ଆଡଭାନୀଙ୍କୁ ନୋଟିସ; ଖଡଗେ କହିଲେ SIR ଏମିତି ଏକ ବିଧ୍ବଂସକାରୀ ରାକ୍ଷସ ଯିଏ ନିଜ ଲୋକଙ୍କୁ ବି ଛାଡୁନି
ନନ୍ଦିଘୋଷ ବ୍ୟୁରୋ: ଦିଲ୍ଲୀରେ SIR ପ୍ରକ୍ରିୟା ଚାଲିଛି । ଏହାରି ଭିତରେ ଏକାଧିକ ବରିଷ୍ଠ ବ୍ୟକ୍ତିଙ୍କୁ ନୋଟିସ ଜାରି କରାଯାଇଛି । ଯେଉଁମାନଙ୍କ ମଧ୍ୟରେ ପୂର୍ବତନ ଉପପ୍ରଧାନମନ୍ତ୍ରୀ ଲାଲକୃଷ୍ଣ ଆଡଭାନୀ, ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ଼, ବିଦେଶ ମନ୍ତ୍ରୀ ଏସ. ଜୟଶଙ୍କର, ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ସମେତ ଏକାଧିକ ବ୍ୟକ୍ତି ରହିଛନ୍ତି । ନିର୍ବାଚନ ଅଧିକାରୀଙ୍କ ଅନୁସାରେ, ଏମାନଙ୍କ ତରଫରୁ ଭୋଟର ଫର୍ମରେ ଦିଆଯାଇଥିବା ସୂଚନାରେ କିଛି ଅସଙ୍ଗତି ଦେଖାଯିବା ପରେ ନୋଟିସ୍ ଜାରି କରାଯାଇଛି । ଯାହାକୁ ନେଇ ଏବେ ରାଜନୀତି ଜୋର ଧରିବାରେ ଲାଗିଛି । ଘଟଣାକୁ ନେଇ କଂଗ୍ରେସ କେନ୍ଦ୍ର ସରକାର ଓ ନିର୍ବାଚନ ଆୟୋଗଙ୍କୁ ଟାର୍ଗେଟ କରିଛି ।
କଂଗ୍ରେସ ଅଧ୍ୟକ୍ଷ ମଲ୍ଲିକାର୍ଜୁନ ଖଡଗେ SIR ପ୍ରକ୍ରିୟାକୁ ନେଇ କେନ୍ଦ୍ର ସରକାର ଓ ନିର୍ବାଚନ ଆୟୋଗଙ୍କୁ ଟାର୍ଗେଟ କରିଛନ୍ତି । ସେ ସୋସିଆଲ ମିଡିଆରେ ଏକ ପୋଷ୍ଟ କରିଛନ୍ତି । ଏଥିରେ ସେ ଉଲ୍ଲେଖ କରିଛନ୍ତି, ବିହାରରୁ ଆରମ୍ଭ ହୋଇଥିବା SIR ଏବେ ଦିଲ୍ଲୀରେ ପହଞ୍ଚି ସାରିଛି । ଏବେ ଶାସକ ଦଳକୁ ଜଣାପଡୁଛି କଂଗ୍ରେସ କାହିଁକି ଏହି ପୂରା ପ୍ରକ୍ରିୟାକୁ ପ୍ରଥମ ଦିନରୁ ତ୍ରୁଟିପୂର୍ଣ୍ଣ କହୁଥିଲା ।
କେନ୍ଦ୍ର ସରକାରଙ୍କୁ ଟାର୍ଗେଟ କରି ଖଡଗେ କହିଛନ୍ତି, SIR ବିଜେପିର କେବଳ ଭୋଟ ଚୋରି କି ଲୋକତନ୍ତ୍ରକୁ ଶେଷ କରିବାର ଅସ୍ତ୍ର ନୁହେଁ, ଏହା ସମ୍ପୂର୍ଣ୍ଣ ତ୍ରୁଟିପୂର୍ଣ୍ଣ ପ୍ରକ୍ରିୟା ଓ ଏକ ବିଧ୍ବଂସକାରୀ ରାକ୍ଷସ ଯାହା ନିଜ ଲୋକଙ୍କୁ ବି ସଫାଉଛି ।
ଆଗକୁ ସେ କହିଛନ୍ତି, SIR ପ୍ରକ୍ରିୟା ବେଳେ ବିଜେପିର ଏକାଧିକ ବରିଷ୍ଠ ନେତାଙ୍କୁ ନୋଟିସ କରାଯାଇଛି । ଏଥିରେ ବିଜେପିର ବରିଷ୍ଠ ନେତା ଲାଲକୃଷ୍ଣ ଆଡଭାନୀ, ଏସ. ଜୟଶଙ୍କର, ଦିଲ୍ଲୀ ଉପରାଜ୍ୟପାଳ ତରନଜିତ ସିଂ ସନ୍ଧୁ, ରାଜ୍ୟସଭା ସାଂସଦ, ପୂର୍ବ କେନ୍ଦ୍ରମନ୍ତ୍ରୀ, ପୂର୍ବ ମୁଖ୍ୟମନ୍ତ୍ରୀ ବି ରହିଛନ୍ତି । ସ୍ଥିତି ଏମିତି ଯେ, ଭାରତ ରତ୍ନରେ ସମ୍ମାନିତ ବୈଜ୍ଞାନିକ ଏବଂ ପୂର୍ବତପ ସେନା ପ୍ରମୁଖଙ୍କୁ ମଧ୍ୟ ନୋଟିସ ଜାରି କରାଯାଇଛି ।
ପଶ୍ଚିମବଙ୍ଗକୁ ନେଇ ଖଡଗେ କହିଛନ୍ତି, ନାଁ କଟିଥିବା ଲୋକଙ୍କୁ ଭୋଟ ଦେବାରୁ ବଞ୍ଚିତ କରାଗଲା । ବର୍ତ୍ତମାନ ସୁଦ୍ଧା ୯୩ ପ୍ରତିଶତ ଲୋକ କରିଥିବା ଅଭିଯୋଗରେ ଜିତିଛନ୍ତି । ଅର୍ଥଶତ ୧ ଲକ୍ଷ ୧୩ ହଜାର ୯୪୩ ଲୋକଙ୍କୁ ପୁଣି ଥରେ ଭୋଟର ତାଲିକାରେ ସାମିଲ କରାଯାଇଛି । କେଉଁ ଆଧାରରେ ଏମାନଙ୍କ ଭୋଟ ଦେବାର ଅଧିକାରକୁ ଛଡ଼ାଇ ନିଆଯାଇଥିଲା ବୋଲି ସେ ପ୍ରଶ୍ନ କରିଛନ୍ତି ।
ଏହାସହ ନିର୍ବାଚନ ଆଯୋଗକୁ ମଧ୍ୟ ଖଡଗେ ଟାର୍ଗେଟ କରିଛନ୍ତି । ସେ କହିଛନ୍ତି, ନିର୍ବାଚନ ଆୟୋଗ ଅଧିକାରିକ ସ୍ତରରେ ପ୍ରାସ ବିଜ୍ଞପ୍ତି ଜାରି କରି VIP/marked electors ର କଥା କହୁଛନ୍ତି । ସେ ପଚାରିଛନ୍ତି, କ’ଣ ଭାରତର ୟୁନିର୍ଭସାଲ ଆଡଲ୍ଟ ଫ୍ରାନଚାଇଜରେ ମତଦାତାଙ୍କୁ ନେଇ କିଛି ସ୍ପେଶାଲ କାଟାଗୋରୀ ଅଛି କି ? ଅର୍ଥାତ ଭିଆଇପି ଭୋଟର ଏବଂ ସାଧାରଣ ଭୋଟର ।
ସେ କହିଛନ୍ତି, ଏହା କ’ଣ ସମ୍ବିଧାନ ଦେଇଥିବା ଗୋଟିଏ ଲୋକ, ଗୋଟିଏ ଭୋଟ ଓ ଗୋଟିଏ ଭେଲ୍ୟୁ ନୀତିା ଅବହେଳା ନୁହେଁ କି ? କ’ଣ ଭିଆଇପି ଭୋଟ ଅଧିକ ମୂଲ୍ୟବାନ ହୋଇଯାଇଛି ? ସେ କହିଛନ୍ତି, ଏସଆଇଆର ପୂର୍ବରୁ ତିନୋଟି ପର୍ଯ୍ୟାୟରେ ୩୧ ରାଜ୍ୟ ଓ କେନ୍ଦ୍ର ଶାସିତ ଅଞ୍ଚଳରେ ୧୩.୮ କୋଟି ଭୋଟରଙ୍କୁ ତାଲିକାରୁ ବାହାର କରି ଦିଆଗଲା । କାହା ଇଙ୍ଗିତରେ ନିର୍ବାଚନ ଆୟୋଗ ଚୁପ ରହିଥିଲା ? ନିର୍ବାଚନ ଆୟୋଗ ଭିଆଇପିଙ୍କ ପାଇଁ ସାମ୍ବାଦିକ ସମ୍ମିଳନୀ କରୁଥିବା ବେଳେ କୋଟି କୋଟି ସାଧାରଣ ଭୋଟରଙ୍କୁ ନେଇ କାହିଁକି କିଛି କହୁନାହିଁ ?
