ନନ୍ଦିଘୋଷ ବ୍ୟୁରୋ : ନେପାଳରେ ଚମତ୍କାର! ମୃତ୍ୟୁକୁ ମାତ୍ ଦେଲେ ୨ ଜଣ। ଫ୍ଲାସ୍ ଫ୍ଲଡ୍‌ର ୯ ଦିନ ପରେ ଆଜି ୨ ଜଣଙ୍କୁ ଜୀବନ୍ତ ଉଦ୍ଧାର କରାଯାଇଛି। ତ୍ରିଶୁଳୀ ହାଇଡ୍ରୋପାୱାର ଟନେଲରୁ ଏହି ୨ ଜଣଙ୍କୁ ଜୀବନ୍ତ ଉଦ୍ଧାର କରାଯାଇଛି। ହାଇଡ୍ରୋପାୱାର ପ୍ରକଳ୍ପର ଟନେଲ ମାଟି ଓ କାଦୁଅରେ ପୋତି ହୋଇଥିବା ବେଳେ ତା’ ଭିତରୁ ୨ ଜଣଙ୍କୁ ଜୀବନ୍ତ ଉଦ୍ଧାର କରାଯାଇଛି। ଏହି ଘଟଣା ପରେ ଟନେଲ ଭିତରେ ଆହୁରି କିଛି ଲୋକ ଜୀବିତ ଥିବା ନେଇ ଉଦ୍ଧାରକାରୀଙ୍କ ଆଶା ବଢ଼ିଛି। ଉଦ୍ଧାର ହୋଇଥିବା ଦୁଇ ବ୍ୟକ୍ତି ହେଲେ କବୀର ମହାର୍ଜନ ଓ ସଞ୍ଜୟ ଶାହ। ନେପାଳର ଗୃହମନ୍ତ୍ରୀ ସୁଦନ ଗୁରୁଙ୍ଗ ଏହି ସୂଚନା ଦେଇଛନ୍ତି।

୩୦ ବର୍ଷୀୟ ସଞ୍ଜୟ ଶାହ ନେପାଳ ଇଲେକ୍ଟ୍ରିସିଟି ଅଥରିଟି (NEA)ରେ ମେକାନିକାଲ ଫୋରମ୍ୟାନ୍ ଭାବେ କାମ କରୁଥିବା ବେଳେ ୪୫ ବର୍ଷୀୟ କବୀର ମହାର୍ଜନ ତ୍ରିଶୁଳୀ-୩ ‘ଏ’ ହାଇଡ୍ରୋପାୱାର ପ୍ରକଳ୍ପରେ ସୁପରଭାଇଜର ଅଛନ୍ତି। ସେମାନଙ୍କୁ ବାହାରକୁ ଆଣିବା ପରେ ଉଦ୍ଧାରକାରୀମାନେ ବହୁତ ଖୁସି ହୋଇଥିଲେ। ଆଉ ଏକ ଜୀବନ ପାଇ ଦୁଇ ଜଣ ମଧ୍ୟ ବହୁତ ଆନନ୍ଦିତ ହୋଇଛନ୍ତି। ନେପାଳର ଆହୁରି ପ୍ରାୟ ୬ଟି ହାଇଡ୍ରୋପାୱାର ଟନେଲରେ ଉଦ୍ଧାର କାର୍ଯ୍ୟ ଜାରି ରହିଛି। ଏହି ଟନେଲଗୁଡ଼ିକରେ ୧୫୦ରୁ ଅଧିକ ଲୋକ ଫସିଥିବା ଆଶଙ୍କା କରାଯାଉଛି। ସ୍ଥାନୀୟ ପ୍ରଶାସନ ଅନୁସାରେ, ନେପାଳର ୧୨ଟି ହାଇଡ୍ରୋପାୱାର ପ୍ରକଳ୍ପରୁ ପ୍ରାୟ ୯୦୦ ଶ୍ରମିକ ନିଖୋଜ ଅଛନ୍ତି। ସେମାନଙ୍କ ମଧ୍ୟରୁ ପ୍ରାୟ ୫୦୦ ଜଣ ଟନେଲ ଭିତରେ ଫସିଥିବା ଆଶଙ୍କା ରହିଛି। ଟନେଲ ଭିତରକୁ ପମ୍ପ ଯୋଗେ ବାୟୁ ପଠାଯାଉଛି।

ଅଗଷ୍ଟ ୨୬ରେ ହୋଇଥିଲା ଭୟଙ୍କର ଫ୍ଲାସ୍ ଫ୍ଲଡ୍। ଗ୍ଲାସିୟର ଧସିବା ଯୋଗୁଁ ଏହି ବିପର୍ଯ୍ୟୟ ହୋଇଥିଲା। ଏଥିରେ ପ୍ରାୟ ୧୩ ଶହ ଲୋକଙ୍କ ମୃତ୍ୟୁ ହେଲାଣି। ପ୍ରାୟ ୫ ହଜାର ଲୋକ ନିଖୋଜ ଅଛନ୍ତି।