ବରଗଡ଼: ବରଗଡ଼ ଅପହରଣ ଓ ଦୁଷ୍କର୍ମ ଘଟଣା । ପୀଡ଼ିତାଙ୍କୁ ନ୍ୟାୟ ଦାବିରେ ଆସନ୍ତା ୨୧ ତାରିଖରେ ବନ୍ଦ ଡାକରା । ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ବନ୍ଦ ଡାକରା ଦିଆଯାଇଛି । ବିଜେଡି ସହ ବିଭିନ୍ନ ଦଳର ବୈଠକରେ ପ୍ରସ୍ତାବ ଗୃହୀତ ହୋଇଛି । ମାମଲାକୁ ଦୀର୍ଘ ୬ ଦିନରୁ ଅଧିକ ସମୟ ବିତି ଯାଇଥିଲେ ସୁଦ୍ଧା ପୋଲିସ ଅଭିଯୁକ୍ତକୁ ଗିରଫ ନକରିବାରୁ ଅସନ୍ତୋଷ ପ୍ରକାଶ ପାଇଛି । ଆଜି ଅଗ୍ରଗାମୀ ଯୁବକ ସଂଘ ଠାରେ କଂଗ୍ରେସ, ବିଜେଡ଼ି, ଆମ୍ ଆଦମୀ ପାର୍ଟି ପ୍ରମୁଖ ଦଳ ସାଙ୍ଗକୁ ବିଭିନ୍ନ ସାମାଜିକ ସଂଗଠନର ପ୍ରତିନିଧି ଙ୍କୁ ନେଇ ଏକ ସାମୁହିକ ବୈଠକ ଡକାଯାଇ ବନ୍ଦ ଡାକରାର ନିଷ୍ପତି ନିଆଯାଇଛି। ତେବେ ଆସନ୍ତା ମଙ୍ଗଳବାର ଦିନ ସକାଳ ୬ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ କେବଳ ଜରୁରୀ ସେବା ଜାରି ରହିବ । ବରଗଡ଼ ଧନୁଯାତ୍ରା ଦେଖିବାକୁ ଆସି ନିଖୋଜ ଯୁବତୀ ଜଣକ କୁର୍ଲା ଜଙ୍ଗଲ ଠାରେ ରକ୍ତ ଯୁଡୁବୁଡୁ ଅବସ୍ଥାରେ ଉଦ୍ଧାର ଘଟଣା ସାରା ରାଜ୍ୟରେ ଚାଞ୍ଚଲ୍ୟ ସୃଷ୍ଟି କରିଛି ।
ବିଚ କର୍ମଚାରୀଙ୍କୁ ମିଳୁନି ଦରମା: ଦାବି କଲେ ଛଟେଇ ହେଉଥିବା ଅଭିଯୋଗ
ପୁରୀ: ଦେଶରେ ସ୍ନାନ ଅନୁକୂଳ ସମୁଦ୍ର ଭାବେ ପୁରୀ ସ୍ବର୍ଣ୍ଣାଭ ବେଳାଭୂମି ସୃଷ୍ଟି କରିଛି ଉଦାହରଣ । ଏଥିପାଇଁ ଡେନମାର୍କ ଫାଉଣ୍ଡେସନ୍ ଫର ଏନ୍ଭାରମେଣ୍ଟାଲ୍ ଏଜୁକେସନ୍ ପକ୍ଷରୁ ପୁନର୍ବାର ସ୍ୱର୍ଣ୍ଣାଭ ବେଳାଭୂମିକୁ ୩୩ଟି ମାନଦଣ୍ଡ ଆଧାରରେ ବ୍ଲୁ ଫ୍ଲାଗ ବିଚ ମାନ୍ୟତା ପ୍ରଦାନ କରାଯାଇଛି । ଅହମଦାବାଦରେ ଏକ ସ୍ବତନ୍ତ୍ର ଚୟନ କାର୍ଯ୍ୟକ୍ରମରେ ଜୁରିମାନେ ମାନ୍ୟତା ପତାକା ପ୍ରଦାନ କରିଛନ୍ତି । ୮୭୦ ମିଟର ବେଳାଭୂମିର ପର୍ଯ୍ୟାୟ କ୍ରମେ ଭିତ୍ତିଭୂମିରେ ପରିବର୍ତ୍ତନ ହୋଇଛି l ପରିବେଶ ଅନୁକୂଳ ଜଳକ୍ରୀଡ଼ା ପାଇଁ ଯୋଜନା କରାଯାଉଛି l ଏଥିପାଇଁ ପୁରୀ ସହରବାସୀ ଓ ବିଚ୍ କର୍ମଚାରୀଙ୍କୁ ଶ୍ରେୟ ଦେଇଛନ୍ତି ଜିଲ୍ଲାପାଳ । ସେପଟେ ବ୍ଲୁଫ୍ଲାଗ ରେ କାମ କରୁଥିବା କର୍ମଚାରୀଙ୍କୁ କିନ୍ତୁ ମିଳିନି ଦରମା । ଯାହାକୁ ନେଇ ଅସନ୍ତୋଷ ବ୍ୟକ୍ତ କରିଛି ବେଳାଭୂମି କର୍ମଚାରୀ ସଙ୍ଘ ।
ଗତ ସରକାର ସମୟରେ ବିଚରେ କାମ କରୁଥିବା କର୍ମଚାରୀଙ୍କ ଦରମା ବୃଦ୍ଧି କରାଯାଇଥିଲା । କିନ୍ତୁ ନୂଆ ସରକାର ଆସିବା ପରେ ବର୍ଦ୍ଧିତ ଦରମା ଏ ପର୍ଯ୍ୟନ୍ତ ମିଳିନାହିଁ । ଏପରିକି ଗତ ୨ ମାସର ରେଗୁଲାର ଦରମା ମଧ୍ୟ ମିଳି ନଥିବା କହିଛନ୍ତି କର୍ମଚାରୀ । ପ୍ରତିବାଦରେ ବେଳାଭୂମି କର୍ମଚାରୀ ସଙ୍ଘ ପକ୍ଷରୁ ଜିଲ୍ଲା ବନଖଣ୍ଡ ଅଧିକାରୀ କାର୍ଯ୍ୟାଳୟ ଘେରାଉ କରାଯାଇଥିଲା । ୟୁଟେକ ସର୍ଭିସ, ଏସଏସ ସର୍ଭିସ ଏଜେନ୍ସି ଦ୍ୱାରା ବିଚକ୍ଲିନ, ଗାର୍ଡେନ, ଇଲେକ୍ଟ୍ରିସିଆନ, ସିକ୍ୟୁରିଟି, ଟିକେଟ କାଉଣ୍ଟର, ଫାଷ୍ଟଏଡ ଆଟେଡାଣ୍ଟ ପଦବୀରେ ପ୍ରାୟ ୬୫ଜଣ କର୍ମଚାରୀ ନିୟୋଜିତ ଅଛନ୍ତି । ଦୁଇଟି ଏଜେନ୍ସି ସରକାରଙ୍କ ଘୋଷିତ ବର୍ଦ୍ଧିତ ମଜୁରୀ ଦେଉନାହାନ୍ତି । ବର୍ଗୀକରଣ ଆଧାରରେ ମଧ୍ୟ ମିଳୁନି ଦରମା । ଇପିଏଫ ଟଙ୍କା ଦାଖଲ କରାନଯାଇ ହେରଫେର କରାଯାଉଥିବା ଅଭିଯୋଗ ହୋଇଛି । ମାଗିଲେ ବିନା ନୋଟିସରେ ଛଟେଇ କରାଯାଉଥିବା ଅଭିଯୋଗ କରିଛନ୍ତି କର୍ମଚାରୀ । ସେପଟେ କର୍ମଚାରୀଙ୍କ ସମସ୍ୟାର ଖୁବଶୀଘ୍ର ସମାଧାନ କରାଯିବ ବୋଲି କହିଛନ୍ତି ବନଖଣ୍ଡ ଅଧିକାରୀ । ବ୍ଲୁଫ୍ଲାଗ ବିଚ କାମ କରୁଥିବା କର୍ମଚାରୀଙ୍କୁ ଦରମା ମିଳୁ ନଥିଲେ ବି ସେମାନେ କେବା କାମରେ ଅବହେଳା କରି ନଥିବା କହିଛନ୍ତି ।
ଗଞ୍ଜାମ ଜିଲ୍ଲାରେ ପ୍ରହସନ ପାଲଟିଛି ମଣ୍ଡି: ଧାନ ବିକ୍ରି କରି ନପାରି ହଟହଟା ଚାଷୀ
ଗଞ୍ଜାମ: ଗଞ୍ଜାମ ଜିଲ୍ଲାରେ ପ୍ରହସନ ପାଲଟିଛି ଧାନମଣ୍ଡି । ହଟହଟା ଚାଷୀ, ବେଫିକର ପ୍ରଶାସନ । ଫାଇଦା ଉଠାଇ ଆନ୍ଧ୍ର ଚାଲାଣ କରୁଛନ୍ତି ଦଲାଲ । ଜିଲ୍ଲାରେ ପ୍ରାଥମିକ ପର୍ଯ୍ଯୟରେ ୪୪ ଲକ୍ଷ ୮୧ ହଜାର ୭୬୧ କ୍ରିଣ୍ଟାଲ୍ ଧାନ କିଣିବାକୁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା । ଏଥିପାଇଁ ୧ ଲକ୍ଷ ୪୬ ହଜାର ୫୦୪ ଚାଷୀ ପଞ୍ଜୀକରଣ କରିଥିଲେ । କିନ୍ତୁ ଅଦିନିଆ ବର୍ଷା ପାଇଁ ୧୦ ଦିନ ବିଳମ୍ବରେ ଜାନୁଆରୀ ୩ରୁ ଖୋଲିଲା ମଣ୍ଡି । ୧୩ ତାରିଖ ମଧ୍ୟରେ ୧୦ ଦିନ ଭିତରେ ମାତ୍ର ୬୮ହଜାର ୧୬୪ ଟ୍ଵିଣ୍ଟାଲ୍ ଧାନ ଉଠିଥିବା ଜଣା ପଡ଼ିଛି । ଜିଲ୍ଲାର ମାତ୍ର ୧୩ଶହ ୩୭ ଜଣ ଚାଷୀ ଧାନ ବିକ୍ରି କରିଥିବା ଅଭିଯୋଗ ହୋଇଛି । ପ୍ରଶାସନର ଅବହେଳାର ଫାଇଦା ଉଠାଉଛନ୍ତି ଆନ୍ଧ୍ର ଦଲାଲ । ଓଡ଼ିଶାରୁ କମ ଦରରେ ଧାନକିଣି ଟ୍ରକରେ ଆନ୍ଧ୍ର ବୋହି ନେଉଛନ୍ତି । ଅଦିନିଆ ବର୍ଷା ଯୋଗୁ ଜିଲ୍ଲାରେ ପ୍ରାୟ ୪୦ ପ୍ରତିଶତ ଧାନ ନଷ୍ଟ ହୋଇଛି । ବର୍ଷା ଦାଉରୁ ଯେଉଁମାନେ କଷ୍ଟେମଷ୍ଟେ ବଞ୍ଚାଇ ରଖିଛନ୍ତି ସେମାନେ କିପରି ବିକ୍ରି କରିବେ ସେନେଇ ଚିନ୍ତାରେ ।
ଗତ ଖରିଫରେ ମିଳିଥିବା ଟାର୍ଗେଟରୁ ମାସେ ମଧ୍ୟରେ ପ୍ରାୟ ୫୦ ପ୍ରତିଶତ ଧାନ କ୍ରୟ ହୋଇ ସାରିଥିଲା । କିନ୍ତୁ ଚଳିତବର୍ଷ ଧାନକ୍ରୟ ପ୍ରକ୍ରିୟା ସମ୍ପୂର୍ଣ ଧିମା ଚାଲିଛି । ଦିଗପହଣ୍ଡି ବ୍ଲକକୁ ସର୍ବାଧିକ ୨୪୦ ଜଣ ଚାଷୀ ଧାନ ବିକ୍ରି କରିଥିବା ବେଳେ ପାତ୍ରପୁର ବ୍ଲକକୁ ୧୭୦ ଓ ଚିକିଟି ବ୍ଲକକୁ ୧୨୨ ଜଣ ଚାଷୀ ଧାନ ବିକ୍ରି କରିଛନ୍ତି । ଅନ୍ୟ ବ୍ଲକରେ ଚାଷୀଙ୍କ ସଂଖ୍ୟା ୩ ଅଙ୍କ ଛୁଇଁନାହିଁ । ଧରାକୋଟ ବ୍ଲକକୁ ସର୍ବନିମ୍ନ ୧୧ ଜଣ ଚାଷୀ ଧାନ ବିକ୍ରି କରିଛନ୍ତି । ଜିଲ୍ଲାରେ ୨୦୨୪-୨୫ ଖରିଫରେ ମୋଟ ୪ ଲକ୍ଷ ୫ ହଜାର ୭୫୦ ହେକ୍ଟର୍ ଜମିରେ ଚାଷ ପାଇଁ ଲକ୍ଷ୍ୟ ଧାର୍ଯ୍ୟ କରାଯାଇଥିଲା । ସେଥିରୁ ୧ଲକ୍ଷ ୭୮ହଜାର ୯ଶହ ହେକ୍ଟର୍ ଜମିରେ ଧାନ ଓ ୧ ଲକ୍ଷ ୨୬ହଜାର ୮୫୦ ହେକ୍ଟର୍ ଜମିରେ ଅଣଧାନ ଫସଲ ପାଇଁ ଖସଡ଼ା ପ୍ରସ୍ତୁତ କରାଯାଇଥିଲା । ଜିଲ୍ଲାରେ ୩୬୫ଟି ସମବାୟ ସମିତି ଧାନକ୍ରୟ ପ୍ରକ୍ରିୟାରେ ସାମିଲ ହୋଇଛନ୍ତି । ୧୧୭ଟି ମହିଳା ସ୍ଵୟଂ ସହାୟିକା ଗୋଷ୍ଠୀ ଓ ଗୋଟିଏ ପାଣି ପଞ୍ଚାୟତ ଧାନକ୍ରୟ କରିବେ ବୋଲି ନିଷ୍ପତ୍ତ ହୋଇଥିଲା । ଏଭଳି ମୋଟ ୪୮୩ଟି ଧାନକ୍ରୟ କେନ୍ଦ୍ରରେ ଚାଷୀ ଧାନ ବିକ୍ରି କରିବେ ବୋଲି ଚୂଡ଼ାନ୍ତ ହୋଇଥିଲେ ସୁଦ୍ଧା ରାଜ୍ୟ ସରକାରଙ୍କ କୌଣସି ଆନ୍ତରିକତା ନଥିବା ଚାଷୀ ଅଭିଯୋଗ କରିଛନ୍ତି ।
ଉପର ଚିକ୍କଣ, ଭିତର ଫମ୍ପା: ରାଜ୍ୟ ବିଜେପିରେ ସାଂଗଠନିକ ନିର୍ବାଚନ ପ୍ରକ୍ରିୟା ବିଳମ୍ବିତ, ପଦ୍ମ ଦଳରେ ବଢ଼ୁଛି ଅଡ଼ୁଆ
ଭୁବନେଶ୍ବର: ପ୍ରଥମ ଥର ପାଇଁ ରାଜ୍ୟରେ ସରକାର ଗଠନ ପରେ ବିଜେପିର ସାଙ୍ଗଠନିକ ନିର୍ବାଚନ ପ୍ରକ୍ରିୟା ଚାଲିଛି। ହେଲେ ମଣ୍ଡଳ, ଜିଲ୍ଲା ଓ ରାଜ୍ୟ ସଭାପତି ପାଇଁ ଡ଼େଡ଼ଲାଇନ ସରିବା ପରେ ବି ଚୂଡ଼ାନ୍ତ ହୋଇପାରୁନି ତାଲିକା। ଜିଲ୍ଲାସ୍ତରରେ ବିଭିନ୍ନ ଗୋଷ୍ଠୀ ମଧ୍ୟରେ ଥିବା ବିବାଦ ତୁଟୁନଥିବାରୁ ଜିଲ୍ଲା ସଭାପତିଙ୍କ ନାମରେ ମୋହର ବାଜିପାରୁନି। ଜାନୁଆରୀ ୫ ସୁଦ୍ଧା ମଣ୍ଡଳ ସଭାପତି, ୧୦ ସୁଦ୍ଧା ଜିଲ୍ଲା ସଭାପତି ଏବଂ ୧୫ ସୁଦ୍ଧା ରାଜ୍ୟ ସଭାପତି ପାଇଁ ଦିନ ଧାର୍ଯ୍ୟ ହୋଇଥିବା ବେଳେ ଫେଲ୍ ମାରିଛି ଡ଼େଡ଼ଲାଇନ୍। ସଭାପତି ପଦ ଲାଗି ବି ଜାରି ରହିଛି ସସପେନ୍ସ ।
କିଏ ହେବେ ରାଜ୍ୟ ବିଜେପିର ପରବର୍ତ୍ତୀ ମୁଖିଆ? କିଏ ସମ୍ଭାଳିବେ ଜିଲ୍ଲା ଦାୟିତ୍ବ? ସରକାରୀ ଦଳ ହିସାବରେ ସାଙ୍ଗଠନିକ ମୁଖ୍ୟଙ୍କ ଗୁରୁତ୍ବ ବଢିଥିବାରୁ ପଦପଦବୀ ପାଇଁ ଚାଲିଛି ଅଙ୍କକଷା। ବ୍ଲକ, ଜିଲ୍ଲା ସ୍ତରରେ ବିବାଦ ତୁଟୁନଥିବାରୁ ଫେଲ୍ ମାରୁଛି ଡେଡଲାଇନ୍। ଚୁଡ଼ାନ୍ତ ହୋଇପାରୁନି ଜିଲ୍ଲା ସଭାପତିଙ୍କ ତାଲିକା। ତୃଣମୂଳ ସ୍ତରରେ ପୁରୁଣା ଓ ନୂଆ ବିଜେପି ମଧ୍ୟରେ ଚାଲିଛି ଟଣାଓଟରା। ପୁରୁଣା ବିଜେପିରୁ ମଣ୍ଡଳ ସଭାପତି କରିବାକୁ ଦଳ ମନସ୍ଥ କରିଥିବା ବେଳେ ବୟସ କଟକଣା ସାଜିଛି ବାଧକ। ବିଭିନ୍ନ କଟକଣା ଯୋଗୁଁ ମଣ୍ଡଳ ସଭାପତି ପାଇଁ ପ୍ରଥମ ପ୍ରସ୍ତାବ କାଟ ଖାଉଛି। ଜାନୁଆରୀ ୫ ତାରିଖ ସୁଦ୍ଧା ମଣ୍ଡଳ ସଭାପତି, ୧୦ ତାରିଖ ସୁଦ୍ଧା ଜିଲ୍ଲା ସଭାପତି ଏବଂ ୧୫ ତାରିଖ ସୁଦ୍ଧା ରାଜ୍ୟ ସଭାପତି ନିର୍ବାଚିତ ପାଇଁ ଦିନ ଧାର୍ଯ୍ୟ ହୋଇଥିଲେ ବି କନ୍ଦଳ ଯୋଗୁଁ ହୋଇପାରୁନି ନିଷ୍ପତ୍ତି। ମଣ୍ଡଳ ସଭାପତି କାମ ସରିଛି ଏବଂ ଜିଲ୍ଲା ସଭାପତି ପ୍ରକ୍ରିୟା ଚାଲିଛି ବୋଲି ସୁନ୍ଦରଗଡ଼ର ନେତ୍ରୀ କୁସୁମ ଟେଟେ କହିଛନ୍ତି।
ନୂଆ ଓ ପୁରୁଣା ବିଜେପି ସହ ଦଳ ଭିତରେ ଥିବା ବିଭିନ୍ନ ଗୋଷ୍ଠୀ ଜିଲ୍ଲା ସଭାପତି ପଦ ନିଜ କବଜାରେ ରଖିବାକୁ ଚାହୁଁଛନ୍ତି। ରାଜ୍ୟ ବିଜେପିରେ ୩୬ଟି ସାଙ୍ଗଠନିକ ଜିଲ୍ଲା ଥିବା ବେଳେ ୧୦ରୁ ଅଧିକ ଜିଲ୍ଲାରେ ଅଡ଼ୁଆ ଛିଡ଼ୁନଥିବାରୁ ଚୁଡ଼ାନ୍ତ ତାଲିକା ବିଳମ୍ବିତ ହେଉଛି। ଜିଲ୍ଲା ସଭାପତି ପରେ ରାଜ୍ୟ ସଭାପତି ସ୍ଥିର କରାଯିବ। ବିଜେପି କ୍ଷମତାକୁ ଆସିଥିବାରୁ ଏବର ସଭାପତି ମନମୋହନ ସାମଲ ପୁଣି ଥରେ ରାଜ୍ୟ ସଭାପତି ଦାୟିତ୍ବ ସମ୍ଭାଳିବେ ନା ନୂଆ ମୁହଁ ସାମନାକୁ ଆସିବେ, ତାକୁ ନେଇ ଚାଲିଛି କଳ୍ପନାଜଳ୍ପନା। ହେଲେ ବିଜେପିରେ ସଭାପତି ରେସରେ କେହି ନଥାନ୍ତି ବୋଲି ମନମୋହନ କହିଛନ୍ତି। ଏପରିକି ପରୋକ୍ଷରେ ଦଳର ସାଙ୍ଗଠନିକ ପ୍ରକ୍ରିୟା ବାବଦରେ ଗଣମାଧ୍ୟମ ମୁଣ୍ଡ ନ ଖେଳାଇବାକୁ ପରାମର୍ଶ ଦେଇଛନ୍ତି ରାଜ୍ୟ ସଭାପତି। ଭାରତୀୟ ଜନତା ପାର୍ଟିରେ ୬ବର୍ଷରେ ଥରେ ସଦସ୍ୟତା ଅଭିଯାନ ଚାଲୁଥିବା ବେଳେ ପ୍ରତି ୩ବର୍ଷରେ ଥରେ ବୁଥ ସ୍ତରରୁ ରାଷ୍ଟ୍ରୀୟ ସଭାପତି ପଦବୀ ଯାଏଁ ନିର୍ବାଚନ ହୋଇଥାଏ। ଓଡ଼ିଶାରେ ବିଜେପି କ୍ଷମତାରେ ଥିବାରୁ ସାଙ୍ଗଠନିକ ନିର୍ବାଚନ ଉପରେ ସମସ୍ତଙ୍କ ନଜର ରହିଛି।
୬ ମାସ ହେଲା ଚାଉଳ ପାଇନାହାନ୍ତି ରାଜ୍ୟବାସୀ: ଭୂତ ରାସନ କାର୍ଡ ମନ୍ତବ୍ୟ ପାଇଁ ଯୋଗାଣ ମନ୍ତ୍ରୀଙ୍କୁ ଘେରିଲେ ବିରୋଧୀ
ଭୁବନେଶ୍ବର: ମାଣ୍ଡିପଙ୍କା ଆମ୍ଵ ଟାକୁଆ ମୃତ୍ୟୁ ଘଟଣାରୁ କିଛି ଶିଖିଲେନି ସରକାର। ରାସନ କାର୍ଡରେ ଅନେକ ଭୂତ କାର୍ଡ କହି ଏବେ ବି ଲୋକଙ୍କୁ ଭୂତାଉଛନ୍ତି। ୬ ମାସ ହେବ ସରକାର ଇକେଓ୍ବାଇସି ଆଳ ଦେଖାଇ ଚାଉଳ ଦେଉ ନାହାନ୍ତି। ରାଜ୍ୟ ବାହାରେ ଥିବା ଲୋକମାନେ ଇକେୱାଇସି କରିନାହାନ୍ତି । ଯାହାକୁ ଭୂତ କାର୍ଡ଼ ବୋଲି ସରକାର ଆଖ୍ୟା ଦେବା ଉଚିତ ନୁହେଁ ବୋଲି ଦୁଇ ବିରୋଧୀ ବିଜେଡ଼ି ଓ କଂଗ୍ରେସ କହିଛନ୍ତି । ଅନ୍ୟପଟେ ଯୋଗାଣ ମନ୍ତ୍ରୀ କହିଛନ୍ତି ଯେ ପ୍ରାୟ 41 ଲକ୍ଷ ଏବେବି ଆବେଦନ କରିନାହାନ୍ତି । EKYC ସରିବା ଯାଏ ସ୍ପଷ୍ଟ ହେବ କେତେ ଭୂତ ରାସନ କାର୍ଡ ହିତାଧିକାରୀ ଅଛନ୍ତି।
୩ ମାସ ରାସନ ନ ଦେବାରୁ କନ୍ଧମାଳ ମାଣ୍ଡିପଙ୍କା ଗାଁରେ ଆମ୍ବ ଟାକୁଆ ଖାଇ ନିରୀହ ଆଦିବାସୀଙ୍କ ଜୀବନ ଗଲା । ରାସନ ଠିକ ଭାବେ ଲୋକଙ୍କ ପାଖରେ ପହଞ୍ଚି ପାରୁନଥିବାରୁ ଯୋଗାଣ ବିଭାଗର ପୋଲ୍ ଖୋଲିଛନ୍ତି ବିରୋଧୀ । ବିଜେଡିର ଅଭିଯୋଗ- ଭୂତ କାର୍ଡ କହି ଲୋକଙ୍କୁ ଭୂତାଉଛନ୍ତି ରାଜ୍ୟ ସରକାର । ସାରଦା ଜେନା ଯୁକ୍ତି ବାଢିଛନ୍ତି ରାସନ୍ କାର୍ଡ, ଆଧାର କାର୍ଡ ସହିତ ସଂଯୋଗ ହୋଇଛି । ଭାରତ ସରକାର ଆଧାର କାର୍ଡକୁ ସୀକୃତି ଦେଇଛନ୍ତି । ଆଧାର କାର୍ଡ ମିଛ କି ? ଯଦି ଆଧାର କାର୍ଡ ରାସନ୍ ସହ ସଂଯୋଗ ହୋଇଛି, ତେବେ ଭୂତ କାର୍ଡ ଆସିଲା କେଉଁଠି। ଇକେୱାଇସି ଆଳ ଦେଖାଇ ୬ ମାସ ହେଲା ରାଜ୍ୟ ସରକାର ଗରିବ ଲୋକଙ୍କୁ ରାସନ ଦେଉ ନାହାନ୍ତି । ବାହାର ରାଜ୍ୟରେ ଥିବା ଲୋକେ ଇକେୱାଇସି କରିନାହାନ୍ତି । ଯଦି ସେମାନେ ଇକେୱାଇସି ପାଇଁ ଆସିବେ ୫ ହଜାର ଟଙ୍କା ଖର୍ଚ୍ଚ କରିବାକୁ ପଡ଼ିବ। ସେହି ହିତାଧିକାରୀଙ୍କୁ ଭୂତ କହି ଭୂତାଉଛନ୍ତି ମନ୍ତ୍ରୀ। ବରିଷ୍ଠ କଂଗ୍ରେସ ନେତା ସନ୍ତୋଷ ସିଂହ ସାଲୁଜା ଅଭିଯୋଗ କରିଛନ୍ତି, ବାରମ୍ବାର ମିଛ କହୁଛନ୍ତି ଯୋଗାଣ ମନ୍ତ୍ରୀ। ଭୂତ ରାସନ କାର୍ଡ ଆଳରେ ହିତାଧିକାରୀଙ୍କୁ ଚାଉଳ ନ ଦେବାକୁ ଷଡ଼ଯନ୍ତ୍ର କରୁଛନ୍ତି ସରକାର। ଆଳୁ, ଧାନ ପରେ ରାସନ ନେଇ ଯୋଗାଣ ମନ୍ତ୍ରୀ କଣ କହୁଛନ୍ତି ନିଜେ ବୁଝି ପାରୁ ନାହାନ୍ତି। ବାହାରେ ଥିବା ହିତାଧିକାରୀ ଇକେୱାଇସି କରି ନାହାନ୍ତି । ସେମାନଙ୍କୁ ଭୂତ ବୋଲି କହିବା ଠିକ୍ ନୁହେଁ।
ସେପଟେ ଯୋଗାଣ ମନ୍ତ୍ରୀ କୃଷ୍ଣଚନ୍ଦ୍ର ପାତ୍ର କହିଛନ୍ତି ଯେ ପ୍ରାୟ 41 ଲକ୍ଷ ଲୋକ ଏବେ ବି ଆବେଦନ କରିନାହାନ୍ତି । ଇକେୱାଇସି ସରିବା ପରେ ସ୍ପଷ୍ଟ ହେବ କେତେ ଭୂତ ରାସନ କାର୍ଡ ହିତାଧିକାରୀ ଅଛନ୍ତି। କିନ୍ତୁ ଭୂତ ହିତାଧିକାରୀ ଅଛନ୍ତି। ଯୋଗ୍ୟ ହିତାଧିକାରୀ ଆଦୌ କଟିବେ ନାହିଁ। EKYC ସରିବା ପରେ ନୂଆ ଆବେଦନ ପାଇଁ ପୋର୍ଟାଲ ଖୋଲିବ। ଆମ ପାଖକୁ ତଥ୍ୟ ଆସିଛି ପ୍ରାୟ 4 ଲକ୍ଷ ହିତାଧିକାରୀ ଏମିତି ଅଛନ୍ତି ଯେଉଁମାନେ କି ଆୟକର ଦେଉଛନ୍ତି। ଅଧିକାରୀମାନଙ୍କୁ ନିର୍ଦ୍ଦେଶ ଦିଆଯାଇଛି ପ୍ରକୃତ ସତ୍ୟ ବାହାର କରିବେ। ରିପୋର୍ଟ ଆସିବା ପରେ କାର୍ଯ୍ୟାନୁଷ୍ଠାନ ନିଆଯିବ। ସେପଟେ କଂଗ୍ରେସ ନେତା ନିଶିକାନ୍ତ ମିଶ୍ର କହିଛନ୍ତି ଯେ ବିଜେପି ୱାନ ନେସନ୍ ୱାନ ରାସନ କଥା କହୁଛି । ତେବେ ବାହାର ରାଜ୍ୟରେ ଥିବା ଲୋକ EKYC କରିନଥିବାରୁ ସେମାନଙ୍କୁ ଭୂତ ହିତାଧିକାରୀ ଠିକ ନୁହେଁ ବୋଲି କଂଗ୍ରେସ କହିଛି। ରାସନ କାର୍ଡର ଇକେୱାଇସି କଣ୍ଟରେ ସାଧାରଣ ଲୋକେ ଯେମିତି ହଇରାଣ ନ ହୁଅନ୍ତି କି ଯୋଗ୍ୟ ହିତାଧିକାରୀ ଭୂତ କାର୍ଡ ରାଜନୀତିରେ ଯେମିତି ବଳି ନ ପଡ଼ନ୍ତି, ସେଥିପ୍ରତି ରାଜ୍ୟ ସରକାର ଧ୍ୟାନ ଦେବା ଉଚିତ ।
ବିଜେପିକୁ ଝଟକା ଦେଲା ନବୀନଙ୍କ ଗୋଟି ଚାଳନା: ବିଜେପି ଛାଡ଼ି ବିଜେଡିରେ ସାମିଲ ହେଲେ ହିଞ୍ଜିଳି ନିର୍ବାଚନମଣ୍ଡଳୀର ଅନେକ ପଞ୍ଚାୟତ ପ୍ରତିନିଧି
ଭୁବନେଶ୍ବର: ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ହିଞ୍ଜିଳି ନିର୍ବାଚନ ମଣ୍ଡଳୀରୁ ଆରମ୍ଭ ହେଲା ବିଜେଡି ସାଂଗଠନିକ ପ୍ରକ୍ରିୟା । ଗଞ୍ଜାମ ଜିଲ୍ଲାରେ ବିଜେପିକୁ ଝଟକା ଦେଇଛି ନବୀନଙ୍କ ଗୋଟି ଚାଳନା । ହିଞ୍ଜିଳି ନିର୍ବାଚନ ମଣ୍ଡଳୀର ବୁରୁପଡ଼ା ପଞ୍ଚାୟତର ଅନେକ ପଞ୍ଚାୟତ ପ୍ରତିନିଧି ଆଜି ବିଜେପି ଛାଡ଼ି ବିଜେଡିରେ ସାମିଲ ହୋଇଛନ୍ତି । ଗତ ୭ ମାସରୁ ଲୋକଙ୍କ ସ୍ବାର୍ଥରେ ବିଜେପି କାମ କରୁନଥିବା ଅଭିଯୋଗ କରି ସେମାନେ ବିଜେଡିରେ ମିଶିଥିବା ନେଇ ସୂଚନା ଦେଇଛନ୍ତି । ଆଗାମୀ ଦିନରେ ବିଜେଡି ସଂଗଠନକୁ ସୁଦୃଢ କରିବା ଦିଗରେ ସେମାନେ କାମ କରିବେ ।
(ଭିଓ୧) ଗଞ୍ଜାମ ଜିଲ୍ଲାରେ ବିଜେପିକୁ ବଡ଼ ଝଟକା । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ବକୁ ପୁଣି ମିଳିଲା ସ୍ବୀକୃତି । ନବୀନଙ୍କ ହିଞ୍ଜିଳି ନିର୍ବାଚନମଣ୍ଡଳୀର ପଞ୍ଚାୟତ ପ୍ରତିନିଧିମାନେ ବିଜେପି ଛାଡ଼ି ବିଜେଡି ଶିବିରରେ ସାମିଲ ହୋଇଛନ୍ତି । ବିଜେଡିରେ ମିଶିଛନ୍ତି ଗଞ୍ଜାମ ଜିଲ୍ଲା ହିଞ୍ଜିଳି ନିର୍ବାଚନ ମଣ୍ଡଳୀର ଅନେକ ପଞ୍ଚାୟତ ପ୍ରତିନିଧି । ବୁରୁପଡା ସରପଞ୍ଚ ସନ୍ତୋଷିନୀ ବେହେରାଙ୍କ ନେତୃତ୍ବରେ ଶତାଧିକ କର୍ମୀ ଓ ପଞ୍ଚାୟତ ପ୍ରତିନିଧି ବିଜେପି ଛାଡ଼ି ବିଜେଡିରେ ମିଶିଛନ୍ତି । ପ୍ରଥମେ ସେମାନେ ନବୀନ ନିବାସରେ ନବୀନ ପଟ୍ଟନାୟକଙ୍କୁ ଭେଟି ବିଜେପିର ଜନବିରୋଧୀ କାର୍ଯ୍ୟକ୍ରମ ସପଂର୍କରେ ଅବଗତ କରିଥିଲେ । ଏହା ପରେ ସେମାନେ ଶଙ୍ଖ ଭବନରେ ଯାଇ ବିଧିବଦ୍ଧ ଭାବେ ବିଜେଡିର ସଦସ୍ୟତା ଗ୍ରହଣ କରିଛନ୍ତି । ସମସ୍ତଙ୍କୁ ଦଳୀୟ ସଭାପତି ନବୀନ ପଟ୍ଟନାୟକଙ୍କ ପକ୍ଷରୁ ସ୍ବାଗତ କରିଥିଲେ ବିଜେଡି ସମନ୍ବୟ କମିଟି ଅଧ୍ୟକ୍ଷ ଦେବୀ ମିଶ୍ର, କାର୍ଯ୍ୟକ୍ରମ ରୂପାନ୍ତର କମିଟି ଆବାହକ ସଞ୍ଜୟ ଦାସବର୍ମା, ସଭ୍ୟ ସଂଗ୍ରହ କମିଟି ଆବାହକ ଅତନୁ ସବ୍ୟସାଚୀ ନାୟକ ଓ ପୂର୍ବତନ ବିଧାୟକ ପ୍ରଣବ ବଳବନ୍ତରାୟ । ହିଞ୍ଜିଳିରୁ ଆରମ୍ଭ ହୋଇଛି ବିଜେଡିର ସାଂଗଠନିକ ପ୍ରକ୍ରିୟା । ଯେଉଁଠି ପୁଣି ଥରେ ନବୀନଙ୍କ ନେତୃତ୍ବ ଓ ବିକାଶ ଉପରେ ଭରସା କରି ବିଜେଡିକୁ ବାଛିଛନ୍ତି ବିଜେପି ନେତା । ହିଞ୍ଜିଳି ହେଉଛି ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନିର୍ବାଚନ ମଣ୍ଡଳୀ । ଯେଉଁଠାରୁ ସେ ଲଗାତାର ୬ ଥର ବିଧାୟକ ଭାବେ ଜିତିଛନ୍ତି । ଗତ ନିର୍ବାଚନରେ ବି ହିଞ୍ଜିଳିବାସୀ ନବୀନଙ୍କ ଉପରେ ଆଶୀର୍ବାଦ ବର୍ଷା କରି ବିଧାୟକ କରିଛନ୍ତି । ରାଜ୍ୟବାସୀଙ୍କ ପାଇଁ ବିଜେପି କୌଣସି କାମ କରୁ ନଥିବା ଅଭିଯୋଗ କରି ନବୀନଙ୍କ ଜନସେବାର ଧାରାକୁ ବାଛିଛନ୍ତି ବିଜେଡିରେ ମିଶିଥିବା ନେତା ।
(ଭିଓ୨) ବିଜେଡିକୁ ଅଧିକ ସଂଗଠିତ କରିବାକୁ ସମସ୍ତେ ସଂକଳ୍ପବଧ । ଓଡ଼ିଶାର ଲୋକପ୍ରିୟ ଜନନେତା ନବୀନ ପଟ୍ଟନାୟକଙ୍କ ନେତୃତ୍ବ ଉପରେ ଭରସା ଅତୁଟ ରଖିଛନ୍ତି ରାଜ୍ୟବାସୀ । ତୃଣମୂଳ ସ୍ତରରେ ନବୀନ ପଟ୍ଟନାୟକଙ୍କ ଉପରେ ଆସ୍ଥା ଓ ଭରସା ରହିଛି ।
ବାଇଟ୍: ଦେବୀ ମିଶ୍ର, ଅଧ୍ୟକ୍ଷ, ବିଜେଡି ସମନ୍ବୟ କମିଟି
ବାଇଟ୍: ସଞ୍ଜୟ ଦାସ ବର୍ମା, ଆବାହକ, ବିଜେଡି କାର୍ଯ୍ୟକ୍ରମ ରୂପାନ୍ତର କମିଟି
(ଫାଭିଓ) ୨୦୨୭ରେ ପଞ୍ଚାୟତ ନିର୍ବାଚନ ଥିବାରୁ ଏବେ ଠାରୁ ହିଁ ସଂଗଠନ ସଜାଡ଼ିବାରେ ସବୁ ଦଳ ଲାଗି ପଡ଼ିଲେଣି । ତେବେ ଯେଉଁ ପରି ଭାବେ ଗଞ୍ଜାମରୁ ବିଜେଡି ପଞ୍ଚାୟତ ଦଖଲ କରି ସଂଗଠନ ସଦୃଢ କରିବା ଆରମ୍ଭ କରିଛି, ତାହା ନବୀନ ପଟ୍ଟନାୟକଙ୍କ ସଫଳ ନେତୃତ୍ବ ଉପରେ ପୁଣି ଥରେ ମୋହର ବାଜିଥିବା ଚର୍ଚ୍ଚା ଜୋର ଧରିଛି ।…..ଭୁବନେଶ୍ବରରୁ କ୍ୟାମେରାପର୍ସନ ଦୀନଭଞ୍ଜନଙ୍କ ସହ ପ୍ରିୟ ପ୍ରୀତମ ମହାନ୍ତିଙ୍କ ରିପୋର୍ଟ, ନନ୍ଦିଘୋଷ ଟିଭି ।
ଜାନୁଆରୀ ୩୧ରୁ ସଂସଦର ବଜେଟ ଅଧିବେଶନ: ବିଜେଡି ସୁପ୍ରିମୋ ନବୀନଙ୍କ ଅଧ୍ୟକ୍ଷତାରେ ପ୍ରସ୍ତୁତ ହେବ ରଣନୀତି, ରାଜ୍ୟ ସ୍ଵାର୍ଥ ଦାବି କରିବ ବିଜେଡି
ଭୁବନେଶ୍ବର: ସଂସଦ ବଜେଟ ଅଧିବେଶନ ପାଇଁ ତାରିଖ ଘୋଷଣା ପରେ ତତ୍ପର ବିଜେଡ଼ି। ଦଳର ୭ ଜଣ ସାଂସଦଙ୍କ ଶୀତ ଅଧିବେଶନରେ ପ୍ରଦର୍ଶନ ଉଚ୍ଚକୋଟୀର ରହିଥିବାବେଳେ ବଜେଟ ଅଧିବେଶନ ପାଇଁ ସାଂସଦମାନେ ସଜବାଜ ଆରମ୍ଭ କରିଛନ୍ତି। ରାଜ୍ୟର ସ୍ଵାର୍ଥ ସମ୍ମିଳିତ ପ୍ରସଙ୍ଗକୁ ଗୃହରେ ଉଠାଇ ହକ ପାଇଁ ଲଢେଇ ହେବ ବୋଲି କହିଛି ବିଜେଡି। ସ୍ଵତନ୍ତ୍ର ରାଜ୍ୟ ପାହ୍ୟା, ପୋଲାଭରମ, ମହାନଦୀ କୋଇଲା ରୟାଲଟି ସଂଶୋଧନ ଭଳି ପ୍ରମୁଖ ପ୍ରସଙ୍ଗକୁ ରାଜ୍ୟସଭାରେ ଉଠାଇବାକୁ ସାଂସଦମାନେ ତୟାର। ଖୁବଶୀଘ୍ର ବିଜେଡି ସୁପ୍ରିମୋ ନବୀନ ପଟ୍ଟନାୟକଙ୍କ ଅଧ୍ୟକ୍ଷତାରେ ବିଜେଡ଼ିର ସଂସଦୀୟ ଦଳ ବୈଠକରେ ପ୍ରସ୍ତୁତ ହେବ ରଣନୀତି ।
୭ ସାଂସଦ, ଶାଣିତ ସ୍ବର। ରାଜ୍ୟ ସ୍ବାର୍ଥ ପାଇଁ ସଂସଦରେ ଆରପାର ହେବ ଲଢ଼େଇ। ବଜେଟ ଅଧିବେଶନ ଘୋଷଣା ପରେ ସଜବାଜ ବିଜେଡି। ସଂସଦୀୟ ଦଳ ବୈଠକରେ ପ୍ରସ୍ତୁତ ହେବ ରଣନୀତି। ରାଜ୍ୟସଭାରେ ଶୀତ ଅଧିବେଶନରେ ଲୋକଙ୍କ ସ୍ବରକୁ ଶାଣିତ କରିଥିଲା ବିଜେଡ଼ି। ଦଳୀୟ ସୁପ୍ରିମୋ ନବୀନ ପଟ୍ଟନାୟକଙ୍କ ମାର୍ଗଦର୍ଶନରେ ଦଳର ୭ ସାଂସଦ ରାଜ୍ୟର ସ୍ଵାର୍ଥ ସମ୍ମିଳିତ ପ୍ରସଙ୍ଗ ଉଠାଇ କେନ୍ଦ୍ର ସରକାରଙ୍କ ଦୃଷ୍ଟି ଆକର୍ଷଣ କରିଥିଲେ। ହକ ପାଇଁ ତାରକା, ଅଣତାରକା ପ୍ରଶ୍ନ ଜରିଆରେ ଓଡ଼ିଶାର ଦାବିକୁ ଉପସ୍ଥାପନ କରିଥିଲେ। ଓଡ଼ିଶାକୁ ସ୍ଵତନ୍ତ୍ର ରାଜ୍ୟ ପାହ୍ୟା, କୋଷ୍ଟାଲ ହାଇୱେ, ପୋଲାଭରମ ପ୍ରକଳ୍ପ, କୋଇଲା ରୟାଲଟି ସଂଶୋଧନ, ବରିଷ୍ଠ ନାଗରିକ କଲ୍ୟାଣ, କୋଇଲା ଖନନ, ଓଡ଼ିଶାରେ MSME, ଅଏଲ ରିଫାଇନାରି ଦୁର୍ଘଟଣା, ସମ୍ବିଧାନର ଅଷ୍ଟମ ଅନୁଛେଦରେ ହୋ, ମୁଣ୍ଡାରି, ଭୂମିଜ, କୁଇ, କୋଶଲୀ ଏବଂ ସଉରା ଭାଷାକୁ ସାମିଲ, ମହିଳାଙ୍କ ପାଇଁ ସ୍ଵୟଂଶାସିତ ସଂସ୍ଥାରେ ୫୦ ପ୍ରତିଶତ ସଂରକ୍ଷଣ, ପୁରୀରେ ଅନ୍ତର୍ଜାତୀୟ ବିମାନ ବନ୍ଦର ପ୍ରତିଷ୍ଠା ଏବଂ ଓଡ଼ିଶାକୁ ଗ୍ୟାସ୍ ପାଇପ୍ ଲାଇନ୍ ସଂଯୋଗ ପରି ଗୋଟିଏ ପରେ ଗୋଟିଏ ବଡ଼ ପ୍ରସଙ୍ଗ ଉଠାଇଥିଲେ। ଆସନ୍ତା ୩୧ ତାରିଖରୁ ସଂସଦର ବଜେଟ ଅଧିବେଶନ ଆରମ୍ଭ ହେଉଥିବାରୁ ଏସବୁ ଦାବି ସହ ବିଜେଡି ସଂସଦୀୟ ବୈଠକରେ ଯେଉଁ ରଣନୀତି ପ୍ରସ୍ତୁତ କରାଯିବ ତାହାକୁ ଗୃହରେ ଉଠାଯିବ ବୋଲି ବିଜେଡି ସାଂସଦ ସୁଲତା ଦେଓ କହିଛନ୍ତି ।
ଶୀତ ଅଧିବେଶନ ପରି ବଜେଟ ଅଧିବେଶନରେ ମଧ୍ୟ ବିଜେଡ଼ି ଓଡ଼ିଶାବାସୀଙ୍କ ସ୍ବର ସାଜିବ। ଓଡ଼ିଶାର ଦୀର୍ଘଦିନର ଦାବି କେନ୍ଦ୍ର ଶୁଣୁନଥିବାରୁ ପୁଣିଥରେ ରାଜ୍ୟସଭାରେ ମୁଖ୍ୟ ପ୍ରସଙ୍ଗ ଉଠାଇ ସାଂସଦମାନେ କେନ୍ଦ୍ରର ଦୃଷ୍ଟି ଆକର୍ଷଣ କରିବେ। ଗୃହରେ ସମସ୍ତ କାର୍ଯ୍ୟସୂଚୀରେ ସାମିଲ ହୋଇ ଓଡ଼ିଶାର ସ୍ବରକୁ ଶାଣିତ କରାଯିବ ବୋଲି ସାଂସଦ ମାନେ କହିଛନ୍ତି । ଆସନ୍ତା ୩୧ରୁ ସଂସଦର ବଜେଟ ଅଧିବେଶନ। ଦୁଇଟି ପର୍ଯ୍ୟାୟରେ ଏପ୍ରିଲ ୪ ପର୍ଯ୍ୟନ୍ତ ଚାଲିବ। ପ୍ରଥମ ପର୍ଯ୍ୟାୟ ଜାନୁଆରୀ ୩୧ରୁ ଫେବୃଆରୀ ୧୩ ଓ ଦ୍ବିତୀୟ ପର୍ଯ୍ୟାୟ ମାର୍ଚ୍ଚ ୧୦ରୁ ଏପ୍ରିଲ ୪ ତାରିଖ ପର୍ଯ୍ୟନ୍ତ ଚାଲିବ । ଫେବୃୟାରୀ ପହିଲାରେ କେନ୍ଦ୍ର ଅର୍ଥମନ୍ତ୍ରୀ ନିର୍ମଳା ସୀତାରମଣ ବଜେଟ ଉପସ୍ଥାପନ କରିବେ । ସାଧାରଣ ଲୋକଙ୍କ ପାଇଁ କେନ୍ଦ୍ର ବଜେଟରେ କଣ ରହିବ ତାହାକୁ ନେଇ ଆରମ୍ଭ ଚର୍ଚ୍ଚା।
ମଧ୍ୟାହ୍ନ ଭୋଜନର ବିକଳ ଚିତ୍ର: ପୋକରା ଭାତକୁ ପାଣିଆ ସୋୟାବିନ ତରକାରୀ, ଅବଗତ କଲେ ଶୁଣୁନାହାନ୍ତି ଅଧିକାରୀ
ଖୋର୍ଦ୍ଧା: ପିଲାଙ୍କ ଖାଦ୍ୟରେ ପୋକ ସାଲୁବାଲୁ । ପାଣିଆ ତରକାରୀକୁ ପୋକଡ଼ା ଚାଉଳ । ଯାହାକୁ ନେଇ ଜଟଣୀ କେଦାର ନାଥ ରାୟ ପ୍ରାଥମିକ ବିଦ୍ୟାଳୟରେ ଦେଖା ଦେଇଛି ଅସନ୍ତୋଷ । ଛାତ୍ରଛାତ୍ରୀଙ୍କୁ ପୁଷ୍ଟିକର ଖାଦ୍ୟ ଯୋଗାଇ ଦେବାକୁ ପୂର୍ବ ସରକାର ଆରମ୍ଭ କରିଥିଲେ ଯୋଜନା । ହେଲେ ଏବେ ପ୍ରଶାସନର ଅପାରଗତାକୁ ଦାୟୀ କରିଛନ୍ତି ଅଭିଭାବକ । ସେପଟେ ପ୍ରଧାନ ଶିକ୍ଷୟିତ୍ରୀଙ୍କ କହିବାକଥା, ଯେତିକି ଟଙ୍କା ଆସୁଛି ସେତିକିରେ ରନ୍ଧା ଯାଉଛି ଖାଦ୍ୟ ।
ଟିକିଏ ଭଲ କରି ଦେଖନ୍ତୁ ଏହି ଭାତକୁ । ଧଳା ଭାତ ଭିତରେ କଳା ପୋକ ସାଲୁବାଲୁ । ତରକାରୀ ନୁହେଁ ତ ହଳଦୀଆ ପାଣିରେ ଭାସୁଛି କିଛି ସୋୟାବିନ ଓ ଆଳୁ । ଏହାକୁ ଖାଉଛନ୍ତି ଛାତ୍ରଛାତ୍ରୀ । ଛାତ୍ରଛାତ୍ରୀଙ୍କୁ ସ୍କୁଲମୁହାଁ କରିବା ଓ ପୁଷ୍ଟିକର ଖାଦ୍ୟ ଯୋଗାଇ ଦେବାକୁ ପୂର୍ବ ସରକାର ଆରମ୍ଭ କରିଥିଲେ ମଧ୍ୟାହ୍ନ ଭୋଜନ ଯୋଜନା । ହେଲେ ଏବେ ଏହା ସତେଯେମିତି ପ୍ରହସନ ପାଲଟିଛି । ସ୍କୁଲରେ ବାଧ୍ୟ ହୋଇ ପିଲାଏ ଏହାକୁ ଖାଉଛନ୍ତି । ଇଏ ହେଉଛି ଜଟଣୀ ପୌରପରିଷଦ ଅନ୍ତର୍ଗତ ୧୦ ନମ୍ବର ୱର୍ଡରେ ଥିବା କେଦାରନାଥ ରାୟ ପ୍ରଥମିକ ବିଦ୍ୟାଳୟର ଦୃଶ୍ୟ । ଯେଉଁଠି ଶହେରୁ ଉର୍ଦ୍ଧ୍ବ ଛାତ୍ରଛାତ୍ରୀ ପାଠ ପଢନ୍ତି । ହେଲେ ପୁଷ୍ଟିକର ଖାଦ୍ୟ ବଦଳରେ ପିଲାଙ୍କୁ କିପରି ଖାଦ୍ୟ ଯୋଗାଇ ଦିଆଯାଉଛି ଏହା ଆପଣଙ୍କ ସାମ୍ନାରେ । ଖରାପ ଖାଦ୍ୟ ଦିଆଯାଉଥିବା ପିଲାମାନେ କହିଛନ୍ତି ।
ଏପରି ଦୃଶ୍ୟ ଦେଖିବା ପରେ ଅଭିଭାବକ ସ୍କୁଲକୁ ଆସି ପ୍ରଧାନ ଶିକ୍ଷୟିତ୍ରୀଙ୍କ ଅଭିଯୋଗ କରିଥିଲେ । ତେବେ ସେ ଏହାକୁ ନେଇ ନିଜର ଅସହାୟତା ପ୍ରକାଶ କରିଛନ୍ତି । ତାଙ୍କର କହିବା କଥା, ସେ ଉପର ଅଧିକାରୀଙ୍କୁ ଏନେଇ ଅବଗତ କରିଛନ୍ତି କିନ୍ତୁ ସେ ଏନେଇ କୌଣସି ପଦକ୍ଷେପ ନେଉ ନାହାନ୍ତି । ସେପଟେ ଅପରିଷ୍କାର ପରିବେଶରେ ରୋଷେଇ ଚାଲିଥିବାରୁ ଏହାକୁ ସଫେଇ କରିବାକୁ ପ୍ରଧାନ ଶିକ୍ଷୟିତ୍ରୀଙ୍କ ନିକଟରେ ଦାବି କରିଛନ୍ତି ଅଭିଭାବକ । ପୁଷ୍ଟିକର ଖାଦ୍ୟ ପରିବର୍ତ୍ତେ, ନିମ୍ନ ମାନର ଖାଦ୍ୟ ପ୍ରଦାନ କରାଯାଉଥିଲେ ମଧ୍ୟ କୌଣସି ଅଧିକାରୀ ପଦକ୍ଷେପ ନେଉ ନଥିବାରୁ ଅଭିଭାବକ ମହଲରେ ଅସନ୍ତୋଷ ପ୍ରକାଶ ପାଇଛି ।
କୁଆଡ଼େ ଗଲା ଡବଲ ଇଞ୍ଜିନ ସରକାରଙ୍କ ପ୍ରତିଶ୍ରୁତି: ସରକାର ବଦଳିବା ପରେ ରାଜ୍ୟରେ ମିଳୁନି କାମ, ବାହାର ରାଜ୍ୟକୁ ଦାଦନ ଖଟିବାକୁ ଯାଉଛନ୍ତି ଲୋକେ
ଧର୍ମଗଡ଼: ଥମିବାର ନାଁ ନେଉନି ଦାଦନ ଯାତ୍ରା। କଳାହାଣ୍ଡିର ବିଭିନ୍ନ ସ୍ଥାନରୁ ଲୋକେ ଦାଦନ ଖଟିବାକୁ ବାହାର ରାଜ୍ୟକୁ ଯାଉଛନ୍ତି। ଭିଟା ମାଟି ଛାଡି ନିୟମିତ ଭାବେ ଏବେ ରାଜ୍ୟ ବାହାର ମୁହାଁ ଲୋକେ। ନିର୍ବାଚନ ସମୟରେ ଦାଦନ ସମସ୍ୟାର ସମାଧାନ ନେଇ ପ୍ରତିଶ୍ରୁତି ଦେଇଥିଲେ ସରକାର। ଏବେ ସେ ପ୍ରତିଶ୍ରୁତି ପାଣିର ଗାର ପାଲଟିଥିବା ଅଞ୍ଚଳବାସୀଙ୍କ ଅଭିଯୋଗ ।
ପଶ୍ଚିମ ଓଡ଼ିଶାର ଅବିଭକ୍ତ କଳାହାଣ୍ଡି ଜିଲ୍ଲାର ଧର୍ମଗଡ ଉପଖଣ୍ଡ । ସରକାର ବଦଳିବା ପରେ ଅଞ୍ଚଳରେ କାମ ମିଳୁ ନଥିବାରୁ ଦାଦାନ ଖଟିବାକୁ ରାଜ୍ୟ ବାହାରକୁ ଯାଉଛନ୍ତି ଅନେକ ଲୋକ। କିଛି ଲୋକ ଇଟା ଭାଟିରେ କାମ କରୁଥିବା ବେଳେ ଆଉ କେଉଁଠି ଘର କବାଟ ବନ୍ଦ କରି ରାଜ୍ୟ ବାହାରେ କାମ କରୁଛନ୍ତି । ବିଶେଷ କରି ଧର୍ମଗଡ ବ୍ଲକର କୋତମେର, ଟିପିଗୁଡ଼ା, ରଏନ୍ ଗୁଡା, ବୋକ୍ରାସିଲ ଓ ଦଣ୍ଡ ପାଟ ଅଞ୍ଚଳର ବେହେରା, ଗୋତୋମୁଣ୍ଡା ଖଳିଗଡ, ଧଅଁରପୁର, ଗୋଲାମୁଣ୍ଡା ବ୍ଲକର ଖଲିଆ ପାଲି, ନକଟିକାନି, ସୁକୁନି ମୁଣ୍ଡା ଓ ଜୟପାଟଣା ଅଞ୍ଚଳରୁ ଅନେକ ଦାଦନ ଏବେ ପେଟ ପାଟଣା ପାଇଁ ରାଜ୍ୟ ବାହାରେ ଅଛନ୍ତି l
ଗୋଟେ ପେଟେ ସରକାରଙ୍କ ଶ୍ରମ ବିଭାଗର ସଚେତନ ଅଭାବ। ଅନ୍ୟପଟେ ଦାଦନ ଚାଲାଣ ସରକାରଙ୍କ ଅନେକ ଯୋଜନାକୁ ଆଙ୍ଗୁଳି ନିର୍ଦ୍ଦେଶ କରୁଛି । ଅଞ୍ଚଳରେ କିଛି ଫ୍ୟାକ୍ଟ୍ରି ତିଆରି ହେଲେ କିମ୍ବା କାମ ମିଳିପାରିଲେ ଲୋକ ଆଉ ରାଜ୍ୟ ବାହାରକୁ ଯାଆନ୍ତେନି ବୋଲି କହିଛନ୍ତି। ଦାଦାନ ଖଟିବାକୁ ଯାଇ ଅନେକ ଲୋକ ପ୍ରାଣ ହରାଉଥିବା ଅଞ୍ଚଳବାସୀଙ୍କ ପାଇଁ ଚିନ୍ତାର ବିଷୟ ପାଲଟିଛି । ୨୦୨୪ ସାଧାରଣ ନିର୍ବାଚନରେ ଡବଲ ଇଞ୍ଜିନ ସରକାର କ୍ଷମତାକୁ ଆସିଲେ ଦାଦନ ସମସ୍ୟା ଦୂର କରିବାର ଡେଙ୍ଗୁରା ଦେଇଥିଲା, କିନ୍ତୁ ବାସ୍ତବ ଚିତ୍ର ଓଲଟା।… ଧର୍ମଗଡରୁ ବାଳକୃଷ୍ଣ ନାଏକଙ୍କ ରିପୋର୍ଟ ନନ୍ଦିଘୋଷ ଟିଭି l…
AAP ସୁପ୍ରିମୋ ଅରବିନ୍ଦ କେଜରିୱାଲଙ୍କ ଉପରେ ଆକ୍ରମଣ: ପଥରମାଡ଼ ହୋଇଥିବା ନେଇ ଅଭିଯୋଗ ଆଣିଲା ପାର୍ଟି
ନୂଆଦିଲ୍ଲୀ: AAP ସୁପ୍ରିମୋ ଅରବିନ୍ଦ କେଜରିୱାଲଙ୍କ ଉପରେ ଆକ୍ରମଣ। କେଜରିୱାଲଙ୍କୁ ପଥର ମାଡ଼ ହୋଇଥିବା ଅଭିଯୋଗ କରିଛି ଦଳ। ନିର୍ବାଚନ ପ୍ରଚାର ବେଳେ ଆକ୍ରମଣ ହୋଇଥିବା ଅଭିଯୋଗ। ପରବେଶ ବର୍ମାଙ୍କ ସମର୍ଥକ ଆକ୍ରମଣ କରିଥିବା ଅଭିଯୋଗ କରିଛି ଆପ୍। କେଜିରୱାଲଙ୍କ ଗାଡି ଉପରେ ଆକ୍ରମଣ କଲେ ଦୁର୍ବୃତ୍ତ। ଦିଲ୍ଲୀରେ ଏକ ଅଭିଯାନ ରାଲିରେ ଅରବିନ୍ଦ କେଜ୍ରିୱାଲଙ୍କ କାରରେ ପଥର ମାଡ ହୋଇଛି। ଏହି ଆକ୍ରମଣକୁ ନେଇ ବିଜେପିକୁ ଟାର୍ଗେଟ କରିଛି ଆପ୍। ଦିଲ୍ଲୀ ବିଧାନସଭା ନିର୍ବାଚନ ପୂର୍ବରୁ ଉତ୍ତେଜନା ବଢୁଥିବା ବେଳେ କେଜ୍ରିୱାଲଙ୍କୁ ଭୟଭୀତ କରିବା ପାଇଁ ବିଜେପି ପ୍ରାର୍ଥୀ ପରଭେଶ ଭର୍ମାଙ୍କ ସମର୍ଥକଙ୍କ ଏହି ଆକ୍ରମଣ କରିଥିବା AAP ଦାବି କରିଛି । ଅନ୍ୟପଟେ ଅରବିନ୍ଦ କେଜ୍ରିୱାଲଙ୍କ କାର ଉପରେ ହୋଇଥିବା ଆକ୍ରମଣ ସମ୍ପର୍କରେ ଆମ୍ ଆଦମୀ ପାର୍ଟିର ଅଭିଯୋଗ ଉପରେ ଭାରତୀୟ ଜନତା ପାର୍ଟି ଜବାବ ଦେଇ କହିଛି ଆଗାମୀ ଦିଲ୍ଲୀ ବିଧାନସଭା ନିର୍ବାଚନ ପୂର୍ବରୁ କେଜ୍ରିୱାଲଙ୍କ ଏହା ଏକ ଷଡଯନ୍ତ୍ର ।