ନନ୍ଦିଘୋଷ ବ୍ୟୁରୋ: ପର୍ତ୍ତୁଗାଲ ଓ ସ୍ଲୋଭାକିଆ ଗସ୍ତରେ ରାଷ୍ଟ୍ରପତି ଦ୍ରୌପଦୀ ମୁର୍ମୁ। ପର୍ତ୍ତୁଗାଲ ଗସ୍ତବେଳେ ସେ ପ୍ରତିପକ୍ଷ ମାର୍ସେଲୋ ଡି ସୌସା ଓ ପ୍ରଧାନମନ୍ତ୍ରୀ ଲୁଇ ମଣ୍ଟେନଗ୍ରୋଙ୍କ ସହ ଆଲୋଚନା କରିବେ। ପରେ ସେ ସ୍ଲୋଭିକିଆ ଯାଇ ସେଠାରେ ରାଷ୍ଟ୍ରପତି ପିଟର ପେଲେଗ୍ରିନି ଓ ପ୍ରଧାନମନ୍ତ୍ରୀ ରବର୍ଟ ଫିକୋଙ୍କ ସହ ଆଲୋଚନା କରିବାର କାର୍ଯ୍ୟକ୍ରମ ରହିଛି। ପ୍ରାୟ ୨୭ ବର୍ଷ ପରେ ପର୍ତ୍ତୁଗାଲକୁ ଜଣେ ଭାରତୀୟ ରାଷ୍ଟ୍ରପତି ଭାବେ ଯିବାରେ ଦ୍ରୌପଦୀ ମୁର୍ମୁ ପ୍ରଥମ। ଉଭୟ ଭାରତ ଓ ପର୍ତ୍ତୁଗାଲ ମଧ୍ଯରେ ଉତ୍ତମ କୂଟନୈତିକ ସମ୍ପର୍କ ରହିଛି। ଦୁଇ ରାଷ୍ଟ୍ର ମଧ୍ଯରେ ସହଭାଗିତା ବୃଦ୍ଧି ଲାଗି ଏହି ଗସ୍ତ ଉଦ୍ଦିଷ୍ଟ ବୋଲି ସୂଚନା ମିଳିଛି। ସେହିପରି ସ୍ଲୋଭାକିଆକୁ ଦୀର୍ଘ ୨୯ ବର୍ଷ ପରେ ଜଣେ ଭାରତୀୟ ରାଷ୍ଟ୍ରପତି ବାବେ ଦ୍ରୌପଦୀ ମୁର୍ମୁ ଗସ୍ତ କରୁଛନ୍ତି। ବିଶ୍ବର ଅର୍ଥନୈତିକ ପରିବର୍ତ୍ତନ, ଆମେରିକା ରାଷ୍ଟ୍ରପତି ଡୋନାଲଡ ଟ୍ରମ୍ପଙ୍କ ନୂଆ ଟାରିଫ ନୀତି ଆଦି ସ୍ଥିତିରେ ଦ୍ରୌପଦୀ ମୁର୍ମୁଙ୍କ ଗସ୍ତ ଗୁରୁତ୍ବପୂର୍ଣ୍ଣ ହୋଇଛି ।
ବିଜେପି ଆସିଲା, ବିପଦ ବଢ଼ିଲା, ରାଜ୍ୟରେ ସୃଷ୍ଟି ହେଲାଣି ରକ୍ତାଭାବ
ଭୁବନେଶ୍ବର: ରାଜ୍ୟରୁ ବିଜେଡି ସରକାର ଗଲା ପରେ ଓଡିଶାକୁ ଗୋଟିଏ ପରେ ଗୋଟିଏ ସଙ୍କଟ ମାଡି ଆସୁଛି । ଏହି କ୍ରମରେ ଏବେ ମାଡି ଆସିଛି ରକ୍ତ ସଙ୍କଟ। ରାଜ୍ୟରେ ଏବେ ଦେଖାଦେଇଛି ବ୍ୟାପକ ରକ୍ତାଭାବ । ନା ରକ୍ତଦାନ ବ୍ୟାପକ ହେଉଛି ନା ଅପଡେଟ ହେଉଛି ଇ-ବ୍ଲଡ଼ ପୋର୍ଟାଲ । ଯେଉଁଥିପାଇଁ ଯାଉଛି ଅନେକ ଜୀବନ । ଏପରିକି ବିଜେଡି ସରକାର ଆରମ୍ଭ କରିଥିବା ଜନନୀ ସୁରକ୍ଷା ଓ ଜନନୀ ଶିଶୁ ସୁରକ୍ଷା ସ୍କିମରେ ମାଗଣା ରକ୍ତଦାନ ବ୍ୟବସ୍ଥା ମଧ୍ୟ ବାଟବଣା ହୋଇଛି । ଯାହାକୁ ନେଇ ତେଜିଛି ରାଜନୀତି । ସବୁ ରାଜନୈତିକ ଦଳ ସରକାରଙ୍କ ଏହି ଆଭିମୁଖ୍ୟକୁ ନିନ୍ଦା କରିଥିବା ବେଳେ ସରକାର ତୁରନ୍ତ ରକ୍ତଦାନ ବ୍ୟବସ୍ଥା ଓ ଏ ସମ୍ପର୍କିତ ସ୍କିମକୁ ବ୍ୟବସ୍ଥିତ କରି ଲୋକଙ୍କ ଜୀବନ ବଞ୍ଚାନ୍ତୁ ବୋଲି ଦାବି ହୋଇଛି ।
ବିଜେପି ଆସିଲା ବିପଦ ବଢିଲା । ରାଜ୍ୟରେ ସୃଷ୍ଟି ହେଲାଣି ରକ୍ତାଭାବ । ନବୀନଙ୍କ ପାଇଁ ପ୍ରତିଟି ଜୀବନ ଥିଲା ମୂଲ୍ୟବାନ । ହେଲେ ମୋହନଙ୍କ ସରକାରରେ ମଳିନ ପଡିଛି ମିଶନ । ଯାହାକୁ ନେଇ ବଢିଛି ଅସନ୍ତୋଷ । ଏପରିକି ଠିକ ସମୟରେ ଅପଡେଟ ହେଉନି ଇ-ବ୍ଲଡ଼ ବ୍ୟାଙ୍କ ତଥ୍ୟ। ରାଜ୍ୟର ଅନେକ ରକ୍ତ ଭଣ୍ଡାରରେ ରକ୍ତର ଅଭାବ ଦେଖିବାକୁ ମିଳିଛି । ସାଧାରଣ ରୋଗୀଙ୍କୁ ରକ୍ତ ମିଳିବା ତ ଦୂରର କଥା ଥାଲାସେମିଆ ଓ ସିକିଲସେଲ ଆନିମିଆରେ ପୀଡ଼ିତ ଥିବା ରୋଗୀ ମଧ୍ୟ ହନ୍ତସନ୍ତ ହେଉଛନ୍ତି । ଏପଟେ ଠିକ ସମୟରେ ରକ୍ତଭଣ୍ଡାରର ତଥ୍ୟ ଦିଆଯାଉ ନାହିଁ । ଯାହା ଫଳରେ ଅନେକ ରୋଗୀ ଅସୁବିଧାର ସମ୍ମୁଖୀନ ହେଉଛନ୍ତି । ଏ ନେଇ ରକ୍ତ ନିରାପତ୍ତା ସୁରକ୍ଷା ନିର୍ଦ୍ଦେଶକ ପ୍ରଦୀପ କୁମାର ପାତ୍ରଙ୍କ କହିବା କଥା ରକ୍ତ ସମ୍ପର୍କିତ ଡାଟା ପାଇଁ ଦୁଇଟି ପୋର୍ଟାଲ ରହିଛି । ଗୋଟିଏ ହେଲା ରାଜ୍ୟ ସରକାରଙ୍କ ଇ-ବ୍ଲଡ଼ ବ୍ୟାଙ୍କ ଓ ଅନ୍ୟଟି ହେଉଛି କେନ୍ଦ୍ର ସରକାରଙ୍କ ଇ-ରକ୍ତକୋଷ ପୋର୍ଟାଲ । ଏହି ଦୁଇଟି ପ୍ଲାଟଫର୍ମ ମିଳିତ ଭାବରେ କାମ କରୁଛନ୍ତି । ସେଥିରୁ କେଉଁ ବ୍ଲଡ ବ୍ୟାଙ୍କରେ ବିଭିନ୍ନ ବ୍ଲଡ ଗ୍ରୁପର କେତେ ରକ୍ତ ରହିଛି ସମସ୍ତ ସୂଚନା ଦିଆଯାଇଥାଏ । କିନ୍ତୁ ଏହାକୁ ନେଇ ଏବେ ଦ୍ଵନ୍ଦରେ ପଡ଼ୁଛନ୍ତି ଲୋକେ । ଏହାକୁ ଠିକ ସମୟରେ ଅପଡେଟ କରାଯାଉନାହିଁ । କିଛି ହସ୍ପିଟାଲକୁ ଛାଡିଦେଲେ ବାକି ହସ୍ପିଟାଲର ରକ୍ତଭଣ୍ଡାରର ତଥ୍ୟ ଇ- ବ୍ଲଡ଼ ପୋର୍ଟାଲରେ ରଖାଯାଉ ନାହିଁ। ଏପରିକି ପୂର୍ବ ସରକାର ସମୟରେ ସରକାରଙ୍କ ପ୍ରତ୍ୟକ୍ଷ ଉଦ୍ୟମ ଯୋଗୁ ବ୍ୟାପକ ରକ୍ତଦାନ କାର୍ଯ୍ୟକ୍ରମ ହେଉଥିଲା ଓ ବହୁ ଲୋକେ ସ୍ବେଚ୍ଛାକୃତ ଭାବେ ରକ୍ତଦାନରେ ସାମିଲ ହେଉଥିଲେ । କିନ୍ତୁ ବର୍ତ୍ତମାନ ସରକାରୀ ସ୍ତରରେ ଏହି ଉଦ୍ୟମ ଠପ। ଯାହାର ପରିଣାମ ଲୋକଙ୍କୁ ଭୋଗିବାକୁ ପଡୁଥିବା କହିଛନ୍ତି ରକ୍ତଦାନ କ୍ଷେତ୍ରରେ କାର୍ଯ୍ୟ କରୁଥିବା ସ୍ବେଛାସେବୀ ଅନୁଷ୍ଠାନ।
ସେପଟେ ରାଜ୍ୟରେ ରକ୍ତ ସଂକଟକୁ ନେଇ ବିଜେପି ସରକାରଙ୍କୁ ଦାୟୀ କରିଛନ୍ତି ପ୍ରମୁଖ ରାଜନୈତିକ ଦଳ ଓ ସ୍ୱାସ୍ଥ୍ୟ କ୍ଷେତ୍ରରେ କାର୍ଯ୍ୟ କରୁଥିବା ଅନୁଷ୍ଠାନ । ବିଜେଡି ସରକାର ସମୟରେ ରାଜ୍ୟରେ ରକ୍ତଦାନ ସମ୍ପର୍କିତ ୪/୫ଟି ଯୋଜନା ଚାଲୁଥିଲା । ଜନନୀ ଶିଶୁ ସରକ୍ଷା ଯୋଜନା, ଜନନୀ ସୁରକ୍ଷା ଯୋଜନାରେ ମାଗଣା ରକ୍ତ ଯୋଜନା ହୋଇଥିଲା । ସେହିଭଳି ସିକିଲ ସେଲ ଆନେମିଆ ଓ ଥାଲାସେମିଆ ରୋଗୀଙ୍କ ପାଇଁ ମାଗଣା ରକ୍ତ ଓ ଗସ୍ତଖର୍ଚ୍ଚ ବ୍ୟବସ୍ଥା ଥିଲା । ସେହି ଯୋଜନା ଏବେ ବି ଅଛି କିନ୍ତୁ ଏବେର ସରକାର ଏହାକୁ କାର୍ଯ୍ୟକାରୀ ନ କରି ଦ୍ବନ୍ଦ୍ୱ ଭିତରେ ରଖିଛନ୍ତି । ବ୍ୟବସ୍ଥା ଓ ବଜେଟ ଥିବା ସତ୍ତ୍ୱେ କାହିଁକି ଏସବୁ କାର୍ଯ୍ୟକାରୀ ହେଉନି ବୋଲି ପ୍ରଶ୍ନ ଉଠିଛି । ରାଜ୍ୟରେ ରକ୍ତର ସ୍ଥିତି ନେଇ ଅଡିଟ ହେଉ ଓ ଏହି ତଥ୍ୟ ସାର୍ବଜନୀନ ହେଉ। ବ୍ଲଡ଼ ବ୍ୟାଙ୍କରେ ରକ୍ତ ସମ୍ପର୍କିତ ତଥ୍ୟ ଡିସପ୍ଲେ ପାଇଁ ମଧ୍ୟ ଦାବି ହୋଇଛି। ସେପଟେ ବିଜେଡି ମଧ୍ୟ ଏଭଳି ଏକ ସମ୍ବେଦନଶୀଳ ପ୍ରସଙ୍ଗକୁ ସରକାର ଗୁରୁତ୍ୱ ଦେବାକୁ ଦାବି କରିଛି ।
କଟକ, ଭୁବନେଶ୍ଵର, ବାରିପଦା, ସମ୍ବଲପୁରରେ ଅଧିକ ମାତ୍ରାରେ ରକ୍ତର ଆବଶ୍ୟକତା ରହିଥାଏ। ଏପରିକି ସିକିଲ ସେଲ ପାଇଁ ମଧ୍ୟ ସମ୍ବଲପୁର, ଝାରସୁଗୁଡା, ଗଜପତି ଅନୁଗୋଳ ଆଦି ଜିଲ୍ଲା ଗୁଡିକରେ ମଧ୍ୟ ରକ୍ତର ଅଧିକ ଆବଶ୍ୟକତା ରହିଛି । ସେହିପରି ବିଭିନ୍ନ ମେଜର ଅପରେସନ ଓ ଦୁର୍ଘଟଣା ହେଉ କୌଣସି ଜରୁରୀକାଳିନ ସେବା ମାଧ୍ୟମରେ ମଧ୍ୟ ରକ୍ତର ବ୍ୟବହାର ବୃଦ୍ଧି ପାଉଛି । ୨୦୧୯ ମସିହାରେ ମୋଟ ରକ୍ତ ସଂଗ୍ରହ କରାଯାଇଥିଲା ୪ ଲକ୍ଷ ୨୯ ହଜାର ୮୨୩ ୟୁନିଟ। ସେହିପରି ୨୦୨୦ ରେ ମୋଟ ରକ୍ତ ସଂଗ୍ରହ କରାଯାଇଥିଲା ୩ ଲକ୍ଷ ୮୨ ହଜାର ୧୨୨ ୟୁନିଟ । ୨୦୨୧ ରେ ମୋଟ ରକ୍ତ ସଂଗ୍ରହ କରାଯାଇଥିଲା ୪ ଲକ୍ଷ ୩୦ ହଜାର ୧୫୩ ୟୁନିଟ। ୨୦୨୨ ମସିହାରେ ମୋଟ ରକ୍ତ ସଂଗ୍ରହ ହୋଇଥିଲା ୪ ଲକ୍ଷ ୯୮ ହଜାର ୪୮୨ ୟୁନିଟ। ୨୦୨୩ ରେ ରକ୍ତ ସଂଗ୍ରହ ହୋଇଥିଲା ୫ ଲକ୍ଷ ୩୯ ହଜାର ୩୮୮ ୟୁନିଟ। ସେହିଭଳି ୨୦୨୪ ମସିହାରେ ରକ୍ତ ସଂଗ୍ରହ ହୋଇଥିଲା ୫ ଲକ୍ଷ ୬୦ ହଜାର ୪୨୦ ୟୁନିଟ। ଏବେ ଧୀରେ ଧୀରେ ରକ୍ତଦାନ କ୍ୟାମ୍ପ କମି କମି ଯାଉଥିବା ବେଳେ ସରକାରୀ ଯୋଜନା ବାଟବଣା ହେବାରୁ ରାଜ୍ୟରେ ରକ୍ତ ସଙ୍କଟ ବ୍ୟାପକ ହେବାରେ ଲାଗିଛି ।
ମିଳିଲା ନିଖୋଜ ଏଏସଓ ପ୍ରକାଶ କୁମାରଙ୍କ ପତ୍ତା
ଭୁବନେଶ୍ବର: ନିଖୋଜ ASO ପ୍ରକାଶ କୁମାର ସାହୁଙ୍କ ମିଳିଲା ପତ୍ତା । ତିରୁପତିରେ ଅଛନ୍ତି ପ୍ରକାଶ । ପରିବାରକୁ ନଜଣାଇ ତିରୁପତି ଯାଇଥିବା ସୂଚନା । ଏନେଇ ସୂଚନା ଦେଲେ ଭରତପୁର ଥାନା ଅଧିକାରୀ ଦୀପକ ଖଣ୍ଡାୟତରାୟ । ଗତକାଲି ASO ନିଖୋଜ ନେଇ ପରିବାର ପକ୍ଷରୁ ଏତଲା ହୋଇଥିଲା । ଲୋକସେବା ଭବନରେ କାମ ସାରି ନିଖୋଜ ହୋଇଥିବା ନେଇ ଏତଲା ହୋଇଥିଲା । ଆଜି ତାଙ୍କର ପତ୍ତା ମିଳିଥିବା ସୂଚନା ଦେଇଛି କମିଶନରେଟ ପୋଲିସ ।
ଶୁକ୍ରବାର ଡ୍ୟୁଟି କରିବାକୁ ଲୋକସେବା ଭବନକୁ ଯାଇଥିଲେ। ସନ୍ଧ୍ୟାରେ ଅଫିସରୁ ଫେରିବା କଥା, କିନ୍ତୁ ରାତି ସୁଦ୍ଧା ଫେରି ନଥିଲେ । ଏହା ପରେ ଗତକାଲି ସଂପର୍କୀୟ ଭାଇ ଭରତପୁର ଥାନାରେ ଏତଲା ଦେଇଥିଲେ । ପ୍ରକାଶଙ୍କ ମୋବାଇଲ ସ୍ଵିଚ୍ ଅଫ୍ ଥିବାରୁ ସନ୍ଦେହ ଅଧିକ ଘନୀଭୂତ ହୋଇଥିଲା । ପ୍ରକାଶ ପୂର୍ତ୍ତ ବିଭାଗରେ କାମ କରୁଥିଲେ । ତେବେ ନିଖୋଜର ୨୪ ଘଣ୍ଟା ପରେ ସେ ତିରୁପତି ଯାଇଥିବା ସୂଚନା ମିଳିଛି ।
ଆକ୍ସନ ମୋଡରେ କମିଶନରେଟ ପୋଲିସ: ବାହାର ରାଜ୍ୟର ଅପରାଧୀଙ୍କୁ ଧରିବାକୁ ମାଷ୍ଟରପ୍ଲାନ
ଭୁବନେଶ୍ବର: ବାହାର ରାଜ୍ୟର ଅପରାଧୀଙ୍କୁ ଧରିବାକୁ ମାଷ୍ଟର ପ୍ଲାନ । ଅନ୍ୟ ପୋଲିସ ସହ ଯୋଗାଯୋଗରେ କମିଶନରେଟ ପୋଲିସର ସ୍ପେଶାଲ ସ୍କ୍ବାଡ । ପୋଲିସ ହାତରେ ଆନ୍ତଃରାଜ୍ୟ ଅପରାଧୀଙ୍କ ଡାଟାବେସ୍ । ରାଜଧାନୀରେ ନିକଟ ଅତୀତରେ ଘଟିଥିବା ୫ରୁ ଊର୍ଦ୍ଧ୍ବ କେସରେ ଆନ୍ତଃରାଜ୍ୟ ଅପରାଧୀଙ୍କ ସମ୍ପୃକ୍ତି ସାମ୍ନାକୁ ଆସିବା ପରେ ସେମାନଙ୍କୁ ମାତ୍ ଦେବା ପାଇଁ ଆରମ୍ଭ ହୋଇଛି ବ୍ଲୁ ପ୍ରିଣ୍ଟ । ୪ ଜଣଙ୍କୁ ଏନକାଉଣ୍ଟର ପରେ ଏବେ ଆନ୍ତଃରାଜ୍ୟ ଅପରାଧୀଙ୍କ ମନରେ ପଶିଛି ଛନକା ।
ଖୋଜି ଖୋଜି ଆନ୍ତଃରାଜ୍ୟ ଅପରାଧୀଙ୍କୁ କରାଯାଉଛି ଏନକାଉଣ୍ଟର । ସ୍ପେଶାଲ ସ୍କ୍ବାଡ ହାତରେ ହାର୍ଡକୋର କ୍ରିମିନାଲଙ୍କ ଡାଟାବେସ୍ । ରାଜ୍ୟ ବାହାର ଜେଲରୁ ନିଆଯାଉଛି କ୍ରିମିନାଲଙ୍କ ତଥ୍ୟ । ଅପରାଧୀଙ୍କ କେସ୍ ହିଷ୍ଟ୍ରି ଓ ଗତିବିଧି ଉପରେ ରହିଛି କଡା ନଜର । ଏୟାରଫିଲ୍ଡ ଥାନା ଲବଣଗିରିରୁ ଚେନ ଝାମ୍ପି ମହିଳାଙ୍କ ଜୀବନ ନେଇଗଲେ । ଭୁବନେଶ୍ୱରର ଦୁଇଟି ସ୍ଥାନରୁ ସାଇବର ଠକଙ୍କ ସିମ ବକ୍ସ ଓ ଡିଜିଟାଲ ଡିଭାଇସ ବସାଇ କୋଟି କୋଟି ଲୁଟିଲେ । ବିବାହ ମଣ୍ଡପରୁ ମାରାଥନ ଚୋରି କରି ଘାଇଲା କଲେ । ପୁଣି ଶେଷରେ ନିରଞ୍ଜନ ପଟ୍ଟନାୟକଙ୍କ ଘରେ ପଶି ପୋଲିସ ପାଇଁ ଚ୍ୟାଲେଞ୍ଜ ସୃଷ୍ଟି କଲେ । ସମସ୍ତ ଘଟଣାରେ ଆନ୍ତଃରାଜ୍ୟ ଅପରାଧୀଙ୍କ ସମ୍ପୃକ୍ତି ସାମ୍ନାକୁ ଆସିଲା । ଅପରାଧର ଅଳିନ୍ଦରେ ଅଣନିଶ୍ୱାସୀ ହୋଇପଡିଥିବା ପୋଲିସ ପାଇଁ ସଂଜୀବନୀ ସାଜିଲା ସ୍ପେଶାଲ ସ୍କ୍ବାଡ । ସମସ୍ତ କେସରେ ବାହାର ରାଜ୍ୟକୁ ଯାଇ ଅପରାଧୀଙ୍କୁ ଧରିଲା । ସବୁଠାରୁ ବଡ଼କଥା ହେଉଛି, ଗତ ୩ ମାସ ଭିତରେ ୪ଜଣ ଆନ୍ତଃରାଜ୍ୟ ଅପରାଧୀଙ୍କୁ ଏନକାଉଣ୍ଟର କରିଛି ପୋଲିସ୍ । ଆଗକୁ ମଧ୍ୟ ଏହି ଧାରା ଜାରି ରହିବ ବୋଲି ଚେତାବନୀ ଦେଇଛନ୍ତି ଡିସିପି ।
ବାହାର ରାଜ୍ୟର ପୋଲିସର ସ୍ପେଶାଲ ଟିମ ଓ କମିଶନରେଟ ପୋଲିସର ସ୍ପେଶାଲ ସ୍କ୍ବାଡ ମଧ୍ୟରେ ଏ ନେଇ ଆଲୋଚନା ପରେ ଆନ୍ତଃରାଜ୍ୟ ପେଶାଦାରଙ୍କ କେସ ହିଷ୍ଟ୍ରି ଖୋଜିଛି ସ୍ପେଶାଲ ସ୍କ୍ବାଡ । ନିକଟ ଅତିତରେ ବାହାର ରାଜ୍ୟରେ ଘଟିଥିବା ଅପରାଧରେ ଅପରାଧୀଙ୍କ ଷ୍ଟାଇଲ ଅଫ ଅପରେସନ ବିଷୟରେ ତଥ୍ୟ ଏକାଠି କରିଛି । ବିଭିନ୍ନ ଜେଲରୁ ହାର୍ଡକୋରଙ୍କ ଗତିବିଧି ଉପରେ ନଜର ରଖାଯାଇଛି । ଏପରିକି ଓଡ଼ିଶାର କିଛି ହାର୍ଡକୋର ଙ୍କ ସମ୍ପର୍କରେ ତେଲେଙ୍ଗାନା, ବିହାର, ଆନ୍ଧ୍ର ପ୍ରଦେଶ ଓ କେରଳ ପୋଲିସକୁ ତଥ୍ୟ ଦେଇ ସହଯୋଗର ହାତ ବଢ଼ାଇଛି କମିଶନରେଟ ପୋଲିସ । କେବଳ ସେତିକି ନୁହେଁ, ଆକ୍ସନକୁ ଆହୁରି ବ୍ୟାପକ କରିବା ପାଇଁ ସହର ଭିତରେ ଭଡାଟିଆ ଚିହ୍ନଟ ପ୍ରକ୍ରିୟାକୁ ମଧ୍ୟ ଜୋରଦାର କରାଯାଇଥିବା କହିଛନ୍ତି ଡିସିପି । ଏପରିକି ପେସାଦାର ଅପରାଧୀଙ୍କୁ ଗିରଫ ପରେ ସେମାନଙ୍କ ସମ୍ପତ୍ତି ବାଜ୍ୟାପ୍ତି ନେଇ ମଧ୍ୟ ତ୍ୱରିତ ପ୍ଲାନ ପ୍ରସ୍ତୁତ କରିଛି କମିଶନରେଟ ପୋଲିସର ସ୍ପେଶାଲ ସ୍କ୍ବାଡ ।
ଶିଶୁବାଟିକା ଖୋଲି ସରକାର ନିଜେ ଫସିଲେ, ପିଲାଙ୍କୁ ଫସାଇଲେ
ଭୁବନେଶ୍ବର: ପ୍ରାଥମିକ ବିଦ୍ୟାଳୟରେ ଶିଶୁ ବାଟିକା ଖୋଲି ସରକାର କେବଳ ଫସିଲେ ନାହିଁ, କୁନି କୁନି ପିଲାଙ୍କୁ ବି ଫସାଇ ଦେଲେ। ଆବଶ୍ୟକ ଭିତ୍ତିଭୂମି ଓ ଶିକ୍ଷକ ନଥାଇ କିପରି ଏହି ପଦକ୍ଷେପ ନେଲେ ତାହାକୁ ନେଇ ଉଠିଛି ପ୍ରଶ୍ନ । ଶିଶୁ ବାଟିକା ପିଲାଙ୍କ ଦାୟିତ୍ୱ କିଏ ନେବ ବୋଲି ପ୍ରଶ୍ନ କରିଛି ପ୍ରାଥମିକ ଶିକ୍ଷକ ସଂଘ । ସରକାର ଶିଶୁ ବାଟିକା ଖୋଲି, ଖଡ଼ି ଛୁଆଁଇ ଚୁପ ବସିଗଲେ । ହେଲେ ଏହାକୁ ନେଇ ସାରା ରାଜ୍ୟରେ ସୃଷ୍ଟି ହୋଇଛି ଅସନ୍ତୋଷ ।
ଯେତେ କହିଲେ ବି ଶୁଣିଲେନି । ଜିଦରେ ରାଜ୍ୟର ପ୍ରାଥମିକ ବିଦ୍ୟାଳୟରେ ଖୋଲିଲେ ଶିଶୁ ବାଟିକା । ଖଡ଼ି ଛୁଆଁ ଉତ୍ସବରେ ପ୍ରଚାର ପ୍ରସାର କରି ଅଯଥା ଖର୍ଚ୍ଚ କଲେ । ପିଲା ମଧ୍ୟ ଉତ୍ସାହିତ ହୋଇ ନାମ ଲେଖାଇଲେ । ଏବେ ଖୋଦ ଯେଉଁ ଶିକ୍ଷକମାନେ ପଢ଼ାଇବେ ସେମାନେ ପ୍ରଶ୍ନ କଲେଣି ଆମେ କେମିତି ପଢ଼ାଇବୁ । ଶ୍ରେଣୀ ଗୃହ କାହିଁ । ଶିଶୁ ବାଟିକାକୁ ନେଇ ରାଜ୍ୟରେ ଏଭଳି ଚିତ୍ର କୁନି କୁନି ପିଲା ଓ ଅଭିଭାବକଙ୍କ ମୁଣ୍ଡ ଗୋଲ କରିଦେଇଛି । ଶିକ୍ଷକ ସଂଘର କହିବା କଥା ଯେଉଁ ପ୍ରାଥମିକ ବିଦ୍ୟାଳୟରେ ପାଞ୍ଚଟି ଶ୍ରେଣୀ ଥିଲା ସେଠି ଶିଶୁ ବାଟିକା ଖୋଲିବା ପରେ ଆଉ ଗୋଟିଏ ଶ୍ରେଣୀ ବଢି ଛଅଟି ଶ୍ରେଣୀ ହେଲା । ସେହିପରି ଯେଉଁ ଉଚ୍ଚ ପ୍ରାଥମିକ ବିଦ୍ୟାଳୟରେ ଆଠଟି ଶ୍ରେଣୀ ଥିଲା ସେଠି ୯ଟି ଶ୍ରେଣୀ ହେଲା । ତେଣୁ ଏବେ ପୂର୍ବ ଭିତ୍ତିଭୂମିରେ ଏହି ଶିଶୁ ବାଟିକା ପିଲା ବସି ପଢିବେ କେଉଁଠି । ସେପଟେ ସ୍କୁଲମାନଙ୍କରେ ଏତିକି ଶ୍ରେଣୀରେ ପଢ଼ାଇବାକୁ ଆବଶ୍ୟକ ଶିକ୍ଷକ ନଥିବା ବେଳେ ଏହି କୁନି ପିଲାଙ୍କୁ ପଢ଼ାଇବ କିଏ ବୋଲି ପ୍ରାଥମିକ ଶିକ୍ଷକ ସଂଘ ସିଧାସଳଖ ସରକାରଙ୍କୁ ଏହି ପ୍ରଶ୍ନ କରିଛି । ଏପରିକି ଶିକ୍ଷା ବ୍ୟବସ୍ଥାରେ ଏକ ବଡ଼ ନିଷ୍ପତ୍ତି ନେବା ପୂର୍ବରୁ ଯେଉଁମାନେ ଏହାକୁ କାର୍ଯ୍ୟକାରୀ କରିବେ ସେମାନଙ୍କ ସହ ଆଲୋଚନା ନକରି ଏହି ନୀତି ଲାଗୁ କଲେ ପିଲାମାନେ ହଇରାଣ ହେବେ ଓ ଶିକ୍ଷା ଗଭୀର ଭାବେ ପ୍ରଭାବିତ ହେବ ।
ଅଭିଭାବକ ମହାସଂଘ ମଧ୍ୟ ସରକାରଙ୍କ ଏଭଳି ଜିଦଖୋର ମନୋଭାବ ଓ ସ୍ଥିତିକୁ ନ ବୁଝି ଏକପାଖିଆ ନିଷ୍ପତ୍ତିକୁ କଡା ସମାଲୋଚନା କରିଛି । ନିଜର ଏଜେଣ୍ଡାକୁ କାର୍ଯ୍ୟକାରୀ କରିବା ପାଇଁ ଛୋଟ ପିଲା ଓ ଅଭିଭାବକଙ୍କ ସହ ଖେଳ ଖେଳା ଯାଉଥିବା ଅଭିଯୋଗ ହୋଇଛି । ଖୋଦ ଶିକ୍ଷକମାନେ ପିଲାଙ୍କୁ କେମିତି ପଢ଼ାଇବେ ବୋଲି ପ୍ରଶ୍ନ କରିଥିବାରୁ ଏବେ ପିଲାଙ୍କ ଭାଗ୍ୟ କ’ଣ ହେବ ବୋଲି ପ୍ରଶ୍ନ ଉଠିଛି । ସେପଟେ ରାଜ୍ୟର ଶିକ୍ଷାର ସ୍ଥିତି, ଲୋକଙ୍କ ଜୀବନଧାରଣ ମାନକୁ ନ ଦେଖି ମନଇଚ୍ଛା ଜାତୀୟ ଶିକ୍ଷା ନୀତିକୁ ପିଲାଙ୍କ ଉପରେ ଲଦିଦେବା ରାଜ୍ୟର ଶିକ୍ଷା ବ୍ୟବସ୍ଥାକୁ ବ୍ୟାପକ କ୍ଷତି ପହଞ୍ଚାଇବ ବୋଲି କୁହାଯାଇଛି ।
ଶିକ୍ଷା ବ୍ୟବସ୍ଥା ସହ ଜଡିତ କୌଣସି ଅଂଶୀଦାରଙ୍କ ସହ ଆଲୋଚନା ନ କରି ମନଇଚ୍ଛା ଜିଦରେ ସରକାର ଶିକ୍ଷା ବ୍ୟବସ୍ଥାରେ ପରିବର୍ତ୍ତନ ଆଣିଛନ୍ତି । ଯେଉଁ ପିଲା ଶିଶୁ ବାଟିକାରେ ଆଡ଼ମିଶନ କରୁଛନ୍ତି ସେମାନେ କିଭଳି ଓ କେମିତି ପଢିବେ ତାକୁ ନେଇ ଉଠିଛି ବଡ଼ ପ୍ରଶ୍ନ ।
ନୀତି ଆୟୋଗଙ୍କ ପରେ ନବୀନଙ୍କ ଆର୍ଥିକ ପ୍ରଗତିକୁ ସିଏଜିଙ୍କ ମୋହର
ଭୁବନେଶ୍ବର: ନବୀନଙ୍କ ଶାସନ କାଳରେ ଓଡ଼ିଶାର ଅଭିବୃଦ୍ଧି ୧୨.୩୭ ଥିଲା । ରାଜ୍ୟର ଆର୍ଥିକ ସୁପରିଚାଳନାକୁ ନୀତି ଆୟୋଗଙ୍କ ପରେ ପ୍ରଶଂସା କରିଛନ୍ତି ଭାରତର ମହାଲେଖାକାର । ୨୦୨୩-୨୪ ଆର୍ଥିକ ବର୍ଷ ପାଇଁ ସଦ୍ୟ ପ୍ରକାଶିତ ଆର୍ଥିକ ପ୍ରତିବେଦନରେ ସିଏଜି ପୂର୍ବ ସରକାରଙ୍କ ସଫଳତାକୁ ବଖାଣିଛନ୍ତି । ଅନାଟନ ଅର୍ଥନୀତିକୁ ବଳକା ଅର୍ଥନୀତିରେ ପହଞ୍ଚାଇଥିଲେ ନବୀନ । ବିଶେଷଜ୍ଞ କହିଛନ୍ତି, ରାଜ୍ୟର ଦାରିଦ୍ର୍ୟତାକୁ ସମୂଳେ ବିନାଶ କରିବା ପାଇଁ ୩ଟି ମୁଖ୍ୟ ଦିଗ ଉପରେ କାମ କରିଥିଲେ ପୂର୍ବ ସରକାର । ରାଜ୍ୟର ଆର୍ଥିକ ପ୍ରଗତି ସହିତ ସମସ୍ତଙ୍କ ଆର୍ଥିକ ବିକାଶ । ଭୋକର ଭୂଗୋଳକୁ ପ୍ରାଚୁର୍ଯ୍ୟରେ ପରିଣତ । ସେହିପରି ୨୦୧୯ରୁ ୨୦୨୪ ମଧ୍ୟରେ ଭିତ୍ତିଭୂମି ନିର୍ମାଣ କ୍ଷେତ୍ରରେ ବିଶେଷ ଗୁରୁତ୍ବ ଦେଇଥିବାରୁ ନବୀନଙ୍କ ଶାସନରେ ସମ୍ଭବ ହୋଇପାରିଛି ଆର୍ଥିକ ପ୍ରଗତି ।
ନୀତି ଆୟୋଗଙ୍କ ପରେ ଖୋଦ ଭାରତର ମହାଲେଖାକାର ବା ସିଏଜି ତାଙ୍କ ଆର୍ଥିକ ପ୍ରତିବେଦନରେ ପୂର୍ବ ସରକାରଙ୍କ ଆର୍ଥିକ ସୁପରିଚାଳନାର ହିସାବ ଦେଇଛନ୍ତି । ୨୦୨୩-୨୪ ଆର୍ଥିକ ବର୍ଷର ହିସାବ ଦେଇ ସିଏଜି କହିଛନ୍ତି ଯେ, ଲଗାତାର ଭାବେ ଓଡ଼ିଶାର ଅଭିବୃଦ୍ଧି ହାର ୧୨.୩୭ ପ୍ରତିଶତ ରହିଛି । ରାଜସ୍ବ ବଳକା ୩୦ ହଜାର ୭୬୧ କୋଟି ରହିଥିବା ବେଳେ, ବିତ୍ତୀୟ ନିଅଣ୍ଟ ପରିମାଣ ନିୟମାନୁଯାୟୀ ଥିଲା ୧୪ ହଜାର ୭୪୩ କୋଟି ଟଙ୍କା । ସେହିପରି ରାଜସ୍ବ ବଳକା ପୂର୍ବ ବର୍ଷ ତୁଳନାରେ ବଢିଥିଲା ୫୮.୧୧ ପ୍ରତିଶତ । ରାଜସ୍ବ ସଂଗ୍ରହ ୨୯ ହଜାର ୧୩୧କୁ ବୃଦ୍ଧି ପାଇଥିବା ବେଳେ, ପୁଞ୍ଜିଗତ ବ୍ୟୟ ପ୍ରାୟ ୪୦ ହଜାର କୋଟିରେ ପହଞ୍ଚିଥିଲା । ଯାହାକି ତତ୍କାଳୀନ ବଜେଟର ଏକ ତୃତୀୟାଂଶ । ବିଶେଷକରି ୨୦୧୯ରୁ ୨୦୨୪ ଭିତରେ ରାଜ୍ୟର ଭିତ୍ତିଭୂମି ବିକାଶ ଏପରି କରାଯାଇଥିଲା ଯେ, ଆଗାମୀ ୫୦ ବର୍ଷ ଭିତରେ ଯିଏ ବି ସରକାରରେ ରହିବ ରାଜ୍ୟର ଆର୍ଥିକ ପ୍ରଗତି କ୍ଷେତ୍ରରେ ମନ୍ଥରତା ଆସିବନି । ନବୀନଙ୍କ ଆର୍ଥିକ ସୁପରିଚାଳନା ଦେଶରେ ଏକ ନମ୍ବର ବୋଲି ଦାବି କରିଛନ୍ତି ପୂର୍ବତନ ବିଧାୟକ ଓ ଅର୍ଥନୀତି ବିଶେଷଜ୍ଞ ।
୨୦୦୦ ମସିହାରେ ଦେବାଳିଆ ସ୍ଥିତିରେ ଥିଲା ଓଡ଼ିଶା । ୧୯୯୯ ମହାବାତ୍ୟାରେ ଅଧାରାଜ୍ୟ ଧ୍ବଂସସ୍ତୁପରେ ପରିଣତ ହୋଇଥିଲା । ସେତେବେଳେ ଋଣ ଶୁଝିବାକୁ ଋଣ କରିବାକୁ ପଡୁଥିଲା । କର୍ମଚାରୀଙ୍କୁ ଦରମା ଦେବାକୁ ଅର୍ଥର ଅଭାବ ପଡ଼ୁଥିଲା । କ୍ରୀଡ଼ା ଓ ଭିତ୍ତିଭୂମି କଥା ଛାଡ଼ନ୍ତୁ, ଜଳସେଚନ ଅଭାବରୁ ଅଧା ଉପାନ୍ତ ଅଞ୍ଚଳରେ ଅନାହାରର ବିଭିଷୀକା ଦେଖିବାକୁ ମିଳିଥିଲା । ଏତିକି ବେଳେ, ଖାଦ୍ୟଶସ୍ୟ ଉତ୍ପାଦନରେ ଓଡ଼ିଶାକୁ ସ୍ବାବଲମ୍ବୀ କରିବା କ୍ଷେତ୍ରରେ ପ୍ରଥମ ପଦକ୍ଷେପ ନେଇଥିଲେ ପୂର୍ବତନ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ । ସେତିକି ନୁହେଁ, କିପରି ଦୁର୍ବିପାକକୁ ସଫଳତାର ସହ ମୁକାବିଲା କରିହେବ, ସେ ନେଇ କରିଥିଲେ ବିଦ୍ଧିବଦ୍ଧ ଯୋଜନା । ଗରିବଙ୍କ ପେଟକୁ ଦାନା, ମହିଳାଙ୍କୁ ଆତ୍ମନିର୍ଭର କରିବା ଥିଲା ନବୀନ ସରକାରଙ୍କ ମୂଳ ଆଭିମୁଖ୍ୟ । ସ୍ଥିତି ଏମିତି ହେଲା, ୨୦୦୬-୦୭ ବେଳକୁ ରାଜ୍ୟ ନିଅଣ୍ଟିଆ ସ୍ଥିତିରୁ ବଳକା ରାଜ୍ୟରେ ପରିଣତ ହୋଇଥିଲା ।
କେବଳ କଥାରେ ନୁହଁ କାମରେ । ଏହା ହିଁ ଥିଲା ନବୀନ ଶାସନର ମୂଳମନ୍ତ୍ର । ସିଏଜିଙ୍କ ଆର୍ଥିକ ପ୍ରତିବେଦନ ପ୍ରମାଣ କରୁଛି, ପୂର୍ବ ସରକାରଙ୍କ ସ୍ବଚ୍ଛ ଆର୍ଥିକ ପରିଚାଳନା ।
ବୁଦ୍ଧି ଶିଖିଲା ବିଜେପି: ଆଚରଣ ଓ ଉଚ୍ଚାରଣ ପାଇଁ ନେବେ ଟ୍ରେନିଂ
ଭୁବନେଶ୍ବର: ସରକାର ଗଠନ ପରେ ବି ଟ୍ରାକକୁ ଆସିପାରୁନି ବିଜେପି । ବିଳମ୍ବ ହୋଇ ଚାଲିଛି ରାଜ୍ୟ ସଭାପତି ଚୟନ । ସରକାରର ୧୦ ମାସ ପରେ ବି ହୋଇପାରୁନି ନିଗମ ନିଯୁକ୍ତି । ମନ୍ତ୍ରିମଣ୍ଡଳରେ ବି ୬ ପଦ ଖାଲି ପଡ଼ିଛି । ସମସ୍ୟା ସୃଷ୍ଟି କରୁଛି ଦବଙ୍ଗ ନେତାଙ୍କ ଆଚରଣ ଉଚ୍ଚାରଣ । ଏଭଳି ସ୍ଥିତିରେ ଓଡ଼ିଶା ଆସୁଛନ୍ତି ରାଷ୍ଟ୍ରୀୟ ଅଧ୍ୟକ୍ଷ ଜଗତ ପ୍ରକାଶ ନଡ୍ଡା । ତିନି ଦିନିଆ ଗସ୍ତ ଅବସରରେ ନଡ୍ଡା ଦଳର ବିଧାୟକ, ସାଂସଦ ଓ କର୍ମକର୍ତ୍ତାଙ୍କ ପ୍ରଶିକ୍ଷଣ ଶିବିରରେ ଯୋଗଦେବେ । ତୃଣମୂଳ ସ୍ତରର ନେତାଙ୍କଠାରୁ ଆରମ୍ଭ କରି ଜନ ପ୍ରତିନିଧିଙ୍କୁ ପଢାଇବେ ଶିଷ୍ଟାଚାରର ପାଠ । ସଭାପତି ଓ ନିଗମ ନିଯୁକ୍ତି ନେଇ ବି ଆଲୋଚନା ହେବ ବୋଲି ଜଣାପଡ଼ିଛି ।
ବିଜେପି ନେତା ପଢିବେ ଶିଷ୍ଟାଚାରର ପାଠ । ସରକାର ଆସିଲା ପରେ ଉଶୃଙ୍ଖଳ ହୋଇଥିବା କର୍ମୀ ଶିଖିବେ ସଠିକ୍ ଆଚରଣ ଓ ଉଚ୍ଚାରଣ । ଜାଣିବେ ଭାଷଣ ଦେବାର କଳା କୌଶଳ । ଏଥିପାଇଁ ଆସନ୍ତା ୧୧ରୁ ୧୩ ତାରିଖ ଯାଏଁ ପୁରୀରେ ଆୟୋଜିତ ହେବ ବିଜେପିର ପ୍ରଶିକ୍ଷଣ ଶିବିର । ରାଷ୍ଟ୍ରୀୟ ଅଧ୍ୟକ୍ଷ ଜଗତ ପ୍ରକାଶ ନଡ୍ଡା ନେତାଙ୍କୁ ଶିଖାଇବେ ନୀତି ନୈତିକତାର କଥା । ସରକାର ଗଠନ କରିବାର ୧୦ ମାସ ପରେ ବି ରାଜ୍ୟ ବିଜେପିରେ ସ୍ଥାଣୁ ଅବସ୍ଥା ଜାରି ରହିଛି । ତାରିଖ ପରେ ତାରିଖ ଘୁଞ୍ଚି ଚାଲିଛି, ହେଲେ ହୋଇପାରୁନି ସଭାପତି ଚୟନ । ନିଗମ ନିଯୁକ୍ତି ପାଇଁ ଶତାଧିକ ଆଶାୟୀ ଅନାଇ ବସିଛନ୍ତି, ହେଲେ ବାଟ ଫିଟୁନି । ମନ୍ତ୍ରିମଣ୍ଡଳରେ ବି ଖାଲିଥିବା ପଦ ପୂରଣ ହୋଇପାରୁନି । ଏଭଳି ସ୍ଥିତିରେ ରାଷ୍ଟ୍ରୀୟ ଅଧ୍ୟକ୍ଷଙ୍କ ଓଡ଼ିଶା ଗସ୍ତ ଅନେକ ଗୁରୁତ୍ବ ବହନ କରୁଛି । ଏଥର ଗସ୍ତର ଫୋକସ ହେଉଛି ନେତାଙ୍କ ପାଠଶାଳା ।
ସରକାରକୁ ଆସିଲା ପରେ ବିଜେପି ନେତାଙ୍କ ଗର୍ବ ଅହଙ୍କାର ସୀମା ଟପିଲାଣି । ଲୋକେ ବି ଏହା ଦେଖୁଛନ୍ତି । ସମ୍ବଲପୁର ବିଧାୟକ ଜୟ ନାରାୟଣ ମିଶ୍ର ପୋଲିସକୁ ବାଡ଼େଇବା ପାଇଁ କହିବା ହେଉ କି ମାହାଙ୍ଗା ବିଧାୟକ ସାରଦା ପ୍ରଧାନ ଓ ଧର୍ମଶାଳା ବିଧାୟକ ହିମାଂଶୁ ସାହୁଙ୍କ ଆଚରଣ ପାଇଁ ଦଳ ବ୍ୟାକ ଫୁଟରେ । ତୃଣମୂଳ ସ୍ତରରେ ବିଜେପି କର୍ମୀମାନେ ତହସିଲ, ଥାନା, ବ୍ଲକରେ ଏକ ପ୍ରକାର କ୍ୟାମ୍ପ ପକାଇ ରାଜୁତି ଆରମ୍ଭ କରୁଥିବାର ଅଭିଯୋଗ ହେଉଛି । ସରକାରୀ ଦଳ ହିସାବରେ ନେତାଙ୍କ ଶାଳୀନତା ପବ୍ଲିକ ଲାଇଫରେ ଜରୁରୀ ଥିବାରୁ ଏହା ଉପରେ ଦଳ ଗୁରୁତ୍ବ ଦେଇଛି । ତିନି ଦିନିଆ ପ୍ରଶିକ୍ଷଣ ଶିବିରରେ ନେତା ଓ କର୍ମୀ ଶିଷ୍ଟାଚାରର ପାଠ ପଢିବେ । ନଡ୍ଡାଙ୍କ ସମେତ ଦଳର ଭେଟେରାନ ନେତା ବି ଆଚାର ବ୍ୟବହାର ଉପରେ ଟିପ୍ସ ଦେବେ ।
ଓଡ଼ିଶାରେ ବିଜେପି ଲମ୍ବା ସମୟ ଧରି ଶାସନ କ୍ଷମତାରେ ରହିବାକୁ ଯୋଜନା କରିଥିବାରୁ ନେତା ଓ କର୍ମୀଙ୍କ ଆଚରଣ, ଉଚ୍ଚାରଣ ଉପରେ ଗୁରୁତ୍ବ ଦିଆଯିବା ଜରୁରୀ । ଏହାସହ ଦଳ ଓ ସରକାର ମଧ୍ୟରେ ସମନ୍ବୟ ରଖିବା ଆବଶ୍ୟକ ଥିବାରୁ ରାଷ୍ଟ୍ରୀୟ ନେତୃତ୍ବ ଏହାର ଖସଡ଼ା ପ୍ରସ୍ତୁତ କରୁଛନ୍ତି ।
୪ ବର୍ଷର ଶିଶୁକନ୍ୟାକୁ ୧୭ ବର୍ଷ ନାବାଳକଙ୍କ ଦୁଷ୍କର୍ମ !
ଦେବଗଡ଼: ଦେବଗଡ଼ରେ ଲଜ୍ୟା । ୪ ବର୍ଷର ନାବାଳିକାଙ୍କୁ ଦୁଷ୍କର୍ମ କଲା ୧୭ ବର୍ଷର ନାବାଳକ । ଅଭିଯୁକ୍ତ ନାବାଳିକାଙ୍କ ସମ୍ପର୍କୀୟ ଅଜା ବୋଲି ଜଣାପଡ଼ିଛି । ଥାନାରେ ଅଭିଯୋଗ ପରେ ପୋଲିସ ଅଭିଯୁକ୍ତଙ୍କୁ ଥାନାରେ ଅଟକ ରଖି ଘଟଣାର ତଦନ୍ତ କରୁଛି । ଘଟଣା ଘଟିଛି ରିଆମାଳ ଥାନା ଅଞ୍ଚଳରେ ।
ଅଭିଯୋଗ ଅନୁସରେ, ଗତକାଲି ଶିଶୁଟି ଘର ବାହାରେ ଖେଳୁଥିବା ବେଳେ ମୋବାଇଲ ଦେଖାଇବା ବାହାନାରେ ନାବାଳକ ଜଣଙ୍କ ଡାକି ନେଇ ଦୁଷ୍କର୍ମ କରିଥିଲେ । ଏନେଇ ଶିଶୁକନ୍ୟା ଜଣକ ତାଙ୍କ ମାଆଙ୍କୁ ଜଣାଇବା ପରେ ଥାନାରେ ଲିଖିତ ଅଭିଯୋଗ କରାଯାଇଥିଲା ।
ଶେଷ ଅବସ୍ଥାରେ ପହଞ୍ଚଛି ଗ୍ଲୋବାଲାଇଜେସନ, ଟ୍ରମ୍ପଙ୍କ ପଦକ୍ଷେପ ଯୋଗୁଁ ବିଶ୍ଵରେ ମାନ୍ଦାବସ୍ଥା !
ନନ୍ଦିଘୋଷ ବ୍ୟୁରୋ: ଗ୍ଲୋବାଲାଇଜେସନର ଯୁଗ ସରି ଆସୁଛି କି । ନା ଏହାର ଶେଷ ଆରମ୍ଭ ହୋଇ ଗଲାଣି। ୧୯୯୧ ପରେ ବିଶ୍ଵ ବାଣିଜ୍ୟ କ୍ଷେତ୍ରରେ ଯେଉଁ ଉଦାରୀକରଣ ଓ ବିଭିନ୍ନ ରାଷ୍ଟ୍ର ମଧ୍ୟରେ ଯେଉଁ ସହଯୋଗ ଓ ନିର୍ଭରଶୀଳତା ଥିଲା, ତାହା ଅନ୍ତିମ ପର୍ଯ୍ୟାୟରେ ପହଞ୍ଚିଛି। ଏପରି ଆଶଙ୍କାର କାରଣ ହେଲା ଟ୍ରମ୍ପଙ୍କ ବାଣିଜ୍ୟ ନୀତି ପରେ ସାରା ବିଶ୍ଵରେ ଦେଖାଦେଇଛି ଅନିଶ୍ଚିତତା ଓ ମାନ୍ଦାବସ୍ଥା। ସୂୂଚନା ଅନୁସାରେ ଆଜି ବ୍ରିଟେନ ପ୍ରଧାନମନ୍ତ୍ରୀ କିର୍ ଷ୍ଟାର୍ମର୍ ଘୋଷଣା କରିବେ, ଗ୍ଲୋବାଲାଇଜେସନ ଯୁଗ ଶେଷ ହୋଇଛି। ସେ ସ୍ଵୀକାର କରିଛନ୍ତି ଆମେରିକାର ପଦକ୍ଷେପ ଯୋଗୁଁ ବିଶ୍ୱ ବଜାର ଅନିଶ୍ଚିତତା ଭିତରକୁ ଠେଲି ହୋଇଛି। ଆମେରିକା ଏବେ ଅର୍ଥନୈତିକ ଜାତୀୟତାବାଦକୁ ଧ୍ୟାନ ଦେଉଛି। ଅନ୍ୟ ଦେଶ ବି ଏହାକୁ ଅନୁସରଣ କରିବେ । ଏହା ଦ୍ଵାରା ବିଶ୍ଵରେ ଯେଉଁ ଉଦାରୀକରଣ ଓ ପରସ୍ପର ନିର୍ଭରଶୀଳତା ଥିଲା, ଗ୍ଲୋବାଲାଇଜେସନ ଥିଲା, ତାହା ଶେଷ ହେବାକୁ ଯାଉଛି । ଏହା ଦ୍ଵାରା ପ୍ରତିଯୋଗିତା ବଢିବ ।
ଦେଶର ପ୍ରଥମ ଭର୍ଟିକାଲ୍ ଲିଫ୍ଟ ସମୁଦ୍ର ସେତୁ ପମ୍ବନ ଉଦଘାଟିତ
ନନ୍ଦିଘୋଷ ବ୍ୟୁରୋ: ଉଦଘାଟିତ ହେଲା ଦେଶର ସବୁଠାରୁ ହାଇଟେକ୍ ବ୍ରିଜ୍ ପମ୍ବନ ସେତୁ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆଜି ସୁନ୍ଦର ପମ୍ବନ୍ ରେଳ ସେତୁର ଉଦଘାଟନ କରିଛନ୍ତି, ଯାହା ଭାରତର ପ୍ରଥମ ଭୂଲମ୍ବ ଲିଫ୍ଟ ସମୁଦ୍ର ସେତୁ । ପମ୍ବନ୍ ସମୁଦ୍ର ସେତୁ ମୁଖ୍ୟଭୂମି ଏବଂ ରାମେଶ୍ୱରମ୍ ଦ୍ୱୀପ ମଧ୍ୟରେ ଏକ ରେଳ ସଂଯୋଗ ପ୍ରଦାନ କରିବ। ପମ୍ବନ ସେତୁର ଲକ୍ଷ୍ୟ ହେଉଛି ଆଧ୍ୟାତ୍ମିକ ଉପକୂଳବର୍ତ୍ତୀ ସହର ରାମେଶ୍ୱରମ ସହିତ ଯୋଗାଯୋଗକୁ ଉନ୍ନତ କରିବା, ଯେଉଁଠିକୁ ଦେଶ ଏବଂ ବିଶ୍ୱର ବିଭିନ୍ନ ସ୍ଥାନରୁ ବର୍ଷସାରା ଭକ୍ତମାନେ ଆସିଥାନ୍ତି।
ପ୍ରଧାନମନ୍ତ୍ରୀଙ୍କ ଗସ୍ତ ପୂର୍ବରୁ, ପବିତ୍ର ସମୁଦ୍ରକୁ ଦେଖି ପମ୍ବନ ରେଳ ସେତୁରେ ଏକ ପରୀକ୍ଷଣ କରାଯାଇଥିଲା। ଆଧୁନିକ ପ୍ରଯୁକ୍ତିବିଦ୍ୟାରେ ନିର୍ମିତ ଏହି ନୂତନ ପମ୍ବନ ସେତୁ ସମୁଦ୍ର ଉପରକୁ ଉଠିପାରିବ। ଏହା କେବଳ ଏକ ସେତୁ ନୁହେଁ ବରଂ ଭାରତର ଇଞ୍ଜିନିୟରିଂ ଶକ୍ତିର ପ୍ରତୀକ।
ଏସିଆର ପ୍ରଥମ ଭୂଲମ୍ବ ଲିଫ୍ଟ ସମୁଦ୍ର ସେତୁ ମଣ୍ଡପମରୁ ରାମେଶ୍ୱରମ ପର୍ଯ୍ୟନ୍ତ ତିଆରି କରାଯାଇଛି । ଏହାକୁ ନିର୍ମାଣ କରିବାକୁ ୫୩୫ କୋଟି ଟଙ୍କା ଖର୍ଚ୍ଚ ହୋଇଥିଲା । ପ୍ରଧାନମନ୍ତ୍ରୀ ମୋଦୀ ୨୦୧୯ ମସିହାରେ ଏହାର ଶିଳାନ୍ୟାସ କରିଥିଲେ ।
ପମ୍ବନ ସେତୁ ବିଷୟରେ ଅଜଣା ତଥ୍ୟ:
- 550 କୋଟି ଟଙ୍କା ବ୍ୟୟରେ ନିର୍ମିତ, ପମ୍ବନ ସେତୁ ଷ୍ଟେନଲେସ୍ ଷ୍ଟିଲ୍ ଦୃଢ଼ୀକରଣ, ଉଚ୍ଚ-ଗ୍ରେଡ୍ ସୁରକ୍ଷାତ୍ମକ ରଙ୍ଗ ଏବଂ ସମ୍ପୂର୍ଣ୍ଣ ୱେଲ୍ଡିଂ ସନ୍ଧି ସହିତ ନିର୍ମିତ।
- ଏହି ସେତୁର ଲମ୍ବ08 କିଲୋମିଟର, ଏଥିରେ 99ଟି ସ୍ପାନ୍ ଏବଂ 72.5 ମିଟର ଭୂଲମ୍ବ ଲିଫ୍ଟ ସ୍ପାନ୍ ଅଛି ଯାହା 17 ମିଟର ଉଚ୍ଚତା ପର୍ଯ୍ୟନ୍ତ ଉପରକୁ ଉଠିଥାଏ, ଯାହା ବଡ଼ ଜାହାଜଗୁଡ଼ିକର ସୁଗମ ଗତିକୁ ସହଜ କରିବା ସହିତ ସୁଗମ ଟ୍ରେନ୍ ପରିଚାଳନାକୁ ସୁନିଶ୍ଚିତ କରିଥାଏ।
- ଏହି ଭୂଲମ୍ବ ସମୁଦ୍ର ସେତୁର ଏକ ଗଭୀର ସାଂସ୍କୃତିକ ଗୁରୁତ୍ୱ ମଧ୍ୟ ରହିଛି, କାରଣ ରାମାୟଣ ଅନୁସାରେ, ରାମେଶ୍ୱରମ୍ ନିକଟସ୍ଥ ଧନୁଷକୋଡିରୁ ରାମ ସେତୁର ନିର୍ମାଣ ଆରମ୍ଭ ହୋଇଥିଲା।
- ରାମେଶ୍ୱରମକୁ ମୁଖ୍ୟଭୂମି ସହିତ ସଂଯୋଗ କରୁଥିବା ଏହି ସେତୁ ବିଶ୍ୱ ସ୍ତରରେ ଭାରତୀୟ ଇଞ୍ଜିନିୟରିଂର ଏକ ଉଲ୍ଲେଖନୀୟ ସଫଳତା ଭାବରେ ଠିଆ ହୋଇଛି। ପାମ୍ବନ ସେତୁର ସ୍ଥାୟୀତ୍ୱ ବୃଦ୍ଧି ଏବଂ ରକ୍ଷଣାବେକ୍ଷଣ ଆବଶ୍ୟକତା ହ୍ରାସ ପାଇଛି।
- ଏହାକୁ ଭବିଷ୍ୟତର ଚାହିଦା ପୂରଣ କରିବା ପାଇଁ ଦ୍ୱୈତ ରେଳ ଟ୍ରାକ ପାଇଁ ଡିଜାଇନ୍ କରାଯାଇଛି। ଏକ ସ୍ୱତନ୍ତ୍ର ପଲିସିଲୋକ୍ସେନ ଆବରଣ ଏହାକୁ ଜଙ୍କ୍ ଲାଗିବାରୁ ବି ରକ୍ଷା କରିବ, କଠୋର ସାମୁଦ୍ରିକ ପରିବେଶରେ ଦୀର୍ଘସ୍ଥାୟୀ ରଖିବ ।

