spot_img
Home Blog Page 1170

ହାସ୍ୟ ଅଭିନେତା ନରିଙ୍କୁ ପିଟିଲେ ତୁଳସୀ ଗଣନାଟ୍ୟ ମାଲିକ !

ଆଠଗଡ଼: ଯାତ୍ରା ଜଗତରୁ ଆଉ ଏକ ଚାଞ୍ଚଲ୍ୟକର ଖବର । ହାସ୍ୟ ଅଭିନେତାଙ୍କୁ ଯାତ୍ରା ପାର୍ଟି ମାଲିକଙ୍କ ଆକ୍ରମଣ । ଆଠଗଡ଼ ଅଞ୍ଚଳରୁ ଆସିଛି ଅଭିଯୋଗ । ହାସ୍ୟ ଅଭିନେତା ନରିପଣ୍ଡାଙ୍କୁ ତୁଳସୀ ଗଣନାଟ୍ୟର ମାଲିକ ଆକ୍ରମଣ କରିଥିବା ଅଭିଯୋଗ । ଏନେଇ ନିଜେ ନରି ଅଭିଯୋଗ କରିଛନ୍ତି । ଚଣ୍ଡିଖୋଲ ଅଞ୍ଚଳରେ ଏକ ଢାବାରେ ଆକ୍ରମଣ ହୋଇଥିବା ଅଭିଯୋଗ କରିଛନ୍ତି ନରି ।

ଅଭିଯୋଗ ଅନୁସାରେ ତୁଳସୀ ଯାତ୍ରା ପାର୍ଟିରେ ଆଗାମୀ ଯାତ୍ରା ଋତୁରେ କାମ କରିବାକୁ ଅଗ୍ରୀମ ଆଣିଥିଲେ ନରି । ତେବେ ପୂର୍ବ ନିର୍ଦ୍ଧାରିତ ପଇସା ମିଳି ନଥିଲା । ଫଳରେ ଅଗ୍ରୀମ ନେଇଥିବା ଟଙ୍କା ଫେରସ୍ତ କରିବାକୁ ଯାଇଥିଲେ ନରି । ଏହି ସମୟରେ ତୁଳସୀ ଯାତ୍ରା ପାର୍ଟିର ମାଲିକ ତାଙ୍କୁ ମାଡ ମାରିଥିବା ସେ ଅଭିଯୋଗ କରିଛନ୍ତି ।

ଘଟଣାକୁ ନେଇ ନରି ଭାଙ୍ଗି ପଡ଼ିଛନ୍ତି । ଲୋକଙ୍କୁ ହସାଉଥିବା ଜଣେ କଳାକାରଙ୍କ ଆଖିରେ ଲୁହ ତାଙ୍କୁ ମର୍ମାହତ କରିଛି । ଆଉ ଯାତ୍ରା କରିବେ ନାହିଁ ବୋଲି କହିଛନ୍ତି ନରି ।

ଜାଲ ସାର୍ଟିଫିକେଟ ଦେଇ ଚାକିରି: ଅଧ୍ୟକ୍ଷଙ୍କ ବହିଷ୍କାର ଦାବିରେ କଲେଜରେ ତାଲା ପକାଇଲେ ଛାତ୍ରଛାତ୍ରୀ

ଢେଙ୍କାନାଳ: ଜାଲ ସାର୍ଟିଫିକେଟ ଦେଇ ଚାକିରି କରିଥିବା କଲେଜ ଅଧ୍ୟକ୍ଷଙ୍କ ବହିଷ୍କାର ଦାବିରେ ତାତିଲେ ଛାତ୍ରଛାତ୍ରୀ । ଜାଲ ଭିନ୍ନକ୍ଷମ ସାର୍ଟିଫିକେଟରେ ଚାକିରି କରିଥିବା ଅଧ୍ୟକ୍ଷଙ୍କୁ ହଟାଇବା ଦାବିରେ ଢେଙ୍କାନାଳ ସ୍ବୟଂଶାସିତ ମହାବିଦ୍ୟାଳୟ ଫାଟକରେ ତାଲା ପକାଇଲେ ଉତ୍ତକ୍ତ ଛାତ୍ରଛାତ୍ରୀ । ହୋହାଲ୍ଲା ନାରାବାଜିରେ କମ୍ପିଛି କଲେଜ ପରିସର । ଏପଟେ ଜାଲ ସାର୍ଟିଫିକେଟ ଘଟଣାରେ ଉପ ଜିଲ୍ଲାପାଳ ଓ ଉଚ୍ଚଶିକ୍ଷା ବିଭାଗର ଆଞ୍ଚଳିକ ନିର୍ଦ୍ଦେଶକ କଲେଜରେ ପହଞ୍ଚି ଅଧ୍ୟକ୍ଷଙ୍କୁ ପଚରାଉଚରା ଆରମ୍ଭ କରିଛନ୍ତି ।

କଲେଜ ଅଧ୍ୟକ୍ଷଙ୍କ ବିରୋଧରେ ସଙ୍ଗୀନ ଅଭିଯୋଗ ଆସିବା ପରେ ଅଶାନ୍ତ ହୋଇଛି ମହାବିଦ୍ୟାଳୟ । ମୁଖ୍ୟ ଫାଟକରେ ତାଲା ପକାଇ ହୋହଲ୍ଲା ନାରାବାଜି କରିଛନ୍ତି ଛାତ୍ରଛାତ୍ରୀ । ପିଲାଙ୍କ ଗୋଟିଏ ଜିଦ୍ କଲେଜ ଅଧ୍ୟକ୍ଷ ଚିତ୍ତରଞ୍ଜନ ସାହୁଙ୍କ ତୁରନ୍ତ ବହିଷ୍କାର କରାଯାଉ ।

କଲେଜ ଅଧ୍ୟକ୍ଷ ଚିତ୍ତରଞ୍ଜନ ସାହୁ ନକଲି ଭିନ୍ନକ୍ଷମ ସାର୍ଟିଫିକେଟ ଦେଇ ଚାକିରି ହାତେଇଥିବା ଅଭିଯୋଗ ଆଣିଛନ୍ତି ଆନ୍ଦୋଳନରତ ଛାତ୍ରଛାତ୍ରୀ । ବିଭିନ୍ନ ସମୟରେ ଅଧ୍ୟକ୍ଷ ଚିତ୍ତରଞ୍ଜନ ଛାତ୍ରଛାତ୍ରୀଙ୍କୁ ଦୁର୍ବ୍ୟବହାର କରୁଥିବା ବି ଅଭିଯୋଗ ହୋଇଛି । ପିଲାଙ୍କ ଶିକ୍ଷାରେ ଉନ୍ନତି ପାଇଁ ଆସିଥିବା ଅନୁଦାନ ଅର୍ଥରେ ବି ଦୁର୍ନୀତି କରାଯାଇଥିବା ଅଭିଯୋଗ ହୋଇଛି । ଶୀଘ୍ର ଏହାର ତଦନ୍ତ କରାଯାଇ କାର୍ଯ୍ୟାନୁଷ୍ଠାନ ନେବାକୁ ଛାତ୍ରଛାତ୍ରୀ ଦାବି କରିଛନ୍ତି ।

ଯଦି ଅଧ୍ୟକ୍ଷ ଚିତ୍ତରଞ୍ଜନ ଭିନ୍ନକ୍ଷମ, ତେବେ ତାଙ୍କର ନାଁରେ ଡ୍ରାଇଭିଙ୍ଗ ଲାଇସେନ୍ସ କିଭଳି ରହିଲା ?  ସେ ବାଇକ ଓ କାର କିଭଳି ଚଳାଉଛନ୍ତି ବୋଲି ପ୍ରଶ୍ନ ଉଠାଇ ଛାତ୍ରଛାତ୍ରୀ ଆନ୍ଦୋଳନ କରିଥିଲେ । ଏନେଇ ସମ୍ବଲପୁର ଆରଡିସିଙ୍କ କାର୍ଯ୍ୟାଳୟରୁ ଜିଲ୍ଲାପାଳଙ୍କୁ ତଦନ୍ତ ପାଇଁ ନିର୍ଦ୍ଦେଶ ଆସିବା ପରେ ଢେଙ୍କାନାଳ ଉପ ଜିଲ୍ଲାପାଳ ଏହାର ତଦନ୍ତ କରିଛନ୍ତି । ତେବେ ପଚରାଉଚରା ବେଳେ କଲେଜ ଅଧ୍ୟକ୍ଷ କୌଣସି ଭିନ୍ନକ୍ଷମ ସାର୍ଟିଫିକେଟ ଦେଖାଇ ପାରି ନଥିବା ଜଣାପଡିଥିଲା । ଯାହାକୁ ନେଇ କଲେଜ ଛାତ୍ରଙ୍କ ମଧ୍ୟରେ ପୁଣି ଅସନ୍ତୋଷ ପ୍ରକାଶ ପାଇଥିଲା । ଏପଟେ ଉଚ୍ଚଶିକ୍ଷା ବିଭାଗ ପକ୍ଷରୁ ମଧ୍ୟ ଆଞ୍ଚଳିକ ନିର୍ଦ୍ଦେଶକ ଘଟଣା ସ୍ଥଳରେ ପହଞ୍ଚି ସୂଚନା ଅଧିକାର କର୍ମୀ ପ୍ରିୟବ୍ରତ ଗଡନାୟକ ଓ କଲେଜ ଅଧ୍ୟକ୍ଷ ଚିତ୍ତରଞ୍ଜନ ସାହୁଙ୍କୁ ଅଲଗା ଅଲଗା ପଚରାଉଚରା କରିଛନ୍ତି ।

ମିଆଁମାରରେ ପୁଣି ଭୂକମ୍ପ ଝଟକା: ଗତକାଲି ଭୂକମ୍ପରେ ଗଲାଣି ହଜାରେରୁ ଅଧିକ ଜୀବନ

ନନ୍ଦିଘୋଷ ବ୍ୟୁରୋ: ଭୂକମ୍ପରେ ପୁଣି ଥରିଲା ମିଆଁମାର । ରିଆକ୍ଟର ସ୍କେଲରେ ଏହାର ତୀବ୍ରତା ୫.୧ ମପାଯାଇଛି । ଗତକାଲି ଦୁଇଟି ଭୂକମ୍ପ ମିଆଁମାରକୁ ଦୋହଲାଇ ଦେଇଥିବା ବେଳେ ଆଜି ପୁଣି ଥରେ ଆଉ ଏକ ଭୂକମ୍ପ ଝଟକା ଅନୁଭୂତ ହୋଇଛି । ଯାହାକୁ ନେଇ ଲୋକଙ୍କ ମଧ୍ୟରେ କୋକୁଆ ଭୟ ଖେଳି ଯାଇଛି ।

ସୂଚନାଯୋଗ୍ୟ, ଗତକାଲି ମିଆଁମାର ସମେତ ଥାଇଲାଣ୍ଡରେ ଦୁଇଟି ଶକ୍ତିଶାଳୀ ଭୂକମ୍ପ ହୋଇଥିଲା । ଯେଉଁଥିରେ କେବଳ ମିଆଁମାରରେ ହଜାରେରୁ ଅଧିକ ଲୋକଙ୍କ ମୃତ୍ୟୁ ଘଟିଛି । ଏବେ ବି କୋଠାର ଭଗ୍ନାବଶେଷ ତଳେ ଲୋକେ ଚାପି ହୋଇ ରହିଛନ୍ତି । ଉଦ୍ଧାର କାର୍ଯ୍ୟ ଜୋରସୋରରେ ଚାଲିଛି । ତେବେ ସମୟ ଗଡ଼ିବା ସହ ଭଗ୍ନାବଶେଷ ତଳେ ଫସିଥିବା ଲୋକଙ୍କୁ ନେଇ ଆଶଙ୍କା ବଢ଼ିବାରେ ଲାଗିଛି । ଏମିତି ସ୍ଥିତିରେ ମୃତାହତଙ୍କ ସଂଖ୍ୟା ଆହୁରି ବଢ଼ିବାର ଆଶଙ୍କା ରହିଛି ।

ସେହିପରି ଥାଇଲାଣ୍ଡରେ ମଧ୍ୟ ଭୁକମ୍ପରେ ବ୍ୟାପକ କ୍ଷୟକ୍ଷତି ହୋଇଛି । ଗତକାଲିର ଭୂକମ୍ପରେ ଥାଇଲାଣ୍ଡରେ ୪ ଜଣ ଲୋକଙ୍କ ମୃତ୍ୟୁ ଘଟିଥିବା ବେଳେ ୮୦ରୁ ଅଧିକ ଲୋକ ନିଖୋଜ ଅଛନ୍ତି ।

ଆଜି ମିଆଁମାରରେ ଆଉ ଏକ ଭୂକମ୍ପ ଝଟକା ଅନୁଭୂତ ହେବା ପରେ ଲୋକଙ୍କ ମଧ୍ୟରେ କୋକୁଆ ଭୟ ଖେଳିଯାଇଛି । ଗତକାଲିର ପ୍ରାକୃତିକ ତାଣ୍ଡବରୁ ଲୋକେ ବାହାରି ନଥିବା ବେଳେ ଆଉ ଏକ ଭୂକମ୍ପ ଝଟକା ସେମାନଙ୍କୁ ଆଶଙ୍କା ମଧ୍ୟକୁ ଠେଲି ଦେଇଛି । ବହୁ ଲୋକେ ଏବେ ବି ନିଖୋଜ ଥିବା ବେଳେ ଲୋକେ ସେମାନଙ୍କ ପରିଜନଙ୍କୁ ଖୋଜୁଛନ୍ତି । ଏମିତି ସ୍ଥିତିରେ ଆଉ ଏକ ଭୂକମ୍ପ ଝଟକା ଲୋକଙ୍କୁ ଦୋହଲାଇ ଦେଇଛି ।

ସେପଟେ ଭୂକମ୍ପ ପରେ ମିଆଁମାରକୁ ବିଭିନ୍ନ ଦେଶରୁ ରିଲିଫ ସହାୟତା ପହଞ୍ଚିବାରେ ଲାଗିଛି । ଭାରତ ୪୦ ହଜାର କେଜିର ରିଲିଫ ସାମଗ୍ରୀ ମିଆଁମାରକୁ ପଠାଇଛି । ଏଥିରେ ଔଷଧ ସମେତ, ଅତ୍ୟାବଶ୍ୟକ ସାମଗ୍ରୀ ରହିଛି । ସେହିପରି ରିଲିଫ କାମରେ ଭାରତୀୟ ନେଭି ମଧ୍ୟ ନିଯୋଜିତ ହୋଇଛି ।

ଶ୍ରୀଜଗନ୍ନାଥଙ୍କ ଜମି ସେଟଲମେଣ୍ଟ ପାଇଁ ସରକାର ଆଣିବେ ୟୁନିଫର୍ମ ପଲିସି

ଭୁବନେଶ୍ବର: ରାଜ୍ୟର ୨୪ଟି ଜିଲ୍ଲାରେ ଚିହ୍ନଟ ହୋଇଛି ମହାପ୍ରଭୁ ଶ୍ରୀଜଗନ୍ନାଥଙ୍କ ୬୦ହଜାର ୪୨୬.୯୪୩ ଏକର ଜମି । ସେହିପରି ୩୮ ହଜାର ୬୧.୮୨୯ ଏକର ଜମିର ସ୍ୱତ୍ୱଲିପି ରହିଛି । ଯାହାର ଡିଜିଟାଇଜେସନ କାମ ସରିବ । ବାକି ୨୨ ହଜାର ଏକରର ଆରଓଆର ଯୋଗାଡ଼ ସରିବା ପରେ ଡିଜିଟାଇଜେସନ କରାଯିବ ।

ସେହିପରି ୬ଟି ରାଜ୍ୟରେ ୩୯୫.୨୫ ଏକରର ଜଗନ୍ନାଥ ଜମି ରହିଛି । ସର୍ବାଧିକ ଜମି ପଶ୍ଚିମବଙ୍ଗରେ ଥିବା ନେଇ ରେକର୍ଡ କରାଯାଇଛି । ରାଜ୍ୟର ୭ଟି ଜିଲ୍ଲାରେ ୧୬୮.୮୬ ଏକର ଜଗନ୍ନାଥ ଜମି ଅବରୋଧ ହୋଇଛି । ଏନେଇ ଶ୍ରୀଜଗନ୍ନାଥ ମନ୍ଦିର ଆଇନ ୧୬ ଏଆଇ ଅନୁସାରେ ୯୭୪ ମାମଲା ରୁଜୁ ହୋଇଛି । ଯେଉଁମାନେ ଦୀର୍ଘ ଦିନ ଧରି ଜଗନ୍ନାଥ ଜମି ଅବରୋଧ କରିଥିଲେ, ସେମାନଙ୍କ ପାଇଁ ୨୦୦୩ରେ ଏକ ୟୁନିଫର୍ମ ପଲିସି ଆସିଥିଲା । ଯେଉଁଥିରେ ଶହେ ଡିସିମିଲ ଜମି କନସେସନରେ ମିଳିବାର ନିୟମ କରାଯାଇଥିଲା । ବାକି ଜମି ବେଞ୍ଚ ମାର୍କ ଭାଲ୍ୟୁରେ ଦିଆଯିବାର ନିୟମ ହୋଇଥିଲା । ଯାହା ୨୦୧୯ରେ ସଂଶୋଧନ ହୋଇଥିଲା । ନୂଆ ସରକାର ତିନି ମାସରେ ୟୁନିଫର୍ମ ପଲିସି ଆଣିବେ । ଏଥିରେ ଲ୍ୟାଣ୍ଡ ସେଟଲମେଣ୍ଟ ପ୍ରକ୍ରିୟା ଜରିଆରେ ଶହେ ଡିସିମିଲ ଜମି କନସେସନ ରେଟରେ ଫେରାଯିବ ବୋଲି ବିଧାନସଭାରେ ଆଇନ ମନ୍ତ୍ରୀ ପୃଥ୍ବୀରାଜ ହରିଚନ୍ଦନ କହିଛନ୍ତି ।

୫୦ ଲକ୍ଷ ଟଙ୍କା ସାଇବର ଠକେଇର ଶିକାର ହେବା ପରେ ଦମ୍ପତିଙ୍କ ଆତ୍ମହତ୍ୟା

ବେଙ୍ଗାଲୁରୁ: ସାଇବର ଠକେଇର ଶିକାର ହେବା ପରେ ଜୀବନ ହାରିଲେ ଦମ୍ପତି । ସ୍ବାମୀ ନିଜ ଗଳା କାଟି ଦେଇଥିବା ବେଳେ ପତ୍ନୀ ବିଷ ପିଇ ଆତ୍ମହତ୍ୟା କରିଛନ୍ତି । ଘଟଣା ଘଟିଛି କର୍ଣ୍ଣାଟକ ବେଲଗାଭିରେ । ସାଇବର ଅପରାଧୀଙ୍କ ଦ୍ବାରା ୫୦ ଲକ୍ଷ ଟଙ୍କା ହରାଇବା ପରେ ଆତ୍ମହତ୍ୟା କରିଛନ୍ତି ଦିଆଙ୍ଗୋ ନଜରାତ ଏବଂ ତାଙ୍କ ପତ୍ନୀ ପ୍ଲେବିଆନା ନଜରାତ । ମୃତ୍ୟୁ ପୂର୍ବରୁ ସେମାନେ ଏକ ସୁଇସାଇଡ ନୋଟ ଛାଡି ଯାଇଛନ୍ତି ।

ଦିଲ୍ଲୀ କ୍ରାଇମବ୍ରାଞ୍ଚର ଅଧିକାରୀଙ୍କ ପରିଚୟ ଦେଇ ଅପରାଧୀମାନେ ଟଙ୍କା ଲୁଟି ନେଇଥିଲେ । ଏକ ଅପରାଧିକ ମାମଲାରେ ସମ୍ପୃକ୍ତ ଥିବା ଦର୍ଶାଇ ସେମାନେ ଏହି ଟଙ୍କା ଲୁଟ୍ କରିଥିଲେ । ପତିପତ୍ନୀ ଦୁହେଁ ମହାରାଷ୍ଟ୍ର ସଚିବାଳୟରେ ଚାକିରି କରି ଅବସର ନେଇଥିଲେ ।

ସେପଟେ ଅନଲାଇନ ଡେଟିଂ ଆପରେ ସାମିଲ ହୋଇ ନୋଏଡାର ଜଣେ ବ୍ଯକ୍ତି ହରାଇଛନ୍ତି ସାଢେ ୬ କୋଟି ଟଙ୍କା । ଅନଲାଇ ଟ୍ରେଡିଂ ଆପରେ ନିବେଶ କରିବା ଲୋଭ ଦେଇ ମହିଳା ଜଣକ ଏହି ଟଙ୍କା ଠକି ନେଇଥିଲେ । ଠକେଇର ଶିକାର ବ୍ୟକ୍ତି ଜଣେ ବ୍ୟବସାୟୀ ଓ ସେ ନୋଏଡାର ସେକ୍ଟର ୩୬ର ବାସିନ୍ଦା । ଏନେଇ ସେ ଦିଲ୍ଲୀ ସାଇବର କ୍ରାଇମ ପୋଲିସରେ ଅଭିଯୋଗ ଦାୟର କରିଛନ୍ତି ।

ପୋଲିସ ବାବୁଙ୍କ ପ୍ରେମ ପ୍ରତାରଣା: ବିବାହ ପ୍ରତିଶ୍ରୁତି ଦେଇ ଲୁଟିଲେ ଇଜ୍ଜତ, ବାନ୍ଧିଲା ପୋଲିସ

ଜଳେଶ୍ବର: ପୋଲିସ ବାବୁଙ୍କ ଯୌନ କେଳେଙ୍କାରୀ । ପ୍ରେମ ଜାଲରେ ଫସାଇ ଯୁବତୀଙ୍କୁ ଦୁଷ୍କର୍ମ କରି ଗର୍ଭବତୀ କଲେ । ପରେ ବିବାହ କରିବାକୁ କଲେ ମନା । ଥାନାରେ ଅଭିଯୋଗ ପରେ ପୋଲିସ ବାବୁଙ୍କୁ ଗିରଫ କରିଛି ପୋଲିସ ।

ଅଭିଯୋଗ ଅନୁସାରେ, ମାଲକାନଗିରି ଏସଓଜିର ଟ୍ରେନିଂ ପ୍ରାପ୍ତ ସବଇନ୍ସପେକ୍ଟର ବିଜୟ କୁମାର ସାହୁଙ୍କୁ ପୋଲିସ ପ୍ରେମ, ଦୁଷ୍କର୍ମ ଓ ପ୍ରତାରଣା ଅଭିଯୋଗରେ ଗିରଫ କରାଯାଇଛି ।

ବାଲେଶ୍ୱର ଜିଲ୍ଲା ବାଲିଆପାଳ ବ୍ଲକ ବଡ଼ ତାଳପଦା ଗ୍ରାମର ବିଜୟ ଜଣେ ଯୁବତୀଙ୍କୁ ବିବାହର ପ୍ରତିଶ୍ରୁତି ଦେଇ ଶାରୀରିକ ସମ୍ପର୍କ ରଖିଥିଲେ । ଯୁବତୀ ଜଣଙ୍କ ଗର୍ଭବତୀ ହୋଇଥିଲେ । ହେଲେ ପୋଲିସ ଚାକିରି କରିବା ପରେ ବିଜୟ ଯୁବତୀଙ୍କୁ ବିବାହ କରିବାକୁ ମନା କରିଥିଲେ । ଏହାକୁ ନେଇ ଯୁବତୀ ଜଣଙ୍କ ବାଲିଆପାଳ ଥାନାରେ ଅଭିଯୋଗ କରିବା ପରେ ପୋଲିସ ବିଜୟଙ୍କୁ ଗିରଫ କରିଛି । ସୂଚନାଯୋଗ୍ୟ, ମାଲକାନଗିରି ଏସଓଜିରେ ସବଇନ୍ସପେକ୍ଟର ବିଜୟ ସାହୁ ଟ୍ରେନିଂ ନେଇଛନ୍ତି ।

ବେଆଇନ ଇଟା ଭାଟିରେ ଧରାକୋଟ ତହସିଲଦାରଙ୍କ ଚଢ଼ାଉ

ନନ୍ଦିଘୋଷ ବ୍ୟୁରୋ: ଆକ୍ସନ ମୋଡ଼ରେ ଧରାକୋଟ ତହସିଲଦାର। ଆସିକା ଧରାକୋଟ ରାଜସ୍ବ ବିଭାଗ ଅଧିନସ୍ଥ ବେଆଇନ ଇଟା ଭାଟିରେ ତହସିଲଦାର ଚଢ଼ାଉ କରିଛନ୍ତି । ବେଆଇନ ଇଟା ଭାଟି ଉପରେ ଚଢ଼ାଉ କରି ଜଗମୋହନ, ଭାଲିଆ ପୋଲି, ଧରାକୋଟ,ବେଠୁଆର ଆଦି ଅଞ୍ଚଳର ବିଭିନ୍ନ ଇଟା ଭାଟି ଉପରେ ଜେସିବି ଲଗାଇ ହଜାର ହଜାର ଇଟା ନଷ୍ଟ କରିଛନ୍ତି। ପୋଲିସ, ଅଗ୍ନିଶମ ବିଭାଗ ଓ ତହସିଲ କର୍ମଚାରୀଙ୍କୁ ନେଇ ଗଠନ ଏକ ଟିମ ସହାୟତାରେ ଏହି ଚଢ଼ାଉ  ଜାରି ରହିଛି। ପୂର୍ବରୁ ବେଆଇନି ଇଟା ମାଲିକ ମାନଙ୍କୁ ତହସିଲ ପକ୍ଷରୁ ନୋଟିସ କରାଯାଇଥିଲା। ହେଲେ ସେମାନେ ନିଜ ପକ୍ଷ ନ ରଖିବାରୁ ଏହି ପରି ପଦକ୍ଷେପ ନିଆଯାଇଥିବା ଜଣା ପଡ଼ିଛି।

ସରକାରଙ୍କୁ କଲେ ଟାର୍ଗେଟ, ଜାଣନ୍ତୁ କାହିଁକି ଏମିତି କହିଲେ ଆତିଶୀ

ନନ୍ଦିଘୋଷ ବ୍ୟୁରୋ: ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଆତିଶୀ ଏବେର ବିଜେପି ସରକାରକୁ କଟାକ୍ଷ କରିଛନ୍ତି । ସେ ନିଜର ଟ୍ବିଟର(ଏକ୍ସ)ରେ ଏକ ପୋଷ୍ଟ କରିଛନ୍ତି । ଯେଉଁଥିରେ ସେ ଦିଲ୍ଲୀରେ ବିଜୁଳି କାଟକୁ ନେଇ ଏକ ସମାଲୋଚନା ମୂଳକ ପୋଷ୍ଟ କରିଛନ୍ତି । ଏବେ ଭାରତରେ AI ଫିଚର ଗ୍ରୋକକୁ ନେଇ ସବୁଠି ଚର୍ଚ୍ଚା । କାରଣ ୟୁଜର୍ସମାନେ ବିଭିନ୍ନ ପଚାରି ଗ୍ରୋକରୁ ଜାଣୁଛନ୍ତି । ତେବେ ଦିଲ୍ଲୀର ବିଜୁଳି କାଟକୁ ନେଇ ଜଣେ ୟୁଜର୍ସ ପଚାରିଥିବା ପ୍ରଶ୍ନର ଉତ୍ତରରେ ଯାହା ଆସିଛି ତାହାକୁ ନେଇ ସେ ସମାଲୋଚନା କରିଥିବା ଦେଖିବାକୁ ମିଳିଛି ।

ଆତିଶୀଙ୍କ ମୁଖ୍ୟମନ୍ତ୍ରୀତ୍ୱ ସମୟରେ (୨୧ ସେପ୍ଟେମ୍ବର ୨୦୨୪ – ୮ ଫେବୃଆରୀ ୨୦୨୫) ଦିଲ୍ଲୀରେ କୌଣସି ବଡ଼ ବିଦ୍ୟୁତ୍ କାଟ୍ ରିପୋର୍ଟ ହୋଇନଥିଲା। ତାଙ୍କ ପ୍ରଶାସନ ସୁଲଭ ଏବଂ ନିରବଚ୍ଛିନ୍ନ ବିଦ୍ୟୁତ୍ ଯୋଗାଣ ଉପରେ ଧ୍ୟାନ ଦେଇଥିଲା ଏବଂ ଏହି ସମୟ ମଧ୍ୟରେ କୌଣସି ବ୍ୟାପକ ବିଦ୍ୟୁତ୍ ବିଭ୍ରାଟ ହୋଇନଥିଲା। ଯୋଜନାବଦ୍ଧ ଭାବରେ ଛୋଟ ଛୋଟ ହ୍ରାସ କରାଯାଇପାରେ, କିନ୍ତୁ କୌଣସି ବଡ଼ ସମସ୍ୟା ନଥିଲା। ତା’ପରେ ଉପଭୋକ୍ତା ଗ୍ରୋକଙ୍କୁ ପଚାରିଲେ, ବର୍ତ୍ତମାନ ହେଉଥିବା ବିଦ୍ୟୁତ୍ କାଟ ଏବଂ ଅଗ୍ନିକାଣ୍ଡ ସମୟରେ ହୋଇଥିବା ବିଦ୍ୟୁତ୍ କାଟ ମଧ୍ୟରେ କୌଣସି ପାର୍ଥକ୍ୟ ଅଛି କି? ଏହା ଉପରେ, AI କହିଛି, ବର୍ତ୍ତମାନ ଦିଲ୍ଲୀରେ ବିଦ୍ୟୁତ୍ କାଟ୍ ଅଧିକ ଅନୁଭୂତ ହେଉଛି, କିଛି ସ୍ଥାନରେ 12-13 ଘଣ୍ଟା ପର୍ଯ୍ୟନ୍ତ, ଯାହା ଆତିଶୀଙ୍କ ସମୟରେ (21 ସେପ୍ଟେମ୍ବର 2024 – 8 ଫେବୃଆରୀ 2025) ନଥିଲା। ତାଙ୍କ କାର୍ଯ୍ୟକାଳ ମଧ୍ୟରେ କୌଣସି ବଡ଼ କାଟଛାଣ୍ଟ ହୋଇନଥିଲା, କେବଳ ଛୋଟ, ଯୋଜନାବଦ୍ଧ କାଟଛାଣ୍ଟ ହୋଇଥିଲା। ବର୍ତ୍ତମାନ କଟକଣାଗୁଡ଼ିକ ଅଣଯୋଜନାମୂଳକ ଏବଂ ଗମ୍ଭୀର, ବିଶେଷକରି ମାର୍ଚ୍ଚ 2025 ରେ।

ବୟସ ୮୦ ସାଙ୍ଗକୁ ଦିବ୍ୟାଙ୍ଗ, ତଥାପି ମିଳୁନି ବର୍ଦ୍ଧିତ ଭତ୍ତା

ନନ୍ଦିଘୋଷ ବ୍ୟୁରୋ: ବୟସ ୮୦, ସେଥିରେ ପୁଣି ଭିନ୍ନକ୍ଷମ । କିନ୍ତୁ ମିଳୁନାହିଁ ବର୍ଦ୍ଧିତ ଭତ୍ତା । ବର୍ଦ୍ଧିତ ଭତ୍ତା ପାଇଁ ସରକାରୀ ବାବୁ ମାନଙ୍କୁ ଗୁହାରି କରି ନୟାନ୍ତ ହେଲେଣି।  ଶେଷରେ ଉପଜିଲ୍ଲାପାଳଙ୍କୁ ଭେଟି ଦାବି ଜଣାଇଛନ୍ତି ପରଜଙ୍ଗ ବ୍ଲକ ମୁକ୍ତାପଶି ଗାଁର ରେଣୁସାହୁ । ବୟସ  ୮୦ ଉପରେ ହୋଇଥିବା ବେଳେ ଜନ୍ମ ରୁ ଗୋଟିଏ ଗୋଡ଼ ଅକ୍ଷମ । ଠିକରେ ଚାଲିପାରୁନଥିବା ବେଳେ ବୃଦ୍ଧା ବୟସରେ ଭତ୍ତା ପାଇଁ ଏ ଅଫିସରୁ ସେ ଅଫିସ ଦୌଡୁଛନ୍ତି । ପୁଅ ଭରତ ସାହୁ ବୋହିବୋହି ରେଣୁଙ୍କୁ ପଞ୍ଚାୟତ ଠାରୁ ବ୍ଲକ ଯାଏଁ ଧାଇଁ ଧାଇଁ ନିରାଶ ହେବା ପରେ କାମାକ୍ଷାନଗର ଉପଜିଲ୍ଲାପାଳଙ୍କୁ ଭେଟି ବର୍ଦ୍ଧିତ ଭତ୍ତା ପାଇଁ ଦାବି ଜଣାଇଛନ୍ତି । ବର୍ତମାନ ୧୨୦୦ ଟଙ୍କା ଭତ୍ତା ପାଉଥିବା ବେଳେ ବର୍ଦ୍ଧିତ ଭାବରେ ୩୫୦୦ ଟଙ୍କା ପାଇଁ ଦାବି କରିଛନ୍ତି  । ତୁରନ୍ତ ଭତ୍ତା ବ୍ୟବସ୍ଥା କରାଇବାକୁ ଗୁହାରି କରିଛନ୍ତି ପୁଅ ଭରତ ସାହୁ । ତେବେ ତୁରନ୍ତ ବୃଦ୍ଧା ଜଣକ କିପରି ଭତ୍ତା ପାଇ ପାରିବେ ସେ ନେଇ ପ୍ରତିଶୃତି ଦେଇଛନ୍ତି କାମାକ୍ଷାନଗର ଉପଜିଲ୍ଲାପାଳ ଦିନମଣୀ ନାୟକ ।

VRS ନେଲେ ସୁଜାତା ରାଉତ କାର୍ତ୍ତିକେୟନ

ନନ୍ଦିଘୋଷ ବ୍ୟୁରୋ: ୨୦୦୦ ମସିହାର ଆଇଏଏସ ଅଧିକାରୀ ତଥା ଅର୍ଥ ବିଭାଗର ସ୍ବତନ୍ତ୍ର ସଚିବ ସୁଜାତା ରାଉତ କାର୍ତ୍ତିକେୟନ ଆଗୁଆ ଅବସର ନେଇଛନ୍ତି । ତାଙ୍କ ଆଗୁଆ ଅବସର ଆବେଦନକୁ ଗତକାଲି କେନ୍ଦ୍ର ସରକାର ମଞ୍ଜୁର କରିଛନ୍ତି । ଶ୍ରୀମତୀ କାର୍ତ୍ତିକେୟନ ଦୁଇ ହଜାର ମସିହା ପରଠାରୁ ନବରଙ୍ଗପୁର ଉପଜିଲ୍ଲାପାଳରୁ ଆରମ୍ଭ କରି ସୁନ୍ଦରଗଡ଼ ଓ କଟକର ଜିଲ୍ଲାପାଳ ଭାବେ ଜିଲ୍ଲାସ୍ତରରେ କାମ କରି ବେଶ ସୁନାମ ଅର୍ଜନ କରିଥିଲେ ।୨୦୦୭ରୁ ୨୦୦୮ ପର୍ଯ୍ୟନ୍ତ ସେ ଥିଲେ କଟକର ପ୍ରଥମ ମହିଳା ଜିଲ୍ଲାପାଳ । ପରବର୍ତ୍ତୀ ସମୟରେ ସେ ମିଶନ ଶକ୍ତିର ନିର୍ଦ୍ଦେଶିକା ଭାବେ ବେଶ ଆଦୃତି ଲାଭ କରିଥିଲେ । ଓଡ଼ିଶାର ୭୦ ଲକ୍ଷ ମିଶନ ଶକ୍ତି ମହିଳାଙ୍କୁ ଦିଗଦର୍ଶନ ଦେବା କ୍ଷେତ୍ରରେ ତାଙ୍କର ଅବଦାନ ବେଶ ଉଲ୍ଲେଖନୀୟ ଥିଲା । ମିଶନ ଶକ୍ତି ନୂଆ ବିଭାଗ ହେବା ପରେ ସେ ସେହି ବିଭାଗର କମିଶନର ତଥା ସଚିବ ଭାବେ ଦାୟିତ୍ବ ତୁଲାଇଥିଲେ । ମହିଳା ଓ ଶିଶୁ କଲ୍ଯାଣ ବିଭାଗର ସଚିବ ତଥା କମିଶନର ଦାୟିତ୍ବ ସାଙ୍ଗକୁ ତାଙ୍କୁ ଓଡ଼ିଆ ଭାଷା ସାହିତ୍ଯ ଓ ସଂସ୍କୃତି ବିଭାଗର ସଚିବ ଦାୟିତ୍ବ ମଧ୍ଯ ନିର୍ବାହ କରିଥିଲେ । ୨୦୨୪ ମସିହାରେ ତାଙ୍କ ନେତୃତ୍ବରେ ଓଡ଼ିଆ ଭାଷା ସାହିତ୍ଯ ଓ ସଂସ୍କୃତି ବିଭାଗ ପ୍ରଥମ ବିଶ୍ବ ଓଡିଆ ଭାଷା ସମ୍ମିଳନୀ ସଫଳତାର ସହ ଆୟୋଜନ କରିଥିଲା । ୨୫ ବର୍ଷର ଆଇଏଏସ କ୍ଯାରିଅର ପରେ ବ୍ଯକ୍ତିଗତ କାରଣ ଯୋଗୁଁ ସେ ଆଗୁଆ ଅବସର ଗ୍ରହଣ କରିଛନ୍ତି । ଦେଢ ବର୍ଷ ତଳେ ତାଙ୍କ ସ୍ବାମୀ ଭି. କାର୍ତ୍ତିକ ପାଣ୍ଡିଆନ ମଧ୍ଯ ଆଇଏଏସରୁ ଅବସର ନେଇଥିଲେ । ସୁଜାତା କାର୍ତ୍ତିକେୟନଙ୍କ ନିଜ ଘର କେନ୍ଦ୍ରାପଡ଼ା ଜିଲ୍ଲାରେ ।