ବୁଧବାର ଛାତ୍ର ବିଜେଡିର କାର୍ଯ୍ୟକାରିଣୀ ବୈଠକ

ଭୁବନେଶ୍ୱର: ଆସନ୍ତାକାଲି ଛାତ୍ର ବିଜେଡିର କାର୍ଯ୍ୟକାରିଣୀ ବୈଠକ ବସିବାକୁ ଯାଉଛି। ନୂଆ କମିଟି ଗଠନ ପରେ ଏହା ପ୍ରଥମ ବୈଠକ ହେବାକୁ ଯାଉଛି । ଆଉ ଏଥିରେ ଆଗାମୀ ଏକ ବର୍ଷର କାର୍ଯ୍ୟ ଖସଡ଼ା ପ୍ରସ୍ତୁତ କରାଯିବ ବୋଲି ଜଣାପଡିଛି।

ସୂଚନା ଅନୁସାରେ ସ୍ୱତନ୍ତ୍ର ଓଡ଼ିଶା ପ୍ରଦେଶ ଗଠନରେ ମହାପୁରୁଷଙ୍କ ଭୂମିକା, ଓଡ଼ିଆ ଭାଷା ସଂସ୍କୃତିକୁ ଅଧିକ ସଂବୃଦ୍ଧ କରିବାରେ ଛାତ୍ର ବିଜେଡିର ଭୂମିକା ସମ୍ପର୍କରେ ଅଧିବେଶନରେ ଆଲୋଚନା ହେବ। କେନ୍ଦ୍ର ସଂସ୍ଥାରେ ଓଡ଼ିଶାର ଯୁବକ ଯୁବତୀଙ୍କ ଅଧିକ ନିଯୁକ୍ତି ସୁଯୋଗ ନେଇ ପ୍ରସ୍ତାବ ରହିବ।

ଆହୁରି ମଧ୍ୟ ଶ୍ରୀରାମଚନ୍ଦ୍ର ଭଞ୍ଜଦେଓଙ୍କ ନାମରେ ଉତ୍ତର ଓଡ଼ିଶା ବିଶ୍ୱବିଦ୍ୟାଳୟକୁ ନାମିତ କରିବା ଏବଂ ସରକାରୀ ସ୍କୁଲରେ ପଢ଼ୁଥିବା ଛାତ୍ରଛାତ୍ରୀଙ୍କ ପାଇଁ ଇଂଜିନିୟରିଂ ତଥା ମେଡିକାଲ କଲେଜରେ ୧୦ ପ୍ରତିଶତ ସଂରକ୍ଷଣ ନେଇ ମୁଖ୍ୟମନ୍ତ୍ରୀ ଦେଇଥିବା ସହମତିକୁ ଧନ୍ୟବାଦ ପ୍ରସ୍ତାବରେ ରଖାଯାଇଛି।

ସେହିପରି ପ୍ରତି ପଞ୍ଚାୟତ ସଭାପତି ଭାବେ ଛାତ୍ର ବିଜେଡି କର୍ମୀଙ୍କୁ ନିଯୁକ୍ତି, ସୋସିଆଲ ମିଡିଆ ସଂଯୋଜକ ଭାବେ ଛାତ୍ର ବିଜେଡି କର୍ମୀଙ୍କୁ ନିଯୁକ୍ତି ରହିବ ସାଙ୍ଗଠନିକ ପ୍ରସ୍ତାବ। ଏଥିସହ କଲେଜରେ କ୍ୟାମ୍ପସ କମିଟି ଜରିଆରେ କର୍ମୀ ଯୋଡିବା ପାଇଁ ବି ପ୍ରସ୍ତାବ ଦିଆଯିବ। ତେବେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଷଷ୍ଠ ଥର ପାଇଁ ମୁଖ୍ୟମନ୍ତ୍ରୀ କରିବା ପାଇଁ ସଂକଳ୍ପ ପ୍ରସ୍ତାବ ଆଦି ଉପରେ ଆଲୋଚନା କରାଯିବ ବୋଲି ସୂଚନା ମିଳିଛି।