେବେ ବିଧାନସଭା ନିର୍ବାଚନ ତାରିଖ ଘୋଷଣା ଏହି ମାସରେ ହେବା ନେଇ ଆଶା କରାଯାଉଛି । ଲୋକସଭା ନିର୍ବାଚନ ପରେ କେନ୍ଦ୍ରଶାସିତ ଅଞ୍ଚଳରେ ଲୋକତନ୍ତ୍ର ଏବଂ ମତଦାନ ପ୍ରତି ସାଧାରଣ ଜନତାଙ୍କ ଉତ୍ସାହ ଦେଖି ନିର୍ବାଚନ ଆୟୋଗ ମଧ୍ୟ ଉତ୍ସାହିତ ଅଛନ୍ତି । ବିଧାନସଭା ନିର୍ବାଚନ ମଧ୍ୟ ଏହି ସକରାତ୍ମକ ମାହୋଲରେ ସମ୍ପନ୍ନ ହେବା ନେଇ ସେ ଆଶା ରଖିଛନ୍ତି । ସୂଚନା ଅନୁଯାୟୀ, ଅଗଷ୍ଟ ମାସ ଭିତରେ ଜମ୍ମୁ –କାଶ୍ମୀରରେ ବିଧାନସଭା ନିର୍ବାଚନ ସମାପ୍ତ ହୋଇପାରେ ।
୨୦୧୯ରେ ଧାରା ୩୭୦ ଉଚ୍ଛେଦ ପରେ ଜମ୍ମୁ- କାଶ୍ମୀରରେ ପ୍ରଥମ ନିର୍ବାଚନ ହୋଇଥିଲା । ତେବେ ଚଳିତ ବର୍ଷ ଖୁବ୍ ଶୀଘ୍ର କେନ୍ଦ୍ରଶାସିତ ଅଞ୍ଚଳ ଏବଂ ଜମ୍ମୁ- କାଶ୍ମୀରରେ ନିର୍ବାଚନ ପ୍ରକ୍ରିୟା ଆରମ୍ଭ ହେବା ନେଇ ଇସିଆଇ ପକ୍ଷରୁ କୁହାଯାଇଛି । ତେବେ ବିଧାନସଭା ନିର୍ବାଚନ ପାଇଁ ନିର୍ବାଚନ ଆୟୋଗ ପକ୍ଷରୁ ପ୍ରସ୍ତୁତି ଆରମ୍ଭ ହୋଇଗଲାଣି । ଶୁକ୍ରବାର ଇସି ରାଜନୈତିକ ଦଳ ମାନଙ୍କୁ ନିର୍ବାଚନୀ ଚିହ୍ନ ଚୟନ ସହ ଆବେଦନ ଆରମ୍ଭ କରିବାକୁ ପରାମର୍ଶ ଦେଇଛନ୍ତି । ଅର୍ଥାତ୍ ସମଗ୍ର ରାଜ୍ୟରେ ଏପରି ରାଜନୈତିକ ଦଳ ଯେଉଁମାନେ ଆୟୋଗରେ ପଞ୍ଜୀକୃତ ହୋଇଥିଲେ ମଧ୍ୟ ଆଞ୍ଚଳିକ ଦଳର ମାନ୍ୟତା ପାଇ ନାହାଁନ୍ତି, ସେମାନେ ମଧ୍ୟ ଏକ ନିର୍ବାଚନୀ ଚିହ୍ନରେ ପ୍ରାର୍ଥୀ ହୋଇ ପାରିବେ । କିନ୍ତୁ ସେମାନଙ୍କୁ ବିକଳ୍ପ ପ୍ରତୀକ ବା ଚିହ୍ନ ମଧ୍ୟରେ ନିଜ ପସନ୍ଦର ନିର୍ବାଚନୀ ପ୍ରତୀକ ବାଛିବାକୁ ପଡିବ ।
ଧରାପଡ଼ିଲା ଆତଙ୍କ ଖେଳାଇଥିବା ବାଘ
ବାଲେଶ୍ୱର : ଦୀର୍ଘ ୮ ଘଣ୍ଟା ପରେ ଧରାପଡ଼ିଲା ବାଘ । ବାଲେଶ୍ବର ଜିଲ୍ଲା ଖଇରା ବ୍ଲକ ଅଞ୍ଚଳରେ ଆତଙ୍କ ଖେଳାଇଥିବା କଲପତରିଆକୁ କାବୁ କରିଛି ବନ ବିଭାଗ। ବାରିପଦା ବନ ବିଭାଗ ପକ୍ଷରୁ ସ୍ବତନ୍ତ୍ର ଟିମ୍, ଔପଦା, ରେମୁଣା, କୁପାରୀ ସୋର ଓ ଶିମିଳିପାଳ ବନ ବିଭାଗ ବାଘକୁ ଧରିବାରେ ସଫଳ ହୋଇଛନ୍ତି । ବାଘଟି ସୁସ୍ଥ ଥିବା ବେଳେ, ତାକୁ ଶିମିଳିପାଳ ରେ ଛଡାଯିବ ବୋଲି ବନ ବିଭାଗ ପକ୍ଷରୁ କୁହାଯାଇଛି। କଲରାପତରିଆ ବାଘ ଆକ୍ରମଣରେ ୫ ଜଣ ଗୁରୁତର ହୋଇ ମେଡିକାଲରେ ଭର୍ତ୍ତି ହୋଇଛନ୍ତି।
ସୁପର ସଣ୍ଡେ’ରେ ହାଇଭୋଲଟେଜ୍ ମ୍ଯାଚ୍, ମୁହାଁମୁହିଁ ହେବେ ଭାରତ-ପାକିସ୍ତାନ
ନୂଆଦିଲ୍ଲୀ : ଆଜି ସୁପର ସଣ୍ଡେ ହେବ ସୁପର ଫାଇଟ୍ । ଟି-ଟ୍ବେଣ୍ଟି ବିଶ୍ବକପରେ ହେବ ହାଇଭୋଲଟେଜ୍ ମ୍ଯାଚ୍ । ମୁହାଁମୁହିଁ ହେବେ କ୍ରିକେଟର ବହୁଚର୍ଚ୍ଚିତ ପ୍ରତିଦ୍ବନ୍ଦ୍ବୀ ଭାରତ-ପାକିସ୍ତାନ । ରାତି ୮ଟାରେ ନ୍ୟୁୟର୍କର ନାସାଉ କାଉଣ୍ଟି କ୍ରିକେଟ ଷ୍ଟାଡିୟମରେ ଏହି ମ୍ୟାଚ ଅନୁଷ୍ଠିତ ହେବ । ରୋହିତଙ୍କ ନେତୃତ୍ବରୁ ପଡ଼ିଆକୁ ଓହ୍ଲାଇବ ଟିମ୍ ଇଣ୍ଡିଆନ ।
ପ୍ରଥମ ମ୍ଯାଚରେ ଦମଦାର ବିଜୟ ସହ ଭାରତର ମନୋବଳ ଦୃଢ ରହିଛି । ସମସ୍ତ ଖେଳାଳି ମଧ୍ଯ ଫର୍ମରେ ରହିଛନ୍ତି । ସେପଟେ ପାକିସ୍ତାନ ସୁପର ଓଭରରେ ଆମେରିକାଠୁ ପରାସ୍ତ ହୋଇ ବ୍ଯାକଫୁଟରେ ରହିଛି । ଇତିହାସକୁ ଦେଖିଲେ ଭାରତ ଓ ପାକିସ୍ତାନ ଟ୍ବେଣ୍ଟି-୨୦ ବିଶ୍ବକପରେ ୭ଥର ମୁହାଁମୁହିଁ ହୋଇଛନ୍ତି । ୨୦୦୭ ଲିଗ୍ ଓ ଫାଇନାଲ୍, ୨୦୧୨, ୨୦୧୪, ୨୦୧୬, ୨୦୨୧ ଓ ୨୦୨୨ରେ ମୁହାଁମୁହିଁ ହୋଇଥିଲେ ଉଭୟ ଟିମ୍ । ସେଥିମଧ୍ୟରୁ ଭାରତ ୬ଥର ବିଜେତା ହୋଇଥିଲା ବେଳେ ପାକିସ୍ତାନ କେବଳ ଥରେ ଜିତିଛି। ଏଣୁ ପାକିସ୍ତା ବିପକ୍ଷରେ ଭାରତର ପଲ୍ଲା ଭାରି ରହିଛି । ଦଳୀୟ ସନ୍ତୁଳନ ଦୃଷ୍ଟିରୁ ଭାରତର ପଲା ଏହି ମ୍ୟାଚ୍ରେ ଭାରୀ ରହିବାର ଯଥେଷ୍ଟ ସମ୍ଭାବନା ରହିଛି।
ଆଜି ଶପଥ ଗ୍ରହଣ ଉତ୍ସବ, ତୃତୀୟ ଥର ଲାଗି ପ୍ରଧାନମନ୍ତ୍ରୀ ଦାୟିତ୍ବ ସମ୍ଭାଳିବେ ନରେନ୍ଦ୍ର ମୋଦୀ
ନୂଆଦିଲ୍ଲୀ : ଆଜି ସନ୍ଧ୍ୟା ୭ଟା ୧୫ ମିନଟରେ ରାଷ୍ଟ୍ରପତି ଭବନରେ ଆୟୋଜିତ ହେବ ଶପଥଗ୍ରହଣ ଉତ୍ସବ । କ୍ରମାଗତ ତୃତୀୟ ଥର ଲାଗି ପ୍ରଧାନମନ୍ତ୍ରୀ ଦାୟିତ୍ବ ସମ୍ଭାଳିବେ ନରେନ୍ଦ୍ର ମୋଦୀ । ନବଗଠିତ ମନ୍ତ୍ରିମଣ୍ଡଳ ବି ଶପଥ ନେବ । ଉତ୍ସବରେ ସାମିଲ ହେବେ ୮ ହଜାରରୁ ଅଧିକ ଅତିଥି । ଯେଉଁ ଅତିଥିମାନେ ସାମିଲ ହେବେ ସେମାନେ ହେଲେ ଶ୍ରୀଲଙ୍କା ରାଷ୍ଟ୍ରପତି ରାନିଲ ବିକ୍ରମସିଙ୍ଘେ, ମାଳଦ୍ବୀପ ରାଷ୍ଟ୍ରପତି ମହମ୍ମଦ ମୋଇଜୁ, ସିଚେଲସ ଉପରାଷ୍ଟ୍ରପତି ଅହମ୍ମଦ ଅଫିଫ, ବାଂଲାଦେଶ ପ୍ରଧାନମନ୍ତ୍ରୀ ଶେଖ ହାସିନା, ମରିସସ ପ୍ରଧାନମନ୍ତ୍ରୀ ପ୍ରବିନ୍ଦ କୁମାର ଯୁଗନାଥ, ନେପାଳ ପ୍ରଧାନମନ୍ତ୍ରୀ ପୁଷ୍ପ କମଲ ଦହଲ ପ୍ରଚଣ୍ଡ, ଭୁଟାନ ପ୍ରଧାନମନ୍ତ୍ରୀ ସେରିଙ୍ଗ ତୋବଗାୟ । ଶପଥଗ୍ରହଣ ଉତ୍ସବ ଲାଗି ଦିଲ୍ଲୀରେ ହାଇସିକ୍ଯୁରିଟି ବ୍ଯବସ୍ଥା କରାଯାଇଛି । ରାଜଧାନୀର ପ୍ରମୁଖ ହୋଟେଲ ଲୀଲା, ତାଜ, ଆଇଟିସି ମୌର୍ଯ୍ୟ, କ୍ଲାରିଜସ, ଓବରୟକୁ କଡା ସୁରକ୍ଷା ବଳୟରେ ରଖାଯାଇଛି ।
ଜୀବନ ବଞ୍ଚାଇବାକୁ ଯାଇ ଅଳ୍ପକେ ବର୍ତ୍ତିଗଲେ ଆମ୍ବୁଲାନ୍ସ କର୍ମଚାରୀ
ନନ୍ଦିଘୋଷ ବ୍ୟୁରୋ: ଜୀବନ ବଞ୍ଚାଇବାକୁ ଯାଇ ଅଳ୍ପକେ ବର୍ତ୍ତିଗଲେ ଆମ୍ବୁଲାନ୍ସ କର୍ମଚାରୀ । ବାସୁଦେବପୁର ବ୍ଲକର ବାସୁଦେବପୁର- ଜାମୁଝାଡି ରାସ୍ତାରେ ବାଇକ ଓ ମିନି ଟ୍ରକ ଧକ୍କା ହୋଇଥିଲା । ଖବର ପାଇ ବେତଡାରୁ ୧୦୮ ଆମ୍ବୁଲାନ୍ସ ଘଟଣାସ୍ଥଳରେ ପହଞ୍ଚିଥିଲା । ଆହତଙ୍କୁ ଚିକିତ୍ସା ପାଇଁ ଡାକ୍ତରଖାନାକୁ ନେଉଥିବା ବେଳେ ବେତଡା ପେଟ୍ରୋଲ ପମ୍ପ ଆଗରେ ଆମ୍ବୁଲାନ୍ସରେ ନିଆଁ ଲାଗି ଯାଇଥିଲା । ଡ୍ରାଇଭର ଉପସ୍ଥିତ ବୁଦ୍ଧି ଖଟାଇ ଆହତ ବ୍ୟକ୍ତିଙ୍କୁ ଓହ୍ଲାଇ ଦେବା ସହିତ ନିଜେ ଓହ୍ଲାଇ ଯାଇଥିଲେ । ଚାହୁଁ ଚାହୁଁ ହୁତୁ ହୁତୁ ହୋଇ ଜଳିଯାଇଥିଲା ୧୦୮ ଆମ୍ବୁଲାନ୍ସ । ତେବେ ଅଘଟଣ ଅଳ୍ପକେ ରକ୍ଷା ପାଇଗଲେ ରୋଗୀ ଓ ଆମ୍ବୁଲାନ୍ସ କର୍ମଚାରୀ । ଖବର ପାଇ ବାସୁଦେବପୁର ଦମକଳ ବାହିନୀ ପହଞ୍ଚି ନିଆଁକୁ ଆୟତ୍ତ କରିଥିଲେ । ଏହା ଫଳରେ ବାସୁଦେବପୁର ଓ ଜାମୁଝାଡି ପାଖରେ ଶହ ଶହ ଗାଡି ଅଟକି ରହିଥିଲା ।
ଶପଥଗ୍ରହଣ ଉତ୍ସବରେ ଯୋଗଦେବାକୁ ଲୋକୋପାଇଲଟ ଐଶ୍ବର୍ଯ୍ୟା ମେନନଙ୍କୁ ନିମନ୍ତ୍ରଣ
ନନ୍ଦିଘୋଷ ବ୍ୟୁରୋ: ଶପଥଗ୍ରହଣ ଉତ୍ସବକୁ ଦକ୍ଷିଣାଞ୍ଚଳ ରେଳବାଇର ଚେନ୍ନାଇ ଡିଭିଜନ ଲୋକୋପାଇଲଟ ଐଶ୍ବର୍ଯ୍ୟା ମେନନଙ୍କୁ ବି ନିମନ୍ତ୍ରଣ କରାଯାଇଛି । ବନ୍ଦେ ଭାରତ ଓ ଶତାବ୍ଦୀ ଏକ୍ସପ୍ରେସର ଲୋକୋ ପାଇଲଟ ଭାବେ ଖ୍ଯାତି ଅର୍ଜନ କରିଛନ୍ତି ଐଶ୍ବର୍ଯ୍ୟା । ସେ ୨ ଲକ୍ଷରୁ ଧିକ ଘଣ୍ଟା ଟ୍ରେନ ଚାଳନାର ଅଭିଜ୍ଞତା ହାସଲ କରିଛନ୍ତି । ସେହିପରି ଏସିଆର ପ୍ରଥମ ମହିଳା ଲୋକୋ ପାଇଲଟ ସୁରେଖା ଯାଦବ ବି ଶପଥ ଗ୍ରହଣ ଉତ୍ସବରେ ସାମିଲ ହେବେ । ସେ ବର୍ତ୍ତମାନ ଛତ୍ରପତି ଶିବାଜୀ ମହାରାଜ ଟର୍ମିନସ ସୋଲାପୁରରୁ ବାହାରୁ ଥିବା ବନ୍ଦେ ଭାରତ ଟ୍ରେନରେ ଲୋକୋ ପାଇଲଟିଂ କରୁଛନ୍ତି । ସୁରେଖା ୧୯୮୮ରେ ଭାରତର ପ୍ରଥମ ମହିଳା ଟ୍ରେନ ଚାଳକ ଭାବେ ଯୋଗଦେଇଥିଲେ । ସେ ମଧ୍ଯ ସେମି ହାଇସ୍ପିଡ ବନ୍ଦେ ଭାରତ ଏକ୍ସପ୍ରେସର ପ୍ରଥମ ମହିଳା ଲୋକୋ ପାଇଲଟ । ସେହିପରି ସେଣ୍ଟ୍ରାଲ ଭିସ୍ତା ପ୍ରୋଜେକ୍ଟରେ କାର୍ଯ୍ୟରତ ପରିମଳ କର୍ମୀ, ତୃତୀୟ ଲିଙ୍ଗୀ, ଶ୍ରମିକ ବି ଉତ୍ସବରେ ସାମିଲ ହେବେ ।