ନୂଆଦିଲ୍ଲୀ : ଆଜିଠୁ ଦିଲ୍ଲୀରେ ଚାଲିବ ରେଖାଙ୍କ ରାଜ । ଦିଲ୍ଲୀ ମୁଖ୍ୟମନ୍ତ୍ରୀ ଭାବେ ଶପଥ ନେବେ ରେଖା ଗୁପ୍ତା। ପରବେଶ ବର୍ମା ହେବେ ଦିଲ୍ଲୀ ଉପମୁଖ୍ୟମନ୍ତ୍ରୀ। ସେହିପରି ବିଜେନ୍ଦ୍ର ଗୁପ୍ତା ହେବେ ବାଚସ୍ପତି। ଦିଲ୍ଲୀର ରାମଲୀଳା ମଇଦାନରେ ଦିନ ସାଢେ ୧୨ଟାରେ ଶପଥ ଗ୍ରହଣ ସମାରୋହ ଅନୁଷ୍ଠିତ ହେବ। ଦିଲ୍ଲୀ ଉପ-ରାଜ୍ୟପାଳ ମନ୍ତ୍ରିମଣ୍ଡଳକୁ ପଦ ଓ ଗୋପନୀୟତାର ଶପଥ ପାଠ କରାଇବେ । ଶପଥ ସମାରୋହରେ ପ୍ରଧାନମନ୍ତ୍ରୀଙ୍କ ସହ ବିଜେପିର ବହୁ ବରିଷ୍ଠ ନେତା ସାମିଲ ହେବେ। ରାମଲୀଳା ମଇଦାନରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି ଏବଂ ମେଟାଲ ଡିଟେକ୍ଟର ଲଗାଯାଉଛି। ପ୍ରବେଶ ପାଇଁ ତିଆରି ହୋଇଥିବା ସମସ୍ତ ଫାଟକରେ ୧୦-୧୦ଟି ମେଟାଲ୍ ଡିଟେକ୍ଟର ଲଗାଯାଇଛି । ଶାଲିମାର ବାଗ ଆସନରୁ ବିଧାୟିକା ଭାବେ ନିର୍ବାଚିତ ହୋଇଛନ୍ତି ରେଖା ଗୁପ୍ତା। ପ୍ରଥମ ଥର ବିଧାୟିକା ଭାବେ ନିର୍ବାଚିତ ହୋଇଛନ୍ତି। ଶାଲିମାର ବାଗ ବିଧାନସଭା ଆସନରେ ରେଖା ଗୁପ୍ତା ତାଙ୍କ ନିକଟତମ ପ୍ରତିଦ୍ୱନ୍ଦ୍ୱୀ ଆପ୍ର ବନ୍ଦନା କୁମାରୀଙ୍କୁ ୨୯ ହଜାରରୁ ଅଧିକ ଭୋଟ୍ରେ ପରାସ୍ତ କରିଥିଲେ। ରେଖା ଗୁପ୍ତାଙ୍କୁ ୬୮ ହଜାର ୨୦୦ ଖଣ୍ଡ ଭୋଟ୍ ମିଳିଥିବା ବେଳେ, ବନ୍ଦନା କୁମାରୀଙ୍କୁ ୩୮ ହଜାର ୬୦୫ ଖଣ୍ଡ ଭୋଟ୍ ମିଳିଥିଲା। ସେହିପରି କଂଗ୍ରେସ ପ୍ରାର୍ଥୀ ପ୍ରବୀଣ ଜୈନଙ୍କୁ ମାତ୍ର ୪ ହଜାର ୮୯୨ ଖଣ୍ଡ ଭୋଟ୍ ମିଳିଥିଲା। ୧୯୭୪ ମସିହାରେ ଜନ୍ମ ହୋଇଥିବା ରେଖା ଗୁପ୍ତା ଦିଲ୍ଲୀ ବିଶ୍ୱବିଦ୍ୟାଳୟ ଛାତ୍ର ସଂସଦର ସାଧାରଣ ସଂପାଦକ ଓ ସଭାପତି ଭାବେ ନିର୍ବାଚିତ ହୋଇଥିଲେ। ସେ ୧୯୯୬ରୁ ୧୯୯୭ ପର୍ଯ୍ୟନ୍ତ ଦିଲ୍ଲୀ ବିଶ୍ୱବିଦ୍ୟାଳୟ ଛାତ୍ର ସଂସଦର ସଭାପତି ରହିଥିଲେ। ୨୦୦୭ରେ ସେ ଉତ୍ତର ପୀତମପୁରାରୁ ଦିଲ୍ଲୀ ମହାନଗର ନିଗମକୁ ନିର୍ବାଚିତ ହୋଇଥିଲେ। ୨୦୧୨ରେ ସେ ପୁଣି ଥରେ ଦିଲ୍ଲୀ ମହାନଗର ନିଗମକୁ ନିର୍ବାଚିତ ହୋଇଥିଲେ। ଦିଲ୍ଲୀ ବିଧାନସଭା ନିର୍ବାଚନରେ ବିଜେପିକୁ ୪୮ ଆସନ ମିଳିଥିବା ବେଳେ, ମାତ୍ର ୨୨ ଆସନ ଆମ୍ ଆଦମୀ ପାର୍ଟିକୁ ମିଳିଛି।
ଆଜିଠୁ ଗୃହରେ ୨୦୨୫-୨୬ ବଜେଟ୍ ଉପରେ ଆଲୋଚନା
ଭୁବନେଶ୍ବର : ୨୦୨୫-୨୬ ଆର୍ଥିକ ବର୍ଷର ଉପାସ୍ଥାପିତ ହୋଇଥିବା ବଜେଟ୍ ଉପରେ ଆଜିଠୁ ଗୃହରେ ଆଲୋଚନା । ମୁଖ୍ୟମନ୍ତ୍ରୀ ତଥା ଅର୍ଥମନ୍ତ୍ରୀ ମୋହନ ମାଝୀ ୨ ଲକ୍ଷ ୯୦ ହଜାର କୋଟି ଟଙ୍କାର ବଜେଟ୍ ଗୃହରେ ଉପସ୍ଥାପିତ କରିଥିଲେ। ଏହାରି ଉପରେ ସାଧାରଣ ଆଲୋଚନା ଆରମ୍ଭ ହେବ । ବଜେଟରେ କେଉଁ କେଉଁ ଦିଗକୁ ଗୁରୁତ୍ବ ଦିଆଯାଇଛି, ଆଉ କେଉଁ ଦିଗ ଗୁଡିକୁ ଗୁରୁତ୍ବ ଦିଆଯାଇନାହିଁ ତାହାକୁ ନେଇ ଆଲୋଚନା ସମୟରେ ବିରୋଧୀ ଏବଂ ଶାସକ ଦଳର ସଦସ୍ୟମାନେ ଗୃହରେ ମୁହାଁମୁହି ହେବା ସମ୍ଭାବନା ରହିଛି । ପୂର୍ବରୁ ମୋହନଙ୍କ ବଜେଟକୁ ବିପରିତ ଦିଗରେ ଡବଲ ଇଞ୍ଜିନ ସରକାର ଗତି କରୁଛି ବୋଲି କହିଥିଲେ ନବୀନ। ସେପଟେ ଜଳ ସମ୍ପଦ, ରାଜସ୍ବ ବିପର୍ଯ୍ୟୟ ପରିଚାଳନା , ଇସ୍ପାତ, ଖଣି, ଯୋଜନା ଓ ସଂଯୋଜନ, ବାଣିଜ୍ୟ, ସୂଚନା ଓ ଲୋକ ସମ୍ପର୍କ ଏବଂ ପରିବହନ ବିଭାଗର ପ୍ରଶ୍ନ କାଳ ରହିଛି। ଶୂନ୍ୟ କାଳରେ ଆଇନ ଶୃଙ୍ଖଳା, ମିଶନ ଶକ୍ତି , ଓଡ଼ିଶାକୁ ଅଣଦେଖା ସହ ବହୁ ଗୁରୁତ୍ବପୂର୍ଣ୍ଣ ପ୍ରସଙ୍ଗକୁ ଗୃହରେ ଉଠାଇବେ ବିରୋଧୀ । ଅନ୍ୟପଟେ ବିରୋଧୀ ପକ୍ଷରୁ ମୁଲତବି ପ୍ରସ୍ତାବ ଦିଆଯିବ। ତେଣୁ ଆଜି ବି ଗୃହ ସରଗରମ ହୋଇପାରେ।
ନବୀନ ଭରିଥିଲେ ଉତ୍ସାହ, ମନ ଭାଙ୍ଗି ଦେଲେ ମୋହନ: ମାଗଣା ହୋଇ FIH ପ୍ରୋ-ଲିଗ ମ୍ୟାଚ୍ ଦେଖିବାକୁ ଆସୁନାହାନ୍ତି ଲୋକେ
ଭୁବନେଶ୍ବର: ହକିର ହୃତଗୌରବ ଫେରାଇ ଆଣିଥିଲେ ନବୀନ ପଟ୍ଟନାୟକ । ଦୁଇ ଥର ବିଶ୍ବକପ ଆୟୋଜନ କରି ଓଡ଼ିଶା ସାଜିଥିଲା ଉଦାହରଣ । ଏବେ ମୋହନ ଭାଙ୍ଗି ଦେଇଛନ୍ତି ମନ । FIH ପ୍ରୋ-ଲିଗରେ ମାଗଣାରେ ବି ଫାଙ୍କା ପଡୁଛି ସିଟ୍ । ପୂର୍ବ ସରକାର ସମୟରେ କରାଯାଉଥିଲା ବ୍ୟାପକ ପ୍ରଚାର ପ୍ରସାର । ଏବେ ଲୋକଙ୍କ ପାଖରେ ଏଡେ ବଡ଼ ମ୍ୟାଚ ହେଉଥିବା ନେଇ ନାହିଁ ଖବର । ଯାହାକୁ ନେଇ କ୍ରୀଡାପ୍ରେମୀ ଉଦବେଗ ପ୍ରକାଶ କରିଛନ୍ତି ।
ହକିର ହୃତଗୌରବ ଫେରାଇ ଆଣିଥିଲେ ନବୀନ । ହକିପ୍ରେମୀଙ୍କ ବଢାଇଥିଲେ ହାର୍ଟବିଟ୍ । ଭୁବନେଶ୍ବର କଳିଙ୍ଗରୁ ରାଉରକେଲା ବିର୍ସା ମୁଣ୍ଡା ଷ୍ଟାଡିୟମ ଯାଏଁ ସୃଷ୍ଟି କରିଥିଲେ ଅଭୂତପୂର୍ବ କ୍ରେଜ । ସାରା ଓଡ଼ିଶାରେ ଗୁଞ୍ଜରିତ ହୋଇଥିଲା ଚକ ଦେ ଇଣ୍ଡିଆ ନାରା । ବିଶ୍ବ ଦରବାରରେ ସୃଷ୍ଟି କରି ପାରିଥିଲେ ସ୍ବତନ୍ତ୍ର ପରିଚୟ । ଖେଳାଳିଙ୍କୁ ନବୀନଙ୍କ ପ୍ରୋତ୍ସାହନ ବି ଉକୃଷ୍ଟ କ୍ରୀଡା ପ୍ରଦର୍ଶନ ପାଇଁ ଯୋଗାଇଥିଲା ବଳ । ୨୦୧୮ ଓ ୨୦୨୩ FIH ହକି ଓ୍ବାର୍ଲ୍ଡ କପ୍ ଆୟୋଜନ କରି ଓଡ଼ିଶା ସାଜିଥିଲା ଉଦାହରଣ । ହେଲେ ଏବେ ମୋହନ ଭାଙ୍ଗି ଦେଇଛନ୍ତି ମନ । ଏଫଆଇଏଚ ପ୍ରୋ-ଲିଗରେ ମାଗଣାରେ ବି ଫାଙ୍କା ପଡୁଛି ସିଟ୍ । ପୂର୍ବରୁ ଟିକେଟ୍ କିଣିବାକୁ ଲାଗୁଥିଲା ଲମ୍ବା ଲାଇନ୍ । ଏବେ ମାଗଣା ଥିଲେ ବି ଲୋକ ଆସିବାକୁ ଅମଙ୍ଗ ।
ସେପଟେ ବାରବାଟୀ କ୍ରିକେଟ୍ ମ୍ୟାଚ ବେଳେ ଘୋ ଘାରେ ଫାଟି ପଡୁଥିଲା ଷ୍ଟାଡିୟମ । ମ୍ୟାଚ ଟିକେଟ ପାଇଁ ସୃଷ୍ଟି ହେଉଥିଲା କଳାବଜାରୀ ସ୍ଥିତି । ଏଫଆଇଏଚ ପ୍ରୋ-ଲିଗରେ ମାଗଣାରେ ବି ଫାଙ୍କା ପଡୁଛି ସିଟ୍ । ଭୁବନେଶ୍ଵରର କଳିଙ୍ଗ ଷ୍ଟାଡିୟମରେ ଏଫଆଇଏଚ ପ୍ରୋ-ଲିଗ୍ ଖେଳାଯାଉଛି । ରାଜଧାନୀରେ ହକି ଫିଭର୍, ହେଲେ ତାହା ଷ୍ଟାଡିୟମରେ ପରିଲକ୍ଷିତ ହେଉନାହିଁ । ଷ୍ଟାଡିୟମର ନର୍ଥ ଓ ସାଉଥ୍ ଗ୍ୟାଲେରୀ ପୂରା ଫାଙ୍କା । ହକି ଇଣ୍ଡିଆ ତରଫରୁ ଷ୍ଟାଡିୟମ ଭିତରକୁ ପ୍ରବେଶ ସଂପୂର୍ଣ୍ଣ ମାଗଣା ଥିଲେ ମଧ୍ୟ ଲୋକେ ଆସୁ ନାହାନ୍ତି । ଦର୍ଶକଙ୍କ ମତ ଏବେ ରାଜ୍ଯରେ କ୍ରିକେଟର ଯେମିତି ପ୍ରଚାର ଓ ପ୍ରସାର କରାଯାଉଛି ଠିକ୍ ସେହିଭଳି ହକିର ପ୍ରଚାର ଓ ପ୍ରସାର କରାଯାଉନି ।
ପୂର୍ବରୁ ଯେବେ ବି ମ୍ଯାଚ ଆୟୋଜିତ ହେଉଥିଲା, ସେବେ ଲୋକଙ୍କ ଖଚାଖଚ ଭିଡ ଜମୁଥିଲା । ହେଲେ ଚଳିତବର୍ଷ ଭୁବନେଶ୍ବରରେ ହକି ମ୍ଯାଚ ହେଉଛି ବୋଲି ଲୋକ ଜାଣୁ ବି ନାହାନ୍ତି । ରାଜ୍ଯ ସରକାର ହକିର ପ୍ରାୟୋଜକ ଅଛନ୍ତି । ସରକାରଙ୍କ ତରଫରୁ ଯେତିକି ପ୍ରଚାର ପ୍ରସାର ହେବା କଥା ସେତିକି କରାଯାଉନାହିଁ । ସେଥିପାଇଁ ଷ୍ଟାଡିୟମ୍ ଫାଙ୍କା ପଡୁଥିବା କହିଛନ୍ତି କ୍ରୀଡା ପ୍ରେମୀ । ପୂର୍ବ ସରକାର ସମୟରେ ଦୁଇ ଥର ହକି ବିଶ୍ବକପ, ପ୍ରୋ-ଲିଗ, ହକି ଲିଗ ଆୟୋଜିତ ହୋଇଥିଲା । ପୂର୍ବରୁ ହକିକୁ ନେଇ ଓଡିଶା ଗର୍ବିତ ହୋଇଛି । ହେଲେ ଏବେ ଜାତୀୟ ଓ ଅନ୍ତଜାର୍ତୀୟ ସ୍ତରର ମ୍ଯାଚ ବେଳେ ସିଟ ଫାଙ୍କା ପଡିବା କ୍ରୀଡୀ ପ୍ରେମୀଙ୍କୁ ନିରାଶ କରିଛି ।
୧୦ ବର୍ଷ ପରେ ସଂଶୋଧନ ହେବାକୁ ଯାଉଛି ଜମିପଟ୍ଟା, ରହିବ ଅସଲି ମାଲିକଙ୍କ ନାମ
ଭୁବନେଶ୍ବର: ୧୦ ବର୍ଷ ପରେ ସଂଶୋଧନ ହେବ ଜମିପଟ୍ଟା । ପୂର୍ବ ସରକାର ମଧ୍ୟ ପଟ୍ଟା ଅପଡେଟ କରିବାକୁ ଉଦ୍ୟମ କରିଥିଲେ । ହେଲେ ତହସିଲଦାରଙ୍କ ମାନସିକତା, କାମର ଚାପ ଓ ମାନବ ସମ୍ବଳ ଅଭାବ ଯୋଗୁଁ ଏହା ସମ୍ଭବ ହୋଇପାରି ନଥିଲା । ଏବେ ବିଜେପି ସରକାର ପୁଣି ଥରେ ଜମିପଟ୍ଟାରେ ଅସଲ ମାଲିକଙ୍କ ନାମ ରଖିବାକୁ ଉଦ୍ୟମ ଆରମ୍ଭ କରିଛି । ରାଜସ୍ବ ବିଭାଗ ପକ୍ଷରୁ ଜାରି ହୋଇଛି ସ୍ବତନ୍ତ୍ର ଏସଓପି । ନିର୍ଦ୍ଦିଷ୍ଟ ସମୟ ସୀମା ସ୍ଥିର ହୋଇଛି । ଏଡିଏମ୍ ଜିଲ୍ଲା ସ୍ତରରେ ଓ ଉପଜିଲ୍ଲାପାଳ ସବଡିଭିଜନ ସ୍ତରରେ ନୋଡାଲ ଅଫିସର ଭାବେ କାମ କରିବେ । ସରକାରଙ୍କ ଉଦ୍ୟମକୁ ପ୍ରଶଂସା କରାଯାଇଥିଲେ ମଧ୍ୟ ଏହାର ବାସ୍ତବ କାର୍ଯ୍ୟକାରିତାକୁ ନେଇ ପ୍ରଶ୍ନ ଉଠିଛି ।
ସୁଦକ୍ଷ ରାଜସ୍ବ ପ୍ରଶାସନ ପାଇଁ ସଠିକ ଜମିପଟ୍ଟା ବା ଆରଓଆର ନିହାତି ଜରୁରୀ । ଜମିପଟ୍ଟା ସଂଶୋଧନ ପାଇଁ ରାଜସ୍ବ ବିଭାଗର ଚାଲିବ ସ୍ପେଶାଲ ଡ୍ରାଇଭ । ଜାରି ହେଲା ସ୍ବତନ୍ତ୍ର ଏସଓପି । ଉଦ୍ୟମକୁ ପ୍ରଶଂସା, ହେଲେ କାର୍ଯ୍ୟକାରିତାକୁ ନେଇ ଉଠିଲା ପ୍ରଶ୍ନ । ୧୯୬୨ରୁ ୨୦୧୪ ମଧ୍ୟରେ ବନ୍ଦୋବସ୍ତ ଜରିଆରେ ହୋଇଥିଲା ଜମିପଟ୍ଟାରେ ସଂଶୋଧନ । ଏହା ପରଠାରୁ ଆଉ ହୋଇନାହିଁ । ପଟ୍ଟାରେ ନାଁ ଥିବା ଲୋକଙ୍କ ମଧ୍ୟରୁ ୭୫ରୁ ୮୦ ପ୍ରତିଶତ ପ୍ରାଣ ହରାଇ ସାରିଲେଣି । ଜମିପଟ୍ଟାରେ ଉତ୍ତରାଧିକାରୀଙ୍କ ନାଁ ରହିବା ଜରୁରୀ । ବ୍ୟାଙ୍କ ଋଣ, କୃଷି ବୀମା ଓ ସରକାରୀ ସହାୟତା ପାଇଁ ସଠିକ୍ ଜମିପଟ୍ଟା ଜରୁରୀ । ରାଜ୍ୟରେ ୧ କୋଟି ୯୩ ଲକ୍ଷ ୭୭ ହଜାର ୩୭୬ଟି ଜମିପଟ୍ଟା ରହିଛି । ଯେଉଁଥିରେ ୩ କୋଟି ୯୫ ଲକ୍ଷ ୪୨ ହଜାର ୮୮୧ ଲୋକଙ୍କ ନାଁ ରେକର୍ଡରେ ରହିଛି । ହେଲେ ଗତ ୪ ବର୍ଷରେ ମାତ୍ର ୪ ଲକ୍ଷ ୧୨ ହଜାର ଲେକାଙ୍କ ଜମିପଟ୍ଟା ଅପଡେଟ ହୋଇପାରିଛି । ଓଡ଼ିଶା ସର୍ଭେ ଓ ସେଟଲମେଣ୍ଟ ଆଇନ ୧୯୫୮ ଅନୁସାରେ ସଠିକ୍ ପଟ୍ଟା ପ୍ରସ୍ତୁତ କରିବା ତହସିଲଦାରଙ୍କ ପ୍ରମୁଖ କାର୍ଯ୍ୟ । କିନ୍ତୁ ବିପର୍ଯ୍ୟୟ କ୍ଷୟକ୍ଷତି ଆକଳନ, ଜମି ଅଧିଗ୍ରହଣ, ବିସ୍ଥାପିତଙ୍କୁ ଥଇଥାନ, ଖଜଣା ଆଦାୟରେ ତହସିଲ କାର୍ଯ୍ୟାଳୟ ବ୍ୟସ୍ତ ରହୁଥିବାରୁ ହୋଇପାରୁନି ପଟ୍ଟା ସଂଶୋଧନ କାମ । କେବଳ ଚିଠି କରିଦେଲେ ହେବ ନାହିଁ, ଏସବୁ କରିବାକୁ ସରକାର ତହସିଲଦାରମାନଙ୍କୁ ସବୁ ପ୍ରକାର ସହାୟତା ବି ଦେବା ଜରୁରୀ ବୋଲି କହିଛନ୍ତି ସମୀକ୍ଷକ ।
ଜମିପଟ୍ଟାରେ ଅସଲ ଜମି ମାଲିକଙ୍କ ନାଁ ଲିପିବଦ୍ଧ କରିବାକୁ ସ୍ପେଶାଲ ଡ୍ରାଇଭ ଆରମ୍ଭ କରିଛି ରାଜସ୍ବ ବିଭାଗ । ଏଥିପାଇଁ ସ୍ବତନ୍ତ୍ର ଏସଓପି ବି ଜାରି ହୋଇଛି । ତହସିଲ ପ୍ରଶାସନ ଗାଁ ଗାଁ ବୁଲି ଏ ବାବଦରେ ଲୋକଙ୍କୁ ସଚେତନ କରିବେ । ସ୍ବତନ୍ତ୍ର କ୍ୟାମ୍ପ କରି ପଟ୍ଟାରେ ଥିବା ଲୋକଙ୍କ ଉତ୍ତରାଧିକାରୀ ନାଁ ଲିପିବଦ୍ଧ କରିବେ । ଯଦି ଉତ୍ତରାଧିକାରୀମାନେ ଆପୋଷ ବୁଝାମଣାରେ ଜମି ଭାଗ କରିବାକୁ ଚାହୁଁଥିବେ, ତାହା ତହସିଲ କାର୍ଯ୍ୟାଳୟରେ କରିବେ । ଉତ୍ତରାଧିକାରୀଙ୍କ ନାଁ ଲିପିବଦ୍ଧ କଲା ବେଳେ ଯେପରି କୌଣସି ମହିଳା ଉତ୍ତରାଧିକାରୀ ବାଦ ନପଡ଼ନ୍ତି, ସେଥିପ୍ରତି ଗୁରୁତ୍ବ ଦେବେ । ଅତିରିକ୍ତ ଜିଲ୍ଲାପାଳ ଜିଲ୍ଲାସ୍ତରରେ ଓ ଉପଜିଲ୍ଲାପାଳ ସବ ଡିଭିଜନ ସ୍ତରରେ ନୋଡାଲ ଅଫିସର ଭାବେ କାମ କରିବେ । ଜିଲ୍ଲାପାଳ ନିୟମିତ ବ୍ୟବଧାନରେ ସ୍ଥିତି ଅନୁଧ୍ୟାନ କରିବେ । ମୋବାଇଲ ଆପ୍ ଜରିଆରେ ବି ଉତ୍ତରାଧିକାରୀଙ୍କ ନାଁ ରେକର୍ଡ କରାଯାଇପାରିବ। ଏଥିରେ ଆଧାର କାର୍ଡ ନମ୍ବର ମଧ୍ୟ ରହିବ । ସମ୍ପୂର୍ଣ୍ଣ ପ୍ରକ୍ରିୟାରେ ରାଜସ୍ବ ନିରୀକ୍ଷକଙ୍କ ଭୂମିକା ଗୁରୁତ୍ବପୂର୍ଣ୍ଣ ଥିବାରୁ ସେମାନଙ୍କ ପାଇଁ ସରକାର ଇନସେଣ୍ଟିଭ ବ୍ୟବସ୍ଥା ମଧ୍ୟ ରଖିଛନ୍ତି । ଜମିପଟ୍ଟା ସଂଶୋଧନକୁ ସ୍ବାଗତ କରିଛି କୃଷକ ସଙ୍ଗଠନ । ବିଜେପି ସାଂସଦ ପ୍ରତାପ ଷଡ଼ଙ୍ଗୀ ଏହାର ଆବଶ୍ୟକତାକୁ ସ୍ବୀକାର କରିଥିବା ବେଳେ ସରକାରଙ୍କ ଆଭିମୁଖ୍ୟକୁ ନେଇ ପ୍ରଶ୍ନ କରିଛନ୍ତି ।
ରାଜସ୍ବ ନିରୀକ୍ଷକ ମାନେ ପ୍ରତି ଗାଁରେ ସ୍ବତନ୍ତ୍ର କାର୍ଯ୍ୟକ୍ରମ କରି ଜମି ପଟ୍ଟା ସଂଶୋଧନ କାମ ଆଗେଇ ନେବା ସହ ପ୍ରତିଦିନ ସର୍ବନିମ୍ନ ୨୫ଟି ଖାତା କିମ୍ବା ୨୫ଟି ମୃତ ପ୍ରଜାଙ୍କ ବଂଶାବଳୀ ପ୍ରସ୍ତୁତ କରିବାକୁ କୁହାଯାଇଛି । ରାଜସ୍ବ ବିଭାଗର ଏହା ଏକ ବୃହତ୍ତମ କାର୍ଯ୍ୟକ୍ରମ ହୋଇଥିବାରୁ ସରକାରୀ ନିର୍ଦ୍ଦେଶନାମା ସହ ଆବଶ୍ୟକ ଭିତ୍ତିଭୂମି ଓ ମାନବସମ୍ବଳ ଯୋଗାଇ ଦେବା ବି ଜରୁରୀ ରହିଛି ।
କିଏ ଏହି ରେଖା ଗୁପ୍ତା ? ପ୍ରଥମ ଥର ବିଧାୟିକା ଭାବେ ଜିତି ହୋଇଗଲେ ଦିଲ୍ଲୀ ମୁଖ୍ୟମନ୍ତ୍ରୀ
ନୂଆଦିଲ୍ଲୀ: ଦିଲ୍ଲୀର ନୂଆ ମୁଖ୍ୟମନ୍ତ୍ରୀ ହେବାକୁ ଯାଉଛନ୍ତି ରେଖା ଗୁପ୍ତା । ବିଜେପି ବିଧାୟକ ଦଳ ବୈଠକରେ ତାଙ୍କ ନାଁରେ ବାଜିଛି ମୋହର । ଗୁରୁବାର ରାମଲିଲା ମୈଦାନରେ ମୁଖ୍ୟମନ୍ତ୍ରୀ ଭାବେ ଶପଥ ନେବେ ରେଖା । ତାଙ୍କ ସହ ୬ ଜଣ ମନ୍ତ୍ରୀ ଶପଥ ନେବେ । ତେବେ କିଏ ଏହି ରେଖା ଗୁପ୍ତା ? ପ୍ରଥମ ଥର ବିଧାୟିକା ହୋଇ ବି ହେବିଓ୍ବେଟଙ୍କୁ ପଛରେ ପକାଇ ଦିଲ୍ଲୀ ସିଂହାସନରେ ବସିବାକୁ ହେଲେ ସକ୍ଷମ, ଆସନ୍ତୁ ଜାଣିବା ।
ଦିଲ୍ଲୀ ଶାଲିମାର ବାଗ ବିଧାନସଭା ଆସନରୁ ବିଧାୟିକା ଭାବେ ଜିତିଛନ୍ତି ରେଖା ଗୁପ୍ତା । ତେବେ ଗୁରୁତ୍ବପୂର୍ଣ୍ଣ କଥା ହେଲା, ବିଧାୟିକା ଭାବେ ପ୍ରଥମ ଥର ଜିତିଛନ୍ତି ରଖା । ତାଙ୍କ ଜନ୍ମ ୧୯୭୪ ଜୁଲାଇ ୧୯ ତାରିଖରେ ହରିୟାଣାର ଜୁଲାନାରେ ହୋଇଥିଲା । ଦିଲ୍ଲୀ ବିଶ୍ବ ବିଦ୍ୟାଳୟରୁ ବାଣିଜ୍ୟରେ ସ୍ନାତକ କରିଛନ୍ତି । ଏହାପରେ ମ୍ୟାନେଜମେଣ୍ଟ ଆଣ୍ଡ ଆର୍ଟରେ ମାଷ୍ଟର କରିଛନ୍ତି ।
୧୯୯୩ରେ ଅଖିଳ ଭାରତୀୟ ବିଦ୍ୟାର୍ଥୀ ପରିଷଦରୁ ସେ ତାଙ୍କ ରାଜନୈତିକ କ୍ୟାରିୟର ଆରମ୍ଭ କରିଥିଲେ । ୧୯୯୬-୯୭ରେ ଦିଲ୍ଲୀ ବିଶ୍ବବିଦ୍ୟାଳୟର ଛାତ୍ର ସଂସଦ ଅଧ୍ୟକ୍ଷା ବନିଥିଲେ । ୨୦୦୭ ଓ ୨୦୧୨ରେ ଉତ୍ତର ପିତମପୁରାରୁ କର୍ପୋରେଟର ଭାବେ ଜିତିଥିଲେ । ଏହାପରେ ୨୦୨୨ରେ ଦିଲ୍ଲୀ ମ୍ୟୁନିସିପାଲ କର୍ପୋରେସନ (MCD)ର ବିଜେପିରୁ ମେୟର ପ୍ରାର୍ଥୀ ହୋଇଥିଲେ ।
ପିଏମଙ୍କୁ ଦେଇଥିଲେ ବିଜୟର ଶ୍ରେୟ
ଶାଲିମାର ବାଗ ବିଧାନସଭା ଆସନରୁ ସେ ବିଧାୟିକା ଭାବେ ବିଜୟ ହୋଇଛନ୍ତି । ସେ ତାଙ୍କ ନିକଟତମ ପ୍ରତିଦ୍ବନ୍ଦ୍ବୀ ତଥା ଆପ ନେତାଙ୍କୁ ୨୯ ହଜାର ୫୯୫ ଖଣ୍ଡ ଭୋଟରେ ପରାସ୍ତା କରିଛନ୍ତି । ବିଜୟ ପରେ ସେ ଏହାର ଶ୍ରେୟ ପ୍ରଧାନମନ୍ତ୍ରୀଙ୍କୁ ଦେଇଥିଲେ । ପ୍ରଧାନମନ୍ତ୍ରୀଙ୍କ ନେତୃତ୍ବ କ୍ଷମତା ଆଜି ତାଙ୍କୁ ବିଜୟ ଦେଇଛି, ଦିଲ୍ଲୀବାସୀ ଆମ ପାଖରୁ ବିକାଶର ଆଶା ରଖିଛନ୍ତି ବୋଲି କହିଥିଲେ ।
ରେଖାଙ୍କ ଉପଲବ୍ଧି
ନିଜ ରାଜନୈତିକ କ୍ୟାରିୟରରେ ରେଖା ମହିଳା କଲ୍ୟାଣ, ଶିକ୍ଷା ସୁଧାର ଓ ସମୂହିକ ବିକାଶ ଉପରେ ଗୁରୁତ୍ବ ଦେଇଥିଲେ । ସେ ନିଜ ଅଞ୍ଚଳରେ ସୁଇମିଂ ପୁଲ, ଜିମ୍, ଲାଇବ୍ରେରୀ ଓ କମ୍ୟୁନିଟି ହଲ ପରି ସୁବିଧା କରିଥିଲେ । ଏହାବାଦ ସେ ମହିଳା ଓ ପିଲାଙ୍କ ପାଇଁ ସ୍ବାସ୍ଥ୍ୟ ଶିବିରର ଆୟୋଜନ କରିଥିଲେ । ଏହାସହ କନ୍ୟଭୃଣ ହତ୍ୟା ଓ ଶିଶୁ ଶ୍ରମିକ ବିରୋଧରେ ଲୋକଙ୍କ ମଧ୍ୟରେ ସଚେତନତା ସୃଷ୍ଟି କରିଥିଲେ ।
ରେଖା ଗୁପ୍ତା ହେଲେ ବିଜେପିର ଦିଲ୍ଲୀ ମୁଖ୍ୟମନ୍ତ୍ରୀ
ନୂଆଦିଲ୍ଲୀ: ଦିଲ୍ଲୀ ଭୁଖ୍ୟମନ୍ତ୍ରୀ ଭାବେ ରେଖା ଗୁପ୍ତାଙ୍କ ନାଁରେ ମୋହର ମାରିଲା ବିଜେପି । ବିଧାୟକ ଦଳ ବୈଠକରେ ରେଖାଙ୍କୁ ମୁଖ୍ୟମନ୍ତ୍ରୀ କରାଯିବାକୁ ନିଷ୍ପତ୍ତି । ସେହିପରି ପରବେଶ ବର୍ମା ହେବେ ଦିଲ୍ଲୀ ଉପମୁଖ୍ୟମନ୍ତ୍ରୀ । ବିଜେନ୍ଦ୍ର ଗୁପ୍ତା ହେବେ ବାଚସ୍ପତି ।
୨୭ ବର୍ଷ ପରେ ଦିଲ୍ଲୀ କ୍ଷମତାକୁ ଫେରିଥିବା ବିଜେପି କାହାକୁ ମୁଖ୍ୟମନ୍ତ୍ରୀ କରିବ ତାକୁ ନେଇ କଳ୍ପନାଜଳ୍ପନା ଜାରି ରହିଥିଲା । ଶେଷରେ ବିଜେପି ବିଧାୟକ ଦଳ ବୈଠକରେ ରେଖା ଗୁପ୍ତାଙ୍କୁ ଦିଲ୍ଲୀ ମୁଖ୍ୟମନ୍ତ୍ରୀ କରିବାକୁ ନିଷ୍ପତ୍ତି ନିଆଯାଇଛି ।
ଆସନ୍ତାକାଲି ଦିଲ୍ଲୀ ମୁଖ୍ୟମନ୍ତ୍ରୀ ଭାବେ ଶପଥ ନେବେ ରେଖା । ଏଥିପାଇଁ ରାମଲୀଳା ମୈଦାନରେ ଚାଲିଛି ଭବ୍ୟ ପ୍ରସ୍ତୁତି । ଦିଲ୍ଲୀ ଉପ-ରାଜ୍ୟପାଳ ମନ୍ତ୍ରିମଣ୍ଡଳକୁ ପଦ ଓ ଗୋପନୀୟତାର ଶପଥ ପାଠ କରାଇବେ । ଶପଥ ସମାରୋହରେ ପ୍ରଧାନମନ୍ତ୍ରୀଙ୍କ ସହ ବିଜେପିର ବହୁ ବରିଷ୍ଠ ନେତା ସାମିଲ ହେବେ । ଦିଲ୍ଲୀ ବିଧାନସଭା ନିର୍ବାଚନରେ ବିଜେପିକୁ ୪୮ ଆସନ ମିଳିଥିବା ବେଳେ, ୨୨ ଆସନରେ ଆମ୍ ଆଦମୀ ପାର୍ଟି ସନ୍ତୁଷ୍ଠ ହେବାକୁ ପଡ଼ିଥିଲା ।
ଏଏସଓଙ୍କୁ ମାଡ଼ ଘଟଣାରେ ତଦନ୍ତ ଶୀତଳାକୁ ନେଇ ତେଜିଲା ଅସନ୍ତୋଷ, ପୁରୀ ମସୁଦ୍ର କୂଳ ଥାନା ଦ୍ବାରସ୍ଥ ହେଲେ ପତ୍ନୀ
ପୁରୀ: ପୂର୍ବତନ ରାଜ୍ୟପାଳ ରଘୁବର ଦାସଙ୍କ ପୁଅ ଏଏସଓ ବୈକୁଣ୍ଠ ପ୍ରଧାନଙ୍କୁ ମାଡ଼ ମାରିବା ଘଟଣା ନେଇ ସମୁଦ୍ରକୂଳ ଥାନାରେ ଦ୍ୱାରସ୍ଥ ହୋଇଛନ୍ତି ତାଙ୍କ ପତ୍ନୀ ସାୟୋଜ ପ୍ରଧାନ ଏବଂ ଅଲ ଓଡିଶା ଯବାନ ଭେଟେରାନ ଆସୋସିଏସନ । ମିଳିତ ଭାବେ ପୁରୀ ସମୁଦ୍ରକୂଳ ଥାନାରେ ପହଞ୍ଚି ବିଧିବଦ୍ଧ ଲିଖିତ ଏତଲା ପ୍ରଦାନ କରିଛନ୍ତି । ଦୀର୍ଘମାସ ଧରି ଏହି ଘଟଣାର ତଦନ୍ତ ହୋଇ ନଥିବା ନେଇ ଅସନ୍ତୋଷ ପ୍ରକାଶ କରିବା ସହ ଦୋଷୀ ବିରୋଧରେ ପଦକ୍ଷେପ ନେବାକୁ ଦାବି କରାଯାଇଛି l
ଏଏସଓଙ୍କୁ ଆକ୍ରମଣ ଘଟଣାର ତଦନ୍ତ ଶିଥିଳତାକୁ ନେଇ ତେଜିଲା ଅସନ୍ତୋଷ । ପୁଣି ଥାନାରେ ପହଞ୍ଚି ଏତଲା ଦେଲେ ଏସଓଙ୍କ ପତ୍ନୀ ଓ ଭେଟରାନ ଯବାନ । କାର୍ଯ୍ଯାନୁଷ୍ଠାନରେ ବିଳମ୍ବକୁ ନେଇ ପ୍ରଶ୍ନ । ଗତ ରଥଯାତ୍ରା ସମୟରେ ପୂର୍ବତନ ରାଜ୍ୟପାଳ ରଘୁବର ଦାସଙ୍କ ପୁଅ ଜଣେ ସରକାରୀ କର୍ମଚାରୀଙ୍କୁ ମାଡ଼ ମାରିବା ସହ ଦୁର୍ବ୍ୟବହାର ପ୍ରଦର୍ଶନ କରିଥିଲେ ।
ସମ୍ପୃକ୍ତ ଏଏସଓ ବୈଖୁଣ୍ଠ ନାଥ ପ୍ରଧାନ ଜୁଲାଇ ୧୧ ତାରିଖରେ ସମୁଦ୍ରକୂଳ ଥାନାରେ ଏକ ଲିଖିତ ଅଭିଯୋଗ କରିଥିଲେ । ପରବର୍ତ୍ତୀ ସମୟରେ ସେ ଅନଲାଇନ ମାଧ୍ୟମରେ ମଧ୍ଯ ଅଭିଯୋଗ କରିଥିଲେ । ଘଟଣାର ଆବଶ୍ୟକତା ତଦନ୍ତ କରି ଦୋଷୀ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ପୁଣି ଏଏସଓ, ତାଙ୍କ ପତ୍ନୀ ଓ ଭେଟେରାନ ଯବାନ ଆସୋସିଏସନ ମିଳିତ ଭାବେ ସମୁଦ୍ରକୂଳ ଥାନାରେ ଲିଖିତ ଏତଲା ଦେଇଛନ୍ତି ।
ଅନ୍ୟପକ୍ଷରେ ଏହି ଘଟଣା ଏକ ସମ୍ବେଦିନଶୀଳ ଘଟଣା ହୋଇଥିବାବେଳେ ପୁରୀ ପୋଲିସ ପକ୍ଷରୁ ଘଟଣାକୁ ଗୁରୁତ୍ୱ ଦିଆଯାଇଛି l ପୂର୍ବରୁ ସିସିଟିଏନସ ମାଧ୍ୟମରେ ହସ୍ତଗତ ହୋଇଥିବା ଅଭିଯୋଗକୁ ଭିତ୍ତିକରି ପୋଲିସ ତଦନ୍ତ କରୁଛି l ଆଜି ପୁଣି ଏଏସଓ ଓ ତାଙ୍କ ପରିବାର ପକ୍ଷରୁ ଏକ ଏଫଆଇଆର ସମୁଦ୍ରକୂଳ ଥାନାରେ ଦିଆଯାଇଥିବାବେଳେ ଏହା ଉପରେ ଅଧିକ ତଦନ୍ତ କରି ଆବଶ୍ୟକୀୟ ପଦକ୍ଷେପ ନିଆଯିବ ବୋଲି ପୁରୀ ଏସପି କହିଛନ୍ତି l
ଲିଙ୍ଗରାଜ ମନ୍ଦିର ନୂଆ ବିବାଦ: ଜାଗର ପୂର୍ବରୁ ବ୍ରାହ୍ମଣ ନିଯୋଗ ଦୁଇ ଫାଳ
ଭୁବନେଶ୍ବର: ଜାଗର ଯାତ୍ରା ନେଇ ଚଳଚଞ୍ଚଳ ଲିଙ୍ଗରାଜ ମନ୍ଦିର । ପ୍ରଶାସନ ପକ୍ଷରୁ ପ୍ରସ୍ତୁତି ଶେଷ ପର୍ଯ୍ୟାୟରେ । ରାତି ୧୦ଟାରେ ଉଠିବ ମହାଦୀପ । ସମନ୍ବୟ ରକ୍ଷା କରି ନୀତିକାନ୍ତି କରିବେ ସେବାୟତ । ତେବେ ପର୍ବ ପୂର୍ବରୁ ପୁଣି ମୁଣ୍ଡ ଟେକିଛି ନୂଆ ବିବାଦ । ଦୁଇ ଫାଳ ହୋଇଛି ବ୍ରାହ୍ମଣ ନିଯୋଗ । ଦୀର୍ଘ ୮ ବର୍ଷ ପରେ ନିର୍ବାଚନ ହୋଇଥିବା ବେଳେ ପଦ ଛାଡିବାକୁ ନାରାଜ ପୁରୁଣା ସଭାପତି, ସମ୍ପାଦକ । ଏନେଇ ନୂଆ କରି ନିର୍ବାଚିତ ହୋଇଥିବା କର୍ମକର୍ତ୍ତା ଆଜି ସାମ୍ବାଦିକ ସମ୍ମିଳନୀ କରି ସମସ୍ତ ଦସ୍ତାବିଜ୍ ଦେଖାଇବା ସହ ପ୍ରଶାସନ ଓ ସମସ୍ତ ସେବାୟତଙ୍କ ସହ ସମନ୍ବୟ ରକ୍ଷା କରି ଲିଙ୍ଗରାଜଙ୍କ ଜାଗର ଯାତ୍ରା ଶୃଙ୍ଖଳିତ ଭାବରେ ପାଳନ କରିବାକୁ ପ୍ରତିଶ୍ରୁତି ଦେଇଛନ୍ତି ।
ନିର୍ବାଚନ ପରେ ବି ଗାଦି ଛାଡୁନାହାଁନ୍ତି ପୁରୁଣା ସଦସ୍ୟ । ଘୋଷଣା ହେଲା ନୂଆ ସଭାପତି ସମ୍ପାଦକଙ୍କ ନାଁ । ଦସ୍ତାବିଜ୍ ସହ ପ୍ରମାଣ ଦେଲେ ନୂଆ କର୍ମକର୍ତ୍ତା । ୮ ବର୍ଷ ହେବ ଗାଦି ମାଡି ବସିଥିଲେ କିଛି ଲୋକ । ଅସାମ୍ବିଧାନିକ ଭାବରେ ଚାଲିଥିଲା ନିଯୋଗର କାର୍ଯ୍ୟ । ଆର୍ଥିକ ଅନିୟମିତତା ଅଭିଯୋଗ ଆଣିଛନ୍ତି ନୂଆ ସଭାପତି ସମ୍ପାଦକ । ଜାଗରକୁ ଆଉ ମାତ୍ର ଗୋଟିଏ ସପ୍ତାହ ଥିବା ବେଳେ ଏବେ ବ୍ରାହ୍ମଣ ନିଯୋଗ ମଧ୍ୟରେ ଆରମ୍ଭ ହୋଇଛି ତୁ ତୁ ମେଁ ମେଁ । ଗତ ଜାନୁଆରୀ ୨୮ ତାରିଖରେ ନିଯୋଗର ନିର୍ବାଚନ ହୋଇଥିବା ବେଳେ ସଭାପତି ଭାବରେ ନାରାୟଣ ମହାପାତ୍ର ଏବଂ ଉପସଭାପତି ଭାବରେ ବିଜୟ ଭୂଷଣ ମହାପାତ୍ର ଏବଂ ସତ୍ୟନାରାୟଣ ମହାସୁପକାର, ସମ୍ପାଦକ ହିମାଦ୍ରୀ ଶେଖର ମହାପାତ୍ର ଓ ଅନ୍ୟାନ୍ୟ କର୍ମକର୍ତ୍ତା ନିର୍ବାଚିତ ହୋଇଛନ୍ତି । ତେବେ ଏହି ନିର୍ବାଚନକୁ ପୁରୁଣା କର୍ମକର୍ତ୍ତା ଗୋଷ୍ଠୀ ମାନୁ ନାହାନ୍ତି । ନିୟମ ଅନୁସାରେ ପ୍ରତି ଦୁଇବର୍ଷରେ ନିର୍ବାଚନ ହେବା କଥା । କିନ୍ତୁ ଯେଉଁମାନେ ଥିଲେ ସେମାନେ ଅସାମ୍ବିଧାନିକ ଭାବରେ ଗାଦି ମାଡି ବସିଥିଲେ ବୋଲି ନୂଆ ସଦସ୍ୟ କହିଛନ୍ତି।
ଜାନୁଆରୀ ୨୮ ତାରିଖରେ ହୋଇଥିବା ନିର୍ବାଚନକୁ ମନ୍ଦିର ଟ୍ରଷ୍ଟବୋର୍ଡ ସ୍ବୀକୃତି ଦେଇଛି । ଜାଗର ନୀତିକାନ୍ତି ନେଇ ଜିଲ୍ଲାପାଳ ଏବଂ କମିଶନରେଟ ପୋଲିସ ପକ୍ଷରୁ ନୂଆ ସଭାପତି ସମ୍ପାଦକଙ୍କୁ ଚିଠି ମଧ୍ଯ ହୋଇଛି । କିଭଳି ନୀତିକାନ୍ତି ଶୃଙ୍ଖଳିତ ହେବ ଓ ଠିକ୍ ରାତି ୧୦ ଟାରେ ମହାଦୀପ ଉଠିବ ସେ ନେଇ ସମନ୍ବୟ ରକ୍ଷା କରି କାମ କରିବାକୁ କୁହାଯାଇଛି । ସେପଟେ ପୁରୁଣା ସମ୍ପାଦକଙ୍କ ନାଁରେ ସେବାୟତ କାଳୁ ମହାପାତ୍ର ଆଣିଛନ୍ତି ସାଂଘାତିକ ଅଭିଯୋଗ । ବାପାଙ୍କ ମୃତ୍ୟୁ ପରେ ଚୁଲିକୁ ସମ୍ପାଦକ ଜବରଦସ୍ତ ନେଇଯାଇଥିବାରୁ ପରିବାର ଚଳାଇବାରେ ଅସୁବିଧା ହେଉଛି ବୋଲି କହିଛନ୍ତି । ତେବେ ଜାଗର ସମୟରେ ବିବାଦ ଦେଖା ଦେଇଥିବାରୁ ସମସ୍ତଙ୍କୁ ବୁଝାଇ ସୁରୁଖୁରୁରେ ନୀତିକାନ୍ତି କରିବାକୁ ଚେଷ୍ଟା କରାଯିବ ବୋଲି କହିଛନ୍ତି କାର୍ଯ୍ୟନିର୍ବାହୀ ଅଧିକାରୀ
ଜାନୁଆରୀ ୨୮ ତାରିଖରେ ବ୍ରହ୍ମଣ ନିଯୋଗର ନିର୍ବାଚନ ହୋଇଥିବା ବେଳେ ଫେବୃଆରୀ ୧୬ ତାରିଖରେ ଆଉ ଏକ ବ୍ରାହ୍ମଣ ନିଯୋଗ ଗୋଷ୍ଠୀ ନିର୍ବାଚନ କରି ସଭାପତି ସମ୍ପାଦକଙ୍କ ସମେତ ୨୧ ଜଣ କାର୍ଯ୍ୟକର୍ତ୍ତାଙ୍କୁ ଦାୟିତ୍ବ ଦେଇଛି ।
ନିଯୁକ୍ତି ଅନିୟମିତତା ଅଭିଯୋଗ ପରେ ଭୁବନେଶ୍ବର ଏମ୍ସକୁ ଘାଣ୍ଟିଲା ସିବିଆଇ
ଭୁବନେଶ୍ବର: ଭୁବନେଶ୍ୱର ଏମ୍ସରେ ପଶିଲା ସିବିଆଇ ଟିମ୍ । ଚାକିରି କେଳେଙ୍କାରୀ ଅଭିଯୋଗରେ ସିବିଆଇର ୯ ଜଣିଆ ଟିମର ଛାପାମାର । ଠିକା କର୍ମଚାରୀଙ୍କୁ ସ୍ଥାୟୀ ନିଯୁକ୍ତି ଦେବାରେ ହୋଇଛି ବଡ଼ କେଳେଙ୍କାରୀ । ଦୀର୍ଘ ୭ ଘଣ୍ଟାର ରେଡ଼ ବେଳେ ୨୭ ଜଣଙ୍କୁ ଜେରା । ଜବତ ହେଲା ବହୁ ଗୁରୁତ୍ୱପୂର୍ଣ୍ଣ ଡକ୍ୟୁମେଣ୍ଟ ଓ ଡିଜିଟାଲ ଡିଭାଇସ ।
ଭୁନେଶ୍ବର ଏମ୍ସରେ ଚାକିରି ପ୍ରଦାନରେ ଘୋଟାଲା ଓ ପୁଳା ପୁଳା ପ୍ରମାଣ ପରେ ଆକ୍ସନ ମୋଡରେ ସିବିଆଇ । ସିବିଆଇ ପାଖରେ ପିଟିସନ ପଡିବା ପରେ ଆରମ୍ଭ ହୋଇଛି ଚଢ଼ାଉ । ଏମ୍ସ ଏକାଡେମୀକ ବ୍ଲକରେ ଭୁବନେଶ୍ୱର ସିବିଆଇର ୯ ଜଣିଆ ଟିମ ଆରମ୍ଭ କରିଛି ଛାନଭିନ ।
ଅଭିଯୋଗ ମୁତାବକ ସର୍ବଭାରତୀୟ ସ୍ତରରେ ଏମ୍ସ ନିଯୁକ୍ତି ପାଇଁ ପରୀକ୍ଷା କରାଯାଉଥିବା ବେଳେ ଭୁବନେଶ୍ୱର ଏମ୍ସରେ ହୋଇଛି ନିଯୁକ୍ତି ପ୍ରକ୍ରିୟାର ଉଲ୍ଲଂଘନ । ଓଡ଼ିଶାର ଗୋଟିଏ ପରିବାରର ୪ ଜଣଙ୍କୁ ସ୍ଥାୟୀ ନିଯୁକ୍ତି ଦିଆଯାଇଛି । ପୂର୍ବରୁ ଠିକା ନିଯୁକ୍ତି ପାଇଥିବା ଏହି କର୍ମଚାରୀ କିଭଳି ସ୍ଥାୟୀ ହେଲେ ତାକୁ ନେଇ ଉଠିଥିଲା ପ୍ରଶ୍ନ । ଏପରିକି ଚୟନ ପ୍ରକ୍ରିୟାରେ ଯୋଗ୍ୟତା ଓ ଦକ୍ଷତାର ଧଜ୍ଜିଆ ଉଡି଼ଥିବା ନେଇ ପିଟିସନ ପଡିବା ପରେ ଆଜି ସକାଳ ୭ରୁ ଚଢ଼ାଉ ଆରମ୍ଭ କରିଥିଲା ସିବିଆଇ ଟିମ ।
ସିବିଆଇର ତଦନ୍ତ ବେଳେ ମୋଟ ୨୭ ଜଣ ଜେରାର ସମ୍ମୁଖୀନ ହୋଇଛନ୍ତି । ସିବିଆଇ ସୂତ୍ରରୁ ମିଳିଥିବା ସୂଚନା ମୁତାବକ, ୨୦୨୩ ଜୁଲାଇ ୧ ତାରିଖରେ ସାନିଟାରୀ ଇନ୍ସପେକ୍ଟର ରେକର୍ଡ ଆସିଷ୍ଟାଣ୍ଟ ପାଇଁ ସାରା ଦେଶରେ ୭ ଶହ ପୋଷ୍ଟ ବାହାରିଥିଲା । ଓଡ଼ିଶାର କିଛି ପିଲା ସେଥିପାଇଁ ଆବେଦନ କରିଥିଲେ । ପରୀକ୍ଷାରେ ଉତ୍ତୀର୍ଣ୍ଣ ହୋଇଥିବା କିଛି ପିଲାଙ୍କ ବଦଳରେ ପୂର୍ବରୁ ଠିକା ନିଯୁକ୍ତି ପାଇଥିବା କର୍ମଚାରୀଙ୍କୁ ସ୍ଥାୟୀ ନିଯୁକ୍ତି ମିଳିଛି । ସ୍ମୃତି ସାଗର କର ନାମକ ଜଣେ ବ୍ୟକ୍ତିଙ୍କ ପରିବାରର ୪ ଜଣ ସ୍ଥାୟୀ ନିଯୁକ୍ତି ପାଇବା ନେଇ ପିଟିସନ ପଡିବା ପରେ ଜେରା କରିଛି ସିବିଆଇ । ମଧ୍ୟାହ୍ନ ୨ଟା ପର୍ଯ୍ୟନ୍ତ ଚାଲିଥିବା ରେଡ ବେଳେ ବହୁ ଗୁରୁତ୍ୱପୂର୍ଣ୍ଣ ତଥ୍ୟ, ଡିଜିଟାଲ ଡିଭାଇସ ସିବିଆଇ ହାତରେ ଲାଗିଛି । ତେବେ ଏଠାରେ ପ୍ରଶ୍ନ ଉଠୁଛି କିଏ ସେହି କରିତକର୍ମା ? ଚାକିରି କେଲେଙ୍କାରୀରେ ହୋଇଛି କେତେ କୋଟିର କାରବାର ? ଏ ନେଇ ଏମ୍ସ ଉପରିସ୍ଥ ଅଧିକାରୀଙ୍କ ପ୍ରତିକ୍ରିୟା ମିଳି ପାରିନି ।
ଟିଟିଲାଗଡ଼ରେ ଦୁର୍ନୀତି ବଢ଼ିବା ପଛରେ ବିଜେପି ବିଧାୟକ: ଟୁକୁନି ସାହୁ
ଟିଟିଲାଗଡ଼: ଦୁର୍ନୀତିରେ ଉବୁଟୁବୁ ହେବାରେ ଲାଗିଛି ଟିଟିଲାଗଡ଼ ବିଧାନସଭା କ୍ଷେତ୍ର । ଏଠାରେ ବିଜେପି ପ୍ରାର୍ଥୀଙ୍କ ବିଜୟ ପରେ ଦୁର୍ନୀତି ବଢ଼ିବାରେ ଲାଗିଛି । ସରକାରୀ କଳ ବିଜେପି ବିଧାୟକଙକ ହାତବାରିସି ସାଜିଛନ୍ତି । ଆଜି ଏକ ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛନ୍ତି ବିଜେଡି ଜିଲ୍ଲା ସଭାପତି ଟୁକୁନି ସାହୁ ।
ସେ କହିଛନ୍ତି, ଟିଟିଲାଗଡ଼ ଉନ୍ନତି ଲକ୍ଷ୍ୟରେ ପୂର୍ବତନ ମୁଖ୍ୟମନ୍ତ୍ରୀ ଅନେକ ଯୋଜନାର ଶୁଭାରମ୍ଭ କରିଥିଲେ । ଟିଟିଲାଗଡ଼ରେ ମିଶନ ଶକ୍ତି ହାଟ, ମିଶନ ଶକ୍ତି କାଫେ ଭଳି ଅନେକ ଯୋଜନା କରିଥିଲେ ପୂର୍ବ ସରକାର । ହେଲେ ଏହି ସମସ୍ତ ଦୋକାନ ଓ କାଫେ ଦେବାକୁ ସ୍ଥାନୀୟ ବିଧାୟକ ଲୋକଙ୍କଠାରୁ ଅର୍ଥ ସଂଗ୍ରହ କରୁଛନ୍ତି । ବିଧାୟକଙ୍କ ଇସାରାରେ ବ୍ଲକ କାର୍ଯ୍ୟାଳୟ ତରଫରୁ ଦୋକାନ ନେଉଥିବା ଲୋକଙ୍କ ପାଖରୁ ୧୦ ପ୍ରତିଶତ ପିସି ମାଗୁଥିବା ସେ ଅଭିଯୋଗ କରିଛନ୍ତି ।
ଟିଟିଲାଗଡ ବିଜୁ ଜନତା ଦଳ କାର୍ଯ୍ୟାଳୟରେ ପ୍ରେସମିଟରେ ଜିଲ୍ଲା ସଭାପତି ଓ ପୂର୍ବତନ ମନ୍ତ୍ରୀ ଟୁକୁନି ସାହୁ ବିଧାୟକ ନବୀନ ଜୈନକୁ ଖୋଲା ଚେଲେଞ୍ଜ କରିଛନ୍ତି । ବିଧାୟକ ଅନେକ ଠିକାଦାରଙ୍କ ନିକଟରୁ ମୋଟା ଅଙ୍କର ପିସି ନେଉଥିବା ଓ ବିକାଶ ଉପରେ ଗୁରୁତ୍ଵ ଦେଉ ନଥିବା ସେ ଅଭିଯୋଗ କରିଛନ୍ତି ।
ସେହିପରି ବିଧାୟକଙ୍କ ସମର୍ଥକମାନେ ଟିଟିଲାଗଡ଼ ବ୍ଲକ ଅଧ୍ୟକ୍ଷାଙ୍କ ବିରୋଧରେ ଆଣିଥିବା ଅନାସ୍ଥା ପ୍ରସ୍ତାବ ଆବେଦନ ଉପରେ ମତ ରଖିଛନ୍ତି ଟୁକୁନି ସାହୁ । ଟିଟିଲାଗଡ଼ ସମିତିରେ ବିଜେଡିର ବହୁ ମତ ରହିଛି । ବିଜେଡି ଅଧ୍ୟକ୍ଷା ହୋଇଥିବାରୁ ଓ ଦୁର୍ନୀତିକୁ ବିରୋଧ କରୁଥିବାରୁ ତାଙ୍କୁ ହଟାଇବା ପାଇଁ ନବୀନ ଜୈନଙ୍କ ଏହା ଏକ ଚାଲ । ଆଗାମୀ ଦିନରେ ଦଳ ଏହାର ଘୋର ବିରୋଧ କରିବ ବୋଲି ସେ କହିଛନ୍ତି ।