spot_img
Home Blog Page 1151

ମେଘନାଦ ପାଚେରୀରେ ମଗରମୁଣ୍ଡ ଭଙ୍ଗାଯିବା ଘଟଣା : ସ୍ପଷ୍ଟୀକରଣ ରଖିଲେ ଜିଲ୍ଲାପାଳ

ନନ୍ଦିଘୋଷ ବ୍ୟୁରୋ : ଶ୍ରୀମନ୍ଦିର ଦକ୍ଷିଣ ଦ୍ବାର ମେଘନାଦ ପାଚେରୀରେ ଲାଗିଥିବା ମଗରମୁଣ୍ଡକୁ ଭାଙ୍ଗି ଦିଆଯିବା ଘଟଣା । ପ୍ରତିକ୍ରିୟା ରଖିଲେ ପୁରୀ ଜିଲ୍ଲାପାଳ ସିଦ୍ଧାର୍ଥ ଶଙ୍କର ସ୍ବାଇଁ । ଶ୍ରୀମନ୍ଦିରରୁ ଜଳ ନିଷ୍କାସନ ନେଇ ସମସ୍ୟା ହେବାରୁ ଏହାକୁ ଭଙ୍ଗା ଯାଇଛି ବୋଲି ସ୍ପଷ୍ଟୀକରଣ ରଖିଛନ୍ତି ଜିଲ୍ଲାପାଳ । ପରବର୍ତ୍ତୀ ସମୟରେ ଏହାକୁ ପୁନର୍ବାର ଯଥା ସ୍ଥାନରେ ସ୍ଥାପିତ କରାଯିବ । ଶ୍ରୀମନ୍ଦିର ପ୍ରଶାସନ ନିର୍ଦ୍ଦେଶ କ୍ରମେ ଇଞ୍ଜିନିୟର ମାନେ ତାକୁ ଭାଙ୍ଗି ମରାମତି କାର୍ଯ୍ୟ କରୁଥିବା କହିଛନ୍ତି ଜିଲ୍ଲାପାଳ।

ଗତକାଲି ମଗରମୁଣ୍ଡ ଭଙ୍ଗା ଯିବା ଘଟଣାକୁ ନେଇ ସେବାୟତ ମହଲରେ ତୀବ୍ର ଅସନ୍ତୋଷ ପ୍ରକାଶ ପାଇଥିଲା। ଶ୍ରୀମନ୍ଦିର ମେଘନାଦ ପାଚେରୀରେ ଥିବା ମଗର ମୁଣ୍ଡକୁ ଭଙ୍ଗାଯାଇ ସେଠାରେ ଏକ ବଡ଼ ପାଇପ ସଂଯୋଗ କରାଯାଇଛି । ସେହି ପାଇପ ବାଟେ ମନ୍ଦିର ଭିତରର ବର୍ଜ୍ୟ ଜଳ ନିଷ୍କାସିତ ହେଉଥିବା ଦେଖିବାକୁ ମିଳୁଛି  । ତେବେ ପୁରୁଣା କୀର୍ତ୍ତିରାଜିକୁ ଭାଙ୍ଗି ଏପରି ନିର୍ମାଣ କରିବା କେତେଦୂର ଯଥାର୍ଥ ତାହାକୁ ନେଇ ସେବାୟତ ମହଲରେ କ୍ଷୋଭ ପ୍ରକାଶ ପାଇଥିଲା । ଏହାପରେ ଆଜି ଜିଲ୍ଲାପାଳ ସ୍ପଷ୍ଟୀକରଣ ରଖିଛନ୍ତି ।

ପଶ୍ଚିମବଙ୍ଗ ଶିକ୍ଷକ ନିଯୁକ୍ତିରେ କ’ଣ ହୋଇଛି ବଡ ହେରଫେର୍, ଜାଣନ୍ତୁ

ନନ୍ଦିଘୋଷ ବ୍ୟୁରୋ: ପଶ୍ଚିମବଙ୍ଗ ଶିକ୍ଷକ ନିଯୁକ୍ତିରେ ବ୍ୟାପକ ହେରଫେର୍  । ପଶ୍ଚିମବଙ୍ଗ ଶିକ୍ଷକ ନିଯୁକ୍ତିକୁ ସମ୍ପୂର୍ଣ୍ଣ ଭାବରେ ଦାଗୀ ଏବଂ ଦୁର୍ନୀତିଗ୍ରସ୍ତ ବୋଲି ଦର୍ଶାଇ ସୁପ୍ରିମକୋର୍ଟ ୨୫,୭୫୩ ଶିକ୍ଷକ ଏବଂ ଅନ୍ୟାନ୍ୟ କର୍ମଚାରୀଙ୍କ ନିଯୁକ୍ତିକୁ ବାତିଲ କରିଛନ୍ତି  । ସୁପ୍ରିମକୋର୍ଟ କୋଲକତା ହାଇକୋର୍ଟର ନିଷ୍ପତ୍ତିକୁ ସମର୍ଥନ କରିଥିଲେ। ଯେଉଁ ପ୍ରାର୍ଥୀଙ୍କ ନିଯୁକ୍ତିକୁ ଜାଲିଆତି ଭାବରେ ବର୍ଗୀକୃତ କରାଯାଇଛି, ସେମାନଙ୍କୁ ସେମାନଙ୍କର ଦରମା ଫେରାଇବାକୁ ପଡିବ  । ମୁଖ୍ୟମନ୍ତ୍ରୀ ମମତା ବାନାର୍ଜୀ ସୁପ୍ରିମକୋର୍ଟଙ୍କ ଏହି ନିଷ୍ପତ୍ତିର କଡ଼ା ସମାଲୋଚନା କରିଛନ୍ତି। ଏହାକୁ ‘ଘୋର ଅନ୍ୟାୟ’ ବୋଲି ଅଭିହିତ କରି ମମତା ବାନାର୍ଜୀ ଅଭିଯୋଗ କରିଛନ୍ତି ଯେ ଏହି ଶିକ୍ଷକମାନଙ୍କୁ ନିର୍ବାଚନ ଡ୍ୟୁଟି କରିବାରୁ ରୋକିବା ପାଇଁ ଏହା ବିଜେପି ଦ୍ୱାରା ରଚିତ ଏକ ଷଡ଼ଯନ୍ତ୍ର। ସେ ଏହା ମଧ୍ୟ କହିଛନ୍ତି ଯେ , “ମୁଁ  ସୁପ୍ରିମକୋର୍ଟଙ୍କ ଏହି ନିଷ୍ପତ୍ତିକୁ ସମର୍ଥନ କରିପାରିବିନାହିଁ  ।

ମମତା ବାନାର୍ଜୀ ସମ୍ପୂର୍ଣ୍ଣ ନିଯୁକ୍ତି ବାତିଲ ଏବଂ ସମସ୍ତ ପ୍ରାର୍ଥୀଙ୍କୁ ସାମୂହିକ ବହିଷ୍କାର କରାଯିବା ଉପରେ ପ୍ରଶ୍ନ ଉଠାଇଛନ୍ତି । ସେ କହିଛନ୍ତି ଯେ ‘ସମସ୍ତ ନିଯୁକ୍ତ ଶିକ୍ଷକ ଦୋଷୀ ହୋଇପାରିବେ ନାହିଁ।’ ତୁମେ ଯେଉଁମାନଙ୍କୁ ଦୋଷୀ କହୁଛ ସେମାନଙ୍କ ବିରୁଦ୍ଧରେ ଆମ ପାଖରେ କୌଣସି ପ୍ରମାଣ ନାହିଁ। ବିଜେପି ସରକାର କ’ଣ ବଙ୍ଗଳାର ଶିକ୍ଷା ବ୍ୟବସ୍ଥାକୁ ନଷ୍ଟ କରିବାକୁ ଚାହୁଁଛି? ତଥାପି, ସେ କହିଛନ୍ତି ଯେ ରାଜ୍ୟ ସରକାର କୋର୍ଟଙ୍କ ନିଷ୍ପତ୍ତିକୁ କାର୍ଯ୍ୟକାରୀ କରିବେ ଏବଂ ପୁଣି ଥରେ ଚୟନ ପ୍ରକ୍ରିୟାକୁ ପୁନରାବୃତ୍ତି କରିବେ। ତେବେ ଆସନ୍ତୁ

ପଶ୍ଚିମବଙ୍ଗ ସ୍କୁଲ ସେବା ଆୟୋଗ (WBSSC) ସରକାରୀ ଏବଂ ସାହାଯ୍ୟପ୍ରାପ୍ତ ସ୍କୁଲଗୁଡ଼ିକରେ ଶିକ୍ଷକ ଏବଂ ଅଣଶିକ୍ଷକ କର୍ମଚାରୀଙ୍କ ନିଯୁକ୍ତି ପାଇଁ ବିଜ୍ଞପ୍ତି ପ୍ରକାଶ କରିଛି।  ଏହି ପ୍ରକ୍ରିୟା ଶିକ୍ଷକ ଯୋଗ୍ୟତା ପରୀକ୍ଷା (TET) ଆଧାରରେ ଆରମ୍ଭ ହୋଇଥିଲା। ସେହି ସମୟରେ ପାର୍ଥ ଚାଟାର୍ଜୀ ରାଜ୍ୟର ଶିକ୍ଷାମନ୍ତ୍ରୀ ଥିଲେ।

୨୦୧୬: ନିଯୁକ୍ତି ପ୍ରକ୍ରିୟା ଆରମ୍ଭ ହୋଇଥିଲା

୨୦୧୬ ମସିହାରେ, ଶିକ୍ଷକ ଏବଂ ଅନ୍ୟାନ୍ୟ କର୍ମଚାରୀଙ୍କ ପାଇଁ ନିଯୁକ୍ତି ପ୍ରକ୍ରିୟା ଆରମ୍ଭ ହୋଇଥିଲା ଯାହା ମାଧ୍ୟମରେ ମୋଟ ୨୪,୬୪୦ ପଦବୀ ପୂରଣ ହେବାର ଥିଲା  । ୨୩ ଲକ୍ଷରୁ ଅଧିକ ପ୍ରାର୍ଥୀ ଆବେଦନ କରିଥିଲେ। ପରୀକ୍ଷାଟି OMR ସିଟ୍ ଆଧାରରେ କରାଯାଇଥିଲା, କିନ୍ତୁ ପରେ ହେରଫେର ଅଭିଯୋଗ ଆସିଥିଲା।

୨୭ ନଭେମ୍ବର ୨୦୧୭: ଫଳାଫଳ ଘୋଷଣା

WBSSC ଶିକ୍ଷକ ନିଯୁକ୍ତି ପରୀକ୍ଷାର ଫଳାଫଳ ଘୋଷଣା କଲା ଏବଂ ମେରିଟ୍ ଲିଷ୍ଟ ପ୍ରକାଶ କଲା। ତଥାପି, ଅନେକ ପ୍ରାର୍ଥୀ ଫଳାଫଳରେ ଅନିୟମିତତା ଅଭିଯୋଗ କରିଥିଲେ  ।  ଯେପରିକି କମ୍ ନମ୍ବର ଥିବା ପ୍ରାର୍ଥୀମାନେ ଅଧିକ ରାଙ୍କ୍ ପାଇଛନ୍ତି ଏବଂ ଯେଉଁମାନେ TET ପାସ୍ କରିନାହାଁନ୍ତି ସେମାନେ ଚାକିରି ପାଇଛନ୍ତି । ବର୍ଷ ଶେଷ ସୁଦ୍ଧା, ବିଫଳ ପ୍ରାର୍ଥୀମାନେ ଫଳାଫଳରେ ହେରଫେର ଅଭିଯୋଗ ବିରୋଧରେ ରାଜ୍ୟବ୍ୟାପୀ ପ୍ରତିବାଦ ଆରମ୍ଭ କରିଥିଲେ । ଅନେକ କୋଲକାତା ହାଇକୋର୍ଟରେ ଆବେଦନ ଦାଖଲ କରିଥିଲେ।

୨୨ ଜୁଲାଇ ୨୦୨୨: ତତ୍କାଳୀନ ଶିକ୍ଷାମନ୍ତ୍ରୀ ପାର୍ଥ ଚାଟାର୍ଜୀଙ୍କ ଗିରଫଦାରୀ

ଏପ୍ରିଲ ୨୦୨୨ରେ, କୋଲକାତା ହାଇକୋର୍ଟ ନିଯୁକ୍ତି ପ୍ରକ୍ରିୟାରେ ଅନିୟମିତତାର ତଦନ୍ତ କରିବାକୁ ସିବିଆଇକୁ ନିର୍ଦ୍ଦେଶ ଦେଇଥିଲା ।  ଅନ୍ୟପକ୍ଷରେ, ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ମନି ଲଣ୍ଡରିଂର ଦିଗଗୁଡ଼ିକର ତଦନ୍ତ ଆରମ୍ଭ କରିଥିଲା।  ଯେଉଁଥିରେ କି ପାର୍ଥ ଏବଂ ଅର୍ପିତାଙ୍କ ମଧ୍ୟରେ ଆର୍ଥିକ କାରବାରର ପ୍ରମାଣ ପାଇଥିଲା। ଅର୍ପିତାଙ୍କ ଘରୁ ଉଦ୍ଧାର ହୋଇଥିବା 21 କୋଟି ଟଙ୍କାକୁ ଠକେଇର ଆୟ ବୋଲି ବିବେଚନା କରାଯାଇଥିଲା। ଜୁଲାଇ ୨୨ ତାରିଖରେ ତତ୍କାଳୀନ ଶିକ୍ଷାମନ୍ତ୍ରୀ ପାର୍ଥ ଚାଟାର୍ଜୀଙ୍କୁ ଗିରଫ କରାଯାଇଥିଲା। ସିବିଆଇ ଏବଂ ଇଡି ଅନ୍ୟ ରାଜନେତା ଏବଂ ଅଧିକାରୀମାନଙ୍କୁ ମଧ୍ୟ ପଚରାଉଚରା କରିଥିଲେ  ।

୨୨ ଏପ୍ରିଲ ୨୦୨୪: କୋଲକାତା ହାଇକୋର୍ଟର ପ୍ରମୁଖ ନିଷ୍ପତ୍ତି

କୋଲକାତା ହାଇକୋର୍ଟ ୨୦୧୬ ନିଯୁକ୍ତି ପ୍ରକ୍ରିୟାରେ ୨୫,୭୫୩ ନିଯୁକ୍ତିକୁ ବାତିଲ କରିଦେଇଥିଲେ। OMR ସିଟ୍‌ରେ ହେରଫେର ଏବଂ ରାଙ୍କ ଜମ୍ପିଂର ପ୍ରମାଣ ପାଇ କୋର୍ଟ ଏହାକୁ “ବ୍ୟବସ୍ଥିତ ଠକେଇ” ବୋଲି କହିଛନ୍ତି। ହାଇକୋର୍ଟ ଜାଣିପାରିଥିଲେ ଯେ କେବଳ ୨୪,୬୪୦ ପଦବୀ ପାଇଁ ନିଯୁକ୍ତି କରାଯିବାକୁ ଥିବା ବେଳେ, ମୋଟ ୨୫,୭୫୩ ନିଯୁକ୍ତି ପତ୍ର ପ୍ରଦାନ କରାଯାଇଥିଲା। କୋର୍ଟ ବେଆଇନ ଭାବରେ ନିଯୁକ୍ତି ପାଇଥିବା କର୍ମଚାରୀଙ୍କୁ ୧୨% ସୁଧ ସହିତ ଦରମା ଏବଂ ସୁବିଧା ଫେରାଇବାକୁ ନିର୍ଦ୍ଦେଶ ଦେଇଥିଲେ।

୭ ମଇ ୨୦୨୪: ସୁପ୍ରିମକୋର୍ଟଙ୍କ ଦ୍ୱାରା ମଧ୍ୟବର୍ତ୍ତୀକାଳୀନ ସ୍ଥଗିତାଦେଶ।

ପଶ୍ଚିମବଙ୍ଗ ସରକାର ହାଇକୋର୍ଟର ନିଷ୍ପତ୍ତିକୁ ସୁପ୍ରିମକୋର୍ଟରେ ଚ୍ୟାଲେଞ୍ଜ କରିଥିଲେ। ସୁପ୍ରିମକୋର୍ଟ ନିଯୁକ୍ତି ବାତିଲ ଉପରେ ମଧ୍ୟବର୍ତ୍ତୀକାଳୀନ ସ୍ଥଗିତାଦେଶ ଜାରି କରିଥିଲେ, କିନ୍ତୁ ସିବିଆଇକୁ ତଦନ୍ତ ଜାରି ରଖିବାକୁ ଅନୁମତି ଦେଇଥିଲେ। କୋର୍ଟ କହିଛନ୍ତି ଯେ ଆଇନଗତ ଏବଂ ଅବୈଧ ନିଯୁକ୍ତି ମଧ୍ୟରେ ପାର୍ଥକ୍ୟ କରିବା ଆବଶ୍ୟକ  ।

୧୯ ଡିସେମ୍ବର ୨୦୨୪: ସୁପ୍ରିମକୋର୍ଟରେ ଶୁଣାଣି ଆରମ୍ଭ

ସୁପ୍ରିମକୋର୍ଟ ମାମଲାର ବିସ୍ତୃତ ଶୁଣାଣି ଆରମ୍ଭ କଲେ । ରାଜ୍ୟ ସରକାର ଏବଂ ପ୍ରଭାବିତ କର୍ମଚାରୀଙ୍କ ସମେତ ଅନେକ ପକ୍ଷଙ୍କ ଆବେଦନ ଉପରେ ଶୁଣାଣି କରାଯାଇଥିଲା।

୩୧ ଜାନୁଆରୀ ୨୦୨୫: ଇଡି ଚାର୍ଜସିଟ୍

ଇଡି ୨୦ ଜଣଙ୍କ ବିରୁଦ୍ଧରେ ଚାର୍ଜସିଟ୍ ଦାଖଲ କରିଥିଲା ​​ଏବଂ ୧୬୩ କୋଟି ଟଙ୍କାର ସମ୍ପତ୍ତି ଜବତ କରିଥିଲା। ମଧ୍ୟସ୍ଥି ପ୍ରସନ୍ନ ରାୟ ଏବଂ ତାଙ୍କ କମ୍ପାନୀ ଏଥିରେ ସାମିଲ ଥିଲେ।

୧୦ ଫେବୃଆରୀ ୨୦୨୫: ରାୟ ସଂରକ୍ଷିତ ରହିଲା

ସୁପ୍ରିମକୋର୍ଟ ଏହି ମାମଲାରେ ତାଙ୍କର ରାୟ ସଂରକ୍ଷିତ ରଖିଲେ। କୋର୍ଟ ନିଯୁକ୍ତି ପ୍ରକ୍ରିୟାର ବିଶ୍ୱସନୀୟତା ଉପରେ ପ୍ରଶ୍ନ ଉଠାଇଥିଲେ ଏବଂ ଜାଲିଆତିର ପ୍ରମାଣକୁ ବିଚାର କରିଥିଲେ।

୩ ଏପ୍ରିଲ ୨୦୨୫: ସୁପ୍ରିମକୋର୍ଟଙ୍କ ଚୂଡ଼ାନ୍ତ ନିଷ୍ପତ୍ତି

ସୁପ୍ରିମକୋର୍ଟ କଲିକତା ହାଇକୋର୍ଟର ନିଷ୍ପତ୍ତିକୁ ସମର୍ଥନ କରିଥିଲେ  । ଏବଂ ୨୫,୭୫୩ ନିଯୁକ୍ତିକୁ ବାତିଲ କରିଥିଲେ। ଏହାକୁ ଏକ “ବ୍ୟବସ୍ଥିତ ଠକେଇ” ବୋଲି ଅଭିହିତ କରି କୋର୍ଟ କହିଛନ୍ତି ଯେ ଏହି ପ୍ରକ୍ରିୟାରେ ବଡ଼ ଧରଣର ହେରଫେର ହୋଇଛି। ରାଜ୍ୟ ସରକାରଙ୍କୁ 3 ମାସ ମଧ୍ୟରେ ନୂତନ ନିଯୁକ୍ତି ପ୍ରକ୍ରିୟା ଆରମ୍ଭ କରିବାକୁ ନିର୍ଦ୍ଦେଶ ଦିଆଯାଇଥିଲା। ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁଯାୟୀ, ରାଜ୍ୟ ସରକାରଙ୍କୁ ଜୁଲାଇ 2025 ସୁଦ୍ଧା ନୂତନ ନିଯୁକ୍ତି ପ୍ରକ୍ରିୟା ସମାପ୍ତ କରିବାକୁ ପଡିବ। ପୂର୍ବ ଅଭିଜ୍ଞତାରୁ ଶିକ୍ଷା ନେଇ ଏହି ପ୍ରକ୍ରିୟା ସ୍ୱଚ୍ଛ ଏବଂ ନିରପେକ୍ଷ ହେବ ବୋଲି ଆଶା କରାଯାଉଛି ବୋଲି ସୁପ୍ରିମକୋର୍ଟ କହିଛି  ।

ଏହା କ’ଣ ୨୦୨୬ ପଶ୍ଚିମବଙ୍ଗ ବିଧାନସଭା ନିର୍ବାଚନକୁ ପ୍ରଭାବିତ କରିବ?

ଶିକ୍ଷକ ନିଯୁକ୍ତି ଦୁର୍ନୀତିର ପ୍ରଭାବ ଆସନ୍ତା ବର୍ଷ ହେବାକୁ ଥିବା ବିଧାନସଭା ନିର୍ବାଚନରେ ​​ମଧ୍ୟ ପଡ଼ିବାର ଆଶା କରାଯାଉଛି। କିଛି ଲୋକଙ୍କ ବିଶ୍ୱାସ ଯେ ଏହି ଠକେଇ ମମତା ବାନାର୍ଜୀଙ୍କ ତୃଣମୂଳ କଂଗ୍ରେସ (TMC) ସରକାରଙ୍କ ବିଶ୍ୱସନୀୟତା ଉପରେ ଗଭୀର ପ୍ରଭାବ ପକାଇପାରେ । ବିରୋଧୀ ଦଳଗୁଡ଼ିକ, ବିଶେଷକରି ବିଜେପି, ଏହାକୁ 2026 ବିଧାନସଭା ନିର୍ବାଚନରେ ​​ଏକ ପ୍ରମୁଖ ପ୍ରସଙ୍ଗ କରିପାରନ୍ତି।

ରାଷ୍ଟ୍ରପତିଙ୍କ ଅନୁମୋଦନ ଅପେକ୍ଷାରେ ୱାକଫ ସଂଶୋଧନ ବିଲ୍, ଆଇନରେ ପରିଣତ ହେଲେ ବଦଳିବ ଅନେକ ନିୟମ

ନନ୍ଦିଘୋଷ ବ୍ୟୁରୋ : ବାଦବିବାଦ ମଧ୍ୟରେ ଉଭୟ ଲୋକସଭା ଓ ରାଜ୍ୟସବାରେ ଗୃହୀତ ହେଲା ଓ୍ବାକଫ ସଂଶୋଧନ ବିଲ୍ ୨୦୨୪ । ଗତ ଏପ୍ରିଲ ୨ ତାରିଖରେ ଲୋକସଭାରେ ଏହି ବିଲ୍ ଗୃହୀତ ହୋଇଥିବାବେଳେ ୩ ତାରିଖରେ ରାଜ୍ୟସଭାରେ ବିଲକୁ ମିଳିଥିଲା ସ୍ବୀକୃତି । ବିଲ୍ ପ୍ରସଙ୍ଗରେ ଉଭୟ ଗୃହରେ ହୋଇଥିଲା ଦୀର୍ଘ ବିତର୍କ । ଲୋକସଭାରେ ବିଲ୍ ସପକ୍ଷରେ ୨୮୮ ଓ ବିପକ୍ଷରେ ୨୩୨ ଭୋଟି ମିଳିଥିଲା । ସେହିଭଳି ରାଜ୍ୟସଭାରେ ବିଲ୍ ସପକ୍ଷରେ ୧୨୮ ଓ ବିପକ୍ଷରେ ୯୫ ଭୋଟ ପଡିଥିଲା । ଉଭୟ ସଦନରେ ବିଲ୍ ଗୃହୀତ ହେବା ପରେ ଏହାକୁ ମଞ୍ଜୁରୀ ଲାଗି ରାଷ୍ଟ୍ରପତିଙ୍କ ନିକଟକୁ ପଠାଯିବ । ଫଳରେ ଓ୍ବାକଫ ଆଇନ ୧୯୯୫ ବଦଳରେ ନୂଆ ଆଇନ କାର୍ଯ୍ୟକାରୀ ହେବ ।

ସେପଟେ ୱାକଫ ସଂଶୋଧନ ବିଲକୁ ଅସାମ୍ବିଧାନିକ ଦର୍ଶାଇ ସୁପ୍ରିମକୋର୍ଟଙ୍କ ଦ୍ବାରସ୍ଥ ହେବ କଂଗ୍ରେସ। ଦଳର ନେତା ଜୟରାମ ରମେଶ କହିଛନ୍ତି ବିଲ୍ ବିରୋଧରେ ସୁପ୍ରିମକୋର୍ଟ ଯିବ କଂଗ୍ରେସ। ସେ କହିଛନ୍ତି- ଆଇନ ବିଶାରଦଙ୍କ ସହ ଆଲୋଚନା ପରେ ଏହି ବିଲ୍ ବିରୋଧରେ ଦଳ ସୁପ୍ରିମକୋର୍ଟ ଯିବ। ସେହିପରି ଦଳର ବରିଷ୍ଠ ନେତା ଅଭିଷେକ ମନୁ ସିଂଘଭି ମଧ୍ୟ ବିଲକୁ ବିରୋଧ କରିବା ସହ ଏହା ଅସାମ୍ବିଧାନିକ ବୋଲି ଦର୍ଶାଇଛନ୍ତି। ଅନ୍ୟପକ୍ଷେ ବିଲ୍ ପ୍ରତିବାଦରେ ଦେଶର ବିଭିନ୍ନ ସ୍ଥାନରେ ଜାରି ରହିଛି ବିକ୍ଷୋଭ ।

କ’ଣ ହେବ ନୂଆ ଆଇନର ରୂପ ?

  • ଓ୍ବାକଫ ସମ୍ପତ୍ତି ପରିଚାଳନା ଲାଗି ଏକ ସେଣ୍ଟ୍ରାଲାଇଜଡ୍ ପୋର୍ଟାଲ ହେବ
  • ଓ୍ବାକଫ ବୋର୍ଡରେ ସ୍ବଚ୍ଛତା ରଖିବା ଲାଗି ପଦକ୍ଷେପ ନିଆଯିବ
  • ଅତିକମରେ ୫ ବର୍ଷ ମୁସଲିମ ଧର୍ମରେ ଦୀକ୍ଷିତ ବ୍ୟକ୍ତି ସମ୍ପତ୍ତି ଦାନ କରିପାରିବେ
  • ସମ୍ପତ୍ତି ଦାନ କରିବା ପୂର୍ବରୁ ମହିଳାମାନେ ନିଜର ଉତ୍ତରାଧିକାରୀତ୍ବ ହାସଲ କରିବେ
  • ବିଧବା, ଛାଡପତ୍ର ପାଇଥିବା ମହିଳା ଓ ଅନାଥଙ୍କ ଲାଗି ସ୍ବତନ୍ତ୍ର ନିୟମ
  • ଓ୍ବାକଫ ଅଧୀନରେ ଥିବା ସରକାରୀ ସମ୍ପତ୍ତିର ତଦନ୍ତ ହେବ
  • ସମ୍ପତ୍ତିର ତଦନ୍ତ କରିବେ ଜିଲ୍ଲାପାଳସ୍ତରୀୟ ଅଫିସର
  • କେନ୍ଦ୍ର ଓ ରାଜ୍ୟ ଓ୍ବାକଫ ବୋର୍ଡରେ ଅଣମୁସଲିମମାନେ ରହିବେ
  • ଓ୍ବାକଫ ବୋର୍ଡର ସଦସ୍ୟ ସଂଖ୍ୟା ରହିବ ୨୨, ସେଥିରୁ ୪ ଜଣ ଅଣମୁସଲିମ
  • ଓ୍ବାକଫ ବିବାଦର ସମାଧାନ ଲାଗି ଟ୍ରିବୁନାଲ ଗଠନ ହେବ
  • କେନ୍ଦ୍ର ଓ ରାଜ୍ୟ ଓ୍ବାକଫ ବୋର୍ଡରେ ୨ ଜଣ ଲେଖାଏଁ ମୁସଲିମ୍ ମହିଳା ସଦସ୍ୟ ରହିବେ
  • ରାଜ୍ୟ ବୋର୍ଡରେ ଜଣେ ମୁସଲିମ୍ ଓବିସି ସଦସ୍ୟ ରହିବେ
  • ଆଗାଖାନୀ ଓ ବୋହରା ସମ୍ପ୍ରଦାୟ ଲାଗି ରାଜ୍ୟ ସରକାର ସ୍ବତନ୍ତ୍ର ଓ୍ବାକଫ ବୋର୍ଡ ଗଠନ କରିବେ
  • ପଞ୍ଜୀକୃତ ଓ୍ବାକଫଗୁଡିକ ସ୍ବୀକୃତି ପାଇବେ
  • ପୋର୍ଟାଲ ଜରିଆରେ ଅନଲାଇନ ପଞ୍ଜିକରଣ ପ୍ରକ୍ରିୟା ଚାଲିବ
  • ସେଣ୍ଟ୍ରାଲ ପୋର୍ଟାଲରେ ଓ୍ବାକଫ ବୋର୍ଡର ସମ୍ପତ୍ତି ତାଲିକା ଅପଲୋଡ କରିବ
  • ଓ୍ବାକଫ ଢାଞ୍ଚାରେ ମୁସଲିମ ଟ୍ରଷ୍ଟ ବି ଚାଲିବ
  • ଓ୍ବାକଫ ଅଲାଲ ଔଲାଦର ଆୟ ବିଧବା, ଡିଭୋର୍ସୀ ଓ ଅନାଥଙ୍କ ଲାଗି ଖର୍ଚ୍ଚ ହେବ
  • ଟ୍ରିବୁନାଲ ରାୟରେ ଅସନ୍ତୁଷ୍ଟ ଲୋକ ହାଇକୋର୍ଟ ଯାଇପାରିବେ
  • ଓ୍ବାକଫ ସମ୍ପର୍ତ୍ତିର ଅନଲାଇନ ପଞ୍ଜିକରଣ ସାର୍ଟିଫିକେଟ ପୋର୍ଟାଲରୁ ଉପଲବ୍ଧ ହେବ

ମୋଦି-ୟୁନୁସ ଭେଟଘାଟ : ପୂରଣ ହେଲା ୟୁନୁସଙ୍କ ଦୀର୍ଘଦିନର ଇଚ୍ଛା, ଏହି ସାକ୍ଷାତ କାହିଁକି ଗୁରୁତ୍ୱପୂର୍ଣ୍ଣ ଜାଣନ୍ତୁ…

ବାଂଲାଦେଶ ମୁଖ୍ୟ ମହମ୍ମଦ ୟୁନୁସଙ୍କ ବହୁଦିନର ଇଚ୍ଛା ପୂରଣ ହୋଇଛି। ଭାରତ-ବାଂଲାଦେଶ ସମ୍ପର୍କରେ ତିକ୍ତତା ମଧ୍ୟରେ, ବ୍ୟାଙ୍କକ ମାଟିରେ ପ୍ରଧାନମନ୍ତ୍ରୀ ମୋଦି ଏବଂ ମହମ୍ମଦ ୟୁନୁସଙ୍କ ମଧ୍ୟରେ ଏକ ବୈଠକ ହୋଇଛି। ଥାଇଲ୍ୟାଣ୍ଡରେ ଅନୁଷ୍ଠିତ BIMSTEC ସମ୍ମିଳନୀ ଅବସରରେ ପ୍ରଧାନମନ୍ତ୍ରୀ ମୋଦି ଏବଂ ମହମ୍ମଦ ୟୁନୁସଙ୍କ ମଧ୍ୟରେ ଏକ ଦ୍ୱିପାକ୍ଷିକ ବୈଠକ ହୋଇଥିଲା। କାରଣ ଶେଖ ହସିନାଙ୍କ ସରକାର ଯିବା ପରେ ଏହା ଦୁଇ ଦେଶ ମଧ୍ୟରେ ପ୍ରଥମ ଦ୍ୱିପାକ୍ଷିକ ବୈଠକ ଥିଲା।

ପ୍ରକୃତରେ, ବାଂଲାଦେଶର ମଧ୍ୟବର୍ତ୍ତୀକାଳୀନ ସରକାରଙ୍କ ମୁଖ୍ୟ ପରାମର୍ଶଦାତା ମହମ୍ମଦ ୟୁନୁସଙ୍କ ଦୀର୍ଘଦିନର ଇଚ୍ଛା ଶେଷରେ ପୂରଣ ହୋଇଛି। ସେ ପ୍ରଧାନମନ୍ତ୍ରୀ ମୋଦୀଙ୍କୁ ଭେଟିବାକୁ ଚାହୁଁଥିଲେ। ଦୁଇ ଦେଶ ମଧ୍ୟରେ ତିକ୍ତତା ଯୋଗୁଁ ଏହି ବୈଠକକୁ ନେଇ ସସପେନ୍ସ ରହିଥିଲା। କିନ୍ତୁ ପଡ଼ୋଶୀମାନଙ୍କ ସହିତ ଭଲ ସମ୍ପର୍କର ସମର୍ଥନ କରୁଥିବା ଭାରତ ବାଂଲାଦେଶର ମତକୁ ଗ୍ରହଣ କରି ଦ୍ୱିପାକ୍ଷିକ ବୈଠକ ପାଇଁ ରାଜି ହୋଇଥିଲା। ଏହି କାରଣରୁ ଆଜି ଅର୍ଥାତ୍ ୪ ଏପ୍ରିଲ ୨୦୨୫ରେ, ଥାଇଲ୍ୟାଣ୍ଡର ବ୍ୟାଙ୍କକରେ ଅନୁଷ୍ଠିତ BIMSTEC ଶିଖର ସମ୍ମିଳନୀ ସମୟରେ ୟୁନୁସ୍ ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ଭେଟିଛନ୍ତି।

ଏହି ସାକ୍ଷାତ କାହିଁକି ଗୁରୁତ୍ୱପୂର୍ଣ୍ଣ  ?
ଅଗଷ୍ଟ ୨୦୨୪ରେ ଶେଖ ହସିନା କ୍ଷମତାରୁ ଓହରି ଭାରତରେ ଆଶ୍ରୟ ନେବା ପରେ ଏହି ସାକ୍ଷାତ ଦୁଇ ନେତାଙ୍କ ମଧ୍ୟରେ ପ୍ରଥମ ସାକ୍ଷାତ ଥିଲା। ଏହି ବୈଠକକୁ ଦୁଇ ଦେଶ ମଧ୍ୟରେ ଥିବା ତିକ୍ତତାରେ ଉନ୍ନତି ଆଣିବା ଦିଗରେ ଏକ ଗୁରୁତ୍ୱପୂର୍ଣ୍ଣ ପଦକ୍ଷେପ ବୋଲି ବିବେଚନା କରାଯାଉଛି। ଶେଖ୍ ହାସିନାଙ୍କ ସରକାର ବାଂଲାଦେଶ ଛାଡିବା ପରଠାରୁ, ଭାରତ ସହିତ ବାଂଲାଦେଶର ସମ୍ପର୍କ ଭଲ ନାହିଁ। ମହମ୍ମଦ ୟୁନୁସଙ୍କ ନୀତି ଯୋଗୁଁ ସମ୍ପର୍କ ତିକ୍ତ ହୋଇଯାଇଥିଲା।

ଦୁଇ ଦେଶ ମଧ୍ୟରେ ଦୂର ହେବ କି ତିକ୍ତତା ?

ଶେଖ ହାସିନାଙ୍କ ସରକାରର କ୍ଷମତାଚ୍ୟୁତି ପରେ, ବାଂଲାଦେଶରେ ସଂଖ୍ୟାଲଘୁ ହିନ୍ଦୁ ଙ୍କ ଉପରେ ଆକ୍ରମଣ ଏବଂ ଭାରତ ସହିତ ତିକ୍ତ ସମ୍ପର୍କ ଚର୍ଚ୍ଚାର ବିଷୟ ପାଲଟିଥିଲା। ମହମ୍ମଦ ୟୁନୁସ ପୂର୍ବରୁ ଭାରତକୁ ଶେଖ ହାସିନାଙ୍କ ପ୍ରତ୍ୟର୍ପଣ ପାଇଁ ଦାବି କରିଥିଲା । ଏହି ସମୟରେ, ଏହି ବୈଠକରେ ଉଭୟ ନେତା ପାରସ୍ପରିକ ସହଯୋଗ ଏବଂ ଶାନ୍ତି ଉପରେ ଗୁରୁତ୍ୱାରୋପ କରିଥିଲେ। ୟୁନୁସ ଏବେ ନିକଟରେ ଚୀନ ସହ ଘନିଷ୍ଠତା ବୃଦ୍ଧି କରିଛି, ସେଥିପାଇଁ ଏହି ଭେଟଘାଟ ସ୍ୱତନ୍ତ୍ର ବୋଲି କୁହାଯାଉଝି । ଯାହା ଆଗକୁ ଭାରତ ସପକ୍ଷରେ କାମରେ ଆସିପାରେ । ତେଣୁ ଏହି ଭେଟଘାଟ ତିକ୍ତତା ଦୂର କରିବାରେ ସାହାଯ୍ୟ କରିବ କି ନାହିଁ ତାହା ଦେଖିବା ବାକିରହିଲା ।

ଠିକାଦାରଙ୍କ ଟଙ୍କା ନଦେବାରୁ ସମ୍ପତ୍ତି ଆଟାଚ ନିର୍ଦ୍ଦେଶ ଘଟଣା : ଅଫିସରୁ ସମସ୍ତ ଦାମୀ ଆସବାବପତ୍ର ଗାଏବ

ନନ୍ଦିଘୋଷ ବ୍ୟୁରୋ : ସମ୍ବଲପୁର ବୁର୍ଲାରେ ଠିକାଦାରଙ୍କ ବକେୟା ଟଙ୍କା ନଦେବାରୁ ୩ ଅଫିସର ସମ୍ପତ୍ତି ଜବତ ଆଟାଚ ନିର୍ଦ୍ଦେଶ ଦିଆଯାଇଥିଲା । ବୁର୍ଲାସ୍ଥିତ ଉପର ମହାନଦୀ ଅବବାହିକାର ବେସିନ ମ୍ୟାନେଜର ତଥା ହୀରାକୁଦ ଡ୍ୟାମ ମୁଖ୍ୟଯନ୍ତ୍ରୀଙ୍କ କାର୍ଯ୍ୟାଳୟ, ଡ୍ୟାମ୍ ସର୍କିଲର ସୁପରିଟେଣ୍ଡିଂ ଇଂଜିନିୟରଙ୍କ କାର୍ଯ୍ୟାଳୟ, ସମ୍ବଲପୁର ଇରିଗେସନ ଡିଭିଜନର ଏକଜୁକୁଟିଭ୍ ଇଂଜିନିୟରଙ୍କ ଅଫିସର ଆସବାବପତ୍ର ସିଲ୍ ନେଇ ନିର୍ଦ୍ଦେଶ ହୋଇଥିଲା । କିନ୍ତୁ ସମ୍ପତ୍ତି ଜବତ ପୂର୍ବରୁ ବଦଳିଗଲା ଅଫିସର ନାଁ । ଅଫିସରୁ ସମସ୍ତ ଦାମୀ ଆସବାବପତ୍ର ଗାଏବ । ଘଟଣାକୁ ନେଇ ଅଦାଲତଙ୍କୁ ଜଣାଇବୁ କହିଲେ ଠିକାଦାରଙ୍କ ଓକିଲ ।

୨୦୦୦ ମସିହାରେ ମହାନଦୀ କୂଳରେ ନିର୍ମାଣ ହୋଇଥିବା ରିଂରୋଡର କାର୍ଯ୍ୟର ଟଙ୍କା ନିର୍ମାଣ ସଂସ୍ଥାକୁ ବିଭାଗ ଦେଇ ନଥିଲା। ଯାହାଫଳରେ ଠିକା ସଂସ୍ଥା ବାଧ୍ୟ ହୋଇ କୋର୍ଟର ଦ୍ବାରସ୍ଥ ହୋଇଥିଲେ। ୨୦୧୪ ମସିହାରେ ଠିକାସଂସ୍ଥା କୁ ସମସ୍ତ ଟଙ୍କା ସୁଧ ସହ ଫେରସ୍ତ କରିବା ପାଇଁ କୋର୍ଟ ନିର୍ଦ୍ଦେଶ ଦେଇଥିଲେ।ତେବେ ଜଳ ସମ୍ପଦ ବିଭାଗ ୨୦୨୪ ପର୍ଯ୍ୟନ୍ତ କୌଣସି ଟଙ୍କା ପୈଠ କରି ନଥିଲା।

ତେବେ ଆଜି ମାନ୍ୟବର କୋର୍ଟଙ୍କ ନିର୍ଦ୍ଦେଶ କ୍ରମେ ଏକ ନିର୍ଦ୍ଦେଶନାମା ଧରି ଜଳ ସମ୍ପଦ ବିଭାଗର ମୁଖ୍ୟଯନ୍ତ୍ରୀଙ୍କ କାର୍ଯ୍ୟାଳୟକୁ ସମ୍ପତ୍ତି ସିଜ କରିବା ପାଇଁ ପହଂଚିଛନ୍ତି। ତେବେ କୋର୍ଟ କର୍ମଚାରୀ ମାନେ ଏଠାରେ ପହଞ୍ଚିବା ପରେ ସେମାନେ ଦେଖିବାକୁ ପାଇଥିଲେ କାର୍ଯ୍ୟାଳୟର ନାମ ପରିବର୍ତ୍ତନ ହେବା ସହ ମୁଖ୍ୟଯନ୍ତ୍ରୀଙ୍କ କାର୍ଯ୍ୟାଳୟରେ କୌଣସି ଆସବାବପତ୍ର ନଥିଲା। ମୁଖ୍ୟଯନ୍ତ୍ରୀ କହିଥିଲେ ୨୦୨୧ରୁ କାର୍ଯ୍ୟାଳୟର ନାମ ପରିବର୍ତ୍ତନ ହୋଇସାରିଛି। ସେପଟେ କୋର୍ଟ କର୍ମଚାରୀମାନେ ପରବର୍ତ୍ତୀ ସମୟରେ ଏନେଇ କୋର୍ଟଙ୍କୁ ଆସନ୍ତା ଏପ୍ରିଲ ୭ ତାରିଖରେ ଅବଗତ କରାଇବେ ବୋଲି କହିଛନ୍ତି।

୨୫ତମ ବିବାହ ବାର୍ଷିକୀ ପାଳନ ବେଳେ ଆସିଲା ମୃତ୍ୟୁ ; ନାଚୁ ନାଚୁ ଟଳିପଡିଲେ ସ୍ବାମୀ

ନନ୍ଦିଘୋଷ ବ୍ୟୁରୋ : ବିବାହର ୨୫ତମ ବାର୍ଷିକୀ ପାଳୁଥିଲେ ଦମ୍ପତି । ନାଚଗୀତରେ ମସଗୁଲ ହେବା ସହ ସାରା ପରିବାର ଓ ଉପସ୍ଥିତ ଅତିଥିଙ୍କ ମଧ୍ୟରେ ଥିଲା ଉତ୍ସାହ । ହେଲେ ସତେ ଯେପରି ଗୋଟିଏ କ୍ଷଣ ବି ବିଚ୍ୟୁତ ହୋଇ ନଥିଲା ନିୟତିର ନିଷ୍ପତ୍ତି । ନାଚିବା ଅବସ୍ଥାରେ ଅକସ୍ମାତ ତଳେ ପଡିଗଲେ ସ୍ବାମୀ । ବାସ୍ ସାରା ଉତ୍ସବରେ ଘୋଟିଗଲା ଶୋକର ଛାୟା । ଅଧୁରା ବି ରହିଗଲା କେକ୍ କାଟିବା । ତାଙ୍କ ଜୀବନର ସୁନେଲି ଯାତ୍ରାର ବି ହୋଇଯାଇଥିଲା ଅବସନ । ଏହି ଦୁଃଖଦ ଘଟଣା ଘଟିଛି ଉତ୍ତରପ୍ରଦେଶରେ ବରେଲୀରେ । ଷ୍ଟେଜ ଉପରେ ହିଁ ଆଖି ବୁଜିଦେଇଥିଲେ ୫୦ ବର୍ଷ ବୟସ୍କ ଓ୍ବାସିମ ଶାଶ୍ବତ ।

ବିବାହର ୨୫ତମ ବାର୍ଷିକୀ ଅର୍ଥାତ ରୌପ୍ୟ ଜୁବିଲି ପାଳିବାକୁ ନିଷ୍ପତ୍ତି ନେଇଥିଲେ ଦମ୍ପତି । ଉତ୍ସବକୁ ରଙ୍ଗିନ କରିବା ଲାଗି ପତ୍ନୀ ଫାରା ବି ନିଜକୁ ବେଶ୍ ସଜ୍ଜିତ କରିଥିଲେ । ଉତ୍ସବ ପାଳନ ଲାଗି ଶତାଧିକ ବନ୍ଧୁବାନ୍ଧବ, ସମ୍ପର୍କୀୟ, ସାଙ୍ଗସାଥୀ ଉପସ୍ଥିତ ଥିଲେ । ଦମ୍ପତିଙ୍କ ସହ ଅନ୍ୟମାନେ ବି ନୃତ୍ୟଗୀତରେ ସାମିଲ ଥିଲେ । ଶୁଟିଂ ବି ଚାଲିଥିଲା । ହେଲେ ହଠାତ୍ ତଳେ ପଡିଯାଇଥିଲେ ଓ୍ବାସିମ । ତୁରନ୍ତ ତାଙ୍କୁ ହସ୍ପିଟାଲ ନିଆଯାଇଥିଲା । ସେଠାରେ ତାଙ୍କୁ ଡାକ୍ତର ମୃତ ଘୋଷଣା କରିଥିଲେ । ଓ୍ବାସିମ ଜଣେ ଯୋତା ବ୍ୟବସାୟୀ ହୋଇଥିବାବେଳେ ତାଙ୍କରୁ ଦୁଇଟି ପୁଅ ଅଛନ୍ତି । ହୃଦଘାତରେ ତାଙ୍କର ମୃତ୍ୟୁ ଘଟିଥିଲା ବୋଲି ଡାକ୍ତର ପ୍ରକାଶ କରିଥିଲେ । ନାଚଗୀତ ଶେଷରେ ଦୁହେଁ କେକ୍ କାଟିବା ଲାଗି ନିଷ୍ପତ୍ତି ନେଇଥିଲେ । ହେଲେ ଚିରଦିନ ଲାଗି ତାହା ରହିଗଲା ଅପୂରା ।

ପୁଣି ବିବାଦରେ ବିଜେପି ବିଧାୟକ ଜୟନାରାୟଣ ମିଶ୍ର

ନନ୍ଦିଘୋଷ ବ୍ୟୁରୋ : ପୁଣି ବିବାଦରେ ବିଜେପି ବିଧାୟକ ଜୟନାରାୟଣ ମିଶ୍ର। ସମ୍ବଲପୁର ବିଧାୟକ ଜୟନାରାୟଣ ମିଶ୍ର ପୁଣି ଏକ ମାମଲାରେ ଛନ୍ଦି ହୋଇଛନ୍ତି। ଜଣେ ପୋଲିସ ଅଧିକାରୀଙ୍କୁ ଗାଳି ଗୁଲଜ କରିବା ନେଇ ଜୟନାରାୟଣଙ୍କ ବିରୁଦ୍ଧରେ ମାମଲା ରୁଜୁ କରାଯାଇଛି। ଏହା ସହ ହନୁମାନ ଜୟନ୍ତୀ ପୂର୍ବରୁ ଝଣ୍ଡା ଯାତ୍ରା ସମୟରେ ଖଣ୍ଡା ବୁଲାଇବା ଘଟଣାକୁ ନେଇ ୮ ଜଣକ ବିରୁଦ୍ଧରେ ମାମଲା ରୁଜୁ କରାଯାଇଛି। ଗତକାଲି ଗୋଲବଜାର ଅଞ୍ଚଳରେ ଝଣ୍ଡା ଯାତ୍ରା ବେଳେ ବୁଲାଯାଇଥିଲା ଖଣ୍ଡା ।

ଡବଲ ଏନକାଉଣ୍ଟର ଘଟଣା : ଘଟଣାସ୍ଥଳରେ ସାଇଣ୍ଟିଫିକ ଟିମର ଯାଞ୍ଚ ; ବନ୍ଧୁକ, ଗୁଳି, ପଲସର ଗାଡି ଜବତ

ନନ୍ଦିଘୋଷ ବ୍ୟୁରୋ : ରାଜଧାନୀରେ ଡବଲ ଏନକାଉଣ୍ଟରରେ ଗୁରୁତର ବିହାରୀ ଲୁଟେରା ସୋନୁ ଯାଦବ ଓ ମନୀଷ ଯାଦବଙ୍କୁ ଏନକାଉଣ୍ଟର ପରେ ଗୁରୁତର ଅବସ୍ଥାରେ ସେମାନଙ୍କୁ SCB ମେଡିକାଲକୁ ସ୍ଥାନାନ୍ତର କରାଯାଇଛି। ସେପଟେ କ୍ରାଇମ ସ୍ପଟ ବାଙ୍କୁଆଳ ନଦୀ ପଠାରେ ପଡିଛି ଦୁଇ ବନ୍ଧୁକ, ଗୁଳି, ଲୁଟରେ ବ୍ୟବହୃତ ବ୍ୟାଗ ଓ କଳା ରଙ୍ଗର ପଲସର ଗାଡି। ଯେଉଁଠି ପହଁଚି ଛାନଭିନ ଆରମ୍ଭ କରିଛି ସାଇଣ୍ଟିଫିକ ଟିମ। ପାରିପାର୍ଶ୍ବିକ ପରିସ୍ଥିତିକୁ ଯାଞ୍ଚ କରିଛନ୍ତି।

ଗତକାଲି ରାତି ପ୍ରାୟ ୧୦ଟା ପରେ ବଡଗଡ଼ ଥାନା ଅନ୍ତର୍ଗତ ବାଙ୍କୁଆଳ ନଦୀ ପଠାରେ ଏନକାଉଣ୍ଟର ହୋଇଥିବା ବେଳେ ଅପରାହ୍ନରେ ଏହି ଗାଡି ଆଚାର୍ଯ୍ୟ ବିହାର ଛକ ଅତିକ୍ରମ କରିଥିଲା। ବିନା ହେଲମେଟ ଯୋଗୁଁ ଗାଡ଼ିରେ ୧ ହଜାର ଟଙ୍କାର ଫାଇନ କଟିଛି । ତେବେ ଏହି ଗାଡି ମଧ୍ୟ ଚୋରା ବୋଲି ଜଣାପଡିଛି। ଅଭିଯୁକ୍ତ ମାନେ ଗତ ମାର୍ଚ୍ଚ ୨୦ ତାରିଖରେ ଭୁବନେଶ୍ୱର ଆସିଥିଲେ। ୪ ଟି ଛିନତାଇ କରିଥିଲେ। । ସମ୍ପୃକ୍ତ ୨ ଜଣଙ୍କୁ ଧରିବାକୁ ଦୀର୍ଘଦିନ ହେବ ଯୋଜନା କରୁଥିଲା ପୋଲିସ । ଗୁଇନ୍ଦା ସୂଚନାକୁ ଆଧାର କରି ଜାଲ ବିଛାଇଥିଲା ପୋଲିସ ।

ଉଭୟ ଲୁଟେରାଙ୍କ ନାଁରେ ବିଭିନ୍ନ ଥାନାରେ ରହିଛି ଏକାଧିକ ମାମଲା । ୨୦ ମାର୍ଚ୍ଚରେ ଭୁବନେଶ୍ୱର ସମେତ ପୁରୀରେ ଲୁଟ କରି ପୁଣି ବିହାର ଚାଲିଯାଇଥିଲେ। ଏହା ପରେ ପୁଣି ରାଜଧାନୀ ଆସି ବଡ଼ଗଡ଼ ଅଞ୍ଚଳରେ ପୁଣି ଲୁଟ୍ କରିବାକୁ ପ୍ରସ୍ତୁତ ବେଳେ ବିଶ୍ୱସ୍ତ ସୂତ୍ରରୁ ଖବର ପାଇ ପୋଲିସ ଧରିବାକୁ ଉଦ୍ୟମ ଵେକେ ପୋଲିସକୁ ଗୁଳିମାଡ଼ କରିଥିଲେ। ଏହାର ଜବାବରେ ପୋଲିସ ଏନକାଉଣ୍ଟର କରିଥିଲା। ପୋଲିସ ସେମାନଙ୍କ ଠାରୁ ଦୁଇଟି ବନ୍ଧୁକ ଜବତ କରିଛି ପୋଲିସ। ଅନ୍ୟ କାହାରି ସମ୍ପୃକ୍ତି ରହିଛି ଏ ନେଇ ଅଧିକ ତଦନ୍ତ ଜାରି ରଖିଛି ପୋଲିସ।

ଭାରତୀୟ ସେୟାର ବଜାର ଉପରେ ଟ୍ରମ୍ପ ଟାରିଫର ପ୍ରଭାବ

ନନ୍ଦିଘୋଷ ବ୍ୟୁରୋ : ଭାରତୀୟ ସେୟାର ବଜାର ଉପରେ ଟ୍ରମ୍ପ ଏଫେକ୍ଟ। ଧରାଶାୟୀ ହୋଇଛି ଷ୍ଟକମାର୍କେଟ। ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ଦ୍ବାରା ଘୋଷିତ ନୂଆ ଟାରିଫ ଅନୁସାରେ ଏହାର ପ୍ରଭାବ ପଡ଼ିଛି ଷ୍ଟକ ମାର୍କେଟ ଉପରେ। ବିଏସଇ ସେନସେସ୍କ ୮୧୭ ପଏଣ୍ଟ ଖସିଥିବାବେଳେ ନିଫ୍ଟି ୩୦୦ ପଏଣ୍ଟ ହ୍ରାସ ଘଟିଛି। ଆଜି ଷ୍ଟକ ମାର୍କେଟ ଖୋଲୁ ଖୋଲୁ ଏହି ବିପର୍ଯ୍ୟୟ ପରିଲକ୍ଷିତ ହୋଇଛି।ଗତକାଲି ଟ୍ରମ୍ପ ନୂଆ ଟାରିଫ ନୀତି ଘୋଷଣା କରିବା ପରେ କେବଳ ଭାରତ ନୁହେଁ ବିଶ୍ବର ଅଧିକାଂଶ ଷ୍ଟକମାର୍କେଟରେ ଏହାର ପ୍ରଭାବ ପଡିଛି। ଭାରତର ଆଇଟି ଓ ଅଟୋମୋବାଇଲ ସେକ୍ଟରରେ ବଡ଼ ହ୍ରାସ ପରିଲକ୍ଷିତ ହୋଇଛି। ମାରୁତି, ଜେକେ ଟାୟାର କମ୍ପାନୀ ସେୟାର ୩ ପ୍ରତିଶତ ହ୍ରାସ ହୋଇଥିବାବେଳେ ଟାଟା ମୋଟର୍ସ ସେୟାର ଖସିଛି ୬ ପ୍ରତିଶତ। ସେହିପରି ରିଲାଏନ୍ସ, ଟିସିଏସ, ଇନଫୋସିସ, ଏଲ ଆଣ୍ଟ ଟି, ହାଭେଲ୍ସ, ଏଚସିଏଲଟେକ ପ୍ରଭୃତି କମ୍ପାନୀ ଘାଟାର ଶିକାର ହୋଇଛନ୍ତି।

ଖାଦ୍ୟ ନାହିଁ, କି ପାଣି ନାହିଁ…, ତାତିଲେ ତୁର୍କୀ ଏୟାରପୋର୍ଟରେ ୩୦ଘଣ୍ଟା ଧରି ଫସିରହିଥିବା ଯାତ୍ରୀ

ନନ୍ଦିଘୋଷ ବ୍ୟୁରୋ : ଲଣ୍ଠନରୁ ମୁମ୍ୱାଇ ଆସୁଥିବା ଭର୍ଜିନ୍ ଆଟଲାଣ୍ଟିକ୍ ବିମାନର ୨୬୦ରୁ ଅଧିକ ଯତ୍ରୀ ୩୦ଘଣ୍ଟାରୁ ଅଧିକ ସମୟ ଧରି ତୁର୍କୀର ଦିଆର୍ବାକିର ବିମାନବନ୍ଦରରେ ଫସି ରହିଛନ୍ତି  । ଏହି ଯାତ୍ରୀ ମାନେ ନିରନ୍ତର ସାହାଯ୍ୟ ପାଇଁ ନିବେଦନ କରୁଛନ୍ତି । ଭର୍ଜିନ୍ ଆଟଲାଣ୍ଟିକ୍ ବିମାନକୁ ହାର୍ଡ ଲ୍ୟାଣ୍ଡିଙ୍ଗ ବୋଲି ଘୋଷଣା ସହ ବିମାନରେ କିଛି ଯାନ୍ତ୍ରିକ ତ୍ରୁଟି କାରଣରୁ ବିମାନଟି ଉଡାଣ ପାଇଁ ଅନୁପଯୁକ୍ତ ବୋଲି ଘୋଷଣା କରାଯାଇଛି । ଏହା ପରେ କ୍ରୁଙ୍କୁ ଏକ ହୋଟେଲକୁ ପଠାଯାଇଥିଲା, କିନ୍ତୁ ଯାତ୍ରୀମାନଙ୍କୁ ବିମାନବନ୍ଦରର ଏକ ନିଷିଦ୍ଧ ଅଞ୍ଚଳରେ ରଖାଯାଇଥଲା,ଯେଉଁଠାରେ ପର୍ଯ୍ୟାପ୍ତ ସୁବିଧା ନାହିଁ ।

ଭାରତୀୟ ଦୂତାବାସଙ୍କ ସହାୟତାରେ କିଛି ଯାତ୍ରୀଙ୍କୁ ନିକଟସ୍ଥ ହୋଟେଲକୁ ନିଆଯାଇଛି । ସକାଳ ୯ଟା ସୁଦ୍ଧା ଏକ ବ୍ୟାପଅପ୍ ବିମାନ ପ୍ରସ୍ତୁତ ହେବ ବୋଲି ଏୟାରଲାଇନ୍ସ ପକ୍ଷରୁ କୁହାଯାଇଛି । ହେଲେ ଏବେ ବି କିଛି ଯାତ୍ରୀ ଏୟାରପୋର୍ଟ ଭିତରେ ଅଛନ୍ତି ।

ଅନ୍ୟପଟେ ସେଠାରେ ଫସିରହିଥିବା ଯାତ୍ରୀମାନେ ଏୟାରପୋର୍ଟରେ ମୌଳିକ ଅସୁବିଧାକୁ ନେଇ ଅଭିଯୋଗ କରିଛନ୍ତି । ସେମାନେ କହିଛନ୍ତି କି, ଫସିରହିଥିବା ଯାତ୍ରୀଙ୍କ ପାଇଁ କୌଣସି ବ୍ୟବସ୍ଥା କରାଯାଇନାହିଁ କିମ୍ୱା କେତେବେଳେ ମୁମ୍ୱାଇ ଯାଇପାରିବେ ସେ ବିଷୟରେ ମଧ୍ୟ କୌଣସ ସୂଚନା ଦିଆଯାଇନାହଇଁ । ବିମାନବନ୍ଦରରେ ଫସିରହିଥିବା ଯାତ୍ରୀମାନେ ସୋସିଆଲ ମିଡିଆ ଏକ୍ସରେ ଖାଦ୍ୟ, ଶୌଚାଳୟ ଏବଂ ଚାର୍ଜିଙ୍ଗ ପଏଣ୍ଟ ସମେତ ଅନେ ମୌଳିକ ସୁବିଧାର ଅଭାବ ନେଇ ଅଭିଯୋଗ କରି ଟ୍ୱିଟ୍ କରିଛନ୍ତି ।

ସେମାନେ କହିଛନ୍ତି ଯେ, ୨୪ଘଣ୍ଟା ଉପରେ ହେଲାଣି କିନ୍ତୁ ଜଣେ ବି ଏୟାରଲାଇନ୍ସ ପ୍ରତିନିଧି ଯାତ୍ରୀଙ୍କୁ ଭେଟି ନାହାନ୍ତି । ସେମାନଙ୍କ ପାଖରେ ଖାଦ୍ୟ ନାହିଁ, ୧୭୫ଜଣ ଯାତ୍ରୀଙ୍କ ପାଇଁ ଗୋଟିଏ ଶୌଚାଳୟ ରହିଛି । ଫୋନ ଚାର୍ଜିଙ୍ଗ ପାଇଁ ସୁବିଧା ନଥିବରୁ ବ୍ୟାଟେରୀ ସରିଗଲାଣି । ଏପରିକି ଯାତ୍ରୀମାନଙ୍କ ମଧ୍ୟରେ ଛୋଟପିଲା, ଗର୍ଭବତୀ ମହିଳା, ମଧୁମେହ ରୋଗୀ ଏବଂ ବୃଦ୍ଧ ବ୍ୟକ୍ତି ଅଛନ୍ତି,ହେଲେ ସେମାନଙ୍କ ପାଇଁ ମଧ୍ୟ କୌଣସି ସୁବିଧା ଉପଲବ୍ଧ ନାହିଁ ।