ଚେନ୍ନାଇ: ଆଜି ଭାରତ – ଇଂଲଣ୍ଡ ମଧ୍ୟରେ ଟି-୨୦ ସିରିଜର ଦ୍ବିତୀୟ ମ୍ୟାଚ । କ୍ୟାପଟେନ ସୂର୍ଯ୍ୟକୁମାର ଯାଦବଙ୍କ ନେତୃତ୍ଵରେ ପଡ଼ିଆକୁ ଓହ୍ଲାଇବ ଟିମ୍ ଇଣ୍ଡିଆ । ସନ୍ଧ୍ୟା ୭ରେ ଚେନ୍ନାଇର ଚିଦାମ୍ବରମ ଷ୍ଟାଡିୟମରେ ମ୍ୟାଚ ଅନୁଷ୍ଠିତ ହେବ । ମ୍ୟାଚ ଦେଖିବାକୁ ଏବେ ଠାରୁ ଦାର୍ଶକଙ୍କ ମଧ୍ୟରେ ଉତ୍ସାହ ଦେଖିବାକୁ ମିଳିଲାଣି । ୫ ଟିକିଆ ମ୍ୟାଚ ବିଶିଷ୍ଟ ଏହି ଟି ୨୦ ସିରିଜରେ ଭାରତ ୧-୦ରେ ଆଗୁଆ ରହିଥିବା ବେଳେ ଚେନ୍ନାଇରେ ବିଜୟ ଧାରା
ମଧ୍ୟ ବଜାୟ ରଖିବାକୁ ଚେଷ୍ଟା କରିବ ଟିମ ଇଣ୍ଡିଆ ।
ସେହିଭଳି ଇଂଲଣ୍ଡ ଟିମ ମଧ୍ୟ ମ୍ୟାଚ ଜିତି ବରାବର ସ୍ଥିତିକୁ ଆସିବାକୁ ଚେଷ୍ଟା କରିବ । ସେପଟେ ବ୍ୟାଟର ଅଭିଶେକ ଶର୍ମା ଆହତ ହେବା କାରଣରୁ ଏହି ମ୍ୟାଚ ଖେଳିବା ନେଇ ଅନିଶ୍ଚିତତା ଦେଖା ଦେଇଛି । ତେଣୁ ଭାରତୀୟ ଦଳରେ କିଛି ପରିବର୍ତ୍ତନ ହେବ ବୋଲି ଆଶଙ୍କା କରାଯାଉଛି । ଭାରତ-ଇଂଲଣ୍ତ ମଧ୍ୟରେ ପ୍ରଥମ ଟି ୨୦ କୋଲକାତାରେ ଖେଳାଯାଇଥିଲା । ଉକ୍ତ ମ୍ୟାଚରେ ଭାରତର ରୋମାଞ୍ଚକର ବିଜୟ ହୋଇଥିଲା । ଭ୍ରମଣକାରୀ ଦଳ ଇଂଲଣ୍ଡକୁ ୭ ଓ୍ବିକେଟରେ ମାତ ଦେଇଥିଲା ଟିମ ଇଣ୍ଡିଆ ।
