ୟୁପି ନିର୍ବାଚନରେ ବ୍ରାହ୍ମଣ ଭୋଟ ହାତଛଡା ଭୟରେ ଅଜୟ ମିଶ୍ରାଙ୍କୁ ଘଣ୍ଟ ଘୋଡାଉଛି ବିଜେପି

ନୂଆଦିଲ୍ଲୀ: କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ଇସ୍ତଫା ଜିଦ୍‌ରେ ବିରୋଧୀ ଅଟଳ । ଅଜୟ ମିଶ୍ରାଙ୍କ ଇସ୍ତଫା ଦାବିରେ ଆଜି ସଂସଦରେ ବିରୋଧୀ ଜବରଦସ୍ତ ହଙ୍ଗାମା କରିଛନ୍ତି । ୟୁପି ନିର୍ବାଚନରେ ବ୍ରାହ୍ମଣ ଭୋଟ ହାତଛଡ଼ା କରିବା ଡରରେ ବିଜେପି ଅଜୟ ମିଶ୍ରାଙ୍କୁ ଘଣ୍ଟ ଘୋଡାଉ ଥିବା ବେଳେ ବିରୋଧୀ କିନ୍ତୁ ନଛୋଡବନ୍ଧା । ଲଖିମପୁରରେ ଚାଷୀଙ୍କୁ ଯୋଜନାବଦ୍ଧ ହତ୍ୟା ଘଟଣାକୁ ନେଇ ବିରୋଧୀ ଖପ୍ପା । SIT ରିପୋର୍ଟ ଆସିବା ପରେ କ୍ରିମିନାଲ କେନ୍ଦ୍ରମନ୍ତ୍ରୀଙ୍କୁ ବହିଷ୍କାର କରିବାକୁ ଦାବି କରି ଉଭୟ ଗୃହରେ ପ୍ରବଳ ହଟ୍ଟଗୋଳ ହୋଇଛି ।

Lok Sabha adjourned till 2 pm amid uproar in the House by Opposition MPs over the Lakhimpur Kheri matter. pic.twitter.com/04wEFRO6jW

— ANI (@ANI) December 17, 2021

ଏହା ବ୍ୟତୀତ ମୁଖ୍ୟ ନିର୍ବାଚନ କମିଶନର ସୁଶୀଲ ଚନ୍ଦ୍ରଙ୍କ ନିକଟକୁ ଆଇନ ମନ୍ତ୍ରଣାଳୟ ପକ୍ଷରୁ ଏକ ଚିଠିକୁ କେନ୍ଦ୍ର କରି ଗୃହରେ ମୁଲତବି ପ୍ରସ୍ତାବ ଆଗତ କରିଥିଲେ କଂଗ୍ରେସ ସାଂସଦ ମନୀଷ ତିଓ୍ୱାରୀ । ଲଖିମପୁର ହିଂସା ପ୍ରସଙ୍ଗରେ ହୋ ହଲ୍ଲା ଯୋଗୁ ଲୋକସଭା କାର୍ଯ୍ୟକାଳ ଦିନ ୨ଟା ଯାଏଁ ସ୍ଥଗିତ ରଖାଯାଇଛି । ସେପଟେ ରାଜ୍ୟସଭାରେ ବି କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ  ଇସ୍ତଫା ଦାବିରେ ଜୋରଦାର ହଙ୍ଗାମା । ଗୃହକୁ ସୋମବାର ଯାଏ ମୁଲତବୀ ଘୋଷଣା କରିଛନ୍ତି ରାଜ୍ୟସଭା ଅଧ୍ୟକ୍ଷ ଭେଙ୍କିୟା ନାଇଡୁ ।