ନନ୍ଦିଘୋଷ ବ୍ୟୁରୋ: ପୁଣି ମନ୍ଦିରରୁ ଲୁଟ । ବାଲେଶ୍ଵର ବାଲିଆପାଳ ବ୍ଳକ ଶ୍ରଦ୍ଧାକ୍ଷେତ୍ର ଜଗନ୍ନାଥ ମନ୍ଦିରରୁ ଲୁଟ। ବିଳମ୍ବିତ ରାତ୍ରିରେ ଦୁର୍ବୃତ୍ତମାନେ ମନ୍ଦିରର ମୁଖ୍ୟଗେଟର ତାଲା ଭାଙ୍ଗି ହୁଣ୍ଡି ବାକ୍ସ ଓ ଅନ୍ୟାନ୍ୟ ସାମଗ୍ରୀ ଲୁଟ କରିଛନ୍ତି। ଗତକାଲି ମନ୍ଦିରର ପୂଜକ ପୂଜାର୍ଚ୍ଚନା ସାରି ମନ୍ଦିରର ମୁଖ୍ୟ ଫାଟକରେ ତାଲା ପକାଇ ଘରକୁ ଯାଇଥିଲେ। କିନ୍ତୁ ଆଜି ସକାଳୁ ମନ୍ଦିରକୁ ପୂଜାର୍ଚ୍ଚନା କରିବାକୁ ଆସିଲା ବେଳକୁ ମନ୍ଦିରର ମୁଖ୍ୟ ଫାଟକ ତାଲାକୁ କଟା ହୋଇଥିବା ଦେଖିବାକୁ ପାଇଥିଲେ। ମନ୍ଦିର ଭିତରକୁ ଦୁର୍ବୃତ୍ତମାନେ ପଶି ହୁଣ୍ଡି ବାକ୍ସ ଭାଙ୍ଗି ଲୁଟ କରିଛନ୍ତି। ବାଲିଆପାଳ ପୋଲିସକୁ ଖବର ଦେବା ପରେ ଘଟଣା ସ୍ଥଳରେ ପୋଲିସ ପହଞ୍ଚି ତଦନ୍ତ ଆରମ୍ଭ କରିଛି। ମନ୍ଦିରରୁ କଣ ସବୁ ଲୁଟ ହୋଇଛି ଏହାର ତନାଘନା କରୁଛି ପୋଲିସ। ଦିନକୁ ଦିନ ବାଲିଆପାଳ ବ୍ଳକରେ ବିଭିନ୍ନ ମନ୍ଦିରରୁ ଲୁଟ ହେଉଥିବାରୁ ପୋଲିସର ପାରିବାପଣିଆକୁ ନେଇ ଉଠିଛି ପ୍ରଶ୍ନ ।
ବାଇକକୁ ଧକ୍କା ଦେଲା ଟ୍ରାକ୍ଟର, ଜଣେ ମୃତ
ନନ୍ଦିଘୋଷ ବ୍ୟୁରୋ: ଯାଜପୁର ଧର୍ମଶାଳା ଅଂଚଳରେ ମର୍ମନ୍ତୁଦ ସଡ଼କ ଦୁର୍ଘଟଣା। ବାଇକକୁ ଧକ୍କା ଦେଲା ଟ୍ରାକ୍ଟର। ଏଥିରେ ଜଣଙ୍କର ମୃତ୍ଯୁ ହୋଇଥିବାବେଳେ ଅନ୍ୟ ଜଣେ ଗୁରୁତର ହୋଇଛନ୍ତି। ଧର୍ମଶାଳା ଥାନା ଅଧୀନ କାଏମା ନିକଟରେ ଘଟିଛି ଏ ଦୁର୍ଘଟଣା। ଘଟଣା ସ୍ଥଳରେ ବାଇକରେ ଥିବା ଦୁଇ ଜଣଙ୍କ ମଧ୍ୟରୁ ଜଣଙ୍କର ମୃତ୍ୟୁ ହୋଇଥିବାବେଳେ ଅନ୍ୟ ଜଣେ ଗୁରୁତର ଅବସ୍ଥାରେ ମେଡିକାଲରେ ଭର୍ତି ହୋଇଛନ୍ତି। ବାଇକ ଆରୋହୀ ଜାରକା ଅଭିମୁଖେ ଯାଉଥିବା ବେଳେ ଏକ ବାଲି ବୋଝେଇ ଟ୍ରାକ୍ଟର କାଏମା ନିକଟରେ ବାଇକକୁ ଧକ୍କା ଦେଇଥିଲା। ଯାହା ଫଳରେ ଘଟଣା ସ୍ଥଳରେ ଜଣଙ୍କର ମୃତ୍ୟୁ ହୋଇଥିଲା। ଅନ୍ୟ ଜଣଙ୍କୁ ଗୁରୁତର ଅବସ୍ଥାରେ ମେଡିକାଲରେ ଭର୍ତ୍ତି କରାଯାଇଛି। ଘଟଣା ସ୍ଥଳରେ ଚାପା ଉତ୍ତେଜନା ଦେଖାଦେଇଛି। ଦୁର୍ଘଟଣା ଘଟାଇଥିବା ଟ୍ରାକ୍ଟରକୁ ଜବତ କରିଛି ପୋଲିସ। ଧର୍ମଶାଳା ପୋଲିସ ପହଂଚି ଘଟଣାର ଅଧିକ ତଦନ୍ତ ଚଳାଇଛି।
ଗୌତମ ଗମ୍ଭୀରଙ୍କ ଏହିସବୁ ନିଷ୍ପତ୍ତି ପାଇଁ ପ୍ରଥମେ କରାଯାଉଥିଲା ସମାଲୋଚନା, ହେଲେ ଏବେ ପାଲଟିଛି ବିଜୟର ମୁଖ୍ୟ କାରଣ
ନନ୍ଦିଘୋଷ ବ୍ୟୁରୋ: ଚାମ୍ପିୟନ୍ସ ଟ୍ରଫିର ଫାଇନାଲରେ ଭାରତ । ବିଜୟ ଅଭିଯାନ ଜାରି ପାଇଁ ମୁଖ୍ୟ ପ୍ରଶିକ୍ଷକ ଗୌତମ ଗମ୍ଭୀରଙ୍କୁ ମଧ୍ୟ ଶ୍ରେୟ ଦିଆଯାଉଛି । କାରଣ ତାଙ୍କ ଦ୍ବାରା ନିଆଯାଉଥିବା ନିଷ୍ପତ୍ତି ଏବେ ଦଳର ବିଜୟର କାରଣ ବୋଲି ବହୁ କ୍ରିକେଟ ବିଶେଷଜ୍ଞମାନେ ମତ ଦେଉଛନ୍ତି । ତେବେ ଏହିସବୁ ନିଷ୍ପତ୍ତିଗୁଡ଼ିକୁ ପ୍ରଥମେ ସମାଲୋଚନା ଆସନ୍ତୁ ନଜର ପକାଇବା ଏସବୁ ନିଷ୍ପତ୍ତି କଣ?
୫ ଜଣ ସ୍ପିନର ଏବଂ ବରୁଣ ଚକ୍ରବର୍ତ୍ତୀଙ୍କ ଚୟନ
ଚାମ୍ପିଅନ୍ସ ଟ୍ରଫି ଦଳରେ ଟିମ ଇଣ୍ଡିଆର ୫ ଜଣ ସ୍ପିନରଙ୍କ ନାମ ଘୋଷଣା କରିବା ମାତ୍ରେ ଏହାକୁ ବେଶ ସମାଲୋଚନା କରାଯାଇଥିଲା । ସମସ୍ତେ ଏହି ନିଷ୍ପତ୍ତି ବିରୁଦ୍ଧରେ ଥିଲେ ଏବଂ ମୁଖ୍ୟ ପ୍ରଶିକ୍ଷକ ଗମ୍ଭୀରଙ୍କ ସହିତ ଭାରତୀୟ ଅଧିନାୟକ ରୋହିତ ଶର୍ମାଙ୍କ ଉପରେ ପ୍ରଶ୍ନ ଉଠାଯାଉଥିଲା। ଯଶସ୍ୱୀ ଜୟସୱାଲଙ୍କୁ ବାଦ୍ ଦେଇ ବରୁଣ ଚକ୍ରବର୍ତ୍ତୀଙ୍କୁ ଚୟନ କରିବା ପାଇଁ ତାଙ୍କୁ ବହୁତ ସମାଲୋଚନା କରାଯାଉଥିଲା। କିନ୍ତୁ ସେ ନ୍ୟୁଜିଲ୍ୟାଣ୍ଡ ଏବଂ ଅଷ୍ଟ୍ରେଲିଆ ବିପକ୍ଷରେ ଗେମ ଚେଞ୍ଜର ହୋଇଥିଲେ। ସେ ନ୍ୟୁଜିଲାଣ୍ଡ ବିପକ୍ଷରେ ୫ଟି ୱିକେଟ୍ ଏବଂ ସେମିଫାଇନାଲରେ ଟ୍ରାଭିସ୍ ହେଡ୍ଙ୍କ ୱିକେଟ୍ ସମେତ ୨ଟି ଗୁରୁତ୍ୱପୂର୍ଣ୍ଣ ୱିକେଟ୍ ନେଇଥିଲେ।
ହର୍ଷିତ ରାଣାଙ୍କ ଚୟନ
ଚାମ୍ପିଅନ୍ସ ଟ୍ରଫି ପୂର୍ବରୁ, ଜସପ୍ରିତ ବୁମରାହଙ୍କ ଆଘାତ ଯୋଗୁଁ ଦଳରୁ ବାଦ ଦିଆଯାଇଥିଲା। ଏହା ପରେ ହର୍ଷିତ ରାଣା ତାଙ୍କ ସ୍ଥାନ ନେଇଥିଲେ। ହର୍ଷିତଙ୍କ ଚୟନ ଉପରେ କ୍ରିକେଟ ବିଶେଷଜ୍ଞମାନେ ପ୍ରଶ୍ନ ଉଠାଇଥିଲେ। ଅଭିଜ୍ଞତା ଅଭାବରୁ ସମସ୍ତେ ବିଶ୍ୱାସ କରୁଥିଲେ ଯେ ତାଙ୍କ ସ୍ଥାନରେ ମହମ୍ମଦ ସିରାଜଙ୍କୁ ବାଛିବା ଉଚିତ ହୋଇଥାନ୍ତା।
କିନ୍ତୁ ହର୍ଷିତ ଗମ୍ଭୀରଙ୍କ ନିଷ୍ପତ୍ତିକୁ ସଠିକ୍ ପ୍ରମାଣିତ କଲେ। ପ୍ରଥମ ଦୁଇଟି ମ୍ୟାଚ୍ରେ ସେ ଏପରି ଜଣେ ବୋଲର ଭାବରେ ଉଭା ହୋଇଥିଲେ ଯିଏ ପ୍ରତିପକ୍ଷ ଦଳର ଭାଗୀଦାରୀ ଭାଙ୍ଗି ଦେଇଥିଲେ। ପାୱାର ପ୍ଲେ ସହିତ, ସେ ମଧ୍ୟ ଏବଂ ଡେଥ୍ ଓଭରଗୁଡ଼ିକରେ ମଧ୍ୟ ଚମତ୍କାର ବୋଲିଂ କରିଥିଲେ। ସେ ବାଂଲାଦେଶ ଏବଂ ପାକିସ୍ତାନ ବିପକ୍ଷରେ ମୋଟ ୪ଟି ୱିକେଟ ନେଇଥିଲେ ଏବଂ ଭାରତର ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲେ।
ଅକ୍ଷର ପଟେଲଙ୍କ ବ୍ୟାଟିଂ ପୋଜିସନ
ଅକ୍ଷର ପଟେଲଙ୍କୁ ୫ ନମ୍ବରରେ ପଠାଇବା ପାଇଁ ଗୌତମ ଗମ୍ଭୀରଙ୍କୁ କଡ଼ା ସମାଲୋଚନା କରାଯାଇଥିଲା। କ୍ରିକେଟ ବିଶେଷଜ୍ଞମାନେ ବିଶ୍ୱାସ କରୁଥିଲେ ଯେ ଏହା ଏକ ଗୁରୁତ୍ୱପୂର୍ଣ୍ଣ ବ୍ୟାଟିଂ ପୋଜିସନ ଏବଂ ଅକ୍ଷର ପଟେଲ ଜଣେ ନିମ୍ନ କ୍ରମର ବ୍ୟାଟ୍ସମ୍ୟାନ। କିନ୍ତୁ ଅକ୍ଷର ଏହି ଟୁର୍ଣ୍ଣାମେଣ୍ଟରେ ପ୍ରମାଣ କରିଛନ୍ତି ଯେ ବଲ୍ ବ୍ୟତୀତ ସେ ବ୍ୟାଟ୍ ସାହାଯ୍ୟରେ ମଧ୍ୟ ମ୍ୟାଚ୍କୁ ଓଲଟାଇ ପାରିବେ। ସେମିଫାଇନାଲରେ ବିରାଟ କୋହଲିଙ୍କ ସହ ଏକ ଗୁରୁତ୍ୱପୂର୍ଣ୍ଣ ୪୪ ରନର ଭାଗୀଦାରି କରିଥିଲେ ଏବଂ ଦଳକୁ ଚାପରୁ ବାହାର କରିଥିଲେ। ପୂର୍ବରୁ, ନ୍ୟୁଜିଲାଣ୍ଡ ବିପକ୍ଷରେ, ଯେତେବେଳେ ଭାରତ ୩୦ ରନରେ ୩ ୱିକେଟ ହରାଇ ସଂଘର୍ଷ କରୁଥିଲା, ସେ ୪୬ ରନ କରିଥିଲେ ଏବଂ ଶ୍ରେୟସ ଆୟରଙ୍କ ସହ ୯୮ ରନ ଯୋଡିଥିଲେ।
ରାହୁଲଙ୍କ ବ୍ୟାଟିଂ ସ୍ଥିତି
କେଏଲ ରାହୁଲ ସାଧାରଣତଃ ଏକଦିବସୀୟ ମ୍ୟାଚ୍ରେ ୫ ନମ୍ବରରେ ଖେଳନ୍ତି, କିନ୍ତୁ ଏହି ଟୁର୍ଣ୍ଣାମେଣ୍ଟରେ ତାଙ୍କୁ ଅକ୍ଷର ପଟେଲଙ୍କ ତଳେ ପଠାଯାଉଛି। ଗମ୍ଭୀରଙ୍କ ଏହି ନିଷ୍ପତ୍ତି ସମ୍ପର୍କରେ କୁହାଯାଉଥିଲା ଯେ ସେ ରାହୁଲଙ୍କ କ୍ୟାରିୟରକୁ ନଷ୍ଟ କରୁଛନ୍ତି। କିନ୍ତୁ ରାହୁଲ ଟୁର୍ଣ୍ଣାମେଣ୍ଟର ପ୍ରଥମ ମ୍ୟାଚ୍ରେ ଅପରାଜିତ ୪୧ ରନ୍ କରି ଦଳକୁ ମ୍ୟାଚ୍ ଜିତାଇବାରେ ସାହାଯ୍ୟ କରିଥିଲେ। ତା’ପରେ ସେମିଫାଇନାଲରେ ମଧ୍ୟ ସେ ଅପରାଜିତ ୪୨ ରନ କରିଥିଲେ। ଯେତେବେଳେ ସେ ବ୍ୟାଟିଂ କରିବାକୁ ଆସିଲେ, ମ୍ୟାଚ୍ ଅସୁବିଧାରେ ପଡ଼ିଥିବା ପରି ମନେ ହେଉଥିଲା। କିନ୍ତୁ ତାଙ୍କର ବିସ୍ଫୋରକ ଇନିଂସ ଭାରତକୁ ଚାପରୁ ବାହାର କରିଥିଲା।
ଟଲମ୍ୟାନ ବିଜୁ ବାବୁଙ୍କ ପ୍ରତି ଅସମ୍ମାନ ବିରୋଧରେ ଆଜି ସାରା ରାଜ୍ୟରେ ବିଜୁ ଜନତା ଦଳର ଗର୍ଜନ
ନନ୍ଦିଘୋଷ ବ୍ୟୁରୋ: ପଞ୍ଚାୟତିରାଜ ଦିବସରେ ବରପୁତ୍ରଙ୍କୁ ଭୁଲିଗଲେ ରାଜ୍ୟ ସରକାର। ହୋଇଗଲେ ଦାୟିତ୍ବହୀନ। କ୍ୟାଲେଣ୍ଡରରେ ଛୁଟି ଘୋଷଣା କରି ସୁଦ୍ଧା କଲେନାହିଁ ଛୁଟି ଘୋଷଣା। ଟଲମ୍ୟାନ ବିଜୁ ବାବୁଙ୍କ ପ୍ରତି ଅସମ୍ମାନ ବିରୋଧରେ ଆଜି ସାରା ରାଜ୍ୟରେ ବିଜୁ ଜନତା ଦଳ କରିବ ଗର୍ଜନ। କୋଟି ଓଡ଼ିଆଙ୍କ ହୃଦୟର ନେତାଙ୍କ ପ୍ରତି ହୋଇଥିବା ଅନ୍ୟାୟର ଦିଆଯିବ ଜବାବ। ପ୍ରବାଦ ପୁରୁଷ ବିଜୁ ପଟ୍ଟନାୟକଙ୍କ ୧୦୯ ତମ ଜନ୍ମଦିନକୁ ନେଇ ବିଜେପି ସରକାରଙ୍କ ଆଭିମୁଖ୍ଯକୁ କାଠଗଡ଼ାରେ ଠିଆ କରିଥିଲେ ବିରୋଧୀ ଦଳ ନେତା ନବୀନ ପଟ୍ଟନାୟକ। ତିନି ଦଶନ୍ଧିର ଏହି ସମାରୋହକୁ ବନ୍ଦ କରିବା ଆଳରେ ବିଜୁ ଲିଗାସିକୁ କାଟିବାକୁ ରାଜ୍ୟ ସରକାର ଯେଉଁ ଷଡ଼ଯନ୍ତ୍ର କରୁଛନ୍ତି, ତାହା ବିରୋଧରେ ସାରା ରାଜ୍ୟରେ ଦେଖାଦେଇଥିଲା ତୀବ୍ର ଅସନ୍ତୋଷ। ଏନଟିପିସି, ହାଲ, ଏନଆଇଟି ରାଉରକେଲା ଓ ଓୟୁଏଟିର ସ୍ରଷ୍ଟାଙ୍କ ପ୍ରତି ରାଜ୍ଯ ସରକାରଙ୍କ ଘୋର ଅନ୍ୟାୟକୁ ବରଦାସ୍ତ କରିବ ନାହିଁ ବିଜେଡି।
ସାରା ରାଜ୍ୟରେ ଉପରମୁହାଁ ପାରଦ
ନନ୍ଦିଘୋଷ ବ୍ୟୁରୋ: ସାରା ରାଜ୍ୟରେ ଉପରମୁହାଁ ପାରଦ। ଉପକୂଳ ଓଡ଼ିଶା ସମେତ ପଶ୍ଚିମ ଓଡ଼ିଶାରେ ପ୍ରବଳ ଖରା। ଦିନ ୧୦ଟା ବାଜିଲେ ଘରୁ ବାହାରିବା ହେଲାଣି ମୁସ୍କିଲ। ଦିନେ ଦୁଇ ଦିନ ଭିତରେ ଆହୁରି ୨ ରୁ ୩ ଡିଗ୍ରୀ ତାପମାତ୍ରା ବୃଦ୍ଧି ହେବ ବୋଲି ପୂର୍ବାନୁମାନ କରିଛି ଆଞ୍ଚଳିକ ପାଣିପାଗ କେନ୍ଦ୍ର। କିଛି ସ୍ଥାନରେ ୪୦ ଡିଗ୍ରୀ କିମ୍ବା ତାଠାରୁ ଅଧିକ ତାପମାତ୍ରା ରେକର୍ଡ ହେବାର ସମ୍ଭାବନା ରହିଛି। ବର୍ତ୍ତମାନ ରାଜ୍ୟକୁ ଉତ୍ତର ପଶ୍ଚିମ ଦିଗରୁ ଗରମ ଶୁଷ୍କ ପବନ ପ୍ରବାହ ବଢୁଥିବାରୁ ତାତି ଆହୁରି ବଢିବ ବୋଲି ଆକଳନ କରାଯାଇଛି। ସେପଟେ ଓଡ଼ିଶାର ତତଲାଗଡ କୁହାଯାଉଥିବା ଟିଟିଲାଗଡରେ ଏବେ ଠାରୁ ଅସହ୍ୟ ତାତି ଅନୁଭୂତ ହେଲାଣି। ଦିନ ୧୧ଟାରୁ ଅପରାହ୍ନ ୩ଟା ପର୍ଯ୍ୟନ୍ତ ସତର୍କ ରହିବା ସହ ଶ୍ରମିକ ମାନେ କାମ ନ କରିବାକୁ ଜାରି ହୋଇଛି ନିର୍ଦ୍ଦେଶ।
ମାହାଙ୍ଗାରେ ବିଜୁ ବାବୁଙ୍କ ପ୍ରତିମୂର୍ତ୍ତି ଭାଙ୍ଗିବା ଘଟଣା : ୩ ଜଣଙ୍କୁ ଗିରଫ କଲା ପୋଲିସ
ମାହାଙ୍ଗା : ମାହାଙ୍ଗା ଭଦ୍ରେଶ୍ୱର ଥାନା ଉମରଠାରେ ବିଜୁ ବାବୁଙ୍କ ପ୍ରତିମୂର୍ତ୍ତି ଭାଙ୍ଗିବା ଘଟଣା। ଏହି ଦୁର୍ଭାଗ୍ୟଜନକ ଘଟଣାରେ ୩ ଜଣଙ୍କୁ ଗିରଫ କରାଯାଇଛି। ଅଭିଯୁକ୍ତ ହେଲେ ଉମର ଗ୍ରାମର ବିଶ୍ୱଜିତ ମହାପାତ୍ର ଓରଫ ରାଜା, ନନ୍ଦକିଶୋର ମଲ୍ଲିକ ଓ ସେହି ଗ୍ରାମର ବିଶ୍ୱଜିତ ମହାପାତ୍ର ଓରଫ ବୁବୁଆ। ଗତକାଲି ବିଜୁ ବାବୁଙ୍କ ପ୍ରତିମୂର୍ତ୍ତିକୁ ଭାଙ୍ଗି ପାଖରେ ଥିବା ଅଳିଆ ଗଦାରେ ପକାଇ ଦେଇଥିଲେ ଦୁର୍ବୃତ୍ତ। ଭଦରେଶ୍ୱର ପୋଲିସ ଓ ସାଲେପୁର ଏସଡିପିଓ ପହଞ୍ଚି ସିସିଟିଭି ଯାଞ୍ଚ କରିବା ସହ ଘଟଣାର ତଦନ୍ତ ଜାରି ରଖିଥିଲେ। ତେବେ ବିଜୁ ବାବୁଙ୍କ ପ୍ରତିମୂର୍ତ୍ତି ଭାଙ୍ଗିବାକୁ ଘଟଣାକୁ ନେଇ ବିଭିନ୍ନ ମହଲରୁ ପ୍ରକାଶ ପାଇଥିଲା ଅସନ୍ତୋଷ।
ଢେଙ୍କାନାଳରେ ଝିମିଟି ଖେଳରୁ ମହାଭାରତ : ପଞ୍ଚମ ଶ୍ରେଣୀ ଛାତ୍ର ଉପରକୁ ଏସିଡ ମାଡ
ଢେଙ୍କାନାଳ : ଢେଙ୍କାନାଳରେ ଝିମିଟି ଖେଳରୁ ମହାଭାରତ। ପିଲାଙ୍କ ଭିତରେ ଖେଳକୁ ନେଇ ତୁମୁଳକାଣ୍ଡ। ଘରୁ ଡାକି ନେଇ ପଞ୍ଚମ ଶ୍ରେଣୀ ଛାତ୍ର ଉପରକୁ ଅନ୍ୟ ଛାତ୍ର କଲେ ଏସିଡ ମାଡ।ଏସିଡ ମାଡ ପରେ ଗୁରୁତର ଅବସ୍ଥାରେ ପଞ୍ଚମ ଶ୍ରେଣୀ ଛାତ୍ରଜଣକ ଜିଲ୍ଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି ହୋଇଛି । କେଉଁ କାରଣରୁ ଜଣେ ଛାତ୍ର ଅନ୍ୟ ଛାତ୍ର ଉପରେ ଏସିଡ ମାଡ କଲା ତାହା ଜଣା ପଡିନାହିଁ । ଏସିଡ ମାଡରେ ଗୁରୁତର ହୋଇଥିବା ପଞ୍ଚମ ଶ୍ରେଣୀ ଛାତ୍ରଙ୍କ ନାମ ସାଇ ସମ୍ମାନ ନାଥ ହୋଇଥିବା ବେଳେ ଘଟଣାଟି କାମାକ୍ଷାନଗର ଥାନା ଅନ୍ତର୍ଗତ ନୂଆ ଆଲୁତୁମା ଗ୍ରାମରେ ଘଟିଛି । ଏସିଡ ମାଡ କରି ଅନ୍ୟ ଛାତ୍ର ଫେରାର ହୋଇଯାଇଛି ।
ମ୍ୟାଚ୍ ମଝିରେ ଶୋଇପଡ଼ି ଟାଇମ୍ ଆଉଟ୍ ହେଲେ ପାକିସ୍ତାନୀ ଖେଳାଳି
ନନ୍ଦିଘୋଷ ବ୍ୟୁରୋ : ମ୍ୟାଚ୍ ମଝିରେ ଶୋଇପଡିଥିବାରୁ ଟାଇମ୍ ଆଉଟ୍ ହୋଇଥିଲେ ପାକିସ୍ତାନୀ ଖେଳାଳି । ଚଳିତ ICC ଚାମ୍ପିଅନ୍ସ ଟ୍ରଫି ୨୦୨୫ରେ ଭାରତ ବିପକ୍ଷରେ ଅର୍ଦ୍ଧଶତକ ମାରିଥିବା ପାକିସ୍ତାନର ଷ୍ଟାର ବ୍ୟାଟ୍ସମ୍ୟାନ୍ ସୌଦ ଶକିଲଙ୍କୁ କ୍ରିଜ୍ ପହଞ୍ଚିବାର ସୁଯୋଗ ହରାଇବା ପରେ ଟାଇମଆଉଟ୍ କରାଯାଇଥିଲା। ମ୍ୟାଚରେ ୫ମ ସ୍ଥାନରେ ସେ ବ୍ୟାଟିଂ କରିବା ନେଇ ସ୍ଥିର ହୋଇଥିଲା, କିନ୍ତୁ ସେ ଶୋଇ ପଡିଥିବାରୁ ତାଙ୍କୁ ଏପରି ପରିସ୍ଥିତି ସାମ୍ନା କରିବାକୁ ପଡିଥିଲା । ଏହି ଘଟଣାଟି ଲୋକଲୋଚନକୁ ଆସିବାରେ ତାଙ୍କୁ ପ୍ରବଳ ସମାଲୋଚନା କରାଯାଉଛି ।
ଲଗାତାର ୱିକେଟ୍ ପଡ଼ିବା ପରେ, ୫ ନମ୍ବରରେ ବ୍ୟାଟିଂ କରିବାକୁ ଥିବା ସୌଦ ଶକିଲ୍ ନିର୍ଦ୍ଧାରିତ ତିନି ମିନିଟ୍ ମଧ୍ୟରେ କ୍ରିଜ୍ ପହଞ୍ଚି ପାରିନଥିଲେ । ଏହା ପରେ ପିଟିଭି ଦଳର ଅଧିନାୟକଙ୍କୁ ଅପିଲ୍ କରିଥିଲେ ହେଲେ ଅମ୍ପାୟାର ତାଙ୍କୁ ଅଯୋଗ୍ୟ ଘୋଷଣା କରିଥିଲେ। ରିପୋର୍ଟ ଅନୁଯାୟୀ, ଶକିଲ୍ ଶୋଇପଡ଼ିଥିଲେ ଏବଂ ସମୟ ମଧ୍ୟରେ ବ୍ୟାଟିଂ କରିବାର ସୁଯୋଗ ହରାଇଥିଲେ ବୋଲି ଅଭିଯୋଗ ହୋଇଛି।
ଚାମ୍ପିଅନ୍ସ ଟ୍ରଫି ସେମି ଫାଇନାଲରେ ନ୍ୟୁଜିଲାଣ୍ଡର ବାଜିମାତ ; ଫାଇନାଲରେ ଭାରତ ସହ ହେବ କଡ଼ା ମୁକାବିଲା
ନନ୍ଦିଘୋଷ ବ୍ୟୁରୋ : ଦକ୍ଷିଣ ଆଫ୍ରିକାକୁ ହରାଇ ଫାଇନାଲରେ ନ୍ୟୁଜିଲାଣ୍ଡ । ୫୦ ରନରେ ଦକ୍ଷିଣ ଆଫ୍ରିକାକୁ ହରାଇଲା ନ୍ୟୁଜିଲାଣ୍ଡ । ୩୧୨ ରନ କରିବାରେ ସକ୍ଷମ ହେଲା ଦକ୍ଷିଣ ଆଫ୍ରିକା । ଦକ୍ଷିଣ ଆଫ୍ରିକା ଆଗରେ ୩୬୩ ରନର ଥିଲା ବିଜୟ ଲକ୍ଷ୍ୟ ଥିବା ବେଳେ ଶତକ ହାସଲ କଲେ ମିଲର । ଅନ୍ୟପଟେ ରଚିନ ରବୀନ୍ଦ୍ର ଓ କେନ୍ ଓ୍ବିଲିୟମସନ ଶତକ ହାସଲ କରିଥିଲେ । ତେବେ ଫାଇନାଲରେ ଭାରତ ଓ ନ୍ୟୁଜିଲାଣ୍ଡ ମଧ୍ୟରେ ହେବ କଡ଼ା ଟକ୍କର । ସୁପର ସନଣ୍ଡେରେ ଟ୍ରଫି ପାଇଁ ହେବ ଫାଇନାଲ ଲଢ଼େଇ । ଦୁବାଇ ଇଣ୍ଟର ନ୍ୟାସନାଲ କ୍ରିକେଟ ଷ୍ଟାଡିୟମରେ ଫାଇନାଲ ମ୍ୟାଚ ଖେଳାଯିବା ନେଇ ସ୍ଥିର ହୋଇଛି ।
କର୍ଣ୍ଣାଟକ ମାଙ୍ଗାଳୁରୁ ଜେଲରେ ଫୁଡ ପଏଜନିଂ ; ୪୫ରୁ ଅଧିକ କଏଦୀ ଅସୁସ୍ଥ
ନନ୍ଦିଘୋଷ ବ୍ୟୁରୋ : କର୍ଣ୍ଣାଟକ ମାଙ୍ଗାଳୁରୁ ଜେଲରେ ଫୁଡ ପଏଜନିଂ। ୪୫ରୁ ଅଧିକ ବିଚାରାଧୀନ କଏଦୀ ଅସୁସ୍ଥ ହୋଇଛନ୍ତି। ସମସ୍ତ ଅସୁସ୍ଥ କଏଦୀଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଛି। ଖାଦ୍ୟ ଖାଇବା ପରେ ସମସ୍ତଙ୍କ ପେଟ ଯନ୍ତ୍ରଣା ଓ ବାନ୍ତି ହେବା ପରେ ଜେଲରେ ଚାଞ୍ଚଲ୍ୟ ଖେଳିଯାଇଥିଲା। ଏହି ଘଟଣା ପରେ ବିଷାକ୍ତ ଖାଦ୍ୟ ନେଇ ତନାଘନା ଜାରି ରହିଛି। ଏହା ସହ ଜେଲର ସୁରକ୍ଷାକୁ ବଢାଇ ଦିଆଯାଇଛି। ପୋଲିସ କମିଶନର ଅନୁପମ ଅଗ୍ରୱାଲ ହସ୍ପିଟାଲ ପରିଦର୍ଶନ କରିବା ସହ ଘଟଣା ତଦନ୍ତ ନିର୍ଦ୍ଦେଶ ଦେଇଛନ୍ତି।