ନନ୍ଦିଘୋଷ ବ୍ୟୁରୋ: ନୟାଗଡ଼ ପ୍ରଜାମଣ୍ଡଳ ମହିଳା ମହାବିଦ୍ୟାଳୟରେ ଅଭାବନୀୟ ଘଟଣା । ଲେଡିଜ ହଷ୍ଟେଲ ୩ ମହଲାରୁ ଡେଇଁ ଜଣେ ଯୁକ୍ତ ୨ ଛାତ୍ରୀଙ୍କ ଆତ୍ମହତ୍ୟା ଉଦ୍ୟମ । ତଳେ ପଡ଼ିବା ପରେ ଛାତ୍ରଛାତ୍ରୀ ଓ କଲେଜ କର୍ମଚାରୀମାନେ ଉଦ୍ଧାର କରି ନୟାଗଡ଼ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ l ଛାତ୍ରୀଙ୍କ ଅବସ୍ଥା ଗୁରୁତର ଥିବା ଜଣାପଡ଼ିଛି l ନୟାଗଡ଼ ଟାଉନ ଥାନା ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି l ଏ ନେଇ କଲେଜ କର୍ତ୍ତୃପକ୍ଷ ପରିବାର ଲୋକଙ୍କୁ ଖବର ଦେଇଛନ୍ତି l ପୋଲିସ ଅଧିକ ତଦନ୍ତ ଜାରି ରଖିଛି l ଛାତ୍ରୀଙ୍କ ଆତ୍ମହତ୍ୟା ଉଦ୍ୟମର କାରଣ ଜଣାପଡ଼ିନଥିବା ବେଳେ ପ୍ରେମ ଜନିତ କାରଣରୁ ଆତ୍ମହତ୍ୟା ଉଦ୍ୟମ କରିଥାଇପାରନ୍ତି ବୋଲି ସନ୍ଦେହ କରାଯାଉଛି l
କ୍ୟାବ୍ ବୁକ୍ କରିଥିବା ମହିଳାଙ୍କୁ ଖରାପ ମେସେଜ କଲେ ଡ୍ରାଇଭର, ସୋସିଆଲ ମିଡିଆରେ ପୋଷ୍ଟ ଭାଇରାଲ ପରେ..
ନନ୍ଦିଘୋଷ ବ୍ୟୁରୋ: ସହଜ ଏବଂ ସୁଗମ ପାଇଁ ଯେତିକି ସୁବିଧା କରାଯାଉଛି କିଛି ଅସାଧୁ ବ୍ୟକ୍ତି ଏହାକୁ ଖରାପ କରିବାକୁ ଯାଉଛନ୍ତି । ତେବେ ଏବେ ସୋସିଆଲ ମିଡିଆରେ ଏମିତି ଏକ ପୋଷ୍ଟ ବେଶ ଭାଇରାଲ ହେବାରେ ଲାଗିଛି । ଜଣେ ମହିଳା କ୍ୟାବ୍ ବୁକ କରିଥିବାବେଳେ ଡ୍ରାଇଭର ତାଙ୍କୁ ଖରାପ ମେସେଜ କରିଛନ୍ତି । ଯାହାକୁ ନେଇ ମହିଳା ଜଣକ କ୍ଷୋଭ ପ୍ରକାଶ କରିଥିବାବେଳେ ଏହି ଚାର୍ଟକୁ ସୋସିଆଲ ମିଡିଆରେ ପୋଷ୍ଟ କରିଛନ୍ତି । ଯାହାକୁ ନେଇ ୟୁଜର୍ସମାନେ କ୍ୟାବ ଡ୍ରାଇଭରକୁ କଡ଼ା ଭାଷାରେ ଗାଳି କରୁଥିବା ଦେଖିବାକୁ ମିଳିଛି । ମହିଳା ଜଣକ ଲିଙ୍କଡ ଇନରେ ଏହି ପୋଷ୍ଟ କରିଥିବା ଉବେର ପକ୍ଷରୁ କ୍ଷମା ପ୍ରାର୍ଥନା କରାଯାଇଛି । ସମ୍ପୃକ୍ତ ଡ୍ରାଇଭରଙ୍କ ବିରୋଧରେ କଡ଼ା କାର୍ଯ୍ୟାନୁଷ୍ଠାନ ନେବାକୁ ଦାବି କରାଯାଇଛି ।
ଦିଲ୍ଲୀରୁ ଏଭଳି ଘଟଣା ସାମନାକୁ ଆସିଛି । ତାନିଆ ଶର୍ମା ନାମକ ମହିଳା ଏଭଳି ଅସୁବିଧାର ସମ୍ମୁଖୀନ ହୋଇଛନ୍ତି । ଜିତେନ୍ଦ୍ର କୁମାର ନାମକ ଡ୍ରାଇଭର ଜଣକ ତାଙ୍କୁ ଖରାପ ମେସେଜ କରିବା ସହ ଭଲ ପାଉଥିବା ଭଳି ଶବ୍ଦ ମଧ୍ୟ ବ୍ୟବହାର କରିଛନ୍ତି । ଯେଉଁ ମେସେଜ ଦେଖି କ୍ୟାବ୍ ବୁକ କରିଥିବା ତାନିଆ ରାଗିବା ସହ ସୋସିଆଲ ମିଡିଆରେ ପୋଷ୍ଟ କରିଥିଲେ । ଏହି ମେସେଜଟି ବେଶ ଭାଇରାଲ ହୋଇଥିବାବେଳେ ୟୁଜର୍ସମାନେ କମ୍ପାନୀ ଏବଂ ଡ୍ରାଇଭରଙ୍କୁ କଡ଼ା ଭାଷାରେ ସମାଲୋଚନା କରିଥିଲେ । ଯଦିଓ ଉବେର ପକ୍ଷରୁ କ୍ଷମା ପ୍ରାର୍ଥନା କରାଯାଇଛି କିନ୍ତୁ ଲୋକେ ଏହାକୁ ବିରୋଧ କରିଛନ୍ତି । ୟୁଜର୍ସମାନେ କମେଣ୍ଟରେ ଲେଖିଛନ୍ତି କେବଳ କ୍ଷମା ମାଗି କଥାକୁ ଚାପୁଛନ୍ତି କିନ୍ତୁ ଡ୍ରାଇଭରଙ୍କ ବିରୋଧରେ କୌଣସି କାର୍ଯ୍ୟାନୁଷ୍ଠାନ ଗ୍ରହଣ କରାଟାଉନାହିଁ ।
ବିଧାନସଭା ନିର୍ବାଚନ ଲଢ଼ିଥିବା BSP ନେତାଙ୍କୁ କାର ଭିତରେ ଗୁଳିକରି ହତ୍ୟା
ହରିୟାଣାରୁ ଆସିଛି ଏକ ବଡ଼ ଖବର । ଅମ୍ବାଲାର ନାରାୟଣଗଡ଼ରେ କିଛି ଅଜ୍ଞାତ ଦୁର୍ବୃତ୍ତ ଜଣେ ବହୁଜନ ସମାଜ ପାର୍ଟି (ବିଏସପି) ନେତାଙ୍କୁ ଗୁଳି କରି ହତ୍ୟା କରିଛନ୍ତି । ଏହି ଆକ୍ରମଣରେ ବିଏସପି ନେତାଙ୍କ ଦୁଇଜଜଣ ସହଯୋଗୀ ମଧ୍ୟ ଆହତ ହୋଇଛନ୍ତି । ପୋଲିସ ଆକ୍ରମଣକାରୀଙ୍କ ସନ୍ଧାନ ଜାରି ରଖିଛି । ଅଞ୍ଚଳର ସିସିଟିଭି କ୍ୟାମେରାଗୁଡ଼ିକର ଫୁଟେଜକୁ ମଧ୍ୟ ଯାଞ୍ଚ କରାଯାଉଛି । ଏ ଘଟଣା ବାବଦରେ ପୋଲିସ ପକ୍ଷରୁ ସୂଚନା ଜାରି କରାଯାଇଛି । ବିଏସପି ନେତାଜଣଙ୍କ ବିଧାନସଭା ନିର୍ବାଚନ ଲଢ଼ିଥିଲେ । ଏହି ନେତାଙ୍କ ନାମ ହେଉଛି ହରବିଲାସ ସିଂହ ରାଜଜୁମାଜ୍ରା । ହରବିଲାସଙ୍କୁ ଦୁର୍ବୃତ୍ତମାନେ କାର ଭିତରେ ଗୁଳି କରିଥିବା ଜଣାପଡ଼ିଛି । ଏହି କାଣ୍ଡ ଘଟାଇବା ପରେ ଆକ୍ରମଣକାରୀମାନେ PGIMER, ଚଣ୍ଡିଗଡ଼ ଅଭିମୂଖେ ଫେରାର ହୋଇଯାଇଥିଲେ ।
ଠକିଦେଲା ବିଦେଶିନୀ ପ୍ରେମିକା: ପାକିସ୍ତାନ ଜେଲରେ ପ୍ରେମର ପରୀକ୍ଷା ଦେଉଛନ୍ତି ନିରୀହ ଭାରତୀୟ ଯୁବକ
ଆଲିଗଡ଼: ’ପାପା, ସେ ଝିଅଟି ବହୁତ ବ୍ୟସ୍ତ ଥିଲା…. ସେଥିପାଇଁ ମୁଁ ପାକିସ୍ତାନ ଚାଲି ଆସିଲି । ଏବେ ମୁଁ ଏଠାରେ ଇସଲାମ କବୁଲ କରୁଛି । ମୋର ଫେରିବା ନ ଫେରିବା ନେଇ ଆପଣ ବ୍ୟସ୍ତ ହେବେନି ।’ ଆଲିଗଡ଼ରେ ରହୁଥିବା ବାଦଲ ବାବୁ ନାମକ ଯୁବକ ଭିଡିଓ କଲରେ ଏହା କହିଥିଲେ। ସୋସିଆଲ ମିଡ଼ିଆରେ ହୋଇଥିବା ପ୍ରେମରେ ପଡ଼ି ବାଦଲ ଶତ୍ରୁ ଦେଶ ସୀମାରେ ପାଦ ଦେବାକୁ ପଛାଇ ନଥିଲେ । ବାଦଲ ମା’ଙ୍କୁ ଭିଡିଓ କଲରେ ଦେଖି କାନ୍ଦି ପକାଇଥିଲେ । ବାଦଲଙ୍କୁ କୋର୍ଟରେ ହାଜର କରାଯାଇଥିଲା, ସେଠାରେ ତାଙ୍କୁ ଜାମିନ ମିଳିନଥିଲା । ପ୍ରେମ ଚକ୍କରରେ ପଡ଼ି ବାଦଲ ଫସି ଯାଇଥିଲେ ।
’ଗଦର’ ଫିଲ୍ମର ତାରା ସିଂହ ଓ ସଲମାନ ଖାନଙ୍କ ’ବଜରଙ୍ଗୀ ଭାଇଜାନ’ ପରି ଫିଲ୍ମର କାହାଣୀକୁ ବାସ୍ତବ ଭାବି ଆଲିଗଡ଼ର ଯୁବକ ବାଦଲ ସବୁ ସୀମା ଟପିଯାଇଥିଲେ । ଡିସେମ୍ବରରେ ଗିରଫ ହେବା ପରେ ତାଙ୍କୁ ଜେଲରେ ରଖାଯାଇଥିଲା । ଜାନୁଆରୀ ୨୪ରେ ବାଦଲଙ୍କୁ ପାକିସ୍ତାନ କୋର୍ଟରେ ହାଜର କରାଯାଇଥିଲା । ଚାର୍ଜଶିଟ ନ ପହଞ୍ଚିବା କାରଣରୁ ତାଙ୍କର ଜାମିନ ଯାଚିକାର ଶୁଣାଣି ହୋଇ ପାରିନଥିଲା । ସେଥିପାଇଁ ତାଙ୍କୁ ପୁଣି ଥରେ ଜେଲରେ ଭର୍ତ୍ତି କରାଯାଇଥିଲା ଓ ଫେବୃଆରୀରେ ଏହି ମାମଲାର ପରବର୍ତ୍ତୀ ଶୁଣାଣି ହେବ ।
ବାଦଲଙ୍କ ପିତା କୃପାଲ ସିଂହ କହିଛନ୍ତି, ଆଇନଜୀବୀ ଫିୟାଜ ରାମାୟଙ୍କ ସହ ଭିଡିଓ କଲରେ କଥା ହୋଇଥିଲେ । ସେହି ସମୟରେ ସେ କିଛି ସମୟ ପାଇଁ ଭାବୁକ ହୋଇଯାଇଥିଲେ । ତାଙ୍କର ଆଖି ଛଳଛଳ ହୋଇଯାଇଥିଲା । ମାତ୍ର ତା’ପରେ ସେ ନିଜକୁ ସମ୍ଭାଳିଥିଲେ । ପାକିସ୍ତାନୀ ନିବାସୀ ସନା ରାନୀ ଓ ତାଙ୍କର ମା’ଙ୍କ କହିବା ଅନୁସାରେ ବାଦଲ ପାକିସ୍ତାନ ଚାଲିଯାଇଥିଲେ । ସେଠାରେ ସେ ଇସଲାମ କବୁଲ କରିଥିବା କଥା ଭିଡିଓ କଲରେ କହିଥିଲା । ସନାଙ୍କୁ ସାକ୍ଷାତ କରିବା ପାଇଁ ବାଦଲ ପାକିସ୍ତାନର ପଞ୍ଜାବ ପ୍ରାନ୍ତର ମଣ୍ଡି ବହାଉଦ୍ଦୀନ ଜିଲ୍ଲାର ମାଉଙ୍ଗ ଗାଁରେ ପହଞ୍ଚିଥିଲେ । ଫେସବୁକ ବନ୍ଧୁତା ପରେ ବାଦଲ ପାକିସ୍ତାନ ଯାଇଥିଲେ ।
ମାତ୍ର ସେଠାରେ ପହଞ୍ଚିବା ପରେ ବିବାହ କରିବାକୁ ପ୍ରେମିକା ମନା କରିଦେଇଥିଲେ । ବିନା ଭିସା ଓ ପାସପୋର୍ଟରେ ବାଦଲ ପାକସ୍ତାନ ସୀମା ପାର କରିଥିଲେ । ତେଣୁ ପୋଲିସ ତାଙ୍କୁ ଧରି କୋର୍ଟରେ ହାଜର କରିଥିଲା ଓ ତା’ପରେ ଜେଲ ପଠାଇଥିଲା । ଆଲିଗଡ଼ର ନଗଲା ଖଟକାରୀ ଗ୍ରାମରେ ବାଦଲଙ୍କର ଗାଁ ବୋଲି ଜଣାପଡ଼ିଛି । ପାକିସ୍ତାନରେ ପହଞ୍ଚିବା ପରେ ପ୍ରେମିକା ବିବାହ କରିବାକୁ ଅଗ୍ରାହ୍ୟ କରିବା ପରେ ବାଦଲ ନିଜର ପରିଚୟ ବଦଳାଇ ସେଠାରେ ରହିଥିଲେ ।
CDSCO ତରଫରୁ ୧୩୫ଟି ମେଡିସିନର ନମୂନା ଫେଲ: ଉଚ୍ଚ ରକ୍ତଚାପ ଓ ମଧୁମେହ ଟାବଲେଟ ସେବନ କରିବା ସ୍ବାସ୍ଥ୍ୟ ପାଇଁ ବିପଜ୍ଜନକ
ନୂଆଦିଲ୍ଲୀ: କେନ୍ଦ୍ରୀୟ ଔଷଧୀ ମାନକ ନିୟନ୍ତ୍ରଣ ସଂଗଠନ (CDSCO) ତରଫରୁ ସାରା ଦେଶରେ ମେଡିସିନର ମୋଟ ୧୩୫ଟି ନମୂନାକୁ ଫେଲ୍ କରାଯାଇଛି । ଯେଉଁସବୁ ମେଡିସିନଗୁଡ଼ିକର ନମୂନା ଫେଲ କରାଯାଇଛି, ସେଗୁଡ଼ିକ ମଧ୍ୟରେ ହାର୍ଟ, କିଡନୀ, ବିପି ଓ ଆଣ୍ଟିବାୟୋଟିକ ସମେତ ଅନେକ ଔଷଧ ସାମିଲ ରହିଛି । ଏହା ପୂର୍ବରୁ ମଧ୍ୟ CDSCO ତରଫରୁ ଅନେକ ଔଷଧକୁ ବ୍ୟାନ କରାଯାଇଥିଲା । CDSCO ତରଫରୁ ଡିସେମ୍ବରରେ ନିଆଯାଇଥିବା ମେଡିସିନର ନମୂନାର ରେଜଲ୍ଟ ଜାରି କରାଯାଇଛି ।
୧୩୫ରୁ ଅଧିକ ମେଡିସିନର ମାନକ ସଠିକ୍ ନଥିବା କୁହାଯାଇଛି । ଯେଉଁ ଔଷଧଗୁଡ଼ିକର ସାମ୍ପୂଲ ଫେଲ ହୋଇଛି, ସେଗୁଡ଼ିକ ମଧ୍ୟରେ ହାର୍ଟ, କିଡନୀ, ବିପି ଓ ଆଣ୍ଟିବାୟୋଟିକ ସମେତ ଆହୁରି ଅନେକ ଔଷଧ ସାମିଲ ରହିଥିବା କୁହାଯାଇଛି । ଗତ କିଛି ମାସ ମଧ୍ୟରେ କ୍ରମାଗତ ଭାବେ ମେଡିସିନଗୁଡ଼ିକର ନମୂନା ମାନକରେ ଫିଟ ରହିନଥିଲା । ଏହି ମେଡିସିନଗୁଡ଼ିକ ଦେଶର ଅନେକ ବଡ଼ ବଡ଼ ଫାର୍ମାସ୍ୟୁଟିକାଲ୍ସ କମ୍ପାନୀ ପ୍ରସ୍ତୁତ କରିଥାଏ । କ୍ବାଲିଟି ଟେଷ୍ଟରେ ଏହି ମେଡିସିନ୍ସ ଫେଲ ହୋଇଛି ଓ ସେଗୁଡ଼ିକ ସ୍ବାସ୍ଥ୍ୟ ପାଇଁ ବିପଜ୍ଜନକ ବୋଲି କୁହାଯାଇଛି । ଏହି ମେଡିସିନଗୁଡ଼ିକର ନିର୍ମାତା ମଧ୍ୟ ଏବେ ଯାଞ୍ଚ ଘେରକୁ ଚାଲିଆସିଛନ୍ତି । ଏହି ମେଡିସିନଗୁଡ଼ିକ ମଧ୍ୟରୁ ଅଧିକାଂଶ ମେଡିସିନ ମଧୁମେହ ଓ ମାଇଗ୍ରେନ ରୋଗ ପାଇଁ ଦିଆଯାଉଥିଲା । ଏପରି ସ୍ଥିତିରେ ଏବେ ମେଡିସିନ ନିର୍ମାତାଙ୍କ ଲାଇସେନ୍ସ ରଦ୍ଦ କରିବାର ପ୍ରକ୍ରିୟା ଆରମ୍ଭ ହୋଇଯାଇଛି ।
ଓଡ଼ିଶାର ୧୯ ଜଣ ପୋଲିସ ଅଧିକାରୀ ପାଇବେ ପଦକ: କେନ୍ଦ୍ର ଗୃହ ମନ୍ତ୍ରଣାଳୟ ପକ୍ଷରୁ ପ୍ରକାଶ ପାଇଲା ତାଲିକା
ନୂଆଦିଲ୍ଲୀ: ଉଲ୍ଲେଖନୀୟ ସେବା ପାଇଁ ଓଡ଼ିଶାର ୧୯ ଜଣ ପୋଲିସ ଅଧିକାରୀ ପାଇବେ ପଦକ। ଓଡ଼ିଶା ପୋଲିସରେ କାର୍ଯ୍ୟରତ ସୁପରିଟେଣ୍ଡଣ୍ଟ ପୋଲିସ ସରୋଜ ସାମଲ ପାଇବେ ରାଷ୍ଟ୍ରପତି ପୁରସ୍କାର। କନଷ୍ଟେବଲ ସତ୍ୟବାଦୀ ମଲ୍ଲିକ ପାଇବେ ରାଷ୍ଟ୍ରପତି ପୁରସ୍କାର। ସାହସିକତା ପାଇଁ ୬ ଜଣଙ୍କୁ ମିଳିବ ଗ୍ୟାଲେଣ୍ଟ୍ରି ଆଓ୍ବାର୍ଡ। ଏସଆଇ ଗିରିଶ ଚନ୍ଦ୍ର ମାଝୀ, ହାବିଲଦାର ପବିତ୍ର କୁମାର ସାହୁ, ଉମେଶ ମୁଣ୍ଡ, ପୀତାମ୍ବର ସତନାମ, କବିଚନ୍ଦ୍ର ରାଉତ, ସୁଶାନ୍ତ କୁମାର ସାହୁଙ୍କୁ ମିଳିବ ପୋଲିସ ସାହସିକତା ପୁରସ୍କାର। କନଷ୍ଟେବଳ ପାରିତୋଷ ମଣ୍ଡଳ, ମହମ୍ମଦ ତୋସିଫ ରବିନା, ଦେବୀ ପ୍ରସାଦ ମହାନ୍ତି ଏସଆଇ ଅବଦୁଲ ଫାୟାଜ, ତ୍ରିଲୋଚନ ବୁଦ୍ଧିଆ, ନରେଶ ଚୌଧୁରୀ, ଏଏସଆଇ ଶରତ ଚନ୍ଦ୍ର ବେହରା, ତେଜବାହାଦୂର ଗୁରୁଜଂଗସ, ହାବିଲଦାର ଅତୁଲ କୁମାର ବିଶ୍ବାଳ, ଜୟନ୍ତୀ ସୁନା, ମନୋଜ କୁମାର ଜେନାଙ୍କୁ ମିଳିବା ପ୍ରସଂଶନୀୟ ସେବା ମେଡାଲ। ସେହିପରି ଅଗ୍ନିଶମ ବାହୀନିରେ ରାଷ୍ଟ୍ରପତି ବିଶିଷ୍ଟ ସେବା ମେଡାଲ ପାଇବେ ଲିଡିଂ ଫାୟାରମ୍ୟାନ୍ ଭ୍ରମରବର ସେଠୀ। ପ୍ରଶଂସନୀୟ ସେବା ପାଇଁ ପ୍ରଶାନ୍ତ କୁମାର ସାହୁ, ବିଶ୍ବରଂଜନ, ଅଭିମନ୍ଯୁ ପ୍ରଧାନ, ନରେନ୍ଦ୍ର କୁମାର ଭଲ୍ଲାଙ୍କୁ ସମ୍ମାନିତ କରାଯିବ। ।
ମଦ୍ୟପ ସ୍ବାମୀମାନଙ୍କ ଅତ୍ୟାଚାର ହେଲା ଅସହ୍ୟ: ପରସ୍ପରଙ୍କୁ ବିବାହ କଲେ ଦୁଇଜଣ ମହିଳା
ଗୋରଖପୁର: ଉତ୍ତରପ୍ରଦେଶରୁ ଆସିଛି ଏକ ଆଶ୍ଚର୍ଯ୍ୟଜନକ ମାମଲା । ନିଜର ମଦ୍ୟପ ସ୍ବାମୀମାନଙ୍କର ଅତ୍ୟାଚାରରେ ଅତିଷ୍ଠ ହୋଇ ଦୁଇଜଣ ମହିଳା ଏକ ବଡ଼ ପଦକ୍ଷେପ ଗ୍ରହଣ କରିଛନ୍ତି । ଏହି ଦୁଇ ମହିଳା ନିଜର ପତିମାନଙ୍କୁ ଛାଡ଼ି ପରସ୍ପରଙ୍କୁ ବିବାହ କରିଛନ୍ତି । ଦୁହେଁ ପ୍ରଥମ ଥର ସୋସିଆଲ ମିଡ଼ିଆ ପ୍ଲାଟଫର୍ମ ଇନଷ୍ଟାଗ୍ରାମରେ ସାକ୍ଷାତ ହୋଇଥିଲେ । ପରବର୍ତ୍ତୀ ସମୟରେ ଦୁଇ ମହିଳା ପରସ୍ପରଙ୍କୁ ଜାଣିଥିଲେ । ଦୁହିଁଙ୍କର ପରିସ୍ଥିତି ପାଖାପାଖି ସମାନ ରହିଥିବାରୁ ଦୁହେଁ ପରସ୍ପରଙ୍କ ନିକଟତର ହୋଇପାରିଥିଲେ । ଜାନୁଆରୀ ୨୩ ତାରିଖରେ ଏହି ଦୁଇ ମହିଳା ପରସ୍ପରଙ୍କ ଜୀବନ ସାଥୀ ହେବା ନେଇ ନିଷ୍ପତ୍ତି ଗ୍ରହଣ କରିଥିଲେ । ସେମାନଙ୍କର ବିବାହ ଉତ୍ସବରେ ବହୁ ସଂଖ୍ୟକ ଲୋକ ସାମିଲ ହୋଇଥିଲେ । ଏହି ବିବାହ ଏବେ ସ୍ଥାନୀୟ ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।
ଖବର ମୁତାବକ, କବିତା ଓ ଗୁଞ୍ଜା ସରଫ ବବଲୁ ଗତ ଗୁରୁବାର ଦିନ ସନ୍ଧ୍ୟା ସମୟରେ ଦେବରିୟାର ଛୋଟ କାଶୀ କୁହାଯାଉଥିବା ଶିବ ମନ୍ଦିରରେ ପରସ୍ପରଙ୍କୁ ବିବାହ କରିଥିଲେ । ଏହି ବିବାହରେ ଗୁଞ୍ଜା ବରର ଭୂମିକା ନିର୍ବାହ କରିଥିବା ବେଳେ କବିତା ସିନ୍ଦୁର ଲଗାଇଥିଲେ । ଏହାପରେ ଦୁହେଁ ସାତ ଫେରା ନେଇ ପରସ୍ପର ସହ ବିବାହ ବନ୍ଧନରେ ବାନ୍ଧି ହୋଇଥିଲେ । ଗୁଞ୍ଜା ଓ କବିତା ସାରା ଜୀବନ ପରସ୍ପରର ସହ ରହିବାକୁ ଶପଥ ନେଇଥିଲେ । ଦୁଇଜଣ ଯାକ ନିଜ ନିଜର ବିବାହ ପରେ ମଦ୍ୟପ ସ୍ବାମୀଙ୍କ ନିର୍ଯାତନାର ଶିକାର ହୋଇଥିଲେ । ଘରୋଇ ହିଂସା ଅସହ୍ୟ ହେବାରୁ ସେମାନେ ନିଜ ନିଜର ପତିମାନଙ୍କୁ ଛାଡ଼ି ନୂଆ ଜୀବନ ଆରମ୍ଭ କରିବାକୁ ନିଷ୍ପତ୍ତି ନେଇଥିଲେ । ସ୍ବାମୀମାନଙ୍କ ଠାରୁ ଅଲଗା ହେବା ପରେ ଦୁହେଁ ସୋସିଆଲ ମିଡ଼ିଆରେ ବେଶ ସକ୍ରିୟ ରହୁଥିଲେ । ସମାନେ ଫେସବୁକ ଓ ଇନଷ୍ଟାଗ୍ରାମରେ ଅଧିକ ସମୟ ବିତାଉଥିଲେ । ଏହି ଅବସରେ ଦୁହିଁଙ୍କର ଦେଖା ସାକ୍ଷାତ ହୋଇଥିଲା ।
ନବୀନଙ୍କ ପ୍ରୟାସ ସାରା ଦେଶରେ ଗ୍ରହଣୀୟ: ପ୍ରଥମ ଥର ସାରା ଦେଶରେ ନମ୍ବର ଓ୍ବାନ ହେଲା ଓଡ଼ିଶା
ଭୁବେନଶ୍ବର: ପୁଣି ଦେଶରେ ନମ୍ବର ଓ୍ବାନ ହେଲା ନବୀନ ମଡେଲ। ୨୦୨୨-୨୩ ଆର୍ଥିକ ବର୍ଷ ପାଇଁ ଆର୍ଥିକ ସୂଚକାଙ୍କରେ ଓଡ଼ିଶା ହୋଇଛି ଏକ ନମ୍ବର। ଆର୍ଥିକ ସୂଚକାଙ୍କ ୨୦୨୫ ସଂକ୍ରାନ୍ତ ନୀତି ଆୟୋଗ ରିପୋର୍ଟରେ ଓଡ଼ିଶାକୁ ଏକ ନମ୍ବରରେ ରଖାଯାଇଛି। ଆର୍ଥିକ କ୍ଷେତ୍ରରେ ସର୍ବାଧିକ ୬୭.୮ ପଏଣ୍ଟ ସହିତ ଓଡ଼ିଶାର ସ୍ଥାନ ସର୍ବାଗ୍ରେ ରହିଛି। ଋଣ ସୂଚକାଙ୍କରେ ୯୯ ପ୍ରତିଶତ ଓ ଋଣଗତ ସହନଶୀଳତା ୬୪ ପ୍ରତିଶତ ରହିଛି। ଏହାସହ ବ୍ୟୟ ଗୁଣବତ୍ତା ଓ ରାଜସ୍ବ ସମ୍ବଳ ସଂଗ୍ରହ କ୍ଷେତ୍ରରେ ବି ଓଡ଼ିଶା ଉଲ୍ଲେଖନୀୟ ଭାବେ ସଫଳତା ହାସଲ କରିଛି। ଏହି ସମୟ କାଳ ମଧ୍ୟରେ କମ୍ ରାଜସ୍ବ ନିଅଣ୍ଟ, ଋଣ ପରିଚାଳନା, ହାରାହାରି ପୁଞ୍ଜିଗତ ଆକଳନ ଓ ଜିଏସଡିପି ଅନୁପାତ କ୍ଷେତ୍ରରେ ମଧ୍ୟ ଓଡ଼ିଶା ଉତ୍ତମ ପାରଦର୍ଶିତା ହାସଲ କରିଛି। ନବୀନ ସରକାରର ପଞ୍ଚମ ପାଳି ତଥା 5T କାର୍ଯ୍ୟକାରିତା ପରେ ଏଭଳି ସଫଳତା ମିଳିଛି। ନବୀନ ପଟ୍ଟନାୟକଙ୍କ ପ୍ରଚେଷ୍ଟା ପାଇଁ ଓଡ଼ିଶା ପ୍ରଥମ ଥର ପାଇଁ ଏହି ସଫଳତା ହାସଲ କରିବା ସହ ସାରା ଦେଶରେ ନମ୍ବର ଓ୍ବାନ ହୋଇଛି। କେବଳ ଏହି କ୍ଷେତ୍ର ନୁହେଁ, ଅନେକ କ୍ଷେତ୍ରରେ ମଧ୍ୟ ନବୀନ ପଟ୍ଟନାୟକଙ୍କ ଉଦ୍ୟମ ଯୋଗୁ ଓଡ଼ିଶା କେନ୍ଦ୍ର ସରକାରଙ୍କ ଠାରୁ ପ୍ରଶଂସା ସାଉଣ୍ଟୁଛି। ସଫଳତା ପାଇଁ ଅନେକ ଥର ପୁରସ୍କୃତ ହୋଇଛି ଓଡ଼ିଶା।
ହିନ୍ଦୁ ସେନା ଅଧ୍ୟକ୍ଷଙ୍କ ଗାଡ଼ି ଉପରକୁ ଗୁଳିମାଡ଼: ଆଜମେର ଦରଗାହ ବିବାଦକୁ ନେଇ ଦାୟର କରିଥିଲେ ଯାଚିକା
ଆଜମେରା: ରାଜସ୍ଥାନର ଆଜମେରରେ ଘଟିଛି ଏକ ବଡ଼ ଘଟଣା । ହିନ୍ଦୁ ସେନାର ରାଷ୍ଟ୍ରୀୟ ଅଧ୍ୟକ୍ଷ ବିଷ୍ଣୁ ଗୁପ୍ତାଙ୍କ ଉପରେ ଆଜି ସକାଳୁ ଫାୟାରିଂ କରାଯାଇଥିବାର ଖବର ସାମ୍ନାକୁ ଆସିଛି । ତେବେ ଗୁଳି ବିଷ୍ଣୁଙ୍କ ଶରୀରରେ ବାଜି ନଥିବାରୁ ତାଙ୍କର ଜୀବନ ଅଳ୍ପକେ ବର୍ତ୍ତି ଯାଇଛି । ବିଷ୍ଣୁ ଆଜମେରରୁ ଦିଲ୍ଲୀ ଯିବା ସମୟରେ ଏହି ଘଟଣା ଘଟିଥିଲା । ଗୋଗଲ ଥାନା ଅଞ୍ଚଳରେ ଏହି ଘଟଣା ଘଟିଥିବା ବେଳେ ବିଷ୍ଣୁଙ୍କ ଗାଡ଼ି ଉପରକୁ ଗୁଳିମାଡ଼ କରାଯାଇଥିବା କୁହାଯାଉଛି । ଏହି ସୂଚନା ପାଇବା ମାତ୍ରେ ଏସପିଙ୍କ ସମେତ ଅନ୍ୟ ପୋଲିସ ଅଧିକାରୀମାନେ ଘଟଣାସ୍ଥଳରେ ପହଞ୍ଚିଥିଲେ ।
ସୂଚନା ମୁତାବକ, ବିଷ୍ଣୁଙ୍କ କାର ଉପର ଫାୟାର ଶଟ୍ ଦେଖିବାକୁ ମିଳିଛି । ପୋଲିସ ଟିମ ଗୁଳିର ଖୋକା ସନ୍ଧାନରେ ରହିବା ସହ ଘଟଣା ସମ୍ବନ୍ଧରେ ତଥ୍ୟ ସଂଗ୍ରହ କରୁଛି । ଆଜମେର ଦରଗାହରେ ଶିବ ମନ୍ଦିର ହେବାର ଦାବିକୁ ନେଇ ମାମଲା ସରଗରମ୍ ହୋଇ ଉଠିଥିବା ବିଷ୍ଣୁ କହିଛନ୍ତି । ଜାନୁଆରୀ ୨୪ରେ ଆଜମେରର ସିଭିଲ କୋର୍ଟରେ ଏହି ବିବାଦର ଶୁଣାଣି ହୋଇଥିଲା । ଏହି ମାମଲାରେ ବିଷ୍ଣୁ ଯାଚିକା ଦାୟର କରିଥିବା ବେଳେ ତାଙ୍କୁ କ୍ରମାଗତ ଧମକ ମିଳୁଥିଲା । ତେଣୁ ବିଷ୍ଣୁ ନିଜ ପରିବାରର ସୁରକ୍ଷା ମାଗିଥିଲେ । ମାମଲାର ଶୁଣାଣି ସମୟରେ କୋର୍ଟ ପରିସର ଭିତର ଓ ବାହାରେ ପ୍ରବଳ ଭିଡ଼ ଦେଖିବାକୁ ମିଳିଥିଲା । ଦରଗାହରେ ମନ୍ଦିର ହେବା ନେଇ ଗତବର୍ଷ ବିଷ୍ଣୁ ଆଜମେର ଜିଲ୍ଲା କୋର୍ଟରେ ଯାଚିକା ଦାୟର କରିଥିଲେ । ଗତବର୍ଷ ନଭେମ୍ବର ୨୭ରେ ତାଙ୍କର ଯାଚିକାକୁ କୋର୍ଟ ସ୍ବୀକାର କରିଥିଲେ ।
ବଡ଼ମ୍ବା ନରସିଂହପୁରରେ ପୁଣି ଦନ୍ତା ହାତୀର ମୃତ୍ୟୁ
ବଡ଼ମ୍ବା: ନରସିଂହପୁର ପୂର୍ବ ରେଞ୍ଜ ରଙ୍ଗଡାବ ଗ୍ୟାସ ଅଫିସ ନିକଟରେ ଦନ୍ତାର ମୃତଦେହ ଜବତ ହୋଇଛି। ଗ୍ୟାସ ଅଫିସ ନିକଟରେ ଥିବା ଏକ ବଗିଚାରେ ଦନ୍ତାର ସନ୍ଦେହଜନକ ମୃତଦେହ ଠାବ ହୋଇଛି। ଏନେଇ ଏସିଏଫ ମନୋଜ ପାତ୍ର ସୂଚନା ଦେଇଛନ୍ତି। ହାତୀର ବୟସ ଆନୁମାନିକ ୧୦ ରୁ ୧୨ ବର୍ଷ ହେବ।