spot_img
Home Blog Page 1118

ପୁଣି ଗଡ଼ିଲା ମୁଣ୍ଡ: ୫ ଦିନରେ ୫ଟି ହତ୍ୟାକାଣ୍ଡ ଯୋଗୁଁ ଆତଙ୍କିତ ରାଉରକେଲା ସହରବାସୀ

ରାଉରକେଲା: ପୁଣି ରକ୍ତପାତ, ପୁଣି ଗଡ଼ିଲା ମୁଣ୍ଡ । ଅଣାୟତ ରାଉରକେଲାର ଆଇନ ଶୃଙ୍ଖଳା । ୫ ଦିନରେ ୫ଟି ହତ୍ୟାକାଣ୍ଡ ଯୋଗୁଁ ଆତଙ୍କିତ ସହରବାସୀ । ମାଆ ହତ୍ୟାକାରୀ ବାପାକୁ ହତ୍ୟାକଲା ପୁଅ । ସୁନ୍ଦରଗଡ଼ ଜିଲ୍ଲା ଲାଠିକଟା ବ୍ଲକ ଭାଲୁପତ୍ରା ଗ୍ରାମରେ ଘଟିଛି ଏପରି ଚାଞ୍ଚଲ୍ୟକର ଘଟଣା । ହତ୍ୟାକାରୀ ୨୨ ଵର୍ଷୀୟ ବିଷ୍ଣୁ ବର୍ମାକୁ ଗିରଫ କରିଛି ବ୍ରାହ୍ମଣୀ ତରଙ୍ଗ ଥାନା ପୋଲିସ । ମୃତ ବାପା ୫୫ ବର୍ଷୀୟ କାନ୍ତିକୁମାର ବର୍ମା ନିଜ ପତ୍ନୀକୁ ହତ୍ୟା କରିବା କରିଥିବା ଅଭିଯୋଗରେ ୨୦୨୪ ଡ଼ିସେମ୍ବରରେ ଜେଲରୁ ଫେରିଥିଲେ । ପୁଅ ସହ ଗଣ୍ଡଗୋଳ ଯୋଗୁଁ ଉତକ୍ଷିପ୍ତ ହୋଇ ହତ୍ୟା କରିଥିବା ପୋଲିସ ସନ୍ଦେହ କରିଛି ।

୫ ଦିନରେ ୫ଟି ହତ୍ୟାକାଣ୍ଡ ସହରବାସୀଙ୍କ ନିଦ ହଜାଇ ଦେଇଛି । ପୂର୍ବ ସରକାରଙ୍କ ସମୟରେ ଶାନ୍ତ ସହର ଥିବା ରାଉରକେଲାରେ ଏବେ ପ୍ରତିଦିନ ଘଟୁଛି ରକ୍ତପାତ । ଗତ ୯ ତାରିଖରେ ଭିଏସଏସ ମାର୍କେଟ ଓ ଗାନ୍ଧୀ ରୋଡ଼ରେ ଦୁଇଜଣଙ୍କୁ ହତ୍ୟା କରିଥିଲେ ଦୁର୍ବୃତ୍ତ । ୧୧ ତାରିଖରେ ସାଙ୍ଗକୁ ସ୍କୃଡ୍ରାଇଭରରେ ଭୁସି ଦେବାରୁ ଚିକିତ୍ସାଧିନ ଅବସ୍ଥାରେ ତାଙ୍କର ମୃତ୍ଯୁ ହୋଇଛି । ୧୨ ତାରିଖ ରାତିରେ ଏସଟିଆଇ ଛକ ନିକଟରେ ଜଣେ ଯୁବକଙ୍କୁ ତଣ୍ଟିକାଟି ହତ୍ୟା କରାଯାଇଥିବା ଅଭିଯୋଗ ହୋଇଛି । ରାଉରକେଲା ସହର ଓ ନିକଟବର୍ତ୍ତୀ ଅଞ୍ଚଳରେ ଚୋରା ମଦ କାରବାର ବଢୁଥିବାରୁ ଅପରାଧ ବଢିଥିବା ଲୋକେ ଅଭିଯୋଗ କରିଛନ୍ତି । ମଦ କାରବାର ରୋକିବାକୁ ରାଉରକେଲା ରାସ୍ତାକଡ, ପାର୍କ ଓ ସହର ନିକଟବର୍ତ୍ତୀ ଜାତୀୟ ରାଜପଥ ଏବଂ ଢାବାରେ ଚଢାଉ କରୁଛି ପୋଲିସ୍ ।

ପଞ୍ଜାବକୁ ପୁଣି ଏକ ବଡ଼ ଝଟକା: IPL ୨୦୨୫ରୁ ବାଦ୍ ପଡ଼ିଲେ ଏହି ଖେଳାଳି

ଇଣ୍ଡିଆନ ପ୍ରିମିୟର ଲିଗ (IPL) ଚାଲିଥିବା ବେଳେ ଏହା ମଧ୍ୟରେ ପଞ୍ଜାବ କିଙ୍ଗସକୁ ଲାଗିଛି ଏକ ବଡ଼ ଝଟକା । ଗତ ମ୍ୟାଚରେ ପଞ୍ଜାବକୁ ସନରାଇଜର୍ସ ହାଇଦ୍ରାବାଦ ଠାରୁ ୮ ଓ୍ବିକେଟରେ ପରାସ୍ତ ହେବାକୁ ପଡ଼ିଥିଲା । ଏହା ମଧ୍ୟରେ ଟିମକୁ ଲାଗିଛି ପୁଣି ଏକ ବଡ଼ ଝଟକା । ପଞ୍ଜାବର ଦ୍ରୁତ ବୋଲର ଲକୀ ଫର୍ଗ୍ୟୁସନ ଆଇପିଏଲ ୨୦୫ରୁ ବାଦ୍ ପଡ଼ିଛନ୍ତି । ମିଡ଼ିଆ ରିପୋର୍ଟ ମୁତାବକ, ଫର୍ଗ୍ୟୁସନଙ୍କୁ ଏକ ବଡ଼ ଧରଣର ଆଘାତ ଲାଗିଛି । ତେଣୁ ସେ ଏବେ ଖେଳିବା ଅସମ୍ଭବ । ଏହି କାରଣରୁ ଫର୍ଗ୍ୟୁସନ ଏହି ଟୁର୍ଣ୍ଣାମେଣ୍ଟରୁ ବାଦ୍ ପଡ଼ିଛନ୍ତି । ଫର୍ଗ୍ୟୁସନଙ୍କ ଖେଳିବା ଏକପ୍ରକାରର  ଅସମ୍ଭବ ବୋଲି ପଞ୍ଜାବର ବୋଲିଂ କୋଚ ଜେମ୍ସ ହୋପ୍ସ ଏ ବାବଦରେ ସୂଚନା ଦେଇଛନ୍ତି ।

କୋଚ ହୋପ୍ସ କହିଛନ୍ତି, ଫର୍ଗ୍ୟୁସନ ଅନିଶ୍ଚିତ ସମୟ ପାଇଁ ବାଦ୍ ପଡ଼ିଛନ୍ତି । ଚଳିତ ଟୁର୍ଣ୍ଣାମେଣ୍ଟର ଶେଷ ସୁଦ୍ଧା ସେ ଟିମକ ଫେରିବା ମୁସ୍କିଲ । ସୂଚନାଯୋଗ୍ୟ ଯେ, ହାଇଦ୍ରାବାଦ ବିପକ୍ଷ ମ୍ୟାଚ ସମୟରେ ଦୁଇଟି ବଲ୍ ଫୋପାଡ଼ିବା ପରେ ଫର୍ଗ୍ୟୁସନ ପଡ଼ିଆ ଛାଡ଼ି ଚାଲିଯାଇଥିଲେ । ଚଳିତ ସିଜିନରେ ସେ ପଞ୍ଜାବ ପାଇଁ ଖେଳି ୪ଟି ମ୍ୟାଚରେ ୫ଟି ଓ୍ବିକେଟ ଅକ୍ତିଆର କରିଛନ୍ତି । ସେ ମିଡିଲ ଓଭରରେ ଟିମର ବୋଲିଂ ଯୋଜନାରେ ବଡ଼ ଭୂମିକା ନିର୍ବାହ କରିଥିଲେ ।

ମହାକାଶ ଯାତ୍ରାରେ ଇତିହାସ ରଚିଲେ କେଟୀ ପେରୀଙ୍କ ସମେତ ୬ ଜଣ ମହିଳା

ନୂଆଦିଲ୍ଲୀ: ମହାକାଶ ଯାତ୍ରାରେ ଇତିହାସ ରଚିଛନ୍ତି ପପ୍ ସିଙ୍ଗର କେଟୀ ପେରୀଙ୍କ ସମେତ ୬ ଜଣ ମହିଳା । ବ୍ଲୁ ଅରିଜିନର ନ୍ୟୁ ଶେପର୍ଡ ସବଅର୍ବିଟଲ ବାହନ (ଏନଏସ-୩୧)ର ୩୧ତମ ମିଶନ ସଫଳତାର ସହ ସମାପ୍ତ ହୋଇଛି । ଏପ୍ରିଲ ୧୪ରେ କଟୀ ପେରୀ ଓ ଅନ୍ୟ ୫ ଜଣ ମହିଳା ମହାକାଶ ଯାତ୍ରା କରିଥିଲେ । ନ୍ୟୁ ଶେପର୍ଡ ପ୍ରୋଗ୍ରାମର ୧୧ତମ ମାନବ ଉଡ଼ାଣ ଥିଲା, ଯାହାକି ୧୯୬୩ ମସିହା ପରେ ପ୍ରଥମ ଥର ଅଲ-ଫିମେଲ ସ୍ପେସ ଟ୍ରିପ ଥିଲା ।

ଏହି ମିଶନ ଅବସରରେ ମହାକାଶ ଯାତ୍ରୀ କିଛି ମିନିଟ୍ ପାଇଁ ଭାରହୀନତାର ଅନୁଭବ କରିବେ । ପୃଥିବୀର ଜୀବନ-ପରିବର୍ତ୍ତନକାରୀ ଦୃଶ୍ୟର ଦେଖିବେ । ପପ ଷ୍ଟାର କେଟୀ ପେରୀ, ସିବିଏସ ମାର୍ଣ୍ଣିଂଙ୍ଗସର ସହ-ହୋଷ୍ଟ ଗେଲ କିଙ୍ଗ, ଲେଖିକା ଅମାଣ୍ଡା ଗୁୟେନ, ପୂର୍ବ ନାସା ରକେଟ ବୈଜ୍ଞାନିକ ଆୟଶା ବୋବେ, ଫିଲ୍ମ ନିର୍ମାତା କେରିୟନ ଫ୍ଲିନ, ମିଶନ ଲିଡର ଲରେନ ସାଞ୍ଚେଜ (ଯେ କି ବ୍ଲୁ ଅରିଜିନର ସଂସ୍ଥାପକ ଜେପ ବୋଜେସଙ୍କ ପାର୍ଟନର ଅଟନ୍ତି) ଏହି ମିଶନରେ ସାମିଲ ଥିଲେ । ଉଡ଼ାଣ ପାଖାପାଖି ୧୪ ମିନିଟ୍ ପର୍ଯ୍ୟନ୍ତ ଚାଲିଥିଲା । ଏନଏସ-୩୧ କ୍ରୁ କ୍ୟାପସୁଲ ଟେକ୍ସାସ ରେଗିସ୍ତାନରେ ପାରାଶୁଟ ଦ୍ବାରା ସୁରକ୍ଷିତ  ଭାବେ ଅବତରଣ କରାଯାଇଥିଲା ।

ସନରାଇଜର୍ସ ହାଇଦ୍ରାବାଦ ଟିମର ଖେଳାଳିମାନେ ରହିଥିବା ହୋଟେଲରେ ଲାଗିଲା ନିଆଁ

ନୂଆଦିଲ୍ଲୀ: ବର୍ତ୍ତମାନ ଆଇପିଲ ୨୦୨୫ ଜାରି ରହିଥିବା ବେଳେ ଏହା ମଧ୍ୟରେ ଏକ ବଡ଼ ଖବର ସାମ୍ନାକୁ ଆସିଛି । ସନ ରାଇଜର୍ସ ହାଇଦ୍ରାବାଦର ଖେଳାଳିମାନେ ଯେଉଁ ହୋଟେଲରେ ରହୁଥିଲେ ସେଠାରେ ନିଆଁ ଲାଗିଛି । ହୋଟେଲର ତୃତୀୟ ମହଲାରେ ଥିବା ସ୍ପା’ରେ ନିଆଁ ଲାଗିଥିବା ସୂଚନା ମିଳିଛି । ହାଇଦ୍ରାବାଦର ବଞ୍ଜାରା ହିଲ୍ସ ପାର୍କ ହ୍ୟାତ ହୋଟେଲରେ ଖେଳାଳିମାନେ ରହିଥିଲେ । ସବୁଠାରୁ ବଡ଼ କଥା ହେଉଛି, ହୋଟେଲରେ ଯେଉଁ ସମୟରେ ନିଆଁ ଲାଗିଥିଲା, ସେତେବେଳକୁ ଖେଳାଳିମାନେ ହୋଟେଲ ପରିସରରୁ ବାହାରି ସାରିଥିଲେ ।

ଏହି ଅଗ୍ନିକାଣ୍ଡ ଘଟଣାରେ ହୋଟେଲରେ ଥିବା କୌଣସି ଅତିଥି କି ଖେଳାଳିଙ୍କର କିଛି କ୍ଷତି ଘଟି ନାହିଁ । ଅଫିସିଭାଲ ଭାବେ ଏନେଇ ସୂଚନା ଦିଆଯାଇଛି । ତେବେ ଅଗ୍ନିକାଣ୍ଡର କାରଣ ସମ୍ପର୍କରେ ଯାଞ୍ଚ ଚାଲିଛି । ଆସନ୍ତା ଗୁରୁବାର ଦିନ ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ସନରାଇଜର୍ସ ହାଇଦ୍ରାବାଦ ଖେଳିବ । ସେଥିପାଇଁ ପୂରା ଟିମ୍ ସକାଳୁ ହିଁ ବିମାନବନ୍ଦର ଅଭିମୂଖେ ଯାତ୍ରା କରିସାରିଥିଲା । ତେଣୁ ଖେଳାଳିମାନେ ଏହି ଘଟଣାରେ ପ୍ରଭାବିତ ହୋଇନଥିଲେ ।

ଦୃଢ଼ ଇଚ୍ଛାଶକ୍ତି ଆଗରେ ହାର ମାନିଛି ଶାରୀରିକ ଅକ୍ଷମତା: ଗୋଟିଏ ଗୋଡ଼ ହରାଇଥିଲେ ବି ହାର ମାନି ନାହାନ୍ତି ମମତା

ଆନନ୍ଦପୁର: ଦିବ୍ୟାଙ୍ଗ ହୋଇ ବି ସକ୍ଷମ । ଦୁର୍ବାର ଇଚ୍ଛା ଶକ୍ତି ଆଗରେ ହାର ମାନିଛି ଶାରୀରିକ ଅକ୍ଷମତା । ସବୁ ପ୍ରତିବନ୍ଧକକୁ ମାତ ଦେଇ ଜୀବନ ଯୁଦ୍ଧରେ ଆଗେଇ ଚାଲିଛନ୍ତି ଆନନ୍ଦପୁର ଉପଖଣ୍ଡ ଘଷିପୁରା ବ୍ଲକ ପୁରୁଣା ବାନ୍ଧଗୋଡା ଗାଁର ସଂଘମିତ୍ରା । ସେ ଆଖପାଖ ଅଞ୍ଚଳରେ ମମତା ନାନୀ ଭାବେ ବେଶ ପରିଚିତ । ମମତା ପିଲାବେଳୁ ପୋଲିଓରେ ଆକ୍ରାନ୍ତ ହୋଇ ଗୋଟେ ଗୋଡ ହରାଇ ବସିଛନ୍ତି । ତଥାପି ସେ କେବେ ହାରମାନି ଯାଇନାହାଁନ୍ତି । ପରିବାରର ଆର୍ଥିକ ସ୍ଥିତିରେ ପରିବର୍ତ୍ତନ ଆଣିବା ନିମନ୍ତେ ସେ ବଡି ତିଆରି କରି ବିକ୍ରି କରୁଛନ୍ତି ।

ମମତା ପ୍ରସ୍ତୁତ କରୁଥିବା ବଡିର ସ୍ଥାନୀୟ ଅଞ୍ଚଳରେ ବେଶ ଚାହିଦା ରହିଛି । ଲୋକ ମାନେ ତାଙ୍କ ଘର ନିକଟକୁ ଯାଇ ବଡି କିଣି ନେଇଯାଉଛନ୍ତି । ଖାଲି ଏତିକି ନୁହେଁ ନଡିଆ କଞ୍ଚିରୁ ଖଇଞ୍ଚି ତିଆରି କରି ବିକ୍ରିବଟା କରୁଛନ୍ତି ମମତା । ନିଜର ଦୃଢ ଇଚ୍ଛାଶକ୍ତି ବଳରେ ନିଜେ ଦିବ୍ୟାଙ୍ଗ ହୋଇ ମଧ୍ୟ ଆତ୍ମନିର୍ଭରଶୀଳ ହେବା ସହ ଅନ୍ୟମାନଙ୍କୁ ସ୍ୱାବଲମ୍ବୀ କରିବାକୁ ପ୍ରେରଣା ଯୋଗାଉଛନ୍ତି। ମମତା ଏବେ ଅନ୍ୟ ମହିଳାମାନଙ୍କ ପାଇଁ ପ୍ରେରଣାର ଉତ୍ସ ପାଲଟିଛନ୍ତି ।

ଓଡ଼ିଆ ନବବର୍ଷରେ ସାରା ଓଡ଼ିଶା ଚଳଚଞ୍ଚଳ: ରାଜ୍ୟର ବିଭିନ୍ନ କୋଣ ଅନୁକୋଣରେ ଥିବା ପୂଜାସ୍ଥଳୀରେ ଭକ୍ତଙ୍କ ଭିଡ଼

ଭୁବନେଶ୍ବର: ଆଜି ପବିତ୍ର ମହାବିଷୁବ ସଂକ୍ରାନ୍ତି ଏବଂ ପଣା ସଂକ୍ରାନ୍ତି । ପରମ୍ପରାର ପ୍ରତୀକ ତଥା ଓଡିଆ ନବବର୍ଷ । ଗାଁ ଠୁ ସହର ସବୁଠି ଉତ୍ସବର ମାହୋଲ । ସବୁଠି ଚାଲିଛି ପଣା ବଣ୍ଟନ । ପଣା ସଂକ୍ରାନ୍ତିରେ ଚଳଚଞ୍ଚଳ ପୂଜାସ୍ଥଳୀ । କେନ୍ଦୁଝରର ଆରାଧ୍ୟ ଦେବୀ ମାଆ ତାରିଣୀଙ୍କ ପୀଠରେ ମହା ଆଡମ୍ବରରେ ପାଳିତ ହୋଇଯାଇଛି ମହାବିଷୁବ ସଂକ୍ରାନ୍ତି । ମାଆଙ୍କୁ ସୁନା ବେଶରେ ଦର୍ଶନ କରି କୃତାର୍ଥ ମଣିଛନ୍ତି ଭକ୍ତ । ଆରଡିର ବାବା ଆଖଣ୍ଡଳମଣିଙ୍କ ମନ୍ଦିରରେ ପ୍ରବଳ ଭକ୍ତଙ୍କ ସମାଗମ । ମଣିବାବାଙ୍କ ଦର୍ଶନ ନିମନ୍ତେ ପ୍ରଶାସନ ପକ୍ଷରୁ କରାଯାଇଛି ବ୍ୟାପକ ବ୍ୟବସ୍ଥା ।

ଏପଟେ ପଣା ସଂକ୍ରାନ୍ତି ଓ ଝାମୁଯାତ୍ରା ପାଇଁ ଚଳଚଞ୍ଚଳ ଜଗତସିଂହପୁରର ଅଧିଷ୍ଠାତ୍ରୀ ଦେବୀ ମାଆ ଝଙ୍କଡ ଶାରଳାଙ୍କ ପୀଠ । ମାଆଙ୍କୁ ଦର୍ଶନ କରି ଧନ୍ୟ ମଣିଛନ୍ତି ଭକ୍ତ । ଆଜିର ଦିନରେ ମାଆ ନିଜେ ରତ୍ନ ସିଂହାସନ ପରିତ୍ୟାଗ କରି ଗାଁ ଦାଣ୍ଡକୁ ଆସିଥାନ୍ତି ବୋଲି ରହିଛି ବିଶ୍ଵାସ । ବାସୁଦେବପୁର ବ୍ଲକର ବିନାୟକପୁର ମାଆ ଆଙ୍କୁଡେଶ୍ବରୀଙ୍କ ପୀଠରେ ଭକ୍ତଙ୍କ ଗହଳିଚହଳି । ସୁଦୂର କୋଲକାତାରୁ ଛୁଟିଆସିଛନ୍ତି ଶ୍ରଦ୍ଧାଳୁ । ଖୋର୍ଦ୍ଧା ଜରିପୁଟ ତନ୍ତମୁଣ୍ଡିଆ ହନୁମାନ ପୀଠରେ ଶ୍ରଦ୍ଧାଳୁଙ୍କ ଭିଡ । ପ୍ରଭୁଙ୍କୁ ଦର୍ଶନ କରି ହନୁମାନ ଚାଳିଶା ପାଠ କରିଛନ୍ତି ଶ୍ରଦ୍ଧାଳୁ । ଆଜିର ଦିନରୁ ନୂଆ ପାଞ୍ଜି ପ୍ରଚଳନ ହୋଇଥାଏ ।

ଛୋଟ କଳାକାରଙ୍କ ହୃଦୟ ମହାନ: ବାପାଙ୍କ ସ୍ମୃତିରେ ତିଆରି କଲେ କଂକ୍ରିଟ ରାସ୍ତା ଓ ପାହାଚ

ଗୁଣୁପୁର: ନଦୀ ତୁଠକୁ ନିର୍ମାଣ ହୋଇଛି ଚକାଚକ ରାସ୍ତା । ତିଆରି ହୋଇଛି ପାହାଚ । ଆଉ ଏହି ପାହାଚ ଗ୍ରାମ୍ୟ ସଡକ ପରିବହନ ପକ୍ଷରୁ ତିଆରି ହୋଇନି । ଆପଣଙ୍କୁ ଏ କଥା ଟିକେ ଚକିତ କରିପାରେ ହେଲେ ସତ । ଏହା ପଛରେ ରହିଛି ବିଶେଷ କାରଣ । ରାସ୍ତା ଓ ପାହାଚକୁ ତିଆରି କରିଛନ୍ତି ଗୁଣୁପୁର କୁମ୍ଭାର ସାହିର କୋନା ମାର୍କଣ୍ଡ । ସେ ତାଙ୍କ ବାପାଙ୍କ ମୃତ୍ୟୁ ପରେ ତାଙ୍କ ସ୍ମୃତି ଓ ଲୋକସେବା ଉଦ୍ଦେଶ୍ୟରେ ବଂଶଧାରା ନଦୀ ତୁଠକୁ ତିଆରି କରିଛନ୍ତି କଂକ୍ରିଟ ରାସ୍ତା ଓ ପାହାଚ । ତାହା ପୁଣି ନିଜସ୍ଵ ଅର୍ଥରେ ।

କୋନା ମାର୍କଣ୍ଡ । ଜଣେ କ୍ଷୁଦ୍ର ଚିତ୍ରକାର ଓ ମୂର୍ତ୍ତି ଶିଳ୍ପୀ । କୋନାଙ୍କ ବାପା କୋନା ସୁରିୟ ନାରାୟଣ ଦୁଇ ହଜାର ମସିହାରେ ମୃତ୍ୟୁବରଣ କରିଥିଲେ । ସେବେଠାରୁ ମାର୍କଣ୍ଡ ତାଙ୍କ ବାପାଙ୍କ ଉଦ୍ଦେଶ୍ୟରେ କିଛି କରିବା ପାଇଁ ଚିନ୍ତା କରିଥିଲେ । ତାପରେ ତାଙ୍କ ନଜରକୁ ଆସିଥିଲା ବଂଶଧାରା ନଦୀ ତୁଠର ଅସୁବିଧା କଥା । ଲୋକଙ୍କ ସୁବିଧା ପାଇଁ ସେ ୨୦୨୦ ମସିହାରେ ୧ ଲକ୍ଷ ୭୦ ହଜାର ଟଙ୍କା ଖର୍ଚ୍ଚ କରି ନଦୀକୁ ଓଲ୍ଲାଇବା ପାଇଁ ପ୍ରଥମେ କଂକ୍ରିଟ୍ ପାହାଚ ତିଆରି କରିପାରିଥିଲେ । ଅର୍ଥ ଅଭାବରୁ ପରେ ୧ ଲକ୍ଷ ୫୦ ହଜାର ଟଙ୍କା ବ୍ୟୟରେ ପାହଚ ଠୁ ନଦୀ ହୁଡାକୁ କଂକ୍ରିଟ ରାସ୍ତା ନିର୍ମାଣ କରି ସଂପୂର୍ଣ୍ଣ କରିଛନ୍ତି । ମାର୍କଣ୍ଡଙ୍କ ଏଭଳି ଉଦ୍ୟମକୁ ଅଞ୍ଚଳବାସୀଙ୍କ ସମେତ ବୁଦ୍ଧିଜୀବୀ ମାନେ ବେଶ ପ୍ରଶଂସା କରିଛନ୍ତି ।

ଫେଲ୍‌ ମାରିଛି ଗ୍ରାମ୍ୟ ଆଲୋକୀକରଣ ବ୍ୟବସ୍ଥା: ଘରୁ ବାହାରିବାକୁ ଅସୁରକ୍ଷିତ ମଣୁଛନ୍ତି ମହିଳା

ବରୀ: ଅଚଳ ହୋଇପଡିଛି ଷ୍ଟ୍ରିଟ ଲାଇଟ । ସଞ୍ଜ ନଇଁବା କ୍ଷଣି ଡରାଉଛି ଅନ୍ଧାର । ଘରୁ ବାହାରିବାକୁ ଅସୁରକ୍ଷିତ ମଣୁଛନ୍ତି ମହିଳା । ଏଭଳି କିଛି ଦୃଶ୍ୟ ଦେଖିବାକୁ ମିଳିଛି ବରୀ ବ୍ଲକରେ । ବରୀ ବ୍ଲକର ବିଭିନ୍ନ ପଞ୍ଚୟତର ଗାଁ ଦାଣ୍ଡରେ ଲାଗିଥିବା ଷ୍ଟ୍ରିଟ ଲାଇଟ ଗୁଡି ଏବେ ଅଚଳ ହୋଇପଡିଛି । ଏପରିକି ବରୀର ମୁଖ୍ୟ ବଜାର ବରୀ ମାଉଣ୍ଡରେ ଲାଗିଥିବା ହାଇମାସ୍ଟ ଲାଇଟର ଅବସ୍ଥା ବି ଶୋଚନୀୟ ହୋଇପଡିଛି । ଯାହାର ସୁଯୋଗ ନେଇ ଅନ୍ଧାର ହେବା କ୍ଷଣି ବଜାରରେ ଅସମାଜିକ ବ୍ୟକ୍ତିମାନେ ଆଡା ଜମାଉଛନ୍ତି । ରାତିରେ ଚୋରି ବୃଦ୍ଧି ପାଉଛି । ଫଳରେ ସ୍ଥାନୀୟ ମହିଳାମାନେ ବଜାରକୁ ଆସିବାକୁ ଅସୁରକ୍ଷିତ ମଣୁଥିବା ଅଭିଯୋଗ ହୋଇଛି ।

ପୂର୍ବ ସରକାରଙ୍କ ସମୟରେ ଅରଙ୍ଗାବାଦ୍ ଛତର ନିକଟରୁ ବାଲିବିଲି ଗାନ୍ଧୀ ଛକ ପର୍ଯ୍ୟନ୍ତ ଲକ୍ଷାଧିକ ଟଙ୍କାରେ ଲାଗିଥିଲା ଷ୍ଟ୍ରିଟ ଲାଇଟ । କିନ୍ତୁ ବର୍ତ୍ତମାନ ତାହା ସମ୍ପୂର୍ଣ୍ଣ ରୂପେ ଅକାମୀ ହୋଇ ପଡ଼ିଛି । ଠିକାଦାର ମାନେ ନିମ୍ନମାନର ଲାଇଟ ଲଗାଇ ଲକ୍ଷାଧିକ ଟଙ୍କା ଲୁଟିନେଇଥିବା ଅଭିଯୋଗ ହୋଇଛି । ସରକାରଙ୍କ ନିୟମ ଅନୁଯାୟୀ ଗ୍ରାମ୍ୟ ଆଲୋକୀକରଣ ନିମନ୍ତେ ଲାଗିଥିବା ଷ୍ଟ୍ରିଟ ଲାଇଟ ଅଚଳ ହେଲେ ଅଚଳ ଲାଇଟର ତାଲିକା ପଞ୍ଚାୟତ ତରଫରୁ ବ୍ଲକ ପ୍ରଶାସନକୁ ଅବଗତ କରାଯିବା କଥା । ମାତ୍ର କେଉଁ ପଞ୍ଚାୟତର କେତେ ଷ୍ଟ୍ରିଟ ଲାଇଟ୍ ଅଚଳ ହୋଇପଡିଛି ତାହାର ତାଲିକା ବ୍ଲକ ପ୍ରଶାସନ ନିକଟରେ ନାହିଁ । ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି।ଆଲୋକୀକରଣ ଉପରେ ସରକାର ଦୃଷ୍ଟି ଦେବାକୁ ଦାବି ଜୋର ଧରିଛି ।

ସରକାରୀ ଯୋଜନାରେ ଜନସେବା କେନ୍ଦ୍ର ଅଧିକାରୀଙ୍କୁ ମିଳୁନି ସଠିକ୍ ପାରିଶ୍ରମିକ

ଚଣ୍ଡିଖୋଲ: ସରକାରୀ ଯୋଜନାରେ ଜନସେବା କେନ୍ଦ୍ର ଅଧିକାରୀଙ୍କୁ ମିଳୁନି ସଠିକ୍ ପାରିଶ୍ରମିକ। ଯାହାକୁ ନେଇ ସରକାରଙ୍କ ଉପରେ ବର୍ଷିଲେ ଜନସେବା କେନ୍ଦ୍ରର ଅଧିକାରୀ। ଯାଜପୁର ଜିଲ୍ଲା ବଡ଼ଚଣା ବ୍ଲକରେ ଥିବା ଜନସେବା କେନ୍ଦ୍ର ଅଧିକାରୀମାନେ ପହଞ୍ଚି ସେମାନଙ୍କ ବିଭିନ୍ନ ସମସ୍ୟା ନେଇ ଯାଜପୁର CDMOଙ୍କ ଉଦ୍ଦେଶ୍ୟରେ ଦାବିପତ୍ର ବଡ଼ଚଣା ମେଡ଼ିକାଲ କର୍ତ୍ତୃପକ୍ଷଙ୍କୁ ପ୍ରଦାନ କରିଛନ୍ତି। ସରକାରଙ୍କ ବିଭିନ୍ନ ଯୋଜନାରେ ଜନ ସେବା କେନ୍ଦ୍ରକୁ ଦାୟିତ୍ଵ ଦେଉଛନ୍ତି ହେଲେ ସେମାନଙ୍କୁ ସଠିକ୍ ପାରିଶ୍ରମିକ ମିଳୁନାହିଁ। ଯେଉଁଥିପାଇଁ ସେମାନେ ବିଭିନ୍ନ ସମସ୍ୟାର ସମ୍ମୁଖୀନ ହେଉଛନ୍ତି।ଆୟୁଷ୍ମାନ କାର୍ଡ ଯୋଜନାରେ ଜନସେବା କେନ୍ଦ୍ରକୁ ଅର୍ନ୍ତଭୁକ୍ତ କରାଯାଇଥିବା ବେଳେ କାର୍ଡ ପିଛା ସରକାର ଦେଉଥିବା ପାରିଶ୍ରମିକ ଯଥେଷ୍ଟ କମ୍ ରହିଛି। ଏଥିରେ କାର୍ଯ୍ୟ କରି ଜନ ସାଧାରଣଙ୍କୁ ଘରେ ନେଇ ଆୟୁସ୍ମାନ କାର୍ଡ ପହଞ୍ଚାଇବା ସମ୍ଭବ ପର ନୁହେଁ ଯାହାକୁ ନେଇ ଅଭିଯୋଗ କରିଛନ୍ତି ଜନ ସେବା କେନ୍ଦ୍ର ଅଧିକାରୀ। ପୂର୍ବରୁ ସୁଭଦ୍ରା ଯୋଜନାରେ ଏହିଭଳି ସମସ୍ୟା ଦେଖା ଦେଇଥିଲା। ସରକାର ଏହା ଉପରେ ପଦକ୍ଷେପ ନେବା ପାଇଁ ଜନସେବା କେନ୍ଦ୍ର ଅଧିକାରୀମାନେ ଦାବି କରିଛନ୍ତି

୧୩ ହଜାର କୋଟି ଠକେଇ ମାମଲାର ଅଭିଯୁକ୍ତ ଗିରଫ: ତହବୁର ରାଣା ପରେ ଏବେ ମେହୁଲ ଚୋକସୀ ଭାରତକୁ ପ୍ରତ୍ୟର୍ପଣ ହେବ କି?

ନୂଆାଦିଲ୍ଲୀ: ଦିଲ୍ଲୀରୁ ପାଖାପାଖି ୬ ହଜାର କିମି ଦୂର ସ୍ଥିତ ବେଲଜିୟମରୁ ଗିରଫ ହୋଇଛି ପଳାତକ ମେହୁଲ ଚୋକସୀ । ପାଖାପାଖି ସାଢ଼େ ୧୩ ହଜାର କୋଟି ଟଙ୍କାର ଠକେଇ ମାମଲାର ଅଭିଯୁକ୍ତ ଚୋକସୀକୁ ଦୀର୍ଘ ଦିନ ଧରି ଭାରତ ସରକାର ତଲାସ କରୁଥିଲେ । ୨୦୧୮ରୁ ଚୋକସୀ ଭାରତର ଯାଞ୍ଚ ଏଜେନ୍ସିକୁ ଚକମା ଦେଇ ଆସୁଥିଲା । ନିକଟରେ ୨୬/୧୧ ମୁମ୍ବାଇ ଆକ୍ରମଣର ମାଷ୍ଟରମାଇଣ୍ଡ ତହବୁର ରାଣାକୁ ଆମେରିକାରୁ ଭାରତକୁ ପ୍ରତ୍ୟର୍ପଣ କରାଯାଇଥିଲା । ତେଣୁ ଏବେ ବେଲଜିୟମ ସରକାର ମଧ୍ୟ ଚୋକସୀକୁ ପ୍ରତ୍ୟର୍ପଣ କରିବେ କି ବୋଲି ପ୍ରଶ୍ନ ଉଠିଛି ।

ଚୋକସୀର ଗିରଫ ପରେ ଖୁବଶୀଘ୍ର ତାକୁ ମଧ୍ୟ ଭାରତକୁ ଅଣାଯିବ ବୋଲି ପ୍ରଶ୍ନ ଉଠିଛି । ଏଭଳି ସ୍ଥିତିରେ ଭାରତ ଓ ବେଲଜିୟମ ମଧ୍ୟରେ ପ୍ରତ୍ୟର୍ପଣ ସନ୍ଧି କିପରି ରହିଛି ତାହା ଜାଣିବାର ଆବଶ୍ୟକତା ରହିଛି । ୨୦୨୩ ମାର୍ଚ୍ଚରେ ଇଣ୍ଟରପୋଲ ପକ୍ଷରୁ ଚୋକସୀ ବିରୋଧରେ ରେଡ କର୍ଣ୍ଣର ନୋଟିସକୁ ପ୍ରତ୍ୟାହାର କରିନିଆଯାଇଥିଲା । ତା’ପରେ ଭାରତର ଯାଞ୍ଚ ଏଜେନ୍ସି- ଇଡି ଓ ସିବିଆଇ ତାକୁ ବେଲଜିୟମରୁ ଭାରତକୁ ପ୍ରତ୍ୟର୍ପଣ କରିବାକୁ ପ୍ରୟାସ କରୁଥିଲେ । ୨୦୨୦ରେ ଭାରତ ଓ ବେଲଜିୟମ ମଧ୍ୟରେ ପ୍ରତ୍ୟର୍ପଣ ସନ୍ଧିରେ ମୋହର ବାଜିଥିଲା । ସନ୍ଧି ମୁତାବକ, ଯଦି ପ୍ରତ୍ୟର୍ପଣ ସମ୍ବନ୍ଧିତ କୌଣସି ଅପରାଧରେ ସାମିଲ ରହିଥିବା ଅଭିଯୁକ୍ତ ବା ଦୋଷୀ, କୌଣସି ଦେଶରେ ଗିରଫ ହୁଏ, ତେବେ ତା’ର ପ୍ରତ୍ୟର୍ପଣ ହେବ । ଦୁଇ ଦେଶର ପ୍ରତ୍ୟର୍ପଣ ସନ୍ଧି ହତ୍ୟା, ଦୁଷ୍କର୍ମ, ଠକାମୀ ପରି ଗମ୍ଭୀର ଅପରାଧର ଅଭିଯୁକ୍ତକୁ ପ୍ରତ୍ୟର୍ପଣ ପାଇଁ ଅନୁମତି ଦେଇଥାଏ । କୌଣସି ଅପରାଧୀକୁ ଏକ ଦେଶ ପ୍ରତ୍ୟର୍ପଣ କରିବ କି ନା ତାହା ଉକ୍ତ ଦେଶର ବିବେକ  ଉପରେ ନିର୍ଭର କରେ । ଏଥିସହିତ ଉକ୍ତ ମାମଲା ବେଲଜିୟମରେ ଅପରାଧ କି ନା ତା’ ଉପରେ ମଧ୍ୟ ପ୍ରତ୍ୟର୍ପଣ ନିର୍ଭର କରିଥାଏ ।