ନନ୍ଦିଘୋଷ ବ୍ୟୁରୋ: ଗଞ୍ଜାମ ଜିଲ୍ଲା ପୁରୁଷୋତ୍ତମପୁର ଥାନା ଅନ୍ତର୍ଗତ ଲଡକାପଲ୍ଲୀ ଛକ ନିକଟରେ ଏକ ଭୟଙ୍କର ସଡ଼କ ଦୁର୍ଘଟଣା ଘଟିଛି। ଏକ ଯାତ୍ରୀବାହୀ ବସ୍ ଏବଂ ଅଟୋରିକ୍ସା ମଧ୍ୟରେ ସାମ୍ନାସାମ୍ନି ମୁହାଁମୁହିଁ ଧକ୍କା ହେବା ଫଳରେ ଘଟଣାସ୍ଥଳରେ ହିଁ ୬ ଜଣଙ୍କର ମୃତ୍ୟୁ ଘଟିଛି । ଏହି ମର୍ମନ୍ତୁଦ ଦୁର୍ଘଟଣାରେ ଅନ୍ୟ ୪ ଜଣ ଯାତ୍ରୀ ଗୁରୁତର ଭାବେ ଆହତ ହୋଇଛନ୍ତି। ଘଟିଥିବା ଏହି ଦୁର୍ଘଟଣା ସମଗ୍ର ଅଞ୍ଚଳରେ ଗଭୀର ଶୋକର ଛାୟା ଖେଳାଇ ଦେଇଛି।
ପ୍ରତ୍ୟକ୍ଷଦର୍ଶୀଙ୍କ ସୂଚନା ଅନୁଯାୟୀ, ଅଟୋଟି ଯାତ୍ରୀମାନଙ୍କୁ ନେଇ କୋଦଳା ଅଭିମୁଖେ ଯାଉଥିବା ସମୟରେ ବିପରୀତ ଦିଗରୁ ସେହି ସମାନ ରାସ୍ତାରେ ଏକ ବସ୍ ମାଡ଼ି ଆସିଥିଲା। ଧକ୍କା ଏତେ ଭୟଙ୍କର ଥିଲା ଯେ ବସଟି ଅଟୋକୁ ପିଟିବା ପରେ ପ୍ରାୟ ୧୦୦ ମିଟର ପର୍ଯ୍ୟନ୍ତ ଘୋଷାଡ଼ି ନେଇ ରାସ୍ତା କଡ଼ରେ ଥିବା ଏକ ଗଛରେ ପିଟି ହୋଇଯାଇଥିଲା। ଦୁର୍ଘଟଣା ଘଟାଇବା ପରେ ଚାଲାକ ଜଣକ ବସ୍ ସହ ଘଟଣାସ୍ଥଳରୁ ଫେରାର ମାରିବାରେ ସଫଳ ହୋଇଛି।
ଦୁର୍ଘଟଣା ପରେ ସ୍ଥାନୀୟ ଲୋକେ ତୁରନ୍ତ ଉଦ୍ଧାର କାର୍ଯ୍ୟରେ ଜୁଟିଯାଇଥିଲେ ଏବଂ ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଥିବା ଆହତମାନଙ୍କୁ ଗାଡ଼ି ଭିତରୁ ବାହାର କରିଥିଲେ। ସମସ୍ତ ଗୁରୁତର ଓ ଆହତ ବ୍ୟକ୍ତିଙ୍କୁ ପ୍ରଥମେ କୋଦଳା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର (CHC) ରେ ଭର୍ତ୍ତି କରାଯାଇଛି, ଯେଉଁଠାରେ ସେମାନଙ୍କର ଚିକିତ୍ସା ଜାରି ରହିଛି। ମୃତଦେହଗୁଡ଼ିକୁ ବ୍ୟବଚ୍ଛେଦ ପାଇଁ ପଠାଯିବା ସହ ବର୍ତ୍ତମାନ ସୁଦ୍ଧା ମୃତ ଓ ଗୁରୁତର ଆହତମାନଙ୍କର ସଠିକ୍ ପରିଚୟ ମିଳିପାରି ନାହିଁ।
ଅନ୍ୟପଟେ ଖବର ପାଇ ପୁରୁଷୋତ୍ତମପୁର ଥାନା ପୋଲିସ ଏବଂ ଦମକଳ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ରାସ୍ତାରୁ ଦୁର୍ଘଟଣାଗ୍ରସ୍ତ ଗାଡ଼ିକୁ ହଟାଇ ଯାତାୟାତ ସ୍ୱାଭାବିକ କରାଯିବା ସହ ପୋଲିସ ଏକ ମାମଲା ରୁଜୁ କରିଛି। ଫେରାର ଥିବା ବସ୍ ଏବଂ ଏହାର ଚାଳକକୁ ଧରିବା ପାଇଁ ପୋଲିସ ବିଭିନ୍ନ ସ୍ଥାନରେ ଚଢ଼ାଉ ଜାରି ରଖିଥିବା ସୂଚନା ମିଳିଛି।
ଗଞ୍ଜାମରେ ମର୍ମନ୍ତୁଦ ସଡ଼କ ଦୁର୍ଘଟଣା: ୬ ମୃତ,୪ ଗୁରୁତର
ରାଜ୍ୟରେ ଆରମ୍ଭ ହେଲା ପଞ୍ଚାୟତ ଓ ପୌର ନିର୍ବାଚନ ପ୍ରକ୍ରିୟା…
ନନ୍ଦିଘୋଷ ବ୍ୟୁରୋ: ପୌର ଓ ପଞ୍ଚାୟତ ନିର୍ବାଚନ ପାଇଁ ରାଜ୍ୟରେ ଜୋରଦାର ପ୍ରସ୍ତୁତି ଆରମ୍ଭ ହୋଇଛି । ଭୋଟର୍ ତାଲିକା ପ୍ରସ୍ତୁତି ପାଇଁ ନିର୍ବାଚନ କମିଶନ ପ୍ରକ୍ରିୟା ଆରମ୍ଭ କରିଛନ୍ତି । ଉପଜିଲ୍ଲାପାଳମାନଙ୍କୁ ଭୋଟର୍ ପଞ୍ଜିକରଣ ଅଧିକାରୀ ଓ ବିଡିଓମାନଙ୍କୁ AERO ଭାବେ ଦାୟିତ୍ୱ ଦିଆଯାଇଛି ।
ନିର୍ବାଚନୀ ପ୍ରସ୍ତୁତିକୁ ନେଇ ପ୍ରମୁଖ ରାଜନୈତିକ ଦଳମାନେ ମଧ୍ୟ ସକ୍ରିୟ ହୋଇପଡ଼ିଛନ୍ତି । ବିଜେଡି ପକ୍ଷରୁ “ନାରୀ ଅଧିକାର ସମାବେଶ” ଆୟୋଜନ ହେଉଥିବା ବେଳେ ବିଜେପି “ଜନ ଆକ୍ରୋଶ ସମାବେଶ” ମାଧ୍ୟମରେ ଲୋକଙ୍କ ସହ ଯୋଡ଼ାଯାଉଛି ।
ଅନ୍ୟପଟେ କଂଗ୍ରେସ ବିଜେପି ସରକାରଙ୍କ ୨ ବର୍ଷର ବିଫଳତାକୁ ଗାଁ ଗାଁରେ ପହଞ୍ଚାଇବାକୁ ରଣନୀତି ପ୍ରସ୍ତୁତ କରିଛି । ରାଜ୍ୟରେ ନିର୍ବାଚନୀ ମାହୋଲ ଧୀରେ ଧୀରେ ଜୋର ଧରୁଥିବା ବେଳେ ରାଜନୈତିକ ଚର୍ଚ୍ଚା ମଧ୍ୟ ତେଜୁଛି ।
ବସ ସହ ଅଟୋ ମୁହାଁମୁହିଁ ଧକ୍କା : ୬ ମୃତ, ୪ ଗୁରୁତର
ଭୁବନେଶ୍ଗର : ଗଞ୍ଜାମ ପୁରୁଷୋତ୍ତମପୁର ଥାନା ଲଡକାପଲ୍ଲୀ ଛକରେ ବସ ସହ ଅଟୋ ମୁହାଁମୁହିଁ ଧକ୍କା। ଘଟଣାସ୍ଥଳରେ ୬ ମୃତ, ୪ ଗୁରୁତର। ସମସ୍ତ ଆହତଙ୍କୁ କୋଦଳା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରରେ ଭର୍ତ୍ତି କରାଯାଇଛି। ମୃତକଙ୍କ ପରିଚୟ ମିଳିପାରି ନଥିବା ବେଳେ ପୋଲିସ ପହଞ୍ଚି ଚଳାଇଛି ତଦନ୍ତ। ଅଟୋକୁ ଧକ୍କା ଦେବାପରେ ଘୋଷାଡ଼ି ନେଇ ରସ୍ତା କଡ଼ ଗଛରେ ପିଟିଲା ବସ l ଦୁର୍ଘଟଣାରେ ଅଟୋରେ ବସିଥିବା ପାଞ୍ଚ ଜଣଙ୍କ ମୃତ୍ୟୁ ହୋଇଥିବା ବେଳେ ଚାରିରୁ ଅଧିକ ଗୁରୁତର ହୋଇଛନ୍ତି l ମୃତ ଓ ଗୁରୁତରଙ୍କ ପରିଚୟ ମିଳିପାରିନଥିବା ବେଳେ ଅଟୋଟି କୋଦଳା ଅଭିମୁଖେ ଯିବା ସମୟରେ ବିପରୀତ ଦିଗରୁ ଆସୁଥିବା ବସ ଧକ୍କା ଦେଇ ଫେରାର ମାରିଥିଲା । ଘଟଣାସ୍ଥଳରେ ସ୍ଥାନୀୟ ଲୋକେ ଉଦ୍ଧାର କାର୍ଯ୍ୟ କରିଥିଲେ।..
ଆସୁଛି ଲଘୁଚାପ, ଓଡିଶା ଉପରେ ସକ୍ରିୟ ରହିଛି ଘୂର୍ଣ୍ଣିବଳୟ।
ନନ୍ଦିଘୋଷ ବ୍ୟୁରୋ: ରାଜ୍ୟରେ ଜାରି ରହିଥିବା ଅସହ୍ୟ ଗରମ ଏବଂ ଗୁଳୁଗୁଳି ମଧ୍ୟରେ ଏବେ ଆଶ୍ୱସ୍ତିର ଖବର ମିଳିଛି। ଓଡ଼ିଶାବାସୀଙ୍କୁ ଖୁବ୍ଶୀଘ୍ର ମିଳିବ ତ୍ରାହି। ଭାରତୀୟ ପାଣିପାଗ ବିଭାଗ ବା IMD ର ଆକଳନ ଅନୁଯାୟୀ, ରାଜ୍ୟରେ ଏକ ବଡ଼ ବର୍ଷାର ପୂର୍ବାନୁମାନ କରାଯାଇଛି। ଓଡ଼ିଶା ଆକାଶରେ ଏବେ ଏକ ଶକ୍ତିଶାଳୀ ଘୂର୍ଣ୍ଣିବଳୟ ସକ୍ରିୟ ରହିଛି, ଯାହା ଆଗାମୀ ଦିନରେ ବଡ଼ ଲଘୁଚାପର ରୂପ ନେବାକୁ ଯାଉଛି।
ବଙ୍ଗୋପସାଗରରେ ରୂପ ନେଉଛି ଆଉ ଏକ ପାଣିପାଗ ନିୟମ ଆଇଏମଡି (IMD) ର ସୂଚନା ଅନୁଯାୟୀ, ଆସନ୍ତା ମେ’ ୨୮ ଏବଂ ୨୯ ତାରିଖ ବେଳକୁ ପୂର୍ବ-କେନ୍ଦ୍ରୀୟ ବଙ୍ଗୋପସାଗରରେ ଏକ ଶକ୍ତିଶାଳୀ ଲଘୁଚାପ କ୍ଷେତ୍ର ସୃଷ୍ଟି ହେବାର ସମ୍ଭାବନା ରହିଛି।
ଓଡ଼ିଶା ଏବଂ ଏହାର ପାର୍ଶ୍ୱବର୍ତ୍ତୀ ଅଞ୍ଚଳ ଉପରେ ଏକ ବାୟୁମଣ୍ଡଳୀୟ ଘୂର୍ଣ୍ଣିବଳୟ ସକ୍ରିୟ ରହିଛି। ଆସନ୍ତା ୨୮ ଓ ୨୯ ତାରିଖ ଆଡ଼କୁ ଏହି ଘୂର୍ଣ୍ଣିବଳୟ ଘନୀଭୂତ ହୋଇ ଲଘୁଚାପର ରୂପ ନେବ। ଏହା ସୃଷ୍ଟି ହେବା ପରେ ଏହି ସିଷ୍ଟମ୍ ସିଧାସଳଖ ଉତ୍ତର-ପଶ୍ଚିମ ଦିଗକୁ ଗତି କରିବ। ଯାହାଫଳରେ ଏହା ଓଡ଼ିଶା ଏବଂ ପଶ୍ଚିମବଙ୍ଗ ଉପକୂଳ ମୁହାଁ ହେବାର ସମ୍ଭାବନା ଅଧିକ ରହିଛି।
ପାଣିପାଗ ବିଶେଷଜ୍ଞଙ୍କ କହିବା ଅନୁଯାୟୀ, ଏହି ଘୂର୍ଣ୍ଣିବଳୟ ଯେତିକି ପାଖେଇବ, ଓଡ଼ିଶାରେ ବର୍ଷାର ପରିମାଣ ସେତିକି ବଢ଼ିବ। ଏହି ଲଘୁଚାପର ସିଧାସଳଖ ପ୍ରଭାବ ଓଡ଼ିଶା ଉପରେ ପଡ଼ିବାକୁ ଯାଉଥିବାରୁ, ଆଗାମୀ ଦିନରେ ଉପକୂଳ ଜିଲ୍ଲାଗୁଡ଼ିକରେ ପ୍ରବଳରୁ ଅତି ପ୍ରବଳ ବର୍ଷା ହୋଇପାରେ। ଏହା ସହିତ ସମୁଦ୍ର ଅଶାନ୍ତ ରହିବା ଆଶଙ୍କା ଥିବାରୁ ମତ୍ସ୍ୟଜୀବୀମାନଙ୍କୁ ମଧ୍ୟ ଆଗୁଆ ସତର୍କ କରାଯାଇଛି।
ସୋସିଆଲ ମିଡିଆରେ ହଲଚଲ: ବିଜେପିକୁ ପଛରେ ପକାଇଲା ‘କକ୍ରୋଚ୍ ଜନତା ପାର୍ଟି’
ନନ୍ଦିଘୋଷ ବ୍ୟୁରୋ: ସୋସିଆ ମିଡିଆର ଶକ୍ତି ଆଜିର ଦୁନିଆରେ କେତେ ପ୍ରଭାବଶାଳୀ, ତାର ସବୁଠାରୁ ବଡ ଉଦାହରଣ ସାଜିଛି ‘କକ୍ରୋଚ୍ ଜନତା ପାର୍ଟି’ (CJP)। ଭାରତର ମୁଖ୍ୟ ବିଚାରପତି ସୂର୍ଯ୍ୟକାନ୍ତଙ୍କ ଏକ ମନ୍ତବ୍ୟକୁ ଅସ୍ତ୍ର କରି ମାତ୍ର କିଛି ଦିନ ମଧ୍ୟରେ ଇନଷ୍ଟାଗ୍ରାମରେ ବିଶ୍ବର ସବୁଠାରୁ ବଡ ରାଜନୈତିକ ଦଳ ବୋଲାଉଥିବା ବିଜେପିକୁ ମଧ୍ୟ ପଛରେ ପକାଇ ଦେଇଛି ଏହି ଭର୍ଚୁଆଲ୍ ଦଳ ।
ବର୍ତମାନ ସୁଦ୍ଧା ଇନଷ୍ଟାଗ୍ରାମରେ ‘କକ୍ରୋଚ୍ ଜନତା ପାର୍ଟି’ର ଫଲୋଅର୍ସ ସଂଖ୍ୟା ସମସ୍ତ ରେକର୍ଡ ଭାଙ୍ଗି ୧୨.୫ ନିୟୁତରେ ପହଞ୍ଚିଛି। ଅପରପକ୍ଷରେ, ଶାସକ ଦଳ ବିଜେପିର ଫଲୋଅର୍ସ ସଂଖ୍ୟା ୮.୭ ନିୟୁତ, ଆମ ଆଦମୀ ପାର୍ଟିର ୧.୯ ନିୟୁତ ଏବଂ କଂଗ୍ରେସର ୧୩.୩ ନିୟୁତ ଫଲୋଅର୍ସ ରହିଛନ୍ତି।
CJI ଙ୍କ ମନ୍ତବ୍ୟରୁ ଜନ୍ମ ନେଲା ଏହି ଦଳ
ଗତ ଶୁକ୍ରବାର ସୁପ୍ରିମକୋର୍ଟରେ ଏକ ମାମଲା ଶୁଣାଣି ବେଳେ ମୁଖ୍ୟ ବିଚାରପତି ସୂର୍ଯ୍ୟକାନ୍ତ ଦେଶର କିଛି ବେକାର ଯୁବବର୍ଗଙ୍କୁ ‘କକ୍ରୋଚ୍’ ଏବଂ ପରଜୀବୀ ବୋଲି ମନ୍ତବ୍ୟ ଦେଇଥିଲେ । ସେ କହିଥିଲେ ଯେ, ଯେଉଁମାନେ ବୃତ୍ତିଗତ ଦୁନିଆରେ ନିଜ ପାଇଁ ସ୍ଥାନ ତିଆରି କରିପାରନ୍ତି ନାହିଁ, ସେମାନେ ଘଟଣାର ଗମ୍ଭୀରତାକୁ ନ ବୁଝି ପ୍ରତ୍ୟେକ ପ୍ରସଙ୍ଗରେ ବ୍ୟବସ୍ଥାକୁ ଟାର୍ଗେଟ କରିଥାନ୍ତି ।
CJI ଙ୍କ ଏହି ମନ୍ତବ୍ୟକୁ ରାଜନୈତିକ ଯୋଗାଯୋଗ ରଣନୀତିଜ୍ଞ ଅଭିଜିତ ଦୀପକେ ଏକ ଆନ୍ଦୋଳନରେ ପରିଣତ କରିଥିଲେ, ଯାହାକୁ ଦେଶର ଯୁବପିଢି ଆପଣେଇଛନ୍ତି ।
କିଏ ଏହି ଅଭିଜିତ ଦୀପକେ ?
୩୦ ବର୍ଷୀୟ ଅଭିଜିତ ଦୀପକେ ହେଉଛନ୍ତି କକ୍ରୋଚ୍ ଜନତା ପାର୍ଟିର ପ୍ରତିଷ୍ଠାତା । ଅଭିଜିତ ଦୀପକେ ପୁଣେରୁ ସାମ୍ବାଦିକତାରେ ସ୍ନାତକ ହାସଲ କରିଛନ୍ତି ଏବଂ ବର୍ତ୍ତମାନ ବୋଷ୍ଟନ ବିଶ୍ୱବିଦ୍ୟାଳୟରେ ଜନସମ୍ପର୍କ ବିଭାଗରେ ଅଧ୍ୟୟନ କରୁଛନ୍ତି । ସେ ଡିଜିଟାଲ୍ ମିଡିଆ ଏବଂ ରାଜନୈତିକ ବାର୍ତ୍ତା ପ୍ରସାରଣରେ ଜଣେ ବିଶେଷଜ୍ଞ । ୨୦୨୦ ରୁ ୨୦୨୩ ମଧ୍ୟରେ ସେ ଆମ ଆଦମୀ ପାର୍ଟି (AAP) ର ସୋସିଆଲ ମିଡିଆ ଏବଂ ନିର୍ବାଚନ ପ୍ରଚାର ସହ ଜଡ଼ିତ ଥିଲେ । ୨୦୨୦ ଦିଲ୍ଲୀ ନିର୍ବାଚନରେ ଆପ୍ର ପ୍ରସିଦ୍ଧ ‘ମିମ୍-ଆଧାରିତ’ ଡିଜିଟାଲ୍ ଅଭିଯାନ ପଛରେ ତାଙ୍କର ବଡ଼ ହାତ ଥିଲା ।
ଅଭିଜିତଙ୍କ ଏହି ଅଭିଯାନକୁ ବିରୋଧୀ ଦଳର ପ୍ରମୁଖ ନେତା ଯେପରିକି ଟିଏମସି ସାଂସଦ ମହୁଆ ମୋଇତ୍ର, କୀର୍ତ୍ତି ଆଜାଦ ଏବଂ ବରିଷ୍ଠ ଆଇନଜୀବୀ ପ୍ରଶାନ୍ତ ଭୂଷଣ ମଧ୍ୟ ସମର୍ଥନ ଜଣାଇଛନ୍ତି ।
ୱେବସାଇଟ୍ ଏବଂ ଦଳୀୟ ସଂଗୀତ ରିଲିଜ୍
ଦଳ ପକ୍ଷରୁ ଏକ ସ୍ୱତନ୍ତ୍ର ୱେବସାଇଟ୍ ମଧ୍ୟ ସୃଷ୍ଟି କରାଯାଇଛି, ଯାହା ଅଳ୍ପ ଦିନରେ ଲକ୍ଷରୁ ଅଧିକ ଲୋକଙ୍କୁ ଆକର୍ଷିତ କରିସାରିଲାଣି । ଏହି ୱେବସାଇଟ୍ରେ ଦଳ ନିଜକୁ “ଅଳସୁଆ ଏବଂ ବେକାର ଯୁବବର୍ଗଙ୍କ ସ୍ୱର” ବୋଲି ବର୍ଣ୍ଣନା କରିବା ସହ ନିଜର ଦଳୀୟ ସଂଗୀତ ମଧ୍ୟ ଜାରି କରିଛି । ତେବେ ଏହି ଦଳର କୌଣସି ଆନୁଷ୍ଠାନିକ ପଞ୍ଜିକରଣ ହୋଇନାହିଁ ।
କ୍ଷମତାକୁ ଆସିଲେ କଣ କରିବ ସିଜେପି (CJP)?
୧– ଅବସର ପରେ କୌଣସି ମୁଖ୍ୟ ବିଚାରପତିଙ୍କୁ ରାଜ୍ୟସଭାକୁ ପଠାଯିବ ନାହିଁ।
୨– ଜଣେ ପ୍ରକୃତ ଭୋଟରଙ୍କ ନାମ ତାଲିକାରୁ ବାଦ୍ ପଡ଼ିଲେ, ନିର୍ବାଚନ କମିଶନଙ୍କ ବିରୋଧରେ ଆତଙ୍କବାଦୀ ବିରୋଧୀ ଆଇନ (UAPA) ଅନୁସାରେ କାର୍ଯ୍ୟାନୁଷ୍ଠାନ ହେବ।
୩– ମହିଳାମାନଙ୍କ ପାଇଁ ସିଧାସଳଖ ୫୦ ପ୍ରତିଶତ ସଂରକ୍ଷଣ ବ୍ୟବସ୍ଥା କରାଯିବ ଓ ବଡ଼ ବ୍ୟବସାୟୀଙ୍କ ସହ ଜଡ଼ିତ ଗଣମାଧ୍ୟମ ସଂସ୍ଥାର ଲାଇସେନ୍ସ ବାତିଲ ହେବ।
୪– ଦଳ ବଦଳାଉଥିବା ନେତାଙ୍କ ସଦସ୍ୟତା ରଦ୍ଦ ହେବ ଏବଂ ୨୦ ବର୍ଷ ପାଇଁ ନିର୍ବାଚନ ଲଢ଼ିବା ଉପରେ ରୋକ୍ ଲାଗିବ।
କକ୍ରୋଚ୍ ଜନତା ପାର୍ଟି ଦଳରେ ମିଶିବା ପାଇଁ ଯୋଗ୍ୟତା:
. ପ୍ରାର୍ଥୀ ନିଶ୍ଚିତ ଭାବେ ବେକାର ଏବଂ ଅଳସୁଆ ହୋଇଥିବେ
. ଦିନକୁ ଅତିକମରେ ୧୧ ଘଣ୍ଟା ସୋସିଆଲ ମିଡିଆରେ ଆକ୍ଟିଭ୍ ଥିବେ
ଏହି ରୋଚକ ଓ ବ୍ୟଙ୍ଗାତ୍ମକ ଡିଜିଟାଲ୍ ଆନ୍ଦୋଳନ ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି।
ହତ୍ୟା ନା ଆତ୍ମହତ୍ୟା? ତ୍ଵିଶାଙ୍କ ମୃତ୍ୟୁ ମାମଲାରେ ଆସିଲା ନୂଆ ଅପଡେଟ୍
ମଧ୍ୟପ୍ରଦେଶ (ଭୋପାଳ): ନୋଏଡାର ମଡେଲ ତଥା ଅଭିନେତ୍ରୀ ତ୍ଵିଶା ଶର୍ମାଙ୍କ ରହସ୍ୟଜନକ ମୃତ୍ୟୁ ମାମଲା ଏବେ ସାରା ଦେଶରେ ଚର୍ଚ୍ଚାର ବିଷୟ ପାଲଟିଛି। ବିବାହର ମାତ୍ର ୫ ମାସ ପରେ ଭୋପାଳସ୍ଥିତ ଶଶୁର ଘରୁ ଟ୍ୱିଶାଙ୍କ ଝୁଲନ୍ତା ଦେହ ମିଳିବା ପରେ ଏହା ଆତ୍ମହତ୍ୟା ନା ଯୌତୁକ ନିର୍ଯାତନା ଜନିତ ହତ୍ୟା, ସେ ନେଇ ଦ୍ୱନ୍ଦ୍ୱ ବଢ଼ିବାରେ ଲାଗିଛି। ଏହି ହାଇପ୍ରୋଫାଇଲ୍ ମାମଲାରେ ବର୍ତ୍ତମାନ କୋର୍ଟଙ୍କ ବଡ଼ ନିଷ୍ପତ୍ତି ଆସିଥିବା ବେଳେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମୋହନ ଯାଦବ ସିବିଆଇ (CBI) ତଦନ୍ତର ପ୍ରତିଶ୍ରୁତି ଦେଇଛନ୍ତି।
ମାତ୍ର ୫ ମାସ ତଳେ ବଡ଼ ଆଶା ନେଇ ସଂସାର ଗଢ଼ିଥିବା ୩୩ ବର୍ଷୀୟା ତ୍ଵିଶା ଶର୍ମାଙ୍କ ଜୀବନ ଦୀପ ଏଭଳି ଭାବେ ଲିଭିଯିବ, ତାହା କେହି ଭାବି ନଥିଲେ। ଗତ ମେ ୧୨ ତାରିଖରେ ଭୋପାଳସ୍ଥିତ ଶଶୁର ଘର ଛାତ ଉପରେ ଏକ ଜିମ୍ନାଷ୍ଟିକ୍ ରୋପ୍ (ଦଉଡ଼ି)ରେ ତାଙ୍କ ମୃତଦେହ ଝୁଲୁଥିବା ଅବସ୍ଥାରେ ଉଦ୍ଧାର କରାଯାଇଥିଲା।
ପରିବାରର ସାଂଘାତିକ ଅଭିଯୋଗ: ତ୍ଵିଶାଙ୍କ ପରିବାର ଲୋକଙ୍କ କହିବା ଅନୁସାରେ, ଏହା ସାଧାରଣ ଆତ୍ମହତ୍ୟା ନୁହେଁ। ଯୌତୁକ ପାଇଁ ତାଙ୍କୁ କ୍ରମାଗତ ଭାବେ ମାନସିକ ଓ ଶାରୀରିକ ନିର୍ଯାତନା ଦିଆଯାଉଥିଲା। ଟ୍ୱିଶାଙ୍କୁ ହତ୍ୟା କରାଯାଇଛି କିମ୍ବା ଆତ୍ମହତ୍ୟା କରିବା ପାଇଁ ବାଧ୍ୟ କରାଯାଇଛି।
ସ୍ୱାମୀଙ୍କ ସୂଚନା ଦେଲେ ମିଳିବ ୧୦ ହଜାର ପୁରସ୍କାର
ମୃତ୍ୟୁ ପରେ ପୋଲିସ ଟ୍ୱିଶାଙ୍କ ସ୍ୱାମୀ ସମର୍ଥ ସିଂହଙ୍କ ବିରୋଧରେ ଯୌତୁକ ମୃତ୍ୟୁ ମାମଲା ରୁଜୁ କରିଛି। ଏକ ସ୍ୱତନ୍ତ୍ର ତଦନ୍ତକାରୀ ଦଳ (SIT) ଏହି ମାମଲାର ଛାନଭିନ୍ କରୁଛି। ଏହି ମାମଲାରେ ଟ୍ୱିଶାଙ୍କ ଶାଶୁଙ୍କୁ ଅଗ୍ରୀମ ଜାମିନ ମିଳିସାରିଥିବା ବେଳେ ତ୍ଵିଶାଙ୍କ ସ୍ୱାମୀ ସମର୍ଥଙ୍କ ଜାମିନ ଆବେଦନ କୋର୍ଟ ଖାରଜ କରିଦେଇଛନ୍ତି। ସେ ଏବେ ସୁଦ୍ଧା ଫେରାର ଅଛନ୍ତି। ତେବେ ଫେରାର ସମର୍ଥଙ୍କ ସୂଚନା ଦେବା ପାଇଁ ପୋଲିସ ପକ୍ଷରୁ ୧୦,୦୦୦ ଟଙ୍କାର ପୁରସ୍କାର ରାଶି ଘୋଷଣା କରାଯାଇଛି।
ପରିବାରକୁ ଝଟକା: ଦ୍ୱିତୀୟ ପୋଷ୍ଟମର୍ଟମ ଆବେଦନ ଖାରଜ
ନ୍ୟାୟ ପାଇଁ କୋର୍ଟରେ ଚାଲିଥିବା ଲଢ଼େଇରେ ଟ୍ୱିଶାଙ୍କ ପରିବାରକୁ ଏକ ବଡ଼ ଝଟକା ଲାଗିଛି। ଦ୍ୱିତୀୟ ସ୍ୱାଧୀନ ପୋଷ୍ଟମର୍ଟମ ପାଇଁ ପରିବାର ପକ୍ଷରୁ କରାଯାଇଥିବା ଆବେଦନକୁ ଭୋପାଳ ଜିଲ୍ଲା କୋର୍ଟ ଖାରଜ କରିଦେଇଛନ୍ତି। ପୋଷ୍ଟମର୍ଟମ ରିପୋର୍ଟ ଅନୁଯାୟୀ, ମୃତ୍ୟୁର ପ୍ରାଥମିକ କାରଣ “ଶ୍ୱାସରୁଦ୍ଧ ହେବା ବା ଫାଶୀ” ବୋଲି ସ୍ପଷ୍ଟ ହୋଇଛି, ଯଦିଓ ଶରୀରରେ କିଛି ଆଘାତର ଚିହ୍ନ ମଧ୍ୟ ରହିଛି। ଭୋପାଳ ପୋଲିସ କମିଶନରଙ୍କ ସୂଚନା ଅନୁସାରେ, ଏହା ଏକ ଆତ୍ମହତ୍ୟା ମାମଲା।
ମୃତଦେହ ସଂରକ୍ଷଣ ପାଇଁ କୋର୍ଟଙ୍କ ସ୍ୱେଶାଲ ନିର୍ଦ୍ଦେଶ
ଏମ୍ସ ଭୋପାଳରେ ଆବଶ୍ୟକ ସୁବିଧା ନଥିବାରୁ, କୋର୍ଟ ମୃତଦେହକୁ ଦୀର୍ଘ ସମୟ ସୁରକ୍ଷିତ ରଖିବା ପାଇଁ ମାଇନସ୍ ୮୦ ଡିଗ୍ରୀ ସେଲସିୟସ୍ ତାପମାତ୍ରାରେ ସଂରକ୍ଷିତ ରଖିବାକୁ ପୋଲିସକୁ ନିର୍ଦ୍ଦେଶ ଦେଇଛନ୍ତି। ତେବେ ନ୍ୟାୟ ଆଶାରେ ତ୍ଵିଶା ଶର୍ମାଙ୍କ ପରିବାର ଲୋକେ ମଧ୍ୟପ୍ରଦେଶ ମୁଖ୍ୟମନ୍ତ୍ରୀ ମୋହନ ଯାଦବଙ୍କୁ ସାକ୍ଷାତ କରିଛନ୍ତି। ମୁଖ୍ୟମନ୍ତ୍ରୀ ସେମାନଙ୍କୁ ସମ୍ପୂର୍ଣ୍ଣ ସହାୟତାର ପ୍ରତିଶ୍ରୁତି ଦେଇଛନ୍ତି। ତେବେ ଏହି ସମ୍ବେଦନଶୀଳ ମାମଲାର ତଦନ୍ତ ଭାର କେନ୍ଦ୍ରୀୟ ତଦନ୍ତ ବ୍ୟୁରୋ (CBI)କୁ ହସ୍ତାନ୍ତର କରିବା ପାଇଁ ସେ କେନ୍ଦ୍ରକୁ ଚିଠି ଲେଖିବେ ବୋଲି ସ୍ପଷ୍ଟ କରିଛନ୍ତି। ଯଦି ପରିବାର ଚାହିଁବେ, ମୃତଦେହକୁ ଦିଲ୍ଲୀ ଏମ୍ସ (AIIMS) ନେବା ପାଇଁ ସରକାର ସମସ୍ତ ବ୍ୟବସ୍ଥା କରିବେ ବୋଲି ମଧ୍ୟ ମୁଖ୍ୟମନ୍ତ୍ରୀ କହିଛନ୍ତି।
ସାମ୍ନାକୁ ଆସିଲା ଅଡିଓ କ୍ଲିପ୍, ପ୍ରମାଣ ନଷ୍ଟର ଆଶଙ୍କା
ଏହି ସମୟରେ ଏକ ନୂଆ ଅଡିଓ କ୍ଲିପ୍ ସାମ୍ନାକୁ ଆସିଛି, ଯେଉଁଥିରେ ତ୍ଵିଶାଙ୍କ ଉପରେ ହେଉଥିବା ପାରିବାରିକ ନିର୍ଯାତନାର ସ୍ପଷ୍ଟ ସଙ୍କେତ ମିଳୁଥିବା ଦାବି କରାଯାଇଛି। ତେବେ ସ୍ୱାମୀଙ୍କ ପରିବାର ବେଶ୍ ପ୍ରଭାବଶାଳୀ ଏବଂ ଆଇନଗତ ପୃଷ୍ଠଭୂମିରୁ ହୋଇଥିବାରୁ ପ୍ରମାଣ ନଷ୍ଟ ହେବାର ଆଶଙ୍କା କରୁଛନ୍ତି ଟ୍ୱିଶାଙ୍କ ପରିବାର ଲୋକେ।
ଏବେ ଦେଖିବାକୁ ବାକି ରହିଲା, ସିବିଆଇ ହାତକୁ ମାମଲା ଗଲେ ତ୍ଵିଶାଙ୍କ ମୃତ୍ୟୁର ପ୍ରକୃତ ରହସ୍ୟ ଉପରୁ ପରଦା ହଟିପାରୁଛି କି ନାହିଁ ।
ଦିଲ୍ଲୀ ଆସୁଛନ୍ତି ପୁଟିନ, ବ୍ରିକ୍ସ ସମ୍ମିଳନୀରେ ଜମିବ ମହାବୈଠକ, ସି ଜିନପିଙ୍ଗଙ୍କ ସହ ହେବ ସ୍ପେଶାଲ ମିଟିଂ !
ନନ୍ଦିଘୋଷ ବ୍ୟୁରୋ : ବିଶ୍ଵ ରାଜନୀତିକୁ ନେଇ ଏହି ସମୟର ସବୁଠାରୁ ବଡ ଖବର ସାମ୍ନାକୁ ଆସୁଛି । ଆସନ୍ତା ସେପ୍ଟେମ୍ବର ମାସରେ ଭାରତ ଗସ୍ତରେ ଆସୁଛନ୍ତି ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ । ନୂଆଦିଲ୍ଲୀରେ ଆୟୋଜିତ ହେବାକୁ ଥିବା ହାଇ-ପ୍ରୋଫାଇଲ ବ୍ରିକ୍ସ (BRICS) ଶିଖର ସମ୍ମିଳନୀରେ ସେ ସାମିଲ ହେବେ । ରୁଷର ସରକାରୀ ସମ୍ବାଦ ସଂସ୍ଥା ତାସ (TASS) ଅନୁଯାୟୀ, କ୍ରେମଲିନର ଆନ୍ତର୍ଜାତୀୟ ବ୍ୟାପାର ପରାମର୍ଶଦାତା ୟୁରି ଉଶାକୋଭା ଏହି ସୂଚନା ଦେଇଛନ୍ତି । ଚଳିତ ବର୍ଷ ଭାରତ ବ୍ରିକ୍ସର ସଭାପତିତ୍ୱ କରୁଥିବାରୁ ସେପ୍ଟେମ୍ବର ୧୨ ଏବଂ ୧୩ ତାରିଖରେ ଏହି ମହାସମ୍ମିଳନୀର ଆୟୋଜନ କରାଯାଇଛି ।
ଜିନପିଙ୍ଗଙ୍କ ସହ ହେବ ମହାବୈଠକ !
ଏହି ଗସ୍ତରେ ସବୁଠରୁ ବଡ ଓ ରୋମାଞ୍ଚକର ଦିଗ ହେଉଛି- ବ୍ରିକ୍ସ ସମ୍ମିଳନୀର ପାର୍ଶ୍ଵବର୍ତ୍ତୀ ବୈଠକରେ ରୁଷ ରାଷ୍ଟ୍ରପତି ଭ୍ଲାଦିମିର ପୁଟିନ ଏବଂ ଚୀନ ରାଷ୍ଟ୍ରପତି ସି ଜିନପିଙ୍ଗଙ୍କ ମଧ୍ୟରେ ଏକ ସ୍ପେଶାଲ ଦ୍ୱିପାକ୍ଷିକ ଆଲୋଚନା ହେବାକୁ ଯାଉଛି। ଏହାପୂର୍ବରୁ ଗତ ୨୦୨୫ରେ ୨୩ତମ ଭାରତ-ରୁଷ ବାର୍ଷିକ ଶିଖର ସମ୍ମିଳନୀରେ ଯୋଗଦେବାକୁ ପୁଟିନ ଭାରତ ଆସିଥିଲେ । ଏହି ମହାଗସ୍ତର ବ୍ଲୁ-ପ୍ରିଣ୍ଟ ପ୍ରସ୍ତୁତ କରିବା ପାଇଁ ଚଳିତ ମାସ ଆରମ୍ଭରେ ରୁଷର ବୈଦେଶିକ ମନ୍ତ୍ରୀ ସେରଗେଇ ଲାଭରୋଭ ମଧ୍ୟ ଦିଲ୍ଲୀ ଆସି ସମୀକ୍ଷା କରିସାରିଛନ୍ତି ।
କାହିଁକି ଗୁତୁତ୍ୱପୂର୍ଣ୍ଣ ଏହି ବ୍ରିକ୍ସ?
ବ୍ରିକ୍ସ ଏବେ ବିଶ୍ଵ ଅର୍ଥନୀତିର ଏକ ଶକ୍ତିଶାଳୀ ମଞ୍ଚ ପାଲଟିଛି । ପ୍ରାରମ୍ଭରେ ଏଥିରେ ବ୍ରାଜିଲ, ରୁଷ, ଭାରତ,ଚୀନ ଏବଂ ଦକ୍ଷିଣ ଆଫ୍ରିକା ଥିଲେ । କିନ୍ତୁ ୨୦୨୪ରେ ଇଜିପ୍ଟ, ଇଥିଓପିଆ, ଇରାନ ଓ ୟୁଏଇ ଏବଂ ୨୦୨୫ରେ ଇଣ୍ଡୋନେସିଆ ଏଥିରେ ଯୋଗ ଦେବା ପରେ ଏହା ଏକ ବିଶାଳ ସଂଗଠନରେ ପରିଣତ ହୋଇଛି ।
ବ୍ରିକ୍ସର ୫ଟି ମୁଖ୍ୟ ଶକ୍ତି-
. ୧୧ ପ୍ରମୁଖ ଦେଶ: ଏବେ ଏହି ସଂଗଠନରେ ବିଶ୍ଵର ୧୧ଟି ବଡ ବିକାଶଶୀଳ ଅର୍ଥନୀତି ସାମିଲ ଅଛନ୍ତି ।
. ୪୯.୫ ପ୍ରତିଶତ ଜନସଂଖ୍ୟା: ସାରା ଦୁନିଆର ପ୍ରାୟ ଅଧା ଜନସଂଖ୍ୟା ଏହି ଦେଶଗୁଡିକରେ ବାସ କରନ୍ତି ।
. ୪୦ ପ୍ରତିଶତ (GDP): ବିଶ୍ଵର ମୋଟ ଜିଡିପିର ପ୍ରାୟ ୪୦ ପ୍ରତିଶତ ଏହି ଗ୍ରୁପ୍ ପାଖରେ ଅଛି।
. ୨୬ ପ୍ରତିଶତ ବାଣିଜ୍ୟ: ଗ୍ଲୋବାଲ୍ ଟ୍ରେଡର ଏକ ବଡ ଭାଗ ଏମାନଙ୍କ ଦ୍ୱାରା ନିୟନ୍ତ୍ରିତ ହୁଏ।
. ମୋଦୀଙ୍କ ନେତୃତ୍ୟରେ ଭାରତ ଚଳିତ ବର୍ଷ ଏହାର ମଙ୍ଗ ଧରିଛି ।
ୟୁକ୍ରେନ ଯୁଦ୍ଧ ଏବଂ ବଦଳୁଥିବା ଭୂ-ରାଜନୀତି ମଧ୍ୟରେ ପୁଟିନଙ୍କ ଏହି ଭାରତ ଗସ୍ତ ଏବଂ ଜିନପିଙ୍ଗଙ୍କ ସହ ସାକ୍ଷାତକାର ଉପରେ ଏବେ ସାରା ବିଶ୍ଵର ନଜର ରହିଛି ।
ପ୍ରକାଶ ପାଇଲା ଯୁକ୍ତ ଦୁଇ ରେଜଲ୍ଟ: ଅପରାହ୍ଣ ୩ଟାରୁ ଅନଲାଇନ୍ରେ ମିଳିବ ଯୁକ୍ତ ୨ ରେଜଲ୍ଟ
ନନ୍ଦିଘୋଷ ବ୍ୟୁରୋ: ପ୍ରକାଶ ପାଇଲା ଯୁକ୍ତ ଦୁଇ ପରୀକ୍ଷାଫଳ । ଚଳିତ ବର୍ଷ ମୋଟ ପାସ ହାର ରହିଛି ୮୫.୮୫ ପ୍ରତିଶତ । କଳାରେ ସର୍ବମୋଟ ୮୪.୫୦ ପ୍ରତିଶତ ହୋଇଥିବାବେଳେ 77.97% ଛାତ୍ରୀ ଓ 89.45% ଛାତ୍ର ପାସ କରିଛନ୍ତି । ସେହିପରି ବିଜ୍ଞାନରେ ପାସ ହାର ରହିଛି ୮୮.୮୦ ପ୍ରତିଶତ । ଛାତ୍ର 87.41% ଛାତ୍ରୀଙ୍କ 90.24% ପାସ କରିଛନ୍ତି । ବାଣିଜ୍ୟରେ ସର୍ବମୋଟ ୮୮.୦୭ ପ୍ରତିଶତ ପାସହାର ଥିବାବେଳେ ଛାତ୍ର ୮୩.୬୭% ଛାତ୍ରୀଙ୍କ ପାସ ହାର ରହିଛି ୯୦.୪୩% । ଧନ୍ଦାମୂଳକ ଶିକ୍ଷାରେ ସର୍ବୋମୋଟ ୭୭.୬୨ ପ୍ରତିଶତ ପାସ କରିଛନ୍ତି । ଛାତ୍ର ୭୧.୪୯% ଓ ଛାତ୍ରୀଙ୍କ ପାସ ହାର ରହିଛି ୮୩.୪୩% । ଚଳିତବର୍ଷ ଫର୍ମ ଫିଲ ଅଫ କରିଥିଲେ ୪ ଲକ୍ଷ ୧ ହଜାର ୬୨୩ ପିଲା । ସେଥି ମଧ୍ୟରୁ ପରୀକ୍ଷା ଦେଇଥିଲେ ୩ ଲକ୍ଷ ୯୮ ହଜାର ୯୦ । ସମୁଦାୟ ପାସ ହୋଇଛନ୍ତି ୩ ଲକ୍ଷ ୪୧ ହଜାର ୭୮୧ । ପ୍ରତିବର୍ଷ ପରି ଚଳିତ ବର୍ଷ ମଧ୍ଯ ପୁଅଙ୍କ ତୁଳନାରେ ଝିଅଙ୍କ ପାସ ହାର ଅଧିକ ରହିଛି । କଳାରେ ସମ୍ବଲପୁରରେ ସର୍ବାଧିକ ପାସ ହାର ରହିଥିବାବେଳେ ନବରଙ୍ଗପୁରରେ ସର୍ବନିମ୍ନ । ବିଜ୍ଞାନେରେ ବାଲେଶ୍ବର ସର୍ବାଧିକ ରେଜଲ୍ଟ ରଖିଥିବାବେଳେ କୋରାପୁରରେ ସର୍ବନିମ୍ନ ରହିଛି । ବାଣିଜ୍ୟରେ ବୌଦ୍ଧରେ ଶତପ୍ରଶତ ରେଜଲ୍ଟ ହୋଇଥିବାବେଳେ ବଲାଙ୍ଗୀରରେ ସର୍ବନିମ୍ନ ରେଜଲ୍ଟ ରହିଛି । ଧନ୍ଦାମୂଳକ ଶିକ୍ଷାରେ ନବରଙ୍ଗପୁରରେ ଶତପ୍ରତିଶତ ରେଜଲ୍ଟ ହୋଇଛି ।
ଅପରାହ୍ନ ୩ ଟାରୁ ଅଭିଭାବକ ଓ ଛାତ୍ରଛାତ୍ରୀ ଏହା ଅନଲାଇନରେ ଦେଖି ପାରିବେ । ଚଳିତ ଥର ୨୨୧ ପ୍ରଶ୍ନପତ୍ର ହବ କରାଯାଇଥିଲା । ଯାହାକୁ ପ୍ରଥମ ଥର ପାଇଁ ଏଆଇ କ୍ୟାମେରା ମନିଟର କରୁଥିଲା । ୩୦୨ ଜୋନର ୧୫୧ ମୂଲ୍ୟାୟନ କେନ୍ଦ୍ରରେ ୨୫ ଲକ୍ଷ ଉତ୍ତରଖାତା ମୂଲ୍ୟାୟନ ହୋଇଥିଲା । ଯେଉଁଥିପାଇଁ ୧୬ ହଜାର ୪୯୪ ଜଣ ଅଧ୍ୟାପକମାନଙ୍କୁ ନିୟୋଜିତ ହୋଇଥିଲେ । ଚଳିତ ବର୍ଷ ଫେବୃଆରୀ ୧୮ ରୁ ମାର୍ଚ୍ଚ ୨୮ ଯାଏଁ ଯୁକ୍ତ ଦୁଇ ପରୀକ୍ଷା ଅନୁଷ୍ଠିତ ହୋଇଥିଲା ।
ଚଳିତବର୍ଷ ୩ ଲକ୍ଷ ୯୬ ହଜାର ୫୯୨ ଜଣ ପରୀକ୍ଷାର୍ଥୀ ପରୀକ୍ଷା ଦେଇଥିଲେ । ପରୀକ୍ଷା ସରିବାର ୪୫ ଦିନ ଭିତରେ ଫଳ ପ୍ରକାଶ କରିବାକୁ ଲକ୍ଷ୍ୟ ରଖିଥିଲା ସିଏଚଏସଇ । ନିର୍ଦ୍ଧାରିତ ସମୟରେ ରେଜଲ୍ଟ ଘୋଷଣା କରିଛନ୍ତି ମନ୍ତ୍ରୀ ।
ଆଜି ଶ୍ରୀମନ୍ଦିରରେ ବନକଲାଗି ନୀତି
ଭୁବନେଶ୍ବର : ଆଜି ଜ୍ୟେଷ୍ଠ କୃଷ୍ଣ ମଳ ଚତୁର୍ଥୀ । ଶ୍ରୀବିଗ୍ରହମାନଙ୍କ ଅନୁଷ୍ଠିତ ହେବ ବନକଲାଗି ନୀତି । ଏଣୁ ଦ୍ୱିତୀୟ ଭୋଗମଣ୍ଡପ ଭୋଗ ଶେଷ ହେବାପରେ ଆପାତତଃ ସନ୍ଧ୍ୟା ୬ ଘଟିକା ଠାରୁ ରାତ୍ର ୧୦ଘଟିକା ପର୍ଯ୍ୟନ୍ତ ଚାରି ଘଣ୍ଟା ପାଇଁ ସର୍ବସାଧାରଣ ଦର୍ଶନ ବନ୍ଦ ରହିବ। ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି । । ଏଣୁ ଦ୍ୱିତୀୟ ଭୋଗମଣ୍ଡପ ଭୋଗ ଶେଷ ହେବାପରେ ଆପାତତଃ ସନ୍ଧ୍ୟା ୬ ଘଟିକା ଠାରୁ ରାତ୍ର ୧୦ଘଟିକା ପର୍ଯ୍ୟନ୍ତ ଚାରି ଘଣ୍ଟା ପାଇଁ ସର୍ବସାଧାରଣ ଦର୍ଶନ ବନ୍ଦ ରହିବ। ଶ୍ରୀମନ୍ଦିର ପ୍ରଶାସନ ପକ୍ଷରୁ ସୂଚନା ପ୍ରଦାନ କରାଯାଇଛି ।
ଔଷଧ ଦୋକାନ ବନ୍ଦ: ସର୍ବଭାରତୀୟ ସ୍ତରରେ କେମିଷ୍ଟ ଓ ଡ୍ରଗିଷ୍ଟ ମହାସଂଘର ବନ୍ଦ ଡାକରା
ଭୁବନେଶ୍ବର: ୩ଟି ପ୍ରମୁଖ ଦାବି ନେଇ ସର୍ବଭାରତୀୟ କେମିଷ୍ଟ ଓ ଡ୍ରଗିଷ୍ଟ ମହାସଂଘ ସାରା ଦେଶରେ ଗୋଟିଏ ଦିନ ପାଇଁ ଆନ୍ଦୋଳନକୁ ଡାକରା ଦେଇଛି । ଦେଶର ୧୨ ଲକ୍ଷରୁ ଅଧିକ ଔଷଧ ଦୋକାନୀ ଏହି ବନ୍ଦରେ ସାମିଲ ହୋଇଛନ୍ତି । ଓଡ଼ିଶାରେ ୩୫ ହଜାର ଦୋକାନ ବନ୍ଦ ରହିଛି । ଔଷଧର ଅନଲାଇନ ବିକ୍ରି ବନ୍ଦ ରଖିବା, କର୍ପୋରେଟ ସଂସ୍ଥା ଦ୍ବାରା ମାତ୍ରାଧିକ ରିହାତି ବନ୍ଦ କରିବା ଓ ମାର୍କେଟରୁ ନକଲି ଔଷଧ ହଟାଇବା ଭଳି ଦାବିରେ ଏଭଳି ଆନ୍ଦୋଳନ ଡାକରା ଦେଇଛି ମହାସଂଘ । ତେବେ ଏହାକୁ ନେଇ ୭ ସୂତ୍ରୀ ପ୍ରସ୍ତୁତି ସୂତ୍ର ଜାରି କରିଛି ଡ୍ରଗ୍ସ କଣ୍ଟ୍ରୋଲ ନିର୍ଦ୍ଦେଶାଳୟ । ତାଙ୍କ ଅଧୀନରେ ଥିବା ଅଞ୍ଚଳ ଗୁଡିକରେ ଔଷଧ ଯେପରି ଅଭାବ ନ ରହିବ ସେନେଇ ଡ୍ରଗସ ଇନ୍ସପେକ୍ଟର ମନିଟର କରିବେ । ହସ୍ପିଟାଲ କ୍ୟାମ୍ପସ ଓ ହସ୍ପିଟାଲ ସହ ଜଡିତ ଦୋକାନ ୨୪ ଘଣ୍ଟା ଖୋଲା ରହିବା ନେଇ ବ୍ୟବସ୍ଥା କରାଯାଇଛି । ହୋଲସେଲର ଓ ଡିସଟ୍ରିବ୍ୟୁଟର ଔଷଧର ଆଡଭାଂଶ ଯୋଗାଣ ସୁନିଶ୍ଚିତ କରିବେ । ଗାଁ ଗହଳିରେ ଗୁରୁତର ରୋଗୀଙ୍କ ପାଇଁ ଔଷଧ ଯୋଗାଣରେ ଯେପରି ଅସୁବିଧା ନ ହୁଏ ସେଥିପ୍ରତି ଦୃଷ୍ଟି ଦିଆଯାଇଛି । ଯଦି କୌଣସି ପରିସ୍ଥିତିରେ ଔଷଧ ଯୋଗାଣରେ ଅଭାବ ଦେଖାଯିବ, ଡ୍ରଗସ ଇନ୍ସପେକ୍ଟର ଉଚ୍ଚପଦସ୍ତ ଅଧିକାରୀଙ୍କୁ ରିପୋର୍ଟ କରିବାକୁ କୁହାଯାଇଛି ।…