ନନ୍ଦିଘୋଷ ବ୍ୟୁରୋ: ରାତିର ଅନ୍ଧାରରେ ଘଟିଲା ଛାତିଥରା ଦୁର୍ଘଟଣା । ଏକାସାଙ୍ଗରେ ଚାଲିଗଲା ୭ ଜଣଙ୍କ ଜୀବନ । ଗୁଜୁରାଟର କଚ୍ଛରୁ ସାମ୍ନାକୁ ଆସିଛି ଏଭଳି ଭୟଙ୍କର ଦୁର୍ଘଟଣାର ଖବର । ଏକ କାର ଏବଂ ବୋଲେରୋ ମଧ୍ୟରେ ଧକ୍କା ହେବା ଯୋଗୁଁ ସାତ ଜଣ ଶ୍ରମିକଙ୍କର ମୃତ୍ୟୁ ହୋଇଛି । ସୂଚନା ଅନୁସାରେ, ଖଓ୍ବଡା ଆରୀ ପାର୍କରେ ଘଟିଛି ଏହି ଦୁର୍ଘଟଣା । ଗତକାଲି ବିଳମ୍ବିତ ରାତିରେ କଚ୍ଛର ଖଓ୍ବାଡା ନିକଟରେ ଆରୀ ପାର୍କକୁ ଯାଉଥିବା ସମୟରେ ଏହି ଗୁରୁତର ଦୁର୍ଘଟଣା ଘଟିଥିଲା । ଏକ କଳା ରଙ୍ଗର କାର ଶ୍ରମିକଙ୍କୁ ନେଇ ଯାଉଥିବା ବୋଲେରୋକୁ ଧକ୍କା ଦେବା ଫଳରେ ବୋଲେରୋଟି ଭାରସାମ୍ୟ ହରାଇ ଦୁର୍ଘଟଣାର ଶିକାର ହୋଇଥିଲା ।
ପ୍ରାରମ୍ଭିକ ରିପୋର୍ଟ ଅନୁଯାୟୀ, ଦୁର୍ଘଟଣାରେ ସାତ ଜଣ ଶ୍ରମିକଙ୍କର ମୃତ୍ୟୁ ହୋଇଛି । ବୋଲେରୋରେ ୧୫ରୁ ଅଧିକ ଶ୍ରମିକ ଥିବା ଅନୁମାନ କରାଯାଉଛି । ତେଣୁ ଦୁର୍ଘଟଣାର ଭୟାବହତାକୁ ଦେଖି ମୃତ୍ୟୁ ସଂଖ୍ୟା ଆହୁରି ବଢିପାରେ ବୋଲି ଆଶଙ୍କା ବଢିଛି । ଶ୍ରମିକଙ୍କ ବ୍ୟତୀତ ଅନ୍ୟମାନେ ମଧ୍ୟ ଦୁର୍ଘଟଣାରେ ଆହତ ହୋଇଥିବା ଜଣାପଡିଛି । ଯାହାପରେ ଦୁର୍ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଥିଲା ।
ତେବେ ବିଳମ୍ବିତ ରାତିରେ ଘଟିଥିବା ଏହି ଦୁର୍ଘଟଣା ଯୋଗୁଁ ସମଗ୍ର ଅଞ୍ଚଳରେ ଶୋକର ଛାୟା ଖେଳିଯାଇଛି । ମୃତଦେହଗୁଡିକୁ ପୋଷ୍ଟମର୍ଟମ ପାଇଁ ଖଓ୍ବାଡାରୁ ଭୁଜକୁ ସ୍ଥାନାନ୍ତର ପ୍ରକ୍ରିୟା ଆରମ୍ଭ ହୋଇଛି । ଆରଇ ପାର୍କ ଅଞ୍ଚଳରେ ଏହି ପ୍ରକାରର ଏହା ପ୍ରଥମ ବଡ ଦୁର୍ଘଟଣା । ବର୍ତ୍ତମାନ ପୋଲିସ ଏହି ଘଟଣାର ଅଧିକ ତଦନ୍ତ ଆରମ୍ଭ କରିଛି ।
