spot_img
Home Blog Page 1149

ପୁଣିଥରେ ନବୀନ ମଡେଲକୁ ନୀତି ଆୟୋଗଙ୍କ ପ୍ରଶଂସା

ଭୁବନେଶ୍ବର : ସରକାର ବଦଳିଛି । ହେଲେ ନବୀନ ନୀତିରେ ଏବେ ବି ଶତମୁଖ ନୀତି ଆୟୋଗ । ପ୍ରକାଶ ପାଇଛି ୨୦୨୫ ନୀତି ଆୟୋଗ ବିତ୍ତୀୟ ସ୍ବାସ୍ଥ୍ୟ ସୂଚକାଙ୍କ ରିପୋର୍ଟ । ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ଶାସନ ସମୟରେ ଓଡ଼ିଶା ଆର୍ଥିକ ପରିଚାଳନାରେ ସବୁ ରାଜ୍ୟଠୁ ଆଗରେ । ୨୦୨୨-୨୩ ଆର୍ଥିକ ବର୍ଷରେ ଓଡ଼ିଶା ବିତ୍ତୀୟ ସ୍ବାସ୍ଥ୍ୟ ସୂଚକାଙ୍କରେ ୬୭.୮ ପଏଣ୍ଟ ପାଇ ଦେଶରେ ଏକ ନମ୍ବର ପୋଜିସନ ପାଇଛି । ଖୋଦ ବିଜେପି ଶାସିତ ଡବଲ ଇଞ୍ଜିନ ରାଜ୍ୟମାନେ ଓଡ଼ିଶାଠାରୁ ବହୁ ପଛରେ ରହିଛନ୍ତି । ନୀତି ଆୟୋଗଙ୍କ ରିପୋର୍ଟ ପୁଣି ଥରେ ନବୀନଙ୍କ ଆର୍ଥିକ ସୁପରିଚାଳନା ନୀତିକୁ ମୋହର ମାରିଛନ୍ତି । ଗୁଜରାଟ ୫ ନମ୍ବର ସ୍ଥାନରେ ଥିବାବେଳେ ଉତ୍ତରପ୍ରଦେଶ ୭ ନମ୍ବର ଓ ମଧ୍ୟପ୍ରଦେଶ ୯ ନମ୍ବର ସ୍ଥାନରେ ରହିଛି । ୨୦୨୪ରେ ସରକାର ପରିବର୍ତ୍ତନ ହୋଇଛି ସତ, କିନ୍ତୁ ଏବର ଡବଲ ଇଞ୍ଜିନ ସରକାର ଉତ୍ତରାଧିକାରୀ ସୂତ୍ରରେ ନବୀନଙ୍କ ଆର୍ଥିକ ସୁପରିଚାଳନାର ଫଳ ଅମଳ କରୁଛନ୍ତି ବୋଲି ବିଜେଡି ଦାବି କରିଛି । ଏବର ସରକାର ଅବିଚାରିତ ଭାବେ ଋଣ କରିଚାଲିଛନ୍ତି । ଫଳରେ ରାଜ୍ୟର ବିତ୍ତୀୟ ସ୍ବାସ୍ଥ୍ୟ ବିଗିଡ଼ିବାକୁ ଯାଉଛି । ଏ ଦୁର୍ବୁଦ୍ଧି ରାଜ୍ୟ ସରକାରଙ୍କୁ କେନ୍ଦ୍ରରୁ ମିଳିଛି । ଦେଶର ଅଭିବୃଦ୍ଧି ଆଗରେ ମୁଣ୍ଡପିଛା ଆୟରେ ୧୪୦ ତମ ସ୍ଥାନରେ ରହିଛି । ମୋହନ ସରକାର ଚାଣକ୍ୟ ନୀତିରେ ନ ଯାଇ ଚାର୍ବାକ ନୀତିରେ ଚାଲିଛି । ଖୋଦ କଂଗ୍ରେସ ମଧ୍ୟ ନବୀନଙ୍କ ଆର୍ଥିକ ପରିଚାଳନାକୁ ପ୍ରଶଂସା କରିଛି ।…

ନବୀନ ପଟ୍ଟନାୟକଙ୍କ ଆର୍ଥିକ ପରିଚାଳନାର ୪ଟି ଥିଲା ମୁଖ୍ୟ ଦିଗ । ଖୋଲାବଜାରରୁ ଅଧିକ ସୁଧରେ ଋଣ ନିଆଯାଉନଥିଲା । କେବଳ ଆଇଏମ୍ଏଫ, ବିଶ୍ବ ବ୍ୟାଙ୍କ, ଏଡିବିରୁ ଶୂନରୁ ୨ ପ୍ରତିଶତ ହାରରେ ନିଆଯାଉଥିଲା ଋଣ । ପୁଞ୍ଜିଗତ ବ୍ୟୟକୁ ଗୁରୁତ୍ବ ଦିଆଯାଇ ରାଜ୍ୟର ଆୟକୁ ବୃଦ୍ଧି କରାଯାଇଥିଲା । ଲୋୟର ସୁକତେଲ, ପାର୍ବତୀ ଗିରି ମେଗା ଜଳସେଚନ ପ୍ରକଳ୍ପଠୁ ଆରମ୍ଭ କରି ବିଜୁ ଏକ୍ସପ୍ରେସ ଓ୍ବେ, ବିଏସ୍କେଓ୍ବାଇ, ଶିକ୍ଷା ସହାୟତା ରାଜ୍ୟକୁ ନୂଆ ପରିଚୟ ସୃଷ୍ଟି କରୁଥିଲା । ଏଥିରେ ଲୋକଙ୍କ ଆୟ ସଞ୍ଚୟ ହେବା ସହ ଉତ୍ପାଦିକତା ବୃଦ୍ଧି ପାଉଥିଲା । ଫଳରେ ଋଣ ନେବାର ଆବଶ୍ୟକତ ନଥିଲା । ଅନ୍ୟରାଜ୍ୟଙ୍କ ଋଣଭାର ୬ ଲକ୍ଷରୁ ୭ ଲକ୍ଷ କୋଟି ରହିଥିଲା । ସେମାନେ ସୁଧ ବାବଦରେ ୧ ଟଙ୍କା ଆୟର ୫୬ ପଇସା ସୁଧ ପରିଶୋଧରେ ଖର୍ଚ୍ଚ କରୁଥିଲେ । ଓଡ଼ିଶା ଖର୍ଚ୍ଚ ପରିଶୋଧ କରୁଥିଲା ମାତ୍ର ୧୨ ପଇସା । ତୃତୀୟରେ ଯାହା ବି ନୀତି ପ୍ରଣୟନ କରାଯାଉଥିଲା ଫାଇଭ-ଟି ବ୍ୟବସ୍ଥା ଯୋଗୁ ଲୋକଙ୍କ ପାଖରେ ସରକାରଙ୍କ ଯୋଜନାର ସୁଫଳ ପହଞ୍ଚିପାରୁଥିଲା । ଚତୁର୍ଥ କଥାଟି ହେଉଛି ପୂର୍ବତନ ମୁଖ୍ୟମନ୍ତ୍ରୀ ରାଜ୍ୟକୁ ପ୍ରଗତି ପଥରେ ଆଗେଇ ନେବା ସହ ୧ ଟ୍ରିଲିୟନ ଅର୍ଥନୀତିରେ ପହଞ୍ଚାଇବା ପାଇଁ ଭିଜନ ରଖିଥିଲେ । ଯାହାକି ଏବର ସରକାରରେ ଦେଖିବାକୁ ମିଳୁନି । ନବୀନଙ୍କ ସୁଶାସନକୁ ଲୋକେ ଏବେ ବି ମନେ ପକାଉଛନ୍ତି । ବିଗତ ୨୪ ବର୍ଷ ଥିଲା ଓଡ଼ିଶା ଶାସନର ସୁବର୍ଣ୍ଣଯୁଗ । ଯେଉଁଥିରେ ରାଜ୍ୟ ଅର୍ଥନୀତି ୧୮ ଗୁଣ ବଢିଥିଲା ।

ସରିଲା ଅଧିବେଶନ, ଆରମ୍ଭ ହେଲା ହିସାବ ନିକାଶ । ବିଧାୟକଙ୍କ ଫୋକସରେ ନିର୍ବାଚନ ମଣ୍ଡଳୀ

ଭୁବନେଶ୍ବର : ବିଧାନସଭା ଅଧିବେଶନ ସରିବା ପରେ ଆରମ୍ଭ ହୋଇଛି ପୋଷ୍ଟମଟମ। ମୁଖ୍ୟ ବିରୋଧୀ ଦଳ ବିଜେଡି ଉଠାଇ ଥିଲା  ପଛୁଆ ବର୍ଗ ସଂରକ୍ଷଣ, ମହାନଦୀ, ପୋଲାଭରମ, ବିପର୍ଯ୍ୟସ୍ତ ଆଇନ ଶୃଙ୍ଖଳା, ଧାନ କଟନି ଛଟନୀ, ଆଦିବାସୀ ହଷ୍ଟେଲ ସୁରକ୍ଷା, ଶ୍ରୀମନ୍ଦିର ସମସ୍ୟା, ମିଶନ ଶକ୍ତିକୁ ସରକାର ଶକ୍ତିହୀନ କରୁଥିବା ପରି ପ୍ରସଙ୍ଗ । ରାଜ୍ୟ ସ୍ବାର୍ଥ ପ୍ରସଙ୍ଗ ଉଠାଇ ଶାସକ ଦଳକୁ ପ୍ରଶ୍ନ ବି କରିଥିଲା ବିଜେଡି। ଦଳର ବିଧାୟକମାନେ ନିଜ ଅଂଚଳର ସମସ୍ୟା କଥା ଉଠାଇ ସମାଧାନର ବାଟ ଖୋଜିଥିଲେ । ଗୃହ ମୁଲତବୀ ହେବା ପରେ ଦଳର ସୁପ୍ରିମୋ ନବୀନ ପଟ୍ଟନାୟକଙ୍କ ନିର୍ଦ୍ଦେଶରେ ନିର୍ବାଚନୀ ମଣ୍ଡଳୀ ଉପରେ ବିଜେଡି ବିଧାୟକମାନେ ଫୋକସ୍ କରିଛନ୍ତି। ସେପଟେ ଶାସକ ଦଳର ବିଧାୟକ କହିଛନ୍ତି ଏଥରର ଅଧିବେଶନ ବେଶ ଉତ୍ସାହନ ଜନକ ଥିଲା।

ଏହି ଅଧିବେଶନରେ କଂଗ୍ରେସର ୧୪ ବିଧାୟକ ଅଧିକାଂଶ ସମୟ ନାରୀ ନିର୍ଯାତନା ପ୍ରସଙ୍ଗରେ ଉଭୟ ଗୃହ ଭିତରେ ଓ ବାହାରେ କରିଥିଲେ ହଟ୍ଟଗୋଳ। ଅଧିକାଂଶ ସମୟ ଗୃହ ବାହାରେ ରହିଥିଲେ। ସେମାନେ ଖର୍ଚ୍ଚଦାବି ଆଲୋଚନାରେ ଭାଗ ନେଇ ପାରିଲେ ନାହିଁ କି ବିଶ୍ବ ବିଦ୍ୟାଳୟ ସଂଶୋଧନ ବିଲ ଏବଂ ଓଡ଼ିଶା ରାଜ୍ୟ ରାଜପଥ ପ୍ରାଧିକରଣ ବିଲରେ ଦଳର ମତ ରଖିପାରିଲେ ନାହିଁ। ଏହା ବିଜେପିକୁ ବେଶ ସୁହାଇଥିଲା । କଂଗ୍ରେସର ବିଧାୟକ ଗୃହ କାର୍ଯ୍ୟରେ ସାମିଲ ହୋଇନଥିବାରୁ ନିଜ  ଅଂଚଳର ସମସ୍ୟା କଥା ବି ଉଠାଇପାରିନଥିଲେ। ଏବେ ଅଧିବେଶନ ସରିଲା ପରେ ବିଧାୟକମାନେ ନିର୍ବାଚନୀ ମଣ୍ଡଳୀ ଯାଇ ଭୋଟରଙ୍କ ସହ ସମ୍ପର୍କ ଯୋଡ଼ିବାକୁ ଅଣ୍ଟା ଭିଡ଼ିଛନ୍ତି। ଏଥର ବିଧାନସଭାର ବଜେଟ ଅଧିବେଶନରେ ଥିଲା ୨୫ଟି କାର୍ଯ୍ୟ ଦିବସ। ବିଭିନ୍ନ ପ୍ରସଙ୍ଗରେ ପ୍ରଶ୍ନ କରି ସରକାରଙ୍କୁ ଜବାବ ମାଗିଥିଲା ବିଜେଡି।ବିଧାନସଭା ଇତିହାସରେ ପ୍ରଥମ ଥର କଂଗ୍ରେସର ସବୁ ବିଧାୟକ ୭ କାର୍ଯ୍ୟଦିବସରୁ ନିଲମ୍ଵନ ହେବା ପରେ ବ୍ୟାକଫୁଟକୁ ଚାଲିଯାଇଥିଲା ଦଳ ।

ଆହୁରି ସ୍ବଚ୍ଛ ହେବ ରିଅଲ ଇଷ୍ଟେଟ କାରବାର, ସାବାଡ଼ ହେବେ ଠକ ବିଲଡର

ଭୁବନେଶ୍ବର : ରେରା ପଞ୍ଜୀକୃତ ଆପାର୍ଟମେଣ୍ଟର ହେବ ଫରେନସିକ୍ ଅଡିଟ୍ । କ୍ରେତାଙ୍କ ଅର୍ଥକୁ ନେଇ ବିଲଡର ଏପଟ ସେପଟ କଲେ ମିଳିବ ଆର୍ଥିକ ଦଣ୍ଡ । ଓରେରା ପକ୍ଷରୁ ବାହାରିଲା ବିଧିବଦ୍ଧ ବିଜ୍ଞପ୍ତି । ଅନ୍ୟ ରାଜ୍ୟ ଭଳି ଓଡ଼ିଶାରେ ଗଢ଼ାଗଲା ଫରେନସିକ୍ ଅଡିଟ୍ ଟିମ୍ । ଗ୍ରାହକ ହେବେ ଅଧିକ ସଶକ୍ତ, ସାବାଡ ହେବେ ଠକ ବିଲଡର । କଟକ, ଭୁବନେଶ୍ବର ସମେତ ସାରା ରାଜ୍ୟରେ ହେବ କାର୍ଯ୍ୟକାରୀ। ଘର କିଣିବା ପାଇଁ ଗ୍ରାହକ ଅର୍ଥ ପୈଠ କରିବା ପରେ ବି ନିର୍ଦ୍ଧାରିତ ସମୟରେ ସରୁନି ପ୍ରକଳ୍ପ । ବିଭିନ୍ନ ବାହାନା ଦେଖାଇ ବିଲଡର ଜାଣିଶୁଣି ପ୍ରକଳ୍ପ ସାରୁନାହାନ୍ତି । ଗୋଟିଏ ପ୍ରକଳ୍ପରେ କ୍ରେତାଙ୍କ ଠାରୁ ଆଦାୟ ଅର୍ଥ ଅନ୍ୟ ପ୍ରକଳ୍ପରେ ବିନିଯୋଗ କରୁଛନ୍ତି ବିଲଡର । ଏପରିକି ଲୋକଙ୍କ ଅର୍ଥକୁ ନିଜ କାମରେ ବିନିଯୋଗ କରୁଛନ୍ତି ବିଲଡର । ଘର କିଣିବା ପାଇଁ ବ୍ୟାଙ୍କରୁ ଋଣ ଆଣି ବିଲଡରଙ୍କୁ ଅର୍ଥ ଦେଇ ଫସୁଛନ୍ତି ଗ୍ରାହକ। ରେରା କର୍ତ୍ତୃପକ୍ଷଙ୍କ ପାଖରେ ପହଞ୍ଚିଛି ଏଭଳି ଅନେକ ଅଭିଯୋଗ। ଏସବୁକୁ ନଜରରେ ରଖି ଓରେରା ନେଇଛନ୍ତି ଗୁରୁତ୍ବପୂର୍ଣ୍ଣ ନିଷ୍ପତ୍ତି । ଚାର୍ଟାର୍ଡ ଆକାଉଣ୍ଟାଣ୍ଟଙ୍କୁ ନେଇ ଏକ ପ୍ୟାନେଲ କମିଟି ଗଢ଼ିଛନ୍ତି ଓରେରା ।

ପ୍ରକଳ୍ପର ଆର୍ଥିକ ଅଡିଟ, ଫରେନସିକ୍ ଅଡିଟ ଟିମ୍ କଲା ପରେ କୌଣସି ଅନିୟମିତତା ଆସିଲେ ଓରେରା ଆଇନର ଧାରା ୬୩ ଅନୁସାରେ ବିଲଡରଙ୍କୁ ପ୍ରକଳ୍ପ ବଜେଟର ୧୦ ପ୍ରତିଶତ ଜରିମାନା ଦେବାକୁ ପଡ଼ିବ । ଫରେନସିକ୍ ଅଡ଼ିଟ୍ ଟିମର ରିପୋର୍ଟ ଅଦାଲତରେ ମଧ୍ୟ ଗ୍ରହଣୀୟ ହେବ। ଧାରା ୧୩ ଅନୁସାରେ ଘର କିଣିବା ପାଇଁ ଏଗ୍ରିମେଣ୍ଟ କଲା ପରେ କ୍ରେତା ଘର ମୂଲ୍ୟର ୧୦ ପ୍ରତିଶତ ଦେବା କଥା । ସମସ୍ତ ପ୍ରମୋଟର ପ୍ରତି ୩ ମାସରେ ଷ୍ଟାଟସ ରିପୋର୍ଟ ଦେବା ବାଧ୍ୟତାମୂଳକ । ପ୍ରକଳ୍ପର ୭୦ ପ୍ରତିଶତ ଅର୍ଥ ଏକ ସ୍ବତନ୍ତ୍ର ବ୍ୟାଙ୍କ ଆକାଉଣ୍ଟରେ ବିଲଡର ଜମା କରିବା କଥା । ଏହି ଅର୍ଥକୁ ଅନ୍ୟ ପ୍ରକଳ୍ପ ବା ନିଜ କମ୍ପାନୀର ଷ୍ଟାଫ ଦରମା ବାବଦକୁ ଖର୍ଚ୍ଚ କରିପାରିବେ ନାହିଁ। ତୃତୀୟ ପକ୍ଷ ଅଡିଟ ହେଲେ ଗ୍ରାହକମାନେ ଅଧିକ ସଶକ୍ତ ହେବା ସହ ବିଲଡରମାନେ ମଧ୍ୟ ସ୍ବଚ୍ଛତା ଅବଲମ୍ବନ କରିବେ । ଫରେନସିକ୍ ଅଡିଟ ଟିମ୍କୁ ଡେଭଲପର ବା ପ୍ରମୋଟର ମାନେ ସମସ୍ତ ଆବଶ୍ୟକୀୟ ଡକ୍ୟୁମେଣ୍ଟ ପ୍ରଦାନ କରି ଅଡିଟରେ ସମ୍ପୂର୍ଣ୍ଣ ସହଯୋଗ କରିବାକୁ ପଡ଼ିବ। ନଚେତ ରେରା ଆଇନର ଧାରା ୩୫ର ଉଲ୍ଲଂଘନ ବୋଲି ବିବେଚନା କରାଯିବ ।

ବିଧାନସଭା ମୁଲତବି ପରେ ବି ଥମୁନି କଳି, ଗୃହ ବାହାରେ ମୁହାଁମୁହିଁ ବିଜେପି ଓ କଂଗ୍ରେସ

ଭୁବନେଶ୍ବର : ଗୁରୁବାର ବିଧାନସଭାକୁ ଅନିର୍ଦ୍ଦିଷ୍ଟ କାଳ ପାଇଁ ମୁଲତବି କରିଥିଲେ ବାଚସ୍ପତି। ଏହାପରେ ବି ବିଧାନସଭାକୁ ନେଇ ଦୁଇ ଜାତୀୟ ଦଳ ବିଜେପି ଓ କଂଗ୍ରେସ ମଧ୍ୟରେ ଥମୁନି ବାକଯୁଦ୍ଧ। ଗୃହ ମୁଲତବି ପରେ ନିଲମ୍ବିତ କଂଗ୍ରେସ ବିଧାୟକଙ୍କୁ କାହା ନିର୍ଦ୍ଦେଶରେ ପୋଲିସ ରାତି ୨ଟା ୧୫ରେ ଜୋର ଜବରଦସ୍ତ ବିଦା କଲା ? ବରିଷ୍ଠ କଂଗ୍ରେସ ନେତା ପ୍ରସାଦ ହରିଚନ୍ଦନ ଅଭିଯୋଗ କରିଛନ୍ତି ଯେ, ବିଧାନସଭା ମୁଲତବି ହେବା ପରେ ବିଧାୟକଙ୍କୁ ଗୃହରୁ ବିଦା କରିବା ପାଇଁ ବାଚସ୍ପତିଙ୍କର କୌଣସି ଅଧିକାର ନାହିଁ। କଂଗ୍ରେସ ବିଧାୟକଙ୍କ ପ୍ରତି ଏପରି ଅଗଣତାନ୍ତ୍ରିକ କାର୍ଯ୍ୟ କରିଥିବା ବ୍ୟକ୍ତିଙ୍କ ବିରୋଧରେ ତୁରନ୍ତ ରାଜ୍ୟପାଳ କାର୍ଯ୍ୟାନୁଷ୍ଠାନ ନେବାକୁ ଦାବି କରିଛି ଦଳ। ଏନେଇ ରାଜ୍ୟପାଳଙ୍କୁ ସ୍ମାରକପତ୍ର ପ୍ରଦାନ କରାଯାଇଛି। ଦରକାର ପଡ଼ିଲେ ବିଚାର ବିଭାଗୀୟ ଆଶ୍ରୟ ନିଆଯିବ ବୋଲି ଚେତାବନୀ ଦେଇଛି କଂଗ୍ରେସ।

କେବଳ ସେତିକି ନୁହେଁ, ପୋଲିସ ଏବେ ରାଜନୈତିକ କର୍ମୀ ସାଜି କାମ କରୁଛି । ତେଣୁ ପୋଲିସ ନିଜ କାର୍ଯ୍ୟ ସଠିକ ଭାବେ ତୁଲାଇବା ସହ ରାଜନୈତିକ କର୍ମୀ ନସାଜୁ ବୋଲି ପରାମର୍ଶ ଦେଇଛି କଂଗ୍ରେସ। ସେପଟେ କଂଗ୍ରେସର ଅଭିଯୋଗ ପରେ ଉତ୍ତର ରଖିଛି ଶାସକ ବିଜେପି। ବିଧାନସଭାର ନିୟମ ଅନୁସାରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି ବୋଲି କହିଛନ୍ତି ସଂସଦୀୟ ବ୍ୟାପାର ମନ୍ତ୍ରୀ ମୁକେଶ ମହାଲିଙ୍ଗ। ଅନ୍ୟପଟେ ସମସ୍ତଙ୍କୁ ସାଙ୍ଗରେ ନେଇ ଗୃହ ଚାଲିବାର ଥିଲା ବୋଲି ମତ ରଖିଛନ୍ତି ବରିଷ୍ଠ ବିଜେଡି ବିଧାୟକ ଅରୁଣ ସାହୁ। କଂଗ୍ରେସ ବିଧାୟକଙ୍କ ପ୍ରତି ଆକ୍ରୋଶମୂଳକ ପଦକ୍ଷେପକୁ ନେଇ ତେଜିଛି ରାଜନୀତି। ପ୍ରଶ୍ନ ଉଠିଛି, ଗଣତନ୍ତ୍ରକୁ କିଏ କରିଛି ହତ୍ୟା ? ଯାହାକୁ ନେଇ ବିଧାନସଭା ବାହାରେ ମୁହାଁମୁହିଁ ହୋଇଛନ୍ତି ଦୁଇ ଜାତୀୟ ଦଳ ବିଜେପି ଓ କଂଗ୍ରେସ।

ରାତି ପାହିଲେ ବାବା ଲିଙ୍ଗରାଜଙ୍କ ରୁକୁଣା ରଥଯାତ୍ରା

ଭୁବନେଶ୍ବର : ରଥ, ପଥ ପ୍ରସ୍ତୁତ। ଚଳଚଞ୍ଚଳ ଭୁବନେଶ୍ବର ଏକାମ୍ର କ୍ଷେତ୍ର। ପ୍ରଶାସନକୁ ରଥ ହସ୍ତାନ୍ତର ପରେ ହେବ ପ୍ରତିଷ୍ଠା । ଶନିବାର ରଥରେ ଚଢି ଯାତ୍ରାରେ ଯିବେ ବାବା ଲିଙ୍ଗରାଜ ।  ରଥ ଖଳାରେ ଦୀର୍ଘ ୧୦ ଦିନ ହେଲା ୬୫ ଜଣ ମହାରଣା, କମାର, ଓ ବେହେରା ସେବାୟତ ରଥ ନିର୍ମାଣରେ ଲାଗିଥିଲେ । ଚକ ଅଖ, ଦଣ୍ଡା, ୧୬ କଣ ସିଂହା, ୩୩ ପଟା ବୀଜ, ଚାରି ନାହାକା, ୧୬ ଜୋକା, ଘଣ୍ଟି, ଓରା ,ଦଧିନଉତି, ଚାରି ଦୁଆର ଲାଗି ସଜେଇ ହେଲାଣି ରଥ । ରଥର ଉଚ୍ଚତା ପତକା ସହିତ ୪୫ ଫୁଟ ଥିବା ବେଳେ ଚଉଡା ୨୭ ଫୁଟ ରହିଛି । ପ୍ରତିଷ୍ଠା ପରେ ଆରମ୍ଭ ହେବ ଯାତ୍ରା ପ୍ରସ୍ତୁତି ।

ମହାପ୍ରଭୁ ଲିଙ୍ଗରାଜ ଦୋଳଗୋବିନ୍ଦ ଓ ଭଉଣୀ ରୁକୁଣା ରଥରେ ବିଜେ ହୋଇ ମାଉସୀ ଘରକୁ ଯିବେ । ଏ ନେଇ ମିନ୍ଦିର ପ୍ରଶାସନ ପକ୍ଷରୁ ବ୍ଯାପକ ପ୍ରସ୍ତୁତି କରିଛି । ମନ୍ଦିର ପ୍ରଶାସନ ପକ୍ଷରୁ ବାବା ଲିଙ୍ଗରାଜଙ୍କ ନିତୀନିର୍ଘଣ୍ଟ ମଧ୍ଯ କରାଯାଇଛି । ରୁକୁଣା ରଥ ଯାତ୍ରାର ନିତୀକାନ୍ତି ବିଳମ୍ବ ନ ହେବ ସେ ନେଇ ମନ୍ଦିର ପ୍ରଶାସନ ନିଷ୍ପତ୍ତି ନେଇଛି। ରାତିରେ ମରଚିକୁଣ୍ଡ ପାଣି ନିଲାମ ହେବାର କାର୍ଯ୍ଯକ୍ରମ ରହିଛି । ଶନିବାର ଅପରାହ୍ନ ୩ ଟା ରେ ରଥଟଣା ଆରମ୍ଭ ହେବ । ଏହାର ୬ ଦିନ ପରେ ବାହୁଡିବ ଅଣଲେଉଟା ରୁକୁଣା ରଥ ।

ଆରମ୍ଭ ହେଲା ବ୍ରହ୍ମପୁରର ପ୍ରସିଦ୍ଧ ଠାକୁରାଣୀ ଯାତ୍ରା

ବ୍ରହ୍ମପୁର : ପିତ୍ରାଳୟରେ ବୁଢୀ ଠାକୁରାଣୀ । ଦୁଇବର୍ଷ ପରେ ବାପା ଘରକୁ ଆସିଲେ ମାଆ । ଦେଶୀ ବେହେରା ସାହିର ଅସ୍ଥାୟୀ ମନ୍ଦିରରେ ମାଆ ସାଆନ୍ତାଣୀ । ଦର୍ଶନ ପାଇଁ ସକାଳୁ ସକାଳୁ ଛୁଟିଛି ଶ୍ରଦ୍ଧାଳୁଙ୍କ ସୁଅ । ବିଳମ୍ବିତ ରାତିରେ ଦେଶୀ ବେହେରା ଦମ୍ପତି ଚାଙ୍ଗୁଡ଼ିରେ ଇଟମଳା ଫୁଲ ନେଇ ବିଶାଳ ପଟୁଆରରେ ବାହାରିଥିଲେ ମାଆଙ୍କ ମନ୍ଦିର । ଶଙ୍ଖ, ଘଣ୍ଟ, ଢୋଲ, ଚାଙ୍ଗୁ ବାଦ୍ୟରେ ଦୁଲୁକିଥିଲା ପରିବେଶ । ଚଣ୍ଡୀପାଠ, ଦିଗବନ୍ଦନ, ଆଳତୀ, ମନ୍ତ୍ରଣା ପରେ ମାଆଙ୍କୁ ଅର୍ପଣ କରାଯାଇଥିଲା ଫୁଲ । କିଛି ସମୟ ପରେ ପିତ୍ରାଳୟ ଆସିବାକୁ ମଥାରୁ ଫୁଲ ଖସାଇ ସମ୍ମତି ଜଣାଇଥିଲେ ମାଆ । ଦେଶୀ ବେହେରାଙ୍କ ହାତକୁ ଆଜ୍ଞାମାଳ ଆସିବା ପରେ ଏହାକୁ ନେଇ ସାହିକୁ ଫେରିଥିଲେ ଦମ୍ପତି ।

ରାଜାଗୁର୍ଜି, ବଡ଼ବଜାର, ଖାସ୍ପା ସାହି ଓ କାଞ୍ଜି ବେହେରା ସାହି ଦେଇ ମାଆଙ୍କ ଚାଙ୍ଗୁଡ଼ି ଦେଶୀ ବେହେରା ସ୍ଥିତ ଅସ୍ଥାୟୀ ମଣ୍ଡପରେ ପହଞ୍ଚିଥିଲା । ସାହିର ମହିଳାମାନେ ରାସ୍ତାରେ ଗୋବର ପାଣିରେ ଲିପା ପୋଛା କରି ବିଭିନ୍ନ ଝୋଟି ଦେଇ ମାଆଙ୍କୁ ସ୍ବାଗତ କରିଥିଲେ । ସ୍ବତନ୍ତ୍ର ପୂଜାର୍ଚ୍ଚନା ପରେ ମାଙ୍କୁ ଅସ୍ଥାୟୀ ମନ୍ଦିରରେ ସ୍ଥାପନ କରାଯାଇଥିଲା । ଏହା ପରେ ବିଦ୍ଧିବଦ୍ଧ ଭାବେ ଆରମ୍ଭ ହୋଇଛି ଯାତ୍ରା । ଶୁକ୍ରବାର ମାଆଙ୍କ ବିଶ୍ରାମ ପରେ ଶନିବାରଠାରୁ ମାଆ ନଗର ପରିକ୍ରମରେ ବାହାରିବେ । ମୁଖ୍ୟ ଘଟ ସହ ୯ଟି ଘଟ ପ୍ରତିଦିନ ବିଭିନ୍ନ ସାହି ପରିକ୍ରମା କରିବ । ମାଆ ଏଠାରେ ଦୀର୍ଘ ୨୫ ଦିନ ଅବସ୍ଥାନ କରି ଶ୍ରଦ୍ଧାଳୁଙ୍କୁ ଦର୍ଶନ ଦେବେ। ଯାତ୍ରା ପାଇଁ ପୋଲିସ ପକ୍ଷରୁ ବ୍ଯାପକ ବ୍ୟବସ୍ଥା କରାଯାଇଛି ।

ଉଦଘାଟନ ଅପେକ୍ଷାରେ ଦୁଇ ଦୁଇଟି ସ୍ପୋର୍ଟସ କମ୍ପ୍ଲେକ୍ସ, ଅଭ୍ୟାସ ପାଇଁ ସୁଯୋଗ ପାଉନାହାନ୍ତି ଖେଳାଳି

କଟକ : ଖତ ଖାଉଛି କୋଟି କୋଟି ଟଙ୍କାର ସରଞ୍ଜାମ । ଉଦଘାଟନ ଅପେକ୍ଷାରେ ଦୁଇଟି ସ୍ପୋର୍ଟ୍ସ କମ୍ପ୍ଲେକ୍ସ । ଅଭ୍ଯାସ ପାଇଁ ଖେଳାଳିଙ୍କୁ ମିଳୁନି ସୁଯୋଗ । କଟକ ମହାନଦୀ ପଠାରେ ନିର୍ମିତ ଏସସିବି ସାମ୍ପ୍ରସାରଣରେ ସ୍ଥାନାନ୍ତର ହୋଇଥିବା ବୋଷ ଓ ଏସସିବି ବଡ଼ ମେଡିକାଲ ଖେଳ ପଡିଆ । ନିର୍ମାଣ କାର୍ଯ୍ୟ ଆଜିକୁ ଦୀର୍ଘଦିନ ହେବ ସମ୍ପୂର୍ଣ୍ଣ ହୋଇ ନପାରି ପଡ଼ି ରହିଛି । ଫଳରେ ଜିଲ୍ଲାରେ ଖେଳାଳିମାନେ ଅଭ୍ଯାସ ପାଇଁ ଉପଯୁକ୍ତ ଭିତ୍ତିଭୂମି ପାଇପାରୁ ନଥିବା ଅଭିଯୋଗ ହୋଇଛି । ଦୀର୍ଘଦିନ ହେଲା ପଡି ରହିବାରୁ ଖେଳ ଉପକରଣ ମଧ୍ଯ ନଷ୍ଟ ହେବାକୁ ବସିଲାଣି । ଯାହାକୁ ନେଇ ତୀବ୍ର ଅସନ୍ତୋଷ ପ୍ରକାଶ କରିଛନ୍ତି କ୍ରୀଡ଼ାବିତ ।

୨୦୨୨ରେ ପୂର୍ବ ସରକାର ଏହି ଦୁଇଟି ଅତ୍ୟଧୁନିକ ସ୍ପୋର୍ଟ୍ସ କମ୍ପ୍ଲେକ୍ସ ତିଆରି କରିଥିଲେ । ଏଥିପାଇଁ ୨ କୋଟି ୫୭ ଲକ୍ଷ ଖର୍ଚ୍ଚ ହୋଇଥିଲା । ଏହି ପ୍ରକଳ୍ପ ୨୦୨୫ରେ ସମ୍ପୂର୍ଣ୍ଣ ହୋଇଥିଲା । ଦୁଇଟି କ୍ରିକେଟ ଗ୍ରାଉଣ୍ଡ, ଦୁଇଟି ଫୁଟବଲ ଗ୍ରାଉଣ୍ଡ ସହିତ ଟେବୁଲ ଟେନିସ ଆଦି ଗ୍ରାଉଣ୍ଡ ରହିଛି । କ୍ରିକେଟ ଅଭ୍ୟାସ ପାଇଁ ୪ ଟି ପିଚ ନିର୍ମାଣ ହୋଇଛି । ପାର୍କିଂ ବ୍ୟବସ୍ଥା ସାଙ୍ଗକୁ ଦର୍ଶକ ପାଇଁ ମଧ୍ୟ ପାର୍କିଂ ସୁବିଧା ଓ ୩୦ ଫୁଟ ରୋଡ଼ କରାଯାଇଛି । ସେପଟେ ବୋଷର କାମ ସାରିଥିବା ବେଳେ ଏସସିବିର କିଛି କାମ ବାକି ରହିଛି । ମେ ମାସ ସୁଦ୍ଧା ଏହି ଦୁଇଟି ଖେଳପଡିଆ ଉଦଘାଟନ କରିବା ସହିତ ହସ୍ତାନ୍ତର କରାଯିବ ବୋଲି ଜିଲ୍ଲାପାଳ କହିଛନ୍ତି ।

ପୁରୀ ରଥଯାତ୍ରାକୁ ୟୁନେସ୍କୋ ମାନ୍ୟତା ପାଇଁ ପ୍ରାରମ୍ଭିକ ପ୍ରକ୍ରିୟା ଶେଷ

ପୁରୀ : ପୁରୀ ରଥଯାତ୍ରାକୁ ମିଳିବ ବିଶ୍ବ ସାଂସ୍କୃତିକ ଐତିହ୍ୟ ମାନ୍ଯତା । ଶ୍ରଦ୍ଧାଳୁଙ୍କ ସଂଖ୍ୟା ବଢିବା ସହ ପର୍ଯ୍ୟଟନର ହେବ ଅଭିବୃଦ୍ଧି । ବିଶ୍ବର ରଥଯାତ୍ରା ପାଳନ ନେଇ ଉଠୁଥିବା ଦ୍ବନ୍ଦ୍ବର ହେବ ସମାଧାନ । ସଫଳତାର ସହ ପ୍ରଥମ ସୋପାନ ପାର । ରଥଯାତ୍ରାକୁ ଯୁନେସ୍କୋ ଦ୍ବାରା ଇନଟାଞ୍ଜିବଲ କଲଚୁରା ହେରିଟେଜ୍ ଅଫ ହ୍ୟୁମାନିଟି ମାନ୍ଯତା ପ୍ରଦାନ ନେଇ ପ୍ରଥମ ସୋପାନ ସଫଳତାର ସହ ଅତିକ୍ରମ ହୋଇଛି । ୟୁନେସ୍କୋ ମାନ୍ୟତା ପାଇଁ ପ୍ରଥମେ କେନ୍ଦ୍ର ସଂସ୍କୃତି ମନ୍ତ୍ରଣାଳୟ ଅଧିନସ୍ଥ ସଙ୍ଗୀତ ନାଟକ ଏକାଡେମୀର ଜାତୀୟ ଐତିହ୍ଯ ତାଲିକାଭୁକ୍ତ ହେବାକୁ ଥିବାବେଳେ ରଥଯାତ୍ରା ବିଧିବଦ୍ଧ ଭାବେ ତାଲିକାଭୁକ୍ତ ହୋଇଛି । ଶ୍ରୀମନ୍ଦିର ପ୍ରଶାସନ ପକ୍ଷରୁ ଠିକଣା ସମୟରେ ନାମାଙ୍କନ ପତ୍ର ଦାଖଲ ହୋଇଥିଲା । ଗଜପତି ମହାରାଜା ଙ୍କ ମାର୍ଗଦର୍ଶନ ତଥା ମୁଖ୍ୟ ଶାସନ ସଚିବଙ୍କ ନେତୃତ୍ବରେ କମ୍ ଅବଧି ମଧ୍ଯରେ ସମସ୍ତ ପ୍ରସ୍ତୁତି ହୋଇଥିଲା । ସେବାୟତମାନେ ମଧ୍ଯ ଏଥିପାଇଁ ସହଯୋଗ ପ୍ରଦାନ କରିଥିଲେ । ଏଥିପାଇଁ ସମସ୍ତଙ୍କୁ ଧନ୍ଯବାଦ ଜଣାଇଛନ୍ତି ଜିଲ୍ଲାପାଳ।

ଶ୍ରୀମନ୍ଦିର ପ୍ରଶାସନ ପକ୍ଷରୁ ଏଭଳି ପ୍ରୟାସକୁ ସେବାୟତ ଓ ବୁଦ୍ଧିଜୀବୀ ମହଲରେ ସ୍ବାଗତ କରାଯାଇଛି । ପ୍ରତିବର୍ଷ ଆଷାଢ଼ ଶୁକ୍ଳ ଦ୍ୱିତୀୟା ତିଥିରେ ଅନୁଷ୍ଠିତ ହୁଏ ମହାପ୍ରଭୁଙ୍କ ପ୍ରଶିଦ୍ଧ ଘୋଷଯାତ୍ରା । ୟୁନେସ୍କୋ ମାନ୍ୟତା ମିଳିଲେ ବିଦେଶରେ ରଥଯାତ୍ରା ପାଳନ ନେଇ ଦ୍ଵନ୍ଦ ଦୁରୀଭୂତ ହେବା ସହ ରଥଯାତ୍ରାର ମହିମା ସମ୍ପର୍କରେ ଜଗନ୍ନାଥ ପ୍ରେମୀ ଭଲଭାବେ ଅବଗତ ହୋଇପାରିବେ । ଶ୍ରୀକ୍ଷେତ୍ରକୁ ଭକ୍ତ ଓ ଶ୍ରଦ୍ଧାଳୁଙ୍କ ଆଗମନ ବଢିବା ସହ ପର୍ଯ୍ୟଟନର ଅଭିବୃଦ୍ଧି ମଧ୍ୟ ହେବ ବୋଲି କହିଛନ୍ତି ବୁଦ୍ଧିଜୀବୀ । ୟୁନେସ୍କୋର ଏକ ସ୍ବତନ୍ତ୍ର ପ୍ରତିନିଧି ଦଳ ରଥଯାତ୍ରାକୁ ନେଇ ସମସ୍ତ ତଥ୍ୟ ସଂଗ୍ରହ ପରେ ମାନ୍ୟତା ନେଇ ବିଧିବଦ୍ଧ ପ୍ରକାଶ କରାଯିବ ।

ରାଜଧାନୀ ବାଙ୍କୁଆଳ ନଦୀ ବନ୍ଧ ନିକଟ ନିକାଞ୍ଚନ ସ୍ଥାନରେ ଡବଲ ଏନକାଉଣ୍ଟର

ଭୁବନେଶ୍ବର : କ୍ରିମିନାଲଙ୍କୁ କମିଶନରଙ୍କ କଡ଼ା ସନ୍ଦେଶ । ଅପରାଧୀଙ୍କ ଆକ୍ସନକୁ ଡିସିପିଙ୍କ ରିଆକ୍ସନ । ଗୁଳିର ମୁହଁତୋଡ ଜବାବ ଦେଲା ପୋଲିସ୍ । ନିର୍ଜନ ରାତିରେ ନିକାଞ୍ଚନ ସ୍ଥାନରେ ଡବଲ ଏନକାଉଣ୍ଟର ।ହାର୍ଡକୋର କ୍ରିମିନାଲ ସୋନୁ ଯାଦବ ଓ ମନୀଷ ଯାଦବ । ଘର ବିହାରର କଟିଆର । ମାର୍ଚ୍ଚ ୨୦ ରେ ଭୁବନେଶ୍ୱର ଆସିଥିଲେ। ଆସିବା ପରେ ରସୁଲଗଡ଼ ଓ ବଡଗଡ଼ ଅଞ୍ଚଳରୁ ସେହି ରାତିରେ ଲୁଟି ନେଇଥିଲେ ସୁନା ଚେନ୍ । ୪ଟି କେସ ପରେ ପୁରୀ ଚାଲି ଯାଇଥିଲେ। ପୁଣି ଥରେ ଗୁରୁବାର ଦିନ ବାଙ୍କୁଆଳ ନଦୀ ବନ୍ଧ ନିକଟରେ ପହଁଚି ଆଉ ଏକ ଲୁଟ ପାଇଁ ପ୍ଲାନ କରୁଥିବା ବେଳେ ଖବର ପାଇ କ୍ରାଇମ ସ୍ପଟରେ ପହଁଚି ଘାଇଲା କରିଦେଇଥିଲା ସ୍ପେଶାଲ ସ୍କ୍ବାଡ । ତୁରନ୍ତ ପୋଲିସ କମିଶନର ଓ ଭୁବନେଶ୍ୱର ଡିସିପି ହସ୍ପିଟାଲରେ ପହଞ୍ଚିଥିଲେ । ଦୁଇ ଅଭିଯୁକ୍ତଙ୍କୁ ଗୁରୁତର ଅବସ୍ଥାରେ ପ୍ରଥମେ କ୍ୟାପିଟାଲ ହସ୍ପିଟାଲରେ ଓ ପରେ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଛି ।

କ୍ରାଇମ ସ୍ପଟରେ ପଡିଥିବା ଦୁଇ ବନ୍ଧୁକ, ଗୁଳି, ଲୁଟରେ ବ୍ୟବହୃତ ବ୍ୟାଗ ଓ କଳା ରଙ୍ଗର ପଲସର ଗାଡିକୁ ଜବତ କରାଯାଇଛି । ଘଟଣାସ୍ଥଳରେ ଛାନଭିନ କରିଛି ସାଇଣ୍ଟିଫିକ ଟିମ । ଭଲକରି ଦେଖନ୍ତୁ ଏହି ଗାଡି ନମ୍ବରକୁ । କାଲି ରାତି ପ୍ରାୟ ୧୦ ଟା ପରେ ବଡଗଡ଼ ଥାନା ଅନ୍ତର୍ଗତ ବାଙ୍କୁଆଳ ନଦୀ ପଠାରେ ଏନକାଉଣ୍ଟର ହୋଇଥିବା ବେଳେ ଅପରାହ୍ନରେ ଏହି ଗାଡି ଆଚାର୍ଯ୍ୟ ବିହାର ଛକ ଅତିକ୍ରମ କରିଛି । ବିନା ହେଲମେଟ ଯୋଗୁଁ ଗାଡ଼ିରେ ୧ ହଜାର ଟଙ୍କାର ଫାଇନ କଟିଛି । ତେବେ ଏହି ଗାଡି ମଧ୍ୟ, ଚୋରା ବୋଲି ଜଣାପଡିଛି । ସବୁଠାରୁ ବଡ଼କଥା ଏନକାଉଣ୍ଟରର ୨ ଘଣ୍ଟା ପୂର୍ବରୁ କେଶୁରା ଛକରୁ ଶହେ ଗ୍ରାମରୁ ଉର୍ଦ୍ଧ ଏକ ଚେନ ଲୁଟ ହୋଇଛି । ଅଭିଯୁକ୍ତଙ୍କ ଏହି କେସରେ ସମ୍ପୃକ୍ତି ନେଇ ତନାଘନା ଆରମ୍ଭ କରିଛି ପୋଲିସ ।  ଗତ ୩ ମାସ ଭିତରେ ୩ ଟି ଏନକାଉଣ୍ଟର କରିଛି ଭୁବନେଶ୍ୱର ପୋଲିସ । ୪ ଆନ୍ତଃରାଜ୍ୟ ଅପରାଧୀଙ୍କୁ ଘାଇଲା କରାଯାଇଛି । ଅନ୍ୟରାଜ୍ୟ ପୋଲିସ ଲିଙ୍କରେ ସ୍ପେଶାଲ ସ୍କ୍ବାଡ ରହିବା ସହ ସେମାନଙ୍କ ଡାଟାବେସକୁ ସ୍କାନରକୁ ନେଇଛି ।

ହାସ୍ୟ ଅଭିନେତା ନରି ପଣ୍ଡା ଓ ପ୍ରତାପ ମହାନ୍ତିଙ୍କୁ ଅନିର୍ଦ୍ଧିଷ୍ଟ କାଳ ପାଇଁ ବ୍ୟାନ କଲା ଯାତ୍ରା ମାଲିକ ସଂଘ

ଭୁବନେଶ୍ବର : ହାସ୍ୟ ଅଭିନେତା ନରି ପଣ୍ଡା ଓ ପ୍ରତାପ ମହାନ୍ତିଙ୍କୁ ଅନିର୍ଦ୍ଧିଷ୍ଟ କାଳ ପାଇଁ ବ୍ୟାନ କଲା ଯାତ୍ରା ମାଲିକ ସଂଘ । ଭୁବନେଶ୍ବରରେ ଯାତ୍ରା ମାଲିକ ସଂଘର ବୈଠକରେ ଏହି ନିଷ୍ପତ୍ତି ନିଆଯାଇଛି । ଦୀର୍ଘ ସମୟ ଧରି ଆଲୋଚନା ପରେ ଯାତ୍ରା ମାଲିକ ସଂଘ ଏହି ନିଷ୍ପତ୍ତି ନେଇଛି । ତୁଳସୀ ଗଣନାଟ୍ୟର ମାଲିକଙ୍କ ସହ ଚୁକ୍ତି ଟଙ୍କା ନେଇ ପରବର୍ତ୍ତି ସମୟରେ ତାଙ୍କୁ ଦୁର୍ବବ୍ୟବହାର କରିବା ଓ ଥାନାରେ ମାମଲା କରିବା ନରି ପଣ୍ଡା ଓ ପ୍ରତାପ ମହାନ୍ତିଙ୍କୁ ମହଙ୍ଗା ପଡିଛି । ଆସନ୍ତା ଶୁକ୍ରବାର ପୀୟୂଷ ତ୍ରିପାଠୀଙ୍କୁ ନେଇ ଯାତ୍ରା ମାଲିକ ସଂଘର ବୈଠକ ହେବ । ପରବର୍ତ୍ତି ସମୟରେ ତାଙ୍କ ବିରୋଧରେ କଣ କାର୍ଯ୍ୟାନୁଷ୍ଠାନ ନିଆଯିବ ତାହା ଜଣାପଡିବ । ପିୟୁସ ଅସୁସ୍ଥ ଥିବା ତାଙ୍କ ବାପା ଯାତ୍ରା ସଂଘ ଜଣାଇଛନ୍ତି । ତେଣୁ ଆସନ୍ତା ସପ୍ତାହରେ ହେବାକୁ ଥିବା ବୈଠକରେ ଯୋଗଦେବେ ପୀୟୂଷ । ଭୁବନେଶ୍ବରରେ ବିବାଦକୁ ନେଇ ଯାତ୍ରା ମାଲିକ ସଂଘର ବୈଠକ ବସିଥିଲା । ତେବେ ବୈଠକରେ ଏନେଇ ସବିଶେଷ ଆଲୋଚନା ପରେ ଏନେଇ ସୂଚନା ଦେଇଛନ୍ତି ଯାତ୍ରା ମାଲିକ ସଂଘ ସଭାପତି ଭରତ ଭୂଷଣ ଦେଓ । ସେପଟେ ପୀୟୂଷଙ୍କ ବାପା ହରିଶଙ୍କର ତ୍ରିପାଠୀ ଯାତ୍ରା ମାଲିକ ସଂଘର ସଭାପତିଙ୍କୁ ଲେଖିଥିବା ଚିଠିରେ ଜଣାଇଛନ୍ତି ଯେ ତାଙ୍କ ପୁଅ ଆର୍ଥିକ ଓ ପାରିବାରିକ ସମସ୍ୟା ପାଇଁ ଘରେ ରହିବେ । ଅପେରା ସୂର୍ଯ୍ୟମନ୍ଦିର ଓ ସିଂହବାହିନୀ ପାର୍ଟି ବିବାଦରେ ସମସ୍ତେ ସମସ୍ତଙ୍କ କଥା କହିଲେ, ହେଲେ କେହି ତାଙ୍କ କଥା ଶୁଣିଲେ ନାହିଁ । ତାଙ୍କ ପରିବାର ନିଷ୍ପତ୍ତି ଅନୁଯାୟୀ ପୀୟୂଷ ୨୦୨୫-୨୬ରେ ଘରେ ରହିବେ । ତେଣୁ ଦୁଇଟି ଯାକ ଯାତ୍ରା ପାର୍ଟି ମାଲିକ ଦେଇଥିବା ଅଗ୍ରୀମ ଫେରାଇ ନେବାକୁ ସଂଘର ସଭାପତିଙ୍କୁ ଅନୁରୋଧ କରିଛନ୍ତି ପୀୟୂଷଙ୍କ ବାପା । ସେପଟେ ଏନେଇ କୌଣସି ପ୍ରତିକ୍ରିୟା ଦେବାକୁ ମନା କରିଛନ୍ତି ହାସ୍ୟ ଅଭିନେତା ନରି ପଣ୍ଡା ।