ଯାଜପୁର : ରଥଯାତ୍ରାକୁ ନେଇ ଚଳଚଞ୍ଚଳ ବିରଜା କ୍ଷେତ୍ର । ସିଂହଧ୍ବଜ ରଥରେ ଆସିବେ ମାଆ ବିରଜା । ରଥ ଉପରେ ହେବ ନବଦିନ ଷୋଡ଼ଶ ଉପଚାର । ଶୁଭ ସୁନିଆଁ ଠାରୁ ବିଲ୍ୱବରଣୀ ହୋଇ ରଥଖଳାରେ ଆରମ୍ଭ ହୋଇଛି ରଥ ନିର୍ମାଣ କାର୍ଯ୍ୟ । ଦଶହରା ଅବସରରେ ପୀଠରେ ୯ ଦିନ ବ୍ୟାପୀ ଅନୁଷ୍ଠିତ ହେବ ରଥଯାତ୍ରା । ମାଙ୍କୁ ରଥରେ ଦର୍ଶନ କରି ରଥ ଦଉଡି ଛୁଇଁବାକୁ ଅପେକ୍ଷା କରିଛନ୍ତି ଶ୍ରଦ୍ଧାଳୁ । ତେବେ ମା ଙ୍କ ଏହି ରଥଯାତ୍ରା ଏକ ସ୍ୱତନ୍ତ୍ରତା ରହିଛି ।ଭାରତ ବର୍ଷରେ ୫୧ ଟି ଶକ୍ତି ପୀଠ ମଧ୍ୟ ରୁ ଯାଜପୁର ଅଧିଷ୍ଠାତ୍ରୀ ଦେବୀ ମା ବିରଜାଙ୍କ ଶକ୍ତି ପୀଠ ଅନ୍ୟତମ । କେବଳ ଏହିଠାରେ ହିଁ ମାଙ୍କ ରଥଯାତ୍ରା ଅନୁଷ୍ଠିତ ହୋଇଥାଏ।
ରଥଯାତ୍ରା ପାଇଁ ଜୋରସୋରରେ ଚାଲିଛି ରଥ ନିର୍ମାଣ କାମ । ୮ରୁ ୧୦ ଜଣ ମହାରଣା କାରିଗର ପ୍ରସ୍ତୁତିରେ ଲାଗିଛନ୍ତି। ଦେବୀଙ୍କ ଏହି ୧୨ ଚକ ବିଶିଷ୍ଟ ରଥରେ ୮୯୮ ଖଣ୍ଡ କାଠ ବ୍ୟବହାର କରାଯାଉଥିବାବେଳେ ରଥରେ ନବଗ୍ରହ,ଦଶଦିଗପାଳ ରହିଛନ୍ତି । ଯାହାକି ସ୍ୱୟଂ ବ୍ରହ୍ମାଂ ହିଁ ରଥର ସାରଥୀ ସାଜିଥାନ୍ତି । ରଥର ଉଚ୍ଚତା ୫୬ ଫୁଟ ହୋଇଥିବା ବେଳେ ମାଙ୍କ ରଥଯାତ୍ରା ବିଶ୍ୱରେ ବିରଳ ବୋଲି କୁହାଯାଏ । ଶାନ୍ତିପୂର୍ଣ୍ଣ ରଥଯାତ୍ରା ପାଇଁ ମନ୍ଦିର ପ୍ରଶାସନ ପକ୍ଷରୁ ବ୍ୟାପକ ବ୍ୟବସ୍ଥାର ଆୟୋଜନ କରାଯାଇଛି ।
ମା’ ବିରଜାଙ୍କ ପ୍ରସିଦ୍ଧ ବିଜୟା ରଥଯାତ୍ରାକୁ ନେଇ ଭକ୍ତଙ୍କ ମଧ୍ୟରେ ରହିଛି ଉତ୍କଣ୍ଠା। ମାଙ୍କୁ ରଥରେ ଦର୍ଶନ କରି ଆଶିଷ ଲଭିବାକୁ ଅପଲକେ ଅପେକ୍ଷା କରିଛନ୍ତି ଶ୍ରଦ୍ଧାଳୁ ।
