spot_img
Home Blog Page 1150

ମୂର୍ତ୍ତି ସହ ମୁଖା ପ୍ରସ୍ତୁତିରେ ଲାଗିପଡିଛନ୍ତି ନଗେନ ମହାପାତ୍ରଙ୍କ ପରିବାର

ଅନୁଗୁଳ : ବିଭିନ୍ନ ମୂର୍ତ୍ତି ସାଙ୍ଗକୁ ମୁଖା ପ୍ରସ୍ତୁତିରେ ନିମଗ୍ନ କାରିଗର । ତୁଳୀରେ ରଙ୍ଗଦେଇ ନିର୍ମାଣ କରୁଛନ୍ତି ଜୀବନ୍ତ କଳାକୃତି । ଦଣ୍ଡଯାତ୍ରାରେ ବ୍ଯବହୃତ ସାମଗ୍ରୀ ଓ ସରଞ୍ଜାମ ପ୍ରସ୍ତୁତିରେ ଲାଗିପଡିଛନ୍ତି କାରିଗର । ଦିନରାତି ଏକ କରି ସରଞ୍ଜାମ ତିଆରିରେ ଲାଗିପଡିଛନ୍ତି ଅନୁଗୁଳ ଜିଲ୍ଲା ବନ୍ତଳା ଲାଛବନ୍ଧ ଗାଁର ନଗେନ ମହାପାତ୍ରଙ୍କ ପରିବାର । ମା’ କାଳୀଙ୍କ ମୁଖା ସହ ଅନ୍ୟାନ୍ୟ ଚରିତ୍ର ପାଇଁ ଷଣ୍ଢ, ବାଘ, ସିଂହ, ଭାଲୁ, ଚଢ଼େୟା ମୁଖା ଓ ନାବକେଳି ପାଇଁ ଧର୍ମଡଙ୍ଗା ତିଆରି କରୁଛନ୍ତି ।

ନଗେନଙ୍କ ପରିବାର ଦଣ୍ଡ ଯାତ୍ରାରେ ବ୍ୟବହୃତ ସରଞ୍ଜାମ ପୀଢି ପରେ ପୀଢି ପ୍ରସ୍ତୁତ କରି ଆସୁଛନ୍ତି । ଘରର ମହିଳାମାନେ ମଧ୍ୟ ଏହି କାର୍ଯ୍ୟରେ ସାହାଯ୍ୟ କରିଥାନ୍ତି । ନଗେନ ଓ ତାଙ୍କ ପରିବାର ମନ୍ଦିର, ମାଟି ଓ ସିମେଣ୍ଟ ମୂର୍ତି ଓ କାଗଜରେ ସୁନ୍ଦର ସୁନ୍ଦର କାରୁକାର୍ଯ୍ୟ କରିଥାନ୍ତି । ଦଣ୍ଡ ଯାତ୍ରା ପୂର୍ବରୁ ଗାଁ ସମତେ ଜିଲ୍ଲା ବାହାରୁ ଲୋକେ ଆସି ଏହି କଳାକୃତି ନେଇଯାଆନ୍ତି । ନଗେନଙ୍କ ଏହି କଳାକୃତି ପାଇଁ ସେ ଜିଲ୍ଲା ତଥା ଜିଲ୍ଲା ବାହାରେ ବେଶ ପରିଚିତ ହୋଇପାରିଛନ୍ତି । ସରକାରଙ୍କ ପକ୍ଷରୁ ନଗେନଙ୍କୁ ଆର୍ଥିକ ସହାୟତା ଯୋଗାଇ ଦିଆଗଲେ ସେ ଆହୁରି ଆଗକୁ ଯାଇପାରନ୍ତେ ।

ଦିଗହରା ମୋ ପୋଖରୀ ଯୋଜନା, ପୋତିହେବାକୁ ବସିଲାଣି ପୋଖରୀ

ସମ୍ବଲପୁର : ପୂର୍ବ ସରକାର ମହିଳା ମାନଙ୍କୁ ସ୍ଵାବଲମ୍ବୀ କରିବା ପାଇଁ ଅଣ୍ଟା ଭିଡିଥିଲେ । ଏସଏଚଜି ମାନଙ୍କୁ ପୋଖରୀ ଗୁଡିକର ପୁନରୁଦ୍ଧାର ଏବଂ ବ୍ୟବହାର ଉପଯୋଗୀ କରିବା ପାଇଁ ମୋ ପୋଖରୀ ଯୋଜନାରେ କାମ ଯୋଗାଇ ଦେଇଥିଲେ । ମହିଳା ମାନେ ନିଜର ପୁଞ୍ଜି ଲଗାଇ କାମକୁ ଆଗକୁ ବଢାଇଥିଲେ । ଏବେ ସରକାର ବଦଳିବା ପରେ SHG ଗ୍ରୁପର ମହିଳା ମାନେ କରିଥିବା କାମର ପ୍ରଥମ କିସ୍ତି ଟଙ୍କା ମଧ୍ୟ ପାଇନଥିବା ନେଇ ଅଭିଯୋଗ କରିଛନ୍ତି । ପ୍ରାପ୍ୟ ପାଇଁ ମହାନଗର କାର୍ଯ୍ୟାଳୟ ଠାରୁ ଆରମ୍ଭ କରି ଜିଲ୍ଲାପାଳଙ୍କ କାର୍ଯ୍ୟାଳୟ ପର୍ଯ୍ୟନ୍ତ ଧାଇଁ ନୟାନ୍ତ ହେଲେଣି ହେଲେ ଫଳ ଶୂନ । ଫଳରେ ଚଳିତ ବର୍ଷ କାମ ଆଗକୁ ବଢିନପାରି କେଉଁଠି ମାଟିରେ ପୋଖରୀ ପୋତି ହେଲାଣି ତ କେଉଁଠି ଅଳିଆ ଗଦା ପାଲଟିଗଲାଣି ।

ସମ୍ବଲପୁର ମହାନଗରରେ ୮ଟି ପୋଖରୀ ଏହି ଯୋଜନାରେ ସାମିଲ ହୋଇ କାମ ଆରମ୍ଭ ହୋଇଛି । ପ୍ରତି ପୋଖରୀ ପାଇଁ ୪ କୋଟିରୁ ୬ କୋଟି ପର୍ଯ୍ୟନ୍ତ ଅର୍ଥ ମଂଜୁର ହୋଇଥିଲା । ପ୍ରତି SHG ମାନଙ୍କୁ ୧୫ ଲକ୍ଷ ଟଙ୍କlର କାମ ପାଇଁ କାର୍ଯ୍ୟାଦେଶ ଦିଆଯାଇଥିଲା  l କେବଳ ଦୁଇଟି ପୋଖରୀ ଛାଡିଦେଲେ ବାକି ସବୁଠି ୨୦ ପ୍ରତିଶତ ବି କାମ ହୋଇନି । ସେପଟେ ମହାନଗର ନିଗମ କମିଶନର କହିଛନ୍ତି । କାମ କରିବାକୁ SHG ମାନଙ୍କୁ ଟ୍ରେଂନି ଦିଆଯାଇଥିଲା ଆଉ ସେମାନେ ଭଲ କାମ କରିଛନ୍ତି ।  କେତେଟା ଜାଗାରେ କିଛିଟା ସମସ୍ୟା ଯୋଗୁ ତାଙ୍କର ପ୍ରାପ୍ୟ ବିଳମ୍ବ ହେଉଛି । ସେ କାମ ଗୁଡିକୁ ପୁଣିଥରେ ଆରମ୍ଭ କରିବାକୁ ଆମେ SHG ଙ୍କୁ କହିଛୁ । ବହୁତ ଜଲଦି ଏହାର ସମାଧାନ ହେବ ।ପୂର୍ବ ସରକାର SHG ମହିଳାଙ୍କୁ ସ୍ଵାବଲମ୍ବୀ କରିବାକୁ ତାଙ୍କୁ ଏହି ଯୋଜନାର ଦାୟିତ୍ଵ ଦେଇଥିଲେ । ଏବେ ଦିଗହରା ମୋ ପୋଖରୀ ଯୋଜନା ବୋଲି ସାଧାରଣରେ ଚର୍ଚ୍ଚା ହେଉଛି ।

ଗ୍ରୀଷ୍ମ ପ୍ରବାହକୁ ଦ୍ଵିଗୁଣିତ କରୁଛି ଜଳକଷ୍ଟ, ପାଣି ପାଇଁ ଡହଳବିକଳ ଲୋକେ

କଣ୍ଟାମାଳ : ବସୁଧା ଯୋଜନାରେ ପ୍ରତ୍ଯେକ ଘର ଆଗରେ ଲାଗିଛି ଷ୍ଟାଣ୍ଡ ପୋଷ୍ଟ ଓ ପାଇପ ଲାଇନ । ହେଲେ ସେସବୁ ଅଚଳ ହୋଇପଡିଛି । ଗାଁରେ ଥିବା ଚାରିଗୋଟି ନଳକୂପ ମଧ୍ୟରୁ ଦୁଇ ଗୋଟି ଅଚଳ ହୋଇପଡିଛି । ଦୁଇ ଗୋଟି ନଳକୂପରୁ ଭଲରେ ପାଣି ବାହାରୁନାହିଁ । ଏପରି ସ୍ଥିତିରେ ପାଣି ପାଇଁ ଆଉଟୁପାଉଟୁ ହେଉଛନ୍ତି ବୌଦ୍ଧ ଜିଲ୍ଲା କଣ୍ଟାମାଳ ବ୍ଲକ କଲରାଝୁଲି ଗାଁ ଲୋକେ । ପ୍ରତିଦିନ ସକାଳୁ ମହିଳାମାନେ ଗାଁ ଠାରୁ ଗୋଟିଏ କିଲୋମିଟର ଚାଲି ଚାଲି ଯାଇ ପାଣି ଆଣି ଚଳୁଛନ୍ତି । ତାହା ପୁଣି ଗୋଟିଏ କୂଅ ଉପରେ ଦୁଇ ହଜାର ଲୋକ ନିର୍ଭର କରୁଥିବାରୁ କୂଅ ପାଖରେ ଦୀର୍ଘ ସମୟ ଧରି ଅପେକ୍ଷା କରିବାକୁ ପଡୁଥିବା ନେଇ ଲୋକେ କହିଛନ୍ତି ।

ଅଞ୍ଚଳରେ ପାଇପ ଯୋଗେ ଜଳଯୋଗାଣ ବ୍ୟବସ୍ଥା ଥିଲେ ମଧ୍ଯ ତାହା ଅଚଳ ହୋଇପଡିଥିବାରୁ ଲୋକେ କୂଅ, ପୋଖରୀର ଦୂଷିତ ପାଣି ପିଉଛନ୍ତି । ଜଳ ସମସ୍ଯାର ସମାଧାନ ନିମନ୍ତେ ଗ୍ରାମବାସୀ ଅନେକ ଥର ଅଧିକାରୀଙ୍କ ନିକଟରେ ଅଭିଯୋଗ କରିଥିଲେ ମଧ୍ଯ କେହି ଶୁଣୁନଥିବା ଅଭିଯୋଗ ହୋଇଛି । ଅନ୍ଯପଟେ ଏନେଇ କଣ୍ଟାମାଳ ଗ୍ରାମ୍ୟ ଜଳ ଯୋଗାଣ ବିଭାଗର ନିର୍ବାହୀ ଯନ୍ତ୍ରୀଙ୍କୁ ପଚରିବାରୁ, ସେ ଖୁବଶୀଘ୍ର ପ୍ରକଳ୍ପ ମରାମତି କରାଯିବ ବୋଲି ପ୍ରତିଶ୍ରୁତି ଦେଇଛନ୍ତି l ଗାଁରେ ଖୁବଶୀଘ୍ର ଜଳ ଯୋଗାଣ ପ୍ରକଳ୍ପର ମରାମତି କରାନଗଲେ ଆଗକୁ ଉତ୍କଟ ପାନୀୟ ଜଳସଙ୍କଟ ଦେଖା ଦେବାର ଆଶଙ୍କା ଦେଖାଦେଇଛି ।

ଘରୋଇ ଋଣ ପ୍ରଦାନକାରୀ ସଂସ୍ଥା ପାଲଟିଛି ମୃତ୍ୟୁର ସୌଦାଗର

ଆନନ୍ଦପୁର : ଭାରି ପଡୁଛି ଋଣ । ମୃତ୍ୟୁର କାରଣ ପାଲଟୁଛି ଘରୋଇ ଋଣ ପ୍ରଦାନକାରୀ ସଂସ୍ଥା । ଜୁଲମ ସହିନପାରି ହାରୁଛନ୍ତି ଜୀବନ । ଭାବିଥିଲେ ଋଣ ଆଣି ପନିପରିବା ଚାଷ କରି ଭଲ ଦୁଇ ପଇସା ରୋଜଗାର କରିବେ । ହେଲେ ଚାଷରେ କ୍ଷତି ହେବାରୁ ଋଣ ସୁଝିନପାରି ଘରୋଇ ସଂସ୍ଥାର ଜୁଲମରେ ଜୀବନ ହାରୁଛନ୍ତି ମହିଳା । ଏପରି କିଛି ଘଟଣା ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ହାଟଡିହି ବ୍ଲକ ଶିବନାରାୟଣପୁର ଗାଁରେ । କିଛି ଦିନ ତଳେ ଜଣଙ୍କର ଜୀବନ ଯାଇଥିବା ବେଳେ ଅନ୍ଯ କେତେ ଜଣ ମେଡିକାଲରେ ଜୀବନ ମରଣ ସହ ସଂଗ୍ରାମ କରୁଛନ୍ତି । ଗ୍ରାମର ଗିରିଧାରୀ ଦାସଙ୍କ ସ୍ତ୍ରୀ କୁନ୍ତଳା ଦାସ ଦୁଇଟି ଗ୍ରୁପରୁ ୧ ଲକ୍ଷ ୪୦ ହଜାର ଟଙ୍କା ଋଣ ଆଣି ଚାଷ ବାସ କରିଥିଲେ । ହେଲେ ଋଣ ପରିଶୋଧ କରିପାରି ନପାରିବାରୁ ଫାଇନାନ୍ସ ସଂସ୍ଥାର କର୍ମଚାରୀ ବାରମ୍ଵାର ଘରକୁ ଅସି ତାଗିଦ କରିବାରୁ ସେ ମାନସିକ ଭାରସାମ୍ୟ ହରାଇ କୀଟନାଶକ ପିଇ ଦେଇଥିଲେ । ପରିବାର ଲୋକେ ତାଙ୍କୁ ମେଡିକାଲ ନେବା ପରେ ତାଙ୍କର କଟକ ବଡ ମେଡିକାଲରେ ମୃତ୍ଯୁ ଘଟିଛି । ଏପରିକି ମୃତ୍ୟ ବରଣ କରିବା ଦିନ ମଧ୍ୟ ଘରୋଇ ଫାଇନାନ୍ସ ସଂସ୍ଥାର କର୍ମଚାରୀ ମାନେ ଆସି ତାଙ୍କ ଘର ବାରଣ୍ଡାରେ ବସିବାରୁ ପଡ଼ୋଶୀ ମାନେ ନିଜ ନିଜ ଭିତରେ ଅର୍ଥ ସଂଗ୍ରହ କରି କିସ୍ତି ପୈଠ କରିଥିବା କହିଛନ୍ତି।

ସେହିପରି ଅନ୍ୟ ଜଣେ ମହିଳା ଗ୍ରୁପ ଋଣ ଟଙ୍କା ପରିଶୋଧ କରି ନପାରି କିଛି ଦିନ ତଳେ ଘରେ ଥିବା କୀଟନାଶକ ପିଇ ଦେଇଥିଲେ । ତାଙ୍କୁ ମଧ୍ଯ ପ୍ରଥମେ ଆନନ୍ଦପୁର ଓ ପରେ କଟକ ସ୍ଥାନାନ୍ତର କରାଯାଇଛି । ଘରୋଇ ଫାଇନାନ୍ସ ସଂସ୍ଥାର ଋଣ ଆଦାୟ ଜୁଲମ ମହିଳା ମାନଙ୍କୁ ମାନସିକ ଆଘାତ ଦେଉଥିବା ବେଳେ ଅନେକ ପରିବାରରେ ଅଶାନ୍ତି ସୃଷ୍ଟି କରୁଛି । ଋଣ ଲଗାଣକାରୀ ସଂସ୍ଥା ଗୁଡ଼ିକ ଗ୍ରାହକଙ୍କୁ ଟଙ୍କା ଦେଲା ବେଳେ ସେମାନଙ୍କ ଆର୍ଥିକ ସ୍ଥିତି ଦେଖୁନଥିବା ଯୋଗୁଁ ଏପରି ସ୍ଥିତି ଉପୁଜୁଛି ବୋଲି ଅଭିଯୋଗ ହୋଇଛି । ସରକାର ଏଥିପ୍ରତି ଦୃଷ୍ଟି ଦେବାକୁ ଗ୍ରାମବାସୀ ମାନେ ଦାବି କରିଛନ୍ତି । ଋଣ ଅପବାଦରୁ ବଞ୍ଚିବାକୁ ଜୀବନ ହାରୁଥିବା ମହିଳାମାନଙ୍କ ମାନସିକ ସ୍ଥିତିରେ ସୁଧାର ଆଣିବା କ୍ଷେତ୍ରରେ ସରକାର ଦୃଷ୍ଟି ଦେବାକୁ ସାଧାରଣରେ ଦାବି ଜୋର ଧରିଛି ।

ଆଜି ଠାରୁ ସମୂହ ଛୁଟିରେ ଗଲେ ଯୋଗାଣ ସହାୟକ

ଭୁବନେଶ୍ବର : ଆଜି ଠାରୁ ସମୂହ ଛୁଟିରେ ଗଲେ ଯୋଗାଣ ସହାୟକ। ରାଜ୍ୟରେ ବାଧାପ୍ରାପ୍ତ ହୋଇପାରେ PDS ସାମଗ୍ରୀ ବଣ୍ଟନ। ରାଜ୍ୟର ଅଧା ହିତାଧିକାରୀ PDS ସାମଗ୍ରୀ ପାଇଁ ହଇରାଣ ହୋଇପାରନ୍ତି। ରାଜ୍ୟରେ ୨୧ ଜିଲ୍ଲାରେ ପ୍ରାୟ ୩୫୦୦ରୁ ଅଧିକ ପଞ୍ଚାୟତରେ କାର୍ଯ୍ୟରତ ଯୋଗାଣ ସହାୟକ ସ୍ଥାୟୀ ନିଯୁକ୍ତି ଦାବି ନେଇ ଆଜି ଠାରୁ ୧୪ ତାରିଖ ପର୍ଯ୍ୟନ୍ତ ସମୂହ ଛୁଟିରେ ରହିବେ। ଯାହା ଫଳରେ ଯୋଗାଣ ସହାୟକ ନିଯୁକ୍ତ ହୋଇଥିବା ପଂଚାୟତରେ PDS ସାମଗ୍ରୀ ବଣ୍ଟନ ପୁରା ଠପ ହୋଇଯିବ। ବାରମ୍ବାର ସରକାରଙ୍କୁ ଅବଗତ କରିଥିଲେ ମଧ୍ୟ ଦାବି ପ୍ରତି କର୍ଣ୍ଣପାତ କରୁ ନଥିବାରୁ ଏଭଳି ଆନ୍ଦୋଳନକୁ ଓହ୍ଲାଇଛି ଓଡିଶା ରାଜ୍ୟ ଯୋଗାଣ ସହାୟକ ସଂଘ। ଏ ନେଇ ଭୁବନନେଶ୍ୱରରେ ସାମ୍ବାଦିକ ସମ୍ମିଳନୀ କରି ସୂଚନା ଦେଇଛନ୍ତି ସଙ୍ଘ ସଭାପତି ସଂଜୀବ କୁମାର ଦାଶ। ଦାବି ପୂରଣ ନ ହେଲେ ପୁଣି ରାଜରାସ୍ତାରେ ରାଜ୍ୟ ସରକାରଙ୍କ ବିରୁଧରେ ଆନ୍ଦୋଳନକୁ ଓହ୍ଲାଇବାକୁ ଚେତାବନୀ ଦେଇଛି ସଙ୍ଘ ।

ଭାରତରେ ହେବ ନୂଆ ଧର୍ମର ଜନ୍ମ, ଯିଏ ମୁସଲମାନ୍, ଜିହୂଦୀ ଏବଂ ଖ୍ରୀଷ୍ଟିଆନଙ୍କୁ ରଖିବ ଏକାଠି

ନନ୍ଦିଘୋଷ ବ୍ୟୁରୋ: ଭାରତର ଜଣେ ମହାନ ନାମିଦାମୀ ଡାକ୍ତର ଇମାମ ଉମୈର ଇଲିଆସି କହିଛନ୍ତି ଯେ ବହୁତ ଶୀଘ୍ର ଏକ ନୂତନ ଧର୍ମ ଆସିବାକୁ ଯାଉଛି । ଏହି ଧର୍ମ ମୁସଲମାନ, ଜିହୂଦୀ ଏବଂ ଖ୍ରୀଷ୍ଟିଆନଙ୍କୁ ଏକତ୍ର କରିବ । ସେ ଦାବି କରିଛନ୍ତି ଯେ ଏଥିପାଇଁ ସଂଯୁକ୍ତ ଆରବ ଏମିରେଟ୍ସର ଆବୁଧାବିରେ ଏକ କେନ୍ଦ୍ର ନିର୍ମାଣ ହୋଇସାରିଛି ଏବଂ ତିନୋଟି ଧର୍ମକୁ ସଂଯୋଗ କରିବା ପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି । ଡକ୍ଟର ଇମାମ ଉମୈର ଇଲିଆସି କହିଥିଲେ ଯେ ମୁସଲମାନ, ଜିହୂଦୀ ଏବଂ ଖ୍ରୀଷ୍ଟିଆନ ଭାଇ ଭାଇ, ସେମାନଙ୍କର ମୂଳ ସମାନ କିନ୍ତୁ ସେମାନେ ନିଜ ନିଜ ମଧ୍ୟରେ ଲଢ଼ନ୍ତି। ଏହି ସଂଘର୍ଷର ଅନ୍ତ ପାଇଁ ସାରା ବିଶ୍ୱରେ ପ୍ରସ୍ତୁତି ଚାଲିଛି।

ଡକ୍ଟର ଇମାମ ଇଲିଆସି କହିଛନ୍ତି ଯେ ଏହି ନୂତନ ଧର୍ମର ନାମ ହେଉଛି ଇବ୍ରାହିମ ଏକ ବିଶ୍ୱାସ। ଏହି ଧର୍ମ ନିକଟ ଭବିଷ୍ୟତରେ ଆସିବ, ଯାହାର ପ୍ରସ୍ତୁତି ପ୍ରାୟ ସମ୍ପୂର୍ଣ୍ଣ। ସେ କହିଲେ, ‘ଇସଲାମ, ଯିହୁଦୀ ଏବଂ ଖ୍ରୀଷ୍ଟିଆନିଟି, ତିନୋଟି ଧର୍ମର ମୂଳ ସମାନ, ପିତା ଜଣେ, ତେବେ ସେମାନଙ୍କ ମଧ୍ୟରେ ଏହି ଦ୍ୱନ୍ଦ୍ୱ କିପରି ଶେଷ ହୋଇପାରିବ?’ ଏଥିପାଇଁ କେବଳ ଗୋଟିଏ ଉପାୟ ଅଛି ଯେ ଏହି ତିନିଜଣ ଏକ ହୋଇଯାଆନ୍ତି ଏବଂ ସେମାନଙ୍କୁ ଏକତ୍ର କରିବା ପାଇଁ ଏପରି ଏକ ଧର୍ମ ଆସିବ। କେବେ ଆସିବ, କିପରି ଆସିବ, ମୁଁ ଜାଣିନାହିଁ।

ଇମାମ ଇଲିଆସି କହିଥିଲେ, ‘ରମଜାନ ମାସରେ ମୋତେ ଏହି ଅନୁଭବ ହୋଇଥିଲା କାରଣ ରମଜାନ ପୂର୍ବରୁ ମଧ୍ୟ ଏକ ସ୍ୱର ଉଠିବାକୁ ଲାଗିଥିଲା ​​ଯେ ଏହି ତିନୋଟି ଧର୍ମକୁ ଏକତ୍ର କରିବାର କେବଳ ଗୋଟିଏ ଉପାୟ ଅଛି।’ ଖ୍ରୀଷ୍ଟିଆନ, ମୁସଲମାନ ଏବଂ ଯିହୂଦୀମାନେ ନିଜ ନିଜ ମଧ୍ୟରେ ଲଢ଼ନ୍ତି, ଯଦିଓ ସେମାନେ ଭାଇ, ଭାଇ, ତେଣୁ ସେମାନଙ୍କୁ ଏକତ୍ର କରିବାର କେବଳ ଗୋଟିଏ ଉପାୟ ଅଛି, ତାହା ହେଉଛି ଗୋଟିଏ ଧର୍ମ ରହିବା ଉଚିତ ଏବଂ ତାହା ହେଉଛି ଆବ୍ରାହିମଙ୍କ ବିଶ୍ୱାସ। ସେ କହିଥିଲେ ଯେ ଆବ୍ରାହିମଙ୍କ ବିଶ୍ୱାସ, ଯାହା ଏକ ଧର୍ମ ହେବାକୁ ଯାଉଛି, ତାହା ସାରା ବିଶ୍ୱରେ ସମସ୍ତଙ୍କୁ ଏକତ୍ର କରିବ।

ସେ କହିଛନ୍ତି ଯେ ଏହା କୌଣସି ଚିନ୍ତାଧାରା ନୁହେଁ, ଏହା ସତ୍ୟ। ଆବୁଧାବିରେ ଏକ କେନ୍ଦ୍ର ନିର୍ମାଣ କରାଯାଇଛି, ଏହାର ନାମ ଆବ୍ରାହିମିକ୍ ଫେଥ୍ ସେଣ୍ଟର । ଏହା ତିନୋଟି ଧର୍ମ ପାଇଁ ତିଆରି କରାଯାଇଛି। ଇମାମ ଇଲିଆସି କହିଥିଲେ ଯେ ଏହା ଏକ ମଡେଲ ଏବଂ ଏହା ମାଧ୍ୟମରେ ଲୋକମାନେ ବୁଝିପାରିବେ ଯେ କ’ଣ ହେବାକୁ ଯାଉଛି। ଏହି ଆବ୍ରାହିମିକ୍ ସେଣ୍ଟରର ମଧ୍ୟ ସମାନ ଧାରଣା ଅଛି କାରଣ ଇସଲାମ, ଯିହୁଦୀ ଏବଂ ଖ୍ରୀଷ୍ଟିଆନିଟି ମଧ୍ୟରେ ସମାନତା ଅଛି। ପୂଜାର ପଦ୍ଧତି ନିଶ୍ଚିତ ଭାବରେ ଭିନ୍ନ କିନ୍ତୁ ସମସ୍ତେ ଏକ। ତିନୋଟି ଧର୍ମକୁ ଏକତ୍ର କରିବା ପାଇଁ ସାରା ବିଶ୍ୱରେ ପ୍ରୟାସ ଚାଲିଛି ଏବଂ ଏହା ନିଶ୍ଚିତ ଭାବରେ ଆସିବ, କିନ୍ତୁ କେବେ ଆସିବ ତାହା କେହି ଜାଣନ୍ତି ନାହିଁ।

 

 

ୱାକଫ ବିଲ୍ ସମର୍ଥନ କରିବା ପାଇଁ ନୀତିଶ କୁମାରଙ୍କୁ ତାଚ୍ଛଲ୍ୟ କଲା RJD

ରାଞ୍ଚି : ରାଷ୍ଟ୍ରିୟ ଜନତା ଦଳ (ଆରଜେଡି) ବିହାର ମୁଖ୍ୟମନ୍ତ୍ରୀ ନୀତୀଶ କୁମାରଙ୍କ ଉପରେ ଆକ୍ରମଣ କରିଛି। ଶୁକ୍ରବାର ସଂସଦରେ ଗୃହୀତ ୱାକଫ ସଂଶୋଧନ ବିଲ୍ ପାଇଁ ତାଙ୍କ ସମର୍ଥନକୁ ନେଇ ତାଙ୍କୁ ଜଣେ ଆରଏସଏସ କର୍ମୀ ଭାବରେ ଚିତ୍ରଣ କରାଯାଇଥିବା ଏକ ସୋସିଆଲ ମିଡିଆ ପୋଷ୍ଟ। ନିର୍ବାଚନ ବର୍ଷରେ ବିଲକୁ ସମର୍ଥନ କରିବା ପରେ ଜେଡି(ୟୁ)ର ପାଞ୍ଚ ଜଣ ନେତା ଇସ୍ତଫା ଦେବା ପରେ ଆରଜେଡି ଏହି ଆକ୍ରମଣ ଆରମ୍ଭ କରିଥିଲା।

ସୋସିଆଲ ସାଇଟ୍ ଏକ୍ସରେ ଆରଜେଡି ଦ୍ୱାରା ସେୟାର କରାଯାଇଥିବା ଫଟୋସପ୍ ହୋଇଥିବା ଫଟୋରେ ନୀତିଶ କୁମାର ଆରଏସଏସ ର ଟ୍ରେଡମାର୍କ ଧଳା ସାର୍ଟ ଏବଂ ଖାକି ସର୍ଟସ୍ ପିନ୍ଧିଥିବା ଦେଖାଯାଇଛି। ବିହାରର ବିରୋଧୀ ଦଳ ଫଟୋଟିର କ୍ୟାପସନ ଦେଇଛନ୍ତି : ‘ଆରଏସଏସ- ସାର୍ଟିଫାଇଡ୍ ମୁଖ୍ୟମନ୍ତ୍ରୀ ଚିଟିଶ କୁମାର।’ ଏହି ପୋଷ୍ଟ ମାଧ୍ୟମରେ, RJD ନୀତିଶ କୁମାରଙ୍କ ଧର୍ମନିରପେକ୍ଷ ଯୋଗ୍ୟତାକୁ କଟାକ୍ଷ କରିବାକୁ ଚେଷ୍ଟା କରୁଛି, ଏହା ଦେଖାଇ ଯେ ବିଲ୍ ଉପରେ ବିଜେପି ସହିତ ସମର୍ଥନ କରି, ଜେଡି(ୟୁ) ମୁଖ୍ୟ ଆରଏସଏସ ବିଚାରଧାରା ଦ୍ୱାରା ପ୍ରଭାବିତ ହୋଇଥିଲେ।

ୱାକଫ ବିଲ୍ ପାରିତ ହେବା ପରେ ଜେଡି(ୟୁ)ର ମୁସଲିମ ନେତାମାନଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି। ଏହି ବିଲ୍ ୱାକଫ ସମ୍ପତ୍ତିର ନିୟନ୍ତ୍ରଣ ଏବଂ ସେଗୁଡ଼ିକ ସହିତ ଜଡିତ ବିବାଦର ସମାଧାନରେ ସରକାରଙ୍କ ଭୂମିକା ବୃଦ୍ଧି ଉପରେ ଗୁରୁତ୍ୱାରୋପ କରେ।

ୱାକଫ୍ ବିଲ୍ ଗୃହୀତ ହେବାରେ ଲୋକସଭାରେ ଯଥାକ୍ରମେ ଜେଡି(ୟୁ) ଏବଂ ଟିଡିପିର ୧୨ ଏବଂ ୧୬ ସାଂସଦଙ୍କ ସମର୍ଥନ ଗୁରୁତ୍ୱପୂର୍ଣ୍ଣ ଥିଲା। ପ୍ରତିବାଦ ସ୍ୱରୂପ ଏପର୍ଯ୍ୟନ୍ତ ପାଞ୍ଚ ଜଣ ନେତା ଦଳରୁ ଇସ୍ତଫା ଦେଇସାରିଛନ୍ତି। ଏଥିମଧ୍ୟରେ ମହମ୍ମଦ କାସୀମ ଅନସାରୀ, ମହମ୍ମଦ ଶାହନାୱାଜ ମଲିକ ଏବଂ ମହମ୍ମଦ ତାବରେଜ ସିଦ୍ଦିକି ଅନ୍ତର୍ଭୁକ୍ତ। ଜେଡି(ୟୁ)ର ଜାତୀୟ ମୁଖପାତ୍ର ରାଜୀବ ରଞ୍ଜନ ପ୍ରସାଦ କହିଛନ୍ତି ଯେ କାସିମ ଅନସାରି କିମ୍ବା ଶାହନୱାଜ ମଲିକ କେହି “ଆମର କର୍ମୀ” ନୁହନ୍ତି।

ଅନେକ ମୁସଲିମ ନେତା ମଧ୍ୟ ନୀତିଶଙ୍କ ବିଲ୍ ପ୍ରତି ସମର୍ଥନ ଉପରେ ସାଧାରଣରେ ଅସନ୍ତୋଷ ପ୍ରକାଶ କରିଛନ୍ତି। ତାଙ୍କ ମତକୁ ସମାଲୋଚନା କରିଥିବା ଲୋକଙ୍କ ମଧ୍ୟରେ ବରିଷ୍ଠ ନେତା ଗୁଲାମ ଗୌସ ଏବଂ ପୂର୍ବତନ ରାଜ୍ୟସଭା ସାଂସଦ ଗୁଲାମ ରସୁଲ ବାଲିୟାଭି ମଧ୍ୟ ଅଛନ୍ତି। ବିହାରର କିଛି ମୁସଲିମ ନେତା ମଧ୍ୟ ସୂଚିତ କରିଛନ୍ତି ଯେ ସେମାନେ ସୁପ୍ରିମକୋର୍ଟରେ ୱାକଫ ବିଲକୁ ଚ୍ୟାଲେଞ୍ଜ କରିବେ। ବିହାରର ଜନସଂଖ୍ୟାର ପ୍ରାୟ ୧୭% ମୁସଲମାନ ଏବଂ ଜେଡି(ୟୁ) ପାରମ୍ପରିକ ଭାବରେ ଏହି ସମ୍ପ୍ରଦାୟର ସମର୍ଥନ ପାଇଆସିଛି। ଚଳିତ ବର୍ଷ ନଭେମ୍ବରରେ ବିହାରରେ ବିଧାନସଭା ନିର୍ବାଚନ ଅନୁଷ୍ଠିତ ହେବାକୁ ଯାଉଛି। ଏପରି ପରିସ୍ଥିତିରେ, ୱାକଫ ସଂଶୋଧନ ଆଇନ ଉପରେ ଆରଜେଡି ବିଜେପି ଏବଂ ନୀତିଶ କୁମାରଙ୍କୁ କଡ଼ା ଆକ୍ରମଣ କରିବା ଆରମ୍ଭ କରିଛି।

ଅଧିକ ଗରମରେ ବି ଖରାପ ହେବନି ଚୀନର ଏହି ଟମାଟ

ନନ୍ଦିଘୋଷ ବ୍ୟୁରୋ :  ଦୀନକୁ ଦିନ ତାପମାତ୍ରା ବଢିବାରେ ଲାଗିଛି । ଉତ୍ତାପ ଯେତେ ବଢୁଛି ଫସଲ ଉପରେ ସେତିକି ପ୍ରଭାବ ପଡୁଛି । ଐକ ଗବେଷଣାରୁ ଜଣାପଡିଛି, ଯଦି ୧ ଡିଗ୍ରୀ ତାପମାତ୍ରା ବଢୁଛି ତେବେ ଉତ୍ପାଦନ ୬ରୁ ୮ ପ୍ରତିଶତ କମିବା ସମ୍ଭାବନା ରହିଛି । ଏହି ସମୟରେ କୃଷି ଏବଂ ଖାଦ୍ୟ ସୁରକ୍ଷା ପାଇଁ ଉଦ୍ଭିଦଗୁଡ଼ିକର ତାପ ସହ୍ୟ କରିବାର କ୍ଷମତା ଅତ୍ୟନ୍ତ ଗୁରୁତ୍ୱପୂର୍ଣ୍ଣ ହୋଇଯାଇଛି।

ଏବେ ଚୀନ୍‌ର ଚାଇନିଜ୍ ଏକାଡେମୀ ଅଫ୍ ସାଇନ୍ସ‌ର ଇନଷ୍ଟିଚ୍ୟୁଟ୍ ଅଫ୍ ଜେନେଟିକ୍ସ ଆଣ୍ଡ୍ ଡେଭଲପମେଣ୍ଟାଲ୍ ବାୟୋଲୋଜିର ପ୍ରଫେସର ଜୁ କାଓଙ୍କ ଦଳ ଏହି ଦିଗରେ ଏକ ପ୍ରମୁଖ ସଫଳତା ହାସଲ କରିଛନ୍ତି। ସେ ଟମାଟୋ ଗଛରେ ଏକ ନୂତନ ଜୈବିକ ପ୍ରକ୍ରିୟା ଆବିଷ୍କାର କରିଛନ୍ତି। ଯାହା ସେମାନଙ୍କୁ ପ୍ରଚଣ୍ଡ ଗରମରେ ମଧ୍ୟ ବୃଦ୍ଧି ଏବଂ ଅମଳ ବଜାୟ ରଖିବାରେ ସାହାଯ୍ୟ କରେ । ଅର୍ଥାତ୍ ଏହା ଗରମ ସାମ୍ନା କରିବା ସମୟରେ ମଧ୍ୟ ବଢ଼ିପାରିବ। ଏହି ଗବେଷଣା ଏପ୍ରିଲ ୨ ତାରିଖରେ ଡେଭଲପମେଣ୍ଟାଲ୍ ସେଲ୍ ଜର୍ଣ୍ଣାଲରେ ପ୍ରକାଶିତ ହୋଇଥିଲା।

ଗବେଷଣା ଅନୁଯାୟୀ, ଯମାଟୋ ଗଛରେ ଥିବା ‘ସୁଟ୍ ଆପିକାଲ ମେରିଷ୍ଟେମ୍’ ଅର୍ଥାତ୍ ଶୀର୍ଷରେ ଥିବା ପତ୍ର ଓ ଫୁଲ ଗଠନ ପ୍ରକ୍ରିୟାକୁ ନିୟନ୍ତ୍ରଣ କରୁଥଇବା ଷ୍ଟେମ୍ କୋଷଗୁଡି, ଗରମରେ ସବୁଠାରୁ ଅଧିକ ପ୍ରଭାବିତ ହୋଇଥାଏ । ୃଧିକ ଗରମ ହେତୁ ଷ୍ଟlମ୍ କୋଷଗୁଡିକରେ ଅଧିକ କ୍ଷତି ପହଞ୍ଚିଥାଏ  । ଯାହା ଫଲରେ ଗଛ ବଢିବାରେ ବାଧା ସୃଷ୍ଟି ହେବା ସହ ଗଛ ମଧ୍ୟ ମରିଯାଇଥାଏ ।

କିନ୍ତୁ ପ୍ରଫେସର ଜୁ କାଓଙ୍କ ଟିମ୍ ଜାଣିପାରିଲେ ଯେ ଗ୍ରୀଷ୍ମ ଋତୁରେ, ଉଦ୍ଭିଦ ଭିତରେ ‘ପ୍ରତିକ୍ରିୟାଶୀଳ ଅମ୍ଳଜାନ ପ୍ରଜାତି’ ଗଠିତ ହୁଏ, ଯାହା ଏକ ନିର୍ଦ୍ଦିଷ୍ଟ ପ୍ରୋଟିନ୍ TMFକୁ ସକ୍ରିୟ କରେ। ଏହି TMF ଗଛକୁ ଅସ୍ଥାୟୀ ଭାବରେ ଫୁଲ ଫୁଟିବା ବନ୍ଦ କରିବାକୁ ସଙ୍କେତ ଦିଏ, ଯାହା ଫଳରେ ଗଛଟି ଗ୍ରୀଷ୍ମ ଋତୁରେ “ନିଷ୍କ୍ରିୟତା” ଅବସ୍ଥାକୁ ଚାଲିଯାଏ। ଏହାର ଅର୍ଥ ହେଉଛି ଏହା ନିଜକୁ ବନ୍ଦ କରିଦିଏ ଏବଂ ତାପମାତ୍ରା ସ୍ୱାଭାବିକ ହେବା ମାତ୍ରେ, ଏହା ପୁଣି ବଢ଼ିବା ଏବଂ ଫୁଲ ଫୁଟିବା ଆରମ୍ଭ କରେ।

ଏହି ରଣନୀତି ପ୍ରଥମ ଫଳ ଉତ୍ପାଦନରେ ୩୪ ରୁ ୬୩ ପ୍ରତିଶତ ହ୍ରାସକୁ ରୋକିପାରିବ। ବୈଜ୍ଞାନିକମାନେ ବିଶ୍ୱାସ କରନ୍ତି ଯେ ଏହି ଆବିଷ୍କାର ଜଳବାୟୁ ପରିବର୍ତ୍ତନ ଯୁଗରେ ଏପରି ଫସଲ ବିକଶିତ କରିବା ଦିଗରେ ଏକ ବଡ଼ ପଦକ୍ଷେପ, ଯାହା କଠିନ ପରିସ୍ଥିତିରେ ମଧ୍ୟ ଭଲ ଉତ୍ପାଦନ ଦେଇପାରିବ।  ।

ଓଡ଼ିଆ ବଦଳରେ ଇଂରାଜୀରେ ଲେଖାଯାଉଛି ନାମ ଫଳକ

ରାଉରକେଲା : ରାଜ୍ୟ ସରକାର ଓଡିଆ ପକ୍ଷ ପାଳନ କରିବା ସହ ଓଡିଆ ଅସ୍ମିତା କଥା କହୁଥିଲେ। ହେଲେ ଓଡି଼ଆ ଅସ୍ମିତା ରାଉରକେଲାରେ ପ୍ରହସନରେ ପରିଣତ ହୋଇଛି । ରାସ୍ତା କଡରେ ଲଗାଯାଇଥିବା ସରକାରୀ ଵିଜ୍ଞାପନ ହେଉ କି ବେସରକାରୀ ଓ ସରକାରୀ କାର୍ଯ୍ୟାଳୟ । ବ୍ୟବସାୟିକ ପ୍ରତିଷ୍ଠାନରେ ନାମଫଳକ ଓଡିଆ ଵଦଳରେ ଇଂରାଜୀରେ ଲେଖାଯାଇଥିବା ଅଭିଯୋଗ ହେଉଛି । ରାଜ୍ୟ ସରକାରଙ୍କ ଶ୍ରମ ଵିଭାଗ ପକ୍ଷରୁ ସଚେତନତା ରଥ ଵାହାର କରାଯାଇ ଓଡିଆରେ ନାମ ଫଳକ ଲେଖିବା ପାଇଁ ସଚେତନ କରାଯାଉଥିଲେ ମଧ୍ୟ   ଏହାର ବ୍ୟତିକ୍ରମ ଦେଖିବାକୁ ମିଳିଛି । ରାଉରକେଲାରେ ଓଡିଆ ଅସ୍ମିତା କେଵଳ ପ୍ରଚାରରେ ସିମିତ ଥିବା ରାଉରକେଲା ସହରବାସୀ ଅଭିଯୋଗ କରିଛନ୍ତି । ନାମଫଳକ ଓଡିଆ ଵଦଳରେ ଇଂରାଜୀରେ ଫଳକ ଲଗାଯାଉଥିବାରୁ ରାଉରକେଲା ସହରବାସୀଙ୍କ ମଧ୍ୟରେ ଅସନ୍ତୋଷ ସୃଷ୍ଟି ହୋଇଛି। ସେପଟେ ଓଡିଆରେ ନାମ ଫଳକ ନଲେଖିଲେ ଦୃଢ କାର୍ଯ୍ୟନୁଷ୍ଠାନ ସହିତ ଜୋରିମାନା ଓ ଲାଇସେନ୍ସ ରଦ୍ଧ କରାଯିବାର ନିୟମ ରହିଛି। ପ୍ରଥମଥର ଖିଲାପକାରୀଙ୍କୁ ୫ ହଜାର ଓ ଦ୍ବିତୀୟ ଥର ଖିଲାପକାରୀଙ୍କୁ ୨୫ ହଜାର ଟଙ୍କା ଜୋରିମାନା ଵ୍ୟଵସ୍ଥା ରହିଛି।ଓଡିଆରେ ନାମ ଫଳକ ନଲେଖିଲେ ଶ୍ରମ ଵିଭାଗ ପକ୍ଷରୁ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉଥିବା ଯୁଗ୍ମ ଶ୍ରମ କମିଶନର କହିଛନ୍ତି।

ଦାଦନ ଖଟିବାକୁ ଯାଇ ଶବ ହୋଇ ଫେରିଲେ ଯୁବକ

ଜି ଉଦୟଗିରି : ପରିବାର ପ୍ରତିପୋଷଣ ଲାଗି ଅନ୍ୟ ରାଜ୍ୟକୁ ଦାଦନ ଖଟିବାକୁ ଯାଇଥିଲେ। ହେଲେ ଶବ ହୋଇ ଫେରିଲେ ଯୁବକ । କେରଳରୁ କନ୍ଧମାଳ ଟିକାବାଲି ଅଏଂଚଳରୁ ଆସିଛି ଯୁବକଙ୍କ ମୃତଦେହ। ମୃତକ ହେଲେ ଟିକାବାଲି ବ୍ଲକ୍ ଗାଡ଼ିଙ୍ଗିଆ ପଞ୍ଚାୟତର ପାଙ୍ଗାନାଜୁ ଗାଁର ୩୨ ବର୍ଷୀୟ ସୁଜିତ କୁମାର ପ୍ରଧାନ। କେରଳରେ କାମ କରୁଥିଲେ। ସବୁଦିନ ଭଳି ଅନ୍ୟ କର୍ମଚାରୀମାନଙ୍କ ସହ ମିଶି କାମ କରୁଥିବାବେଳେ ବିଦ୍ୟୁତ୍ ଆଘାତରେ ଗୁରୁତର ହୋଇପଡ଼ିଥିଲେ ସୁଜିତ। ସେଠାରେ ଥିବା କର୍ମଚାରୀମାନେ କମ୍ପାନୀ ମାଲିକଙ୍କୁ ଜଣାଇବା ସହ ତୁରନ୍ତ ନିକଟସ୍ଥ ମେଡ଼ିକାଲକୁ ନେଇଥିଲେ। କିନ୍ତୁ ସେଠାରେ ଡ଼ାକ୍ତର ସୁଜିତଙ୍କୁ ମୃତ ଘୋଷଣା କରିଥିଲେ। ପରେ ସମ୍ପୃକ୍ତ କମ୍ପାନୀ କର୍ତ୍ତୃପକ୍ଷ ସୁଜିତଙ୍କ ମରଶରୀରକୁ ବିମାନ ଯୋଗେ ଭୁବନେଶ୍ୱର ପଠାଇବା ପରେ ସେଠାରୁ ଆମ୍ବୁଲାନ୍ସ ଯୋଗେ ଗତକାଲି ଟିକାବାଲି ବ୍ଲକ୍ ଗାଡ଼ିଙ୍ଗିଆ ପଞ୍ଚାୟତର ପାଙ୍ଗାନାଜୁ ଗାଁରେ ପହଁଚିଥିଲା। ପରିବାର ଲୋକେ ସୁଜିତଙ୍କ ଶେଷକୃତ୍ୟ କରିଥିବା ଜଣାପଡ଼ିଛି।ଘଟଣାକୁ ନେଇ ଶୋକାକୂଳ ପରିବେଶ ସୃଷ୍ଟି ହୋଇଛି।